الفصل التاسع

لما سماح قالت الكلام الغريب ده لي حمد .. حمد استاء استياء شديد وبطنو طمت .. وقال ليها خلاص ياسماح مافي مشكلة .. اقتراحك مقبول تب .بس عندي طلب ..

خليك قاعده في البيت .. لغاية ما تلدي الجنا الفي بطنك.. لانو ده جناي انا .. وكانك ما زوجتي .. مابقرب منك ولاتقربي مني .. ولاعندي معاك اي علاقة .. بس بعد تلدي مباشرة بطلقك اتفقنا ؟؟

قالت ليهو اتفقنا ..

شوية هدأت ودخلت جوه جابت ليهو أكل .. قال ليها مستحيل اكل من يدك تاني.. قالت ليهو يلا في ستين .. شالت الاكل رجعت بيهو ..

ما أخد ساعة ضرب لي الزاكي.. عشان يسأل من فدوى .. لقى التلفون مقفول ..

وقلق قلق شديد .. وتاني دقاهو .. مقفول .. وتالت ضربو جاب جرس بس الزاكي مارفع .. وحمد بقى مقلق يدخل ويمرق .. وضرب كم مرة والزاكي مارد ..

وماعارف الحاصل بيغادي شنو وكلام سماح ما هماهو شديد.. ليه ماعارف ..

بس هسي اهتمامو وقلقو كلو على فدوى ..

قامت سماح سألتو قالت ليهو ضربت لي منو .. الماردت ليك دي .. وخلتك مقلق كدي ؟.. قال ليها وانتي مالك ؟؟ وعلاقتك بالموضوع شنو ..؟

مش اتفقنا اي زول في حالو ؟؟

قالت ليهو يعني اضرب للزول الحكيت ليك بيهو عادي ..؟

قال ليها اضربي ليهو لونفسك بتسمح ليك بالخيانة. وانتي في عصمة راجل .. وجناهو في بطنك .. لو اهلك ربوك على كدا؟ مافي مشكلة اعملي البريحك ..

بس لو سمحتي تاني ماتسأليني من حاجة بتخصني.. وماعندك علاقة بحياتي.. خليك في حالك وخليني في حالي ..

وتاني شال التلفون ضرب للزاكي المرة دي الزاكي رده ليهو ..

حمد قال ليهو انت وين يا الزاكي .. قال ليهو قدام مع ناس بكري .. حمد داير يسألو من فدوي .. عاين لي سماح كدا .. لقاها غازة كوعا تعاين ليهو ..

قال ليهو خلاص انا جاي عليك.. حضر لي حاجة اكلها لاني جيعان شديد ..

وطلع طوالي وعاين لي سماح.. قال ليها مع السلامة ياسماح خلي بالك من نفسك.. قالت ليهو وانت مالك ومالي .. امشي في حالك ..

قال ليها طيب .. طلع طوالي ركب العربية مشى على ناس الزاكي .. وبكري .. والمرة دي معاهم واحد اسمو نميري. برضو من ضمن الشلة ..

المهم الزول ده لمن جا للناس ديل قابلوهو مقابلة باردة شديد ..

حتى بكري الزول الفكاهي .. قابل حمد مقابلة سئيه .. ونميري ده رد ليهو السلام بي تحت نخريهو .. والزاكي مارد السلام.. اساسا صاري وشو ..؟

المهم حمد اتحسس شديد لكن ماعرف الحاصل شنو؟

قام نادى الزاكي قال ليهو الزاكي لو سمحت تعال دقيقة .. جاهو قال ليهو اها شنو؟

قال ليهو انتو مالكم في شنو ..؟ قال ليهو مافي شي ..

قال ليهو ياخي مقابلتكم لي كانت قاتلة والله ..

الزاكي قال ليهو قلت ليك مافي شي .. انت عايزني لشنو؟قول العندك وخلصني ..

قال ليهو انا بسأل من فدوى بقت كيف؟

قال ليهو انا بٍسألك سؤال وجاوبني بصراحة ياحمد.. انت ليه مهتمي بي فدوى دي قدر ده ..

ياخي فدوى تطير وانت وراها ..

قال ليهو ده كلام شنو يا الزاكي ..؟ انت اخوي والله .. الزول مابسأل من اختو.. الزاكي قاليهو ياخي فكني من الحنك الماجايب حقو ده.. خوة من متين ؟؟

لو سمحت ياحمد .. ابعد من حياتنا وشوف ارزاقك ..

