الجزء 5
اصلا ... مافي زول اتكلم عن ترتيبات سكن حلا واحمد
الدائمة .. ح يقعدوا وين؟؟؟ .. في بيت اهل ابوهم و لا
عندنا؟؟؟ ..مافي زول جاب السيرة ...
كان ممكن اسأل ابوي و اشوف لو الرجال اتكلموا في
الموضوع دة ولا لا ... لكن جواي خايفة ومتوجسة ..خايفة
اجابة ابوي تكون انهم ح يسكنوا في العمارات ...
طبعا اصلا شقتهم هناك في العمارات ... واصلا زمان كانوا
قاعدين هناك ... ما معاي ...لكن زمان مختلف ...زمان
ابوهم وامهم موجودين ...وقاعدين يجونا طوالي مع امهم
... و انا طوالي بمشي ليهم في شقتهم ...
لكن بعد دة لو مشوا قعدوا هناك انا عارفة ما ح اقدر
اشوفهم زي زمان ..وزي ما فقدت اختي كمان افقد
اولادها .؟؟؟؟ ...
لغاية ما يوم بالصدفة سمعت عمتي و ابوي بالصدفة
بتكلموا في الموضوع دة ..... انا كنت في المطبخ وهم في
الصالة برة ..عمتي سألت ابوي نفس السؤال الداير في
عقلي ..
ابوي قال ليها ( والله لسة ما معروف ... ايام الفراش فتحنا
الموضوع انا ودكتور احمد و بكري ....بكري قال خلي ايام
البكا تمشي وان شاء الله كل شي بترتب ... تاني ما فتحنا
الموضوع ... )
طبعا لما سي ابوبكر يتكلم الناس كلها توافق !!!! كلام ابوي
طمني شوية ..لكن برضه بقيت خايفة ابوبكر دة يكون بدبر
ليه في حاجة ...لكن المهم هم حسة معاي ..وقررت اخلي
كل حاجة بوقتها ...
حلا واواب من ناحيتهم زي ما قلت متعودين يقعدوا
معاي .... مع انه المرة دي الحكاية مختلفة ...حلا دي شكلها
فهمت موضوع وفاة امها وابوها من اول ايام ... الدكتور
صاحب المرحوم محمد الجابهم من السعودية قال حلا يوم
الوفاة ولما كلموها بكت ..لكن اواب مرة ولا مرتين كدة
سألني ( ماما مشت وين ؟؟ )
حلا طوالي تنطط عيونها و تعاين لي .. كانها فاهمة ..
و . لما اقول لاواب ( ماما مشت الجنة .. هي وبابا )
بسألني ( برجعوا متين؟؟؟ )
احييي انا ..ما بقدر اجاوبه و هو بعد شوية بنسي و
بسكت ...لكن اليوم كله مباريني وماسك في هدومي ... دي
الحاجة الكان بعملها مع مروة ....
كان باقي لي اسبوعين على نهاية السمستر في الجامعة ...
و بعداك بناخد اجازة نص السنة ... الاسبوعين ديل كانوا
شوية زنقة عشان الامتحانات و التصحيح و النتيجة ... في
البيت لما اضطر امشي الجامعة واخلي ناس حلا ، مشاعر
بتجي تمسكهم مع مها ..
اما في الجامعة غايتو اسامة اصلو ما قصر معاي
... ساعدني في وضع الامتحان و التصحيح ورصد النتيجة
... وحسيت اننا قربنا لبعض اكتر .... مع اني الاسبوعين ديل
بس اول ما اخلص شغل طوالي بجري ارجع البيت ... ما زي
زمان بقعد معاه بعد الشغل في الكافتيريا نخلط ونتونس
..والله حاسة بيه مقدر ظروفي و صابر علي ...
بعد حلا واواب تموا عندنا اسبوع في البيت عمتي قالت
نمشي نوديهم لجدهم وحبوبتهم يزوروهم ... انا ما كنت
مرتاحة للموضوع لكن بيني وبين نفسي عارفة انه دة الصاح
...
من العصر بدري طلعنا انا و عمتي و ابوي ... لقينا عمتو
نعمات وعمو احمد و ابوبكر وعمر ..كلهم قاعدين ...حلا
جرت سلمت عليهم عادي ... لكن اواب كالعادة ماسك في
الاسكيرت حقي .. الا حمت بيه عليهم واحد واحد سلم
عليهم ... و لما قعدت طوالي جاء اتلصق علي ...
قعدتنا ديك كلها انا قاعدة و يدي في قلبي ...خايفة لما
نجي نمشي يقولوا لينا خلوا العيال ...لكن مافي زول قال
حاجة ... و لما طالعين على الباب خلاص ما فضل الا اجري
اطلع ... ماسكة حلا بيد واواب بيد ....
