الجزء 8

اها واختفت الجنية بعد تهديدا لي،،طبعا بقيت خاتي

احتمالات كتييييرة في انو ممكن تضرني بيها،لكن متأكد من

انو كل شي بامر من الله سبحانه وتعالي،،لكن بقي خوفي

كلو من انو الجنية دي توجه غضبها كلو علي ملاذ،،يااااالله

من البحصل لي بس لما افكر في الموضوع دا فكيف لو

حصل!!!! طوالي شلت تلفوني واتصلت علي مها أصغر

خالاتي،،وقلت ليها بأي طريقة تجيبي لي رقم ملاذ،،في

الاول جرجرتني وتحقيقات طويلة في انو عايز بالرقم

شنو،،طبعا شمارات منها وكدة مع احترامي لخالتي

طبعا،،لكن في النهاية اقنعتها انو قاصدها في موضوع

عاااجل جدا،،قالت لي اديني عشرة دقايق وبجيب ليك

الرقم،،وانا بقيت منتظر بعد حوالي نص ساعة جاتني رسالة

منها برقم ملاذ،،بعد الاندفاع داك كلو بقيت متردد اضرب

ليها ولا لا؟؟طيب لو ضربت وحكيت ليها حتخاف،،ولو

خليتا احتمال تتضرر اها اسوي شنو اسوي شنو يالله،،في

النهاية رسلت ليها رسالة السلام عليكم ملاذ،،كيفك،،انا

مهاب،،ودايرك في موضوع ضروري جدا جدا وموضوع

عاجل لو عندك زمن ارجعي لي بمسكول او رسالة وبقيت

منتظر لما رجعت لي برسالة وقمت طوالي اتصلت عليها

وجاني الصوت الملائكي .......

-اهلين مهاب،،خير مالك !!!

-كيفك ملاذ،،والله ما عارف ابدا ليك كيف وابدا ليك

بشنو ...

-اتفضل انا سامعاك ....

......وقمت حكيت ليها القصة بس فيها حبة اختلاق يعني

حذفت الجزء بتاع التهديد .....

-طيب يا مهاب وحتعمل شنو؟؟؟

-ما حأعمل حاجة بس كل المطلوب منك انك تتحصني

كويس ولو حصلت حاجة دعواتك بس ....

-حاجة زي شنو يا مهاب ليه عايز تقلقني عليك .....

-ياخ انا لما سمعت تقلقني عليك لما قلبي قال فرررر،،،لا لا

يا ملاذ ماف حاجة بس دعواتك ....

- حاضر ان شاء الله،،يلا خلي بالك من نفسك .....

- وانتي كمان يلا .....

..... كدة انتهيت من موضوع ملاذ،،بعد داك رقدت نمت

عادي جدا،،وصحيت الصباح شربت الشاي واتحركت علي

الجامعة،،بعد المحاضرة الاولي ما انتهت مشينا علي ماما

سميرة انا والشلة،،قاعدين في امان الله حسيت انو رجليني

كل ماليها ماشيات تقال زي خدرين كدة،،في الاول طنشت

الموضوع لكن بعد شوية بقيت ما حاسي بأي حاجة

نهائي،،حاولت اقيف مافي حاجة،،حركت رجليني مافي

حاجة ....

-يا جماعة انا ما شاعر برجلي .....

-نط ماهر،،كيف ما شاعر برجليك انت جنيت ولا شنو،،ورفع

رجلي وفكاها لقي مافي اي تفاعل او رد فعل لحركتو

دي،،يا مهاب انت جاد ولا دي حركات منك؟؟دا كان رد

رميساء لكلامي ....

-ياجماعة انا جادي اقسم بالله ما شاعر برجلي

نهائي،،،الجماعة شالوني شيل واقرب امجاد رفعوني

فيها،،ودوني المستشفي،،طواالي دخلوني علي الدكتور وبقو

منتظرين برة،،الدكتور بقي يسألني من بتين شعرت بالحالة

دي؟؟وقبل كدة حصلت ليك غايتو اسئلة كتيرة،،جاوبت

عليهو قال تمشو تعملو صورة،،مارقين من مكتب الدكتور

ناس البيت جو وامي دي تبكي ومتبشتنة بشاتن شديدة

خلاص انا لما حنيت عليها،،عملنا الصورة وبقينا

منتظرين،،في النهاية الدكتور قال الصورة نضيفة

جدا،،ومافي حاجة،،احتمال انها تكون حالة عرضية،،وكتب

لي مراهم وادوية وقال لو مافي تحسن اجي راجع .....

