الجزء 26

في احد المقاهي جلست تراقب عقارب الساعه بحرص بينما تُعدل " طرحتها " بين

الحين و الاخر وما إن بدأ الملل يتسلل الى داخلها حتى جاء شاب عشريني متوسط

الطول .. صبيح الوجهه .. غزير الحاجب .. صغير العينان .. اسمر البشرة يرتدي بنطلونآ

مسترضى و قميصآ ناصع البياض عانقته ساعه سوداء و خاتم فضي في بُنصر يده

الشمال .. ابتسم لها عن بُعد و اشارة هي الاخر بيدها نحوه .. تسارعت خطاه بلطف و

سلم عليها بحرارة .. جلس على كرسيه بهدؤ و اردف ..

= ياااه اخيرآ يابت خليل لميت فيك ♡♡

جيلا بضحكه : شكلك دخته شديد

حمزه : هو انا دخته وبس ؟ كلو يهون طالما وصلتا ليك ♡

جيلا : تشرب شنو ؟

حمزه : لا دا واجبي من بعدك .. رفع يدو خلال ثواني جاهو الجرسون طلبوا على

زوقوا بعدما اسأل جيلا الوافقت على زوقوا ..

# موليحظه 🐸

حمزه بتحرك اثناء ما هو بتكلم يعني ما بعرف يقعد بهدوء من غير حركه ‏( شويه

متلازمه فرط الحركه ‏) ..

جيلا بدهشه: متذكر بشرب شنو !

حمزه وهو بعاين ليها : و عمري ما حانسى ♤

كسر الصمت الساد بيناتهم : ما اطول عليك حا اخش ليك في الموضوع على طول

نحنا مجموعه من الشباب بنحاول نجمع اكبر عدد من اصحاب الهِمم الخاضوا تجارب

حياتيه صعبه قوتهم بعد معافرة .. بنستضيفهم في برنامج اسمو " لا يزال مُتسع "

البرنامج فكرتوا بث الايجابيه حوالينا بتعرض على السوشيال ميديا .. يعني ما حا

يكون في تلفزيون بس اطمني هو بقى معروف بعدما عملنا كذا لقاء ما كذا ضيف

معروف

جيلا : افهم من كدا انكم عايزين تسضيفوني ؟

حمزه : يب ، و حابين تنضمي لينا اذا ما عندك مانع !!..

حمزه : انتي عندك افكار جميله حا تساعدنا نطور من البرنامج و نحنا محتاجين ناس

زيك في المشروع خاصه انو شبابي بحت من انتاج لاخراج لتمويل .. دا غير خبرتك

في الميديا بما إنك من هُواة العالم الرقمي !

جيلا : و انت كيف عرفته اني من الهُواه ؟

حمزه : تقدري تقولي عملته دراسه عنك بحث و لقيتك عامله كذا دراسه عنو المهم ما

صعبه اعرف ..

جيلا : طيب ااا..

قاطعه : انا بقدم البرنامج لو دا بهمك يعني .. زميل قديم و كذا ... !!

جيلا بضحكه : مبدئيآ موافقه على الاستضافه بس الشغل محتاجه افكر مشغوله بكذا

شيء فا ما بعرف اذا جدولي حا يتيح لي اضيف ليهو عمل اضافي !

حمزه : اخدي وقتك ..

جيلا : تمام ..

عما الصمت ارجاء المكان 🐸

جيلا : اها كيف حياتك ماشه ؟

حمزه : العاطفيه ؟

جيلا خبت ابتسامته : عامه يعني !

حمزه : سنقل ، بائس ، تعيس يبحث عن زوجه 🐾💙😔

جيلا : الله يرزقكك ببت الحلال ♡

حمزه : مع اني لقيته لكن آمين يمكن تطلع احسن منها !..

هنا جيلا ما قدرت تمسك ضحكتا ابتسمت خفيف و غطتا بيدها .. حمزه سرح فيها و

قال بضحكه : بضّحِك ها ! ..

جيلا : ما قصدي بس كلامك ضحكني 😂

حمزه : يا ستي اضحكي اصلا شبهك ♢

جيلا : شنو الشبهي ؟

حمزه : الضحك ♡♡

جيلا : انت بتحاول تحنكني ؟

حمزه : لا بتغزل بس و الله !

جيلا : كماااان !...

حمزه بضحكه : شوفي انا لساني حلو خلقه .. حاجه ما بيدي فما ... تفهميني صاح

اتفقنا !

