الجزء 3

بكت رهف في تشنج لما شافت جثه طفل في العاشره من عمرو ودهسو بتاع موتر

وخلاهو مرمي وهرب وبعدها بدت الناس في التجمهر وطلبو الشرطه وكلهم في حالة

حزن وذهول من منظر جثه الطفل ولما لاحظو بكاها قالو ليها انتي قريبه ناس سيف

الدين ،ديل يظهر اهل الطفل المتوفي .. سريع جاوبت لا لا بس انا اتأثرت بمنظر الجثه

واسرعت مبتعده من مكان الحادث قبل م تصل الشرطه وركبت امجاد ولما وصلت

البيت دخلت غرفتها بدون م تسلم علي والدتها وراجعت شريط الحصل كلو وذادت في

البكي .. ياربي ولدي الحصل ليهو شنو ،مات ولا حي ،شالو ذول ولا ودوهو الشرطه

ومن الشرطه لدار الرعايه .. لا لا المحل آمن بكون شالو ودحلال او بت حلال .. وكمان

امكن م شافو اي ذول وقعد لحدي نص الليل ولمت فيهو الكلاب .. آآآه ياربي انا معذبه

ريحني من عذاب الضمير والحمل التقيل الشايلاهو ..ياربي لطفك وعفوك وطامعه في

مغفرتك ياارحم الراحمين ..

جات لطيفه في خلعه ،مالك طافيه النور في شنو ..رهف ومشت علي مفتاح النور

وولعت اللمبه ولقت رهف وشها متورم من الدموع وقعدت جنبها وطبطبت عليها في

حنان ..يابتي استغفري ربك كتير ولما تبدي تصلي كتري من قرايه القرءآن عشان

الذنوب اللابساك دي تزول وربنا اذا تبتي توبه نصوحه بغفر ليك ان شاء الله وانا كمان

مشتركه معاك في الجريمه دي وبستغفر ربي في اليوم الآف المرات عشان ربنا يغفر لي

.

سكتت مسافه وواصلت ورهف لسه بتبكي واسمعي كلام امك انا عمري قرب للخمسه

واربعين وانتي لسه م كملتي 17 سنه يعني في بدايه حياتك وانتي اعلنتي نهايتها

بالجريمه الارتكبتيها في حق نفسك وحق اسرتك .. لكن اسمعي نصيحتي الذول الدايرك

زوجه للمستقبل م بمارس معاك الرذيله ويحافظ عليك وم بعرضك لموقف زي الانتي

فيهو دا واذا حصل ووقع معاك في الحرام وبعداك ستر عليك واتزوجك يعني اذا طلع

راجل وعمل كدا !!! بعد الزواج م بحترمك ولا حيكمل معاك واحتمال يحصل العكس

ويعيش معاك للآخر لكن بتلقي دايما في حاجه مفقوده .

رهف رفعت راسها ومسحت دموعها ،والله ياامي هو غدر بي واداني حبوب في عصير

وعمل معاي الدايرو وبعدين صورني ولما اكتشفت عملتو ورفضت تاني اقابلو بقي

يهددني بالفديو الصورو .

لطيف : اسمعي دا م تبرير لجريمتك واصلا تمشي معاه محل فاضي وخاص ليه .

رهف :ضحك علي وكان متفق مع واحد صحبو يضرب ليهو وهو معاي ويقول ليهو

امك عيانه وطلب مني امشي اشوفها بغرض التعرف علي نسيبتي المستقبليه

لطيفه : المهم استفيدي من الحصل دا ويبقي ليك درس وكتري الاستغفار

نامت رهف اليوم داك نوم كلو كوابيس والليل كلو تصرخ ودا خلي امها تجي تقرا ليها

ونامت جنبها لحدي الصباح ...

ومرت الايام وجا وكت التقديم للجامعه وطلبت رهف من والدتها تقريها جامعه خاصه

كليه الصيدله ،لطيفه خاصه اجيب ليك ملايين من وين انا المحامي كتر خيرو لقي لي

شغل صاح لكن اجيب الرسوم من وين .

رهف :البيت .. قروش البيت

لطيفه : بيت .. بيت شنو نحن غير قروش البيت دي تاني عندنا شنو بعدين المحامي قال

شاف لينا بيت في حته بعيده صاح لكن المواصلات متوفره وسعرو كويس ايجار

الشقه دا يابتي م بقدر عليهو ..

