الفصل الثاني عشر

بعد م اتنفشته فيهو النفشه دي ومشيت خليتو حسيت بنفسي عايزة اموت من الخنقه ولو م كنت اتفجرته وبكيت في حتتي ديك م كنت عارفه الحيحصل لي شنو كان ممكن عادي انهار من الزعل، صهيب حتى م فكر انو يخطي وراي خطوة او يحاول يبرر موقفو او يجادلني حتى، انا م اتلفته عاينته ليه بس انا متأكدة انو رجع وقف عادي، اصلاً انا من يوم م عرفتو وهو م بفرق معاه شي، بحاول يبين انو إتغير بس هو في الواقع حرفياً لسه م اتغير، لسه جواهو صهيب القديم البدوس على غيرو ومشاعرهم من غير اي رحمه، لسه جواهو الأنانيه الخلتو يبطل يكمل مع رنين وجى مثل معي ادوار وخلاني اصدقو، ورجع بين لي انو كذاب وتاني رجع لعب بعقلي وإستغباني وفي النهايه إتجاوز مرحله انو يهمو وجودي في حياتو وعاملني زي اللعبه في يدو ومشى اتزوج علشان واثق انو كل المريت بيهو زمان مهما غلط لو رجع قرب مني خطوة حأضعف قدامو وحأنسى كل شي، الحاجه الوحيدة الصح انو انا حرفياً ضعيفه قدامو شديد

عارفين الغلط وين؟م غلطو هو ابداً، الغلط غلطي انا لاني كنت معاه غبيه زيادة عن اللزوم، قدمته تنازلات عن حجات مفروض انا اكون متمسكه اكتر بيها، هو م بس بستغباني لا هو بستخف بي انا ك شهد لانو شايفني البت الجاهله لا تعليم ولا غيرو، المكانها بين 4 حيطان عادي ممكن يعمل الفي مزاجو وهي تتأقلم معاهو، م عارف انو انا اتجاوزته اسوأ لحظات حياتي براي وانا بتنازل علشان نمشي لقدام رغم اخطاؤ الما بتتغفر انا بتجاوز علشان بحبو وعايزاه ونفسي اكمل معاه وشايفه انو كل شي ممكن يهون طالما هو معي، بس على شنو ولمتين؟كل حاجه ليها حد يعني، ايوة انا يمكن اكون ضعيفه قدامو بس الضعف في حد زاتو لما يزيد عن حدو بولد قوة وتماسك يستصعب كسرو

انا حرفياً اكتفيت وجع من الحياة دي، اكتفيت خزلان، يعني بس نفسي حاجه تمشي معي عديل، نفسي احب حاجه وتلازمني من غير م تقابلني فيها عوارض، ليه لازم انا استحمل انا اعافر، انا اتمسك، بجد كل حاجه ليها حد والحجات الما لينا نصيب فيها افضل نفوتها بقناعه ونكسب زمنا وصهيب دة حرفياً من الحجات اللي م لي نصيب فيها ابداً لاني قدر م احاول اتجاوز كل شي كعب واخطي خطوة تجاهو هو برجعني خطوتين لورا، كل م افتح باب عليهو هو بقفلو في وشي خلاص اكتفيت وم عندي قوة تحمل لكل دة والله

إتصلته على بلسم م ردت، فضلته قاعدة ومقعدة ولدي جمبي، فجأة قام يبكي وقال عايز مويه، شلتو وبقيت لافه بيهو عشان اللقى ليهو مويه وبالفعل لقيت برميل الناس بتشرب منو سقيتو منو ورجعته قعدته في مكانا داك، م عديت ربع ساعه كريم بدأ يبكي من غير اي سبب وبكى م طبيعي بكى بتاع ضيق كدة قدر م حاولته اسكتو واحوم بيهو لسه كان ببكي وبدأ يرجع وعيونو دي فجأة بقت معلقه فوق والسواد مافي بس بياض العين، انا بشوفتي ليهو وهو بالمنظر دة إتخلعته وبقيت اصرخ وجاريه وبقول للناس ولدي ولدي اللحقو ولدي، مسكني ولد قال لي مالو، قولته ليهو م عارفه واااي ولدي، شالو مني وبقى جاري وبقول للناس الشارع الشارع ي شباب العيادة وانا جاريه وراهو وبصرخ والتوب بقع مني وبرفعو وجاريه وبقول ليهم ولدي واااااي

