الجزء 11
= ما بهمني اي شيء بخصو الراجل دا .
فهد : حتى لو قولت ليك انو كلامي بخص حياتو القديمه مع امك ؟
بزهج : انت ما حا تمشي صاح ؟
فهد : اديني فرصه اثبت ليك نفسي يا ناردين .
= قدامك خمسه دقايق ما حا تزيد ثانيه !
فهد بسعادة : ما محتاج اكتر من كدا اساسآ ، انزلي خلينا نمشي بعربيتي ..
= خمسه دقايق هنا من محلك دا ..
فهد : اوكي .. لفى الناحيه التانيه فتح الباب و ركب : علفكره ابوك اشترى عربيتك دي
مني ..
= مرة دقيقه ...
فهد بهزة راس : اوكي ، ناردين ابوك ما بيدو ساب امك بإرادتو ، نجوان فتنت بيناتهم
خلتهم يطلقوا و عرستو .. عاينتا ليهو مستنيه يكمل !
فهد : دي المعلومه العرفتها و حبيت اطلعك عليها يمكن تفيدك ..
= خلصت ؟ هز لي راسو ايجابآ
اشرت ليهو بعيوني ينزل
فهد : فضل لي دقيقه
= الدقائق الاديتك ليها اديتك ليها عشان فكرتا انو كلامك مفيد بس انت ما جبتا شيء
جديد دا كلو انا عارفه ..
فهد : آسف فكرتو حايفيدك انا اول ما سمعتا المعلومه جيت عليك جري بس عشان
ابين ليك انو نيتي صافيه اتجاهك .
= اممم نيتك وصلت اتفضل ..
فهد : طيب .. نزل مشى اتجاه عربيتو بغيظ .. دورتا مشيت لمن قربتا للبيت العربيه
وقفت ! نزلت اشوف في شنو لقيت الدخان طالع منها فتحتا غطاء المحرك كان ولعان ..
وقفتا مسافه لبين ما وقف عمو كبير كدا
العم : الا تجيبي مكنيكي يصلحه ليك شكلو المحرك حرق..
= يالله دا ما وقتو ابدآ اجيب واحد من وين هسا ؟ ..
العم : لو عندي حبل كنت كرتا ليك بعربيتي بس بقدر بوصلك لغايه بيتكم اذا حابه !
= لا تسلم ماعايزه اتعبك معاي + ما بقدر اخليها هنا و امش !
العم : لكن يا بتي الواطه داخل على اليل ما ينفع تقعدي هنا برك اولاد الحرام كتار
المنطقه دي كعبه !
جان صوت : تسلم انت بتقدر تمشي انا حا اهتم بالباقي .. ختى يدو في كتف العم كان
فهد !
فهد : كتر خيرك انا خط ...
قاطعتوا : انت شنو الجابك ؟
فهد : شوفتك واقفه قولن اشوف في شنو ؟ اتفضلي اوصلك بيتكم و ان كان العربيه
اتصلتا لواحد من الشباب هسا بجي ياخده اديني المفتاح ..
= لا شكرا ودعمتي مكانيكي بتصرف هو ..
فهد : بكوت تعبان ما تزعجيهو تعالي ما تعاندي المكان خطر
اديتو المفتاح اترسمت على شفاها ابتسامه نصر : صاح كلامك بكون يدوب جا داخل
البيت مافي داعي اتعبو وبمانو العربيه اساسآ من معرضك يبقى اولى تتصلح في
الورشه و انا حا امر عليها الصباح احاسبك .. يلا عمو عشان توصلني .. ركبت معاهوو
خليت فهد واقف .. وصلني شكرتو و نزلتا
نجوان : دا منو الوصلك دا ؟؟
رفعتا حاجبي وميلتها بجنبه : زول عندو رجلين ويدين وعيون ونخرين
نجوان : تصدقي قايلاهو حيوان ؟
= معليش كل يرى الاخر بعينه .
نجوان : ح اكلمك ليكي ابوك يدقكك
ضحكتها و قولت ليها بإستهبال : تحبي انادي ليكي ؟؟
نجوان بنفرزه : شايفه لسانك طول ولازمو قص !
قولت ليها بدلع : ماااااا يطول براحتو .. ليكي شوق في حاجه ؟؟
نجوان : ح تعرسي فهد يا ناردين و رجلك فوق رقبتك ولو ما عرستيهو لكون ..
