الفصل الثالث والعشرون

ضربت لي تلفوني بتصرخ قالت لي اخوي اللحقني هجمو علينا، اختي انا بيني وبينها خطوات إغتصبوها وم لحقتها، المرة البتبكي قالت ليهو قلته ليكك اسكت، وفجأة سمعته صرخه اتلفته يميني لقيتو عمر ملصق وشو مع الحيطه وببكي وبضرب بيدو،

انا م مستوعبه الحاصل شنو لغايه اللحظه، قلته ليهم في شنو؟بلسم مالها؟ماف زول جاوبني وعمار دة من شافني رجع يبكي، مشيت عليهو قلته ليهو عمار في شنو بلسم وين سألتك انا جاوبني، وهو يبكي لمن برجف وكل م اسألو بختو يديهو في راسو ويصرخ؟مسكتو قلته ليهو سألتك انا بلسم مالها جاوبني امس انا خليتها معاك وين بلسم؟

في مرة بقت تبكي وتقول كررر علي ي بت امي كررررر علي ي الحرقتي حشى اخوانك

قلته ليهم بلسم وين وعمار مالو ببكي زول يجاوبني عمار انا بتكلم معاك ي عمار بقيت ارفع ليهو راسو وبقول ليهو جاوبني بلسم وين

جات حبوبه مسكتني وهي تبكي م عارفاها طلعت من وين اساساً، قلته ليها حبوبه بلسم وين؟بلسم ماتت؟قالت لي لا م ماتت، قلته ليها طيب وين؟قالت لي تعالي، قلته ليها م ماشه بلسم وين؟جرتني طلعتني برة وهي تبكي قدرتها، قالت لي قالو الليله فضو القيادة واظنها هي واخوها كانو بايتين هناك والناس ديل إغتصبوها، قلته ليها كيف يعني؟اتفكيت منها وجريت دخلته وقلته لي عمار دة شنو اليتقول فيهو حبوبه دة؟عمار عاين لي هنا انا بتكلم معاك القالتو حبوبه دة صح؟صح بلسم حصل ليها كدة؟

الناس الحوالي كلهم ببكو وعمر رجع يبكي زي الطفل، انا هنا بقيت اصرخ قلته ليهو عمار انت مش كنت معاها؟مش كنت معاها ي عمار؟كيف يعني يحصل ليها كدة؟وفي مرة جمبي بقت تصررررخ وتصرررررخ وخاته يديها في راسها وبتقول الليله وووووب من الجاتك ي بسمه ي اختي وووووووووووووب من الجاتك في بتك، قمته على حيلي وجريت على غرفه بلسم لقيت 2 واقفين برة عايزة ادخل واحدة مسكتني قالت لي لو سمحتي قالو ماف زول يدخل عليها، لزيتها قلته ليها ياخي زحي لزيت الباب ودخلته لغايه م دخلته م كنت مستوعبه الحاصل ابداً بس مع دخلتي كدة فجأة شوفته بلسم مرميه في رجول خالتي بسمه ومغطيه وخالتو بسمه تبكي بس بدون صوت، قلته ليها بلسم مالها ي خالتو بسمه ودة شنو البقولو فيهو الناس البرة دي، خالتو بسمه بقت تبكي الواقفين برة قفلو الباب، قلته ليها خالتو بسمه انتي بتبكي لييه؟يعني القالوهو صح؟يعني بلسم فعلا حصل ليها كدة؟بقيت رفعته الغطى من بلسم وبقيت اقول ليها بلسم بلسم ارفعي راسك، ارفعي راسك اتكلمي معي ي بلسم قولي لي الكلام دة كزب واالناس دي طايرة ليها زي م بتقولي دايما، يلا ي بلسم الله يخليك اتكلمي معي الله يخليك مش امس نحن كنا مع بعض وكنتي بتضحكي وبتهظري معي اسي مالك، خالتو بسمه قولي ليها تتكلم معي، بسلم هييييييي بتكلم معاك انا زعلانه مني انتي عشان م مشيت معاكم صح، وم عايزاني اسافر اعيد في البلد ودي حركه منك صح؟بلسم م اتحرك ليها ساكن ابداوخالتوً بسمه تبكي لمن تتهند، وقعتهه في الارض وبقيت اصرخ خالتو بسمه دي بقت ساكته وتعاين لي كأنها مصدومه بس دمعتها في عينها، وبلسم اصلا ولا كأني اتكلمته معاها، قعدته في الارض جمب السرير وبقيت ابكي م قادرة حتى اقول اسم بلسم، اكتر من ساعه انا واقعه وببكي وم فاهمه حاجه وشريط يوم امس كلو مرة على بالي لغايه اااخر لحظه، جات حبوبه طلعتني وساقتني بالغصب، اول م طلعنا برة الحوش سامعين رصاص حي مبالغ فيهو، حتى سمعته مرة بتقول حسبي الله ونعم الوكيل فيهم حسبي الله ونعم الوكيل م خلو ولد حي في القيادة كتلوهم كلهم م خلوهم يعيدو بركه رمضان دة يشوفوهو في اولادهم، واحدة تانيه قالت ليها قالو حرقوهم جوة الخيم وهم نايمين، قال ليك كم هايل من الجثث والله عمله زي دي يهودي م يعملها وفي رمضان كمان

