الجزء 17
* بصراحة يا ابوي انا خجلانه ، ما عارفه اقوليك شنو ، بس احمد يا ابوي اتهمني في شرفي و في عرضي و طعن في تربيتكم لي .. و قال اني .... اني .. خاينة ( وفكت البكية ) اتخيل يا ابوي ، قال اني خنتو . ...
_ دا كلام شنو ؟ احمد الشفتو دا ما بيقول كدا يا رحاب ، و اتهمك بالخيانه ساي كدا من باب للطق ! ما بتجي ..
* رغم انه يا ابوي من فترة اكتشفت انه كان عنده علاقه مع وحدة من زمن الجامعه وبعدها جات اشتغلت عنده ، بس سكتا عشان امسك بيتي علي و نا دايرة مشاكل بس عليك الله ما تقوليهو الكلام دا ، خايفه يشيل مني بتي يا ابوي !
_ طول ما انا حي ، ما تخافي انتي بت ابوكي
ويوم جا عرسك ما عرسك من الشارع ...
اما انحنا ، نزلنا من العربيه ، لافين من محل لمحل و من حته لي حتة ، لمن حجزنا و اشترينا جزء من الحاجات ، و دخلنا محل تياب عشان نشيل واحد لامهم ،احمد صمم يدخل معانا .. فعلاً دخلنا ، و اشترينا و طلعنا كان خلاص بعد المغرب ..
مشينا العربيه ، احمد قال شافزمحل عجبو ، قال ننتظرو في العربية ، فعلا قعدنا يمكن قريب ساعه ، العشاء اذن .. حتى جا شايل اكياسو جمبو .. عبير قالت ليهو فرجنا ! قاليها لا في البيت ،، قلت ليهم انا نزلوني في اول الشارع م تدخل جوا ، قالي الليله اقعدي مع ناس البيت ، قلت ليهو عندي شغل لازم اسلمو ما بقدر .. قالي معليش بكرة سلميهم ..
قلت لبهو لا اللبله بكونو جو و مالقوني ، عبير قالت لي اسمعي الكلام ، و بعدين انتي لازم تجيبي فستانين يا علياء كل م اختار واحد تقولي لا وانا عارفه ليه ! بس خليني ساكته . قلت ليها هوي فساتيني بسويهم براااااي ،قالت لي بالله ! قلت ليها والله ، المافي شنو ؟
احمد قالي حنمشي على البيت ، قلت ليهو لا
قالي لازم نمشي ، في موضوع لازم نتكلم فيهو ، سكته لاني استنتجتا قصدو .. عبير قالت ليهو بتمشي ياخ خلاص ..
عبير قالت لي حبوبة كيف بقت ؟ احمد قاليها كويسه و متجاوبه وبقت احسن اسي ودوها دار كويس حمدلله !
لمن اتخلعتا ، هو متابع يعني الاخبار !
قالت ليهو الحمدلله .. و وصلنا على كدااا ..
ماشه وبتكلم بي قلبي ، لمن وصلنا ، قعدنا في الصالة نفرج في امهم الحاجات ، الا احمد مسك حاجاتو ومشى ..
قلت ليهم انا نعسانه ، خالتو قالت لي الا تتعشي ، قلت ليها شبعانه والله ما شايفه قدامي ، و مشيت قبل عبير تمسكني ..
احمد جا ، قعد معاهم لمن شافني م رجعت ، قاليهم ، علياء وين ؟ عبير قالت ليهو مسكينة تعبتها معاي مشت نامت ،، سكت كدا ....
قاليهم انا عايزكم في موضوع ، وكويس ان علياء ما موجودة ...
امه قالت ليهو ، في شنو يا احمد ؟
عبير قالت ليها خلينا نسمعو يا امي !
امه قالت ليهو اتكلم يا احمد خير .... قاليها عشان يكون عندي امل اكسب قضية الحضانة ، حسب كلام المحامين و عندك عبير خبرتا كويسه لازم اوفر كل حاجة ممكن تحتاجها بتي ، و من ضمن الحاجات دي الزوجة ! .....
( في جانب وليد )
انا كلمت ابوكي ، حسيتو متردد ف التلفون ، وخالتي قالت لي انتو بتلعبو ولا القصه شنو ! قالت لي خطوبة ما عندي ، المرة دي عرس عديل عشان الخلافات دي تنجبرو تحلوها جوا بيتكم ما تلعبو بي اعصابنا ، ههههه ، والله يا رغدة على رغم انها هرشه ، لكن كيفتني شديد ...