قاطعتها بعصبيه : هيييي هااا انتي .. وطفرتجتا بأصابعي في وشها : انتي شايفه
كويس ؟؟ منتبه للواقفه قداااامك دي منو ؟؟ انا ما ناردين العمرها عشره سنين الكنتي
بتمنعي منها الاكل وتحبسيها في المخزن بالساعات .. ولا الشافعه الكنتي بتخليها تبكي
من مرضها وتعطف عليها الخدامه بالدس .. ولا الكنتي بتمدي يدك عليها وترميها في
البرد برا البيت بعد ابوها ينوم تتلج لغاية الصباح .. رفعت صوتي : انا البت قطعت
اصبع اخوكي لمن حاول يتحرش بيها قدام عيونك ،، والبت الكشحت فيكي المويه
الحارة وقت كنتي عايزه تشوهي ليها وشها .. عرفتي منو ؟؟ انا ما بتجبر انا الجبورت
نفسو ، لمي لسانك قبل اقطعو ليك ..
نجوان بعصبيه وصوت عالي : انتي قايله روحك بتخوفيني بالكلمتين ديل ؟؟
رفعت صوتي اعلى منها : خفضي صوتك وانتي بتتكلمي معاي ..
نجوان : لالا كدا كتير انتي لازمك تربيه من اول وجديد .. رفعت يدها ونزلتا تضربني
كف مسكت يدها قبل تصلني وباليد التانيه رجعتو ليها ، نجوان رفعت راسه وعيونها
شرار قربت مني بعصبيه عشان تخنقني غرزت اظافره في رقبتي وحاولتا اقاويها وابعد
يدنها عني بكل قوتي .. بعد شافت مجدي جاي علينا نجوان جرحت روحها بسرعه في
يدها وبقت ماسكه يدها وبتبكي
مجدي : في شنو يا جماعه مالكم ؟؟
نجوان مدت ليهو يدها المجروحه وهي بتبكي بإستهبال : شوف يا مجدي بتك عملت
فيني شنو ؟؟ دا كلو عشان سألتها الوصلك منو ؟؟ ما من حقي أسالها يعني ؟؟ اهىء
اهىء اهىء اهىء ..
حدرتا ليها برفعت حاجب : يا شيخه ... ؟
مجدي بعصبيه خفيفه : دا شنو العملتي دا ؟؟اعتذري منها فورآ !!
هزيت راسي بيأس و دخلت البيت بسرعه متوقعه منو شنو من خروف مرتو ؟؟ طلعتا
وفي ظرف ثواني مجدي لحقني طبعآ بت الحرام ك العادة ملت ليهو راسو وجاي
يضربني ، قولت ليهو بملل : طلع قاشك اضربني بسرعه عايزه انوم وراي جامعه
وصحيه بدري .
مجدي وهو بمسح وشو : هي سألتك سؤال ليه ما جاوبتها الا تعملي مشاكل
معاها ؟ ..كل يوم في الحال دا ؟ بعدين هي ما غلطت دا منو الوصلك دا في وقت زي
دا .. ؟
= ااااهااا ... وانت مهتم شديد تعرف انا بمشي وين ومع منو ؟ وااااو ما كنت
عارفه !!
مجدي بزهج : جاوبي على السؤال .
= خليك من الوصلني .. انت بتعرف ان تغريد كانت عيانه السنين دي كلها ؟؟
مجدي بزهج : وانا مالي ومالها .
= للدرجه دي العشرة البينكم ما بتتساهل ؟ انت ليه دايمآ بتضايق من سيرتها ؟ كل ما
اجيب ليك سيرتها بتضايق وبتتنرفز وبتعصب ليه دا كلو !!
مجدي عصب شديد : ما تجيبي طاري المره دي تاني .
= ليه ؟
مجدي : هو كدا .. ما عايز اسمع اسمها دا في البيت لا هي ولا اي شي بخصها .