جيلا ضحكت : انت ما معقول ابدآ 💔😂

______________________

ريتال : يعني هي كانت عايشه في البيت براها ؟

خبي : اي

ريتال : و مافي واحد من اصحاب ابوها التقال طلبه لولدو ؟

خبي : طلبوا بس هي بترفض

ريتال :في حياته في واحد يعني ؟

خبي : لا ما عندها

ريتال : معقوله ؟ اكيد في واحد بس هي ما حاكيه ليك

خبي : ما علينا ، لقيتي موضوع لرسالتك و لا لسه ؟

ريتال : كدي خليك من رسالتي ، و جاوب على سؤالي في حياته في واحد

خبي : قولي عرفتي ان في حياته في واحد حا تستفيدي شنو ؟

ريتال : كل القصه اني حابه اتعرف عليها اكتر بما انها بتهمك

خبي : امشي اتعرفي عليها و صاحبيه و خليها هي التحكي ليك بنفسها مش احسن ؟

ريتال : هسي انت معصب كدا ليه ؟ مجرد سؤال سالتو ما بحتاج العصبيه دي كلها!

خبي : ما هو ما ممكن كل ما نتكلم تساليني بس عنها انتي مخطوبه لي انا ما هي !..

شال نفس : ممكن لمن نتكلم يكون محور كلامنا علاقتنا انا و انتي وبس ؟ عشان ما

بحب اجيب القولات زي النسوان !

ريتال : ناردين بقت قواله ؟ انت منبع سرها فيها شنو لو حكيت لي ... ؟!

خبي : ياربييييي .......

ريتال : طيب ما تزعل نفسك انا بس كنت حابه اساعدك تتعرف علي جوانبه العاطفيه

مافي بت ما بتعيش قصه غراميه في حياته خصوصي لمن تخش الجامعه لابد من

تتعرف على واحد تعجب بيهو خصوصي انها فاقده حنان الابوين دا قصدي ما اكتر و

لا اقل

خبي : طيب

ريتال : اممم .. رققت صوتها : عندي عرس صحبتي نهاية الشهر بكره ماشه السوق

اقص الفستان و اجيب كذا حاجه محتاجاها و قروشي بسيطه 💔

خبي : لغايه المساء حا ارسل ليك قروش في حسابك امشي اشتري العايزاه

ريتال بدلع : مافي داعي حبيبي انا بس بفضفض ليك !

خبي : عشان حبيبي دي في دواعي ، يلا شويه وارجع ليك ..

ريتال : اوكيه حبيبي ♡♡

فصل منها و قال في نفسو: مرة عرس صحبتي و مرة خطوبته عايزه ليها هديه و مرة

محتاجه حاجات ! اجيب ليها قروش من وين دي هسا ؟ معقوله ياخ الصرف دا !..

الوداني اخطب شنو بس ما كنت سنقل مرتاح .. ما تمينا شهرين و كل قروشي

قشطتهم !.. اااخ ياربي افرجه علي من عندك ما عايزه تقول عني بخيل 💔😪

______________

قعدتا مع امي لغايه العصر و طلعتا منها ، لقيت مجدي قاعد في بيت عمتي سكينه

سلم علي بالحضن اول ما شافني .. مسكني من يدي و قعدني جنبوا كان جايب كميه

حاجات .. دخلتا انوم بعد مشى كنت مرهقه شديد حيلي ما شايلني .. صحيت بطني

تصرخ جوع .. لبين ما صليت و صحصحتا شويه حضرتا شيء اكلو .. ختيت تلفوني

في الشحن قدام التلفزيون و قعدتا في السرير احضر .. جا خالد اكل معاي شويه جاء

خبي داخل .. خالد طلع بعدما خلص اكل و انا فضلتا اقلب في القنوات .. جاني اتصال

سحبت التلفون من الشاحن ورديت ..

= اهلين ياسر ..

ياسر : كيفك ؟

= الحمدلله و انت ؟

ياسر : كويس ، قالوا قبيل بتفتشي لي في الجامعه !

= اي صاح

ياسر : خير !..

عاينتا لخبي و قومتا من جنبو طلعتا برا

= ياسر ، كان في واحد صاحبكم قلد قروش قدامنا متذكرو ؟ يوم مشينا رحله مع

الدفعه كان جا معاكم اسمو غريب كدا !

ياسر بعد صمت : ااه عمر قصدك بنادوا تيراب ، اي مالو ؟

= بس دا عايزاك توصلني ليهو ؟

ياسر : عايزه تزوري قروش و لا شنو ؟

ببياخه : هيهيههي ظريف ، اجدع لي رقمو

ياسر : بتختصريني يعني ؟

= اختصرك شنو يااخ هو انت بختصروك ♡!..

ياسر : الطلس خلي و قولي عايزه بيهو شنو ؟

= اممم .. ينفع ما اقول !