* كان شفت انا تحمر فيني ساي ، قالت لي دا هو المنعك تسافري يختي ههههه ..
_ والله بيني وبينك معاهم حق وانا زاتي بعد دا بمشي بي شورتهم ، انتي معاي ؟
* معاك خطوة بخطوة ، راجل كلمتك ما بتقع الواطه ..
_ كدا انا ح احبك زيادة ..
* دا المطلوب ، عشان م تفكر تبعد عني في يوم ، حبك لي يجيبك لي ..
_ ما ظنيت بقدر يا رغد ، ما ظنيت لو داير ابعد كان بعدت ، حصل البيبعدني بس انتي رجعتيني تاني ..
* و ما حتندم ، وعد ...
_ الله يخليكي لي ...
انا دخلت غرفة سلمى في وقتها م كنت شايفه غير السرير ، نمتة نومة وحدة ، ما طلعت غير الطرحة ، صحتني سلمى ما بعرف متين ، قالت لي قومي طلعي عبايتك و كملي نومك ، قلت ليها ما بقدر ، قالت لي قومي نايمة كدااا كيف !
اصرت لمن قمتت غيرت كيف ما بعرف ،ورجعتت نمتا ... صحيت الصباح ، زي الساعه 8 ، ياداب حسيت اني استوعبت الدنيا دي ،، طلعت براا المغسلة ، غسلتا و مشيت ، جبت قزازة موية و رجعتا ، لمن لقيت الجو صاني ، نمت تاني .. بعدها صحتني عبير ، قالت لي قومي ، ما شبعتي ! عيانه انتي ؟
قلت ليها لا صحيت قبيل لقيت البيت صاني ، رجعت نمت تاني ، قالت لي قووومي يلا ، عايزة امشي للطرحه و اشوف موضوع فستاني الحنة ، يا علوشة دايرة اسابك بما انك عندك فكرة في الخياطة !
قلت ليها شنو ؟ قالت لي ، عايزة اعمل فستان الحنة زي بتاع ناس زمان . ، قصير و مكشكش و نص كم و احمر كالمعتاد بس دايرة ارص فيهو زي دهب الجنيها
ت ، عندك فكرة ؟
قلت ليها ااااي ، استحضرتوو ، والبمنع شنو تواكبي موضه اسي ؟ قالت لي لا ما دايرة ! و عاينت لي ، قالت لي ما دايرة تقولي لي حاجة !
قلت ليها حاجة زي شنو ؟ قالت لي خلاص ، بس دا ما بمنعني اقوليكي م تظلمي نفسك و ما تستعجلي ، دا زواج و محسوب في
عدادك و حيبقى ليك ماضي في يوم من الايام ، قمتا قعدتا ، قلت ليها احمد كلمك ؟ قالت لي ما انا بس كمان كلم امي و شرح لينا الموضوع كامل ، بس امي رأيها نفس راي ، اااي دايرين ليهو الخير بس ما على حسابك يا علوشة .. قلت ليها اتطمني انا بي رغبتي موافقه لان م عندي نية اتزوج ف الواقع ، عشان كدا الماضي حقي زي حاضري حيفضل لي و انتو ما قصرتو معاي ، عشان يوم يكون في يدي اساعد و ما اساعد ، رغم اني فكرتت انه ليه احمد فكر فيني انا ما فكر في وحدة من بنات اهلكم !
لقيت ان منطقياً زواجو من اي وحدة من قرايبكم حيكون واقع للقانون انه مدبر ، عكسب انا الما بتجمعني بيكم صلة رحم .. عشان كداااا وافقتا ..
قالت لي يسلم عقلك يا رب ، يلا قومي ، خلينا ننجز ..
قمتا استحميت و لبست منها ، و مشيت صبحت على امهم ، و بتعاين لي بنظرات انتو اتخيلوها ، م قدرت اسكت وانا فتحت الموضوع ، قلت ليها انا عارفه انتي عايزة تقولي شنو ! انا م عندي حياة اخاف من مستقبلي فيها ، وانا مسؤلة عن نفسي و عن قرارتي ، كل الفكرة لايام و بتمنى اقدر اقدم فيها كلالبقدر عليهو ، اتطمني ..
قالت لي ربنا ييريحك يا بتي ، قلت ليها ، امييييييين ...
احمد جا كمان ، كدا ، كملت ، صبح علينا و قعد ...
