الجزء 10

قال ليها :

_ تسمحي لي أعزمك ?

وهو بعاين ليها جوه عيونا خجلت نزلت رأسها

في اللحظة دي إتغير السواد الفي دنيا لي الوان تتدخل البهجة في النفس

إحساس غريب إتوغل جواها , أول مرة تحس بيه

هزت كتفها بأنها موافقة , طار من الفرحة صفر بصوت عالي لمن خجلت بقت تتلفت تشوف لوو في زول إتتبه ليه , قال ليها :

_ من الليلة شيلي فكرة إنك تتلفتي لأنك ح توجعي رقبتك أنا مجنون ولا ما عندك مساحة للمجانين في حياتك ?

ضحكت قالت ليه :

_ حسب نوع الجنون الفيهم في ناس جنهم سمح ..

_ ههههههههه جربيني والله جني أسمح من سمح ..

شالت شنطتا وقامت سبقا مشى على العربية فتح ليها الباب ..

وقتها تلفونا رن عايزة ترد قلعو من يدها

قفلو ودخلو في جيبه بعد ركبت قال ليها :

_ الوقت دا حقي أنا ما من حق أي زول ياخد منو ثانية ..

عاينت ليه بإستغراب جواها مية سؤال بس ما قادرة تقول شي سكتت مسافة قالت ليه :

_ على فكرة أول أمس كنت بعرفك بتمثل أنت ما عيان ولا شي ..

بقي يضحك بصوت عالي شغل الموسيقى عشان يعدي الموضوع

قالت ليه :

_ علي أنت ليه ظهرتا في حياتي الآن تحديداً ليه بتحاول تقرب في الوقت الأنا بقيت فيه بعيدة ..

_ بتصدقيني لو قلت ليك ما عندي إجابة للأسئلة في نفسي مستغرب فيني لأني أول مرة أكون جادي للدرجة كلهم ما مصدقني أولهم صافي بت عمي بس ما أقول شي ولا بفسر لحدي ما تكوني لي ..

_ أكون ليك هههههههههه ? عرسي إتحدد وخلاص إتونس أتونس

_ كدي الموضوع دا هسي ما وقتو نهائي , تحبي نفطر وين ?

_ في الشركة طبعا الساعة ماشة 11 ونحنا لسة لافين ..

_ ههههههههههه أنتِ مع المدير ما تخافي ..

_ الشغل شغل يا السيد المدير ..

اتجادلوا في الموضوع كتير وهو لسة لافي بيهم

لحدي ما لمح كفتيريا وقف نزل وهي رافضة تنزل

فتح الباب داير يجرها من يدها ما كان عندها حل غير تنزل قبل ما ينفذ الفي راسو ..

فطروا بسرعة لأنو مطلوب في إجتماع وهم في الطريقة وقف يرد على التلفون

شذى بدون ما تفكر قالت ليه وهي بتأشر بيدها :

_ ياريت لو بنقدر نشرب شاي عند الخالة بس في الشارع ..

_ ههههههه يابت شارع شنو ? ومعاي مافي حاجة إسمها ياريت معاي يلا ارح ..

مع إنو ما بحب الشاي طلب معاها بعدها طلب قهوة

بتونسو بضحكو طلع من بالو موضوع الإجتماع قاعدين لحدي العصر