الجزء 20

شهلا : و جعني كلامها شديد 💔

منار : ما اتوقعتا من سبأ حاجه زي دي ، اتخزلتا فيها ..

= هو حار علينا كلنا بس جيلا اخدت النصيب الاعظم دي صحبتها من الاساس، لازم

نقيف معاها و نا نحسسه انها براها

عبير : بعد نتلاقى نتفاهم ، بنادوني لازم اقفل ..

= تصحبوا على خير ..

حسيت بضيقه في نفسي ما اتوقعتها من سبأ .. كانت على الاقل تواجهنا و تقول قراره

في وشنا بشجاعه مش تتغير مننا و تتحسسنا اننا عملنا ليها شيء و غلطنا في

حقها .. ! جاني اتصال من امي اطمنت علي و فصلت ، و ك العاده ما نمنا لغايه

الصباح اللي اتصبّح بدلوكه و زغاريت من شراب الشاي .. الجو مليان بالضحكات و

السعادة المرسومه في وشوش الحاضرين ، بدينا نضافه و ترتيب .. الناس فطرت و

الجمعه جات و الرجال مشوا الجامع للعقد .. كنا منهمكين في الشغل انا و حلا وقت

جات منار شايله شنطتها قالت لي بسعاده : صاباها لغايه الحفله و ح يجي حازم

يرجعني ♡

بادلتها نفس السعاده : لو ما رجعك بنرجعك نحنا ..

عمتي سكينه كوركت لينا مشينا عليها

عمتي سكينه : امشوا بيت نمارق بيغادي نضفوهو ورتبو في ضيوف مهمين جاين بعد

العقد ح نقعدهم هناك ديلك الناس جاين من الجامع شويه و بصلوا .. هنا البنات عملوا

كل شيء ما محتاجنكم تاني وهاا !.. ما تخلو شافع يدخل البيت و بعد تخلصوا البسوا

نضيف واقعد قبلكم استقبلهم مافي زول فاضي انا بجي بعد يجوا .

= نسوان يعني ؟

عمتي سكينه و هي ماشه و بتعدل في توبها : اي اي ..

شلنا مقاقشينا مشينا بيت نمارق كان فيهو شفع و شويه نسوان طردنا الشفع و

النسوان طلعوا واحده ورا التانيه .. رتبنا البيت و بخرناهو اثناء ما شغالين ..

منار : امس ما حكيت ليك تخيلي موده جات براها و ماجابت معاها اولادها 😊

💔

ضحكتا : حزييينه

منار : صحي لمن جيت لاقاني خبي سلم علي سلام عرفه !!

= هو بعرفكم كلكم علفكره حاكيه ليهو عنكم فحفظكم

منار : اهااا.. ح يخطب منو هو ؟

= ريتال بت صحبت عمتي سكينه

منار : عرست ليهو امو يعني ؟

= حسب السمعتوا اختار براهو .

منار : هو ما حكى ليك يعني ؟

مسكتا كيس المخده : هو قاصد ما يحكي لي ..

منار : اشمعنا .. ؟!

قعدتا في طرف السرير : عشان كنتا مخبيه عنو حاجات فكان عايز يلفت انتباهي من

غير ما يوضح بالكلام ، اليله ح يعلنوا الخطوبه و يلبسوا الخواتم في الحفله ..

شردتا بعيد وانا ماسكه المخده في يدي .. منار قعدت جنبي : مالك ؟

= خبي كان رابط زواجو بزواجي من زمااان ، حاولنا كذا مرة نقنعوا يعرس بس كان

رافض تمامآ ، هسا امس لمن سمعتا من زين انو خطب اتذكرتا كلامي معاهو ، قبل قرار

الخطوبه دا بأيام اتكلمته معاهو و قسيت شديد عليهو في الكلام

منار : قولتي ليهو شنو انتي ؟

عاينتا ليها بزعل : قولت ليهو انا ما بتك و لا اختك شوف حياتك بعيد عني ..

منار : حار القولتي يا ناردين !!

= بعرف بس كنت عايزاهو يشوف حياتو ، هو موقف كل شيء علي كان لازم اخت حد

عشان لو تابعني ح يموت و حيد ، انا مشاكلي و مصايبي ما بتخلص يا منار كل يوم

مصيبه اكبر من القبليها ..

منار : ما تقولي كدا بلاء و بزول ان شاءالله ..