قربت منو بهدؤ : بقت ضعيفه شديد لحمها لاصق في عضمها حتى ملامحه ما قدرتا
افرزه . ما نفسك تشوفه ، تغريد ام بتك يا مجدي ؟؟
مجدي انتفض بعصبيه كانو لابسو جن : قولتا ليكي ما داير اسمع اسمها ، ما تقولي
اسمها ، ما داير اسمعو لا .. قفل اذنو بيدو وطلع وهو بكورك بصوت عالي ،، طلعتا
وراهو وانا شايفاهو بتخبط في جنبات السلم
= للدرجه دي بكرها ؟ في حد بكره حد كدا ؟ جد خسارة الايام الاتحملتك فيها . لزيت
الباب بقوة وضربتو برجلي كنت مضايقه شديد من ردة فعلو ، كنتا فاكراهو ح يسألني
على الاقل " بقت كيف " مهما كان في بيناتهم عشرة وفي بيناتهم انا !.. سألتو عشان
ارضي اخر امل جواي بانهم يرجعوا لبعض بس انطفى ، انا متاكده انو ما طايق نجوان
بس ما عارفه البخلي جاري وراها كدا شنو ؟؟ بنفز كلامها بالحرف كأنها مبرمجاهو
كانو ربوت !!.. ، اتصل لي رقم ..
فهد : حركتك القبيل دي ما حانساها ليك يا ناردين
= والله انت الاخترحته تصلحه ما انا !
فهد : تقومي تحرجيني قدام الراجل ؟
= ما طولي عمري بحرجك وين الجديد ؟
فهد : قسمآ بالله لاخليكي مرتي غصبآ عليك و تشوفي كيف حا اخليك تجري وراي ..
= منو دي التبقى مرتك و منو دي التجري وراك ؟ انت نسيت نفسك و لا شنو ؟
فهد : انا الحا اعلمك الادب يابت الحرام ...
= تحرم عيشتك يا حيوان .. تيت تيت فصلتا الخط .. عايزه اجدع التلفون جاني
اتصال فتحت الخط وقولت ليهو بعصبيه : نعم !..
جاني صوت غريب : نعم الله عليك ، في حد برد على التلفون كدا !...
نزلتا التلفون من اذني و بحلقتها فيهو لقيتو رقم غريب : انا اسفه فكرتك حد تاني .
لا عادي ، شكلو مزعلك شديد " الحد " دا .
بنهره : وانت الدخلك شنو ؟؟
= تمام تمام اهدي !... معاك خُبي
_ خُبي منو ؟؟
= ما قادر اتجاوز السؤال صراحه ، المهم عرس زين كمان جمعتين وامي قالت افتريتي
يعزموك شخصيآ ودا السبب الخلاني اتصل .. معسلامه واسف اني اتصلتا 💔🐸
بنبره سريعه : خبي خبي خبي ،، لحظه تمام .. ! رقمك جديد وانا عقلي ما معاي اسفه
😔
خبي : ياتو يوم هو عقلك كان معاك اساسا ؟ بعدين رقمي دا ليهو يومين لو بتسالي
يعني .. 🐸
بإستهبال : ليه الغلط دا بس .. ؟ اها جيت متي .... سكتا مسافه قبل اصرخ : واي واي
انت جييييت خبي جيت صاح ؟ الرقم سوداني انت جيت واااااي وااااااي ما مصدقه
انا احلف خُبي 💔😍😭😭😭😭
خبي ضحك : ما بتتخيلي مشتاق لي شوفتك قدر شنو
= اجيك بباقي اليل دا انا ..
خُبي : خليها تصبح بس واملي عيني منك
=اها جيت متين؟
خبي : يومين
= اييييك طولتا ليه ما كلمتني ليه ما جيتنا في البيت ؟ كويس يا بابا بقيت يتعمل
خيانات !..
خبي : ما بجي لناس كعبه ما بجوني 😏
= القعده مع امك خلتك بنوتي شديد .. بطل حركات النسوان دي عرفتا اني ما بسال
ما تغنيها لي ..
خبي : اتلمي قبل المك يعواليقه ..
بضحكه : اشتقتا ليك يا بابا 💙💙😂
خبي : يفصل راسك 😂 انا كمان شديد والله 🐾💙
اقول ..
= اها
خبي : مع اصحابي برجع ليك وقت تاني ، تصبحي على خير .
= و انت من اهلو 🐾💙
انبسطتا شديد ان خُبي رجع هديت بعد مكالمتو وقعدت انطط ♡ شلتا شهيق وطلعتا
زفير سيفتا الرقم عندي و اتكرفستا نومتا بكل اريحيه الدنيا ..
