الفصل الرابع والثلاثون

عندك مثلاً انا بعدك إنتي تاني الحاجه الوحيدة الممكن ازعل عليها لاني م حصلته هي الجنهه في الاخرهه اما في الدنيا دي مطلبي كلو إنتي وكفى، قالت لي انت الكفى وربي حابكي من كلامك دة ضحكك قال لي البكى عندك إسلوب حياة إنتي قالت لي لا انا م بحب البكى بس بحب الطريقه الانت بتراضيني بيها لما ابكى، قلته ليها ملاحظه إنك اديتيني سرك يعني بعد كدة عادي ممكن اسفهك لما تبكي

وقفت باطراف رجولها في رجولي وقربت علي اكتر لدرجه انو انفاسها بقت في وشي وهي رافعه حاجيها وبتعاين لي وهي ساكته، بعد مساافه قلته ليها م بتهوني علي عارفه كدة صح؟ضحكت قالت لي ثقهه في الله قلته ليها لا دة بتسمى هرش سلس وثقه في القدرات عارفه نفسك نقطه ضعفي ف حلال عليك الثقه دي ي ماما ه قالت لي اممممم حبيبي ممكن اقول حاجه بمناسبه ي ماما دي؟قلته ليها تعالي قعدتها في الكنبه ورقدته في رجولها قلته ليها احكي، قالت لي ممكن بكرة نمشي بيت اهلك؟

شلته ريموت التلفزيون وغيرته القناة، شالت الريموت من يدي وقالت لي م تتجاهل سؤالي ممكن ولا لأ؟قلته ليها مش نحن امس جاين منهم؟بكرة انا عندي مششوار ضروري، قال لي م تتهرب انا عارفه كل شي، امتثال في الكوفير حكت لي كل شي، عارفه إنو انت م قاعد تدخل بيتكم لأي سبب من الاسباب، عارفه انو انت من طلعته من المعتقل م حصل خطيت خطوة في بيتكم دة وم دخلك ليهو الا عرس محمد، عارفه انو علاقتك مع امك متوترة وم هيا اختك كمان بس ي صهيب لو جينا نحسبها هم م ليهم غيرك بعد كدة انت كبيرهم والدليل على كدة انو عرس محمد دة انت الوحيد الوقفته فيهو، ابوك مشى خلاهم، ماذن اخوك م هان عليهو حتى يجي عرس اخوهو، يبقى انت الوحيد المفروض تقيف فيهم صح؟ايوة صح يمكن تكون زاعجاك بعض تصرفت امك بس كمان هي العليها م شويه، تجيها من وين ولا من وين، تشيل هم منو فيكم وتخلي هم منو، ختيت يدي في لحيتو قلته ليهو المضى من عمرك دة كلو كوم والجاي كوم تاني خالص م انا بس الفي مسؤليتك لا في امك وحبوبه وهيا اختك ومسؤليه بيتكم الكبير كلو على عاتقك ف بالتالي لازم تتجاوز الحصل سواء كانت السبب فيهو امك السبب فيهو او غيرها انت م بتقدر ولا عندك حق او صلاحيه في معاقبتها، ماف زول بقاطع امو ي صهيب، حتى ابوك رغم كل شي هو في النهايه ابوك لو في يدك شي تدعي ليهم ربنا يهديه بس، صدقني م حتعرف قيمتهم الا بعد م تفقدهم والله لا يضوقكك احساس الفقد بتاعهم، رفعته راسي وعاينته ليها وقلته ليها كنت بحاول بس اكيد دة الحيحصل ي شهد إن شاءالله

باستني وقالت لي بحبك وانت بتسمع الكلام كدة قلته ليها عارفه ي شهد إنتي الما ممكن تكوني كدة، ي ريت لو الناس كلها تقدر تشوفك زي م انا بشوفك، اصلي م خايف من بكرة ابداً عارفه ليييه؟قالت لي ليييه؟قلته ليها لاني عارف إنو عندي انتي، وانا كل م اتعوجت بتعدليني ف ي بختي بيكك قالت لي طيب بكرة نمشي ليهم نسلم عليهم وكدة علشان بعد بكرة في التوقيع على الاتفاقيه قالو الاحتفال حيكون في ساحه الحريهه

