الجزء 5

بعد عشرة يوم بالضبط وفي بينش من يينشات الجامعة

شفت ملاذ،،اي والله ملاذ شخصيا،،مشيت عليها بالخطوة

السريعة ،،لمن وصلتها وقعدت جنبها،،ولكن من نبرة الصوت

اتضح لي انو دي ما ملاذ،،سالتها انتي منو؟؟

- انا سماهر يا مهاب ....

- سماهر !!!!

-الجنية الملازماك،،افتكرتني ملاذ صاح؟؟

- ايوة افتكرتك ملاذ بس نبرة الصوت هي الخلتني

متردد .....

- لقيت انسب شكل ممكن أجيك بيهو في المرة الاولي هو

شكل ملاذ عشان تجيني انت بمجرد ما تشوفني ....

- وليه ما جيتي بالشكل البتظهري بيهو في أحلامي؟

- الشكل داك بعد ما توافق علي وجودي في حياتك حتي

اظهر بيهو قدام أي زول،،يعني لازم اسمع منك موافقة اننا

حنكون مع بعض .....

-طيب اسي حاليا في زول شايفك غيري !!ولا شايفك انا

براي؟؟؟

-خايف انو اكون ظاهرة ليك بس والناس يقولو مجنون

وبتكلم براهو !!!

- أكيد لو ظاهرة لي براي مشكلة ....

- دا واحد من عيوبكم يابشر انو بتشتغلو بكلام بعضكم

البعض،،وبتختو مليون خط قدام اي خطوة لازم

تخطوها .....

- لازم والا يكون الانسان كائن انطوائي ....

- لا غلط،اعمل الشايفو انت صاح بشرط انو يكون صاح

والكلام خليهو يضرب اقرب حيطة .....

-طيب ممكن اسألك سؤال؟؟

-اتفضل اصلا ظهرت ليك الليلة عشان تسأل عن كل حاجة

غايبة عنك .....

-انتي ليه اخترتيني انا بالذات !!!العالم دا مليان بشر ....

-مافي مخلوق بقدر يتحكم في قلبو .....

-طيب نواتج القلب لبني الجنس،،يعني بشر يحب

بشر،،والجن يحب الجن .....

- وليه جنية ما تحب ليها بشر؟؟

-ما متخيل الفكرة نهائي،بالرغم من اني سمعت عنها

كتير ....

-عادي جدا وحصلت كتير وزي ما قلت ليك لايمكن لاي

مخلوق ان يتحكم في قلبو .....

-طيب المطلوب مني شنو؟

- المطلوب انك تقابل الملك والملكة ....

-ليه؟؟

- عشان تثبت ليهم انو اختياري كان صاح وما كان وليد

لحظة طيش او انو مجرد احساس عابر حيزول سريع ....

- وانتي القال ليك احساسك دا ما وليد لحظة طيش منو؟؟

-الجني او الجنية لما يعشق بفضل مع معشوقو ما ببدلو ولو

بعد الفين سنة،،والحاجة المابتعرفا انو انا عمري حاليا 780

سنة ما عشقت غيرك ومنتظرة انك تبادلني نفس

الشعور ....

طيب والملكة والملكة ديل وين؟وحأقابلم كيف وبياتو

صفة؟؟؟

-الملك والملكة في مملكة الجن،وحتقابلم هناك وبصفتك

زوجي ....

- وطيب والكلام دا بتين؟؟

-لما اتأكد من حقيقة مشاعرك تجاهي بظهر ليك بنفس

الشكل الظهرت ليك بيهو في احلامك وهنا انت تكون جاهز

لانك تمشي معاي وتقابل الملك والملكة .......

......واختفت الجنية كأنها لم تكن قاعدة معاي،،وبقيت

محتار في امري هل اطاوعا في الحاجة دي واكفي شرها

ولا اقيف ضدها واستحمل البحصل لي،،مع انو الشكل

الظهرت لي بيهو جميييلة حد الادهاش والله،،يعني لو

عملت ليها زفاف ممكن أشغل الراي العام لسنين ههههه

تقول لي هناية ديك،،لكن لنفترض انو اتزوجتها اطفالنا

حيكونو كيف؟؟بالله دا كلام دا غايتو ربنا يكون العون

ويعدي الموضوع دا علي،،في لحظة التفكير دي ضرب لي

جدي ...

