الفصل السادس عشر
عموما انا واحدة من البنات البمشو القيادة وايوة م بت ناس حسب اعتقادك اللي م ليهو اي تلاتين لازمه بس حاسب وخلي بالك من اخواتك م يكونو هم كمان م بنات ناس من وراك وكلنا نطلع جوة الجك، قال لي اعصابك اعصابك ي بتنا انا قلته ليك اخديها ك نصيحه م عجبتك اعتبري نفسك م سمعتي من غير م تشخصني الموضوع، قلته ليهو اساسا دة الحيحصل بالزبط بقى يعاين لي بغضب ...
قلته ليهو خلصته ولا عندك حاجه تاني عايز يساعدوك فيها؟م ردة لي على طول اتحركته خليتو كنت طالعه ماشه الاستراحه قبل م اطلع المشرفه ندهت علي قالت لي شهد خلصتو؟قلته ليها م عارفه والله لكن تقريباً خلص، قالت لي طيب
حسيت نفسي مرتاحه نفسياً لاني رديت عليييه لو كنت سكتته كنت همووووت غييييظ بس
نهايه اليوم اخدته مرتبي كان 4 الف طلعته مشيت القيادة كنت خايفه اتلاقى مع صهيب بس في نفس الوقت كنت بتلفت ونفسي اللحمو حتى لو من بعيد في كل التروس المريت بيها م كان فيها، اتلاقيت مع بلسم قعدنا نص ساعه، ومشينا وقفنا في التفتيش اكتر من ساعه بعدها طلعنا مشينا، بعد م طلعنا قلته ليها اليوم عازماك، قالت لي شنوووو؟قلته ليها النفسك فيهو بس ه، قالت لي احلفي؟طيب انا عايزة قفه فرح، قلته ليها اننننننننننننن م تنفعلي م للدرجه دي انا قلته ليك عازماك تقولي لي قفه فرح؟دقيقه اغير راي
قعدت تضحك قالت لي احلفي انك جادة؟قلته ليها حصل انا قلته ليك شي وكذبته عليك فيهو؟قالت لي مقولات بشششه دي م تقوليها لي قلته ليها وربي تتعولقي اغير راي اسي قالت لي خلاص اوكيه اممممممممممم نفسي في شاورما من انس واصابع بطاطس وبيبسي ومخلل وبس قلته ليها بس؟بس ي وسخه؟قعدت تضحكك، قلته ليها طيب يلا مش عندو فرع في مكه هنا؟قالت لي يب يب...
مشينا اكلنا وطلبته لناس بيتنا ودخلته السوبر ماركت اشتريت كميه من الحجات للبيت ولكريم ودخلته محل بتاع اللعاب كدة اشتريت لكريم عربيه ودميه سوبر مان ورجعنا البيت، كنت مبسووووطه شديد احساس انو تشتغل وتشتري حجات من مرتبك الخاص الانت تعبان فيهو م كان في احلى منو، اي نعم يمكن بسيط بس على الاقل جايني من حاجه انا عملتها، رجعته وانا متحمسه على امل انو القى كريم صاحي بس لقيتو نايم
نمت وانا مبسووووطه صحيت على صوت العربيه الجبتها لكريم، فتحته عيوني لقيتو بحبى بيها في الارض، قلته ليهو حبيب ماما، اول م سمع صوتي قال لي ماما، قلته ليهو بصوت نعسان روح ماما
قال لي بلغه الاطفال "حبوبه قالت ليك ثكرا"وباسنيً في خدي وهو خشمو ملان شوكلاته، بعدها قال لي ماما انتي حوهه"حلوهه"وتاني رجع باسني، شلتو رقدتو جمبي وضميتو علي شديد وبوستو، م بتتخيلو احساسي اللحظه ديك كان كيف، قلته ليهو حبيب ماما انت، عجبتك العربيه؟حأجيب ليك تاني واحدة كبييييرة
شلتو وطلعته بيهو برة لحبوبه قالت لي جا قال ليك شنو ملى ليك وشى بالنصيب دة كدة، قلته ليها قال لي حبوبه قالت ليك شكراً ضحكت قالت لي شوفي الشافع العوير دة انا قلته ليك قول شنو ومشيت قلته ليها شنو انت؟قلته ليها صحاني من النوم عشان يقول لي الكلام دهه قالت لي غلباوي زي اشغالك زمان لي جدك الله يرحمو، قلته ليها الليله الفطور شنووو؟قالت لي ملاح ام رقيقه بكسرة، قلته ليها ي سلاااام ومعاها شطه خدرة بدكوة زمن منو والله