حبوبه قالت ليهم لا إله الا الله وحسبي الله ونعم الوكيل في العسكر بركه اليوم دة ربنا يوريهم ليهو في عافيتهم ي رب،

انا هنا بديت اجمع واستوعب، الاعتصام إتفض؟بقيت ماشه على باب الشارع وانا بردد في الكلام دة، قلبي للحظه حسيتو حيطلع من محلو، حبوبه جات لاحقاني قالت لي ماشه وين ي بت؟قلته ليها حبوبه صهيب في القيادة، صهيب بكون مع الاولاد الماتو، قالت لي ي بت كدة قولي بسم الله، عايزة امشي مسكتني، قلته ليها م تمسكيني قلته ليك صهيب هناك، طلعته جريت على بيتنا وانا حفيانه والتوب زاتو واقع مني، لاقوني شباب من الحله قالو لي التاتشرات دي جايه بجاي خشي خشي بسرعه، م عارفه نفسي دخلته البيت ووصلته لغايه غرفتي كيف شلته التلفون اتصلته على صهيب وانا برجف كلي تلفونو كان داخل لما سمعته الجرس اعصابي شويه هدت قلته معناها كويس بس م كان في رد، رجعته اتصلته برضو م كان في رد بقيت اتصل كتيييير وانا خلاص اعصابي تلفت، حبوبه جات داخله قالت لي اها في شنو؟ قلته ليها م برد ي حبوبه

قالت لي لا إله الا الله كدة اتصلي تاني، قلته ليها دي اكتر من 20 مكالمه لو كان كويس كان ردة اكيد حاصله ليهو حاجه، قالت لي ي بتي م تتسبقي الحوادث كدة شوفي اهلو امتثال او واحد من اخوانو، اتصلته على امتثال تلفونها مقفول، اعصابي هنا باظت زيادة، قلته ليها والله حاصله ليهو حاجه ي حبوبه

اتصلته على احمد تلفونو كان داخل بس م برد، قلته ليها م بقدر اقعد انا ي حبوبه، قالت لي تمشي وين ي بت م سامعه صوت السلاح دة البلد دي الليله مقلوبه فوقاني تحتاني خلي العربيه تجينا نسافر بس، قلته ليها م بقدر اسافر انا بلسم في الحاله دي وصهيب م عارفه ليهو اتجاه اسافر كيف انا

قالت لي كدة اقعدي روقي شويه م شايفه نفسك بترجفي والعرق نازل منك كيف؟فتحته الدولاب لبسته لي عبايه وطرحه وطلعته حبوبه مسكتني قالت لي وحاة ابوي م بخليك تمشي انتي ي بت مجنونه ماشه وين في الضرب والاغتصابات الحاصله دي دايرة تموتي انتي؟قلته ليها حبوبه انا ماشه بيت اهلو اكيد بيكونو عندهم علم بالحاصل و...قاطعتني قالت لي لا انتي م سامعه بالحاصل في البلد دي يعني؟عايني لولدك دة اسي لو م انا قلته لي شافعه الجيران تمشي تشيلو م بتجيبي ليهو خبر و..

