الجزء 3

استسلم ايهاب لي قدرو وودع حبو لي رنده ورفض يتكلم في السيرة دي تاني وحاول يتعامل عادي مع رنده وسفيان عشان ما يحسو انو متغير من ناحيتم ورنده كانت مشغولة عنو بي سفيان وحبها ليهو الماخلاها تنتبه لي صديقا ولي الحزن الدفين الجواهو

وطلب ايهاب من جيهان وهشام انهم ما يجيبو سيرة بالموضوع لي اي زول خاصة انو شايف رنده وسفيان سعيدين مع بعض ودي الحاجة البتمناها انو رنده تكون سعيده وانو سفيان بدا يتجاوز صدمة وفاة اخوهو واندفع بكل قلبو وجوارحو ناحية رنده ورغم انو كان بعرفا من زمان لكن من بعيد وحسا ان كل عمرو الفات من غيرا كان ولا حاجة لولا وحود المرحوم سيف

في الفترة دي جيهان عرفت هشام اكتر من الاول وبدا مفهوما عنو يتغير وحست انها كانت ظالماهو شديد .. كانت متخيلة انو بحب الشهرة لقتو بالعكس هو حابي البرامج البقدما لانو بلقا فيها نفسو وبعشقا بالجد .. وحكاية البنات انتبهت انو بالعكس هو متحفظ جدا في التعامل مع البنات لكن لما يكون في واحد من البرامج العاملا لازم يكون منفتح اكتر في التعامل لكن بدون مايتجاوز اي حدود لانو مامفروض ينفر البنات منو وهم جزو من الجمهور البتابع برامجو الحلوةالبنظما وبتجمع النرفيه والفن والثقافة والبنتظروها الطلبة دايما

وكانت جيهان متحسسة لانها كانت متحاملة عليهو شديد بدون وجه حق وماعارفة كيف تغفر لي نفسها ظنها السيئ فيهو وهي العمرها مابتحب تظلم زول

وصلت جيهان الكلية ولقت شكلة مدوره وفاطمة حسان مستلمة الجو هي وواحدة شكلها عجيب ليها كم يوم حايمة معاها وواقفين يتكلمو بي صوت عالي ويضحكو علي تلاتة بنات شكلهم بسيط والبنات داخلين في ضفورم وماقادرين يدافعو عن نفسهم وفاطمة وصاحبتا بضحكو عليهم ويجدعو في الكلام ... جيهان ما اشتغلت بالموضوع كتير وكانت ماشه الكفتيريا وقبل ما تتحرك لمحت بت طويلة وسمرا وجميلة ووشها مليان غضب وقفت تتكلم مع البنات التلاتة الكانت فاطمة وصاحبتا بضحكو عليها ومشت ناحية فاطمة ووقفت قداما بدون ماتخاف منها ومن صاحبتا وادتا كف ماقدرت فاطمة تردو ليها ووقفت البت تعاين ليها بكل شجاعة وثقة في النفس وقالت ليها بكل برود

* لما يكون عندك كلام معاي قوليهو لي انا اي واحدة من اهل العوض الماعاجبنك ديل تاني لو سألتيها انا البرد عليك

وساقت البنات وخلت فاطمة وصاحبتا قاعدين في النار والكف معلم علي وشها واكيد عمرها ما ح تنساهو

وجيهان شافت الموقف كلو واتكيفت من البت شديد لكن ماكانت عارفة هي منو وفاطمة انتبهت انو جيهان شافت الموقف كلو وزاد غضبا زيادة وبقت تتوعد وتهري وتنكت في نفسها

* استني علي تديني كف يابت ال ...... يا انا يا انتي في الجامعة دي

وضربت جيهان كف بكف وهي بتقول

* ربنا يهديك

ومشت خلت فاطمة وصاحباتا في نارا ... لكن انتبهت انو في زول كان واقف بعيد وبراقب ويبدو انو شاف الموقف من اولو وابتسامة ساخرة مرسومة علي وشو ولما حسا انو جيهان شافتو رفع ليها يدو بالتحية وسبق هشام جيهان ودخلت لقتو قاعد منتظرا جوه الكفتيريا

اهليين هشام وينك ليك كم يوم ماظاهر في الجامعة

* قاعد لكن كنت مشغول شوية امتحاناتي قربت

* اهاااا تمام يازول مادام كده مافي مشكلة

واترددت جيهان قبل ماتقول

* بالمناسبة انا بالجد ماكنت بعرفك

* ههههههه عارفك كنتي مابتطيقي سيرتي

* يعني كاشف دوري

* انتي حكمتي علي من بعيد ويمكن عشان موضوع رنده القديم . كان مأثر فيك ... لكن زي ماقلتي انتي ماكنتي بتعرفيني