ياسر : مع انو الحنك ماكل معاي جنبه بس راحتك ينفع 😅

= حبيبي يا يسو ♡♡

ياسر بضحكه : حا ارسلو ليك واتساب ..

= غريبه ما قولت لي تغار علي و جُملك المعتادة ديك متشاكلين و لا شنو ؟ 😂

ضحك : لا منفصلين ..

= ههه صدقتا ..

ياسر : جادي معاك انفصلنا

= بجد ؟

ياسر : جد ..

= ليه ؟

ياسر : ما اتفقنا ..

= ما حا تحكي لي يعني ؟

ياسر : بعد تحكي لي انتي ..

بغيظ : ياسر 🔥😒

ياسر شال نفس : خلينا نقول مشاعره اتجاهي ما حقيقيه و خلينا نقفل لهنا .

= يااسسسسر !...

ياسر : نود ، انا بتعافى تمامآ ؟

= طيب بس من متين الكلام دا ؟

ياسر : اسبوعين و شويه ..

= زعلت ليك والله كنتوا كبلز حلوين 💔😔

ياسر : ما تستاهل يزعلوا عليها ..

= لدرجه دي قافل منها ؟

ياسر : قولنا شنو نحنا ؟؟

= تمام حا اسكت .. هون على نفسك اتفقنا ؟

ياسر : ادعي لي 💔

= ربنا يجبر كسرك ان شاءالله ♡

ياسر : امين امين .. يلا ... تيت تيت تيت ...

زعلتا على ياسر شديد معقوله يتخلى عنها بعد الحب الحباها ليهو دا كلو ؟ ما مصدقه

والله صوتو بيوحي بكسرتو ما كان شايف بت غيره اكيد بكابر 💔

رجعتا قعدتا في السرير .. فتحتا البيانات دخلت الوتس .. جاتني مسج من ياسر فيها

الرقم و تحتا ملحوظه " سماعتو ما شغاله كلمي واتساب "

= طيب لمن يبقى اونلاين رسل لي .

ياسر : حاليآ اونلاين ..

= زابط ..

طلعتا من محادثه ياسر ورسلت لتيراب .. شويه رد لي ..

تيراب : ناردين تبع ياسر ؟

= بتعرفني؟

تيراب : ياسر كلمني اتفضلي ..

= ايوا , محتاجاك في شغل خلينا نتلاقى

تيراب : شغل شنو بالضبط ؟

= لمن نتلاقى حا تعرف ..

تيراب : سر و لا شنو 😂 عمومآ انا حا اجي جامعتكم قريب نتلاقى هناك

= لا مستعجله شويه لو ممكن بكره كيف و كيف ؟

تيراب : اوكي اتفقنا ..

= بينا شات

تيراب : دسيس ..

طلعتا من المحادثه رجعتا التلفون الشاحن .. دخلتا المطبخ عملت لي كبايه شاي ، شلتا

مراجعي طلعتا " الزقاق " اقرا .. اثناء ما بقرا حسيت بخطوات اتلفتا لقيتو خبي .. نزل

راسو متجنب فرع الشجره ختى لي التلفون في السرير

خبي : ما كنت عايز ازعجك بس جاتك كذا مكالمه شكلو الموضوع ضروري .. ختاهو و

مشى ما مسكتا تلفوني كويس الرقم اتصل رديت ..

بصوت راجف : الحقيني يا ناردين حا يقتلوني هددوني تاني انا خايفه ، خايفه شديد

..

_ عبير !

عبير : ايوه عبير غيرتا رقمي منهم ، عليك الله يا ناردين ساعديني و انا اوعدك ما

اكذب عليك و اقول ليك كل شيىء بس ساعديني ..

= طيب اهدي ، اهدي وين انتي ؟

عبير : في البيت

= ثواني و اكون عندك خليكي هاديه تمام ؟

عبير : ما تتأخري علي انا قاعده براي 💔

= مسافة السكه ما حا اتأخر ..

عبير بصوت مخنوق : عليك الله ما تتأخري علي ..

= حاضر يا عبير حاولي اهدي لغايه ما اجيك ..

بسرعه غيرتا ملابسي و جريت على بيتهم .. فتحتا باب الغرفه براحه لقيته قاعده في

نص السرير مكومه نفسها عليها بإنهيار و بترجف .. مشيت عليها بخطوات متسارعه

حاولته اهديها .. طول الوقت كانت بتبكي و مرعوبه ...

عبير بصوت باكي : قال لي حا افتنك و اقتلك حا يقتلني يا ناردين انا خلاص انتهيت

💔💔

= ما حا يقدر يعمل شيء لو عايز يإذيك كان عمل من زمان هو بس عايز يخوفك

عشان يستدرجك و يتمكن منك ، انتي ما تبيني ليهو انك خايفه اعملي روحك انو ما

فارق معاك عشان هو يخاف ..