قلته ليها حاضر اصلاً بكرة الجمعه سبب كافي لي إنو نمشي عليهم، قالت لي م كدة وبس لازم نمشي ليهم كل جمعه، وانت كمان كل م لقيت نفسك راجع بدري من الدوام او فاضي اغشاهم وسلم عليهم وطيب خاطر امك بكلمتين صدقني حيفرق عندها كتير بقيت اعاين ليها ومستغرب هي من متين بالعقل دة، شهد اتغيرت شديد، وصلت لدرجه من الووحى مبالغ فيها، عن كميه التسامح الجواها بتخليني احسد نفسي عليها لاني اذيتها في الشعور مرة واتنين وتلاته وللسه هي هنا رغم كل شي قلته ليها اصلاً هم عندهم فكرة السفر لدبي الفترة دي وانا شايف احسن ليهم يمشو يعدو فترة ويجو راجعين

قالت لي احلى خبر ختيت يدي في خدها وقلته ليها ي دواي إنتي م عارف من غيرك كنت هعدي الفترة دي كيف قالت لي ايوااااا بمناسبه دواااي دي خليني اسالك دكتورة رفأ بالنسبه ليك شنو؟ضحكته

قالت لي م تضحك م ناسيه معاملتك الرف لي قدامها فترة الاعتصام يوم الكنافه بالذات

قلته ليها الفترة دي انا م كنت طايق نفسي حرفياً وبجد حتى انا م عارف مالي، يمكن كل التراكمات والضغوطات كانت سبب في كدة، قالت لي بس كنت بتعاملني انا بس بالطريقه دي ودكتورة رفأ لا، قلته ليها رفأ غريبه علي واي زول مهما كان متضايق وحالتو سيئه بحاول يكون لبق مع الغرباء ولا شنو؟قالت لي بس انا كنت بتضايق من معاملتك ليها وهي كمان كانت...قلته ليها شهد رفأ عاقدين عليها على فكرة يعني ابداً م الفي بالك هي زوله اصليه وصحبتي شديييد بس دي كل القصه فهمتي؟قالت لي بصوت طفولي بجد عاقدين عليها؟ طيب راجلها وين مخليها تقابض في رجال الناس

قلته ليها شهد، قالت لي طيب اسفهه بس بجد راجلها وين؟قلته ليها في لندن وحالياً بتجهز في اوراقها عشان حتسافر ليهو هي كمان، قالت لي وانت عرفته من وين يعني متواصل معاها صح بقيت اعاين ليها وفي وشي ابتسامه مطبوعه، قالت لي م تعاين لي كدة قول قلته ليها عايني حبيبي مش رفأ لو جابو لي حور العين في الدنيا دي م حتلقي عيني وقعت على غيرك ابداً قالت لي انا عايزة اكون صحبتك قبل م اكون حبيبتك م عايزة اي واحدة يكون ليها مكانه جواك ليها غيري، م عايزة واحدة تشاركني فيك فهمته، قلته ليها كيف كدة؟اكيد لو طال الزمن وقصر حتجي واحدة تشاركك فيني!

قالت لي بغضب شنووووو؟قلته ليه، مالك قلته شنو غلط اسي انا؟قالت لي ولا شي على طول قامت على حيلها عايزة تتحرك وقفته مسكتها وقلته ليها شهدو زعل، قالت لي صهيب فكني يخخ، لفيتها علي وقربتها مني بالغصب وقلته ليها مش لو طال الزمن وقصر حتجيبي لي بت شبهك ونسخه مصغرة منك؟ يبقى اكيد اي حاجه منك حتشاركك فيني زي كريم مثلا ولا شنوووو؟؟حاولت تفضل متماسكه بس ااااا ويييين ياااا إبتسامتها خزلتها، مع ضحكتها دي قلته ليها اقول ليك حاجه ولا إن طال الزمن وقصر أنا زاتي مستعجل إنو تكون عندي بت ف يلا تعالي وعلى طول شلتها...

صحيت الصباح على صوتها وهي بتتكلم مع كريم وبتضحك وبتعلب معاهو في الحمام وهو كان بضحك بأعلى صوت ليهو نزلته مشيت فتحته باب الحمام لقيتها بتحمي فيهو اول م شافني صرخ قال لي بابا قلته ليهو حبيب بابا ي شغب، شهد رشتني بالمويه و قالت لي صباحو كسل إتفضل حمام قلته ليها على طول و دخلته وقفلته الباب

حرفياً انا م بحس بالاستقرار النفسي الا بصوت وريحه وجود شهد وكريم في البيت وحياتي كلها...

بعد م طلعته كنت شايل كريم في رقبتي، لقيتها مجهزة لي ملابس الصلاة العلى الله والساعه والعطر وكدة قالت لي حبيبي المكيف شغال حتلتهبو الاتنين مع بعض وحتحيروني، قلته ليها نحن اصلا عايزين نمرض عشان تهتمي بينا ضحكت و قالت لي والله حأنوم واسفهكم، المهم انا ماشه اجهز الفطور، م تخلي كريم يقرب على الملابس دي عشان حيوسخهااا..

