الفصل الأول

فتاح ياعليم رزاق ياكريم .. (حمد النحلة) .. طلع بي امجادو .. من البيت كايس الارزاق .. حمد مسمنو النحلة من زمان لمن كان شغال طلبة في المباني الجديدة بتاعة صالحة .. لمن صالحة بدت يادوب .. الزول قالو زمان بشتغل في موقعين .. اول طلبة يشتغل في موقعين في وكت واحد .. بشتغل مع اوسطة لغاية الساعة ..

تلاتة وبمشي للاوسطى.. التاني في موقع تاني يشتغل سهرة ..

والسهرة عند البنوات الشغل من الساعة 3 الى المغرب ..

عشان كدا حمد كان مسمنو النحلة .. لكن سبحان الله مع شغلو الكتير ده زول رزقو معاكسو .. كل ماتتصلح من جيهة تتقد من جيهة تانية .. دايمن اصحابو بقولو ليهو انت زول مدقر .. يعني عندك عوارض ..

لكن هو مصر يشتغل ويشتغل .. واصلو مايقيف من الشغل ..

كدي دقيقة انا ما داير اتكلم عن حمد كتير ..

لانو هسي هو بعد شوية بتكلم براهو.. يوريكم .. هه

اها الزول ده ماشي من جيهة المنطقة الصناعية ام درمان .. من الصباح هو ساكن على جيهة امبدات الكدي ديك .. اها يازول بالشارع الفاصل بين حديقة امدرمان الكبري .. ومقابر البكري تقريبا ..

في الحتة ديك في زول اشر ليهو .. وقف قال ليهو سلام عليكم .. حمد قال ليهو عليكم السلام ..

الراكب .قال ليهو عليك الله عايز اصل سريع الملازمين ..

حمد قال ليهو وين بالضبط؟ المهم وصف ليهو .. قال ليهو اها بي كم؟

حمد قال ليهو يازول اركب بالنية ..

قال ليهو بالنية دي معاي مابتنفع يا اخوي.. الاولو شرط اخرو نور ..

المهم في النهاية اتفقو على رقم معين .. وركب معاهو ..

في الشارع حمد قال ليهو من وين في الاهل آ الاخو ..؟

قال ليهو انا اسمي الزاكي .من منطقة في الشمال اسمها كدا وراهو.. لكن هسي ساكن في امبدة الحارة الكدا ..

حمد قال ليهو سبحان الله .. انا ساكن في نفس الحارة .. بس ماحصل اتلاقينا الله يقطع المدن ويقطع ناسا .. يكونو ساكنين في فد فجة .. ومايتعارفو .. حمد قال ليهو .. اها موضوعك شنو في الملازمين ..؟

الزاكي قاليهو انا فني كهربا .. اتصلت علي واحدة من هناك.. وقالت عندها مشكلة في كهربة العمارة ..

وحتى تصدق هسي حقك ماعندي هي قالت لي اركب امجاد وتعال انا بدفع ليك حق الامجاد.. والله جيبي قرش مافيهو ..

قال ليهو يازول لي خير ربك يفتح الارزاق ..

الزاكي قال ليهو وانت ماعرفتني عليك .. قال ليهو والله انا اسكت ساي .. اولا اخوك حمد لو سألت اي زل في الشارع القدامكم .. من زول اسمو حمد النحلة بجيبوك لي ..

قاليهو النحلة؟ ههههه ..

والله زي السامع بالاسم ده ..

حمد قاليهو لازم تكون سمعت بيهو اخوك مشهور احم احم ههه ..

اها يازول منطقتي من شرق الجزيرة .المنطقة اسمها كدا لو سمعت بيها .. قالو نعم سمعت بيها ..

كنت شغال طلبة في المباني ..

قربت ابقى معلم اوسطه .. وقعت فوق سقاله..

عملت لي مشكلة في كراعي اليمين ..

بقيت مابقدر اقيف عشرة دقايق .. وخليت الشغل .. واشتغلت في السمسرة ..

برضو كجرت معاي لاني مابعرف الف وادور واكضب ههه ..