مسافه العيادة كانت بعيدة الولد كان بنط الترس القدامو وبجري ومخليني انا وراهو لغااايه م وصل قال ليهم ي دكاترة حاله مستعجله، الدكتور شالو بخلعه قال ليهو مالو، قالو ليهو م عارف بس امو جايه، كلهم اتلمو فيهو، جيت داخله قولته ليهم ولدي وينو ولدي مالو، مسكوني قالو لي اهدي، قولته ليهم اهدى كيف وولدي بموت قدامي

قالو لي م بحصل عليهو شي فهمينا مالو، بقيت ابكي، الدكتور قال لي بهرشه البكى م بفيدك فهمينا مالو عشان نقدر نساعدو، قولته ليهو م عارفه انا كان كويس م فيهو شي م عارفه فجأة بدأ يرجع، قال لي طيب اكل شنو او شرب شنوووو؟قولته ليهو م اكل حاجه وشرب مويه بس، واحدة قالت لي مويه من هنا جوة القيادة ولا مويه صحه؟قولته ليها مويه برميل،

الدكتور قال ليهم حاله تسسمم إسعاف سرعه يلا ي شباب، شالو الولد وطلعو بيهو جري وانا وراهو ببكي وبقول ليهم مالو، ولدي، كريم، فتحو الإسعاف ركبوهو وانا ركبته وراهو وبقو جوة الاسعاف يعملو ليهو في حجات كدة والدكتور هرشني وانا ببكي قال لي كيف طفل صغير زي دة تشربيهو مويه انتي م عارفاها نضيفه ولا وسخانه ولا الحاصل فيها شنووو؟

فضلته ابكي وانا شايفهه كريم م ظاهر من عيونو غير البياض، بقيت اقول ليهم مات؟كريم مات، ولدي مات واي، في دكتورة بقت تتكلم معي وتهدي فيني، وصلنا المستشفى نزلو بيهو جري دخلوهو غرفه كدة في المستشفى، لما جيت ادخل وراهم منعوني،

انا وصلته لمرحله اللاوعي بقيت ابكي بطريقه هستيريه وجنونيه وقعته في الأرض حتى بقيت ابكي لميت حوالي المستشفى كلها وماف زول قدر يهديني

بعدها بشويه وهم لسه م طلعو لقيت بلسم واقفه في راسي بتقول لي شهد، شهد في شنووو قعدت جمبي ومسكتني، قولته ليها بلسم كريم، كريم بموت جوة وم دخلوني اشوفو، قالت لي دة شنو البتقولي فيهو دة كريم مالو؟قولته ليها م عارفه بس عيونو السواد حقها مافي بس البياض بلسم شوفي لي ولدي مالو ي بلسم

جرت على الغرفه حاولت تدخل قالت ليهو انا دكتورة، الواقفين برة قالو ليها ممنوع، قالت ليهو انا خالتو لو سمحته، قال ليها واقفين في راسو اكتر من 15 دكتور ي ريت تحترمي الحاجه دي والولد كويس، جات راجعه، قولته ليها مالو؟قالت لي اصبري ي شهد بطلي البتعملي فيهو دة واحكي لي مالو؟

قولته ليها والله ي بلسم م عارفه اتصلته عليك م رديتي قعدته انا وهو قال عطشان شربتو مويه من اقرب برميل لاقاني و.. قالت لي شهد شربتيهو مويه من برميل؟انتي ايش ضمنك انها مويه نضيفه؟دة شنو الاهمال الانتي فيهو دة ي شهد معقوله؟ انتي م عارفه الحاصل في القيادة شنو؟كيف تضمني سلامة المويه دي انتي؟فجأة ونحن قاعدين جات مكالمه في تلفوني الماسكاهو هي في يدها ردت وقالت الووو؟ايوة نحن جوة على طول، شويه كدة وانا ببكي اشوف في وشي صهيب ومحمد واحمد داخلين مع بعض وصهيب طاير بإتجاهنا طير، لما وصلونا صهيب قال لينا في شنو والولد مالو الحاصل عليهو شنووو؟عاينته ليهو بإستحقار وكملته بكى، قال لي بنهرة انتي دي انا بتكلم معاك الولد مالو، قولته ليهو وانت مالك ومال الحاصل معاه؟قال لي بإندفاعيه وهو عايز يمد يدو علي قدام الناس م تقولي لي انت مالك اووووعى فهمتي بتكلم معاك جاوبي الولد دة م ولدك انتي براك فاهمة ولا لأ؟، محمد واحمد مسكوهو وهو بتقالع معاهم قال ليهم فكوني بالله ياخ انتو كمان، ، قولته ليهو اااايوة ولدي براي انت منو؟جاوبني كدة انت منو اساسا عشان كتبته اسمك مع اسمو في ورقه جاي تعمل إنك ابوهو؟