عبير : بس انا خايفه شديد

= بعرف بس دي بيني و بينك هو ما لازم يعرف انك خايفه استقوي قدامو ، وهسا

قولي لي الحكايه بالضبط عشان نلاقي حل ..

عبير : اوعديني ما تكلمي زول !

= افتكر دا ما وقتو !

عبير : طيب طيب .. لمن عرفتا انو ببيع تراما كان بجرجرني اشرب و مرات بخت لي

في الكاس و انا بعمل فيها شربتو وبمشي بستفرقوا في الحمام بس كشفني و كان

= و انتي بعتي معاهم !

هزت راسه بأسف : لو ما بقيت منهم كان حا يوديني ورا الشمس .. انا عملت كدا عشان

ما امشي في السكه دي و الله العظيم اتجبرتة يا ناردين

= ليه ما بلغتي فيهم ؟ ليه ما بعدتي عنهم ؟

عبير : ابوهو لواء يا ناردين لواء اشكي الظالم لابو ؟ دا غير انو مهددني بحاجات تانيه

.. واجهشت بالبكاء 💔

= حاجات شنو ؟

ختت يدها في خشمه و هي بتبكي ..قربتا منها بهدؤ و ضميتا علي : قولي لي يا عبير

عشان اساعدك لازم اعرف اتصرف كيف دا وقت تواجهي بقوة ما وقت تضعفي !

عبير : هو كان .. كان .. لمن نكون برانا .. يعني فهمتي .. وطلع مصور دا كلو و هددني

بيهو قال حا يفضحني ... وذادت بكاء

بنهره : و انتي عقلك كان وين بعد سمحتي بحاجه زي دي ؟

عبير ببكاء : هو بجرجرني ..

قاطعتها بعصبيه : دا ما عذر ليك يا عبير

عبير : ناردين الشيطان شاطر و انا معترفه اني غلطانه و الله العظيم ندمانه و الله

العظيم توبته والله العظيم ...

= بت.. ما تكوني حملتي منو و تدخلينا في مصيبه تانيه ؟ اياكي تكذبي علي يا عبير

احكي ..

عبير : لالااالا والعظيم لا كلو كان سطحي ..

عاينتا ليها بزهج : بجد انا ما بعرف كيف بتفكري و وين بكون عقلك في لحظات زي

دي ياما نصحتك ..

عبير : انتي حا تبقي زيهم برضو ؟ انا حكيت ليك دونا عنهم عشان بتفهميني

= ليه القاعدين يقولوا غلط ؟

عبير : ما غلط بس مستنين فيني فرصه عشان يشمتوا فيني ...

= ماف حد شمتان فيك و لا في حد مركز معاك يا عبير و ان كانوا بشاكلوا في

تصرفاتك افتكر انتي فهمتي جدا السبب البخليهم يعملوا كدا و استوعبتيهو كويس .. !

وزي ما قالت شهلا لو ما كنا حاسبنك اخت ما كنا نبهناك .. عمومآ دا ما موضعونا و

خلينا نفكر في المصيبه القدامنا ..

عبير : انا عقلي مطبل تمامآ ما قادرة افكر في شيء

= حا نلاقي حل .. في كلامنا جاها اتصال .. عبير مسكت التلفون برعب و عاينت لي ..

= دا هو ؟

عبير بخوف : كيف عرف رقمي الجديد ؟ انا ما اتصلتا بيهو لزول غيرك !

= متأكده ؟ ... هزت راسه

= سجلي المكالمه ..

عبير : ما عايزه ارد

= لا حا تردي و حا تكوني ثابته و اياكي تخافي .. افتحي التسجيل اول قبل تردي

عبير : بس انا خايفه ..

= لازم تواجهي خليكي قويه و حاولي جرجيهو يعترف بكل عمايلو .. هزت راسا وردت

.. اشرت ليها تفتح الاسبيكر ..

انور : كنتي ما تردي يا بت الحرام قايله نفسك حا تخلصي مني لمن تغيري رقمك !

مسكت يدي قبل تقول ليهو : حرمت عيشتك يا باطل ..

انور : كمان طلع ليكي لسان تردي بيهو ؟ بسيطه بعرف بقطعوا ليك يا كلبه .. اسمعي

يا تجيني يا اجي جوه بيتكم المخستبيه فيهو دا ..

