الجزء 5

كلام مؤيد وقع زي الصاقعه على اذن منار وقفت مسافه تتسوعب الكلام الاتقال !.. ،

مشى منها اتجاه واحده وهو بضحك بإستفزاز .. منار كاانت شايله في شنطتا الوان

مويه للجين بت اختها شالت واحده في يدها و مشت اتجاههم الاتنين ، ضربت مؤيد

ضربات خفيفه على كتفو ، بمجرد ما اتلفت فتحت علبة الالوان و كبتا في راسو ..

ملابسو ووشو كلهم اتوسخو ، وشو حمر عاين ليها بغضب

منار : ما منار فيصل البعلمو عليها يا باطل .. جدعت فيهو العلبعه و مشت خطوتين ..

البت بقت تسأل فيهو دي منو دي منو بسألك انا رد علي ؟

منار جات راجعه ليها و قالت : انا الاولى و انتي التانيه و في غيرنا اربعه .. البت

وقفت على حيله و ختت يدينا في نصها وبصوت عالي : صحي الكلام دا ؟؟

منار بضحكه : مستنيه يعترف ليك مثلآ ؟؟

البت اتملت غضب و زعل و فكت الردحه .. منار عاينت لمؤيد و هي بتضحك و عامله

علامه النصر ✌

ياسر شافها جا عليها بسرعه ..

ياسر وهو بعاين للولد : منار دا شنو ؟!

منار بزعل : واحد باطل و ريتو مكانتو ، نفضتت ملابسها و اتلفتوا هم الاتنين اتجاه

مؤيد و حبيبتو بعد طلعت اصواتهم .. مؤيد بحاول يبرر ليها و هي تشيل و تردح ليهو

و تنبز شويه لمت فيهو هي و صحباته ودقوهو .. 💔😂 منار قلبه برد و هدا بعد

شافت منظرو و هو طالع بالجلاله يحبى من تحتهم عشان ينجد روحو ،، الناس كلها

اتلمت فيهم مشوا اتجاه الكفتريا هي و ياسر ..

ياسر : منار محتاج مساعدتك في شي ..

منار : احكي ..

ياسر : " تاليا " عيد ميلاده يوم الخميس و انتي شايفه ضغوطات الامتحانات ما

عارف اتصرف كيف و عقلي فارغ تمامآ من الافكار ممكن تساعديني ؟!

منار : بسيطه .. الخميس نهاية الامتحانات امشي بيها مكان هادي و احتفلو سوا منو

يبقى ليها تغير جو من استرس الامتحانات .

ياسر : فكرتا كدا بس المشكله هي مسافره لاهله .

منار : مسافره وين نحنا ما عندنا اجازه و ح ننزل الاحد طوالي !!.

ياسر : ابوها تعبان شديد ح تمشي تشوفو ..

وهي بتفكر : اهاا الله يوالي العافيه .. طيب في الحاله دي نفسها ح تكون مقفوله من

الاحتفال و كذا طالما ابوها عيان ، طييييب اااامم... ممكن تعملو نزهه اثناء

الامتحانات !!

ياسر : ما فاهم !

منار : يعني سوقها اطلع بيها مكان نظام تراجعو سوا و شيل معاك اكل و هديه عيد

ميلاده .. اثناء ما انتو بتقرو عادي طلع الهديه اديها ليها و كدا ح تكون ضربتا اتنين

بواحد من جهه غيرتو جو القرايه ومن جهه يعتبر احتفال ،، حاجه حلوة و بسيطة

ومناسبه للظرف الهي بتمر بيهو وح يفرق معاها كتير ♡♡

ياسر : عشان كدا بستشيرك دايمآ عندك افكار رهيبه ♤

بإفترا : احم احم بس هديتي براها حبيبي انا ✌😌

ياسر ضحك وتكل ضهرو على الكرسي : انا ك ياسر هديه بنسبه ليك 😌

منار بإستهبال : لااااا حنك الاولاد دا م ح تاكلني بيهو ،، هديتي تصلني مغلفه بكل

زوق وحلاوة 🐾😏 جات تاليا اثناء ما هم قاعدين حدرت لي منار من فوق

لتحت و اتلفتت اتجاه ياسر و ربعت يدينها و هي بتهز في رجله : انا مش قولت ليك

البت دي وشلتا ما تقعد معاهم تاني !

ياسر بهدوء : وطي صوتك و عيب البتقولي دا ..