بعد م جينا انا وكريم من صلاة الجمعه لقيناها جاهزة منتظرانا، لما جينا طالعين وقفتني قالت لي حبيبي، قلته ليها هااا في شنو؟صلحت لي الزرارة حقت الجلابيه ومشت صوابعها في اطراف حواجبي على وقالت لي يعني لو م الواحد خلا بالو منك م بتخلي بالك من نفسك، قلته ليها م انا بتعمد الحاجه دي عشان تخلي بالك انتي

قالت لي يلا ي سجم، مسكتها قلته ليها على فكرة يوم العرس م كنت قادر ارفع عيني منك ابداً حسدتهه كل العيون الشاركتني شوفتك بس لو كنت عقبته عليك كنتي قاعدة على الهبشه وحتعملي موال، ضحكت وقالت لي يعني انت خليت بعد العرس يعدي بيومين وجاي تقول لي الكلام دة قلته ليها ولو بعد مليون سنه انا م بنسى تفصيله صغيرة انا شوفتها فيك قالت لي لاحظ كريم ساكت وبعاين لينا كيف شلته كريم وقلته ليها بعد كدة حنسجلو في الروضه على فكرة

قالت لي لا لسه صغير، قلته ليها براعم م صغير ابدا، مشيناً بيت اهلي لقينا معاهم ضيوف كانو جاين من البلد لعرس احمد ولسه م سافرو، رغم انو إستقبال امي لشهد م كان على قدر كدة وانا إتضايقت جداً بس اقتنعته انو شهد حرفياً مطبقه نظريه عشان عين بتكرم الف عين م حسيتها اتحسست من الموضوع بالعكس انا عارف إنو هي بتعمل كدة عشاني انا بس، وفي نفس الوقت م بقدر اجبر امي على إنها تتقبلها او افرضها عليها ف الحل الوحيد اني اوازن م بضمن تصرفات امي معاها حتكون كيف بس واثق من عقلانيه شهد...

اثناء م بنتونس امتثال قالت لينا اها بكرة كيف وكيف جاهزين لاحتفال التوقيع النهايي دة؟قلته ليها جاهزين ورافعين شعار جهز عديل علمك كمان قالت لي بجد حماس شديد بكرة الشعب كلو في الشارع

نرجع للقصه بلسان شهد...

اثناء قعدتنا لاحظته لي انو احمد اغلب وقتو ساكت وسرحان وماسك تلفونو وساكت وابداً احمد في العادة م كدة، فجأة جاتو مكالمه طلع، خليتهم مشغولين بالونسه وطلعته لحقتو في الحديقه لقيتو جاي راجع، قلته ليهو احمد، قال لي شهد الخبر شنو؟قلته ليهو الحمدلله وانت؟قال لي الحمدلله، قلته ليهو اممم بلسم م ردت عليك او كذاا؟قال لي ابداً والله قالت ليك حاجه؟قلته ليهو ابداً م جابت لي سيرة الموضوع لكن لو عايزني اتكلم معاها ممكن..قال لي لا ي شهد ابداً انا م عايز اضغط عليها انا متفهم الوضع الهي فيهو واكيد اي واحدة مكانها صعب تتجاوزو وصعب ترجع تتعامل مع اي زول بشكل طبيعي عشان كدة خليتها على راحتها وبعدين هي حظرتني واتسب مسنجر يعني الجواب واضح من عنوانو افضل انو نقفل على الموضوع دة، قلته ليهو والله ي احمد م عارفه اقول ليك شنو بجد

قال لي ي شهد كل شي لخير وإن شاءالله هي تقدر تعدي وتتجاوز وبس قلته ليهو فعلا...ً

بالجد كاسر قلبي وحالتو تحنن الكافر والمشكله انو الحاجه دي ظاهرة في نفسو بس م اصعب من وضع بلسم ابداً بعد م طلعنا منهم صهيب قال لي نبقى على مشاورنا التاني، قلته ليهو وين؟قال لي بيتكم طبعا، قلتهً ليهو بخلعه بيتنااا؟لااا ي صهيب لااااا.الله يخليك لا قال لي بسم الله مالك ي بت الناس؟قلته ليهو حأقول لناس حبوبه وعماتي شنو؟ولا خالي؟بس رجعته بيتي وسكته من غير اي سابق قعد يضحك قال لي ي زوله عادي اصلا انا مكلم خالك من بدري وحبوبتك كلمتها قدام الخلق يعني ماف شي بخجل، قالت لي انت كلمتهم اما انا من الحفله وعلى طول مشيت معاك

قال لي ي حبيبي م مشكله صح ي كريم؟كريم قال ليهو ااااي م مثكلهه، قعدو يضحكو قلته ليهو دة كلو منك انت يعني كان مفروض تسوقني من بيتنا م بالطريقه دي قال لي لو م سوقتك بالطريقه دي م كنتي حتجي لكن غياظ ياااخي وبارد وكريم ماخد نفس طباعو، سكته منو نظام زعلانه على طول شغل غنيه بتقول"عفصيها قلوبنا الفي الواطهه

طبطبيها طقيها ببلاطهه

هي تتجازى تستحمل الجاتا

الخفيفهه اللفيفيهه المعاطهه...

