الجزء 5

رندة سرحانة وملامحا مابتقول اي حاجة عن الشي البتفكر فيهو وايهاب مشغول عليها مامن عادتا تكون ساكتة وسرحانة كده وحتي شكل سفيان لما جا ساق رندة ماعجبو لكن ماسأل من حاجة ولاحبا يتدخل بينم خاصة انو رندة شكلها ماحابة تتكلم

* ممكن اعرف مالك ساكتة كده ومادايرة تفتحي خشمك بي كلمة

* خليني عليك الله يا ايهاب في الأنا فيهو .. والله ما قادرة اتكلم

* مابخليك من بتين بتدسي مني حاجاتك ... ياني انا ايهاب صاحبك واخوك ولو ما وقفتا معاك البقيف معاك منو غيري

* عارفة يا ايهاب لكن الانا فيهو لا انا ولا انت بنقدر نحلو

* انتي احكي لي يمكن ربك يفرجا علي يدي

* سفيان ... سفيان امو خطبت ليهو بت خالتو

* ده كلام شنو كيف تخطب ليهو ... وهو رايو شنو

* لما رفض زعلت منو وحلفت عليهو الا يعرس بت خالتو ولا ماعافية ليهو

* ده كلام عجيب ... وانتي اسه صاره وشك وقالبة خلقتك عشان كده

* عليك الله يا ايهاب ده ماوقت هزار ... عايزني اضحك واقهقه ولا شنو

وردا عليها ايهاب بي جدية

* رنده انتي بتحبي سفيان . ولا الحكاية عندك ونسة وبرنامج تملي بيهو زمنك وبس

* من بتين انا كنتا كده انتا عارف انا زولة جادة في المواضيع دي .. و اكيد بحبو

* والبحب زول لما يلقاهو في مشكلة بقيف معاهو ولا بهرب ويخليهو براهو زي اليتيم

* قصدك شنو

* قصدي واضح ماتبقي ضعيفة وتستسلمي .. دافعي عن حبك واقيفي جمب سفيان .. هو محتاجك جمبو في الوقت ده عشان يتقوا بيك لكن لما تبعدي وتخليهو براهو ح يحس انك ما وقفتي معاهو ....

* دايرني اعمل شنو اقول ليهو اخسر امك عشاني وخليك معاي

* لا ... لكن خليك جمبو عشان يعرف انك معاهو في الحلوة والمرة وهو لما يلقاك معاهو وقريبة منو وبتسانديهو في محنتو بقدر يقنع امو انو ماعايز غيرك

* ماقادرة ... لو امو اصرت علي موقفا ح يحصل شنو .. اكيد ح يرضيها ويسيبني

* علي الاقل اسمك دافعتي عن حبك ما جريتي من اول مشكلة تواجه علاقتكم

* انتا شايف كده

* المنطق بقول كده ... ما تستسلمي لي اي حاجة تلاقيك .. انتي لسه ح تشوفي كتير لازم تتعلمي المواجهة الهروب مابفيدك

* الكلام ساهل لكن التنفيذ صعب

* والأصعب انك تكوني سلبية وتخسري حبك

* من وين بتجيب الكلام ده

* رندة انتي غالية علي ومن حقك علي انصحك بالحق ما اقيف اعاين ليك وانتي بتخسري حاجة حلوة في حياتك عشان ماعارفة تتصرفي فيها كيف

* كتر خيرك يا ايهاب ... والله كلامك ريحني شديد

* تمام .. يلا اضربي لي سفيان خليتيهو راسو ضارب .. طمنيهو شوية وقولي ليهو كلمتين حلوين خلي الولد يتشجع بيك شوية ويحس انك واقفة معاهو

واشرق وجه رنده بي ابتسامة حنينة

* طلعتا ما هين ياود الرشيد بتعرف تكون جادي وبتعرف للصاح والغلط

* اسمعي هنا ماتشغليها لي .. كلمي حبيبك ده خلينا نخلص

* ههههههه طيب طيب عايز تخلص مني

* ايوه عشان امشي عليهو هو زاتو اديهو كلمتين في جمبو افهمو حاجة ... هو قايلك براك ماوراك رجال يقيفو ليك