تاليا بضحكه استهبال : ياسلاااااام .. وعيب كمان !! ، اتلفتت اتجاه منار : شوفي

عايزاك تعرفي اني ما ببلعك ابدآ ..

ياسر وقف علي حيلو و بعصبيه : اعتذري ..

تاليا وهي بتأشر عليها : انااا اعتذر لي دي ؟!! شوف يا ياسر يا انا يا هي ..

ياسر : دي شنو تصرفات الشفع دي يا تاليا .. ؟ !

منار وهي بتلم في اغراضه : هدو شباب مافي داعي للشكل يا جماعه ،، هداني مشيت

يا تاليا..

تاليا بنظرات كره : كويس انك عرفتك حجمك .

ياسر بنهره : تاليا .. لاخر مرة بحذرك تتصرفي قدام اخواتي بالطريقه دي .. واذا ما

اعتذرتي منها حالآ و قدامي ح اتصرف معاك تصرف ما بيعجبك ، ما كل ما تشوفيها

معاي تعملي مشكله ..

منار : ياسر انا ما عايزه اعتذار ، ما تضخم الموضوع في الفاضي ساي . و اتلفتت على

تاليا : شوفي انا محترمه غيرتك عليهو بس ياسر زميلي و اخوي لا اكتر ولا اقل

وحتى قعدتنا دي كانت عنك .

قاطعته : ما بهمني الكلام القولتو و انتوا سوا ، انا ما عايزه اشوف شبحك حواليهو

تاني فاهمه ؟!

عاينت لي ياسر : قولتها ليك بدل المرة الف .. البت دي انا بكرها لله في الله هي

وصحباتا حتى من قبل ما اتعرف عليك ويا انا يا .... وعاينت لي منار من فوق لتحت ..

ياسر : وانا ما بقطع علاقاتي مع ناسي عشان نفسنت بنات فاضيه ، لو كانت غِيره منك

كنت احترمتها بس طالما الموضوع كدا فانا ما بتخت تحت خيار !

قاطعتو منار اشر ليها بيدو سكتا وكمل ..

= انا عارف حدودي كويس و ملتزم ما اتخطيته خطوه و بسببك خليتني اعمل

حسابي مع بنات الدفعه كلهم مررتها ليك بدل المرة الف .. ما تمشي مع فلانه ، فلانه

دي انا ما برتاح ليها الزول دا كذا والبت دي صفته وصفته مع انك عارفه ان علاقتي

مع فئة البنات محدوده.. كلو ما عارضتك و مشيتك بقول دا نابع عن حبك و غيرتك ما

اكتر و عشااان انا بحبك كنت بحترم قرارتك البتخص ناسي انا .. ؟؟! بس كونو

تصل لاني اقطع علاقتي مع الناس البسيطه الطلعته بيهم من الجامعه و انتي عارفه

غلاتهم جواي عشان ارضيك ؟ فانا آسف مح اخسر ناسي كلهم بسبب انانيتك الانا

بقيت ما قادر اتحمله ، عندك سبب مقنع فاهلا و سهلآ حاضر جدآ .. بس انانيه منك و

عدم ثقه فبلاها احسن ما مستعد اكمل مع واحده عايزه تتحكم في حياتي .. انا ما

حكرآ على زول حتى لو انتي ...

تاليا رمت ديمعاته : انا بعمل كدا عشان بحبك و بغير عليك ..

ياسر وهو بلبس في شنطتو : البحب زول ما ببعدو عن الناس البحبهم بحجه انو بحبو

دا ما منطق ابدآ ... خطى خطوتين قبل تاليا تقيف قدامو بصوت باكي

تاليا : شوفتا ، كنت بعرف انك ما بتحبني وبتحب صحبااتك 💔

ياسر : لو في قلبي ذرة مشاعر اتجاه ااييي واحده في الدنيا غيرك ما كنت فضلته

معاك لحظه عارفه ليه ؟! عشان انا مجبور اكمل معاك لاي سبب من الاسباب ، ياريت

تتخلصي من الوساوس الفي راسك دا عشان تقدري تعيشي براحه بال .

ياسر اتجه اتجاه الباب وقف و اشر لي منار ، منار اتلفتت اتجاه تاليا اللي بادلتا نظرات

حقد طلعوا برا الكفتريا ..

منار بضيق : ياسر انا اسفه اتخيت في الموقف دا بسببي 💔

طلع نضارتو نضفه بطرف قميصو و لبسه : ابدآ .. انتي ما عندك دخل في الموضوع ،

جذور المشكله في راس تاليا و اتمادت بسبب تمشيتي ليها لو وضعته حد لتصرفاته من

البدايه ما كان و صلنا هنا ، يلا انا ماش عايزه شي ؟؟!

