الفصل الثاني والعشرون

اها حمد والزاكي لمن وصلو .. لقو جماعة يوسف جابو الورقة من نفيسة .. من المكتب.. وكانت طابعة فيها وصل امانة .. بي اربعين مليون .. بس كانت داقسة دقسة صغيرة .. حتوديها في ستين داهيه .. مكتوب في الورقة:

بسم الله الرحمن الرحيم..

وصل امانة ..

انا الزاكي فلان فلان .. بهذا اشهد ان ل بسمات فلان فلان مبلغ 40,000 لاغير اربعين الف جنيه في ذمتي والتزم بتسديدها في فترة اقصاها 13 / 11 / 2009 ..

التوقيع .. وهنا كان (توقيع الزاكي) .. وهنا (بصمته)

الشاهد الاول: ... ومخلياهو فاضي ..

الشاهد التاني... ومخلياهو فاضي ..

طبعا كانت في الفترة دي كايسة للشهود عديمين الذمة الببيعو شهادتهم ..

ودي كانت الدقسة والثغرة القانونية الضيعت بسمات ..

وكما لايخفى على الناس البعرفو القانون.. انو اي وثيقة تتم بدون شهود لاتعتبر ..

واذا صدرت الوثيقة بدون حضور الشهود .. واثبات شخصياتهم فان المساءلة القانونية

تطال المحامي وموثق العقود .. وربما يتم سحب رخصته في مزاولة مهنة المحاماة ..

وطبعا الزاكي ماقادر يستوعب .. من هول المصيبة..

لمن شاف الورقة .. نطط عيونو .. وبقى يهضرب .. وقال لي حمد طيب هي عارفة انو القروش دي ماعندي.. ولا يمكن اسددها ليها .. فكيف تعمل عملية زي دي؟

حمد قال ليهو هي اساسا يا استاذ.. ماعايزة قروش.. لكن دايرة حاجة تكون مقيداك بيها .. وماتقدر تتصرف معاها اي تصرف .. يعني ورقة ضغط ..

قام يوسف قال ليه .. طبعا نحن بعد كدا حنرفع البلاغ ده للنيابة ..

وده بلاغ تزوير وحيسحبو منها الرخصة.. ونخليها صايعة ساي ..

حمد قال لي يوسف .. يوسف ياخي مافي داعي .. حلو الموضوع. وخلاص.. اهو الورقة اتحصلنا عليها.. مافي داعي نقوم نضرها ضرر قدر ده .. وانا بوعدكم بلاقيها واتكلم معاها .. ياخي صعبة حكاية سحب الرخصة دي .. في النهاية الزولة دي مراة وعقلها ناقص .. واتصرفت بي غباء .. وربنا كفاهو شرها ..

يوسف قال ليهو .. لالا مستحيل ياحمد .. القضية طلعت من الزاكي .. دي بقت قضية جنائية ضد القانون .. ومستحيل نتساهل فيها ..

الزاكي قال ليهو طيب.. مش المفروض تتسجن ؟؟ .. وهسي انا قعدت في الحراصة .. بي بلاغ كاذب وتضليل .. دي كلها موش جرايم ..؟

يوسف قال ليهو انت يا الزاكي الموضوع داك بس انساهو .. بلاغ وشطبناهو.. عشان ماتجيب لناس فايقة كلام وجرجرة وسمعة .. خلينا نبقى في القضية التانية دي لانها بالمناسبة اخطر ..

لانو المحامي بمثل القانون.. لما هو بي نفسو يبقى خاين .. ومخالف للقانون ..

هنا العدالة مابتتساهل معاهو ابدا ..

الزاكي قال لي حمد.. عليك الله ياحمد تلفونك ده سريع ..

اداهو التلفون .. اتصل عليها .. قال ليها بسمات .. انتي حقو يسموك.. (بس .. مات)..

لانو مكرك الليلة بس مات يا خاينة ياغدارة .. انا زمني وقعدة الحراصة خليتا لي الله ..

وشاكيك على الله .. وانتي طالق .. وتاني ماعايز اشوف وشك ..

وقفل الخط .. وحمد يعاين ليهو .. والزاكي ده زعلان زعله يرجف ..