م ولدك نهائي فهمته م ولدك نهااائي؟

في دكتور قال لينا ي شباب عيب ياخي دة شنو البتعملو فيهو دة؟بلسم قالت لينا دة م وقتو والموضوع م بستاهل

محمد قال لي احمد امسكو بالله انا ماشي اشوف الحاصل محمد اتحرك صهيب اتحرك وراهو بسرعه، احمد قال لي وين كريم في غرفه؟بلسم قالت ليهو قصادك على طول وقفو جمب الباب وقفوهم، صهيب لزة الواقف قدام الباب وقال ليهو بقول ليك دة ولدي ي زول انت مجنون ولا شنو ودخل ومحمد اعتزر للواقفين برة و دخل وراهو

انا فضلته ابكي وابكي واحمد وبلسم قدر م حاولو يتكلمو معي م سكته، صهيب ومحمد تمو قريب النص ساعه في الغرفه وم جو طالعين

قولته ليهم اكيد ولدي حاصله عليهو حاجه علشان كدة م طلعو، انا ماشه اشوف ولدي، الناس دي طولت جوة ولدي مالو مشيت على الغرفه بلسم مسكتني قالت لي شهد، قولته ليها بصرخه بلسم م تمسكيني دة ولدي الجوة دى، احمد مسكني قال لي شهد عارفنو ولدك لكن انتي كدة م حتفيديهو انت فاهمه بالعكس بتضريهو، لزيتو عايزة ادخل الغرفه صهيب جا طالع واتلاقينا في الباب، قولته ليهو ولدي مالو عايزة ادخل مسكني قال لي م حيخلوك تدخلي مدخلنو العنايه، قولته ليهو عنايه شنو، شوفته دموعو جاريه قولته ليهو بصوت عاالي ولدي مالو قولته ليك ي صهيب جاوبني، مات؟كريم مات الله يخليك ي صهيب لو كريم ولدي مات كلمني قولي لي مات، قال لي م مات ي شهد كريم كويس، قولته ليهو طيب لييه بتبكي انت، ليه م عايزين تخلوني اشوفو ليييهه