قالت لي تعالي كدة اقعدي لي هنا، لما قالت كدة قلبي عمل شححح قلت معناها صهيب جاها، قلته ليها بصوت مبحوح في شنو خير؟قالت لي انتي كل يوم ماليه التلاجه دي حجات وم بتتاكل لانو نحن برانا والله بوزعها للجيران واولاد عربيه النفايات بدل تبوظ ساي، ي بتي قروشك م تبزريها ساي لميها دقي بيها دهب بجي يوم تحاجيهو، قلته ليها ي حبوبه دهب شنو عليك الله ياه هي وينها القروش البدقو بيها دهب انتي قايله الحجات دي بقروش كتيرة؟قالت لي ي بتي كان جنيه بتسمى قرش ولو لميتيهو ببقى قروش الزمن والدنيا م معروفه ي بتي، قلته ليها حبوبه الدهب العندي اسي انا عملته بيهو شنو؟مش مجدوع ومركون في الدولاب؟قالت لي بجي اليوم الاسود البتحتاجيهو فيهو، قلته ليها طيب ي حبوبه حاضر
قالت لي عارفه راسك قوي، ضحكته وقلته ليها انا م بخاف من الدنيا طول م انتي معي، قالت لي هي لكن انا دايمه ليك؟قلبي قبضني لما قالت كدة، قلته ليها م تقولي كدة ي حبوبه وربي ابكي ليك اسي حتفوتيني وين انتي يعني
قالت لي الدنيا دي فراااقه ي بتي، قولته ليها حبوبه الله يطول لي في عمرك وخلاص ياااخ وبعدين بالمناسبه انا عايزة اديك حاجه، قالت لي حاجه شنووو؟قلته ليها دقيقه، مشيت فتحته شنطتي طلعته قروش وجيت قلته ليها تفضلي ي حجتي، قالت لي ديل شنو ي بت؟قلته ليها امس صرفو لينا مرتبات وبما انو دة اول مرتب شغل اشتغلو ف انتي ليك النصيب الاعظم فيهو
قالت لي شنوووو؟بري وحات الله م بشيلهن، دي قروشك وتعبك ي بتي والله م...قاطعتها قلته ليها م تحلفي ساي ي حبوبه م هو علشان دي قروش شغلي لازم تشيليها ان شاءالله ختيها ساس انا عارفاك م محتاجاها، قالت لي ي بت، ختيت القروش قدامها وقلته ليها م تناقشيني، قالت لي طيب وريني صرفو ليك كم؟ربعته ليها صوابع يدي ال 4 وانا ساكته، قالت لي بس؟قلته ليها قابله للزيادة حسب اجتهادي، قالت لي بري وحات الله تعب المشي ساااي دة حالتو صاحب راجلك؟، ضحكته وعملته نفسي رايحه وغيرته الموضوع على طول علشان م تنق
كنا داخلين على رمضان، بتزكر اني مرة جبته لصهيب 3 جلاليب "على الله"بي طقمها كامل بدون سبب، حتى هو ضحك علي وقال لي دي في شيله م حصلت لكن ي زوله بخزنهم لرمضان لانهم م بتلبسو سااي يخخ قلته ليهو امممم طيب اوعدك انو كل رمضان يعدي علينا مع بعض حأشتري ليك واحدة، رغم انو كان م بحبهم بس بتزكر في يوم جمعخ كنت بتناقش معاه في موضوع انو يلبسها للصلاة وم يلبسها، قال لي انا نفسي افهم قصتك شنو انتي مع العلى الله دي انتي؟
قلته ليهو بصوت طفولي كل القصهه انو انا بحبهم فيك بس بما انو انت م بتحبهم م حأقول ليك البسها ابداً وم حتشوفهم في دولابك اصلا"ً
ابتسم بخباثه وهو بمسح في لحيتو، عملته روحي زعلانه مشيت فتحته دولابي وبقيت انزل فيهم، جا مسكني ولفه يديهو حوالي وقال لي وانا ي ستي بحب اي حاجه بتحبيها انتي، مش العلى الله دي من اللحظه دي انا بحب حنانها زاتو حانوم بيها واصحى بيها وفي احتمال كبير اني امشي بيها الشغل زاتو اها كيف معاك، ابتسمته وانا عامله روحي زعلانه، قال لي طيب رايك شنو الليله امشي بي واحدة الشغل؟بقيت اعاين لييهو، اتجهني على الدولاب وقال لي يلا على السريع كدة ارح اختاري لي واحدة امشي بيها اليوم هم زاتهم باردات ومريحات وافضل من البناطلين والاقمصه بمليون مرة