قبل م تتم كلامها باب الشارع دق، مشيت فتحتو بسرعه لقيتو سواق العربيه المفروض انو يسفرنا البلد، دخل سلم علينا، حبوبه قالت ليهو اسي السفر كيف مع الاوضاع دي، قال ليها والله ي عمتي عشه انا زاتي جاي اقول ليك انو حالياً الخرطوم مافي منها طريقه طلعه والشوارع كلها مقفله والدعامه ديل في كل مكان ممنوع المرور وتفتيش كل العربات وارهاب وضرب رصاص في الناس الفي الشوارع الحاصل دة م إرهاب دة إستعباد للشعب، قالت ليهو لا حول ولا قوة الا بالله ي ولدي يعني اسي طريقه سفر مافي كلو كلو؟قال ليها ماف والله ي حبوبه، قالت ليهو قالو كتلو الاولاد في القيادة هناك كتل شين خلاص، قال ليها والله ي حبوبه غدروهم وسو فيهم الما عملو فيهم عمر البشير حسبي الله ونعم الوكيل، دموعي بقت جاريه قلته ليهو وانا بتنهد ممكن توديني مشوار؟قال لي وين ومالك بتبكي ي اختي، حبوبه قالت ليهو راجلها بمشي القيادة طوالي واسي اظنو بتتصل عليهو م برد وخايفه عليهو، قال لي لا ياخي إن شءالله م يكون هناك بس، قللته ليهو وصلني بيت اهلو ممكن؟قال لي جداً ابشري ربنا يجيب العواقب سليمه إن شاءالله، ، حبوبه قالت لي دقيقه اشيل الولد امشي معاك، قلته ليها انتي خليك مع ناس خالتو بسمه بلسم واخوانها وكلهم حالتهم صعبه شديد م صح نخليهم في وقت زي دة، قالت لي واخليك تمشي براك في الموت دة؟قلته ليها ماف شي بجيني ي حبوبه عليك الله خليني ي حبوبه انا اسي في نارين بلسم في اتجاه وصهيب في اتجاه م تزيديها علي، اتحركته مشيت وخليتها واقفه، بقت تقول لي ي بت تعالي هنا، بتكلم معاك انا دايرة تموتي انتي وتجيبي اجلي في نفس الوقت ي بت؟حسبو قال ليها خليها ي عمتي انا بوصلها م بجيها شي، قالت ليهو ي ولدي شن ضمني في الحاصل دة البت دي انا اصلا شايفه موتها بعيني، قال ليها لالا م بجيها شي إن شاءالله، جا طالع وهي جات لاحقاني قالت لي دايرة تموتي انتي ي دايرة تقطعي قلبي في الدنيا دي، ركبته العربيه وخليتها واقفه ولسه كنت بتصل على احمد،

ونحن مارين في الشوارع كميه عربات الدعامه الفي الشوارع وعربات مكافحه الشغب والارهاب الحاصل في الشوارع م بتحكي، وكل الشوارع مترسه ولساتك مولعه وتقريباً نص الشعب في الشارع،