خُبي : ود عمتي الكنت بكلموا الايام الفاتت و فكرتو حبيبي صاح و لا غلطانه ؟ 😂
دا ابوي الرباني بعد ما ابوي الحقيقي فلت يدو مني 💔 حيلتي من الدنيا و السمح
المصبرني عليها .. دا العوض اللي لولاها كنت انتحرتا زمان ..خبي بعد ما اهلي سابوني
بقى لي ام و اب ، ابسط تفاصيلي عارفه حتى التفاصيل الحساسه عني اي واحده
فيكم عندها حاجات معينه بتكون بينا وبين امها مع الاسف ما لقيت ام او اخت او
حتى خاله اشاركه التفاصيل دي .. ما لقيت غير بابا خبي اللي الشخص الوحيد البكون
قدامو انا ناردين الحقيقيه ناردين الضعفيه .. ناردين البكايه .. و جههي الحقيقي بظهر
ليهو هو و بس.. عشان كدا هو حاجات كتيره ما بقدر اكتبه في سطرين تلاته عمومآ حا
تعرفوا تفاصيلوا لقدام 🐾🐾💙
______________________
سبأ : يعني شنو يا امي خلاص !... انتي مشيتي تصلحي ولا تبوظي .. ؟! مش قولتي
ماشه تفهمي الموضوع ؟؟
نجاة : الولد بتهمك بحاجه زي دي وانتي لسه عايزه ترجعي ليهو ؟ انتي جنيتي يا
سبأ ؟؟
سبأ : يا امي دايراهو .. دايراهو اعمل شنو ؟؟
نجاة بضق صدر : لا حوله ولا قوة الا بالله العلي العظيييييم يا سبأ ، الله يعوضني
فيك يا سبأ الله يعوضني ..
سبأ اتلفتت على حبوبتها : يما ما تقولي حاجه ؟؟
الحبوبه : امك سوت الصاح والصاح ما بقولو وراهو كلام .
سبأ قعدت في السرير ختت يديها في وشها وبكت ، امها اتمحنت و بتعاين ليها من
سكات !..
____________________
ليلى دخلت على منار لقتها راقده في السرير و ماسكه تلفونها وبتعلب جنبها لجين ..
قعدت جنبها و شالت التلفون من منار ادتو ل لجين
ليلى : اطلعي العبي بالتلفون برا يا لجين ..
منار : دا شنو دا دا ؟؟
ليلى : قومي عايزه اتكلم معاكي كلمتين . .
منار صلحت قعدتها بإنبساطه : خير جاني عريس ؟
ليلى : وانتي عرفتي من وين ؟ 😒
منار ختت يد فوق يد : يعني يا ماما من متين بكون بيناتنا مواضيع غير سيرت
العرس ، اها منو المرة دي ؟
ليلى : سمح اتعدلي واسمعي الح اقولو ليكي دا كويس .. هيثم ود عمتك دايراك ،
ابوكي ح يسألك تقولي ليهو ما دايره ولو اصر تتمردغي في الارض دي وتبكي سامعه ؟
منار بإستغراب : ليه دا كلو مش المفروض انو ود عمتي واولى من الغريب ؟؟
ليلى بعصبيه : يغربل راسك دا ، هيثم قليل ادب ودروبو ما عديل .. اسمعي هنا يا
منار لو عرستي الولد دا حياتك ح تكون جحيم ولو جيتني تبكي لي بقفل بابي في
وشك .
منار بزعل : ليه يا ماما بتقولي لي كدا هو انا لي غيرك بعد تقفلي بابك في وشي ؟
بعدين انا اصلآ ما دايراهو وانتي عارفه كويس اني رفضتها اخوانو القبليهو يعني اكيد
م ح اعرس من العيله دي ..
ليلى راجعت ملامحه و فردتها شويه : معليش يا بتي لكن الموضوع عامل لي هوس
في راسي .. انا دايره ليكي السمح وخايفه ليكي من الشين . خوفتها تكوني دايراهو
وتتبهدلي معاهو هو ما زول عدل ولا زول ستره ..
منار : ما تخافي علي ما ح اخد غير نصيبي ونصيبي ح يكون سمح بإذن الله اطمني
🐾💙😊
ليلى عاينت لمنار بحنيه وضمتها عليها : مع اني عارفاكي بربع عقل لكن مرات بتوزني
كلامك .
منار بزعل : ياربي يا ماما شنو انتي ما بتشوفي محاسني ابدآ .. !!!!
ليلى بضحكه : خلاص قومي اعملي العشاء خلينا نشوف محسانك دي
منار اطمت في السرير : ااااااخ يا ضهري ..