بغني وبقول لي كريم يلا بابا ارقص اها وكريم م مقصر وكالعادة انا بالغصب ضحكته، دة كلو كوم وحركاتو لما وصلنا بيت اهلي كوم تاني خالص كل م ارفع عيني اللقاهو رافع لي حاجبو، ومرة يبتسم عارفني داخله في ضفوري حيوان خلاص لما جينا طالعين قال لي براحه م تنسي شنطك ي بطه قلته ليهو صهيب اسكت مني، قال لي م حأجيبك راجعه تاني قريب خليك عارفه

سكتت منو، قبل م اقول شي حبوبه قالت لي هي يمه انتي ناسيه حجاتك ولا شنو؟ادخلي رتبي حجاتك وشيليهم معاك دامكم جيتو، صهيب على طول رفع لي حاحبو وقال ليها لا ي حبوبه خليها تجي تشيلهم مرة تانيه م بتكون مستعجله ليهم، قالت ليهو بري وحات النبي تشيلهم م بتخليهم وراها ي ولدي بالفعل دخلته غرفتي لميت ملابسي وحجاتي في شنطتين حتى طلعته، ركبنا العربيه قلته ليهو وربي ي صهيب فيك سخف ضحك قال لي انتي براك متحسسه انا ذنبي شنو

قلته ليهو اممممممممم اكتر حاجه فرحتني انو عماتي حيستقرو هنا مع حبوبه وخالي ومرتو برضو كنت شايله ليها الهم، قال لي ااااي الحمدلله ي ستي وكتى لو م استقرو كنا حنسكنها معاها انا عرضته الفكرة على خالك بس رفض قلته ليهو بجد؟قال لي والله

بعد م وصلنا البيت هو غير ملابسو وانا بقيت الف في شعري وكريم بلعب بتلفون صهيب، وقاعد قدام التلفزيون، بعد ربع ساعه كدة صهيب جا قال لي حبيبي، قلته ليهو نعم، قال لي تعابي عايزك، قلته ليهو دقيقه بس الف شعرتي دي، قال لي يلا منتظرك سرعه، قلته ليهو في شنووو؟قال لي تعالي بس، طلعته ليهو مسككني من يدي، قلته ليهو مالك؟قال لي تعالي وخليك ساكته قربنا من غرفه كدة جمب غرفه كريم قفل لي عيوني بيدو، قلته ليهو صهيب، قال لي قلنا خليك ساكته بس، وصلنا الغرفه فتح الباب ودخلني قال لي دقيقه م تفتحي وهو سايقني قدامو وانا غير انو شامه ريحه عطر قوي وبرودة المكيف م شايفه شي

بعد مسافه شال يدو من عيوني فتحته عيوني لقيتها غرفه ضلماء بس فيها ابچورات في السقف ملونه كدة، قلته ليهو صهيب انا م شايفه شي، فجأة ولع النور وهنا كانت الصدفه بقيت اتلفت وانا مخلوعه، غرفه ملانه لوحات رسومات لي انا، ومكان الرسم وعلب الالاقلام والالوان وكل شي في الغرفه زي م هو كدة وخرااافي لابعد الحدود، انا وقفته مبهورة قلته ليهو صهيب دة شنووو؟قال لي تعالي ساقني وقفني قدام لوحه وهو ضاميني من ورا قال لي متزكرة يوم يوم جيتي القيادة وكنتي لابسه توب ابيض وجبتي معاك كريم وجبتي لي كنافه واتموقفته معاك قدام دكتورة رفأ؟م قدرته اشيل صورتك من مخيلتي بعد م مشيتي، وقتها جاتني فكرة اني افرغ زعلي كلو في انو ارسم صورتك، جيت وقعدته فيها 8 ساعات من بديت فيها م وقفته الا وانا مخلصها، قلته ليهو كات، ودي وانتي شايله كريم كنداكتي وولدي لو م رسمتهم حأرسم منووو؟اما البقيه ديل كلهم وانتي نايمه في المستشفى م كنت قادر استحمل كل م اتضايق واشوف وضعك الانتي فيهو بجي البيت وبقعد ارسم كان ملجأي الوحيد، باسني مساااافه في خدي وشم ريحتي وقال لي اكتر حاجه كانت بتقربني ليك هو الرسم دة كل م ازعل منك واتضايق او ازعل من نفسي بجي هنا وبقعد اتخيل شكلك مع الموقف،