* الله يخليك لي والله الرجالة والخوة ياها كده

وطلعت رندة تلفونا واتصلت علي سفيان عشان تطمنو عليها

وايهاب المبتسم برغم كل شي ومن كل قلبو بتمني انو رندة تكون سعيدة مع الزول الإختارو قلبها

جيهان وصلت متأخرة ومالحقت تلاقي رندة او تعرف المشكلة الحصلت لي سفيان شنو ... ومشت بسرعة عشان تلحق محاضرتا قبل ماتبدا .. خلصت المحاضرة واول ماطلعت كان في بالا هشام فكرت انها تلاقيهو عشان تعرف الحصل شنو بينو وبين ريا لكن اتراجعت في آخر لحظة .. عشان خايفة تخش في وسطم وتتحشر في خصوصياتم ... خليها بعيد احسن الا لو هم طلبو مساعدتا او هشام براهو جا وراها وصل لي شنو مع ريا ... الليلة كان عندها محاضرة واحدة تشوف رندة شوية وترجع بدري عشان عايزة تكلم ابوها وامها ليها كم يوم ما اتصلت عليهم

وشافت سفيان واقف براهو وقالت في نفسها اكيد رنده معاهو او بكون عارف هي غاتسة وين .. مشت عليهو ولقتو بتكلم بالتلفون ومبتسم وسمعتو بقول رنده معناها بكلم في حبيبة القلب ولما خلص تلفونو قال ليها

* جيتي والله جابك

* اهاااا مالك خير ان شاء الله

* امي عملت فيني عملية صعبة وعايزك تقنعيها لي تتراجع عن كلاما

* اولا كدي قول لي الحصل شنو

* اسمعي وحاولي شوفي لي حل

لاني مافاهم اتصرف كيف في الورطة دي

* لااااا ياناس الجامعة بعد كده انا ح افتح مكتب مخصوص لحل مشاكلكم .. احكي يا اخوي ... احكي عوضنا الله معناها عمك محمد بلال وخالتك روز الليلة مافي ليهم طريقة

وحكي سفيان لي جيهان كل التفاصيل لحدي تلفون رنده الطمن قلبو شوية بعد ما خلتو قلبو واقع من المنظر الطلعت بيهو من الجامعة

* لكن امك صراحة صعبتا ...

* شفتي المصيبة الانا فيها

* كدي اول وريني منو العروس في بنات خالاتك

* وعد بت خالتي سعاد

وهنا ضحكت جيهان ... وسفيان عاين لبها بي استغراب

* البضحكك شنو قدر ده

* انتا متأكد انو وعد بت خالتك وافقت عليك

* والله ما عارف موافقة ولا رافضة ..

* ياسيدي محلولة ... انا عارفة انو وعد بتحب ود عمها ... وشكلها ح تكون اتزنقت نفس زنقتكم دي كده

* وانتي جبتي الكلام ده من وين

* انت ناسي انو

انا بعرف اهلك كلهم ... ووعد واخواتا ايام الوفاة ساقوني بيتا معاهم وسمعتا حكاية وعد مع ود عمها

* طيب اتصرف كيف عشان اعرف هي موافقة علي ولا رافضاني ... حتي ولو الكلام القلتيهو كان صحيح .. مش يمكن تكون زي ماقلتي اتزنقت زيي كده وماقادرة تقول لي اهلا لا

* دقيقة بس اعمل تلفون وبعدها نشوف البحصل شنو ... لكن اسمع هنا لو الموضوع ده اتحلا لاااازم تخطب رندة مادايرين جرجرة تاني تقوم امك تشوف ليك عروس تانية مانقدر نخارجك منها