بعد ربع ساعه وانا سرحانه اتزكرته انو فاضل معي 1500 بس عايزة اشتري منها لخالي هديه ولصهيب على الله ومحتارة بينهم اليوم التاني كان الجمعه، م كنت شغاله، ، جاتني بلسم بقينا نتونس قلته ليها عندي 1500 عايزة اجيب لي خالي هديه بس م عارفه اجيب ليهو شنو قالت لي بتجيب ليهو هديه حنينه، بعد مسافه قلته ليها بتردد اممممم م المشكله انو انا م عايزة اشتري ليهو بيها كلها لاني عايزة اشتري منها جلابيه على الله لصهيب كمان
بقت تعاين لي ونظرتها غريبه كدة
قلته ليها بصوت طفولي م تعايني لي كدة انا اصلا متعودة اجيب ليهو هديه في رمضان حتى لو كنا م مع بعض دة م بيمنع اجيب ليهو صح
قالت لي شهد ابصم ليك بالعشرة صهيب دة حيجننك، حيجننك شنو دة جننك وانتهى الله يعينك حبيبتشي انا م لاقاتني اندل منك
بقيت اعاين ليها قالت لي م تعايني لي كدة، عامله فيه أسترونق اندبندت وووومن شبكتينا عايزة اشتغل وانساه واتغير وبتاع، وانتي ي يمه فلاوله اخر حاجه كان عطستي ساااي بتقولي صهيب
قلته ليها خلاص خليتو اها
قالت لي لا م تخليهو بس انتي م حاسه انو هروبك من صهيب برجعك عشرة خطوات لورا وبخليك ترجعي تفكري فيهو اكتر من اول؟اكبر دليل على كلامي دة انك متزكرة موضوع العلى الله دة
قلته ليها عايني م تتفلسفي لي وقولي لي اجيب لصهيب شنو، اقصد لخالي شنو؟
ضحكت وقالت لي صهيب لكن قلته ليها ياخي بطلي
قالت لي طيب جيبي لخالك ساعه وعطر وخاتم فضه او سبحه، وجيبي لي صهيب العلى الله م بتفوت ال 600 او 700 بالكتير، قلته ليها طيب تمشي معي؟قالت لي م وراي شي ارح على طول
بالفعل مشينا اشترينا الحجات ورجعنا قالت لي هاااا ي ظريفه حتديها ليهو كيف؟
قلته ليها خالي؟عادي م فيها شي
قالت لي خلعه تجيب اجلك، انا قصدي صهيب م تتغابي
قلته ليها م عارفه والله بس بقلى طريقه انا م عايزة اشوف وشو بس ممكن اديها لي احمد ولا محمد يوصلها ليهو
قالت لي لا ي هبله احمد ومحمد شنو كمان، عايني في طريقه ظريفه ومميزة ممكن تديها ليهو بيها، ركزي معي نحن نقوم نجيب لينا بوكس هدايا صغير كدة نضيف ليهو ساعه وعطر فتيله عليها ورقه نفس فكرة برطمان السعادة، حاجه كدة تكونزكيوت ومميزة ولو انتي بالجد في بالو زي م هو في بالك كدة ومتزكر كل شي حصل بينكم بالحرف الواحد بشكل تلقائي حيعرف انو انتي العامله الحركه دي وصدقيني حيجي يتكلم معاك
قلته ليها اممممم
قالت لي م امممممممممم ولا حاجه نطلع اسي نجيب الحجات ونظبطها لانو رمضان بالكتير بعد يومين من بكرة
قلته ليها ومحن حنجيب توصيل من وين؟
قالت لي انتي مالك خليها علي انا حكايه التوصيل دي
قلته ليها معناها حاستلف منك قروش م عايزة اشيل من حبوبه، قالت لي زابط يلا ارح معي البيت اول بعدين نطلع نمشب
بالفعل مشينا وجينا راجعين ظبطناها فضل الفتيل العليهو ورقه ومفروض اكتب عليها حاجه
قالت لي دقيقه اشوف ليك اقتباس ظريف اكتبو ليك
قلته ليها لا خليها فاضيه كدة
قالت لي لييييه؟
قلته ليها هو لو عرف انو الهديه دي مني انا، حيعرف انا قاصدة شنو بالفراغ دة
قالت لي اوكيه، معناها حاتصل لبتاع التوصيل يجي يشيلها يوصلها،
المساء كدة جا كان سايق موتر ا
يناه البوكس ورقم صهيب، قلته ليهو ممكن تتصل عليهو اسي؟قال لي جداً
اتصل على صهيب في البدايه م ردة عليهو، تاني رجع ليهو اول م ردة انا قلبي كان عايز يطير
