الجزء 7

عدينا اليوم الباقي مابين المحاضرات وماما سميرة اصلا دا

برنامج الجامعة الثابت بالنسبة لينا،،نهاية اليوم مشيت علي

البيت ومنو للكورة،برنامج ثابت وممل،،مر علي الحالة دا

قريب اسبوعين لغاية ما يوم ماكان عندنا حاجة في

الجامعة،،الشلة اتذكرو لي برنامج الرسم ،،وما كنت شايل

معاي اقلامي والكراسة غشينا أقرب مكتبة اشترينا لوازم

الرسم ومن هناك اتفقنا نمشي توتي،،محل الحبيبة والناس

الرومانسين في يوم ما،،توتي دي لو لقت اهتمام بسيط

حتطلع من جنان الله علي الارض لموقعها الممتاز

جدا،،مشينا قعدنا لينا تحت شجرة قريبة من البحر وبديت

أرسم في الشباب وكانت البداية بهنادي الجميلة ويبقالي دي

البت الحديقة القالا حبيبنا مصطفي سيدأحمد ذاتو في

الاغنية المشهورة،،بديت أرسم فيها وكأنو ما انا البرسم يدي

مطاوعاني جدا حتي هم وقفو مشدوهين من سرعتي في

الرسم،،خلي هم انا ذاتي بقيت مستغرب لكن بيني وبين

نفسي عرفت انو الحكاية دي من سماهر الجنية،،حقيقة

وجود جنية مخيف جدا في حياة اي انسان لكن برضو

فيهو مميزات بتكون ماعند غيرك،،انتهيت من رسم هنادي

لما استلمت رسمتها اول حاجة رسلتها لكل صاحباتها وبديت

في باقي الشلة نفر نفر لما انتهيت منهم وكلهم كانو

مستغربين في التحول الرهيب في أيام دا لكن ما أقدر

اقول ليهم أي حاجة عن السر الدفين دا،،لانو لو عرفو

احتمال علاقتي بيهم تبوظ وديل الاصحاب الوحيدين

البرتاح معاهم وبنشكي همومنا لبعض الا سيرة الجنية دي

نهائي ما حاولت اجيبا ليهم ولا من باب التلميح نهائيا .......

......نهاية اليوم اتحركنا من توتي وطول الطريق كانو

بتكلمو عن دقة الرسومات لما عملو ازعاج للركاب الفي

الحافلة،،بعضهم شداهو الكلام وبدا يقلب في الرسومات

وبعضهم اعتبر كلام جوطة وطيش شباب لكن الغالبية

عجبتهم الرسومات،،اصحابي قالو لي تعمل صفحة في

الفيس وتبدأ تنزل فيها اعمالك دي،،لكن انا قلت ليهم انا ما

داير جوطة حواليني ،غايتو شبه أقنعتهم انو نأجل الحكاية

دي شوية وقلت لنفسي يمكن انت والجنية دي ما تتفقو

ودا وارد جدا لأنو لايمكن انو اسيب حياتي كإنسان واتزوج

جنية خصوصا انو لو قبلت بالحكاية دي فلايمكن انو انا

اتزوج او حتي أحب لي بت او انسانة عادية زينا كدة !! اها

البحصل شنو في اللحظة ديك؟؟أكيد البحصل انسحاب

للجنية دي ولو بأي طريقة وكمان إنسحاب لقدرتي علي

الرسم البقيت شبه متأكد او متأكد عديل انو دي من

عمايلا،،يلا فلو عملت تلميع لنفسي وبديت أرسم لابد في

يوم حأتوقف وحتكون في تساؤلات كتييييرة لكن كل شي

وليهو يوم .........