قال لي العنايه ي شهد عشان وضعو يستقر ويراغبو حالتو فهمتي؟قولته ليهو طيب انا عايزة اشوفو، ليه م هم بخلوني اشوف ولدي قعدته في الأرض حتى بقيت ابكي وصهيب واقف بعاين لي بعد مسااافه نزل الأرض بقى يهديني فيني قال لي والله كريم كويس انا شوفتو بعيني قولته ليك قومي بطلي بكى، لسه زايدة في البكى والناس كلها تعاين لي، صهيب قال لي اسمعي الكلام عايني لي هنا رفع لي راسي قال لي انا شوفتو بعيوني م بتصدقيني انتي؟لسه كنت مواصله في بكاي قولته ليهو عايزة ولدي انا عايزاااهو ي صهيب، وسط عيون الناس الحوالينا ديك كلها مسح لي دموعي ضماني عليهو وقال لي هششششش خلاص حلفته ليك بالله إنو كويس خلاص بطلي بكى، بطلي بكى قولته ليك ياخي بس حيدخلوهو العنايه المكثفه عشان حالتو تستقر م عندك ثقه فيني انتي؟قولته ليهو إذا كلامك صحي ليه طلعته من الغرفه بتبكي لييييهه؟قال لي متوقعه شنو من زول اسي ولدو كان قدامو وبلعب معاهو يغيب عنو اقل من ساعه يجي يلقاهو كلو اجهزة؟قومي يلا سندني لغايه م قومني وهو ماسكني وبقول لأحمد جيب مويه، قعدني في كنبه كدة وبقى يمسح لي في دموعي وبقول لي خلاص قلنا بطلي بكى، لما احمد جاب المويه وجا، قال لي هاك اشربي مويه، نزلته راسي وقولته ليهو م عايزة شي انا، قعد جمبي فتح المويه ورفع راسي قال لي ماف حاجه اسمها م عايزة اشربي عشان تهدي وشربني ليها هو بنفسو، بعدها قولته ليهو حيخلوني اشوف ولدي؟عليك الله ي صهيب خليهم يخلوني اشوفو، قال لي رجعتي تبكي تاني؟طيب تمام بطلي بكى حأخليهم يخلوك تشوفيهو، في قعدتنا دي جات بلسم ومحمد واحمد ال 3 مع بعض، قولته ليهم اها ولدي وين والحصل عليهو شنو؟محمد قال لي بخير الحمدلله ووضعو مستقر، قولته ليهو عليك الله قول لي الحقيقة ي محمد، قال لي والله جادي معاك الزول دة حاليا كويس ووضعو مستقر لو م مصدقه اسألي دكتورة بلسم، بلسم قالت لي فعلأ كويس اسي نحن جاين منو ي شهد بس العنايه لضمان سلامتو خلال ال 24 ساعه الجايات ديل بعدها بتخرج عادي، قولته ليهم طيب هو الحصل ليهو كدة دة شنو؟ محمد.قال لي حاله تسمم، المويه الشربتيهو منها م نضيفه وغالباً فيها حاجه، احمد قال لي وصفي لي مكانها حأمشي اتكلم مع لجنه المتاريس عديل، قولته ليهو يعني المويه مسممة؟محمد قال لي للأسف، وصفته لأحمد المكان مشى وانا ساقوني ودوني الغرفه الفيها كريم، طبعا مفروض اعاين ليهو من برة بس ممنوع ادخل عليهو جوة كانو مركبين ليهو انبوب كدة

قولته ليهو صهيب هو م كويس ولا شنو مركبين ليهو الحاجه دي وهي دي شنو اصلا؟

قال لي كويس ي شهد دة انبوب معدة عادي، قولته ليهو مركبنو ليهو لشنوو؟عاين لي بنرفزة كدة لما شاف حالتي وانا ببكي فصل، جات بلسم قالت لي شهد حتبيتي هنا ولا حتمشي البيت؟ قولته ليها م حأمشي اخلي ولدي وراي طبعا، قالتً لي ولدك م حيخلوك.تشوفيهو تاني الا بكرة ونحن قاعدين يعني اكيد م حتحصل ليهو حاجه عشان حبوبتك م تقلق وانا م عايزة اخلعهم الدنيا ليل، هزيت ليها راسي وقولته ليها م ماشه، قالت ليهو ي صهيب اتكلم معاها، قال ليها اقول ليها شنو يعني؟م حتسمع الكلام عارفها انا خليها تقعد، فضلنا قاعدين وقاعدين معانا محمد واحمد وبلسم، شويه كدة محمد قال حيدخل يساعد الدكاترة في الحالات الباردة، احمد طلع وجا جاب لينا مويه وبارد وكدة، قالو لي اكلي قولته ليهم م عايزة، بلسم قالت لصهيب اكلت معاك هي في العمود الجابتو؟ علشان من الصباح نحن مع بعض م اكلت خالص

صهيب بقى يعاين لي مسافه، احمد قال لينا انا ماشي القيادة هنا اي مستجدات تلفون تمام؟صهيب قال ليهو تمام، طلع مشى بلسم قالت ليهو انت قاعد صح ي صهيب؟قال ليها ايوة م متحرك ماشي اي مكان، قالت ليهو طيب خليك معاها عليك الله وبرضو هي اتحركت خلتنا نحن بس القاعدين، بعد مسافه قولته ليهو عايزة اشرب!!

