الجزء 4

اتحركت جيهان ومعاها هشام ناحية الداخلية الساكنة فيها ريا وكل مرة تسرق نظرة لي هشام الكان اما مشغول بالنظر للخارج وهي متأكده انو عقلو وقلبو مشغولين علي ريا واما بعيد الاتصال علي ريا عسي ولعلها ترد عليهو ... تأكدت جيهان انو هشام بحب ريا فعلا وقلبو مشغول بيها هي وبس وانو مابعاين لي اي واحدة تاني غيرا .. والدليل علي كده انو طول الفترة الكان فيها بعيد من ريا ما حبا غيراولما بدت جيهان تعرفو عن قرب ماشافتو طول الفترة دي بتكلم مع بت او عن بت بي اي صفة خاصة .. حتي محاولات البعض تفسير وجودو معاهم في شلتم بي صورة شبه دائمة انو بحاول يتقرب ليها .. هي اكتر واحدة عارفة انو الفكرة دي ماصحيحة لانو ماحصل حتي ابدا ليها مايدل علي انو عندو تجاها اي حاجة خاصة وهي بدت تعجب بيهو وبي شخصيتو وبي احترامو لي نفسو لكن حبست الاعجاب ده جواها عشان مايتطور لي حاجة هي متأكده انو ما ح يكون ليها مكان في قلبو ... قلبو المشغول بي ريا وماقادر ينساها

وطلعت من شرودا علي صوت هشام

* ريا عنيدة لو عرفت اني معاك يمكن ماترضا تقابلك

* بحاول معاها وان شاء الله خير

* ح تتصرفي كيف معاها وح تقولي ليها شنو

* ماتشغل نفسك اكيد ح القا لي مدخل واخش بيهو ليها .. المهم النتيجة

* ضغطتا عليك لكن مافي زول غيرك ممكن يساعدني

* يازول ضغط شنو .. تصدق انا شفتا ريا قبل كم يوم وما كنتا عارفة انو دي حبيبتك وبالجد كان نفسي اتعرف عليها بس ما جات فرصة .. ويمكن دي تكون فرصتي

وتلفون جيهان دقا ولقتا رنده

* ايوه يارندوش وين انتي

* انتي الوين

* انا عندي مشوار ضروري بعدين بحكي ليك

* جيهان عايزاك ضروري اول ما تخلصي مشوارك تعالي لي البيت

* مالك يارندة في شنو

* لما تجيني ... بس ما تتأخري

* اوكي

رندة شغلت بال جيهان بي اتصالا . ولازم تمشي ليها . عشان تعرف صاحبتا مالا ... وصلو الداخلية ونزلت جيهان وخلت هشام في عربيتا ودخلت وفي الاستقبال طلبت انها تقابل ريا ابوطالب وقالت انها جايبة ليها وصية تخصها وريا جات عشان تشوف منو الضيفة البتسأل عنها

* وين الضيفةالبتسأل عني

سألت الاستقبال

وردت عليها جيهان

* انا

امبارح قلب عليك الجامعة كلها وما لقاك وبحاول يكلمك في التلفون لكن تلفونك مقفول .. لو انتي لسه بتحبيهو او علي الاقل بتعزيهو امشي اتكلمي معاهو هو ح يموت عشان يطمئن عليك

* وانا ضمني شنو ما تكون ده واحدة من حركات فاطمة حسان وتكون مدبره لي مصيبة تاني وجاية انتي عشان تساعديها

* اوكي .. خدي تلفوني وكلمي هشام بنفسك عشان تتأكدي من صدق كلامي ...

ومدت تلفونا لي ريا وريا بتعاين بي حيرة للبت الفجأة دخلت عليها بدون سابق معرفة وبتقول انهابتحاول تساعدا وتقيف معاها ضد فاطمة .. اخدت ريا منها التلفون ودقت علي رقم هشام بتردد ومن اول جرس ردا هشام بلهفة

* لقيتيها .. لقيتي ريا .. ريا كويسه

لما سمعت اللهفة الفي صوتو حست بي شوق كبير لي هشام هشام الضيعتو في لحظة شك كانت السبب فيها فاطمة .. وماقدرت ترد عليهو وادت التلفون لي جيهان وعيونا بتحكي عن حالا لما سمعت صوت حبيبا وهو بسأل منها وكلو شوق ليها .. وجيهان ردت عليهو وهي مبتسمة لانها عرفت من ملامح ريا انها لسه جواها شعور جميل لي هشام