وكمان عمتي قالت نجيبهم كل اسبوع .. دي ح تكون حرقة
اعصاب غايتو !!!!
بعدها بيومين تقريبا العصر جانا ابوبكر في البيت ...كان
قاعد مع ابوي وياسر في الصالة ومعاهم حلا واواب ....
ولما جبت ليه العصير قال ( ح اسوق حلا واواب افسحهم
شوية .. )
انا لما قال ( ح اسوق حلا واواب . ) . وقبل ما يكمل كلامه
قلبي قال شح وقربت ارمي الصينية ... بقيت بس قاعدة
على اعصابي متوقعة في لحظة اي يجي يسوق حلا واواب
مني ...
ما اتنفست الا لما فهمت انه ح يجيبهم راجعين ...حلا
طوالي نطت ( ح تفسحنا وين يا عمو ؟؟؟ )
قال ليها ( ح نمشي الملاهي ... واي محلة تاني انتو عاوزنها
... )
اواب قال ( انا عايز ايسكريم ... )
ابوبكر قال ليه (حاااضر .. و ح نشتري ايسكريم .. )
طبعا منظر ابوبكر البارد الجامد يتكلم كدة مع العيال كان
غريب بالنسبة لي ...
حلا نطت ( هالة يلاكي معانا .... ) انا؟؟؟ ..امشي معاكم
وين مع ابوبكر دة ؟؟؟
قلت ليها سريع ( الليلة ما بقدر يا حلا عشان عندي
تصحيح ..ما شفتي الكراسات الجبتها معاي؟؟ .. )
قامت قالت لي ( خلاص المرة الجاية يللا معانا ... )
قلت ليها (كويس ... ) حلك للمرة الجاية ...
الحاجة الحيرتني اني لقيت حلا و اواب متفاعلين شديد
مع ابوبكر ..وانا كنت قايلة انهم ما متعودين شديد عليه
.. عشان سفره الكتير ... وعشان طبيعة شخصيته الجامدة
دي ...
حلا واواب جوا راجعين من مشوارهم مع ابوبكر
مبسوطين ... و يشيلوا و يحكوا لي في الحاجات العملوها
و الحاجات الاشتراها ليهم عمو بكري !!!!
وانا طبعا كنت قاعدة على اعصابي ما اتنفست الا لما
جابهم راجعين ... مشاعر قاعدة معاي تعاين لي وانا مقلقة
قالت لي ( يا بت دة شنو البتسوي فيه دة ؟؟ يعني ح
يختطفهم مثلا ...؟؟ )
قلت ليها ( ما بعيد عليه ... اي حاجة متوقعة ... )
هزت راسها تعاين لي زي المجنونة و قالت ( اقول
شنو ؟؟؟ ...بس استغفر الله ... )
تميت اخر اسبوع دوام لي في الجامعة و اجزت خلاص
قعدت في البيت ... وبقى ما عندي شغلة غير حلا واواب
... اعمل ليهم في الاكلات البحبوها .... وانفذ ليهم اي حاجة
يطلبوها ... لغاية ما يوم مشاعر شالكتني قالت لي كدة ح
تبوظيهم ..لكن ما اشتغلت بيها ...
و حياتنا بقت ماشة على الروتين دة ... بالنسبة لي انا اذا
الحكاية استمرت كدة ما عندي اي مشكلة ...حلا واواب
قاعدين معانا ... قطعة من مروة معانا ...
لكن الكنت حاسة بيه ما ياهو كان ابوي ... كتير اشوفه قاعد
متمحن وسارح بالساعات ... مرات اشوفه قاعد يعاين للعياال
ووشه فيه تعبير ما بتوصف ... زي الشايل هم كبير فوق
راسه ... مع انه بحاول ما يحسسني بالحاجة دي .. ولما
نكون مع بعض بحاول يتظاهر انه هو عادي ...لكن كنت
حاسة بيه بس ياه تظاهر ....
انا كنت بحاول بقدر الامكان اني اخفف عليه ..لكن ما
عارفة كيف .... وما عارفة اصلا هو الح يخفف عنه شنو
....
المهم واصلنا في حياتنا كدة ... اخر الاسبوع مشينا تاني
العمارات ودينا العيال لاهلهم ... و الزيارة مرت من غير
مشاكل بالنسبة لي !!!!
بعد يومين من مشيتنا الباب دق بعد الفطور .. ابوي جوة
مع جرايده ومها في المطبخ .. مشيت افتح الباب ... حلا
جارية قدامي و واواب ماسك في هدومي ... فتحت الباب
... و قلبي قال شحححح
ابوبكر ...
جاي لشنو؟؟
يتبع ....