اها بعد كدة مشينا البيت،،وفي الطريق امي ضربت

لاخوانا واخواتها وابوي ضرب لاخوانو كلموهم

بالحاصل،،وصلنا البيت دخلوني غرفتي ورقدوني في

السرير،،والشلة طبعا لسع معاي،،البنات بقو مع امي،،وبقي

في الغرفة معاي ماهر .....

-تفتكر الجنية حقتك عندها دور في الحكاية دي؟؟؟

-ما تستبعد الكلام دا يا صاحبي لكن ما اظن لانو بالزعل

الشفتو منها ما اظن تعمل لي حاجة ساهلة زي دي ....

- ودي حاجة ساهلة يامهاب !!!!

-قدر اخف من قدر،،الايام حتكشف لو كان عندها علاقة ولا

لا ....

- الله يسهل وتقوم لينا بالسلامة ....

-دعواتكم بس عليك الله،،وياخ ما نتعبكم معانا الوقت

اتأخر سوق البنات ديل ودوهم عشان ما يتاخرو علي اهلهم

ويقلقو عليهم .....

- نمشي كيف نخليك ياخي؟؟انت حصلت قصرت مع واحد

فينا لما نخليك .....

-ما كدة لكن برضو بس عشان البنات والتاخير ما يخلق

ليهم مشكلة وكدة يا صاحبي ولا شنو .....

- التشوفو،،طيب نحنا حنمر عليك باكر،،يلا تصبح علي

خير ......

....سامع صوت امي وابوي بودعو فيهم برة،،لما جو

راجعين وامي دي صوتا معبور،،وانا عامل فيها ثابت لكن

من جوة بتقطع والله،،غايتو احساس صعب جدا،،انك تفقد

حاجة من جسمك،،يعني تاني انا حركة مافي !!!! الحمام تاني

يودوني ليهو !!!ما اقدر امشي !!!ما اقدر العب كورة !!!! اللهم

انا لا نسالك رد القضاء ولكن نسألك اللطف فيه ..

قبل ما انوم جات امي داخلة علي شايلة ليها شوربة في

كورية كدة سقتني وليها وبعد داك اخدت الدواء الكتبو لي

الدكتور،،وقرت لي قرآن ومشت ولسسه صوتها مبحوح من

اثر البكاء القبيل،،،خلتني براي مع آلامي البحس بيها بتقطع

في قلبي،،لو فضلت علي الحالة كل الاحلام والطموحات

البنيتا حتتهد زي الما كانت في يوم،،في النهاية غلب علي

النعاس ونمت،،،الصباح صحيت علي صوت جوطة في

البيت حاولت انزل من

السرير غلبني نهائي نسيت يوم امس وكأنو كان كابوس لكن

في النهاية اتأكدت من انو كان واقع فعلا،،ناديت اخوي جا

نزلني من السرير في العجلة عشان اطلع الحمام وآخد لي

دش،،قلت ليهو الجوطة البرة دي شنو؟؟؟قال لي ديل

اخوالنا واعمامنا جو قبل الشرقة،،ياااااالله انا الكنت

بستقبلن وبقيف في ضيافتن بالله الدنيا دي فيها جنس

حاجات لكن الحمد لله علي كل حال لا عتراض علي حكم

الله .......

..... مشيت استحميت وجيت راجع ليهم في السلام وحمدا

لله علي السلامة لما جابو ليهم الشاي والجبنة،،وبدت

الاسئلة ......

- انت يا مهاب اصلا الحكاية شنو؟؟؟

طبعا انا ما داير اجيب سيرة الجنية في الحكاية دي لانو

لسع ما اتأكدت من انو ليها دور في الكلام دا والله يا خال

اقدار بس نسال الله الشفاء .....

وشعرت بالحاجة دي بتين يا وليدي؟؟؟

-والله يا عمتي انتهيت من المحاضرة ومشيت برجلي لما

وصلنا محل الجبنة بعد شربت الجبنة شعرت بالخدر في

رجلي وشوية شوية فقدت الاحساس بيهن .....