* ريا كويسة ياهشام اهي معاي .. شوية ونجي عليك

وقفلت الخط

* انا قلتا لي هشام انك ح تلاقيهو ما اظن انك ح تكسفيني

وطلعت ريا بسرعة غيرت هدوما وطلعت مع جيهان عشان تلاقي هشام الكان منتظر حبيبتو وكلو لهفة وشوق

ريا عاملة زعلانة وهشام ماعارف يقول شنو وجيهان قاعدة في نص الاتنين ومحتارة فيهم وفي صمتهم

* اسمعو هنا انا ماشه وح اخليكم مع بعض ان شاء تقعدو ساكتين لي الصباح انا العلي عملتو ... يلا اشوفكم بكره واوعا ما توروني الشمار وعليكم الله اتكلمو زهجتوني ياخ .. باااي

ومشت حيهان وخلت الحبيبن ونظرات العتاب والشوق واحاسيس كتيرة متضاربة غلب عليها الحب الخلا هشام اول ما يعرف انو حبيبتو ممكن تكون واقعة في مشكلة يجري عليها ويحاول يحميها مهما كلف الأمر .. وقطع هشام حبل الصمت

* ماعايز اسمع حاجة عن كل الفات ولا عن اي حاجة حصلت بينا .. لكن عايز افهم فاطمة مالا معاك .. ولي شنو قافلة تلفونك وماجيتي الجامعة لي شنو ماتكون فاطمة السبب

* ماعارفة البت دي عايزة مني شنو ما كفاية فرقتنا

* مالا معاك ومعتز الزفت ده الدخلو شنو في الموضوع البينكم

* معتز بهددني

* بهددك .. كيف يعني ولي شنو اصلا يهددك عندو عندك شنو

* معتز متفق مع فاطمة قال لي اما ا عتزر لي فاطمة قدام الناس واخليها ترد لي الكف الضربتو ليها او يسقطني في الامتحان

* ده كلام فارغ هي الحكاية لعب ولا الجامعة حقتو ينجح ويسقط علي مزاجو

* ياريت لو الكلام وقف علي كده

* في شنو تاني

* حضرتو بتجرأ ويطلب مني طلب وسخ عشان ينسي كلام فاطمة وينسي موضوع الامتحان

هشام وشو بقا ستين لون وضرب التربيزة القاعدين فيها بي يدو بكل قوة وغضب

* الكلب .. يتجرأ ويقول كده

* هشام اهدا شوية الموضوع ده مابتحلا بالغضب ... لازم نشوف حل يطلعني من الورطة دي ويكشف فاطمة حسان ومعتز علي حقيقتم

*

اسكت .. اسكت كيف فاطمة اتعدت حدودا زمان وسكتا عشان قلتا دي واحدة مهووسة ما اكتر لكن يصل الحد انها تضيعك وتضيع مستقبلك وكمان عايزة تذلك قدام الناس .. لااا ماعشتا لو خليتا تحقق مرادا ولا عستا لو خليت معتز يلمس شعرة منك او حتي يهددك

* اهدا ياهشام وخلينا نفكر براحة عشان نعرف نتصرف كيف ونعمل شنو قبل ما الكلاب ديل ينفذو تهديدم

جيهان وصلت عند رنده ولقتا قلقانة ومحتارة

* مالك يارندوش تلفونك ماريحني .. في شنو

* انا زاتي ماعارفة في شنو

* كيف يعني في حاجة حصلت .. سفيان كويس معاك .. انا طلعتا وخليتكم مبسوطين

* ايوه لحدي ماطلعنا ونحنا كويسين

* طيب حصل شنو تاني .. اتشاكلتو ?

* ابدا والله ... لكن جاهو تلفون وشكلها امو لانو لما ردا قال يا امي .. وبعد شوية شكلو زي القالت ليهو كلام ازعجو لانو حتي ماوصلني زي عادتو .. اعتزر لي وقال عايزنو في البيت ضروري .. ومن ما مشا ما اتصل علي تاني وحاولت اكلمو مابرد علي تلفوناتي ضربتو ليهو اكتر من عشرين مرة وبرضو مابرد

* يمكن التلفون مافي يدو

* مستحيل .. وحتي لو ماشايلو حاليا اول مادخل البيت اكيد كان معاهو .. هو متعود يضرب لي عشان يطمئن اني وصلتا البيت .. لا كلمني ولا سأل فيني