عاين لي وقالي انا كلمت امي و رحاب بالموضوع ، وقدامهم بقوليكي لو حاسة انك ما مرتاحه ولا اي حاجة بتمنى تكوني واضحة ، و ما تجي على نفسك لأي سبب من الاسباب ..
سكتا .....
و تاني قالي ، دا زواج ، يعني محسوب عليكي و .. * قاطعتو ..
قلت ليهو ، انا وافقت لاني حابة اساعد بالاضافه ان انا انسب وحدة للموضوع دا خصوصاً ان مافي صلة قرابة ، و بتردد عندكم كتير والعكس يعني الزواج حيكون طبيعي و واقعي ، فااا م تشيل هم دا قراري وانا مسؤلة عنه .. عاين لي كدا بي نظرة مليانه كل حاجة حلوة ف الدنيا دي ، قالي بطاقتك واثباتاتك معاكي ؟ قلت ليهو ايوة .. قالي بعد المغرب بنتم الموضوع في البيت ، و اعرفي انه قعادنا هنا بعدها حيكون صعب ، فا لازم ننتقل ل بيتي ...
طبعاً سكتا ، دا الما اتوقعتو ولا عملتا حسابو .. سكتا صعب اتراجع بالسرعه دي ..
هو طلع ،، هبير قالت ليهو م بتودينا الليله ! قاليها للاسف الليله مشغول وكان مبتسم و طلع ...
رغم ان الموضوع شكلي بس كان في فرح جواهم ، بتعاملو بس فرح كدا و بهجة ، حتى كلامهم عن عرس عبير كان بي كل حب و عناية ، و بدخلوني في كل حاجة بتكلمو عنها و ياخدو رأي ، رغم ان الموضوع مؤقت وزواج لسبعة ايام الا اني كنت متوترة ...
و ما عارفه ليه ، قلت لي عبير ، ينفع امشي لي حبوبة بعدها نطلع مشاويرنا او اي وقت المهم امشي اشوف حبوبة الليلة !
قالت لي الدار وين ؟ قلت ليها قريب من ال ( .. ) ، قالت لي بعيد .. انا عندي فكرة كويسه ، رايك شنو نمشي السوق نخلص لازم العصر نكون في البيت ، بعداك احمد يوديكي ما فيها حاجة ! سكتا قلت ليها خلاص ربنا يسهلها لحد المساء ..
لبسنا و طلعنا ، مع السواق البتعاملو معاهو داا ..
( في جانب احمد )
_ اتغشينا فيك ، و كنت قايلك راجل محترم ، يوم اتزوجتا بتي ، اتزوجتها بي كرامتها و من البيت داا ، يعني عندها بيت و عندها اهل و عندها سمعة ، ما اتزوجتها من الشارع ، عشان تطلقا بالطريقه دي و لا عشان تجدعا هي وبتها ، بتها الما شفتها لحد اللحظة دي ، ياتو راجل محترم بيعمل عملتك دي ، لا و كمان بتشكك في عرضها ! انت لمن اتزوجتهت اتزوجتهت و هي بنت و اشرف من الشرف ، و لعلمك القضية الرفعتها دي تبلها و تشرب مويتها ، الخيانة و قلة الاخلاق دي فتشها عندكم ما اصلو العرق دساس ...
_ سمعتك للاخر ، كل الحأقولو ليك ، كل حاجة في وقتها حلوة يا عمي ، اذا خلصتا انا استأذنك . ّ.
* طبعاً ما حتقدر تقول لي حاجة ، الفي مكانك مفروض يدفن راسو في التراب ، انت الطعنت في تربية اهلك ليك .. انسان مخادع و غشاش ..
_ شكراً .. عن اذنك ...... * طلع ...
رحاااب .. رحااااااب .. قلبتي التربيزة فيني بكل ظلم و افترا ، ما كفاك العملتي فيني !
والله و والله لو اموت بتي م تقعد معاكي ولا تربيها وحدة زيك ، صبرررك ...
خلصنا نص الطلبات ، بعدها فجاة ابتدت تجيب ملابس و بتاخد راي ، بجامات و عبايات و كدا ، قلت ليها عبير انتي مش جايبين ليكي شيلة !
قالت لي ايوة ... يلا نمشي ، عم صديق دا وين ياخ العصر اذن و الناس صلو ، قلت ليها اتصلي عليهو تاني !
بعد نص ساعه حتى جا .. ركبنا و مشينا على البيت ..