عبير عاينت لي بخوف مسكتا يدها طمنتها

عبير : ما جاياك و كان راجل تعال و خت رجلك في عتبت الباب انا ما خايفه منك و لا

من امثالك

انور : اووو بجد ؟ للدرجه دي مستغنيه عن نفسك ؟ يبقى ما تلومني لمن تلقي صورك

و فديوهاتك ماليه الميديا و هاشتاق " مقاطع سخنه لبت رنا صاحبة اكبر مراكز تجميل

في السودان " متخيله الهشتاق دا حا يعمل ضجه قدر شنو .. ؟ ناهيك لو جبته سيرت

رجل الاعمال امين حكمت "! ضحك بإستفزاز " لا ما قادر امسك نفسي 😂😂

عبير خافت ضغطتا على يدها قولت ليها بصوت خافت : استخدمي اسمو ضدو

عبير : و لا انا قادره امسك نفسي لمن الجرايد تكتب عن اللواء المعروف بنزاهتو ان

ولدو انور يبيع الممنوعات و يتصدر " قائمه المطلوبين " اي تهور منك ما حا اتردد

لحظه اني استخدم كل البعرفوا ضدك ما براك الذكي ! ..

عاينت لي هزت ليها راسي

انور ضحك بإستفزاز : اديكي قولتيها " ولد اللواء المعروف بنزاهتو " يعني ما حا

تقدري تثبتي شي عني .. خليكي في فتيلك بالله 😂

عبير : هاا فاكرني قاعده معاك المدة دي كلها غبيانه ؟ لا يا حبيبي اصحى انا عندي

البوديك في ستين دهيه من لما كنت بتبيع التراما لستات الشاي المتفق معاهم لغايه

المخدرات الجبتها معاك من مصر دا كفايه مني اكلم الشرطه بشقتك الفاتحه بيت

دعارة لاصحابك .. كمية المخدرات الحا يلقوها هناك كفيلع تلبسك المشنقه دا غير

الناس المستعده تبيعك ..

انور : المخدرات و اتباعت و الشقه بإسم صحبي ما اسمي قولت ليك خليكي في

فتيلك ..

عبير : افتكر ما صعب على الشرطه يا ولد اللواء انها تثبت فسادك لمن اصحابك يبعوك

و يتسلموا الادله العندي

انور بغضب : ادله شنو العندك ؟ حا اقتلك انا حا اقتلك

عبير : و الله الموت دا تاني حاجه بتاعت ربنا بس اي تهور منك اتجاهي ما حا تردد

في اني اخدك معاي ..

و فصلت الخط ...

عاينت لي بخوف و جسمها برجف .. هديتها و طمنتها

= ما حا يحصل شيء اطمني

عبير وهي بتفرك يديها ببعض : ياربي خاف ؟

= ما سمعتي كيف بتراجف اكيد خاف وبكدا ما حايقرب منك ، رسلي لي التسجيلات

و انسخي جزو منها عندك .. بس لازم اهلك يعرفوا الموضوع بقا خطر !!..

عبير : لالالا الا اهلي يا ناردين بحذرك تكلمي حد فيهم .

= ما انا الحا اكلمهم انتي حاولي كلميهم .. عبير اهلك حا يعرفوا يتصرفوا معاهو و

يختوا ليهو حد الموضوع كبير شديد و حا تدخل فيهو الشرطه و محاكم و قصص اكبر

مننا .. الافضل يكون عندهم علم و ما لازم تقعدي براك ابدآ وجودك لوحدك خطر

عليك فاهمه ؟

عبير : بس يا ناردين ...

= اسمعي ، ابوك لازم يعرف عشان يعرف يتصرف.

عبير : نظرتوا لي حا تتغير يا ناردين 💔

= قولي ليهو انهم ورطوك و انو ما كان عندك علم بعدين عمو امين بحبك شديد و

علاقتو معاك كويسه حا يتفهمك .. لو قولت ليك بنحلها برانا حا اكون معيشاك في

احلام الدليل عندك تاخديها تمشي بيها الشرطه و استشيري محامي انور دا ضروري

يتحاسب ويخش السجن

عبير : ابوهو لواء انتي مستوعبه ؟

= لو كان رئيس الدوله نفسو لازم يتحاسب دا بإذي غيرو من غير ما يفكر مرتين !...

القضيه كبيره و حا تعمل ضجه كبيره لازم تكوني قويه اشتباهو في قضية الحادث حا

يخلي الشرطه تلف شكوكه حواليهو ..

عبير : خايفه شديد

= ما حا يحصل لي شيء انور خواف المقويهو منصب ابو .. بس دا ما معناها ما

تاخدي حذرك منو الناس دي كعبه

عبير : ان شاءالله

عاينت للساعه : ايييك الوقت اتاخر شديد لازم امشي بعد دا الساعه داخله على 8

عبير : خليكي معاي شويه 💔

= ما بقدر خبي منبه علي ما اطلع بعد المغرب ..