هزت ليهو راسها و ابتسمت ليهو بسمه مجامله

ياسر : ما تختي في بالك بس تطلع من دور الضحيه دا بترجع لعقله ..

منار : بس انت قولت ليها جوه انو بلاها احسن !

ياسر بضحكه و هو ماسك رقبتو : دا كان قرصة ودان ما اكتر ، لاقيها في كوشه انا

عشان اسيبه بالبساطه دي !!..

منار حست براحه جواها و ضميره ارتاح شويه ، ياسر مشى الداخليه يرتاح و منار

اتجهت للشله

___

جات منار لقتني قاعده براي سبأ و جيلا مافي .. اول ما شوفتها قولت ليها : وين

انتي كنتي ؟ ! شايفه مؤيد في السنتر قبيل ،، قعدت جنبي وهي بتصلح في طرحتها :

اي كنت قاعده معاهو انا ..

= اها و فهمتي الحاصل؟!

منار بضحكه : اسكتي ما طلع بضاعه مغشوشه وكلمت الغاشيني معاها دقتو هي

وصحباته 😂

= جااادة ؟؟

منار : و الله ، يلا تمشي باتا تجي جزمه رباطه و اللي سابنا خسرنا دلعنا

= من صجك ؟؟

منار : لا من باقتي ، المهم تاني ما تجيبوا لي سيرتو ، حسسني اني رخصيه شديد

= ما تشتغلي بيهو بكره يجيك الاحسن

منار : اهااا انسينا ..

جيلا و سبأ جو يضحكوا من بعيييد

سبأ : عجبتني كيييف يا منار 😂

منار : انتوا شوفتني ؟

جيلا : اي كنا قاعدين وراكم نحنا ، قويييه لقيتك

سبأ : لو شهلا هنا كانت دقتو معاها 💔😂😂

= يا حليلا هي ما جايه ؟

جيلا : اتصلتا ليها امس كانت منفسسنه و بتبكي

منار : ماله ؟

جيلا : ابوها رفضوا تاني 💔

= الناس ديل مشكلتهم معانا شنو ؟ البنكون عايزينو برفضوا و الرافضنوا بقبلوا !

منار : حرااقه روح بس .. ارح نمشي بعد دا

طلعنا برا الجامعه ما جات مواصلات ..

جيلا : ارح كندكا ..

سبأ : شنو يالبرواجزيه وين عربيتك مصاحبنك على شنو نحنا

شلتا قطعه منقا بشطه : بنشرت اليله ..

سبأ : بناات دي مش عبير ؟ اشرت على واحده راكبه في عربيه

جيلا : ما اظن ..

سبأ : شافتنا و رفعت قزاز العربيه و الله ..

جيلا : لالا ياااخ ما هي ..

= لا هي انا زاتي لاحظتا ليها شافتنا و رفعت القزاز طوالي .

منار : ما عايزانا نشغله ليها ..

جيلا : ما لي مصلحتا بنقول في شنو نحنا ؟؟

سبأ : دا الجديد و لا شنو دي ما نفس العربيه بتاعت القديم ..

منار : اااي ديك فضيه ..

= لحقتو تحفظوها 😂

جيلا : الله يحفظه البت دي دربه ما عديل ..

= بنات ، كلنا ركبنا عربات صاح ؟؟

سبأ : بررري ما قدره والله .. !!

منار ضحكت واتلفتت على سبأ الكانت بتعاين لينا لسه .. شويه جو مفحطين قدامهم و

كتحونا بالغبار ..

سبأ بصوت عالي : الشارع دا حق ابوك يا معرص .. ؟؟

جيلا و هي بتقرص في سبأ : خفضي صوتك انتي في الشارع هسا كان سمعك ولد

يقول عليكي شنو ؟

سبأ : يقول اليقولو انا مالي ؟!

و صلت البيت كان مافي صوت لا لنجوان و لا لعياله .. عايزه اطلع فوق سمعتا صوت

جمانه بتضحك بصوت عالي قعده في الجلسه الجنب السلم ، مشيت اتجاها براحه ..

جمانه بدلع : قولت ليك صعب اجي ما تعصر علي حبيبي ... امممم كدا انا حا ازعل

لكن ! .. هههههههههههااااي " بصوت عالي " ،، اقنعتني رسل لي اللوكيشن .