وبقيت اطمش ساي بلاشغل ..

غايتو لمو فيني اخواني الاتنين الكبار.. عرسو لي عرسة كدا ضربو رماه ..

بقيت مضطر افتش لي شغل غايتو استلمت العربية دي قبل شهرين وشغال فيها ..

بورد يوميا 30 جنية لسيد العربية والباقي يادوبك على قدر اكلي وشرابي انا والمراة ..

والمراة هسي حامل .. والله التقول حامل انا ..

هامي من الولادة اكتر منها هي هاهاها .. واخد ليهو ضحكة ساخرة كدا ..

المهم حمد حكى للزول ده حكايتو ..

الزاكي قال ليهو خلاص نحن قربنا .. انتظرني .. لو الشغل كان سمح توصلني راجع وبتصلح معاك ..

حمد قال ليهو يازول مافي عوجة ..

الزاكي قال ليهو لف بالشارع الجاي .. وقفو قدام عمارة من تلات طوابق فاتحة في الزلط ..

ونزل الزاكي دق الجرس بتاع الباب ..

جاتو واحدة شكلها شغالة .. قال ليها نادي لي فلانة ست البيت .. قالت ليهو طلعت ..

قال ليها طلعت كيف؟ وهي عارفاني انا جاي ..

قالت ليهو انا ماعارفة يا انتظرها يا امشي .. وقطعتو معاهو .. ودخلت طوالي ..

بقو مضطرين ينتظرو المراة لامن تجي .. الواطة صباح ..

وقفو الامجاد في ضل العمارة وبقو يتونسو ..

والزاكي حكا لي حمد معاناتو في تحصيل لقمة العيش ..

وقال ليهو والله يابن العم انا بطلع من الصباح بلف للشغل وبجي .. قروشي البجيبها مابتفوت الوجبه ومرات الوجبة زاتها في تلتة ..

البلد بقت حكاية صعبة خلاص ..

ونحن والله خلاص زهجنا وملينا .. بس ماعارفين نعمل شنو ..

حمد قال ليهو عارف التور وكت يكتفوهو ويضبحوهو؟

ديل نحن السكين فوق رقابنا وماقادرين نفرفر ..

ربنا يصلح الحال ويرفع البلا يازول .. لكن في النهاية نقول الله ماشقالو حنكا" ضيعو ..

ومادام الله خالقنا .. قادر يرزقنا ..

المهم في ونستهم ديك المرة جات .. راكبة عريبة نيسان باترول جديدة كرت ..

وسايقها سواق ..

نزلت .. قبل ماتدخل الزاكي جا ماشي عليها ..

قال ليها سلام يامدام .. انا الكهربجي .. قالت ليهو معليش انا جبت كهربجي غيرك .وهسي هو شغال ..

قال ليها بس انتي اتصلتي علي .. وانا جيت على حسب اتصالك ..

حتي اجرت امجاد .. وماعندي حق المشوار ..

قالت ليهو يعني ادفع ليك حق الامجاد .. وانت ما اشتغلت لي .. ؟؟

والله خبر !!

اسمع يا استاذ .. انت طالب مني حاجة ..؟ قال ليها ابدا" ..

قالت ليهو انا مافاضية ليك وفتحت اباب ودخلت وقفلت الباب.. وخلت ليك الزاكي خشمو حنضل حنضل ..

اخد ليهو وقفة وبقى يقول ليها والله دي حقارة .. وانا مابسيبك ..

وبقى يدق في الجرس .. والجرس شدة موعالي .. صوتو برة بنسمع ..

كرررررر .. كرررررر

تاني جاتو مارقة والمرة دي معاها واحد قدر الضربة .لابس فتيلة وشورت مخطط كدا شكلو كان نايم .. و عيونو مورمة وشكلو مرعب ..

وقفت المراة قدام الزاكي الكهربجي .. وقالت للزول الوراها اتصرف مع الزول ده طيرو من هنا .. ودخلت ..

وحمد من هناك يراقب في الوضع ..