الجزء 1

وين الشينة ماجات لسه

* ايهاب بطل حركاتك دي كرهتا البت القعدة معانا

* ههههههه عشان شينة

* نفسي افهم انت مابتشوف كويس ولا شنو

* لي شايفاني عميت

* اكيد

* عشان بقول صاحبتك شينة

* جيهان بلال شينة ...

* مستغربة مالك

* جيجي زي سماحتا دي ولا بتلقاها في السودان ده كلو

* صاحبتك ... و لازم تدافعي ليها

* اوووف منك ياخ ... عليك الله ما تقول ليها كده بقت مابتقعد معانا بي سببك

* هي ماواثقة من نفسا ولا شنو

* ماممكن لكن انت اول ماتشوفا طوالي ياشينة ياشينة وواقف ليها في حلقا بدون سبب

* يمكن بريدا

* هههههههه تريدا

* مالك ... مستغربة

* تريدا كيف يعني

* الناس بتريد كيف

* هوووووي ياود الرشيد البت دي ابعد منها وبطل حركاتك دي . ولا انا البرد ليك تاني

* انتي فايرة مالك هي قالت ليك زعلانة من كلامي

* انت قايلا زيك بترمي الكلام ساااي قدام الناس

* انا بقول الفي قلبي ... وهي مازعلانة

* انت واثق شديد من نفسك

* اكيد

* طيب يا استاذ واثق من نفسك رجاء خاص لو شفتا جيهان بلال تاني في اي حتة امسك خشمك ده عليك ... ياخ الجامعة كلها بقت بتقول ليها الشينة

وضحك ايهاب ضحكة طويلة

* انتي ده المزعلك طيب ح اطلع ليها اسم جديد بس لما اشوفا المرة الجاية .. المهم يارندوش لما صاحبتك الشينة تنزل . من الاجازة سلمي عليها .. اشتقنا ليها والله

ورنده بتعاين ليهو عشرة عشرة ومشا ايهاب الرشيد وهو بضحك ولا شغال بيها خلاها مغيوظة ومرارتا مفقوعة منو

* مغرور .. بس عليك

وانطلقت ضحكة ناعمة من خلف ريم عرفت صاحبتا طوالي واتلفتت ناحياتا بي فرح

* جيجي حمدالله علي السلامة

وسلمت رنده علي صديقتا سلام شديد

* كده ياجيجي تقولي اسبوعين وتغيبي شهر كامل

* عارفة بابا ماكان عاوز يخليني ارجع بالعافية اقنعتو

* ابوك ده عجيب في زول بخاف علي بتو في بلدنا

* والله لو ما خالتك روز وقفت معاي ماكنت رجعتا السنة دي ... مالو معاك ودالرشيد شايفاك بتنقي معاهو من هناك وهو عينو في عيني

* يعني كان شايفك ... ايهاب ده بتاع حركات والله ويقول لي سلمي علي صاحبتك وهو شايفك جاية علينا ..

وغمزت ليها جيهان وهي بتضحك

* رندوش قال ليك صاحبتك ولا الشينة قولي الحقيقة

وكشرت رندة

* الود ده بغيظني بي حركاتو دي

* ايهاب صاحبك واليوم كلو سوا وجنكم ما بقوم الا لما تجي سيرتي

* ايوه بحب يكاويني عارفني بزعل من سخافتو معاك

وضحكت عليها جيهان لانها عارفة انو رنده صاحبتا وايهاب اعز اصحاب في الجامعة وكان او زول عرفتو لما دخلت الجامعة ومن يوما وهم اصحاب وايهاب الرشيد من شباب هندسة

وحاليا في سنتو الرابعة اما رنده برضو في هندسة في سنة تانية وجيهان اداب في تانية برضو واتعرفت علي رنده قبل سنة وبقو اصحاب شديد وكانت بتسمع منها دايما عن ايهاب . وشافتو كم مره معاها وكان دايما بعاكسا بالكلام وبقول ليها شينة ورندا بتتضايق منو رغم انو بقولا بس عشان يخلي رنده تتحمق وتزعل

* انا ميتة من الجوع نمشي نشوف لينا ساندويتشات ناكلا

وصرخت جيهان بإعتراض

* لاااا انا عايزة فتة وبس .. خرمااااانة لي فتة

* نفسي افهم انتي جاية من وين نص عمرك في كندا وامك امريكية .. البخليك جنك فتة وفول شنو

* هههههه ماتنسي ابوي . محمد بلال سوداني نسيتي ولا شنو

* ابوك ده انا شاكة فيهو زاتو الما شاف السودان ولا مره من عشرين سنة بكون نسا السودان