* انتي خارجيني من وعد ولو قلتي لي اعقد علي رندة بعقد بس حلي لي الورطة دي

* خلاص خلي الكلام الكتير عشان اعرف اتصرف ... يلا باي

* ماشة وين

* ماشة احل ليك مشكلتك ... ما اصلو ده بقا برنامجي اليومي

وطلعت جيهان بي عربيتا واول ما وصلت البيت كلمت وعد بالتلفون

* وعد ده كلام شنو السمعتو من سفيان ده ... انتي خليتي حبيبك ولا شنو

* ورطة يا جيهان وماعارفة اطلع منها كيف

* ورطة شنو انتي لسه دايرة ودعمك ولاشنو

* ايوه لسه عايزاهو وخلاص كان جاي يخطبني وامي وابوي عارفين لكن خالتي فاجأتنا وخلتنا محرجين ماعارفين نتصرف كيف

* اهااا يعني ناس بيتكم عارفين برنامج ود عمك

* عارفين ومباركينو لكن خالتي دخلتنا في حتة ضيقة وامي خايفة عليها عشان هي عارفة انها متأثرة شديد بي وفاة سيف

* يعني انتي مادايرة سفيان

* انا بحب ودعمي وامورنا كلها ظابطة مع بعض وسفيان ان شاء الله ربنا يديهو نصيب احسن مني

* مادام ده كلامك معناها انا احكي ليك الكلام العندي بي قلب جامد

* كلام شنو

* اسمعي ياستي

وحكت لي وعد عن علاقة رندة وسفيان وحبهم وانو امو اتصرفت من غير ماترجع ليهو

* خالتي بالغت والله ... لكن مادام كده انا قلبي بقا قوي .. بكلم حبيبي واخليهو يجيب اهلو وتاني مافي زول بقدر يقول حاجة

* يمكن مايقدر يجيبم اسه

* هو المفروض كان يجي هو وعمي ومرة عمي بكرة لكن لما خالتي جاتنا وقالت عايزاتي لي سفيان قلت ليهو يصبر عشان نعرف نحل الموضوع لكن خلينا نخت الكل قدام الامر الواقع بعد كده خالتي مابكون عندها كلام تقولو

* وامك وابوك ... امي امرها هين وابوي اصلا داير ود اخوهو

* والله كده تكوني حليتيها بس ماتقوم تسبب ليك مشكلة مع ناس بيتكم

* ما اظن لانهم زاتم كانو محرجين وماعارفين يحلوها كيف ويقولو لي خالتي شنو

* لو كده يبقا محلولة

* بخلي ابوي يعتزر ليهم ويقول ليها البت دايرا ود عمها من زمان ولما انتو طلبتو رجعنا شاورناهو وقال هو لسه عند رغبتو .. ما اظن بعد كده تقول حاجة

* كده تمام كلام مظبوط

* يلا انا من هنا وعلي ابوي وامي . لازم الليلة اخت حد للحكاية دي

* خلاص وريني عملتي شنو

* هههههه طمني سفيان اكيد يدو في قلبو وحالتو زي حالتي الايام الفاتت

* هههههه حاضر بس انتي اديني النتيجة

* تمام بكلمك واوريك عملتا شنو

* اوكي .. يلا تسلمي ياوعد .. باي

والمسا رجعت وعد تكلم جيهان تاني

* زبطتا الموضوع وما زحيت من جمب ابوي إلا لما خليتو يتصل علي خالتي ويعتذر ليها ... وحبيبي بكرة المسا جاي هو وامو عشان يثبتو الموضوع . ويبقا رسمي وما اظن تاني بكون في كلام بعد ده

* تمام ياستي مبروك وربنا يتمم ليك علي خير

* خلي سفيان يلحق يخطب حبيبتو كمان قبل ما خالتي تجيب ليهو عروس تاني

* هههههه يارب تتسهل وما تقيف ليهو في تاني وترفض

* خليهو يدق الحديد وهو ساخن اسه بتكون زعلانة عشان نحنا ماوافقنا بيهو ولو عرض عليها موضوعو يمكن توافق