الولد قال ليهو السلام عليكم؟صهيب قال ليهو وعليكم السلام، الولد قال ليهو معاك خدمه التوصيل، انا عندي بوكس مفروض اوصلو ليك بس عايز اعرف عنوانك وين بالزبط عشان اصلك
صهيب قال ليهو بوكس؟من منو بالزبط
الولد قال ليهو والله م عارف انا طلبتني واحدة وادتني البوكس دة وادتني رقمك
صهيب سكتت مساافه بعدها قال ليهو انا م موجود في البيت والله بعيد منو بس ممكن اديك رقم زول ممكن يستلمو منك، الولد قال ليهو طيب ممكن برضو
زي م اتوقته اداهو رقم احمد
قلته لي بلسم عامله فيها افكارك رهييييبه ياهو زي م شايفه في الاخير حيستلمها احمد يعني من البدايه لو اختصرنا الموضوع مش احسن من اللفه دي كلها،
قالت لي ي هبله م في الاخير هو مبدئياً حيكون عارف انو انتي المرسلاها دة المغزى من اللفه دي كلها هنا ي طيرة اعلمك ولا اربي عيالي انا
قلته ليها بما انو في القيادة وحيستلمها احمد هو م حيهتم ولا حيركز معاها كتير حيقول لاحمد استلمها وخليها معاك
قالت لي يلا ننتظر ونشوف م خسرانين شي
على قدر م كنت متحمسه ئسته ومزاجي اتعكر، اليوم التاني صحيت زهجانه من الصباح جهزته مشيت الشغل وكنت طول اليوم بلوم في نفسي وبقول ي ريت لو م اشتريت ليهو الهديه، اساسا مشترياها لشنوو على اساس انو قاعد يتزكرك او يجيب خبرك غبيه ي شهد وندله وم عندك كرامه كمان نسيتي لما قال واحدة من الحجات الطلعت من نفسي انتي بالجد انا ندله ندله ندله
في وقفتي ديك فجأة اسمع زول بقول لي "فكي المحنه وعايني لينا نحن"اتلفته لقيتو الفوتغرافر الاسمو فوكس ولا بطيخ دة، جا سلم علي وانا على زهجتي دي شايفاه عشرة عشرة
قال لي كيفك؟
قلته ليهو اهلين الحمدلله
قال لي انتي زولهوصغيرة شايله هم الدنيا مالك؟
قلته ليهو يعني كل زول خاتي يدو في خدو وسرحان معناها مهموم؟
قال لي بالنسبه لي اااايوة
قلته ليهو وبالنسبه لي لا
قعد يضحك قال لي انتي مالك جادة كدة ياخ؟حاولي خليك ريلاكس شويه دايماً
بقيت اعاين ليهو وانا ساكته، بقى يتونس معي وفتح ليهو مواضيع وانا بقيت باخد وبدي معاه في الكلام بعد مسااااافه عاينته لتلفوني لقيت الساعه 7، قلته ليهو معليش بس عايزة امشي اصلي المغرب لانو زمن الصلى دخل وفات، قال لي شكلها دي توزيعه م اكون مسكته بيك زمن؟قلته ليهو لا والله ابداً بس زمن الصلاة وكدة
قال لي طيب اتفضلي نتلاقى مرة تانيه، قلته ليهو ماشي، مشيت صليت وقعدته مسافه علشان م ارجع اللقاه بالفعل رجعته وم لقيتو، وقفته في محلي جو زباين لفيت معاهم نزلنا طلباتهم وديتهم محل الحسابات اثناء م انا بحسب في القطع تلفوني ضرب، والمتصل منووو؟صهيب
اتلخبطته طبعاً وم قدرته اكمل حساب قلبي بقى يحمل شح، قلته ليهم عن إزنكم،
مشيت خليتهم مع ناس الحسابات، م رديت وبقيت متنحه في التلفون وعيوني مزغللات قلت معناها احمد وصل ليهو الهديه فضلت ماسكه التلفون لغايه م فصل، بقيت اقول ي رب يرجع يتصل، ي رب، ي رب، فجأة رجع اتصل بعد مساافه فتحته الخط وانا ساكته، قال لي الووو شهد
قلته ليهو اهلين
قال ليك كيفك؟
قلته ليهو الحمدلله
قال لي الحمدلله، وكريم وحبوبه كيف؟اليوم حبوبه تلفونها قافل لييه خير ان شاءالله
قلته ليهو كريم كويس الحمدلله، حبوبه يمكن شححن تلفونها خلص عايزها في حاجه ولا شننوو؟
قال لي ايواااا علشان كدة، لا بس اتصلت اسلم على كريم وعليها واتطمن عليهم "لاحظو اتطمن عليهم "