* بابا معزور عمرو كلو بره وماشاف السودان الا سنة واااحدة بس ورجع كندا تاني ... كدي خلينا من بابا ... ح تظبطي الفتة ولا اشوف زول تاني يظبطا لي

* حااااضر ياجيجي امرنا لله اصلو لو ماطيرتا ليك الفتة والفول ديل في راسك مابرتاح

ضربت جيهان الفتة المزبطة وهي ومبسوطة

* والله اشتقتا ليكم وللجامعة

وقبل ما رنده ترد علي تعليقا اتفاجأت بالبيبسي بتختا علي الطربيزة القاعدين يفطرو فيها وايهاب الرشيد بعاين لي رنده في عيونا

* اها ياستي صاحبتك وصلت ودي التحية عشان عارف اسه ح تدوريها معاي وتقولي لي ماسلمتا علي ......... لي شنو

* النقط دي شنو ياود الرشيد

* النقط دي خليها لي اسم صاحبتك الجديد . عشان ماناقص زعل في الحر ده يلا كملو اكلكم و اشربو سريع عشان انا عازمكم برنامج حلو

* خلينا من البرنامج والبيبسي وحنكك ده سلم علي جيجي اول

* حااااااضر يارندوش اوامرك .. ح اسلم تاني ...

وعاين لي جيهان

* سلامات يا ..... يا ..... يا .....

وضربتو رندا علي يدو وبلهجة كلها وعيد وتهديد

* يا شنو

* ياسمحة ... اها كده مبسوطة يارندوش

* ايهاب طير من وشي سرييييع . ماعايزة اشوفك قدامي

وارتفعت ضحكات جيهان وايهاب وبقت رنده بتعاين ليهم بدهشة

* اهاااااا كمان بقيتو تضحكو علي سوا .... لااااااا ده جديد علي الموضوع ده ...

وردت جيهان علي رنده

* لا والله مافي حاجة .... كل الحكاية انو اول زول لاقيتو لما دخلت الجامعة كان ايهاب وسلم علي وجا يفتشك مخصوص عشان يقول ليك انو انا جيت وماتخافي يارنده كان محترم جدا بس شكلو داير يدورك زي عادتو

* خلو النقة وخلصو سريع ربع ساعة امشي واجيكم راجع القاكم خلصتو اكل

* انتي بالذات يارندوش لازم تحضري البرنامج ده

* برنامج شنو المجننا بيهو

* هشام وشلتو عاملين برنامج في الساحة الخضراء وعارفك جنك هشام لو فاتك البرنامج ح تموتي

* طيييب ياايهاب انا جني هشام

* آسف ياستي بتحبي البرامج البعملا هشام ... يلا بسرعة ارجع القاكم خلصتو

* اوكي

ورمي نظرة ماكرة لي جيهان وهو متحرك خلا رنده تحمر ليهو وضحكو فيها تاني

وبعد ما ايهاب مشا سألت جيهان صديقتا بإهتمام

* لسه حكاية هشام عبدالله دي ما خلصنا منها

* مالو هشام ياجيجي

* انتي مش قلتي ما ح تفكري فيهو تاني

* قلتا ايوه لكن صعب انسي الموضوع طوااالي كده

* انا ماحبيت اتكلم قدام ايهاب لكن اعملي حسابك ماتندفعي وراهو وهو ماشغال بيك

* اااخ ياجيجي انا بقيت مابتكلم معاهو .. ولو ما ايهاب ماكنت بسلم عليهو لكن هو صاحب ايهاب شديد وكمان هو ماليهو ذنب ياجيجي هو ماعارف انا متعلقة بيهو

* رندوش انتي علقتي روحك بي حبال دايبة ... اقول ليك خلينا من ده كلو ويلا نتزبط قبل ما صاحبك المستعجل ده يجي

هشام عبدالله .... اقتصاد السنة الرابعة صديق ايهاب ورندا معجبة بيهو شديد وهو حولو كتير من المعجبات وعندو شلة بعملو برامج ترفيه فيها التمثيل والغنا والشعر والفكاهة وبقو معروفين في الجامعة والشباب كلهم بحبو البرامج البعملوها ورنده معجبة بيهو شديد وماقادرة تقول ليهو حاجة لانهم ما اصحاب ومافي حاجة بتجمعم مع بعض وكمان هو ماشغال بيها وعشان شايفا طوالي مع ايهاب صاحبو ماحاول يتقرب ليها اكتر من كونها صديقة صاحبو