* صراحة شكلك ماكان بوحي بغير الفهم الفي راسي .. لكن توووبة ما احكم علي زول مابعرفو

* حلو ... معناها صورتي اتعدلت عندك

وضحكت جيهان بخجل

* بالمناسبة دي لازم تعزمني فطور ... لكن انا فطور الحناكيش ده مابنفع معاي عايزة فتة وبس

* ههههههه حاااااضر ياستي لكن ماهنا لو فاضية ح تاكلي فتة عمرك ما اكلتيها قبل كده رايك شنو

* تمااااام انا عشان الفول والفتة اخلي اي شي

* اوووو سامع الناس بتقول فتة جيت في وقتي

وصل ايهاب في وقتو تمام

* ايهاب رايك شنو نمشي فريد ونضرب فتة هناك .. متأكد جيهان تاني ما ح تاكل فول الا منو وبس

* المهم الحكاية فيها جومة اكيييد معاكم

وابتسمت جيهان لانها حست انو ايهاب بدا يستعيد مرحو وبهجتو الزمان

* يلا ياشباب انا جيعااااانة

وهمس ايهاب لي جيهان

* شنو ياشينة ناوية تحبي صاحبي ولا شنو ... يعني كل ما اصاحب واحدة لتزم تحب لي هشام عبدالله

وضربتو جيهان علي يدو

* ماقلنا نبطل الحركات دي ونبقا جادين شوية

وهم طالعين شافت جيهان البت الضربت فاطمة حسان الكف وعلقت عليها

* البت دي عجبتني شديد حسمت فاطمة حسان وخلتا تكلم نفسها زي المجنونة

وما كان في اي تعليق من جانب ايهاب وهشام لكن لاحظت انو هشام عاين للبت دي وهي كمان في نفس الوقت كانت بتعاين ليهو ونزلت عينا بسرعة وهشام اتلفت لي جيهان

* خلونا نحصل فول فريد .. بخلص من بدري وح تروح عليك العزومة

جيهان اكلت احلي فتة في حياتا وقررت انها تكون زبونة دايمة عند فريد والفضل يرجع لي هشام عبدالله الخلاها تعرف الإكتشاف الخطير ده ... ورجعو الجامعة وهم مبسوطي

ن وآخر ونسات وضحك

وهم داخلين بي عربية جيهان وجيهان بتضحك مع ايهاب وهشام وهي سايقة وما كانت بتعاين قداما ومامنتبهه للطريق . وفجأة لقت نفسها بتصدم العربية القداما والكان صاحبا بحاول يركن عربيتو ولقا جيهان بتخش فيهو بدون مقدمات

وبسرعة نزلت جيهان ومعاها ايهاب وهشام ونزل سواق العربية وبادرت جيهان بالإعتزار للزول الكان بطمئن علي الضربة ماتكون شديدة وعملت اثر واضح في عربيتو

* آسفة يا استاذ ما كنت منتبهة

ورد عليها صاحب العربية

* ما منتبهة ... عزر مامقبول ... عربيتي ماحصل ليها شي ولا انا الحمد لله ... لكن المرة الجاية لو برضو مامنتبهة ممكن تروح فيها ارواح ناس وممكن تكوني انتي الضحية

وهشام اول ماشاف صاحب العربية ضحك وقال

* عربيتك جاتا البركة يا استاذ دي جيهان بلال الصدمتك يعني ما اي زول

* اهاااا دي صديقتك الجديدة .. اتشرفنا جيهان .. انا قصي عبدالله اخو هشام الكبير

ومد قصي يدو وسلم علي جيهان وايهاب

* ولايهمك ... حصل خير

* آسفة للمرة التانية

وعرف هشام الجميع

* قصي اخوي الكبير طبيب صيدلي ... ايهاب الرشيد طبعا سمعتا اسمو كتير عندي

* اخير شفتا ايهاب ...