قلته ليهو بغييييييظ لا هم بخير الحمدلله، اتصل عليها بكرة بتلقى تلفونها فاتح
قال لي لا انا اصلا جايكم بعد نص ساعه كدة في موضوع كدة عايز اقعد اتكلم معاك فيهو
ضربات قلبي زادت قلته ليهو بنبرة خلعه جاي علينا وين؟
سكت م رد علي
قلته ليهو اقصد متين؟
قال لي بعد ساعه بالكتير
قلته ليهو امممممممم بس انا برة البيت
قال لي برة البيت وين في الزمن دة؟
سكتته بقيت افتش لي في كذبه بعد مسافه قلته ليهو جيرانا عندهم عرس عزمونا مشيت معاهم الصاله
قال لي وحترجعو متين؟
قلته ليهو م متأكدة والله لسسسه الحفله شغاله وعندهم جرتق وبرنامج طويل
قال لي معناها حترجعو متأخرين وم حيكون عندي طريقه اجي البيت اهلك حيكونو نايمين كفايه المرة الفاتت ولا شنوو؟
قلته ليهو هو الموضوع مهم شديد يعني؟خير إن شاءالله؟طيب ممكن لما نحن نتحرك من الصاله اتصل عليك تمشي على بيتنا نتلاقى قدام باب الشارع، او خليهو لي بكرة "وانا في قلبي بقول ي رب م يخليهو لبكرة ي رب"
قال لي طيبتمام اول م تتحركي اديني خبر
قلته ليهو طيب
فضلته واقفه وانا عقلي بودي وبجيب وانا بفكر ي ربي عايزني لشنو؟يمكن احمد وصل ليهو الهديه؟معقوله عايز يقول لي نرجع لبعض وكدة؟
طيب انا حاقول ليهو شنو لو قال لي كدة؟اتصلته على بلسم بسرعه اول م ردت قلته ليها اللحقيني، قالت لي مالك في شتو؟قلته ليها صهيب اتصل قال عايز يشوفني اليوم، قالت لي كذااااابه؟قلته ليها والله اسي قفل مني، قالت لي معقوله احمد وصل ليهو البوكس؟طيب م قال ليك عايزك في شنو؟قلته ليها بس قال لي عايزك في موضوع، قالت لي معناها عايز يتكلم معاك في موضوعكم، قلته ليها انا كمان قلته كدة بس م عارفه اقول ليهو شنو لو فاتحني في الموضوع دة
قالت لي شوفي انتي عايزة شنو بدل الشحتفه الانتو فيها دي، بس م تفصلي من اول كلمتين لانو راجلك دة متناقض قبل فترة مش قال لي م تخليني محور حياتك وطلعتي من نفسي وبتاع، اوعى تفصلي خليك متماسكه قدامو م تتهبلي
قلته ليها انتي عارفه اني م بتهبل قدامو، قالت لي مشكلتي م بضمنك المهم اتقلي وخليهو يجتهد علشان يقنعك وبرضو م تقتنعي فهمتي، قلته ليها طيب
قبل م اتم كلامي معاها صهيب تاني رجع اتصل علي، قلته ليها عايني رجع اتصل علي تاني افصلي دقيقه،
فصلته منها وفتحته الخط، قال لي ي شهد، قلته ليهو ايوة، قال لي وين انتي في اي صاله؟عشان لو قريبه انا بجي عليك اسي
قلته ليهو كيف يعني تجي علي؟
قال لي قصدي اجي اسوقك طالما نحن في الحالتين حنتلاقى
قلته لنفسي ويييييبببببياااااااااهه زي م بقولو حبل الكذب قصير اقول ليهو شنو اسي
سكتت مسااافه وانا م عارفه ارد بشنو، قال لي الووو شهد
قلته ليهو ايوة معاك اممممم م تتعب نفسك وتجي نحن لما نخلص حنطلب ترحال يوصلنا واول م نتحرك بديك خبر م محتاج تجي،
قال لي بطلي حركاتك دي وقولي اسم الصاله انا منتظرك
قلته ليهو حركات شنو وبعدين م تتنفش فيني
قال لي م نفشه بس انا في يدي عربيه يعني لو في المريخ حأصلك فهمتي؟بس قولي لي اسم الصاله
قلته ليهو امممممممم طيب اسمها صاله الحضري
قال لي دي الجمب عفراء دي ولا وين؟
قلته ليهو ااايوة ياها زاتها
قال لي قريبه لي انا في القيادة نص ساعه بالكتير بكون معاك
قلته ليهو نص ساعه؟
قال لي بإستغراب اااي مالك مخلوعه كدة؟
قلته ليهو لا ماف شي طيب تمام لما تصل اتصل علي بس
قال لي طيب.