عبير : اسفه حا اعمل ليك مشاكل

= يابتي عادي ، انتي روقي و اهدي و كل شيء بتحل ان شاءالله اتفقنا ؟

عبير : شكرا يا ناردين جبتك على مال وشك

= حا ازعل كدا !

عبير : طيب طيب ما تزعلي ..

طلعت معاي لغايه الباب لقاني عَمْر اخوها في الباب سلم علي و اصر يوصلني بعدما

عبير طلبت منو ..

وقف قدام الباب شكرتو و نزلتا خشيت البيت ..

استلمتني نمارق : كنتي وين انتي و جيتي من وين ؟ و دا منو الوصلك دا طلعتي ما

كلمتي زول !

= ما يخصك ...

خالد : كيف يعني ما يخصها ؟

اتلفتا عليهو : و الله هي ما مسؤوله مني عشان تسألني السؤال دا .. عمومآ انا كنت في

بيت صحبتيز و الوصلني دا يبقى اخوها " و عاينتا لنمارق "

خالد : انا بعرف انكم الاتنين ما بتترايدو بس ياريت اسلوبك معاها يكون احسن في

النهايه دي مرتي !

= انا محترمه انها مرتك يا خالد بس هي تلم لسانه مني عشان اسلوبي معاها يكون

كويس

نمارق : المو كيف و انتي بتطلعي على كيفك و بتجي على كيفك كاننا ما عايشين

معاك ؟ شنو يعني الواحد كان شاف فيك عوجه ما يعدله ؟

= انا ما صغيره عشان تعدليني و لا فيني عوجه زي ما بتقولي !

نمارق : طبعآ ما اتربيتي لا تالي لا والي مستنيه منك شنو انا ؟

خالد بنهره : نمارق ..

نمارق : ما قولت شيء غلط ! البت اتعودت انها تطلع زي ما عايزه من غير ما زول

يسأله انتي ماشه و ين و مع منو و على راي المثل الساب عادتو قلت سعادتو !..

= و انتي واجعك ليه ؟ كنتي من بقية اهلي ؟

نمارق : عايشه معانا في بيت واحد و محسوبه على راجلي و البتحسب على راجلي

بتحسب علي

طب خليكي في راجلك و بيتك و ريحي بالك مني عشان انا لا بعمل في شيء

يتحسب عليك و لا على راجلك حلو كدا ؟ دخلتا البيت جوه لاقيت خبي في الصاله ..

وقف قدامي ..

خبي : كنتي وين انتي في وقت زي دا ؟؟

بتزمر : اووووف و بعدين معاكم ، السؤال دا بالدور يعني ؟

عقد واجبو : نعم !

طبقتا يديني بزهج : كنت في بيت صحبتي و صلني اخوها ها تاني في سؤال ؟

عاين لي بإستغراب !..

= عن اذنك خاشه انوم اذا ما عندكم مانع

خبي : نحنا منو !..

= ما عارفه .. خطيت خطوتين وقف قدامي

خبي : انتي بتتكلمي معاي كدا ليه ؟

اتأفأفته بتزمر و مشيت .. غيرتا ملابسي و نومتا تاني يوم اتجهزتا بدري و مشيت

العريشه اشرب الشاي صبحته عليهم خالد رد علي و خبي ما اشتغل بي

= احتمال اليله اتاخر ما تستنوني على الغداء

خالد : لو حا تجي مع المغرب اتصل لي اجيبك

= اوكي زابط .. خالد طلع قدامي و انا طلعته وراهو

= خالد

مسك تلفونو : اي يا ناردين

خالد : بخصوص امس اسلوبي كان رد فعل مع استفزازه لي بكلامه و الا ما كنت

رديت كدا قدامك !

ابتسم : هي اتواقحت في الكلام عمومآ حصل خير .. لو طالعه اوصلك معاي ‏( عندو

اتوس ‏)

ابتسمت ليهو : اكون ممنونه ..

ركبنا وصلني مشيت الجامعه .. اول ما دخلته القاعه لمحته البنات ملمومه في تاليا

اللي كانت بتوريهم في خاتم خطوبته !!!... عاينتا ليها بإستغراب و مشيت اتجاه ياسر

كان قاعد في اخر بينش ورا اتجاه الشباك و بعاين برا .. قعدت جنبو .. كان ماسك

قبضة يدو بقوة بعد عروقو ظاهره .. عيونو مليانه دموع ساجنه مكانه ...