ليلى ضربتها في رجلها : بس دي فلاحتك تتمطي لي اليل والنهار شي ما فالحه فيهو ..
منار : ح اوفق على هيثم ودعمتي سلوى ..
ليلى : خلاص خليكي راقده اصلو ما منك عمار ..
_____________
صحيت الصباح بحماس لقيت كذا مكالمه من خبي و مسج مكتوب فيها " ابو صاحبي
اتوفى امس بليل و سافرنا معاهو لاهله يومين و بجي ما بطول ما تزعلي اتفقتا ؟ ♡
" زعلتا شديد كنت صاحيه عشان اشوفو .. سبأ ما جات الجامعه برضو .. انا و منار
مشينا نجيب شيتات جيلا قالت ما قادره استنتنا تحت الشجره ، جاء منذر لقاها قاعده
سرحانه .. ضربه ضربات خفيفه في راسها وهو بقعد رفعت راسها وحركت عيونها
معاهو لغايه قعد
منذر : الجميل صرحان وين ؟؟
جيلا : صرحان بغنم ابليص
منذر : دا تنمر واضح 💔
جيلا : خلاص ما تزعل 💔😂😂
منذر : ما معتبرك " بشريه " عشان ازعل منك 🐸
عاينت ليهو بطرف عينها بإفتراء : على اساسك انك من فصيلة البني آدمين يعني ؟
منذر : ما ح انزل لمصتواك يا كلبوبه
جيلا : على سيرة الكلبوبه شوفتا كراشتك حايمه مع صاحبه داك من كليه للتانيه ..
منذر : خليتاااا زاتو ارتاحو
جيلا : ليه ؟
منذر : طرحتا ليها واتعنصرت فيني لغويآ
ضحكت و قالت ليهو : و انت الوداك تطرح ليها شنو ما عارفه مفتريه ؟ 💔😂
منذر : قولت اجرب حظي
جيلا : حظك غابيك بعد تجربوا يا منذررر ؟ 😂
منذر : انا بتكلم معاك ليييييه بس لييييه ، عايز يقوم وقفتو : معليششش اقعد اقعد ..
منذر رجع قعد
جيلا : هي الخسرانه انها رفضت واحد زيك والله الف من تتمناك بعدين معجباتك كتار
ما تنسى انك لاعب باسكت ممتاز ..
جينا معانا ياسر لقيناهم بتكلمو منار قاطعتهم : دا منو العااااب دا ؟
جيلا : فلان دا .. واشرت على منذر
منذر : جيلا ..
= نعم 😊
منذر : فكيني من طلص امي واليرحمك !
انتبهت انو مضايق : انت لسسسه موضوع كراشتك دي مأثر معاك ؟
منذر : لا
= ما تعمل لي حركات صحباتي ديل
منذر وهو بصلح في قعدتو : ما هي المضايقاني ، صاحبي كان عرصو الاصبوع الفات
وفي الطريق عمل حادث و اتشل ، البت العقد عليها دي عافر عشانه شديد بص هي
بعد عرفت انو اتشل صابتو وطلبت الطلاق اكتئب وخشى في حاله واجعني شديد
💔
وانت ختت نفسك مكانو ، وانو ماف واحده ح ترضى بيك عشان لدغة السين !..
منذر بضجر : انا بقول في شنو وانتوا في شنو ؟؟
جيلا : انت اول مرة تضايق عشان قلدتا كلامك و قبيل اضايقته عشان منار عملت
نفس الشي ، علفكره انتبهنا و منار حست بتأنيب الضمير .
منار : اسفه يا منذر ما افتكرته اني ح اضايقكك كدا 💔
منذر : ما زعلان يا صلك الاقاشي
منار بزعل : بسحب اعتذاري انا 💔😑
ياسر وهو بحدر لمنذر : انت يااااالكاااتب لو عطسته بتعطس فراشات منشور امس
عمل 1k مع انو حاجه كدا مااا بتستاهل وكلهم بنات ورقادر الرز عليك الله بطل
طعمجتك دي وانشف .. وجراهو من كاحل رجلو برجلو ( فهمتوها ؟ (🐸
منذر : امشي يااااحاقد يا بتاع تشاليا ( نظام بقلد كلامها 😂 )
ياسر : وشك زاتو
في ونستنا جات واحده قالت لينا : هاي
ردينا ليها : اهلين
عاينت لمنذر بتوتر : لو ما فيها ثقاله يا منذر ممكن تشرح لي مايكرو ؟
منذر : الدفعه الكم انتي ؟
اليت : ال 22 بعديكم طوالي
منذر : اهااا مايكرو تانيه دا ما بفهمو والله ، منار شاطره فيهو خليها تشرحو ليك .
