الجزء 6

بقينا مساهرين الليل انا وخالي والبقية أبوي ساقن

عشان يرتاحو في البيت والصباح بجونا،، في الاول ما

وافقو لكن ابوي اقنعن انو يمشو يرتاحو في البيت بعد

التعب والارهاق الحصل عليهم،وبقينا في المستشفي انا

وخالي،قمت سالتو انت جدي دا مالو الحصل عليهو شنو

ياخالي ونحنا خليناهو ما شاء الله نصيح تب .....

-والله يا مهاب جدك دا اصلا عندو القلب وطبعا الموضوع

دا مافي زول عارفو غيري،،يلا انا الصباح مرقت عندي

شغلة في السوق مشيت انتهي منها مع تجار كدي ،، هو

قام مشي الحواشة وانا مافي وانت عارف جدك اصلو ما

بقعد ساكت بدا يحفر هنا ويدفن هنا ما خلا ليهو حاجة لما

تعب انا لما وصلت سألت منو قالو مرق قلبي أكلني عرفتو

مشي الحواشة لما لحقتو هناك كان خلاص قرب يلحق الحد

اقرب مستوصف لحقتو ليهو عملو ليهو اسعافات وطوالي

لحقنا بيهو هنا .....

-بالله طول الزمن دا في علاقتي مع جدي ما حكي لي عن

مرض قلبو دا .....

-يا مهاب اصلا ابوي ما بعرف يشكي ودا المعزبنا يعني لو

حس بأي ألم بضغط علي نفسو وبقول بروح براهو،،ربك بس

يستر ....

- ربنا يشفيهو ان شاء الله .....

.... في النهاية غلبنا النعاس نمنا في المساطب البرة

المستشفي لغاية مالشمس شرقت الجماعة جونا شايلين

الشاي والفطور معاهم،،الدكتور قال لينا ممكن يدخل عليهو

واحد بس حاليا لانو حالتو ما تسمح ليهو يتكلم كتير،دخل

ليهو أكبر اخوالي،ومشي قعد معاهو يمكن ربع ساعة بس

ويمكن ما تماها،،اها خير ان شاء الله؟؟ قال بتكلم معاهو

تعب اسع الدكاترة معاهو جوة الله يجيب العواقب

سليمة،،قاعدين كدة جوني الشلة بتاعين الجامعة وكفرو لينا

وسألو من جدي وريناهم انو بعد الدكاترة قالو تمام تاني

تعب واسع الدكاترة معاهو جوة ،،بقينا منتظرين ومقلقين

وندعو لله انو يكشف الغمة ويزح الهم من فوقنا،،بعد مرور

نص ساعة جانا دكتور وقال لينا البقاء لله ........

..... أصعب لحظة ممكن تمر علي انا شخصيا،،أقرب زول

لي في الدنيا يفوت !!! إنا لله وانا إليه راجعون،،في اللحظة

ديك حسيت بأنو خلاص الدنيا فقدت الطعم وفقدت

النكهة،،انا فقدت كل شي جميل او فقدت الاحساس بأي

حاجة،،امي وحاجة إسعاد كانن في حالة لا يعلم بيها الا

الله،،اما ابوي وخالي الكبير مشو عشان يتمو باقي

الاجراءات ونشيل الجثمان ونمشي الحلة،،أنا طول المسافة

مابين الخرطوم والجزيرة بستحضر في الذكريات وفي آخر

مكالمة،،لا حول ولا قوة الا بالله العلي العظيم،،وصلنا الحلة

قريب الساعة 11 وكان هناك خلق خلق بكمية مبالغة،،في

ناس لأول مرة اشوفن حتي الحزن بادي في

ملامحن،،الصغير والكبير،الرجال والحريم،،كان احساس

رهيب وانو كل الجموع دي جات تودع معاك زول غالي

عليك وعليهم،ما غالي علي ربو لكن الفقد عظيم

وموجع،،بعد داك مشينا سترنا الجثمان،وجينا راجعين

لاستقبال المعزين،،اما امي فكانت في حالة تاني،،حتي انهم

دخلوها في غرفة ومنعو منها الناس لانها ما كانت حاسة

بأي شي،،والحلة كلها كانت واقفة صف في عزاء جدي علي

دلالة علي مكانتو بيناتن،،أخدنا في العزاء قريب 15 يوم

لغاية ما كل الناس جات عزت وبعد كدة رجعنا الخرطوم

والمرة دي رجعتنا تفرق عن أي رجعة قبليها،،زمان كنا

بنمشي الخرطوم بأشواق اننا نرجع ونلقي البيت ملان بجدي

علي،اما الان فقدنا الاحساس دا نهائي .....

