الجزء 6
طوالي من اشوف ابوبكر الافكار السوداء بتبدأ تدور في
راسي ..
دخلت ابوبكر لابوي جوة في الصالة وجريت سريع اجيب
عصير .... لو عايز يقول كلام لابوي ما عايزة يفوتني
...قلبي دة يضرب دق دق دق ..
اديته العصير قعدت ..كان بتكلم مع ابوي في مواضيع
عامة ...قعدت على اعصابي .. اكيد ما جاي يتونس مع
ابوي ونسة ساي ... اكيد عنده حاجة ...يللا عليك الله انجز
خلينا نشوف عايز تقول شنو ؟؟
واخيرا ..
ابوبكر قال لابوي ( حلا اظن خلاص مفروض تنزل سنة
اولى .. انا قلت احسن تواصل في مدرستها القرت فيها
الروضة ذاتها ...ولا انتو عندكم راي تاني؟؟؟ ... )
انا اتنفست شوية .. الموضوع مدرسة حلا ... المدارس لسة
باقي ليها شهرين وتفتح و انا كنت مأجلة التفكير في
الموضوع دة ...
ابوي قال ليه ( لا لا احسن ما تغير ... اخير تواصل في
مدرستها ذاتها .... )
ابوبكر قال ليه ( واواب ذاته مفروض ينزل الروضة ... انا
قلت امشي اسجلهم الاتنين ... )
انا نطيت قلت ليه ( لسة باقي شهرين على المدارس .. )
يمكن عشان ابرر نحن ليه ما مشينا سجلناهم ...
ابوبكر قال لي ( مافي حاجة بتمنع نسجلهم من بدري
... على الاقل نضمن ليهم خاناتهم ... مدرستهم دي شايفها
مرغوبة ... )
اتلفت على ابوي وقال ( انا قلت اجي اشوف رأيكم ...
واسوق معاي هالة نمشي المدرسة ونخلص ليهم موضوع
التسجيل ... ) يسوقني انا ؟؟ ..لشنو؟؟ ...
قبل ما الحق افتح خشمي ابوي قال ليه ( ااي احسن من
بدري زي ما قلت ... ) واتلفت علي ( هالة قومي اجهزي
انتي عشان ما تتأخروا ... )
قعدت اعاين من ابوي لابوبكر ... تاني قلت النقوم بكرامتي
البس ...اصلا مافي زول عايز ياخد رأي في الموضوع
... موافقة امشي ولا لا ...
حلا قالت ( انا برضه عايزة امشي معاكم ...لبسيني يا هالة
... )
انا مديت ليها يدي عشان اسوقها ..لكن ابوبكر قال ليها ( لا
يا حلا ... الليلة ح نمشي نحن عشان نسجلكم ... )
انا وقفت مكاني رافعة يدي في الهواء ..حلا حمبكت و
عيونها دمعت وقالت ( لا .. لا ... انا عايزة امشي ... )
طوالي ابوبكر قال ليها ( تعالي هنا يا حلا ... )
مشت عليه مسكها من يدها وقعد يتكلم معاها براحة
( الليلة لانه التسجيل في المدرسة بجوا بس الناس الكبار ...
و ح نجيب ليكم اللبس و الكتب والشنط ... وانا ح اجي
اسوقكم افسحكم تاني ...تمام؟؟؟ )
حلا قال ليه ( ح تودينا الملاهي تاني ؟ )
قال ليها ( ااي .. زي ما تحبي .. )
قالت ليه ( خلاص ما ح امشي المدرسة حسة .... ح اقعد
مع جدو و خالتو مها ... )
طبعا لو كنت دي انا كنت سقتها معاي طوالي ..ما بقدر
استحمل زعلها ودموعها ....
انا اتنهدت و اتحركت مشيت سريع استحميت و لبست ...
طبعا دي اول مرة اركب مع ابوبكر العربية براي و كمان
معاه بقدام ...غايتو ربنا يصبرني على المشوار ...اول ما
اتحرك بالعربية قال لي ( حلا دي عايزة معاملة كدة بطريقة
خاصة ... )
قلت ليه سريع ( معاملة بطريقة خاصة كيف يعني؟؟؟ )
قال لي ( يعني الناس ما يستجيبوا ليها في اي حاجة
... لازم تعرف انه في حدود ... )
يعني قاعد ينتقد في طريقة تعاملي معاها؟؟؟ اتغظت قلت
ليه ( دي لسة طفلة .. ) و يتيمة ...
قال لي ( برضه لازم تعرف انه في حدود ... وانه ما اي
حاجة تطلبها الناس يعملوها ليها ...كدة ما كويس عشانها
... )
سكت ما عرفت اقول ليه شنو ...واتذكرت شكلة مشاعر لي
واني قاعدة ادلع حلا اكتر من اللازم ...لكن كيف انا اقدر
استحمل دموعها؟؟؟ ... انا ذاتي دمعت وقبلت على شباك
العربية وهو ما اتكلم معاي تاني ...