بقيت اوصف ليهو وانا من جواي بس عايزة ابكي وانا بقول ي رب ي رب يكون بخير ي رب م يحصل ليهو شي، م قدرنا نصل بسرعه لانو الشوارع مترسه ف كل مرة كنا بنغير شارع، وصلنا شارع البيت شفته كمييييهه ناس واقفين قدام بيت ناس صهيب والشارع مترس م حسيت بنفسي نزلته وجريت عليهم وانا رجولي م شايلاني حتى حجر الترس ضربني وانا جاريه، وصلت الناس قلته ليهم في شنو؟سامعه اصوات ناس بتبكي جوة، دخلته بسرعه كان اشوف خالتو عواطف واقعه في الارض وبتقول جيبو لي ولدي، دايرة ولدي انا ي ناس جيبو لي ولدي، واحمد بقول ليها امي امي لا إله الا الله، امي إستغفري، قالت ليهو انا حذرتو امس باليل قلته ليهو م تمشي اليله م سمع كلامي مشى، هيا واقعه جمبها قالت ليهو احمد امشي فتشو شوفو وين، شوف صهيب جيبو اسي اسي، محمد قال م لقاهو لا بين المصابين، قالو في ناس محروقين جوة الخيم، في ناس مرمين جوة البحر ي ربي حرقوهو ولا رموهو في البحر إتصل على امتثال، اتصل على محمد ي احمد ورونا صهيب وين حصل عليهو شنو،

قال ليها تقفلي ولا اجي الطشك كفين في وشكك دة؟

بعد م سمعته الكلام دة انا بقيت لا شايفه لا سامعه م حسيت الا بي مويه في وشي، بعدها زول شربني حاجه مالحه قبل م اوعى دخلته في حاله هستيريه بقيت ابكي حتى م قادرة اشيل نفس ولا واعيه للقدامي ولا واعيه انا بقول في شنو؟وحواليني في نسوان بهدو فيني بس انا م فاهمه اي شي فجأة اسمع احمد بيقول وينها هي كدة زحو منها كدي، جا قال لي شهد، ارفعي راسك دة هنا، عايني لي بطلي كوراكك البتعملي فيهو دة، رفع لي راسي قال لي عارفه انو في حاجه اسمها ربنا؟عارفه ولا لأ؟

قلته ليهو عارفه،

قال لي عايني لي في وشي هنا دة عايني لجسمي عايني لملابسي شايفه اثار الضرب دي كلها؟انا شايل مصابين على وشك انهمم يموتو الموت الواحد دة عمرو لي السلاح في راسي عديل وكسرو لي عربيتي عشان شايل فيها المصابين للحظه كنت حاكون ميت بس طلعته منها ليييه؟لانو ربنا كاتب لي باقي عمر وصهيب اذا ربنا كاتب ليهو باقي عمر اسي بتلقيهو قدامك

الجن والبكى دة م برجعو ليك فهمتي؟

كلامو بكاني زيادة وحسيتو تلميح لي انو انا م اتفائل واجهز نفسي لكل شي، بقيت ابكي بحرقهه قلته ليهو طيب هو.حصل كدهه كيف ومتين؟

سرح مسااافه وهززة راسو و قال لي الحاصل في القيادة هناك ي شهد شي كعب شديد، اظن دة اكعب شي يحصل في تاريخ الخرطوم قتل، إغتصاب، ضرب، نهب، حرق، كل شي كعب العسكر عملوهو في القيادة هو بتكلم وانا ببكي وهو زاتو العبرة خنقتو بقى م قادر يتكلم ودموعو جات جاريه نزل راسو في الارض، قلته ليهو بلسم واحدة من البنات الإغتصبوهم ي احمد

رفع راسو مخلوع قال لي بلسم صحبتك؟واصلته بكى بصوت عديل، وهو دموعو ابداً م وقفت لمن قام على حيلو وبقى يقول لا إله الا الله، قلت ليهو احمد انا م بقدر اقعد م بقدر حتى لو ميت عايزة اشوف جثتو في قدامي بس انا م عارفه شي كدة م بقدر قال لي نحن.دي جيتنا من رويال إقتحموها وضربو المصابين والدكاترة الحاجه الوحيدة العملتها اني طلعته امي وحبوبه وهيا جبتهم البيت قلته ليهو طيب ارح نمشي نشوفو مش كل المصابين بودوهم رويال؟انا م بقدر اقعد كدة اقسم بالله ولو م حتمشي معي حأمشي براي

قال لي ارح طيب طلعنا من غير م نكلم زول هو ماشي قدامي وانا وراه حصلنا الزلط عايزين نقطع هو قطع قدامي وانا اصلا م اتلفته لا يمين لا شمال بس مشيت في الزلط وفجأة م حسيت الا بنفسي منفوووووضهه هناااك وواقعه في الارض وشايفه كل الدنيا دي لافه بي وعيوني مزغلله واصوات ناس بتقول لا إله الا الله كتلته بت الناس ي زول، وصوت صريخ بقول وااااااي ماتت ماتت شايفه الناس متلمه حوالي وبتتكلم ومن اللحظه دي انا فقدتهه الوعي...