حدرنا ليهو كلنااا و ياسر لكزو في بطنو بقوة وهو مبحلق في تلفونو ...
منذر وهو ماسك بطنو : اقصد ح احااول ليك فيهو و اذا ما فهمتي مني بتشرح ليك
منار ظريف ؟
البت بحماس : ظريف شديد ، ثانكس مقدمآ عن اذنكم .. مشت و صحباته كانو مستنيها
..
قلدتو : " منار بتشرح ليك " يعني هي غالبه تمشي لواحده من صحباته تشرح ليها ؟؟
منار : ولا هي ما فاهمه مثلآ ؟؟
جيلا : ولا دفعتها مافيها بروفات تمشي ليهم !!
منذر : شانين هجوم علي مالكم يا جماعه ؟؟
ياسر : مشكلتك ما لدغتك مشكلتك غبي ..
= واضح انها معجبه طلبتك بالاسم من بينا كلنا تقول ليها ما فاهم ومنار !
منار : غاظني طبعآ ، عوير ..
منذر : انا تاني ما ح احكي ليكم حاجه
ياسر وقف وضربو في كتفو : ارح التمرين ورانا مباراة يا حيلتها 🐸
منذر اتلفت على ياسر : قصدك شنو " بحيلتها " ؟
ياسر : الهبشك بس
منذر : الهبشني كعب يا صحبي
ياسر : البس ..
منذر مرر يدو في رقبتو و ختى يدو في جيبو ، ياسر كان بنفض في بنطلونو انتبه
لنظرات منذر ضحك ، منذر اتنفخ و فتح خشمو عايز يقول كلمه قبل ما ينطقه ياسر
بسرعه قفل ليهو خشمو و ضحك : امسحه في وشي بس ما قدام البنات ..
منذر زح يد ياسر : قايلني تاليا ؟
ياسر : ما قاعد اتلفظ قدامها والله 💔😂
منذر : و بتتلفظ لي انا يا مخ ....
ياسر قاطعو : منذر عليك الله ما قدام البنات ، ديل اخواتنا يعني !
منذر : اخواتك براك .. قول انا كدا
ياسر : ما بقول
منذر : عارف انك كدا !
ياسر : ما كدا
منذر : لا كدا
ياسر : خلاص ارح
منذر : ح اعتبرو اعتراف ..
ياسر ومنذر مشو التمرينات ونحنا ما ناقشين اي شيء منهم !...
منار : اها الحاصل معاك يا نود
جيلا : طيب استأذن انا
= وين ماشه ؟
جيلا : حا اسيبكم على راحتكم .
= شنو ؟؟
جيلا : عاينو ما تزعلو مني لكن انا ما بحب ادسدس ، عارفه انكم عندكم مواضيع
بيناتكم عشان كدا حابه اني امش و اسيبكم على راحتكم
منار : اي مواضيع يا جيلا من بتين نحنا بنتعامل كدا كلنا شلة واحده !!..
جيلا : شلة واحده لكن اي زول مع الزول البريحو وانا زولتي سبأ وهي زاته زولته
ابتهال ، وانتي ونود طوالي بيناتكم مواضيعكم الخاصه ، بذات نود ما بتحب تحكي
لينا وانا متفهاها يعني متصالحه مع الموضوع 😊
حسيت جيلا متحسسه مني : ابدآ ما كدا والله بس بتجي مرات من غير ما ننتبه
جيلا قاطعتني : شوفي انا متفهمه وزي ما قولت ليك انا قريبه مع سبأ اكتر يعني
عادي ...
منار : جيلا نحنا اسفين اذا اتسببنا ليك في الاحساس دا يوم 💔
جيلا : ياربيييي ما تندموني على صراحتي معاكم !! ..
منار قامت عليها حضتنا شوفتهم ضامين بعض مشيت اتحشرتا في نصهم : بنات انا
لاقيت امي 💙😔
منار : جد ؟؟ وين ومتين ؟
جيلا : انتي ما كنتي متواصله معاها يعني !!!
= طيب اقعدو خليني احكي ليكم الحصل ، و بديت احكي ليهم كل شيء من طقطق
للسلام عليكم ..