وصلنا البيت زول يتكلم مع التاني مافي،،كل واحد

مشي علي غرفتو،،ما طلعنا الا لما امي نادتنا

للغداء،وصامتين في النهاية ابوي ادانا محاضرة عن الموت

والحياة وانو لابد ان يستمر كل شئ فلو كانت الحياة

حتتوقف بموت زول فكان اولي انها تتوقف بموت رسولنا

الكريم عليه أفضل الصلاة واتم التسليم،،،كانت محاضرة

طويلة غايتو مرقتنا من جو الحزن الكنا عايشين فيهو

دا،،بعد الغدا دخلت غرفتي وبديت اقرا لي في رواية يمكن

من سنين ما فتحت لي رواية والليلة الجد شنو الله

أعلم،،لغاية ما غلبني النعاس ونمت وانا بقرأ في الرواية

دي ......

.....وظهرت الجنية تاني بعد ما قلت خلاص إختفت من

حياتي،،وقالت لي يعني بموت جدك عايز الدنيا تقيف؟؟؟

- دا الاحساس الجاني يا سماهر ....

- يعني متذكر إسمي؟؟

-ما عارف ليه بتديني احساس انك بشرية من خلال ردودك

وكلامك ....

- وليه لا احتكيت بيهم لمئات السنين وبعرف كيف بتتكلمو

وكيف بتتعاملو في كل مناحي حياتكم .....

-والليلة الجد شنو؟؟مش قلتي حتختفي من حياتي لغاية ما

أفكر فيك ....

- ايوة،ودا الحصل،،انك لما نمت فكرت في الجنية

بتاعتك،،وعشان كدة انا ظهرت ليك .....

-منو القال ليك فكرت فيك؟؟

- انت القلت لي،انا كل حواسي مرتبطة بيك،يعني مجرد

احساس منك بصلني وبظهر ليك قبل حتي عيونك

ترمش .....

-طيب والحيحصل شنو حاليا .....

-الحيحصل باكر بنتظرك في نفس المكان مجهزة ليك برنامج

جميل حيغير من جو الحزن الانت عايش فيهو دا .....

-طيب نشوف بس ما يكون جو جني .....

- وليه ما يكون جو جني،،وبالمناسبة بطل تحتقر عالمنا،،لانو

نحنا بنعيش في عالم انضف وأجمل والطف من عالمكم

دا،،وعالمنا في

قمة التطور وعالمكم في قمة التخلف ....

-المحاضرة دي كلها عشان كلمة جني،،طيب يا ستي انا

آسف وباكر حنشوف اليحصل شنو يلا باي .....

-باي ......

الصباح صحيت واديت الفرض وجيت علي الحاجة ياسلام

لما تصبح تلقي الحاجة مجهزة ليك الشاي نعمة والله اللهم

احفظ كل الامهات العلي قيد الحياة،،وارحم كل الاموات

يارب،بعد شربت الشاي وبعديهو كباية قهوة لبست هدومي

واتوكلت علي الجامعة،زحمة بتاعة مواصلات مع

الصباح،بلد ياخي تقول كل يوم بجيبو فيها مليون نفر زيادة

غايتو لو استمرينا بالحالة دي تاني الواحد محل يقيف ما

يلقاهو،اتوكلت قاصد الجامعة غايتو دنيا توديني شمال

ويمين،،موت جدي والجنية الملازماني دي وبرنامج الليلة

المعاها دا ما معروف ذاتو يحصل شنو يعني راس جايط

وفكر مشتت،والكمساري يطقطق ساكت،ناس يدوهو وناس

يشاكلوهو الخلق شايلة اخلاقي وماشي،،وصلت الجامعة

واتلفت زي الرايحة لي حاجة،،المحاضرة الاولي عدت ولأول

مرة اكون في محاضرة وما فاهم الحاصل،،بعد داك مشينا

علي الفطور وكالمعتاد البوش او الفول حبيب الشعب عن

عم عثمان الفوال،عندو فول غريب جدا يعني تاكل منو

لازم تاني تجي راجع،،بعد الفطور الشاي عند ماما

سميرة،،وبعد داك اتفرقنا كل زول مشي علي اتجاه لغاية ما

المحاضرة البعديها تبدا،،وظهرت سماهر او الجنيه ياخ انا

لما قلبي دا قال شحححح،،وحسيت بأنو شوية كدة ويجي

مارق مابين ضلوعي،،مشيت عليها وقعدت جنبها،،قالت لي

امسك يديني وغممممت عيونك،،عملت زي ما طلبت

مني،،ما مرت ثواني لقيت نفسي في مكان تاني وجو تاني

لكن لو قلت ليكم يا صدقتو يا ماصدقتو وليكم الحق

طبعا،،لقيت نفسي في مكان اخضر خضرة ذاتا ما طبيعية

وفي حاجة كدة تشبه النهر شاقة الخضرة دي،،واشجار من

كل نوع يعني لو زول قعد في المكان دا خمسة دقائق بس

اي مرض فيهو يروح،،سألتها قلت ليها نحن وين؟؟؟

نحنا في أصغر مملكة من ممالك الجن .....