طلع العصير اداني ليهو قولته ليهو م عايزة عصير انا عايزة مويه، قال لي من الضباح م اكلتي لو قعدتي بحالتك دي للصباح حتقعي، قولته ليهو م عايزة قولته ليك، قال لي م هو لو م شربتي ولدك لو بقى كويس حتقعي انتي وم حتقدري تهتمي بيهو يلا هاك اشربي، برضو شربني بسيط بالغصب وفتح الكيكه اداني جزء منها قال لي يلا اسمعي الكلام، لما ابيتها دخل لي جزؤ منها في خشمي، الكلام دة نص الليل، فضلنا قاعدين ونحن ساكتين والناس بتتحاوم حوالينا لغاايه م في قعدتي دي حسيت نفسي نعسانهه تكيت راسي في يد الكرسي، صهيب قال لي عايزة تنومي؟هزيت ليهو راسي بمعنى لا بس انا النعاس كان غالبني، قام وقف على حيلو بقى ماشي وجاي وانا شبه جاتني غفوة بعد مسافه حسيت بزول برفع لي في راسي فتحته لقيتو هو جايب لي مخدة ورفع راسي وختاها لي قال لي حتعمل ليك وجع رقبه النومة دي، بقيت اعاين ليييه وانا م بين صاحيه ونايمه

كان واقف بتمشى في شباب اتنين جو قعدو جمبي على طول جا قال ليهم عن إذنكم بس ممكن تمشو لكدة شويه؟

زحو ليهو قعد جمبي، فضل طول الليل هو قاعد وحارسني وانا اتقلب يمين وشمال وكل شويه اسألو عن كريم، لما زهجته من الرقدة بجمبه واحدة قعدته عديل وبقيت ماسكه المخدة وخاته فيها راسي، جاتني صحيه كدة لقيتو مرقدني في رجولو، حاولته ارفع راسي فتح عيونو بخلعه وقال لي عايزة حاجة؟قولته ليهو لا م عايزة شي، قال لي رقبتك وجعتك؟قولته ليهو لا، وانا بحاول اغمض عيوني فجأة اسمع ليك صوت إطلاق رصاص، قولته ليهو بخلعه في شنو؟قال لي ماف شي اصلا طبيعي عندهم الحركه دي، المشكله انو الصوت كان قوي وقريب شديد كانو الرصاص دة بطلقو بكثافه وانا قلبي طار بقيت اقول ليهو صهيب في شنو دة رصاص حي عديل ي صهيب

قال لي م تخافي قلنا وبعدين المستشفى امان، قولته ليهو امان كيف وهي على بعد سنتنمترات من مكان الرصاص دة؟ختيت يدي في إضني وإطلاق الرصاص كان كثيف شديد صهيب مسكني وضماني عليهو، قال لي اهدي انا معاك وحاولي نومي م تركزي دي إجراءات روتينيه بمشطو بيها المنطقه من كلاب الأمن البهجمو على المعتصمين بس، حاولته ابعد منو وقولته ليهو لا رفع راسي وبقى يعاين لي وهو خااتي يديهو في وشي و قال لي والله ماف شي ي بت الناس كل يوم نحن بننوم هنا وبنسمع الحجات دي ف شنو إتطمني وبعدين حتى لو في ضرب رصاص تفتكري انا حأخلي يحصل ليك شي؟

بطلي خوفي يلا، جراني عليييه وشبه رجع رقدني في كتفو ولفه يدو حوالي و قال لي الدنيا ليل كملي نومك وصباح الله بخيرو ماف شي بجيك عايزة حاجه؟قولته ليهو بس مصدعه، قال لي مصدعه؟ من متين ليييه م اتكلمتي؟قولته ليهو م عارفه بس راسي واجعني، قال لي طيب خليك هنا دقيقه مشى 5 دقايق وجا راجع جاب لي حبه بندول اداني ليها وشربني مويه ورجع قعد جمبي قال لي يلا حاولي نومي عشان ترتاحي، شبه رجعته كملته نومي وانا خاته راسي في المخدة، جاتني صحيه من اصوات ناس لقيتو خاتي المخدة في رجولو ومرقدني فيها، إتحركته من جمبو فتح عيونو الدنيا كانت صباح مسح وشو بيدو وضغط على عيونو شديد قال لي بصوت مبحوح اصبحت متين كدة؟قولته ليهو م عارفه الحمامات بي وين؟سأل لي من مكانها مشيت غسلته وشي وجيت راجعه لقيت بلسم ومحمد قاعدين معاهو جيت قولته ليهم صباح الخير اها كريم صحى؟بقى كيف؟محمد قال لي كويس الحمدلله كم ساعه كدة للمساء بطلعوه، قولته ليهو م حيخلوني اشوفو؟قال لي صعبة شديد انتي عارفه العنايه دي حساسه شديد وصعب يدخلها اي زول فهمتي؟انتو نايمين من امس في الكرسي دة؟صهيب عاين لي وقال ليهو ايوة، بعدها فضلنا قاعدين جابو لينا الشاي، والفطور م اكلته طبعا، فضلناً قاعدين بعد اذان الضهر كدة مشينا صلينا وجينا راجعين انا وبلسم نتفاجأ بدكتورة رفأ قاعدة مع ناس صهيب، جينا سلمنا عليها قالت لي حمدلله على سلامه الشاب دة كمان، قولته ليها الله يسلمك، قالت ليهو غايتو ي صهيب بالغته على الأقل إتصل كلمني بالحاصل وبعدين الولد دة كان كويس لأخر لحظه كنا فيها مع بعض يعني لو م إتصلته على احمد وسألتو منك م كان عرفته، لاني مشيت الترس بتاعك م لقيتك، صهيب قال ليها اسي كويس الحمدلله،