= خايفه يكون اخد القرار بالسرعه دي عشان كلامي معاهو !..

منار : ما اعتقد ، شخصيه خبي مُستقله ما ممكن تتاثر بكلامك ، بعدين يمكن هو فعلآ

فكر في الموضوع بوجهه نظر تانيه و لقى انو معاك حق !

= ما عارفه يا منار .

منار : ما تفكري كتير كلو لخير ، و في النهايه هو خطب و فرح امو و اهله و اكيد فكر

قبل يقرر و دا المهم !

= صحي بعدين عايزاك تمشي معاي بيتنا اثناء ما الحفله شغاله ..

منار : انتي نويتي خلاص !

= اي ، نجوان ح تجي الحفله اكيد عشان تتبوبر و تظهر للناس .

منار : صحي قبيل ما شايفاها في الغداء .. ؟

= لا هي شايفه غداهم ما من مستواها الاستُقراطي عشان كدا ما جات لكن الحفله اكيد

ح تجي عشان في الصاله

نمارق جات داخله بتنادي علي سكتنا

نمارق : ناردين , انت الفستان الكُحلي دا حقكك ؟؟

= اي

نمارق : هاك لميهو لقيت الولد جاري بيهو الا قلعتو منو.. خاته وين انتي ؟

= كييف يعني جاري بي وين ؟

نمارق : لاقيتو هنا مع باب النص .. " رفعتو بيدها فوق تشوفو و اتفحصتو بعيونه

اثناء ما بتقول : رهيب لكن ، كدي جريبي اشوفو عليك ..

= لا اجربوا شنو الضيوف ..

نمارق : مافي اي زول جاي سرعه سرعه البسي و تعالي كلها خمسه دقائق

منار : اي نشوفك بيهو ..

= طيب دقيقه ..

دخلتا الغرفه لبستو و جيت " الفستان كحلي ضيق على شكل سمكه اوفوشلدر يدينو

قصيره ‏( حا انزلوا ‏)

جيت طالعه : اها كيف ..

منار بدهشه : مبااالغه مع جسمك فظييع عدييل

بجد ؟

نمارق : ما شاءالله بس عيني بارده ..

في كلامنا جاء خاشي خبي ، اول ما شافني لف وشو الناحيه التانيه و قال : غيري

الابساهو دا سرعه ..

نمارق : اها ح تسرحي ياتو تسريحه بعدين ؟

= بفكر اعمل شعري استريت و امسكو من الناحيه دي ‏( و لميت الناحيه اليسار ‏)

خبي : ح تلبس الفستان دا ؟؟

قولت ليهو وانا بتامل في الفستان : حلو صاح ؟

خبي قرب اتجاهي بهدوء و عاين لي في وشي : ح تلبسي وين ؟؟

= في الحفله ..

خبي و هو بحك في لحيتو وحاني جنبتو الشمال اتجاهي : ح تطلعي كدا قدام

الناس ؟

= مالو يعني .. ؟!

خبي : ما حلو عليك ..

= لا هو حلو ، وحتى لو حلو ح البسو عشان ما قصيتو مخصوص للعرس !

خبي بنبره حادة شويه : و انا بقول ليك ما حلو ..

رقق نبرتو شويه : رايك شنو تشوفي غيرو ؟ امشي جربي واحد غيرو و انا ح اقول

ليك رايي يلا ح نعمل عرض ازياء

= لا هو واحد بس و ح البسوا

خبي : و انا قولت ليك ما حلو ما ح تلبسي

نمارق : ما حلو شنو انت اعمى ؟؟

عاينتا لنمارق : حتى لو ما حلو انا ح البسوا

خبي : لا انتي ح تغيري الفستان و م ح تلبسي ..

= لا ح البس الفستان و هو عاجبني شديد

خبي : اذا عاجبك او ما عاجبك الشيء دا ما ح تلبسي لو تموتي ..

ختيت يديني في نصي بزهج : وليه ان شاءالله ؟؟

خبي : انتي ملاحظه اني من قبيل ما قادر اعاين لشيء غير وشك ؟؟ تطلعي بفستان

ضيق زي دا دا كيف يعني ؟ شوفي ليكي شيء غيرو البسي ، خطوه من مكانك الانتي

واقفه فيهو دا ما ح تخطيها بالفستان دا..