-شفت بس يكون من الجبنة قالو ستات الشاي بيعملن فيها

المخدرات والحبوب بس طوالي نمشي للمرة دي .....

- لا لا يا عم الحكاية ما كدة نحنا بنعرف ماما سميرة دي

من دخلنا الجامعة وكانت موجودة من قبلينا،،ما حصل زول

اشتكي منها بالعكس انسانة طيبة شديد وبتساعد كتير من

الطلبة ....

-طيب لو شغل جن وعفاريت كيف الدكتور يقول مافي

حاجة؟؟؟؟

-والله يا حبوبة إسعاد مافي حاجة كان جن كان غيرو بضر

غير بامر من الله،،وبعدين الدكتور قال الحاجة دي ممكن

تكون حاجة عرضية ساكت نتيجة ضغوط حياتية او

غيرو ....

- شن شفت في الدنيا لمن يقول ليك ضغوط حياتية !!!!

- كيف شن شفت وفاة جدي علي دي ما ضغوط حياتية؟؟؟

- الله يرحمو ويغفر ليهو،،،وخبر جدي علي خفف وتيرة

الاسئلة علي وبقو يتونسو في ونساتهم المعروفة،،فلان

عرسو شهر كم وحاج فلان اشتري قطعة أرض،،وفلان داك

مشي الدهب واشتري ليهو بوكسي واسع حيعرس والتجارة

مشت معاهو،،ومجلس الحريم في فلانة عرسوها وفلانة

طلقوها،،اي اصلا تستاهل الطلاق مرة شنافة وما بتمسك

ليها بيت ......

......وقت الفطور جا وفطرنا وشربنا الشاي ،،وبدت الوفود

تجي في البيت،،شلة النادي والكورة ما قصرو كانو واقفين

وقفة جد اليوم دا يوزعو الشاي للناس طبعا يعني حاجة

كدة الزول ما يتخيلا الاهل داخلين ومارقين

والجيران،،واصحاب ابوي وصاحبات امي،،دا غير الناس

الجونا من بعيد،،يعني شلة النادي ما قصرو والله،،الله

يجزيهم خير .....

......بعد الضهر جوني دفعة الجامعة وكانت لمة في

البيت،،يعني لما تحصل ليك حاجة بتعرف قدرك عند

اصحابك،،بقيفو معاك وبساندوك،،جو شايلين معاهم دفاتر

المحاضرات وكل واحد متبرع بالشرح وبالكتابة ،،يعني غيرو

لي جو الكآبة الكنت داخل فيهو بونساتم وضحكاتم

والقفشات البتدخل مرة مرة في جو الونسة بعد داك بدو

يمشو واحد واحد لما فضل معاي ماهر .....

-اها يا حبيبنا حتعمل شنو؟؟؟

- في شنو؟؟لو الجامعة حاليا ما أظن أقدر استمر

فيها،،وشكلي حأجمد السنة دي،، الا لو حصلت

مستجدات .....

- انا ما قاصد الجامعة لكن براك جبت الكلام،،مافي سبب

يخليك تجمد السنة،،كل يوم بنجيك هنا ونشرح ليك

البفوتك ومرة مرة بجيك عديل اسوقك الجامعة منها تغير

جو ذاتو .....

-والله ما معروف يا ماهر ياخي .....

-شنو انت اول ولا آخر واحد يحصل ليهو كدة والله ما

تضيع السنة ساكت وبعدين نحن داخلين علي امتحانات

فشنو الكلام دا كدة ما بنفع .....

-ان شاء الله يحصل خير ،، خلاص بس عليك بالمحاضرات

جيبا لي وتاني ماك مسؤول تب .....

-اها جنيتك عندها دور في القصة دي؟؟؟

-وطي صوتك يابشر حبوبة إسعاد لوسمعت الكلام دا البيت

دا ببقي ليك بمبي .....

- هههههه ليه يعني !!!!

-دي عندها فوبيا من الجماعة ديل ولو عرفت اني كان

عندي جنية ممكن تلف بي لألف شيخ وفكي وكلهم بتاعين

دجل ،،يازول دي ما بتعرفا انت بس .....

- حبوبتك صعبة والله،،الله يكون في عونك،،،اها البتاعة

ديك ليها علاقة بالمرض دا ولا لع ؟؟؟؟

يتبع ....