طلعتا بسرعه من غير ما تلاحظ لي .. غيرتا ملابسي و ختيت لي اكل .. كنت مرهقه

شديد نمتا دغري .. صحيت على صوت التلفون كان رقم غريب بمجرد ما مسكتا

التلفون الخط فصل .. طنشتو و صمتا التلفون و جدعتوا الساعه كانت ماشه على 10

طلعتا برا اشم هوى .. سمعت صوت بكاء جاي من الناحيه الشمال مشيت لقيت شغاله

نجوان بتبكي .. مشيت عليها وسألتها : ميري ، خير مالك ؟؟

لمن سمعت صوتي اتلبكت ووقفت على حيلها بتوتر : لا ماما مافي .

= طيب بتبكي ليه لمن مافي ؟ في زول ضايقكك ؟

بتوتر هزت راسها لا ، قولت ليها تمام عايزه امشي لاحظتا ليها ماسكه بطنا بقوة ..

= لسه بطنك بتوجعك ؟؟ هزت لي راسها لا .. شلت نفسها وقولت ليها : في شنو انتي

مخبياهو احكي ..

ميري : ما مخبي شي ماما

= شوفي اذا ما قولتي مالك ح اكلم ليك نجوان ، عشان سكوتك دا ما ساي ..

بكت : والله ما املت شي ، انا مريض و ماما نجوان ابت تديني مرتب او سلف ..

= طيب ليه ما قولتي من الاول ، كم عايزه ؟

رشا : مبلغ كبير ماما ..

= ما سألتك اذا كبير و لالا كم المبلغ ؟

رشا بتوتر : عايز ".. " ءامل ءامليه ‏( اعمل عمليه ‏)

وادفع قروش العلاج .

ما كنت حابه اساعده سألتها فضول ليس الا بس بعد شوفتا قلة حيلته قولت حرام

تموت بسبب جشع نجوان ،، كان معاي كاش اديتهم ليها وقولتا ليها بديك الباقي بكرا ..

ما بحب الناس الضعاف البكون مغلوب على امرهم ما بحب احساس الضعف وان في

حد ظالمك و مكتف يدينك بحس بروحي بتاكلني ... دخلتا لقيت مجدي قاعد في

الصاله جنبو اولادو بلعبو .. اشر لي بيدو جيتو .. كان هادي

مجدي : تعالي اقعدي هنا عايزه في موضوع ..

= بسمعك من مكاني دا ..

مجدي وهو بحك في راسو : جاكي عريس ..

قااطعتو : ما موافقه ما عندي تفكير في زواج هسا الاولويه للدراستي .. لفيت عايزه

امشي قال لي

= لا انتي ح تتزوجي عشان تنستري ياناردين

= انستر ؟ !

مجدي : ايوة تنستري

= ليه عامله شنو انا عشان يستروني ؟!

مجدي : الشفتي امس ما كفاك ؟ ما نلقص فضايح و ما حا اسمح ليك تشوهي سمعتي

بطيشك ..

= انت من كل عقلك صدقتا كلام الحربايه دي ؟ انا ما واطيه عشان اخش بيوت رجال

يا مجدي انا طالعه من بيت ناس !

مجدي : لا انتي كنتي هناك وانا شوفته الصور .

= اااه الصور !.. انت عارف ان الصور دي مفبركه و عادي اركب على نفس الصوره دي

وشك انت .. ح تكذب بتك وتصدق دي ؟! واشرت اتجاه الباب ..

مجدي : انا بعمل كدا لمصلحتك يا ناردين ..

بعصبيه : مصلحتي ؟؟ ياتو مصلحه دي المبنيه على كذب و افتراء ؟؟ مصلحتي فانو

يكون عندي اب بثق فيني مش يعرس لي عشان اوهام مرتو !.. انت ما منتبه انك يوم

عن يوم بتتهمني بتهم فظيعه ؟! اذا انت الوالدني بتعمل كدا خليت شنو للغرباء اااه

.. ؟ ! انا جد ما مصدقه الانت بتعمل فيهو ما مصدقه انك بتكرهني فيك بإرادتك ! انت

عمرك ما كنت قاسي معاي كدا يا مجدي شنو الغيرك بالطريقه دي انا ما قادرة

استوعب ! انا ناردين بتك انت ليه ما شايفني ؟ ليه بتسمع كلامها في الصاح و الغلط

وبتمشي معمى على عيونك ؟ ليه بتقسى علي كدا شنو انا عملته ليك عشان تجافيني

بالطريقه دي ... ؟؟؟

مجدي وهو مغطى وشو : انا واقفته عليهو .