عاينتا للفستان : عاادي وين الضيق هسا ؟ بعدين كل البنات بلبسوا كدا انت ما

شايفهم ؟

خبي : ما شغلتي بالبنات ، انتي بالفستان دا م ح تطلعي ، انتي عارفه كميه الذنوب

الممكن تاخديها بسبب الفستان دا ؟ عارفه الاولاد ح يقولو عليكي شنو ؟؟ عارفه

التعليقات الح يقولوها ؟؟

ربعتا يديني بنفرزه : ما بهمني يقولوا اليقولوا انا مالي ؟

خبي : مالك انك لابسه ضيق و مفاتنك كلها ظاهره و لو انتي ما بهمك انا بهمني ..

= مفاتنك ؟ على اساس انا ما شاءالله من كلو ... ؟! انا اتعب في الفستان و الف

السوق عشان القماش ومشيه و جيه للترزي و اخر شيء تقولي لي ما تلبسي عشان

الناس ؟ انا مالي و مال الناس ما يعلقوا ولا يقولوا اليقولوا .. انا ما تعبته فيهو عشان

اجدعوا !! ..

خبي بحزم : بهموك ما بهموك ما ح تلبسي ، لو كسرتي رقبتك ما ح تلبسي سامعه ؟؟ و

يلا خشي غيري الدلاقين الابساها دي .. ولزاني بيدو

= ح البسو عجبك ما عجبك ح البسوا يا خبي و ما علي كيفك انت .. مشيت خطويتن

جراني من يدي

خبي : انتي ما جايبنك من الشارع عشان تلبسي على كيفك عندك اهل وابو شايله

اسمو بتختي ليهم اعتبار ...

ربعته يديني بغيظ : شايفه كلام المره اثر فيك ما على اساس ما تشتغلي بيها ودي

وليه راسه فايت !..

خبي بعصبيه : افهميها زي ما تفهميها لكن اللبس دا انتي ما طالع بيهو شبر ..

نمارق : خبي بسم الله مالك ؟ خليك اوبن مايند شويه البت بتلبس كيف ما البنات

بلبسوا يعني لا اهله ح يتاثرو لا ح تسيء لابوها و لا ...

قاطعه : دا بدل تنصحيها ؟ معليش انا ما اوبن مايند ، الله وقعها في واحد شرقي

سوداني دمو حار مخو رجعي من زمن مروي القديمه ، وما عندنا بنات بتلبس كدا لا

في عرس و لا في غيرو حظك يا ختي تسوي ليهو شنو ؟ يلا خشي جوه سريع ..

= عقلك دا احكم بيهو مرتك تاني ما ليك دخل فيني ! ..

خبي : ياااالطييييييف قولت ليك خشي جوه يا بت

ختيت يد في يد : ما خاشه و ما ح امشي علي كلامك

مسح وشو : اعتبريني بغير و عقلي صغير

= ما من حقك تغير علي

خبي : لا من حقي بت خالي و لا ما بت خالي ؟ ربيتك و لا ما ربيتك ؟

= ما من حقكك تدخل في ملابسي و البس شنو و اخلي شنو دا قرار راجع لي

خبي : ح امشي افتش ليك واحد تلبسي لكن قسمآ بالله العظيم تلاته يا ناردين

المحك لابساه اتصرف معاك تصرف عمرك في حياتك ما تنسي و يلا يا بت من قدامي

.. حمرتا ليهو من سكات و كرفستا وشي .. دخلتا الغرفه بزهج وانا بغلي كان اتجاوزتا

ليهو اسلوبو معاي م ح اتجاوز انو شاكلني قدام زول و هو عارف كويس اني بكره

الحركه دي .. غيرتا ملابسي و حردتا الحفله كلها و خلي خطوبتو يحضره زول غيري ..

منار : ما تزعلي نفسك ارح اديك من فساتيني ..

قولت ليها بزهج : ما دايره حردتا الحفله بالفيها ..

منار : عادي يا نود خديهو على قدر عقلو دا خوف عليك بس ..

= يخاف من شنو صغيره انا ؟

منار : مهما كان ح تفضلي في نظرو بتو يعني غيرت اخوان ما اكتر ...

= لا بتو لا اختو

منار : لو سمعك حا يزعل

= ان شاءالله يطق ..