...... وصلت البيت ومشيت غيرت هدومي وأخدت لي

نومة بعد جري الليلة دا،،ما صحيت الا قريب العشاء،قمت

جيهت اموري وقعدت أراجع حبة في شيتات الجامعة،،لما

زهجت بديت أفكر في موضوع سماهر الجنية،،وانو

الموضوع دا حيصل وين؟؟وهل نحسمو هنا ولا اتهور

واواصل معاها القصة دي؟وحتي لو واصلت معاها القصة

دي فلابد من انو الموضوع دا ينتهي في يوم من

الايام،،كان رضيت وكان أبيت ،، لانو العقل السليم يرفض

فكرة تزاوج انسان مع جنية لأنو زواج غير متكافئ سواء

في الافكار او البيئة او أي شي،،نحنا مخلوقات طينية وهم

مخلوقات نارية،،مافي عامل يجمعنا يخلي الموضوع دا يتم

الا مكابرة وعناد مني بس،،ختيت في بالي انو انا أصل

معاها للملك والملكة أشوف عايشين كيف وبعد أطلع من

هناك اوريها الحاصل واليحصل يحصل لانو كدة ما

بنفع ...

اليوم الرابع بالضبط من كلامي مع نفسي ظهرت لي

الجنية في الجامعة مشيت عليها وقالت لي الليلة حنمشي

للملك والملكة وتقابلن،،وافقت علي كلامها ومافي لحظة

تمت الا وكنت في أكبر ممالك الجن ،، حاجة لو قلت ليكم

تحفة أكون أجحفت في حقها،،بداية بالمبني الكبير يعني

أكبر قصور الدنيا لا تساوي شئ امام ضخامة المبني

دا،،وأفخم مباني الارض لا تضاهي روعة وتصميم المبني

دا،،في مدخل القصر حراسة مشددة جدا جدا،،بعد اتجاوزنا

الحراسة كنا في القصر،،امام الملك والملكة وقدامهم

الحاشية من الجن حاجة تشرح النفس،،تم صرف الجميع

عداي والملك والملكة،،حتي سماهر الجنية صرفوها،،الملك

بعد ما رحب بي في مملكتهم قال لي ليه استدعيت

سماهر؟؟؟

-ابدا انا ما استدعيت أي زول،،هي الجات وقدمت

نفسها ....

-وهل انت قبلان بالحكاية دي؟؟

- يعني ....

-داير اجابة محددة ...

-حتي لو ما قبلان فأكيد لايمكن انو أرفض طلب أميرة من

مملكة الجن .....

- وليه لايمكن ان ترفض فالقلب لا يحب بالغصب ....

-صاح والله ....

-طيب انا أساسا ما موافق علي الموضوع وحاولت اقنعها

بأنها تسيبك لكن هي مصممة عليك انت بس،،وعشان تبعد

عن نفسك شرها بديك مهلة إسبوع للتفكير في المسألة

دي،،وفي كلا الحالتين بحاول اوفر ليك الحماية مع اني ما

أقدر اضمن ليك الحاجة دي .....

-تمام اتفقنا،،ومع تمامة الجملة لقيت نفسي في

الجامعة،،مع صداع رهيب نتيجة الضغط الحصل

دا،،واتمنيت لو الحكاية دي تنتهي هنا وأرجع مهاب

الزمان ...

احساس رهيب بالصداع شكلو راسي حيضرب عديي

يل،،يالله قعدت لي في بينش وتكيت راسي،،اتخيلو معاي

ملك من ملوك الجن يقول ليك مابقدر احميك مدة طويلة

من بتي دي،دا ملك عدييييل يعني لاهو شيخ ولاهو فقير

ولاهو زول مبروك،،وشوف ليك صرفة في خلال اسبوع !!!!

اسبوع اسع الاسبوع دا اعمل فيهو شنو !!امشي لاب سوار؟؟

ياخ دا كمان قال مابيقدر يعمل حاجة ويربي معاها عداوة

اها أقع وين انا؟؟؟واقبل وين؟؟وانا ما عارف زول او شيخ

يمكن يقدر يعمل لي حاجة في المصيبة دي شكلو دا

حيكون الاسبوع الاكتر رعبا في حياتي كلها،،دا لو فضلت

فيها حياة بعد الاسبوع دا كلو .......