والبنات كانو جاهزين لما ايهاب وصل

* ياشينة العربية بتاعتك معاك

* ايوه معاي

* اوكي تمام كده ح نستغلك شوية ونخليك توصلينا

وكشرت ليهو رنده

* وين عربيتك

* سايقا هشام لانو اتأخر علي الجامعة وراكبين معاهو سيف سفيان

وابتسمت جيهان لما سمعت اسم التوأم سيف وسفيان

* كده القعدة ح تكون احلي ... ولا شنو ياااا ... شينة

سيف وسفيان توأم سيف هندسة وسفيان طب والاتنين مجانين وبعملو جو حلو في اي مكان يتواجدو فيهو واصحاب جيهان برضو

وردت علبهو جيهان

* اكيد ح تكون حلوة اصلا اي مكان فيهو سيف وسفيان بكون مبسوطة فيهو

* ياناس شكلو الشينة مكسرة فيهم

* ايهاب انت مش قلتا ح تغير الاسم ده

* هههههه مابقدر يارندوش اتعودتا عليهو خلاص .. بعدين صاحبتك زاتا اتعودت عليهو .. ولا شنو

* ولا يهمك يا ايهاب الرشيد شينة شينة ... يلا نحصل الشباب قبل ما البرنامج يبتدي

لما وصلو الساحة كان البرنامج ابتدا فعلا وهشام بغني بي صوتو الجميل والحولو فيهم البردد وراهو وفيهم البستمع ليهو بي صمت وهم مستمتعين بغناهو وصوتو الجميل ...

ووقف كل من ايهاب وجيهان ورنده يسمعو فيهو ورنده عايشة مع صوتو في عالم تاني

انتهت فقرة هشام وبدت فقرة جديدة ورنده لسه عيونا عليهو وإنتبه ابهاب انو رنده مركزه مع صاحبو شديد وهو حاسي بالحكاية دي ليهو فترة لكن رنده ماحكت ليهو حاجة رغم انها صريحة معاهو .. وميل ايهاب علي جيهان وبدون ما رنده تسمعو سألا

* حاسي انو رنده نظراتا لي هشام ماطبيعية

وردت عليهو بإستغراب مصطنع

* كيف يعني ماطبيعية

* جيهان ماتعملي فيها رايحة انتي فاهمة قصدي

* لا مافاهمة قصدك

* اوكي خليك رايحة انا مفروض ما اسألك انتي

* ايهاب من غير زعل الموضوع ده بالذات خليني بعيده منو

* تمام كده فهمتا العايز اعرفو

وقاطع كلامم عن رنده وصول فاطمة حسان واحدة من معارف جيهان ومعاها في نفس الكلية

* اهلييين ياجيجي حمدالله علي سلامتك ... وصلتي بتين

* اهليين فطومة ... وينك يابت ماظاهرة

* قاااعدة

* وين قاعدة قبل ما اسافر سألت منك مافي اي زول عارف عنك حاجة وتلفونك مقفول سافرتي مصر ولا شنو

* بحكي ليك بعدين

* في شنو يافطومة

* انتي راجعة البيت من هنا ولا عندك حاجة

* راجعة طوالي ماعندي حاجة

* اوكي خلاص بطلع معاك وبحكي ليك ... ضروري اتكلم معاك

* خلاص تمام

* يلا خليني الحق هشام قبل مايبدا ليهو برنامج تاني

* برضو هشام

* ايوه برضو هشام .. وده الموضوع العايزاك عشانو

* ماتكوني ....

* بعدين .. بعدين ياجيجي .. ح احكي ليك

وبسرعة اتحركت فاطمة ناحية هشام الكان واقف وسط مجموعة من اصحابو ومعاهم ايهاب المشا عليهم لما شاف فاطمة بتتكلم مع جيهان

وجات رنده وهي بتعاين لي فاطمة البعدت بسرعة

* جيجي البت دي لسه لاصقة فيك

* قصدك فاطمة حسان

* ايوه

* مالا معاك اول مره اشوفك بتكرهي زول كده

* انا لابكرها ولابريدا لكن مابحب وقفتا معاك .. وكمان شايفاها لاصقة لي هشام ليها فترة

* خلينا من هشام ممكن اعرف ليه ماخده منها موقف

* لانها زولة بتاعت لخبطة ... انتي ناسية حكايتا مع نسرين بت علوم وناسية انها خطفت خطيبا منها

