الجزء 24
شاهين جاتو سفره يومين القاهرة ... عشان كده قال لي امشي البيت وبكده بكون مطمن علي أكتر ...
وصلنا عم صالح الجنايني .. بعد وصلنا كان محمد سيد البقاله قاعد بره ومن شافنا طوالي دخل بقالتو وقفل الباب ¡¡ استغربت من تصرفو بس ما اشتغلت بالموضوع كتير
لكن الغريبه تاني يوم سقت زينة ومشينا نجيب اندومي لأنو أشتهيتها ...
سلمت على محمد رد لي بكل رسميه ...
ادانى الاندومى حاسبتو و
قبل ما أطلع قال لي يا أختي : انتي الزول الأمس جابك ده منو ! ؟؟ زوجك ؟؟؟
بغض النظر عن اختي دي ... ضحكت وقلت ليهو ده عم صالح الجنايني حقنا .. راجل طيب بشكل
قال لي طيب !!!!!
قلت ليهو اااي عندك شك ...! قال لي ابدا لالا عداهو العيب ..
طيب في شنو وبتسأل ليي ! ؟؟؟
لالا ماف حاجه ... حلاته بتكم ربنا يخليها ليكم ...
تسلم يا محمد ..
رجعت البيت وانا بتسائل ياربي في شنو !!!! ولييي محمد سأل من عم صالح !!! ؟ تاني قلت لي نفسي بكون شمارات ساي اصلا الرجال بقو جنهم شمارات ...
جاني اتصال من منى زي العصريه كده ... اتونست معاها كداااا ... لغاية صبا جات قعدت تأشر لى .. بسببها اضطريت اقفل المكالمه بالله عامله زي ( ميسر ) مرت لمعى من مسلسل فاطمه ..
قالت لي ان شاء الله جبتي الكرت حقك ؟؟؟
قلت ليها كرت شنو؟؟؟
كرت الدكتور .. بكره عندك مقابله
اتذكرت موضوع المقابله نسيتو تماما ... والكرت زاتو في البيت ... قلت اكسر حنكها وامشي الشهر الجاي
لكن بعد كم دقيقه كده يمان اتصل علي وقال إلا يمش معاي بكرة .. ان شاء الله لو من بعيد لبعيد
... عشان كده اتهربت من زينة وركبت لي أقرب ركشه ومشيت البيت استغربت وقت شفت غرفة عم صالح مقفوله بطبله .. قلت يمكن مشى يزور أهلو .... دخلت جوه البيت وكان موحش بشكل !!!
دخلت غرفتي ... وفتحت دولابي قلبتو قلب بس ما لقيتو .. وتنوير ماف طبعا ... اتذكرت انو الورق كان مع شاهين آخر مرة .. عشان كده دخلت مكتبو ...
فتشت الدرج الاول ما لقيت ... فتحت التاني برضو ... لاقاني ظرف فتحتو واتفاجأته بالشفتو ...
اولآ لقيت لي كم صورة والظاهر انو التقطوها من بعيد ... تاني لقيت لي ورق كده فتحتو لقيت معاملات تجارية حقت بيع وشراء وكده
فتحت تاني ورقه لقيتها ورقة تبني !!!!! التاريخ كان 3/5/2012 يعني قبل 7 سنه كده
قلعت عيوني لمن شفت اسم زينة !!!!
الكلام ده بيعني !!!!
فجأة حسيت بحركة قمت دخلت الورق سرعة سرعة ... وادسيت ورا الباب ... الباب اتفتح وعم صالح جا خاشي عاين كدااا وطلع ...
استغربت جا من وين وانا شفت باب غرفتو الجمب البوابة مقفول بطبله؟؟؟
في حاجه غريبه وانا ما فاهماها ...
طلعت من المكتب بالراحه وقفلت الباب ... وقبل ما التفت سمعت : مدام جوري !!!! الجابك هنا شنو !
ارتبكت وقت شفت عم صالح واقف وفي وشو ابتسامة خلت شعر جسمي كلو يقوم . حاولت ارجح كفة الميزان عشان كده قلت ليهو بكل ثقه : دا بيتي ومن الطبيعي اكون هنا
عم صالح : انا آسف مدام .. بس استغربت وفكرتك حرامي
ضحكت وقلت ليهو كايسه الكرت حق الدكتور بكره عندي مقابله ...
قال لي الكرت قاعد في المكتب ما شفتيهو؟؟؟
قلت ليهو لالا ما شفتو ... قال لي بتلقيهو في الخزنة ... رقمها السري 34
قلت ليهو هو حيالله كرت خاتنو في خزنة !!!
قال لي لانو الكرت غالي ... آخيييرا السيد حيجيهو ولد ...
ما فهمت كلامو وقبل ما افتح خشمي حسيت بوخذه في رقبتي كأنها عضة نمله .. بعدها حسيت بدوخه وفقدت الوعي ..
# كتمت
تابعو الآخيرة من صف البنزين بعد تقيفو في الصف بقصد بعد تصحو الصباح بدري😁🌚🔥🙈
توقعاتكم شنو شباب؟ والصباح نشوف البحصل وتصبحو علي خير♥️