....... راسي هدأ شوية مرقت من الجامعة علي البيت

طوالي،،وصلت البيت بآخر نفس،امي قالت لي تعال النخت

ليك اتغدي،،قلت ليها باكل بعدين،،لانو مافي نفس لاي اكل

غايتو الله يستر بس،دخلت الغرفة حقتي وعايز انوم عشان

اهرب من الواقع الانا فيهو دا لكن ياربي بينفع؟؟؟؟ غايتو

بعد مجابدة مع الصداع نمت لكن نوم بهلاويس وحكايات لا

يعلم بيها الا الله ما بيتذكر يومي الهلوست في النوم،،وما

صحيت الا لمن أمي جات داخلة علي وكوركت سجمي

مهاب مالك؟وانا أسمع في صوتا دا بعيييد تقول جاي من

بطن بير،،شالوني جنازة من البيت واقرب مستوصف،،اليوم

داك لمت فوقي حمة شوية كدة كان ودتني الآخرة،،لكن في

رب اسمو الكريم،،انا راقد في السرير دا تلاتة يوم ما

زحيت منو شبر،والحاجة تعجبك شي شوربة وشي لحم

محمر غايتو الله يديها العافي،لكن رقدت التلاتة يوم دي

اصلا ما من صالحي كدة مرن تلاتة يوم وباقي أربعة يوم

من المهلة،،اليوم الرابع الصباح قمت مشيت علي الجامعة

وضربت لماهر يلاقيني بعيد من الشلة،،وفعلا لاقاني

ومشينا قعدنا بعيد من جوطة الناس،،وحكيت ليهو كل

الحاصل من طق طق للسلام عليكم،،ماهر دا كان مشدوه

وهو بسمع في كل التفاصيل الانا حكيتا ليهو ....

انت عارف يا مهاب انا كنت متوقع انو يكفتك شيطان زي

ما بقولو ،،لكن تحبك جنية !!! دي أصلا ما كنت متوقعها ....

-يلا الحكاية أسع في حب الجنية دي،،عندي خيارين يا انا

كمان أحبها واعرسها وطبعا دا يلغي امتياز انو اتزوج انسانة

تاني نهائي،،يا كمان ارفض طلبا دا واستحمل البجيني

منها ......

-ههههههه والله فعلا شر البلية ما يضحك،،اها وأسع ناوي

تعمل شنو؟؟؟

- انت اول زول أحكي ليهو الحاصل ودايرك توريني انو

أعمل شنو في المشكلة دي،،يعني تقيف معاي تنورني لانو

انا خلاص تفكيري وقف،،وكمان الادهي وأمر انو عندي مهلة

محددة .....

-مهلة !!!مهلة شنو كمان؟؟مهلة ليهم ولا ليك؟؟؟

-ياسيدي المهلة دي من الملك حقهم شخصيا،،انو حيوفر لي

الحماية في خلال إسبوع فقط لو وافقت خير وبركة واكون

ضمنت الجنية،،لو رفضت الجنية حتتصرف وتعمل بلاوي

وهو ما حيقدر يوفر لي حماية في حالة هي بقت

غضبانة .....

-ياخ انت دخلت نفسك في معمعة وجوطة شديدة

خلاص،،لكن انت عارف ما حيمرقك منها الا شيخ

كااااارب ....

-طيب ما تلحقني بيهو الشيخ الكاااارب دا ....

-والله انا ما عارف لي شيخ كارب لكن دقايق اعمل

اتصالاتي مع شباب عندهم علاقات يمكن نطلع لينا بحاجة

مفيدة ......