كان راسمني بأدق تفاصيلي، وانا راقدة في المستشفى للدربات المركبه في جسمي راسمها، مصدوومه انا يعني اخر شي اتوقعتو انو الحاجه دي ممكن تطلع من صهيب، قلته ليهو صهيب انا م مصدقه ابدا، جبتً رسام رسم الحجات دي صح؟إعترف، ضحك وخته يديهو في خدي وقربني منو وقال لي زي م إنتي كنتي بتلجأي للكتابه ومخصصه لي دفتر تحكي لي فيهو تفاصيل يومك ففي المواكب كلها انا كمان رسم صورك والتركيز على ادق تفاصيلك كان ملجأي الوحيد وبعدين انا مهندس معماري ي ستي يعني الرسم دة م حاجه جديدة علي لانو هوايه عندي بس مع الطيش الكنت فيهو ااااااا وييييين يااااااا

قلته ليهو عرفته كيف انو انا كنت بكتب ليك تفاصيل يومي في الموكب؟وجبته الدفتر من وين؟قال لي الدفتر جابتو لي بلسم لما كنتي في المستشفى على اساس انو لو محتاجو اكتب فيهو واقرا فيهو وكدة، بس زي م بقولو كل زول بعبرعن وجعو بالطريقه البتجي معاه صح؟ودي الطريقه البتجي معاي وم تساليني من مكان الدفتر عشان بقى ممتلكات خاصه ممنوع الاقتراب او التصوير قلته ليهو صهيب انا م قادرة اصدق اناا وربي م قادرة مستحيل، قال لي عارف كدة حيكون في تشكيك م انا بتعامل مع زول زي الحزب الشيوعي

عشان كدة تعالي عشان تصدقي، ساقني ومشى بي على حاجه كدة مغطيه بقماش، قال لي غمضي عيونك، قلته ليهو في شنو كمان؟قال لي غمضي بس، غمضته عيوني بعد دقيقه قال لي يلا فتحي، فتحته عيوني سكتته للحظهه وانا بعاين للصورة، قلته ليهو وااااااي لا م بصدق لا م بصدق، قال لي دي تبقى مشكله لو م صدقتي تاني

كان راسم لي رسم بنفس تفاصيل فستاني يوم عرس محمد، كل شي نفس الشي الفستان الاكسسوارات م مخلي تفصيله م راسمها، قلته ليهو صهيب انت مجنون!!!قال لي فعلياً مجنون بيك اسوي شنو بس قلته ليهو لحقته ترسمها كيف ومتين؟ قال بالليل بديت فيها اول امس بعد م نمتي وامس بعد م نمنا صحيت نص الليل بمزاج رايق وكبايه قهوة وانتي في مخيلتي ساهرته فيها لغايه بعد صلاة الصبح واهو طلعت بالطريقه دي

وكما قال الشاعر ي ستي:

آه إن مشت وأدت عيوني قفاها

ووبين إن بقت لاقتني بي محياها

في الحالتين تراي أنا روحي واويلاها

قلبي كمان أكيد بتلحقو أمات طه..

عاملة عيونك السمحات ديل..

ضميتو وإتشعلقته في رقبتو قولته ليهو بحبك، لا م بحبك بس انا بموت فييييييكك ياخ انت مجنووووووووووت م عارفه اقول ليك شنو م عارفه بجد انت ناوي توقف قلبي صح قال لي م انتي موقفه قلبي طبيعي وين الجديد قلته ليهو وعيوني ملانه دموع حبك ياخ قال لي يشهد الله موت موت موت حد العشق والهيام والوله كمان م حب بس

بوستو وقلته ليهو ياخي حد الهبل كمان، قال لي اهاااا قمنا للبكى والحركات؟مسح لي دموعي وقال لي ي...قبل م يخلص كلامو سمعنا كريم بصرخ، من الخلعه فكاني وجرى وانا جريت وراهو، دخلنا الغرفه لقيناهو ببكي صهيب شالو وبقى يهدي فيهو وهو يبكي بأعلى صوتو، عاينته للفيلم الشغال لقيتو فيلم رعب قلته ليهو صهيب يمكن اتخلع من الفيلم لانو كنا مشغلين Mbc2، بعد موال بكى هديناهو بعدها قعدته اضحك عليه