= ياسر انت كويس ؟

قام مني بزهج .. ضرب كتف منار من غير ما يحس لمن صادفه في الممر بين البينشات

.. مشيت الحقوا منار مسكتني

منار : سيبيو ما تسألي

بغضب : شوفتي الكلبه اتخطبت و بكل عين قويه بتفرجهم على الدبله قدامو الله يلعنه

ياخ !

منار حمرت اتجاه تاليا بغضب : ان شاءالله يضوي ليها كان فيهو نور ياسر

= كسرتو الله يكسره حبها بكلو 💔

منار هزت راسه : لا ما كسرتو ، ضايقتو الطريقه السابتو بيها بس

= ما فاهمه ؟

منار : شوفي هو قال لي ما تحكي لزول بس حا احكي لي و انتي ما تكلمي زول

= اتفقنا

منار : قبل اسبوعين كان اتشاكلو هي بدت الموضوع كان تافهه بس هي كبرتو شديد

تخيلي في شنو ؟ قالت ليهو تسيبي الباسكت و شنو شنو عشان معجباتك بقو كتار و

انا بغير و شنو شنو!..

= ليه هو قاعد يعبر واحده منهم بسببه ؟

منار : اساليني ! المهم ياسر حاول يلم الموضوع بس هي رفضت وركبت راس و يا انا

يا الباسكت ! و ياسر اصلا كان مخنوق منها ومن تصرفاته قام قال ليها في لحظه

غضب اعتبري البينا انتهى و فصله منها .. جات اتكبكبت ليهو و اتبكت وعدتو انها

تبطل غيرة و ما حا تطبلوا تاني ك العاده هو ما كان عايز يرجع ليها بس صعبت عليهو

و كان لسه في مشاعر ليها .. ورجعوا كويسين و احسن من زمان .. بدايه الاسبوع دا

جات قالت ليهو جاني عريس !

بإستغراب : اجي ؟

منار : تخيلي !.. المهم العريس مغترب و تقيل تخيلي ياسر قال ليها اجيب اهلي و

اخطبك رفضت ! عارفه ردها كان شنو لمن قال اجيب اهلي ؟ " و عاينت لي : " قالت

ليهو ما بشرفني اعرسك و لا بشروفني اناسب اهلك و ما بحبك لدرجه اعرسك و

رجعت ليك عشان تعرف اني جبته سيد سيدك و الخاتم كان في يدها !!...

بإنفعال : بت الحرام ... و اتلفت اتجاه ريتال ما واقفه .. جات تتمخطر في مشيته

اتجاهنا وقفت و مدت لينا الخاتم

تاليا يتعجرف : عقبال عندكم

منار عاينت ليها من فوق لتحت : بناخد العقبال من بنات الناس الغوووةلي

= ما من الرخيصين البتبعهم القروش و تشتريهم 😏

ريتال بذات العجرفه : الكلام دا لي انا !

.. و مشيت المكان متفق عليه الاقي تيراب .. لقيتو مستنيني سلمت عليهو و قعدنا .

= اتلاقينا قبل كدا نحنا

تيراب : جد ؟

= في رحله المشينا ليها قبل سنه جيت مع ياسر كان

تيراب : اووو معقوله يااخ ليه ما متذكرك ؛ غريبه بالعادة ما بنسى البنات البعرفهم

😅

= ما احتكيت بيك اساسآ كان شوفتك و انت بتقلد القروش بحزفيره انبهرتا بموهبتك

صراحه !

تيراب : ايوا تسلمي ♡

شبكتا يديني في الترابيزه : دا الانا جاياك عشانو عايزاك تقلد لي ..

قاطعني : شوفي انا بقلد صاح بس ك هوايه ما اكتر يعني ما معتمده شغل عديل !..

= و مالو استفيد منها ما خسران شيء !

سكت مسافه قبل ينطق : طيب و شنو عايزه يقلدو ليك ؟

= اوراق ..

تيراب : اووو لا انتي بعيده شديد انا ما لي في مشاكل يا روحي ..

= انا معاك من الالف للعشره قولت شنو ؟

تيراب : للدرجه دي مستعده تدفعي ؟ معناها خطيره الاوراق دي و انا ما لي في

ابلهدله و الله

= يا ود ما تنشف ! ثم انك مشيت بعيد كتيره سؤال و جواب ، و اهو يطلع ليك منها

قرشين حلوين يساعدوك في الظروف الصعبه دي !

تيراب : طالما ما واصله ما تمشي تصوريها او تطبيعها ؟

= الاوراق عندي في تلفون ما في يدي عشان اصوره ! و المطبعه حا تجيبه لي زي ما

في التلفون ما زي ما في الورقه !

تيراب : انتي مالك عايزه تدخليني في مشاكل يا بت الناس انا بسمع فيك لغايه اللحظه

بس عشان ياسر ..