-دي مملكة جن؟؟؟

- ايوة مملكة جن ....

-مملكة جن بالجد ولا أنا في الجامعة والكلام دا مجرد

خداع بصري؟؟

- لا ما خداع بصري ولا حاجة،،نحنا انتقلنا من عالمكم لعالمنا

نحنا .....

- وعالمكم كلو بالجمال دا؟؟ولا بس المملكة دي هي الوحيدة

الفيها خضرة وجمال؟؟؟

- قلت ليك قبل كدة انو نحنا عالمنا متفوق علي عالمكم

بالكثير،،وليس من شاهد كمن سمع .....

- أكيد طبعا ....

- انا الليلة حأديك نزهة في اقل الممالك العندنا عشان تعرف

انو انتو أقل مننا في أي حاجة،،وانو نحنا سبقناكم بالتطور

في كافة السبل .....

.....خلال اليوم دا لفينا في كل حتة في المملكة دي

والعجبني التنظيم والتخطيط في كل حاجة،،يعني الفرق

في شكل المباني حقتن تختلف اختلاف كبير من

مبانينا،،فمبانيهم اما من الزمرد والالماس او الذهب،،ونحنا

ياهو الطين دا،،شعب مسالم جدا او الي حد علمي حتي

الآن،،كل الكنت بقراهو عن عالم الجن والعفاريت لقيت فيهو

إختلاف كبير جدا،يعني لايمكن لجن انو يأذي بشر ما لم

ينتهك البشر خصوصياتهم ،، ومعروف عننا كبشر انتهاك

الحقوق والخصوصية فيما بينا ناهيك عن انو ننتهك باقي

الخصوصيات للعوالم والكائنات الموجودة معانا،،بعد نهاية

النزهة دي رجعت لعالم البشر بنفس الاسلوب الجيت فيهو

لعالم الجن،،في لمحة بصر كنت في الجامعة في نفس

المكان،،وكانت آخر كلمات الجنية لي في النزهة دي انو

إقترب لقاء الملك والملكة وكون مستعد،،لكن مستعد كيف

الله أعلم .....

..... بعد داك حصلت آخر محاضرة في اليوم داك،،وركبت

المواصلات متجه علي البيت،بشعور واحساس غير الكنت

فيهو الصباح،،شعور انك تمشي مملكة من ممالك الجن

وتشوف الحاصل هناك،وتجي راجع من مملكة الجن بدون

ما تتأذي،،شعور انك تشوف جمال وترتيب غير موجود في

دنيا البشر،،لكن تظل رحلة ممتعة برغم المخاطر ......

وصلت البيت مبسوط او علي الاقل غيرت من جو الحزن

الكنت عايش فيهو دخلت غيرت هدومي وأكلت لي لقمة

ومشيت علي التمرين،،طبعا ياهو الدافوري المعروف،،قريب

المغرب التمرين انتهي الشباب قالو نمشي شارع النيل نعمل

لينا برنامج وونسات ونجي راجعين،،اتفقنا نمشي بيوتنا

نستحم ونغير ونتحرك علي شارع النيل بعد داك .....

.......شارع النيل وما ادراك ما شارع النيل كل شئ

متوفر،،كل فئات الناس متواجدة لكن الاغلب شباب،،اما

شباب قاعدين يغنو ويتونسو او اتنين بحبو في بعض

وعايشين الدور الرومانسي في ابهي صورو،،طلبنا جبنة

وقعدنا وهاك يالونسة والضحك،،كنا منبسطين آخر انبساط

وليه ما ننبسط شباب في قمة الحيوية والنشاط لا هموم لا

مشاكل لا متطلبات أسرية لا غيرو زي ما بقولو لا ورانا

محمد ولا فاطمة ولا ورانا البرضعو،،غايتو السودان دا فيهو

كمية بتاعة امثال وحكم،،لكن بعد دا مافي زول شغال

بالحكم دي،،الناس دايشة ساكت ......