..... ماهر طلع تلفونو وعمل ليهو كم مكالمة آخر وحدة

كانت مع واحد اسمو سليمان،،اها دا وصف ليهو لي محل

واحد قال شيخ كبير وعندو قدرة انو ينتهي من الموقف دا

سريع،،قلت ليهو يلا عليهو أسع دا يا ماهر خلينا نتفك من

العارض دا ياخي .....

-وين يازول قال حيضرب يحجز لينا عندو وباكر الصباح

نمشي عليهو ....

- يعني تاني أعيش علي أعصابي لغاية باكر؟؟؟

-استحمل ولسع المهلة حقتك ما انتهت ....

-تمام الواحد يستحمل لغاية باكر ....

- خلاص يلا بينا علي الشلة عشان ما يختو حاجة في

نفسهم،،وخليك عادي قدامهم واكيد الموضوع دا بتحلا .....

-يلا بينا عليهم واليحصل كلو لخير ....

مشينا علي الشلة لقيناهم منتظرننا وكانو بعلقو علي

الاختفاء حقنا دا،،،وكانو مستغربين في الموضوع الانفردنا

فيهو انا وماهر لانو اصلا ما عملناها قبل كدة،،رميساء نطت

لينا قالت موض ع حب وكدة !!!لانو الاتنين شاكة فيكم

واحد بحبني هههههه .....

-ههههه يحبو ليك شنو يا صاحبي .....

- انا صاحبك يا ماهر يخسي عليك احرجتني شديد

والله .....

- لو ما اخاف الكضب اقول حسب الله بتاع الفول الفي

حلتنا ......

-غايتو الله يسامحك دايما كاسفني ومجرح سمعتي

هههههه ...

غايتو احلي شي في شلتنا المناكفات البتكون داخلة

فيها رميساء،،هههه فعلا مرات بتكون حسب الله ومرات

بتكون رقيقة لدرجة قف تأمل،،ياخ مرة كان عندنا الاسبوع

الثقافي البت دي جات الجامعة بفستان عجيييب نحنا

اندهشنا لانو اول مرة نشوف رميساء بالاناقة والجمال دا

لكن دوام الحال من المحال بعديهو رجعت لينا رميساء

البنعرفا ذاتا،،أخدت قعدتي معاهم واتوكلت علي البيت علي

أمل باكر ألقي الحل عند الشيخ ولا الفكي الحنمشي ليهو

دا،،،أخدت قعدتي مع الحاج والحاجة ونسات وضحك

نسوني همومي لما كل واحد مشي شاف شغلتو،،قاعد براي

والجو هادي ما عارف الذكرني شنو لكن فجأة كدة جاتني

في خيالاتي ملاذ ايووووة ملاذ ذاتا،،بعد مرور الزمن دا كلو

جاتني

ملاذ تاني،،ما عارف يمكن عشان الاسم وتمنياتي انو باكر

ألقي الملاذ عند الشيخ دا ولا لحاجة تانية ما عارف غايتو

بس جاتني،،وإتمنيت انو كان تكون معاي وأحكيها ليها

الحصل والبحصل يمكن القي في ذاتا الملاذ لكن ما كل

مايتمناه المرؤ يدركه،،دخل الليل وكل زول لزم سريرو ونام

وفي مخيلتو حاجات تتعمل باكر وانا همي ان شاء الله

يبقي الشيخ كااااارب ويزبط لي الامور دي ........

..... الصباح قومتي من النوم ضربت لماهر قال لي أسع

كنت داير أضرب ليك اقول ليك لاقني علي العربي النمشي

للزول دا،،جري استحميت وشربت الشاي والعربي جاك

بلاء،،لقيتو راجيني ركبنا المواصلات لمن نزلنا في المحطة

ومن هناك من زقاق لزقاق لما لقينا البيت دخلنا لقينا ليك

كمية بتاعة ناس لكن الاغلب نسوان،،قعدنا لما ندهو اسمنا

مشينا عليهو زول الباب قال المريض بس هو اليدخل،،ماهر

رجع قعد برة وانا دخلت عليهو جو ما تعرف بتاع روحانيات

ولا دجل غايتو اتوكلت قعدت قدامو،،وحكيت ليهو الحاصل

كلو،،كشح ليهو بخور كدة وتمتم بحاجات،،وقال لي علاجك

صعب تب .....