رهف : طيب انا بشوف واحده تكون قروشها مناسبه ومن باقي قروش بيع البيت

ودهبك تقريني ياامي انا عندي منو غيرك يقريني .

لطيفه :استغفر الله العظيم .. حاضر يابتي العلم دا م فيهو لا حاضر .

رن جرس الباب وفتحت لطيفه الباب وكانت ميار صديقه رهف وسلمت عليها في

حراره ومشت تنادي ليها رهف من الغرفه جات رهف لابسه فستان بيت اسود جميل

وسلمت علي ميار في حراره وبعد الاسئله المعروفه عن الحال والاحول .

ميار :وااااااو انا عرفت انك جايبه الجمال دا من وين امك عسل عديل وماشاء الله

تقول اختك الكبيره .

رهف ابتسمت : تسلمي ذوقك هو الاحلي

ميار : اسمعيني انا وريت اخوي مازن صورتك وهو كان بفتش عن عروس واتكسر فيك

وجا مخصوص السودان عشان يشوفك يلا عشان نلاقيهو بره في اي مكان لذيذ

.. سكتت رهف وصبت فيها مطره لما سمعت كلام ميار وردت سريع ،عروس عرس شنو

انا لسه عندي دراسه طوووويله ،ميار اسمعي والله انا م طالبه رايك اسي شوفيهو

واتكلمي معاهو وقرري بعداك تعملي شنو .. المهم الحاح طويييل من ميار وافقت رهف

لكن حددت يوم تاني للقاء ...

لبست رهف عبايه سوداء راقيه جميله تتناسب مع بشرتها النقيه وجزمه سوداء وشنطه

يد انيقه واستأذنت من امها وطلعت عشان تقابل ميار ووصلت المكان المتفق عليهو

ولقت ميار ومازن الذي اعجب بيها منذ الوهله الاولي وبقي بس يبحلق فيها حتي ميار

لاحظت وفرحت جدا باعجاب مازن بالعروس الرشحتها ليهو وهي كمان ارتاحت ل

مازن .. كان شاب لطيف منتصف العشرين ووسيم وراقي ومهندس واخلاق عاليه وفهم

.

بعد اللقاء بدت قصه حب جميله بين مازن ورهف وبعد م نزلت الكليه بقي ينتظرها كل

يوم ويوصلها لحدي البيت وفي البيت طول اليوم تلفونات واخيرا قرر يتقدم رسمي

ويعمل عقد وفي اجازه الكليه تمشي ليهو بره وتجي تكمل الجامعه عادي ويتلاقو في

الاجازات لحدي م تخلص وبعدها تستقر معاه في مكان عملو خارج البلاد... فرحت

لطيفه شديد وقالت الْحٍمَدٍ للـّہ الدنيا بقت باسمه لينا وكلمت عم رهف الوحيد وطلبت

منو يقابل ابو العريس واتفقو علي اي شي وعزمو ناس البلد الهاجرو منها يعني

الجيران القريبه وكدا ..

يوم العقد،،،،،،،

مشت العروس الكوافير من الصباح ومعاها بنات الجيران وزميلاتها في الكليه القريبين

ليها وبعد جات مواعيد العقد العريس قال لآزٍمٍ العروس تكون معاهو في اللحظه دي

وبالفعل لبست العروس فستان وردي جميل وكانت آيه من الجمال والكل صل علي

النبي لما شافها .

كانت العروس مع صحباتها في الغرفه منتظرين المأذون بعقد بعداك يجي العريس

يسوق العروس في الحظات دي طلب مازن من ميار تنادي العروس بسرعه ميار قالت

ليهو م ممكن الا بعد العقد لَـگِنْ اصر واترجاها الموضوع ضروري وماكان من ميار الا

تمشي وتسوق العروس بالدس وتجيبها في الغرفه التانيه والكل بره في الخيمه مكان

العقد فرحانيين .. طلب مازن من ميار تخليهم براهم وبعد طلعت وقفلت الباب وراها

عاينت رهف ل مازن في فرح ،م قادر تصبر لحدي م العقد يتم ..مازن عاين ليها في

سخريه وقلب حزين عقد يتم م اظن ،عاينت ليهو رهف في خوف كيف م يتم الحاصل

شنو.