قال ليهو حاضر يا الزاكي .. وانا آسف شديد.. بس ياريت توريني الغلط الحصل مني شنو؟.. الزاكي فات منو طوالي

حمد من كلام الزاكي تاني مارجع للجلسة.. طوالي مشى منهم..وركب العربية ومن الاحراج والزعل قرب يبكي ..

واكتر شي هاميهو انو ماعرف فدوى الحاصل عليها شنو؟

وبتسأءل جواهو كيف يا الزاكي زوجتك مريضة قدر ده .. وانت قاعد تتونس.. ياربي هسي فدوى تكون كيفنها ..

ومشى بقى سايق الامجاد ولافي بالشوارع بدون وعي .. يمرق من شارع ويدخل في شارع .. وهو ماعارف ماشي وين؟

في لفو داك جاء ماشي على السوق في الشارع بتاع حي العرب بورا هناك مع زريبة العيش وهو متجه جنوب ماشي على مسجد العرضة جا ماري في مراة كبيرة كدا اشرت ليهو.. وقف ليها ..

وقبل المراة دي .. في كم نفر اشرو ليهو.. ابدا ما وقف.. لانه ماعندو مزاج يشتغل ..

المراة قالت ليهو انا ماشة السلاح الطبي ..

قال ليها اركبي .. قالت ليهو اها بي كم؟

قال ليها عليك الله ياحجة اركبي .. البتدفعيهو لي بشيلو .. انا ماقادر اجادل.. المراة ركبت طوالي .. وهو سايق وماشي .. قالت ليهو مالك ياولدي متضايق قدر ده؟ الدنيا مابتستاهل ..

قال ليها والله ياحجة انا ما الزول البهتم بالدنيا لكن الظلم حار؟

قالت ليهو انا مراة قدر امك احكي لي ..

حكى ليها .. مرض فدوى زوجة صاحبو.. وقصة المقابلة القبل شوية ..

وقال ليها انا ماعارف ذنبي شنو؟.. بعدين اكتر شي مضايقني ماعرفت المراة العدتني زي اخوها.. الحاصل عليها شنو؟.. وكيف هي عيانه وراجلها قاعد يتونس؟

المراة الراكبة معاهو دي دي قعدت تبكي .. وتقشقش في دميعاتها ..

قالت ليهو سبحان الله ياولدي .. غايتو حوا والده .. انا من معاملة راجل بتي ليها ..

قنعت من الرجال كلو كلو .. وقلت البلد دي مافيها رجال .. لكن انت بكلامك ده.. غيرت راي.. انا بتي عيانة وراقدة في المستشفي .. وراجلها جدعها وهرب ..

وانا هسي بمشي الثورة وبجي المستشفى تلاتة مرات في اليوم .. بمشي لاولاد بتي الصباح .. والبسهم واعمل ليهم الاكل .. اجي المستشفى اقعد مع بتي .. لما الاولاد يجو راجعين من المدرسة برجع تاني .. بديهم الاكل واجي راجعة المستشفى ..

وامشي ليهم المغرب اعشيهم .. وانومهم واجي راجعة المستشفى المرة التالتة ..

عشان ابوهم هارب من المسؤولية .. وكت مرق قال لي ان شاء الله بتك تموت ..

لكن الحمد لله ياولدي ترا صابرة وراجيه الله ..

قال ليها ماتشيلي هم ياحجة .. انا بحاول اساعدك والله ..

بس انتي ادعي لي فدوى ربنا يشفيها .. وتقوم بالسلامة لوليداتها ..

اها يازول لامن وصلو المستشفى .. نزلت المراة وحلف من القروش اداها تلفونو.. وقال ليها الصباح لمن تجي للاولاد اضربي لي ..

شالت منو التلفون وهو رجع على البيت .. في الطريق تلفونو ضرب ..

الرقم ماغريب عليهو .. لكن مامسجل ..

حمد فتح الخط وقال الو مرحبا ..

جاهو صوت فدوى المابغبى عليهو وصوتها واضح فيهو التعب والاعياء .قالت ليهو.. حمد انا اختك فدوى ..

حمد انت قلت لي انت اخوي .. حمد انا محتاجة ليك شديد ..

حمد انا تعبانة شديد ..