* احتمال كبير .. اصلو في كل الحالات لازم يجازف المهم انو المشكلة الاساسية اتحلت تشكري ياستي

* مفروض اشكرك انا لو ما كلامك معاي كنا ح نتورط نحنا الاتنين في خطبة مافي زول فينا دايرا او علي بالو

طبعا سفيان ضارب ستين مره اثناء ماهي بتتكلم مع وعد واكيد عايز يعرف هي عملت شنو

* ياناس صبر مافي جننتني تيت تيت ما خليتني اتكلم مع بت الناس دي كويس

* المهم الحصل شنو ... امي شايفا تهرج ساي شكلو الموضوع طرشق

* هههههه المهم بكرة ح تعزمني شنو حلاوة مازبطتا ليك موضوعك وطرشقتا ليك العرسة

* ياخي انتي اطلبي الدايراهو بس وريني عملتي شنو

وحكت ليهو تفاصيل مكالمتا مع وعد كلها

* شوفي ياجيهان بلال اسه لو طلبتي روحي بديك ليها عشان فكيتني من ورطة ما كنتا عارف اطلع منها كيف

* فووووول

* شنو الفول

* بكرة دي من الصباح القاك جايب لي فول مظبوط وعلي حسابك وكده نكون حبايب

وقعد يضحك سفيان من جوه قلبو

* بس كده قدرة فول كاملة تضربي لحدي ماتقولي بس ... هو نحنا عندنا كم جيهان بلال

اول منظر شافو ايهاب لما وصل الجامعة رنده وسفيان مبسوطين وبضحكو وهشام جاي ومعاهو ريا وطبعا الاتنين مابتقدر تعرف الجواهم شنو

* اوووو الليلة الحبايب اتلمو ... لاااا كده انا اتصرف واشوف لي مزة احبها ولا انتو تتصرفو لي في مزة

ضحك سفيان علي صاحبو وكشرت رنده تكشيرتا المعهودة لما ايهاب يرمي واحدة من تعليقاتو الهزلية

* نفسي اشوفك يوم جادي ... هي مرة واااحدة وبس ما اظنك تكررا تاني

* ومنو القال ليك انا ماجادي

ووصل هشام وريا وعرف هشام ريا ورنده

* ريا ابو طالب .. ريا دي رنده صديقتنا العزيزة

* اهلا بيك ياريا

رحبت رنده بي ريا وسلمت عليها ودعتا عشان تقعد معاهم

* اتفضلي اقعدي مع المجانين ديل

* شكرا ليك يارنده مره تانية لازم احصل محاضرتي

* اوكي مافي مشكلة

وهمست ريا لي هشام

* ح اعمل الإتفقنا عليهو

* تمام

ردا عليها هشام بهدؤ وبعدها غادرت ريا عشان تلحق محاضرتا

وسألت رنده

* غريبة الليلة وين جيهان مامن عادتا تتأخر ولا يكون عندها محاضرة وجات من بدري

ومافي زول جاوبا علي سؤالا وحاولت رنده تكلما لكن تلفونا كان مقفول .. وقالت لي نفسها انها بتكون في المحاضرة مادام تلفونا مقفول

ريا قالت لي رنده انهاماشة علي محاضرتا لكن محاضرتا الليلة بتبدا متأخرة وهي عندها مهمة لازم تنفذا ...... و دخلت علي معتز مكتبو .. ولقتو قاعد مشغول في تلفونو وماحسا بيها وهي داخلة واتفاجأ لما لقاها قدامو . واتلخبط شديد زي الزول الكان بعمل في حاجة غلط وجا زول شافو