ضحكتا و قلتا ليهو : اها وجاي نظام كلمتك يعني ؟ بعدين ما انت البتحدد اذا انا

اعرس ولالا انا ح اعرس لمن انا اكون عايزه اعرس دا ما من حقوقك سياة العقيد

مجدي بابكر !

مجدي انتفض من الكرسي : انا ابوك ومن حقي اعرس ليك و سواء وافقتي او لا انتي

ح تعرسي .

قربتا من مجدي بعصبيه ووجهتا اصبعه على صدرو : انت ما ابوي ! انت واحد تاني

بتشبهو في الشكل وبس ، رفعت صوتي : ابوي الانا بعرفو مستقل في رايو مش بسمع

كلام الحريم على المعمى ...

مجدي رفع يدو و ضربني كف

مجدي " الظاهر اني ما ربيتك ابدآ ..زح التربيزه القدامو برجلو بقوة وطلع فوق ..

ختت يدي محل الكف بخلعه ،، ما كنت قادره استوعب العملو مجدى و الكلام السمعني

ليهو .. عمرو ما كان قاسي معاي كدا و انا صغيره .. معقوله دا بابا الكان ما بخلي

رجلي تصل الارض ؟! معقوله دا الفي يوم شاكل راجل كبير عشان قال اني شلتا من

بتو حلاوتها ؟؟؟ ما كان راضي علي السرقه هسا بتهمني بنفسوا بتهم شنيعه زي

دي ؟؟ .. من عرس نجوان بقى متغير معاي عملت ليهو شنو المرا دي ؟ نفسي قام

شديد جريت غرفتي طلعتا بخاخ الازمه .. رشيت منو شويه جوا خشمي نفسي هدا

قعدتا مكاني في الارض و انا ببكي بصوت .. دخلتا تحت التربيزه و لميت رجولي علي

شكبتا يديني فيهم بقوة حسيت بخوف جواي و حاسه الحيطان ضيقه .. كنت فاقده

امي و متمنيه يكون في زول حواليني ما مهم منو المهم اسمع صوت في البيت دا غير

صوتي يطمني بصوتو بس .. لمن احساس الخوف ذاد عندي جريت على السرير

واتغطيت بالبطانيه طلعتا الا عيوني البراقب بيهم في شبح الستاره .. جسمي كان

متلج و برجف واسناني بتصارع بعضها .. خليت انوار الشقه كلها فاتحه ما قفلتا ولا

نور .. شويه شويه النعاس اتسرب لعيوني و نمتا ..

صحيت على نفس الرقم الامس ما كنت حابه ارد بس الرقم استمر في الاتصال

.. مسكتا التلفون بفتور وفتحتا الخط ،، جاني صوت مرة مبحوح : ناردين !

قولتا ليها بنعاس : ايوة مين ؟!

المرة بعد مسافه : انا غادة خالتك .

لمن سمعتا اسمها صلحتا قعدتي : بالله انا عندي خاله يعني ؟

غادة متجاهله كلامي : كيفك يا بتي ان شالله طيبه ؟

= كويسه انتوا كويسين ؟!

غادة : الحمدلله ... سكتت مسافه قبل تقول : عايزه لاقيك ضروري شديد يا ناردين ..

= كدي خليني استوعب انك خالتي

غادة : بعد تستوعبي ..

= الصراحه ما عندي ام عشان يكون عندي خاله !

غادة : معاك حقك ، نحنا لينا سنين ما سألنا عنك عاذرة تصرفك

= لا ما تعذريني اذا المرة الولدتني ما بستأل عني فانتي ما عليك ملامه، اها قولتي

عايزاني في شنو ؟

غادة : عايزه الاقيك ضروري

= ما بتقدري تقولي تلفون ؟

غادة : لا الا وش لوش

= بخصوص شنو بالضبط ؟

غادة : الخبايا الانتي ما عارفاها

= من غير الغاز و سمحتي

غادة : بخصوص تغريد امك ...

____________

‏( هنالك مقوله قديمه تقول ..

ان الحقيقه تظهر مهما بلغت من سنوات التعتيم ، ولكنها حينها تظهر تحمل في طياتها

دمارآ لخافيها ،، لا احد سينجو الكل غارق لا محاله فخذ دورك واستعد .. ‏)

،،،،،

تتوقعو ناردين ح تعرس جبر ؟؟!

# معسلامه 🐾💙🚶