اول م قفلته بقيت اتلفت يمين وشمال م عارفه اقول ي منووو؟؟؟
عاينته لنفسي صراحه لا شكلي ولا لبسي كان لبس حفله خالص والعجب الشبط وبعليااااااااهه استغفر الله بس
شلته شنطتي وجريت الاستراحه منوغير استئذان حتى، غسلته وشي بسرعه في اليوم دة كنت لابسه إسكيرت شفون شبه منفوش بس م منفوش باللون النبيتي، وبلوزة اوف وايد وطرحه بنفس درجه الاسكيرت، والشبط كان رفيع مشغول بالخرز،
عاينته لنفسي في المرايه قلته ي شهد ظبطي نفسك ع حسب م تقدري لازم اوحي ليهو اني جايه حفله بجد، وكمان لازم اوريهو انو فعلاً م محور حياتي وانو انا مهتمه بنفسي اكتر من التفكير فيهو وم اقل من العولاق البعرفهم
اول حاجه عملتها شكيت البلوزة بجوة الاسكيرت ورفعته الاسكيرت فوق شويه بحيث انو يبين م قصير وم طويل، فكيت شعري وخليتو مفرود، وقفته قدام المرايه وانا بصلح في اللبسه وفي شغري، بعدها طلعته اللاينر عملتها واجتهدته فيها اجتهاد م بعد اجتهاد تقريباً رسم اللاينر وتظبيطها اصعب من التفاوض مع المجلس العسكري بعد م خلصته منها عملته الروج، كانت درجتو الكبدي الشااااااين داك، نظام جايهه حفله بجد وكدة كنت بعمل في دة كلو وانا بعاين للزمن النص ساعه دي كانت جاريه سريع خلاص
في بت قالت لي شبط حلو من وين؟قلته ليها تحلى ايامك اشتريتو من محل في الرياض
قالت لي حبيتو كيوت شديد
قلته ليها تسلمي، معليش بس ممكن تديني رايك اللبسه والتسريحه ديل ظابطين ولا اوووڤر الله يخليك قولي لي الحقيقة بدون مجامله
قالت لي بالعكس ظريفه شديد وجايه مع بعض من قبيل انا مركزة معاك على فكرة هههه،
قلته ليها بجد؟
قالت لي والله العظيم م بكذب عليك ي بت الناس وبعدين انتو الضعاف والحتت ديل اي حاجه بتجي عليكم بالذات الاستايل دة م زينا نحن السمان ديل نشك اللبسه تخجلنا الكرش نرجع نطلع البلوزة ههههه
قلته ليها تسلمي كنت خايفه تكون بايخه
قالت لي بس الشعر لو مسكتي اطرافو بي مشبك ولا برش بكون اظرف، قلته ليها امممم انا كمان فكرته في كدة بس م معي والله وانا مستعجله م بقدر نزل وارجع تاني هنا، قالت لي اقول ليك حاجه دقيقه، فتحت شنطتها قالت لي هاك البرش دة اسي انا اشتريتو من البازار تحت بس بما انك مستعجله اتفضليهو، قلته ليها لا والله م...
قاطعتني وقالت لي انتي محتاجاهو انا ممكن انزل اشتري، انا لقيتو وعجبني وفي منو اشكال كتيرة ف شنو حأنزل اشتري بس، قلته ليها شكراً بجد ياخي م قصرتي الله يسعدك، قالت لي امين دقيقه اظبطو ليك، مسكتو لي بطريقه ظريفه قالت لي يلا، قلته ليها شكراً
قالت لي العفو ي جميل طلعت انا وقفته وشويه وطلعته
ختيت طرحت في راسي وطلعته بسرعه حتى م مشيت ماكس علشان ابصم طلعته بالباب الخلفي على طول وجري على صاله الحضري، دخلته على الصاله والحمدلله لقيت فيها مناسبه وحفله شغاله في الصالتين بس انا م عارفاها حفله شنو بالزبط، المهم اتوكلته ودخلته قعدته لي في طربيزة كدة ناسها قلال كانو 3 وانا رابعتهم واظنها الحفله من بدت م طولت، وانا جيت مع زمن العشاء بس، قعدته، شويه كدة جابو الاكل ختوهو وانا اتلفت ساااي والحفله رااابه والناس مهججهه وصهيب م اتصل قعدته واندمجته مع الناس وقعدته، فجأة المرة الجمبي قالت لي عااااد هبه تستاهل كل الخير اها ياهو جابت ليها راجل هااايش وكباب درايش، قلته ليها اااي والله تستاهل كل الخير ربنا يسعدها، قالت لي اميييين ي بتي عقبالككم كمان ان شاءالله ي رب، سكتت وابتسمته ليها، شويه كدة بدو ياكلو اعاين ليهم؟