وسلم علي ايهاب مره تانية

* غريبة اول مرة الاقيك انت معانا في الجامعة

* انا خلصتا قبل ما انتو تدخلو الجامعة ... لكن محتاج لي مراجع ضروري ومابلقاها الا هنا

* تمام

وجيهان قالت

* فرصة سعيدة لاقيناك الليلة

واستأذن قصي الشباب واتوجه ناحية المكتبة عشان يشوف المراجع المحتاج ليها وبقية الشباب اتفرقو كل واحد علي محاضرتو علي وعد باللقاء نهاية اليوم

خلص اليوم سريع واتجمع الاصدقاء نهاية اليوم ومعاهم رنده وسفيان ... وايهاب بحكي ليهم الطريقة اللاقو بيها قصي اخو هشام .. وهشام كان لسه مالاقاهم .. وهم في وسط ونستم انتبهت جيهان لي البنت الضربت فاطمة وهي جاية من بعيد ووشها متغير شديد وشكلها زي الزول الخايف او متوتر من حاجة لانها كانت بتعاين وراها ... وظهرت فاطمة حسان فجأة ووقفت قداما بتحدي وجيهان سمعتا وهي بتقول

* موش قلتا ليك ما بخليك .. البقيف في وش فاطمة حسان مابكسب

والبت عاينت لي فاطمة من فوق لي تحت بكل اشمئزاز وهي بترد عليها

* انتي واحدة حقيرة وبس

وضحكت فاطمة بي شماتة

* ياشاطرة الزمي حدودك واعرفي انتي بتتكلمي مع منو وإلا ....

* ياحقيرة قايلا عملتك دي وانتي والكلب المعام ح تخليني اخاف منك لا وانا بتك يا ابو طالب ... وانتي من اليوم ح تعرفي انا منو

وخلت فاطمة واقفة تعاين ليها لحدي ما اختفت من قداما وفاطمة مبتسمة وشكلها آخر امبساط

ولما انتبهت جيهان للشباب المعاها لقت الكل منتبه للموقف الحاصل وهشام ظهر بعد شوية وسلموعليهم وايهاب همس لي هشام بي كلام .. وهشام استأذن منهم ومشا طوالي

* هشام مالو مشا طوالي كده انت قلتا ليهو شنو

سفيان سأل ايهاب

* هشام لازم يوقف البت الاسمها فاطمة دي في حدها ماشفتو كلكم تصرفا مع البت المسكينة دي

جيهان لقتا فرصة عشان تعرف منو البت دي

* ايهاب انتو بتعرفو البت الكانت بتتكلم مع فاطمة دي

* انتي مابتعرفيها ولا شنو

ردا عليها ايهاب بي استغراب

* مابعرفا .. لكن شايفة فاطمة شايلاهو معاها تقيل .

وهنا ردت رنده بهدؤ

* دي ريا ابوطالب حبيبة هشام عبدالله

* اهااا عشان كده

وضحك ايهاب

* ايوااااا عشان كده ياشينة

وغمز ليها ايهاب غمزة خلت رنده تحمر ليهو زي ايام زمان

* سفيان رنده بعد شوية ح ترميني بي طوبة ... في شنو يارنده انا قلتا حاجة اسه

وهنا جيهان قالت ليهو

* لو بتعرف ريا ممكن تعرفني عليها ... ضروري ولازم

* حاضر ياستي مع انو ريا ما عندها اختلاط بي ناس كتير لكن بحاول اعرفك بيها

* اوكي

* لكن ممكن اعرف السبب

وغمز ليها تاني

* ايهاب عشان راسك مايودي ويجيب .. فاطمة مستقصدة ريا وشكلها عملت معاها عملة تاني ... صراحة ريا عجبتني قبل ما اعرف هي منوفعلا وكان نفسي اعرفا عن قرب

* اهاااا كده بس .. حااااضر ياشينة

* يلا انا لازم امشي اشوفكم بكرة

وغادرت جيهان الشلة

واتفرق الاصحاب كل في اتجاه وجيهان مشغولة بي ريا ورنده كبر جواها احساس انو جيهان وايهاب في بينم حاجة وايهاب بمجرد ما جيهان طلعت استأذن وطلع وراها طوالي عشان يخلي الحبايب علي راحتم ومشا يفتش علي هشام لانو عاوزو ضروري في حاجة شافا قبيل ويمكن تكون ليها علاقة بي نقاش فاطمة وريا .. وربنا يستر من فاطمة وخبثها واسلوبا الملتوي لأنها لو بدت تضرب ريا تحت الحزام وتدخلا في السكك دي هو كمان ح يقيف ليها عشان بت الناس دي مايدخلوها في متاهات ماليها اول ولا آخر