* مالك اتهجمتا كده .. شفتا شيطان ولا شنو

* لا ... لا مافي حاجة .. انتي الجابك شنو

وضحكت ريا ضحكة ساخرة

* كيف الجابني شنو يا استاذ .. انت ناسي كلامك معاي

وحاول معتز يتدارك نفسو ويبطل اللخمة الهو فيها .. ورجع لي خباثتو وهو ببادل ريا ابتسامتا بي إبتسامة خبيثة ومليانة معاني كتيرة

* ياتو كلام فيهم .. نحنا قلنا كلام كتير

* طيب لما تتذكر ياتو كلام فيهم بجيك تاني

واتحركت ريا من قدامو وعملت نفسها طالعة وهو لحقا بسرعة ومسكا من يدها

* ماشة وين بسرعة كده

في الوقت ده جيهان كانت بتقوم بي مهمةخاصة

جدا ... اتصل عليها هشام بالليل ووراها الحصل شنو بينو وبين ريا وحكا ليها عن اتفاق دار بينو وبين ريا .. خطة هي ح تكون طرف فيها عشان يقدرو يطلعو ريا من الموقف المحرج الختتا فيهو فاطمة حسان وهي وافقت علي القيام بالمهمة

ووصلت الجامعة من بدري وبقت تفتش علي فاطمة حسان بعد ما إتأكدت من وصول ريا وهشام الجامعة ومن وجود معتز في مكتبو وقفلت تلفونا عشان مافي زول يشغلا لما تحتاج تكلم هشام عشان تديهو الاوكي بإتمام مهمتا عشان هو يقوم بالباقي .. واخيرا لقت فاطمة قاعدة مع شلة كلهم اشكالم غريبة ووقفت قدام فاطمة ونادتا

* فاطمة عايزاك ضروري

وردت عليها فاطمة بي استغراب

* غريبة عايزاني في شنو وانتي قاطعاهو معاي ليك فترة

وقامت من مكانا واتجهت ناحية ما كانت جيهان واقفة

* مصلحة لي وليك وحاجة بتهمك ..

* اهااا والله ياجيهان بلال البقيتي تعرفي المصالح .. هههههه اتعلمتي الشفتنة ولا شنو

* خلينا من الكلام الكتير ويلا عشان ماتضيعي الزمن وتندمي

ومشت معاها فاطمة ونفسها تعرف جيهان عايزة شنو منها .. وبدون ما تحسسا جيهان انها بتوجها لي مكان معين بقت ماشة وتتكلم معاها

* انتي طبعا عايزة تاخدي حقك من ريا ابوطالب

* وانتي بتعرفي ريا من وين كمان

* اسمعي كلامي للآخر .. ريا مش كانت حبيبة هشام .. شكلها عايزة ترجع ليهو وانا بي صراحة معجبة بي هشام وماعايزاها ترجع تاني وتدخل حياتو

وقالت فاطمة بي خباثة

* طلعتي ماساهلة

* كل زول لازم يدافع عن حقو

* طيب وانا دخلني شنو في القصة .. دي

* موش في اتفاق بينك وبين معتز عشان تاخدي حقك من ريا

واندهشت فاطمة لما سمعت كلام جيهان الكانت بتقولو بكل ثقة وسألتا وهي مغيوظة

* جبتي الكلام ده من وين

* مامهم جبتو من وين المهم تعرفي انو معتز بلعب من وراك لي صالحو

* كيف يعني

* معتز طلب من ريا انها تبقا صديقة خاصة ليهو مقابل انو ينسا اتفاقو معاك ويمكن كمان . يعمل فيك الكنتو ناوين تعملوهو في ريا .. يسقطك في الامتحانات .. وهو معارفو كتار هنا وانتي عارفة كويس انو ممكن يعمل فيك

وكلام جيهان ظهر تأثيرو فورا في فاطمة البدت تهيج وكانو في الوقت داك وصلو قدام مكتب معتز ... وشافت معتز وهو واقف جمب ريا وماسك يدها والاتنين مبتسمين لي بعض ومعتز بعاين لي ريا بي نظرات كلها جوع وهو بمني نفسو انو ح ينول منها مرادو قريب