بعد م نام صهيب مسك تلفونو وانا رقدته جمبو بعاين لييه وسرحانهه في تفاصيلو بهبل وبقول معقوله ي ربنا بتحبني للدرجه دي؟ ولا انا المصاعب العشتها بتستحق العوض السمح دة منك، وهو مشغول بتلفونو، ختيت يدي في لحيتو عاين لي قال لي م تنومي دقيقه عايز اوريك حاجه، قلته ليهو شنوو؟قال لي دقيقه بس ولا اقول ليك تعالي جراني ورقدني في حضنو قال لي عايني، فتح لي صورة قلته ليهو الله دي مش بلسم

قال لي ايوان بلسم الصورة ماخدنها من غير علمها ه، قلته ليهو نزلت شغل في المستشفى يعني ولا شنو م فهمت؟وكيف مع العلم انو هي لسه م خلصت دراسه، قال لي المهم عندنا انو نشغلها بأي حاجه ممكن تفيدها وتديها دفعه معنويه، انا ومحمد اخوي بنعرف دكاترة هناك وجراحين كمان اتواصلنا معاهم وشرحنا ليهم وضعها و على حسب تواصل امتثال معاها اقنعتها بي إنها تنزل ك متدربه الفترة البسيطه دي معاهم وهي لو شدت حيلها ممكن عادي لي قدام يدخلوها العمليات بس طبعاً اكيد م حتشارك بس حتتفرج وهكذا

قلته ليهو انت ي صهيب عاد لا تفوت لا تموت ي يمه انا لو اتولدته في الف حياة م دايرة غيرك لي راجل ضحك مسااافه وقال لي ي شيييخهه ههههه طيب وازيدك من الشعر بيت؟قلته ليهو اها؟فتح الدرج الجمبو وقال لي إتفضلي ي ستي، قلته ليهو دي شنوووو؟قال لي م شايفه؟تزاكر طيران، قلته ليهو والمعنى؟قال لي السبت الجاي حنسافر السعوديه، قلته ليهو بخلعه نعم؟قال لي مش وعدتك انو حنمشي نعمل عمرة وحأوديك لي بلسم اول م نلقى فرصه؟يلا دة انسب وقت نمشيهو عشان بعدو انا حأنزل الشغل وم حيكون عندي زمن تاني لانو حالياً اتعرض لي مشروع كبير لسه بنتفاوض عليهو

بقيت اعاين فيهو، مسك يدي قال لي بعد الفترة المضت دي كلها نحن حرفياً محتاجين للعمرة دي، قلته ليهو م عندي شي اقولو والله بس ارجع واقول ليك إنو انا بحبك شديد الله م يحرمني منك ي رب ويهنيني بيك دايماً كدة، ضماني وقال لي ولا اتحرم منك ي رب، قلته ليهو بكرة التوقيع الساعه كم؟قال لي 12...

نرجع للقصه بلسان صهيب، ، ،

شهد في اليوم دة ابداً م نامت كانت مصرة تسألني عن تفاصيل الرسمات الانا رسمتها ليها وقالت لي ليه م شاركته في رسومات القيادة دامك بتعرف ترسم، تقريباً شهد اول كائن ارسمو، م حصل ابداً جربته إني ارسم، اي نعم ممكن اصمم مباني وكل شي بس كائن حي اول بني ادمه جاتني رغبه إني ارسمها كانت شهد وبما إني انسان بهتم بالتفاصيل وبحفظها في مخيلتي م بحتاج لصورة تكون قدامي بالضبط بس في المستشفى كنت بصورها للضمان كدة

اثناء م بتتكلم معي قلته ليها الساعه 12 جات صباح المدنيه، قالت لي متزكر ي صهيب اول موكب مشيتو يوم 25 ديسمبر؟قلته ليها وشلتي معاك كريم اغبى تصرف اتمنيتك ميته اليوم داك، ضحكت قالت لي لا حولاااا ياخي حسبي الله من مواكب العربي وبمبانو والعنف الكان بكون فيهووسلسله الاعتقالات البشعه للبنات من غير اي رحمه ولا مراعاة لي إنها حرمه، قلته ليها وكميه الامن وتاتشرات الجهاز ومكافحه الشغب ياخ تدخل العربي قلبك يرجف من شوفتهم، قالت لي سبحان الله كنا وين وبقينا وين، قلته ليها البشوف الثقه الكانو بتكلمو بيها الكيزان م بقول اسي في كوبر، قالت لي ولا بقول إنو نحن حنصل للنقاط دي وحنخت العسكر امام الامر الواقع، قلته ليها ابتدت بمواكب اعدادها قليله عطبرة مروراً بالخرطوم، محاولات قمع بشتى الطرق، تضليل إعلامي، تصريحات كاذبه لناشطين سياسين وتهديدات، تطبيل من كل الجهات، محاوله كسب الشارع وتضليل الشباب بالحجات القالها قوش زي "حنرجع ستات الشاي شارع النيل لقى الشباب بقولو تسقط بس، قال ليهم حنفتح ليكم النوادي في شارع النيل لقاهم لسه بهتفو، الغى ليهم قانون النظام العام بس اااا وييين ياااا الشفاته راكزين، قالت لي م تنسى الغى عقوبه حد السكر وقانون الزي الفاضح دة غير انو قالو عليهم سفهاأ مطاليق ومأجورين وشذاذ افاق وموساد