لما هشام كان قاعد مع اصحابو ايهاب قال ليهو انو شاف فاطمة ومعاها معتز ابراهيم داخلين المكتب معتز ابراهيم ومعتز ابراهيم رغم انو استاذ في الجامعة إلا انو عندو سلوكيات مشبوهة لكن مافي زول قدر يمسك عليهو حاجة والبلم فاطمة حسان مع معتز ابراهيم اكيد حاجة مامزبوطة وهو اول ماسمع الكلام ده خاف انو فاطمة تكون بتجهز لي ريا في مصيبة ومعاها معتز ابراهيم ... عشان كده طلع يفتش علي فاطمة حسان لكن مالقاها ونفسو كان يمشي لي رايا لكن قلبو المجروح خلاهو ينسي الفكرة .. و

ايهاب جا لقاهو واقف محتار ...

* عملتا شنو

* مالقيتا اختفت

* وريا

وسكت هشام مسافة وبعدين قال

* ماعارفا وين وما عايز اعرف

* هشام انا شفتا رياداخلة مكتب معتز وبعد شوية ريا جات طالعة منو بالمنظر الشفناهو كلنا ... اكيد ضايق ريا بي حاجة واكيد فاطمة ليها يد ... عايز تقيف مكتف يديك عشان زعلان من موقف ريا العملتو معاك ... ريا كانت مخدوعة وفاطمة طبخت الحكاية كويس

* ريا ما قيمتني

* ريا بت بلد ومابتعرف الخباثة واكيد لما تشوف ورقة زواج عرفي عليها اسمك اكيد ح تصدق .. اي واحدة في مكانا كانت ح تتصرف نفس تصرفا

* وين حبنا ووين الثقة البيناتنا

* خليك منطقي ياهشام .. علي كل ده ما وقتو خلينا نشوف ريا ونعرف منها الحاصل شنو بدل مانخليها لي فاطمةكل يوم تمهزل فيها وتدخلا في مواضيع ومشاكل هي ماقدرها

* عايزني اتكلم معاها كيف وبي ياتو صفة

* بالصفة الخلتك تجري ورا فاطمة عشان تبعدا من طريق ريا .. بي صفتك زميل .. راجل وخايف علي زميلتو .. بي اي صفة ياخ المهم نعرف فاطمة مالا مع ريا

ايهاب اقنع هشام انو يتكلم مع ريا وعشان ما يكون في اي حساسية في الموضوع طلب منو انو يتصل عليها او يلاقيها المهم هو ما يكون معاهم لانو ريا ممكن تتحسس منو وماتقدر تقول حاجة قدامو

لكن هشام ماقدر يلاقيها او يكلما في نفس اليوم عرف انها رجعت الداخلية والموبايل حقها مقفول

وصل هشام بيتو واتكلم شوية مع ايهاب عشان يوريهو انو ماقدر يلاقي ريا او يكلما وبكره بمشي ليها الكلية ويتكلم معاها

ورقد في سريرو ومقلق ماقادر ينوم .. ودخل عليهو اخوهو قصي وقال ليهو عن خبر سفرو المفاجئ

* انا احتمال اسافر خلال اسبوع

* تاني ...

* لازم اسافر انت ناسي شغلي هناك لازم ارجع ....

* كنتا قايلك خلاص خليت الغربة وح تقعد نهائي لانك قعدتا فترة طويلة المرة دي وما جبتا سيرة انك راجع تاني

* هنا مابقدر اعمل حاجة او اطور من نفسي لكن بره المجال اوسع وفرصة التطور والنجاح اكبر واسرع .. لكن كل ما القا فرصة برجع عارفني زي السمكة مابعرف اعيش بره الموية ومابقدر ما اشوفكم ولا ما ازور بلدي

* ربنا يوفقك ...

* في حاجة كنت عايز اسألك منها

* حاجة شنو

* قصدي شخصية ... زميلتك الكانت سايقا العربية

* قصدك جيهان بلال

* اسمها جيهان

* ايوه .. مالك يادكتور السنارة غمزت ولا شنو

وابتسم قصي وهو بقول

* ماعارف والله لكن فيها حاجة غريبة جذبتني ليها

* جيهان بلال بت جدعة لكن بصراحة انا يادووب عرفتها من فترة بسيطة

* اتمنيت لو كنتا قاعد فترة اطول كنتا اتعرفتا عليها اكتر

وعاين هشام لي اخوهو بي استغراب

* تعرف ياقصي دي اول مره اسمعك بتتكلم فيها عن بت ... والله جيهان طلعت ماهينةجابت راسك