-اوووو جدي العزيز المحترم ...

- كيف حالك يا مهاب يا ولدي ....

-تمام والله الحمد لله،،كيف انت وحاجة إسعاد؟

-تمام نحمد الله،،انت كيفنك وعامل كيف ....

- انا خليها بالنية بس ياجدي ....

-مالك احكي لي الحاصل شنو؟؟وحكيت لجدي كل الحصل

قبل لحظات دا بكل التفاصيل المملة ديك،،جدي دا سكت

مسافة وقال لي ياولدي انت عارف انت حتمر بتجربة غايتو

وحتطلع منها بحاجات تستفيد منها لقدام بس فكر في

موضوع جنيتك دي من كل النواحي واكيد حتطلع ليك

بفهم تقدر تواصل بيهو المسيرة البديتا دي .....

- الله يديك العافي ياجدي وزي ما قلت كدي بفكر في

الموضوع دا من كل النواحي ....

-يلا تحياتي لكل ناس البيت ....

-توصل تحياتك ياجدي وسلم علي الحلة كللللها .....

-سمح بسلم ليك عليها ههههه ......

كدة انا عرفت الجنية دي عايزة مني شنو،وعايزاني أعمل

شنو يعني يوم أحبها حتظهر لي والخوف تظهر لي قبل

احبها،،يلا احكي ليكم قصة حصلت لي بعدة ايام من لقائي

بسماهر الجنية دي،،كنت متمني اكون رسام لكن كل ما

ارسم لي حاجة اصلا ما بتظبط معاي نهائي يعني لازم

يكون في حاجة ناقصة في الرسومات بتاعتي حتي لقيت

تعليقات كتيرة من اصحابي من نوع جلي حنك الرسم دا يا

اصلي،،وياخ انت ذاتو شكلك ما بتاع رسمما عارف ليه

الرسام مربوط بشكل معين يعني تكون مربي شعر ولابس

هدوم ملونة ومزركشة كدة،اها يوم من ذات الايام طلعت

لي في راسي ومشيت غرفتي وطلعت دفتر الرسومات

واندمجت وبقيت ارسم ،،،حتي اني نسيت العالم الخارجي

دا واندمجت بكل احاسيسي في كراسة الرسم لغاية ما

انتهيت وطلعت الرسمة كاملة ولاول مرة في حياتي أرسم

بالشكل دا لغاية ما انتبهت انو المرسومة دي سماهر

الجنية !!!!!اها يا جماعة الموضوع دا شغل يدي ولا عندو

علاقة بسماهر الجنية؟؟؟لكن رفعت من معنوياتي وقلت انو

الرسمة دي من شغلي الخاص الجنية دي ماعندها اي علاقة

بيهو وفرحت بيها جدا،،طلعت الحوش لقيت ابوي قاعد

مستمخ وبقرا

ليهو في جريدة قلت ليهو بالله اديني رايك يا حاج وشوف

الشغل الخام دا،،ابوي دا دقق مساااااافة في الصورة وقال

لي والله ما شاء الله يا مهاب في تطور كبير وملحوظ في

رسوماتك يعني دي بتفرق كتير من الرسومات القبليها لكن

هل الرسمة دي مستندة علي حقيقة ام خيال؟؟

-طبعا اترددت لكن في النهاية قلت ليهو حقيقة لكن شفتها

مرة واحدة ....

-اقول ليك حاجة بت بالجمال دا لايمكن انهت تكون

موجودة وانت بتقول انك شفتها !!!

- كيف يعني لا يمكن تكون موجودة ياحاج انت ما بتشوف

التلفزيون ولا شنو ؟؟

-بشوف التلفزيون لكن دي بالتأكيد لايمكن تكون

موجودة .....

-ما عارف اقنعك كيف لكن لو لاقتني تاني بكلمك تجي

تشوفا ....

-اجي اشوفا !!! عشان امك تعمل لينا سين وجيم هههه انت

بتهظر ولا ما عارف امك ......

- خلاص خليتك ياحاج يلا ماشي انوم عشان باكر عندي

جامعة بدري .......