شلتا نفس قبل اقول ليها : انسي خلينا نغير ملابسنا و نتسقبل الضيوف ، لبين ما

غيرنا الضيوف كانوا واصلين .. كانوا 7 نسوان ضيفناهم و جبنا ليهم الغداء . طلعنا

الصيوان برا لمحته امي و غادة و عفراء ورفيف . مشيت عليهم بفرحه سلمته عليهم ..

الغداء خلص وبدت السيره هيجيج وربه ودلوكه ، ركبنا البصات عملنا سيره حوالين

المنطقه مشينا لغايه البحر وجينا راجعين الجو كان مساعد و زابط شديد .. بعد العشاء

خبي جاء خاشي شايل في يدو كيس لقانا حايمين في الحوش معاي منار.

خبي و مادي الكيس: هاك وافردي وشك دا ..

= ما دايراهو .. اتخطيتو بزهج , مسّك الكيس لمنار و مشى ..

منار : يخسي عليك هو كلف نفسوا و مشى فتشو ليك اليله الجمعه و محل واحد

فاتح مافي دا غير انو اليله خطوبتو لاحظي يعني !!..

= ما بهمني .

منار : طيب وين حاجات الخطوبه عشان الوقت جا

= كلو دبله و خاتم مافي شيء معين محضرنو للخطوبه ..

منار : طيب و بدلتو ؟

اتلفتا عليها : منار ، ما بهمني لا هو لا خطوبتو تمام !

منار : مهما كنتي مضايقه منو دا يوم مهم بنسبه ليهو لازم تقيفي معاهو عشان ما

يحس انو براهو او ما هامك ..

راجعتا نفسي : على قولك اصلا الفتره دي بقى حساس زياده ، ح امشي اودي ليهو

بدلتو الحفله ما فضل ليها شيء ..

منار ضحكت : طيب تلقيني في بيت نمارق ..

= غالبآ حايلبس هناك ارح ..

في بيت نمارق ما لقيت البدله في الدولاب محل ختيتا ، نمارق بتلبس في عياله

سألتها من البدله قالت لي شاله خبي و طلع الديوان البرا .. مشيت الديوان اتاوقته

بالباب لقيت معاهم ناس .. قولت اجي بعدين ، شلتا فستان خبي الجابو فستان

مزركش واسع لامع اكمامو طويله فيهو حزام في النص اسود ، طقمتو مع هيلز اسود

‏( ح انزلو في الكومنت ‏) ، رفعتا شعري فوق و نزلتا خصلتين ..

وقت الحفله قرب الناس كلها مشت الصاله بالعربات الجابوها قولت لمنار اسبقيني

على العربيه و احجزي لي كرسي ، مشيت الديوان لقيتو فااضي مافيهو زول اتلفتا ورا

عايزه اتحرك لقيت خبي في وشي عاين لي بإستغراب و عاينتا ليهو بإبتسامه .. لابس

بدله بُّنيه حوافها سودا۽ .. قميص ابيض ‏( حا انزله ‏) ، ساعه سليفر ، جزمه بني ،

عاينتا ليهو بإعجاب وانا شابكه اصابعي في بعض ..

خبي : هاا بشبه اولاد الناس .. ؟ وصلح البدله

لفيت حوالينو : يعني شبه كدا .. عدلتا المنديل الاسود الكان ف جيب البدله اتأملته

فيهو مسااافه من فوق لتحت دموعي جات جاريه مسكتها وانا بضحك فرحتي و انا

شايفاهو ببدلة الخطوبه لا توصف ..

خبي : يااااربييي مالك عايزه تقلبي سكينه انتي التانيه ؟

= ما مصدقه شايفاك عريس ،، ما مصدقه خطوبتك اليله اصلا ..

خبي : برضو ؟ يخوانا الكلام دا احق بيو زين ..

= فرحتنا بيك اكبر عقبال ما اشوفك في الكوشه ♡

خبي : امين ، و لغايه ما يجي اليوم دا وفري دموعك .. عاين لي : شنو الحلا دا كلو

🐾💙

ضحكتا وما رديت عليهو مسكتا طرف الفستان و ضغطتا على نفي وانا لسه بعاين ليهو

نزل راسو و قال لي : المكيااااج يااا آنسه !!.

ضحكتا : اغلى منك صاح ؟

دخل يدينو في جيبو بضحكه توتر : متوتر اوووووف ..

دخلتا يديني بين يدينو اضمو ، رجع بسرعه لورا

خبي : اقول ما بصافح تحضني !