في لحظهه كدة جاني صوت بعيد بتكلم جمبي، حركته صباعي وبعدها سامعه صوت بيقول لي شهد، شهد، وفي حركه في يدي، فتحته عيوني غصب رغم إني م كنت قادرة افتح عيوني لقيت نفسي بشوف طشاش طشاش بعد مساااافه وانا بغمض وبفتح حتى فجأة اشوف صهيب واقف قدامي، وفجأة جاني صوت بيقول "حمدلله على السلامه يااااخي"وانا م شايفه زول غير صهيب بحاول استوعب واجمع طبعاً هل هو قدامي بجد، وقف في راسي بقى يقول لي انتي كويسه؟كويسه ي شهد؟رفعته عيني من غير م ارد عليهو قال لي شهد،

في صوت قال ليهو اهدأ ي صهيب م.كدة براحه م تستعجل ليها خلينا نحن زاتنا نفهم الحاصل عليها شنو،

نفس الصوت دة جا وقف قدامي كان دكتور لابس سماعه في يدو قال لي حمدلله على السلامه واجر وعافيه إن شاءالله ي رب، حأسألك شويه اسئله لو بتقدري جاوبيني عليها بالإشارات، وانا تركيزي كلو مع صهيب والدكتور بتكلم معي وانا بعاين لصهيب، قال لي انتي متزكرة الحادث الحصل معاك؟ م رفعته عيني من صهيب ودموعي جات جاريه في اللحظه دي عشرة عشرة، صهيب قال ليهو خليها م تضغط عليها، الدكتور قال ليهو طيب 10 دقايق كدة وبجيكم راجع عشان حتتعمل ليها شويه فحوصات، قال ليهو طيب،

م تتخيلو انا قدر شنو كنت ملهوفه لشوفتو وم مصدقه انو قدامي بحق وحقيقه، بعد م الدكتور طلع ختهه يديهو في وشو مساااافهه وهو بمسح عليهوو وعلى راسو حتى نزل يدو ودموعو بقت جاريه وهو بمسح فيها، قعد جمبي ومسك يدي قال لي بصوت مبحوح انتي كويسه؟هزيت ليهو راسي بمعنى اايوة، قال لي متأكدة إنك كويسه؟قلته ليهو انا كنت عايزة اسألك السؤال دهه، مسح دموعو وسكت مساااافه حتى قال لي اكزب عليك لو قلته ليك كنت كويس قبل اللحظهه دي

عاينته حوالي لقيت في اجهزة، قلته ليهو بصوت خاااافض انا حأموت؟قال لي يومي قبل يومك م تقولي كدة ابداً إياااك فهمتي مسك يدي وهو ساكت ودموعو دي نهاااائي م وقفت...

كسرهه

م محتاجين اتكلم عن احداث اليومين المضت دي ابداً لانو الموضوع اسوأ من السؤ نفسو، الما طبيعي انو في ناس بتلومني وبتقول لي ليييه م نزلتي؟ م اعتذرت لاني لقيت نفسي مش م قادرة اكتب وبس انا م قادرة اقعد في بيتنا اساساً ف بالتالي لو جيت اعتذرته حأكون بنافق في نفسي اولا، فً بعتذر لاني م اعتذرت لاني حرفياً اعصابي ابداً م كانت مساعداني في إني اكتب ابدا، وجوً القصه زاتو جو إكتئاب لدرجه اني إتخطيت وإختصرته احداث فض الاعتصام علشان حرفياً نحن الفينا كملت وإكتفينا وجع والواحد قافله معاه جوة وبرة ...

نتلاقى®