......الصبح حاضر والجامعة جاك زول وطبعا شايل كراسة

الرسم بتاعتي ومبسوط وماشي احشش ليك بالشباب الكانو

ما مقدرين الموهبة المدفونة دي،،والبقولو لي جلي الحنك

دا يا اصلي،،الساعة 12 مشينا علي ماما سميرة ومع الجبنة

والونسات طلعت ليهم كراسة الرسم،يلا قبل ما اوريكم

الحصل شنو رايكم شنو تتعرفو علي الشلة بتاعتي؟؟؟

* ماهر اكتر زول مثقف في الشلة دي ما ثقافة بتاعة روايات

بس،،،يعني دا موسوعة شاملة اي كتاب اي حاجة نزلت

ممكن تكون فيها ذرة ثقافة بتلقاها عندو .....

* سلافة ويا سلافة الفن دي زولة ماهر والحب الدفين طبعا

طوالي في حالة مشاكل لكن بحبو بعض جدا ولما تزعل من

ماهر بتقول لينا دا كائن متماهي ساكت ما عارف متماهي

دي شنو ذاتو .....

* خالد ضابط ايقاع الشلة والدنمو المحرك للقعدات

والتجمعات .....

* رميساء صاحبة الدم الخفيف يعني دي نحنا بنعتبرا

صاحبنا اكتر من انها صاحبتنا يعني ماعندها قشة مرة .....

-عمار فيلسوف الشلة من الفسيخ يطلع ليك شربات زول

هادي لكن مرات بقلب وش يحسسك انو هتلر

شخصيا .......

-هنادي أجمل وحدة في الشلة ويمكن كمان اجمل وحدة

في الجامعة غايتو في حاجة بينا وبين عمار لكن ما ظاهرة

لينا او يمكن دا الحب الخفي البقولو !!!!

.... دي شلتي بكل بساطة يلا طلعت ليهم الرسمة طبعا

انبهرو انبهار عجيب جدا بالشكل وبدقة الرسم ولما قلت

ليهم دي رسمتها انا ما صدقو في البداية لكن في النهاية

صدقو واقتنعو،،قبل ما يردو كويس كل واحد طلع تلفونو

وصور الرسمة دي وكلهم اتفقو علي حاجة وحدة انو بت

بالشكل دا لايمكن انها تكون موجودة حتي بعد ما أكدت

ليهم انو الصورة ما خيال وحقيقية برضو قالو لا دي مجرد

خيال وحتي الخيال لايمكن يصل للدرجة دي،،بعد رجعت

البيت اتفاجأت بالصورة منشورة في الفيس بوك وعاملة

ضجة كبيرة خلاص يعني حتي لو كانت الموناليزا ماكان

عملت الضجة دي لكن زي ما بقولو الزيط من الله والفزع

كوراك .....

...... اليوم داك انا كنت أشهر زول في دفعتنا وفي

الحلة،،اي زول يلاقيني يعلق لي علي الرسمة والابداع فيها

لمن حسيت بروحي انو بقيت أشهر رسام في العالم لكن دا

ما يمنع انو انا كنت حاسس انو دا ما شغلي والجنية دي

ليها علاقة بالموضوع دا برغم نكراني الظاهري للموضوع دا

لكن شكلو مافي مفر من سماهر وحكاوي سماهر

دي،،النشوف آخرتا شنو .....

......قبل المساء بشوية كدة جا تلفون لابوي انو جدي علي

تعب وجايبنو جاين الخرطوم،،تعب مالو الله أعلم بس

جايبنو الخرطوم،،وامي دي تشيل وتبكي ونحنا ذاتو ما

عرفنا نعمل معاها شنو،،غايتو قدر القدرنا عليهو انو اتجهزنا

ومشينا عشان نرجاهم قدام المستشفي وبقينا متابعين

معاهم بالتلفون،،لغاية ما وصلونا ودخلنا جدي

المستشفي،وبدات الفحوصات والانتظار الممل،،ونوع امشو

جيبو الفحص دا وامشو المعمل دا،،غايتو كانت لحظات

عصيبة لغاية ما جانا الدكتور وقال انو لحقناهو

سريع،،الناس دي شالت نفسها وختتو جبل بتاع هم وانزاح

من فوق صدورنا الحمد لله،،لكن الزيارة ممنوعة عنو وبقينا

منتظرين شمس باكر تشرق ونشوف الحاصل شنو ربنا يسهل

ويبعد العوارض ان شاء الله .....

يتبع ..