منار : لا حولة ولا قوة الا بالله معقوله دا كلو عين !!
جيلا : العين بتسوي اكتر من كدا ، نص المقابر دي عين عشان كدا في اذكار بتحفظك
..
= عفراء مرت خالي برضو قالت كدا .
منار : المهم انك لاقيتها و عرفتي الحاصل كلو وانها ما سابتك بإرادتها، ما بتتخيلي يا
نود انا مبسوطه ليكي كيف 💙😔
جيلا سكتت مساافه : نود
= ايوه
جيلا : انتي قولتي بعد كلمتي ابوكي وجبتي ليهو سيرة امك انتفض !
= اي بس هو اصلآ كدا من ساعه ما سابو بعض بقى ما بحب سيرتها .. مع انو كان
بحبها 💔
جيلا : طيب وعلاقتو بنجوان كيف ؟
قولت ليها بضيق : الحيه ديك كأنها عامله ليهو عمل بصدقه حتى لو الحاجه حصلت
قدام عينو تخيلي !
جيلا سكتت : نود .. هي ما كأنو ، هو فعلآ ..
= ما فهمتك ؟
جيلا بتوتر : شوفي انا ما عايزه اخوفك و افتي ليكي من عندي بس الكلام القولتيهو
عن امك و ابوك ،، وعن خلافهم والقصه بتاعت امك و كيف ابوك بعد يسمع اسمها
بضايق و طاعتو لنجوان دا كلو بدل ان نجوان سحرت ابوكي .
منار بخلعه : كتبتو ؟؟
جيلا : شوفو ما عايزكم تاخدو كلامي بشكل تشخيصي مؤكد .. بس عندي مرت خالي
حصل ليها نفس الشيء عملو ليها سحر تفرقه .
قولت ليهم بإستنكار : يخوانا انتو بتصدقو الخزعبلات دي ؟؟
جيلا : دي ما خزغبلات يا ناردين دي حقائق مذكورة في القرآن بذات سحر التفرقه دا
مذكور بعبارة واضحه في سورة البقرة ، الله قال فيما معناه " و يتعملون منهم ما
يفرقون به بين المرء و زوجه " . و المسحور اعراضو واضحه بكون في نفور عجيب
من الطرف التاني غير مبرر وزي ما قولتي لمن يشوفه او يسمع سيرته كأنه شايف
شيطان ، وما بطيق يقعد معاها في مكان واحد بحس بضيق في صدرو و يبتدىء يكره
كل شيء بخصها ولو ما مصدقه اسالي اي مفتي او شيخ بأكد ليك كلامي .
استغربتا شديد في كلام جيلا اصدقوا ولالا ؟؟ في نفس الوقت كلامها منطقي
خصوصي ان شوفتو بنفر من امي وما كان بطيقه يشوف وشها حتى لو شافه كان
بغمض عيونو كأنو شايف شيطان و ما بقعد في البيت ثانيه واحده وفورآ بطلع ، دا غير
طاعتو لنجوان في الصاح و الغلط ..
= جيلا ، السحر دا ببطل كيف ؟؟
جيلا : ما متأكده بالضبط بس بتمشي لشيخ وبعمل رقيه شرعيه للمسحور وبعد عدت
جلسات بيشفى بس تقريبآ كدا لازم يتلقى العمل نفسو ويتفكى
= ودا القاهو وين ؟
جيلا : بسأل ليك امي بتعرف في الحاجات دي اكتر مني
منار : ابتديت اخاف عليكي من نجوان دي ، تقوم تعمل ليكي شيء انتي التانيه
وتأذيكي عشان توافقي على فهد .
جيلا : اقري البقره كل يوم و قولي الاذكار ما بتقدر تقرب منك تاني .. لكن لو اتضح
انو هي السحرت ابوكي فعلآ معناها هي نفسها السحرت امك و خلتها تمرض بالطريقه
دي .
= لو اتضح انها عملت كدا فعلآ قسمآ بالله رقبته ما تكفيني ..
____
" يعتاد المرء على تلك الأيام التي كان يخاف حدوثها، يعتاد على تلك الثقوب التي
ملأت قلبه، يمضي وكأن لم يحدث شيء، يمضي وكأن الارتطام الذي كسر جوفه لم
يؤلمه قط "
__
بعتذر عن التأخير 💔🙏🙏
# معسلامه 🐾💙🚶