وصلنا المدرسة وهي قريبة لبيتهم في العمارات ... حسة
كان في داعي يجي المشوار دة كله لبيتنا عشان يسوقني
معاه؟؟؟ ...
دخلنا المدرسة و قابلنا المديرة ... واتأثرت شديد لما عرفت
بوفاة ام حلا وابوها ...ابوبكر خلص اجراءات التسجيل
ودفع الرسوم لحلا واواب ... وادونا الزي و الشنط و الكتب
... وطلعنا ... انا اصلا ما كان في لازمة لجيتي معاه ... يا
ربي جابني لشنو؟؟؟
وجاتني الاجابة بعد شوية ...
ابوبكر قال لي ( هالة في موضوع كدة عايز اناقشه معاك
قبل ما اكلم عمي ياسين ... ) واااي ...قلبي قال شحححح
.. موضوع شنو العايز يكلم بيه ابوي؟؟؟ ...
قلت ليه ( موضوع شنو؟؟؟ ) باين اني ظهر علي الخوف ...
وظهر في صوتي .. لانه عاين لي سريع كدة وقال لي
(احسن ننزل نقعد في محل براحتنا ونتكلم ... ) ..
. قلت ليه (كويس ... ) وانا خلاص اعصابي بايظة ..
بعد شوية كدة هدن قدام مبنى كبير ... لقيته دة فندق
قاعدة اسمع اسمه واشوفه في التلفزيون ... لكن اول مرة
اشوفه على الطبيعة ... نزلنا ودخلنا ... انا ماشة بوراه ...
وهو شكله عارف المحلة كويس ... دخلنا حتة مكتوب فيها
كوفي شوب .. كانت فاضية تقريبا فيها نفر ولا اتنين
....قعدنا وجانا الجرسون ..
ابوبكر قال لي ( تشربي شنو؟؟؟ ) اشرب؟؟ اشرب؟؟ انا بقدر
انزل حاجة من حلقي ؟؟؟
قلت ليه ( لا شكرا ما عايزة حاجة ... ) اتكلم سريع حلني
عليك الله ..
.قال لي ( عندهم عصير ليمون كويس ..جربيه .. ) وطلب
من الجرسون واحد ليمون لي ... وقهوة لنفسه ... لغاية ما
الجرسون جاء راجع هو ما اتكلم ... وانا قاعدة على
اعصابي ...
بعد جابوا لينا الطلبات حتى ابوبكر بدا يتكلم ...قال لي
( حلا واواب ...زي ما رتبنا ليهم موضوع المدرسة محتاجين
كمان نرتب ليهم باقي امورهم ... )
اهااا ... ياهو العرفته ... ياهو الخايفة منه ...
قلت ليه ( امورهم ياتها ؟؟ )
قال لي ( انهم ح يعيشوا وين .؟؟؟ ... ومع منو ..؟؟؟ . )
انا خلاص الهلع و الخوف فك عقدة لساني و قلت ليه ( ما
اصلا هم قاعدين معانا .... و ح يقعدوا معانا ... انا .. انا ..ما
ح اقصر فيهم ابدأ .. )
قال لي ( خلينا نكون عقلانيين يا هالة .... نبعد عن
العواطف شوية ونتكلم بمنطق ..انتي لسة صغيرة .... ما
عايزة يوم تتزوجي و يكون عندك حياتك و اولادك
انت ؟؟؟ ) ....دة كلام شنو دة ؟؟؟
قلت ليه ( انا ما ح اتزوج ... كفاية علي حلا واواب .. هم
حياتي )
قال لي ( .. طيب وهم؟؟ فكري فيهم هم كمان ... نتكلم
بصراحة يا هالة ..تفتكري انهم ح يكون كفاية عليهم انتي
بس؟؟؟ ...ما من حقهم يكون في حياتهم راجل كمان؟ ما
من حقهم يكونوا عايشين في جو اسرة ؟؟؟ ... لو في
امكانية لحاجة زي دي؟؟ ) اسرة؟؟ يعني عايز يشيلهم مني
عشان يعيشوا معاه وهو سوزان؟؟ سوزان ؟؟
خلاص سجلهم في المدرسة جنب بيتهم ... بعيد مني ... و
ح يتزوج سوزان و يشيلهم يعيشوا معاهم ..... انا بقيت ما
قادرة اتكلم ...لساني اتعقد ...
هو واصل وقال لي ( انا عارف انه مافي حاجة ح تعوضهم
عن امهم وابوهم ... ) صوته بقى جاييني من بعيد
... طاغي عليه صوت قوي داير في راسي ... صوت بقول
: خلاص عايز يقلعهم مني ....
هو واصل ( لكن نحن على الاقل نحاول نوفر ليهم اقرب
حاجة ممكنة لام واب .. )
خلاص عايز يقلعهم مني ...
( نوفر ليهم جو اسرة يضمن ليهم الاستقرار ... )
خلاص عايز يقلعهم مني ....
( والحل الوحيد ..... )
خلاص عايز يقلعهم مني ....
( .. انه انا وانتي نتزوج .. )
خلاص عايز يقلعـ .........
شنو؟
نتزوج؟
يتبع ....