= و عشان ياسر وافق ، اها قولت شنو ؟

تيراب قام : معليش فرصه سعيده ..

مسكتو من يدو : استنى .. فكيت يدو

= قولت ليك ما حا يحصل ليك شيء

تيراب : انتي شكلك بت ناس و محترمه الحنك دا انا ما لي فيهو ..

= طيب وصف لي زول بعرف زيك و يكون على ضمانتك

تيراب : انتي ليه مصره كدا ؟

= بدفع ليك لو وصلتني لزول ممكن يخلصهم لي يعني ما حا تطلع منها ببلاش

تيراب : انا ابتديت اشك فيك !.

= انا ما بسمح ليك !

تيراب : العفو لكن الموضوع مقلق و انا ما حمل قلق ، هاك دا رقم واحد ممكن يخلص

ليك بس هو حاليآ مسافر شهر كمان و بجي

= لا شهر شنو انا مستعجله شديد

تيراب : مع الاسف ما بعرف غيرو !..

= خلصهم لي انت طيب !

تيراب : قولت ليك لا

= و الله العظيم و الله العظيم الموضوع بالخطوره الانت شايفه كلو شقفه ورقه تقلده

لي و تمشي في حال سبيلك ! و حا ادفع ليك العايزو

تيراب : شوفي يا بت الناس انا ما مستعد اجازف مهما كان المبلغ اخواتي ما عندهم

غيري في الدنيا دي لا ام و لا ابو امشي الله يسهل ليك بس بعيد عني

= و انا ما عندي غير ابوي في الدنيا و حا اتحرم منو لو ما ساعدتني انت فاهم يعني

شنو حرمان الاهل ساعدني 💔

تيراب : ما فاهم ؟

شلت نفس : حياة ابوي مرهونه بالاوراق دي

تيراب : كأنك ما قولتي حاجه !..

= ما بقدر اشرح اكتر من كدا لو حا تسعدنا زابط و اذا لا بتقدر تمشي ، شكرا على

وقتك عن اذنك .. مشيت بزهج اني فشلته في اقناعه حسيتا مقفله معاي من كل

الجهات مشيت لامي قعدتا معاها شويه غادة اصرت اتغدى معاهم طلعت بعد المغرب

رجعني خالي التاج مع دخلتي لاقيت خبي ..

= كنت مع امي و اصرو اقعد معاهم مع اني كلمتهم اني ما بقدر بس خالي التاج

وصلني لغاية الباب و..

خبي و هو ماشي : ما سألتك .. طلع خلاني وافقه مستغربه ! شلتا اليل افكر هو

زعلان مني في شنو ؟

قطع حبل افكاري مسج من تيراب : طيب يا بت الناس دام فيها حياة زول انا حا

اساعدك بس اوعديني انك ما تعرفيني تاني !

= انت منو ؟

تيراب : تعجيبني ، رسلي الصور ..

________

=زي ما بقول ليك كدا الولد جاي من المانيا يعرس بس و يسوق مرتو ويمشي بيتو

زاتو هناك ، و هو لمن شافك في الاستوري اعجب بيك و سألني منك اذا مرتبطه

_ و قولتي ليهو شنو ؟

= لغايه هسا انا ما جاوبتو طلعت و قولت اشاورك اول

_ بس انا مخطوبه حا يعرفني

= مخطوبه ؟ يابتي انتي طيرة اقول ليك المااااانيا الماااانيا يعني طاقة القدر اتفتحت

ليك تقولي لي مخطوبه ؟ ياهو خطيبك البرسل ليك في الشهر الف و الفين دا ؟ انتي

طيرة ؟ انا بقول شنو و انتي بتقولي شنو ! .. عمامآ الموضوع راجع ليك حياتك و انتي

حرة انا بس كنت عايزه افيدك " رفعت صحن الكيك و اكلت بتأني "

سكت مسافه و هي بتقلبه في راسه : قولتي لي المانيا ؟

= هاك شوفي و شوفي البيت بعينك .. " فتحت الاستديو و مدت ليها التلفون "

اتأملت في الصورة لبرهه قبل تقول : جاي متين ؟

ابتسمت بخياثه : الاسبوع الجاي

= اسمعي انا حا افسخ خطوبتي بس ضمان ما حا يمشي لواحده غيري ؟

صلحت قعدتها : و الله دا شغلك بعد دا لكن من ناحية مكسراهو فانتي مطلعه حنانو ..

_ خلاص ردي ليهو و قولي ليهو سنقل ..

____

بينما تبحثين عن الافضل انتي تخسرين ما بين يديك ♡

# معسلامه 🐾💙🚶