قلته ليها بالضبط كدة بس عشان تعرفي كميه الوعي الكانو فيهو الشباب دة، عارفين هم عايزين شنو الواحد بطلع رغم وقوف اهلو و المجتمع ضدو وم عارف حيرجع ولا لأ اذا طلع بس رغم دة كلو كانو متمسكين بقضيتهم، قالت لي بالجد عبرنا، قلته ليها عبرنا بالوجع والقهر والاضهاد والانتهاكات والقتل والغدر، ايوة عبرنا بس الوجع اكبر، قالت لي علشان الوجع دة يتضمد لازم ناخد حريتنا والا م حنكون عملنا شي

قلته ليها اكيد، قالت لي ي ربي حننتصر ي صهيب؟حناخد مدنيتنا العايزنها؟قلته ليها عارفه ي شهد انا على قناعه انو التفاوضات وإتفاقيات السلام إتعملت لحقن الدماء ودة بالزبط الحالياً حاصل لانو إكتفينا موت، التفاوض والاتفاقيه على الوثيقه دي لحقن الدماء وطبعاً دة م معناه انو بواسطتها م حناخد مدنيتنا لا ابداً بالعكس حناخدها، قالت لي ودة المطلوب اذا النتيجه واحدة بس الخوفه من العسكر لأنو م مضمونين ي صهيب، زي م غدرو بشباب الاعتصام وفضو القيادة بالصورة البشعه دي رغم إنهم كانو في تفاوضات م بغلبهم شي، قلته ليها حبيبي نحن م ضامنين العسكر نحن ضامنين التجمع، ضامنين القوى البتتفاوض بإسمنا، ضامنين نفسنا وقدراتنا ورغبتنا وصوت الشارع، وزي م قالو الشباب "إن عادو عدنا لهتافات الشوارع والمواكب والنشيد"هم إفتكرو فض الاعتصام نهايتنا بس إتفاجأو بردة الفعل العكسيه، وبدل ال 10 نفر طلعو 100، كل م يكتلو روح مننا الكره بزيد، كل م يغدرو الرغبه في سقوطهم بقت اكبر، كل م ينتهكو الاصرار بيتضاعف الف مرة، عارفه لييه؟لانو دة اكتر جيل عانى من حكم الكيزان ونظام الدوله وإتظلم منهم، م اتوفرت ليهو حتى ابسط حقوقو في الحياة دي، حتى المطالبه بحقوقو البكفلها ليهو الدستور أُعتقل وا إتكتل فيها لما طلع طالب بيها ف بالتالي سقوط العسكر ونظامهم والحكومه المدنيه هي مخرجهم الوحيد، فكرك دة جيل ممكن يستسلم او يُقمع؟حالياً المدنيه م بقت خيار لا ابداً بقت قرار حتى الجسم البتفاوض مع العسكر إذا اتهاون حيلقى الشباب دة ضدو، ثورتنا بالذات عبرت لانها سلميه رغم العنف الكان مستخدم، عبرت وبقت أسلوب حياة خليك مننا نحن الكبار حتى اطفالنا اتحولو من انهم يرددو اغاني افلام الكرتون وطيور الجنه لي إنهم يهتفو بهتافات الثورة كل الوقت، المدنيه النحن عايزنها هي البتلبي متطلبات الثورة بكل نواحيها ومن اولوياتها قصاص الشهداء وكل المشاركين ومتسببين في كل قطرة دم نزل وانتهاك حصل من 25 ديسمبر، والمدنيه دي م وثيقه بتتوقع وتغير للحكومه بس لا ابداً والله هي تغير لينا نحن زاتنا في نفسنا، لاازم الواحد يبدأ بنفسو، لازم نتخلص من عقليات الكيزان الزرعوها فينا من 30 سنه، لازم نتعلم نحترم الراي والراي الاخر ونحارب الديكتاتوريه المستوطنه جوانا دي، لازم نتعلم نحترم المعتقدات، الاديان، الافكار، وجهات النظر، لازم نرتقي بنفسنا اول عشان نمثل المدنيه بحق وحقيقه ونخلي الوعي يسود في مجتمعنا بمعرفه حقوقنا والبينا والعلينا و نقدر نحن زاتنا نأثر على الجيل القايم جديد دة بعيداً عن الزرعوهو فينا الكيزان، المدنيه اعمق من الفهم الخاتنهو وراسمنو ليها بعضنا للأسف، قالت لي بجد دة المفروض يحصل بس ارجع واقول ليك ي صهيب م تدي العسكر قفاك العسكر م حيصونك دي الحاجه المفروض تكون معشعشه في عقولناااا والله يعدي يوم بكرة دة على خير، مسكته يدها وقلته ليها وارجع واقول ليك"وان عادو عدنا لهتافات الشوارع والمواكب والنشيد"