* يابت ماتتجرسي كده .. عادي ممكن يكون تلفونو في الشاحن او . حتي يكون عندهم ضيوف وماقادر يرد

* لا ياجيجي قلبي ماكلني شديد علي سفيان

* روقي يارندة بكره بتلاقيهو وتعرفي هو مالو

* لا لا مابقدر اقعد كده لي بكره

ورنا تلفون رندة وشالتو بسرعة ولقتو سفيان متصل عليها

* الو .. حبيبي مالك ماكلمتني من قبيل

* في شنو فهمني الحاصل

* طيب مالك صوتك ماعاجبني

* طيب خلاص بكره

وقفلت الخط .. وسألتا جيهان

* كويس حبيب القلب اتصل وريح بالنا

* اتصل لكن قلقني زيادة

* انتي براك مقلقة

* لا ياجيجي في حاجة حاصلة وسفيان ما داير يكلمني ويوريني الحاصل ليهو شنو

* طيب هو قال ليك شنو

* قال امو كانت عايزاهو في موضوع وهو اتناقش معاها شوية وهي زعلت منو وهو اسه ماقادر يتكلم لكن اتصل عشان عارفني بكون قلقانة عليهو

* طيب يمكن يكون موضوع حاصل في البيت .. ما تعذبي نفسك مادام انتو كويسين مع بعض ومافي مشكلة بينكم خلاص الباقي انتي ماليك دخل بيهو لو ماهو حكا ليك براهو

* انتي شايفة كده

* ايوه .. وتعبتوني معاكم يا حبيبة الجامعة انا اليوم كلو جارية وراكم واصلح ليكم في مواضيعكم ... يلا كفاية علي الليلة خلوني امشي انوم تعبتا خلاااااص

وضحكت رنده علي شكل جيهان وهي بتقول الكلام ده لانو كان ظاهر عليها فعلا انها مرهقة

للمرة التانية بتجمع الصدفة بين . قصي شقيق هشام عبدالله وبين جيهان بلال قدام بوابة الجامعة لمحا وهي بتنزل من عربيتا ودافع قوي جواهو خلاهو ينتظرا قدام البوابة ... وجيها

ن برضو شافتو وحست من نظرتو ليها انو هو كمان شافا وعرفا ويمكن يكون واقف مخصوص عشان يسلم عليها

* اهلا دكتور ... الحمدلله المرة دي سلامة مافي حوادث ولا مشاكل وإلا كنتا كرهتا جامعتا

* هههههه لولا الحادثة دي يمكن ماكنت شفتكم ياجيهان حصل خير علي كل حال

* جاي المكتبة تاني

* لا المرة دي جاي اقابل واحد استاذ اخوهو شغال معاي في نفس المكان و لاني مسافر قريب وهو دايما برسل لي اخوهو معاي شوية حاجات

* بالسرعة دي مسافر لسه ماشفناك ولا قعدنا معاك

* اعمل شنو حظي كده .. لي فتره طويلة في السودان وما اشوفكم الا في الوقت ده ...

* ولا يهمك المرة الجاية لما تجي كلمنا من بدري

* حاااضر .. بس المرة الجاية ما اجي القاك خلصتي الجامعة

* لااا انا لسه في تانية ما دفعة هشام .. لكن الظروف مامعروفة .. لانو بسافر الوالد والوالدة عايشين بره

* اهااا يعني مغتربين زينا

* امي امريكية بس جات السودان فترة بسيطة وصادف ابوي كان هنا في السودان للدراسةولما سافرت لحقا الوالد بعد سنة واتزوجو وانا بقيت بين هنا وهناك ...

* ههههه يعني انتي مكس نص سوداني ونص امريكي

* بس بمووووت في السودان ولو ما ابوي وامي هناك مابمشي

* وانا لو ما وضعي هناك احسن وبستفيد اكتر كنت استقريت هنا .... لكن كلها فترة احقق الحاجة العايزا وارجع تاني ما ناوي استقر هناك واضيع عمري كلو في الغربة بعيد عن اهلي

* تمام كده ربنا يوفقك

* وانتي كمان ربنا يوفقك .. يلا استأذنك اشوف زولي ده قبل ما يمشي علي اي مكان تاني وما اقدر الم فيهو تاني