= بس اليوم : ‏(

خبي : لا ، ما بقدر الدين مافيو لعب !..

بيأس : طيب

خبي : نود ، وقت الله هداني للقرار دا ما بقدر استثني زول حاضر يا بابا ؟؟

هزيت راسي بإبتسامه : حاضر يا بابا الشيخ 🐾💙

ضحك : ح امشي اجيب العروس مع زين ، تجي معانا ؟ زين ح يفرح انتي عارفه

نفسوا اختو تجيب معاهو العروس ..

= ااااا...... صحباتي !

خبي : امشي كلميهم و تعالي سرعه بستناك ورا الصيوان ..

= طيب ثواني و جايه . عايزه اتحرك وقفني

خبي : آسف اني شاكلتك قدام نمارق و منار

= ما مشكله لصالحي

خبي بٳبتسامه : دا كل همي والله

= و انا فهمته

جريت كلمته منار بالشباك لقيت جيلا قاعده جنبها معاها امها سلمت عليهم و استأذنته

. ركبنا مشينا الكوافير .. استنينا شويه قبل تطلع العروس فستانه بسيط محجب

تبارك الرحمن عليها ♡ العروس و العريس ركبو في عربيتهم و نحنا ركبنا في عربيه

صاحب زين مشينا قدامهم ... وصلنا الحفله رااابه اتوجهت انظار الحاضرين للعروسين

بينما اتوجهتا بنظري لصحباتي كلهم جو ما عدا شهلا .. رقصنا شويه لمن عيني وقعت

في نجوان تجبجب ساااي في نص الحفله لابسه توب حرير والمكياج دا ما يدك الدرب

ولا الدهب ‏( فلوس ابويا .. (💔💔💁☺

خُبي و ريتال جو داخلين ريتال لابسه فستان على جسمه برتقالي على مسترضى على

برتقالي على منقا المهم بنزلوا ليكم 😂 لونو حلو ،، ورده بيضاء على الناحيه اليسار

نهايتو على شكل زيل فاكه شعره و لافحه طرحه في اكتافه

لبسوا الخواتم وسط تصفير و زغاريت ،، حفتهم الفرحه من كل الحاضرين و انهالوا

عليهم بالتبركات 🐾💙 ما قدرتا اقاوم دموعي وانا شايفاهاو بلبس في ريتال

الدبله اتماسكنا انا و عمتي سكينا و قلبناها عزاء كنت مبسوطه بيهو شديد شايله

كاميرا في يدي صورتهم بيها صور عفويه .. شويه الحفلت سخنت

عاينتا لمنار الفهمتني طوالي و هزت راسه ، اتسحبنا براحه جيلا جات لحقانا ..

جيلا : ماشين وين انتوا ؟؟

عاينا لبعض : ولا مكان جايين ..

منار في نفس الوقت : بيت الجيران

= نشرب مويه

جيلا : بت جيران شنو و نحنا هنا ، ح تقولوا في شنو ولا دا سر ؟

ما عرفتا اتصرف كيف : ماشين بيتنا وجاين

جيلا : لشنو ؟

= نسيت حاجه هناك .

جيلا : انا عارفه انو دا ما السبب لكن طيب ..

خطت خطوه تمشي منار عاينت لي ، بسرعه مسكت يد جيلا و قولت ليها : صاح

معاكي حق .. نحنا ماشين ... وحكيت ليها ..

جيلا وهي ماشه قدامنا : طيب انا جايه معاكم ..

عاينا لبعض : و امك ؟

جيلا : ما ح تلاحظ مش ح نجي قبل الحفله تخلص ؟

= ما اكتر من نص ساعه

جيلا : خلاص زابط اصلا بتكون فاكراني برقص و هي بتتونس مع خالتك غادة ما ح

تلاحظ لي ..

بعد تفكير دام لثانتين ركبنا العربيه من مكانا ما اتحركنا عبير فتحت باب العربيه و

ركبت عاينا ليها كلنا ..

عبير : ماشين وين ومخليني براي ؟

منار دقت لي الدريسكون : سوقي سوقي خلينا نكسب الوقت قبل ما زول يحس ..