اكيد لا طبعاً طوالي مسكت صحني وبديت اكل اصلا كنت جعانه وجيه الصاله جاتني في حرح والناس الانا قاعدة معاهم اااخر رقيص وبهجهه والعجب لما يجي عليهم المصور، اكلت زيييين كأني واحدة منهم بعدها فوطته يدي وبديت اصلح مكياجي بمرايتي الصغيرة، المرة الجمبي قالت لي روجك دة عندك هنا ي بتي؟قلته ليها اي، قالت لي كدة عليك الله قبل بتاع الكاميرا دة م يجي تاني، قلته ليها اتفضلي، القاعدة جمبها قالت ليها امي عايزة تزيدي روجك دة تاني؟وحات الله مازن بجي بشاكلك بعد كدة، قالت ليها ي بت ها الموزة التخنقك انتي وهو، بس م تفعلي وم تتركي بتعاملوني معامله العجايز مالكم؟ شوفو الروج دة سمح كيف في البت دي بس عاااد انا الله م اداني بنات كابتين نفسكم وكابتني معاهم، بتها التانيه قالت ليها قولي الكلام دة لولدك لمن يجي، قالت ليها خلي يجي انطمو مني، اها ي بتي كدة كيف سمح؟قلته ليها رهيييييب ي خالتو ماشاءالله ماشاءالله عليك ربنا يحفظك، قالت لي بتي عاااد انا بدور الحجات السمحه دي والله حتى اسألي مني ابتسام عاد انا معروفه في نصهم بالجيه زمان حنتي ودخاني ديل م بطلعو من رجلي، ودايماً مكحله ي يمه لكن عاااد اسي بقى عندي فيران في البيت م مريحني، وم ملحلحات زي البنات كدة اها ي بتي دة م ابتلاء، بقيت اعاين ليهم واعاين ليها م عارفه اقول ليها شنو المرة شفافه شديد شلته قارورة البيبسي بتاعتي وبقيت اشرب، قلته ليها والله خالتو انتي لسه شباب ماشاءالله عليك وبناتك زاتهم جميلات جاراهم بالجمال حقك دة انا زاتي لما شوفتك م قايلاهم بناتك، قالت لي جريتهم بسماحتي لكن م برشاقتي ي بتي
مصرة تختني في حته ضيقه المرة، تاني رجعته شربته بارد وانا بعاين ليهم والبنات مكشرات وشوشهم لي امهم وصراحه معاهم حق امهم بتسيح ليهم كدة
فجأة تلفوني ضرب كان صهيب قلته الحمدلله والا كان الوضع حيتعقد بالقعدة دي، قلته ليها عن ازنك ي خالتو انا ماشي والروج دة اعتبريهو هديه مني ليك، قالت لي ي بتي لا...قاطعتها قلته ليها لا والله تشيليهو والدرجه دي زاتها رهيييبه عليك، قالت لي تسلمي تسلمي ي بتي م وريتيني انتي بت منو؟والله ريدتك لله اريتك بتي ي يمه صلاة النبي عليك، على طول فتحته الخط في صهيب قلته ليهو الوو؟ااايوة ي صهيب، عن ازنك ي خالتو، اتحركته من جمبهم قلته لصهيب وصلته؟
صهيب قال لي اي انا واقف برة، قلته ليهو م سامعاك، قال لي اطلعي برة من الجوطه دي، طلعته قال لي انتي سامعاني؟قلته ليهو اي سامعاك، قال لي مستنيك برة انا، قلته ليهو طيب، على طول دخلته الطرحه جوة الشنطه، وطلعته العطر اتعطرته وطلعته برة اتلفته يمين وشمال ماف ليهو اثر لا هو لا عربيتو، رجعته اتصلته عليهو قلته ليهو وين انت م شايفاك، قال لي انتي الوين؟قلته ليهو واقفه قدام باب الصاله مباشرة، قال لي طيب دقيقة، قفل الخط، كان في شباب واقفين برة بشربو سجاير ولا شنو م عارفه المهم واقفين مع بعض وبقو يشاغلو وانا خلاص اتوترته، بعد دقيقتين جات عربيه اضاءاتهاكانت قويه انا لمن ختيت يدي في وشي، واحد من الاولاد قال عليك دينك ي بتاع العربيه خلي نورك دة كدة حييييييييييييييييينا ياخ، بعدها تلفوني ضرب فتحته الخط صهيب قال لي وين وين؟قلته ليهو انت الوين ي صهيب انا واقفه منتظراك، قال لي انا كمان واقف لكن م شايفك، العربيه السوداء الواقفه قدام الصاله دي انتي م شايفاها؟دقيقه اكنتك ليك، اول م كنتك قلته ليهو م انا كمان واقفه قدامك ي صهيب مشيت على العربيه هو نزل القزاز فتحته الباب بقى يعاين لي وهو ماسك سجارة في يدو، قولته ليهو مساء الخير، م ردة لي وكان بعاين لي بإستغراب شديد يعني فجأة واحد من الشباب قبل م اقفل الباب قال ليهم عاينو ليها عاينو ليها غرفوها، صهيب اتحرك الولد قال بصوت عالي "بعد سماحتك دي تتغرفي"