* ماكان عندي زمن عشان افكر في اي حاجة غير مستقبلي لكن شكلو ماعندي نصيب السفر الظهر فجأة ده ما ح يخليني اعرفا او اتكلم معاها ... ياسيدي خليها للزمن مامعروف البحصل شنو

* لو انت معجب بيها فعلا ممكن تتعرف عليها ... السفر مامشكلة

* لا ياهشام ماعايز اشوفا مره يبقا كلامنا تلفونات او نت .. انا عايز انسانة تكون موجودة في حياتي فعلا وانا كمان موجود في حياتا ... خليهو الموضوع ده اسه يمكن لما ارجع تاني يكون لي نصيب والاقيها واعرفا

* انت معقد الموضوع ساي

* مامعقدو ولا حاجة ماعايز اكون زي المغتربين البنزلو عشان يخطبو واحدة ما شافوها الا . لثواني او يمكن حتي مايكونو شافوها الا في صورة

* يازول علي راحتك ... لكن لو انت فعلا فكرتا في جيهان بلال انا بأيدك جيهان بت اي واحد بتمناها

* وانتا

وسألو قصي بصورة مفاجئة

* هههه يادكتور انا لو ما كان قلبي مشغول كنتا ح اخطف جيهان خطف .. لكن خلاص قلبي . مشا حتة تانية

* لسه مع ريا .. مش قلتا سبتها

* سبتها وقلبي لسه معاها

اول حاجة عملا هشام اول ما وصل الجامعة الصباح انو مشا لي ريا في الكلية وبرضو مالقاها وسأل منها صديقاتا وعرف انها ماجات الجامعة وانها قالت تعبانة شوية وماجاية الليلة .. وبرضو تلفونا لسه مقفول وطول اليوم وهو بحاول يتصل عليها ولسه مقفول مامن عادتا تقفل تلفونا لانو اهلا بتصلو عليها دايما عشان يطمئنو عليها وغريبة تقفلو من امبارح فإما يكون عطلان او هي قاصدة تقفلو ... وقلق شديد عليها وقرر يصل ليها ويشوفا ويتكلم معاها بي اي طريقة

واتصل علي جيهان

* الو جيهان وين انتي

* اهلا هشام .. انا داخلة محاضرة اسه

* طيب بعد ما تخلصي ارجعي لي ضروري عندي مشوار وانتي ح تساعديني فيهو

* لو عايز العربية تعال شيل المفتاح

* لا عايزك تمشي معاي

حست جيهان انو الموضوع ممكن يكون بخص فاطمة او ريا

* اوكي اخلص محاضرتي وبكلمك

ودخلت جيهان المحاضرة وبالا مشغول في المشوار العايزا فيهو هشام

اول ما خلصت المحاضرة لقت هشام ومعاهو ايهاب واقفين منتظرنها ...

* كويس انك هنا كنتا ح اكلمك اسه

* انا واقف من بدري منتظرك

وضحك ايهاب

* ماقادر يصبر

* ايوه ماقادر اصبر قلقتا شديد

* فهموني الحاصل شنو

وردا عليها ايهاب

* ياستي ريا من امبارح تلفونا مقفول وما جات الجامعة وهشام قلقان عليها وعايز يعرف مالا امبارح وليه فاطمة اتكلمت معاها ك

ده

* طيب ممكن اعرف انا ممكن اساعدكم بي شنو

وهنا ردا هشام

* لازم اشوفا ولو مشيت ليها الداخلية ح اعمل ليها شوشرة لانو الكل عارف علاقتي بيها وكيف انتهت ويمكن كمان ماتقبل تشوفني او حتي حرس الداخلية مايقبلو يخلوني اشوفا لاني ما قريبا

* عايزني امشي اكلما ليك

* عايزك تلاقيها وتوريها اني لازم اشوفا وياريت لو تقنعيها تطلع معاك طوالي

وابتسمت جيهان

* مع انها مابتعرفني وماعارفة اذا ح تقبل كلامي او تطلع معاي لكن عشان خاطر فول فريد ح امشي معاك واحاول اقنعا تلاقيك

وضحك ايهاب

* ابسط ياعم الفول جاب فايدة اخيرا

جيهان كانت متشوقة انها تلاقي ريا وتتعرف علي البت الشغلت قلب هشام عبدالله وخلتو ماشايف غيرا