في الطريقه فهمنا عبير اننا ماشين بيتنا بس ح نعمل شنو ما وريناها .. وصلنا البيت

دخلنا بفتحه بورا كنت بهرب بيها وانا صغيره ‏( و لغايه هسا (💔💁 عشان مافي

حد يحس بينا فتحت باب الببت برااحه ، الانوار كانت مطفيه شلنا جزمنا في يدينا و

اتسحبنا زس الحراميه و قفنا قدام غرفه نوم نجوان ، دخلتا المفتاح براحه في باب

الغرفه ...

عبير : يخوانا انتوا مالكم بتتسحبوا زي الحراميه .. ؟؟ لمينا فيها التلاته قفلنا ليها

خشمه

عبير : امممممممم !!!... ‏( صوتها وهي مكمكه الفوه (😂

منار بهمس : اشششش اسكتي ، صوتك ما يطلع

عبير بذات نبره منار : يعني دا ما بيت ناردين ؟

منار بهمس : لا بيتها

عبير رفعت صوتها : طيب بتهمسوا مالكم !!..

تاني قفلنا ليها خشمه .. فتحتا باب الغرفه و اتسحبنا براحه و بدينا تفتيش .. السرير ،

الفرش ، المخده الدولاب .....

عبير كانت بتفتش في السرير رفعت راسها : لقيتو

اتملينا فيها : وينو ... ؟

عبير رفعت حاجه زي الحجاب و نورت عليها بفلاش التلفون : دا هو ؟

جيلا شالتو منها و قلبتو يمين و شمال : اي ياهو ..

عبير : مهمتنا انتهت ارح انا صوتي شويه و يختفي ..

= اي خلينا نطلع ..

منار : بنات تعالوا شوفوا دا شنو !! ..

مشينا عليها بفلاشات تلفوناتنا : شنو ؟

وجهت فلاش التلفون لي لمعدن صغير على شكل خزنه صغيره ملصقه في الحيطه

القفل قرصي مرقم

منار : لقيتها وراء اللوحه ...

عبير : افتحه ليكم ؟

جيلا : لا خلونا نمشي

= لا عايزه اشوف فيها شنو

جيلا : انتي مش شلتي العايزاه ؟

= احتمال القى شي ضد نجوان في الخزنه دي ...

جيلا : شنو ممكن تلفي في خزنه صغيره دي ؟؟ كلهاا ما تامه سنتم !!..

= خلينا نشوف .. عبير لو بتعرفي افتحيها ...

جيلا : بتعرفي و لا ح تفضحينا ؟ يكون فيها انذار لا حاجه دي رقميه !!..

عبير مشت قدام الخزنه : لا ما فيها ، بابا عندو خزنه زي دي شوفتو بفتحه كذا مرة

قدامي ..

جيلا : بس اكيد يعني ما عندها نفس باسويرد ابوك !

عبير : اكيد ما غبيه للدرجه دي !! .. مررت يدها في شعره بثقه قبل تقول : كنت بفتحه

من غير ما اعرف الباسويرد وسعوا كدا و خلوني اشتغل شغلي ...

عبير و قفت قدام الخزنه شبكت اصابع يدينها بثقه و مطتهم لقدام .. قربت من الخزنه

بهدوء ختت اذنها مع القفل القرصي .. دورت القرص بحركات انسايبيه .. شويه فتح

القفل ..

منار بدهشته : فتحتها ...

جيلا : ما اتوقعتها منك ...

عبير : يابت انا اختصاصي فتح خزن 🐾😌

= طيب خلينا نشوف الجواها ..

كان فيها شويه دهب و مفتاح بس !..

استغربتا معقوله نجوان ما خاته شيء تاني ؟ حتى الدهب الخاتاهو بسيط ! اتفحصتا

المفتاح بيدي اكيد خاته الدهب عشان تغطي على المفتاح و مفتاح شنو دا البختو في

خزنه ؟؟!

جيلا بيأس : م لقينا شيء مهم ..

شلتا المفتاح و خشيت الحمام لقيت صابونه مربعه طبعته فيها المفتاح بالجهتين...

نضفت المفتاح و رجعتوا مكانو .. رتبنا الغرفه زي ما كانت قبل نطلع .. بمجرد ما قفلنا

باب الغرفه نور الصاله فتح ..

___________

تفكتروا المفتاح دا حق شنو ؟ و ليه نجوان مخلياهو في خزنه ؟شنو الممكن يحصل

بعد ما اتكشفوا ؟؟ .

# معسلامه 🐾💙💁