- صعب كيف يا مولانا قول شي تاني يمين الله انا واقف

ليك تب وماعندي جيهة اقع فوقا تاني هههه قال مولانا قال

غايتو الخوف دا بعمل عمايل

- صعب صعب الجني الملازمك دا قوي ما قدرو انا ....

- يامولانا دا كلام شنو والحل طيب؟؟

-الحل عندك الحل عندك .....

- كيف ما فاهم !!!!

- انت فاهم ياولدي،،الحل في يدك بس انت شايفو

صعب ....

- لو قاصد اني أرضخ فعلا صعب،،طيب لو رفصت الوضع

حيكون كيف؟؟

- لو رفضت تشيل الفاتحة في روحك دا لو ما عملت ليك

مرض نفسي ولا عاهة مستديمة ....

- لا حول ولا قوة الا بالله .....

-لكن الغلط منك ياولدي ليه تحمل نفسك شرا ما بتشيل

شبالو ....

- طيش شباب والله لكن يعني خلاص اتقفلت من كل

الابواب !!!!

- لو رافض الموضوع خليك مع الله هو المعين واتذكر انو لن

يصيبنا الا ما كتب الله لنا .......

-ونعم بالله هو نعم المولي ونعم النصير ....

..... اول ما طلعت لاقاني ماهر قال لي بشر،،قلت ليهو

مقفلة من كل النواحي،،لكن بشوف لي معاها حل سلمي

رضت خير وبركة رفضت كمان ارجي البحصل والبجي كلو

لخير ان شاء الله،،طلعنا من عند الشيخ دا وركبنا

المواصلات طول الطريق ماهر بحاول يخفف علي لكن انا

قلت خلاص لابد من المواجهة معاها،،المساء قاعد في

غرفتي فكرت فيها عشان تظهر لي وفعلا ثواني وكانت

واقفة قدامي بأحلي حلة ممكن انسان يشوف فيها شكل

يعني مافي اجمل من كدة علي الاطلاق،،قلت ليها والله

فكرت في الموضوع دا ولقيت انو ما حينجح ......

- انت عارف نتيجة رفضك لي شنو؟؟

-عارف لكن برضو ما حينجح .....

- لو مفتكر انو الملك او اي شيخ في الدنيا دي ممكن

يحميك مني تبقي غلطان .....

-عارف ومتاكد بس برضو ما حينجح عشان كدة امشي

واصلي حياتك البتعرفيها كجنية وخليني اواصل في حياتي

البعرفها كإنسان ......

- عايز تواصل حياتك وتحب ليك وحدة وتتزوجا !!!!

- ايوة وليه لا !!! دا حق من حقوقي في الدنيا دي،،وحاجة

لابد منها ....

- ملاذ ....

-وبتعرفي ملاذ من وين؟؟؟

-دي العقبة الوقفت بيني وبينك ....

-ما تدخلي ملاذ في حاجة بيني وبينك ننهي الموضوع بينا

بالتي هي أحسن،،وكل حي يشوف سبيلو ....

-اصلا ملاذ خارج حساباتي،،لكن لو ما بقيت لي ما حتبقي

ليها نهائي ......

-أصلا ما حأكون ليك لانو ارتباط محكوم ليهو الفشل من

قبل ما يبدأ .....

- انت عارف عاقبة معارضتي شنو؟؟؟؟

-عارف وقبلان بالواقع لانو لن يصيبنا الا ما كتب الله

لنا .....

- اذا خليك متوقع البحصل وأنا حإبتعد من حياتك بس

إستحمل البحصل ليك ..

يتبع ...