* اوكي تمام خلينا نشوفك قبل ما تسافر

* ربنا يسهل

رنده قلبها مقبوض من امبارح ولما شافت سفيان اتوترت اكتر لانو ابدا ماكان طبيعي

* مالك حبيبي مستحيل ده يكون مجرد نقاش عادي المخليك قالب خلقتك كده

* مافي حاجة يارنده مجرد ضيق وشوية وبروح

* ياريت يكون شوية ضيق وان كان احساسي غير كده

* لا بس الوالدة بقت حساسة شديد من يوم وفاة سيف وكلو واقع علي دماغي ولازم استحملا لحدي ما اعصابا تهدا شوية

* ماتشد معاها انت براك كنتا بتقول متعلقة بيكم شديد واكيد وفاة سيف المفاجئة اثرت عليها .. خليك جمبها واستحملا ما تخليها تزعل منك

* والله عارف كل كلامك ده لكن امبارح طلبت من حاجة مابقدر عليها وهي زعلت مني شديد لما اتناقشتا معاها

* دي

امك لو طلبت الدنيا تديها ليها

* لو طلبت روحي تحت امرها .. لكن هي طلبت حاجة مابي يدي وصعب علي احقق رغبتا دي

* مالك ياسفيان في شنو

وسكت سفيان ووشو في الأرض وهو ماعارف يقول شنو لي رنده

* سفيان معقولة حاجة تضايقك للدرجة دي وماعايز تحكيها لي

* ما عارف اقول شنو

* قول الحصل كلو يمكن ترتاح لما تتكلم وتفضفض

* ياريت لو كان الكلام بريح ... ما اظن . .... خايف الكلام يزعلك

وهنا رنده اتحيرت من كلامو ... ليه تزعل في حاجة بينو وبين امو .. ولا قصدو شنو حيرا بي كلامو ده اكتر من اول

* احكي ياسفيان ... لازم اعرف انت مالك

* ح احكي ليك لكن اوعديني ماتزعلي

* احكي ياسفيان انا خلاااص راسي داير يطق

* امي خطبت لي بت خالتي وبدون ماتشاورني

خبر حرق قلب رنده وخلاها ساكتة ماقادرة تقول اي حاجة وخلا سفيان قلبو مقطوع عليها

* ما قلتا ليك كلامي ما ح يريحك

* كيف يعني تخطب ليك

* كيف دي انا زاتي ماعارفا كل العارفو انها ليها فترة ماسكة في كلام واحد انها فقدت سيف ومافرحت بيهو وبي عيالو وكل مره تقول لي لازم تعرس ... وده الخلاني متشجع اكتر في علاقتي بيك ونويت اقول ليها اني عايز اخطبك ... ومن كم يوم قلتا ليك حاااضر انا موافق اعرس .. وشكلها ماصدقت طواالي وبدون ما ترجع لي خطبت لي بت خالتي كلمت البت وامها وابوها وكمان قالت ليهم انو ح نجيهم يوم الجمعة عشان نتقدم بي صورة رسمية .. ختتني في موقف صعب خالتي وبتها وراجل خالتي القاعدين منتظرين وانا ما عارف اتصرف كيف امي ماعايزة اي تفاهم ورافضة اي كلام معاها وقلتا ليها انا بحب واحدة تاني وعايزاها تكون مرتي هاجت وزعلت وقالت مافي ارتباط بي اي واحدة تاني غير البت الإختارتا هي وبس

ورنده ختت يدها في راس وماعارفة تقول شنو وفجأة قامت علي حيلا

* انا راجعة البيت

وقام سفيان وراها

* رنده مالك اقعدي خلينا نتفاهم

* ماقادرة ياسفيان .. ماقادرة اتكلم ولا افهم ولا افكر في اي حاجة خليني امشي بيتنا احسن

* طيب يلا عشان اوصلك اوصلك

* لا ... انت خليك هنا .. بخلي ايهاب ولا جيهان يوصلوني

* كيف يعني اخليك براك وانتي في الحالة دي .. انتي ماعايزاني اكون جمبك

* محتاجة اكون براي عشان اقدر افكر كويس في كلامك ده

* يعني مصره علي كلامك

* خليني علي راحتي ياسفيان ما تضغط علي اكتر من كده والله ما قادرة استحمل اي كلمة تاني .. لو عايز تريحني شوف لي جيهان ولا ايهاب عشان امشي بيتنا بسرعة ماقادرة اقعد هنا ولا ثانية واحده

* طيب اهدي ماتتعصبي جيهان لسه ماجات .. لكن خليني اكلم ايهاب اشوفو وين عشان يجي يوصلك