حنفضل نردد هتافات الثورة ونقول "تسقط بس" على كل حاجه بتعيق مدنيتنا

وحنفضل نسمع شعر حميد واغاني مصطفى سيد احمد

وحنفضل مُصرين على انو مطلبنا يكون "حريه، سلام، عداله"

وحتفضل المدنيه بالنسبه لينا هي قرار لا محالهه

وحتفضل شوارعنا تصدح بأصوات الثورة ومجسدة معالمها

ووسط دة كلو حنبنيهو

قالت لي وبعد تبقى مدنيه؟ قلته ليها حنقيف في وش العسكر وحننهتف ليهم هتاف "يا مستبد قول لي، الليله شن بتسو"؟قالت لي طيب وبعد نبنيهو؟ قلته ليها حنقيف "وحنقول ليهم ااايوة نحن المرتزقه والسفهاء والمطاليق وشذاذ الافاق وجيل فلفله الشعر والسيستم وتقعد بس

ضحكت وسرحت فيني مسااافه وقالت لي عارف في سؤال في راسي!!! كل م اعاين ليك بخطر على بالي قلته ليها اللي هو؟قالت لي انا عملته شنو عظيم في الحياة دي علشان ربنا يكافئني بيك قلته ليها ي حبيبي وحاتك انا الربنا لما حب يهديني ختاك لي في طريقي، انيستي وونيستي وراحتي وعافيتي وتاج راسي الف الحمدلله عليك دايماً وابداٌ وانا ببقى بيك وبعدين اناا بيك حصلته على مدنيتي الخاصه والمنتظرها حالياً بكرة دي مدنيه الوطن ف شنو مدنياو...

إقتباسات

"وإن بالغتُ في حبكِ يوماً فهذا لأنني على يقين بأنكِ تستحقين ي شهدي وكُل شواهدي"...

إذا الشعب يوماً اراد الحياة لا بد للغدر ان يستجيب

"ي شعباً لهبك ثوريتك، تلقى مرادك والفي إيدك"

إصنع ثورة تحصد وطن...

كن ثائراً فالأرض لا تسترد بالتفاوضات وإتفاقيات السلام

حقنا كامل م بنجامل

البلد دي حقتنا، مدنيهه حكومتنا، القصاص قضيتناو...

حنبنيهو البنحلم بيهو يوماتي...

وفي الشوارع لنا بقيه والشوارع لا تخون، حتماً سنلتقي...

"نتلاقى في الميدان المدني الساعه مدنيهه ونص...

مدنياو

كسرهه

شكراً للناس التابعت وروحها حرقتها واتشحتفت اسفه على طول الوقت والتقطيع بس كل الظروف م كانت مساعدة والله وارجع واقول ليكم هي ابداً م روايه ولا الكاتبها روائيه ولا عندها علاقه بالروايات ولا مقومات الكتاب والروائين، وزي م بقولها زي كل مرة هي عبارة عن شخبطات وخربشات وعولاقات"مش جمع عولاق عولاقات؟"

المهم الواحد بكتبها لانو منفسن وبشاركها معاكم وبمسك زمن بنفسو وبيكم، والمكسب الوحيد بتمثل في انو الواحد يتسبب في انو غير مزاج زول مكتئب او زهجان او غيرو، غير كدة ماف غرض والله لا شهرة ولا لايكات ولا وصول لمرحله كتاب ولا غيرو، إنتو بس إنبسطو وانا بغرق سعادة الضريبه الوحيدة هي سعادتكم دي، ف شنو الله يسعدكم ويحقق امانيكم ويدي كل زول فيكم لمن يرضيهو، وإن شاءالله نحصل على مدنيتنا ونجيب حق اخوانا ونبنيهو

دعوة حلوهه منك بتكفي

الاخيرهه