اها .الضابط حرر امر قبض لي بسمات .. والقانون مشى مجراهو ..

ونحن اصلا ما حنتابع قضيتها .. لانها مابتهمنا بعد كدا كتير ..

ويوسف قال لي حمد والزاكي .. انتو خلاص امشو ويا الزاكي .. نحن لو احتجنا ليك في القضية دي بنناديك ..

وحمد والزاكي طلعو مع بعض .. والزاكي كان بعاين لي حمد.. ومتكيف منو شديد..

وفي نفس اللحظة خجلان منو ..

وقال في نفسو انا لازم اقول لي حمد ده كلام يخفف علي شوية ..

قال ليهو ياحمد.. اخبار اختك شنو؟ .. قال ليهو اختي منو؟ قال ليهو اختك فدوى ..

ولا يعني هي اختك لمن كانت مراتي.. وبعد اتفارقنا تاني مابقت اختك..

قال ليهو والله فدوى اختي.. ومقدارها جواي ماعندو علاقة بيك ..

لو متزوجها لو مطلقها ..

قال ليهو والله انا اول حاجة كنت خاتي في راسي انو بعد تتطلق انت تتزوجها ..

حمد قال ليهو انت غبي !! في زول بتزوج اختو ؟؟

وحتى لو انا ماعندي ليها اي احساس اخوة .. في راجل عندو نخوة بتزوج طليقة اخوهو ؟؟

الزاكي قال ليهو فعلا .فعلا .. كلامك صاح .. بس انا فهمت كدا في النهاية .. لكن بعد فات الاوان .. وبعد ظلمتها وظلمتك .. والله ده كلو كان بي سبب قوايل بسمات ..

قال ليهو معقول يا الزاكي ؟؟ معقول تصدق كلام واحدة من بنات الحلة .. في مرتك العاشت معاك الحلوة والمرة ؟؟

انت عارف زوجتك دي مافي راجل ولامرة في الدنيا بعرفها زيك انت ..

يعني انا سماح دي بفهمها اكتر من امها الولدتها .. يعني لو جا اي زول جاب لي فيهاكلام .. وانا صدقتو .. يبقى انا غبى وحمار ساكت..

الزاكي قال ليهو ياحمد والله انت ماقصرت معاي .. والله انت نعم الاخو ..

وانا والله تاني مابنساك طوال حياتي .. يعني عاين اصحابي بتاعين القرقرة .. والونسات كلهم اتخاذلو مني .. مع اني ماحصل قصرت فيهم بي حاجة ..

وانت الاذيتك وظلمتك وقفت معاي اكتر منهم ..

ومرة قال اللبيب..

البختار صحاب عظما وكرام واجلا.

مابخاف الضلام مادام معاهو اهله.

الاخوان كتار.. لكن تضايقك عله..

تلقى الشله غابت والبساندو اقله..

والله ياحمد انت اصيل .. بس ياحمد انا عندي طلب واحد ومافي زول في الدنيا دي بقدر يعملو لي الا انت ..

قال ليهو طلباتك اوامر الزاكي اخوي قول ..

قال ليهو.. انا عايز فدوى يا حمد.. انا عايزك ترجعها لي باي طريقة ..

انا يا حمد عارف فدوى بتعزك قدر كيف؟ ومن شدة تقديرا ليك وكلامها عنك انا اتشككت وصدقت كلام بسمات ..

عليك الله ياحمد ترجع لي فدوى .. وقعد يبكي كمان. ^ – ^

زمان ماقلنا كدي يا الزاكي بس عامل فيها ابو الغيران

غايتو الدنيا دي فيها جنس عجايب وتقلبات تخلي الزول يتحير ..

اها طبعا حمد متأكد انو فدوى ماحترجع ليهو .. بي دليل انها رفضت تستلم منو القروش .. وداير يكلمو يقول ليهو نحن رسلنا ليها قروش .. بي اسمك وهي ابت تستلمهن .. وخايف انو الزاكي يقول (حمد متواصل معاها بعد الطلاق) ويبدا يتشكك تاني ..

وحمد بقى متردد يقول ولا مايقول.. ولو قال النتيجة بتكون شنو؟

كدي نشوف حيقول ولا لا؟؟