......رجعنا البيت قريب الساعة وحدة صباحا،،دخلت البيت

لقيت ليك ناس بيتنا في سابع نومة طوالي دخلت الغرفة

ومشيت علي صندوق جدي الغالي وعاينت للكتب داير

اعزل،،طبعا زحيت كتاب شمس المعارف بعيد بعد تحذير

الجنية،،وختيت خطيين كبار تحت كتاب السحر

الاسود،ليه؟؟لانو دا لس

ع ما وصلت مرحلتو وبجي اوريكم الكتاب دا فيهو شنز

والبحصل شنو لانو يمكن يكون من اخطر الكتب الموجودة

في الدنيا دي،،وكتاب ممنوع في عدد من الدول من بينها

السودان،،يعني لو جيت شايلو معاك من برة في المطار

بقبضو منك زيو وزي المخدرات،يلا بقت المفاضلة بين

الكتابين الفاضلين وقمت اخترت كتاب حكايات الجان،،كتاب

ظريف للناس الجديدة لكن كان بالنسبة لي عبارة عن حاجة

عادية جدا النديكم نبذة عنو وبعد داك بمشي اقراهو ......

..... الكتاب بحكي عن قصص لناس مع الجن،،مكتوب

بطريقة روائية شعبية،وممكن يكون فيها الصحيح وفيها

الخيالي فقط لاضافة نكهة للكتاب ككل،،يعني بالنسبة لزول

مبتدئ ممكن يكون نافع لكن بالنسبة لزول متبحر ما اظن

يفيدو او يضيف ليهو حاجة في بحثو،،والكتاب في فهمو

العام بيحاول يجيب اجابة لسؤال في ذهن الجميع حصل

شفت جن قبل كدة؟؟وبجيب روايات لاشخاص شافو جن او

استحضرو جن قبل كدة ولكن زي ما قلت ليكم في الغالب

العام يعتبر عمل روائي ما كتاب بالمفهوم الصحيح .......

.....حوالي الساعة 3 صباحا انتهيت من كتاب حكايات

الجان دا بالرغم من اني ما استفدت شي كبير منو لكن

روايات من شاهدو الجن كانت شبه مفيدة في التعامل

معاهم،،بعد داك رقدت نمت،،ما صحيت الا الساعة تسعة

صباحا وطبعا متأخر عن الجامعة الشغال فيها اول محاضرة

الساعة تمنية،،يعني المحاضرة الاولي راحت علي فلازم

ألحق المحاضرة التانية في باقي الزمن دا،،سرعة استحميت

ولبست هدومي وعلي الجامعة طوالي،،اقرب كريز للسوق

العربي،،لحقت المحاضرة في آخر دقيقة،،بعد المحاضرة

انتهت اتلميت علي الشلة وكان اول سؤال ليهم امس

مشيت وين؟؟؟؟طبعا مافي اجابة او الاجابة الموجودة قد

لاتكون مقنعة بالنسبة ليهم،،قلت ليهم يلا نشرب لينا

جبنة،،وبيني وبين نفسي قلت الواحد في المسافة دي

يشوف ليهو سبب للاختفاء غير موضوع الجنية دا،،وصلنا

هناك محل مام

ا سميرة وجابت لينا الجبنة،حاولت أغير

الموضوع قلت ليهم شايف الرسمة عاملة شغل في

الفيس،،والحمد لله نجح الموضوع ....

-آي والله يا مهاب تعرف انا صاحباتي كلهم قالن دايرات

يتعرفن عليك ،، وانو حابات انو ترمسن لكن تكون رسمة

بنفس الدقة دي ......

- جدا يا رميساء اعتبري الموضوع مقضي،،نحنا عندنا كم

رميساء؟؟

- انا عارفة عندكم كم؟؟انت يا مهاب عامل فيها مسكين لكن

زي ما بقولو ياما تحت السواهي دواهي .....

-ههههههه معقولة بس انا دواهي يا رميساء شنو يا ماهر ما

تحضرنا في الكلام دا .....

-والله يا مهاب انا افتكر انو نحنا كمجتمع ذكوري عندنا

نزعة انو يكون في دواهي ودواهي كبيرة جدا عشان كدة

ممكن كلام رميساء يكون صحيح بالمفهوم العام لمجتمعنا

دا .....

-وانا القلت انك حتنصفني يا مهور لكن اصلك ما تبرد ليك

بطن .......

-وبعدين تعال هنا شنو يعني ترسم اصحاب رميساء اول

شي أرسم اصحابك ،،،وكان الزاد ما كفي اهل البيت يحرم

علي الجيران .....

-حااااضر يا هنادي،،تمام نشوف يوم الجامعة مافيها

موضوع ،، نمشي كلنا نقعد لينا في حتة هادية واقعد ارسم

اشكالكم دي،،غايتو بحاول اطلع من الفسيخ شربات ....

- ههههه فسيخ ياسيدي طيب ما حتلقي زينا ..

يتبع ...