صهيب وقف العربيه على طول ونزل مشى عليهم قال ليهم في شنو ي شباب؟م احسن تحترمو نفسكم؟واحد منهم قال ليهو انت المالك ي حبيب في زول سألك اسي؟التاني قال ليهو يعني انت اسي نازل من عربيتك وجاي تعلمنا نحترم نفسنا ومخلي المعاك في العربيه وغالبك تخليها تحترم لبسها؟
نزلته من العربيه بسرعه ومشيت على صهيب لاني عارفه اخلاقو وعصبيتو لما يقوم، صهيب للولد اعلمك تحترم نفسك واعلم ابوك زاتو ي حيوان، مسكتو قلته ليهو صهيب مالك مالهم انت ياخ، قال لي بنهرة ارجعي العربيه النزلك شنوووو انتي؟قلته ليهو صهيب حتعمل ليهم شنو يعني، الله يخليك ارح نمشي ياخي مالك مالهم، قال لي قلته ليك طيري انتظريني في العربيه، قلته ليهو م بمشي بخليك علشان تتشاكل في موضوع تافه زي دة بقيت ماسكاها وبقول ليهو الله يخليك ي صهيب ارح ياخ ديل اصلا هم كدة للماشي والغاشي سوقتو بالغصب على العربيه بعد م ركبنا واحد قال احيااااا اريتني صهيب انا، صهيب قال ليهو انعل ابو ملتك ي حييوان وفحط ونفض فيهم غبار عربيتو، انا صراحه بقيت خايفه على نفسي منو اللحظه ديك، في حال انو فتحته خشمي باي حرف ممكن انضرب او اتعمل شاورما مرة واحدة
بعد مساااافه قلته ليهو ديل شفع سااي م كنت محتاج ترد عليهم على فكرة، قال لي بنبرة غضب يعني عاجباك قله ادبهم صح؟عاجباك واضح انو عاجباك،
سكتت م رديت عليهو
قال لي ساكته لييييه م تردي لو كلامي غلط
قلته ليهو علشان لو رديت حتحور كلامي وم حتفهمو، عارفه حماقتك انا
قال لي يعني ديل بالنسبه ليك شفع م مؤاخذين و انا احمق؟
طلع سايق العربيه بأقصى سرعتو وهو ساكت م مشى مسافه لفه العربيه ووقفها في الباركن بتاع عفراء عفراء، قلته لنفسي واااااي حننزل هنا؟
نزل قال لي خليك هنا وقفل الباب طاااااخ
قلته الحمدلله بعد م نزل، بس خووووفي كلو كان من حاله العصبيه الهو داخل فيها دي فضلته قاعدة ومنتظراه، غايتو في ال 5 دقايق الغابها دي انا اكلت كل ضفوري من الخوف، بعدها قلته لنفسي اوووعى تخافي ي شهد تخافي لشنو هو منو زاتو علشان يهرشك جا راجع ركب وقفل الباب طاااخ وخته لي كيس قدامي، قلته ليهو دة شنووو؟
قال لي افتحي وشوفي بنفسك دي حاجه اظنك نسيتيها في البيت!!!
فتحته الكيس طلعته الفيهو لقيتها طرحه بقيت اعاين ليهو
من غير م يعاين لي قال لي من متين انتي بتطلعي بدون طرحه؟ من متين بتطلعي كدة اصلا"نبرتوً كانت حادة نبرة غضب كدة"
سكتت
قال لي سالتك انا جاوبي قلته ليهو وين المشكله يعني م فهمته؟وبعدين انا جايه صاله يعني عااادي كل الناس فاكين شعرهم وم لابسين طرح
قال لي بالنسبه لي انا م عادي!!!
قلته ليهو شنو هو الماعادي بالنسبه ليك م فهمته؟امتثال دي طبيعي بتمشي اي مكان سواء صاله او غيرو وشعرها كاشف م حصل شفتك علقته عليها او منعتها وهيا برضو نفس القصه، الجدة شنو يعني وقفت علي انااااااا...
قال لي بفوره وغضب م تقولي لي امتثال وهيا اووووووعى م تقارني اساسا، امتثالً زوله كبيرة وواعيهه ومسؤله من نفسها، وهيا ابوها حي يرزق ووصي عليها، اما انتي مرتي وتحت مسؤليتي انا عرفتي الفرق...
كسرة
يعلم الله نقل الكتابه دة اصعب من الخرمجه والتاليف والعولاق نفسو، يعلم الله دغوتات دغوتات، دغوتات
نتلاقى®