اتحركته من جمبهم وانا ماسكه اعصابي بالجلاله، قعدته في مقعد بعيد عنهم وانا بعاين ليهم بغيظ وكره شديد، وكل م صهيب يعاين لي بلف وشي منو وبعمل روحي م شايفاه، لغااية م جات الساعه 4 خرجوهو من المستشفى لمن م صدقته انو كويس وشايلاهو قدامي بعد حالتو الكان عليها ديك، صهيب شالو مني وطلعنا من المستشفى محمد جاب الادويه وقال لي دة تديهو ليهو كل وجبه، ودة كل 8 ساعات، قولته ليهو طيب، قال لينا دقيقة اجيب العربيه عشان اوصلكم، صهيب قال ليهو جيب المفتاح انا بوصلهم، قولته ليهو ماف داعي حنأجر عربيه بتوصلنا، صهيب عين لي بغيظ وقال لمحمد وين العربية؟محمد قال ليهو تعال معي انتو خليكم واقفين هنا وي شهد بطلي قوة راس بالله،

مشو حكايه بتاعه 15 دقيقة جو راجعين ركبنا وإتحركنا، كان غضبان وانا بعاين ليهو في المرايه م كان برفع عينو بعاين لي من شدة الغضب، لما وصلنا البيت بلسم نزلت ومسكت مني كريم ومشت على الباب، لما جيت عايزة انزل صهيب قال لي شهد!!!

الولد دة خلي بالك منو عليك الله تمام وبطلي البتعملي فيهو دة سبب واحد يخليك تجيبيهو القيادة وسط الاجواء الما ضمان دي مافي ي ريت تسمعي الكلام وإنتي زاتك لو م جيتي القيادة يكون احسن، قولته ليهو دقيقة دقيقة كتر خيرك وبارك الله فيك على وقفتك الامس بس دة م معناها إنك عندك صلاحيه تحدد لي امشي ولا لأ تمام؟وم انت البتوصيني على ولدي واناحرة ي سيدي!!! قال لي حرة في نفسك م في الولد، قولته ليهو لا حرة في الإتنين، قال لي قولتي كدة؟

قولته ليهو ايوة وبعدين اقول ليك حاجه او اسألك سؤال؟انت للأن م م طلقتني ليييه؟نحن وصلنا لطريق مسدود انا حرفياً م عندي نفس أكمل معاك ولا بأي شكل من الأشكال ولا طايقة العيشة معاك بعد الشوفتو منك والعيشتني ليهوف م تعلقني بالحبل الرابطني بيهو دة كتير وسلمني ورقتي في اسرع وقت ممكن واي زول يمشي في حال سبيلو يكون احسن، سكتت مساافهه واخد نفس عميق وقال لي معاك حق افضل حل انو نختصر كل شي و نحسم الفارغة دي كلها ...

إقتباسهه

شخص مثلي لن يفلت يدهه إلا عندما يتفتت قلبهه من المحاولهه...

"معليش ي جماعهه خليتكم تنتظرو، امس نمت وانا بكتب فيها والتلفون في يدي، صحيت لقيت تلفوني واقع مني وإتكسر كمان "

نتلاقى®