* ده موضوع قديم يارنده ومامعروف الحقيقة شنو

* الحقيقة انها خطفت خطيب صاحبتا منها ده معناهو انها زولة ماليها امان وانا مابحب وقفتا معاك

* بتذكر كويس انها قالت انها ما كانت عارفة انو خطيب نسرين وإنها اتعرفت عليهو لما كانت في مصر ... يعني من وين ح تعرف انو ده خطيب نسرين ... انتي نفسك ماشفتيهو إلا يوم المشكلة الحصلت بينم وانتي صاحبة نسرين من

سوا وبتونسو وبضحكو وانا بعاين ليهم وجواي مقهوره

* العملتيهو ده ماصاح ولو ضربك مافي زول بقدر يلومو

* انا بشكي ليك عشان تواسيني ماعشان تلوميني

* عايزاني اقول ماكان قصدك واكذب عليك عشان ترتاحي وتكوني مبسوطة

* ماقصدتا كده

* تمام ... والمصيبة العملتيها دي ح تحليها كيف

* ماعارفة احلها كيف اعتزرتا ليهو وماقبل وماطايقني ولا طايق يشوفني

* ليهو حق ... وريا حبيبتو عملت شنو معاك

* وريتا الحقيقة وماصدقتني في البداية واتخيلت انو هشام هو المرسلني ليها ولما حست انو انا مابكذب عليها وانو انا جادة في هاجت فيني وبهدلتني هي وصاحباتا .. وسمعتا انها وحاولت ترجع ليهو لكن برضو ماعبرا لانها اتهمتو وعملت معاهو مشكلة كبيرة بدون ماتتأكد من الحقيقة

* يعني خربتيها وجاية تبكي ... والله ماعارفة اسه انتي عايزة شنو .. مادام خلاص ما ناوي يرجع لي ريا وخربتي علاقتم .. عايزة شنو منو .. يسامحك ولا يحبك ولا شنو مافاهماك يافاطمة

* انا زاتي مافاهمة حاجة بس ماعايزا اشوف في عيونو نظرة اللوم والإحتقار

* هو معزور ... وانتي مهما عملتي مستحيل بين يوم وليلة قلبو بصفا من ناحيتك .. ابعدي عنو وماتجري وراهو وكفاية الحصل لحدي هنا

* يعني ابعد عنو

* اكيد .... ولو عايزة نصيحتي .. ياريت تاني ماتدخلي بين الناس وتخربي حياتم كفاية لحدي هنا

* قصدك شنو بالكلام ده

* قصدي واضح زمان كنت مصدقة لما قلتي انك ماكنتي عارفة انو هاني خطيب نسرين .. لكن بعد موضوع هشام عبدالله بقيت شاكة فيك ... شكلو بحلا ليك حق الناس

* جيجي ليه بتقولي كده

* احسن اقولو في وشك من تسمعيهو . وراك .

* انتي صاحبتي ولا عدوتي

* من الليلة لو عاوزة صداقتنا تستمر غيري طريقتك دي ولا انسي انك بتعرفي جيهان بلال لانو بالجد ح اخليك تشوفي وش ما شفتيهو قبل كده ....

ن

* انا حزرتك منها وانتي حره يلا ... انا لازم امشي ايهاب ح يوصلني

* مالك طالعة بدري ماكنتي مبسوطة بالبرنامج

* خليها لي بعدين .. اسه لازم امشي

* اوكي انا شوية وبمشي برضو بس اشوف سيف وسفيان ما سلمتا عليهم لسه ..

* تمام ... يلا اشوفك بكره

وجا ايهاب ودعا ولاحظ توتر رنده المشت قبلو علي العربيةوعاين لي جيهان بي تساؤل

* رنده احوالا غريبة فجأة غيرت رايا واصرت إلا نمشي

* ماعارفة هي مابترتاح لي فاطمة حسان وشكلا زعلت لما شافتا معاي

* فاطمة حسان ... وانتي البلمك معاها شنو

* انت برضو

* جيجي البت دي ابعدي منها احسن

* نفس كلام رنده

* انا ماعارف رنده قالت ليك شنو لكن لو عايزة تعرفي انا لي قلتا ليك كده اديني كول بعدين وانا بفهمك لكن ده كلام سر ولو ما انتي بتهميني مابقولو ليك

* سافرتا وجيت لقيت كلامكم كلو ألغاز .. حيرتوني معاكم

* خلاص بعدين بكلم ياشينة خليني الحق صاحبتك قبل ما تزعل مني

* اوكي لحدي بعدين

ومشت تفتش علي سيف وسفيان وكانو واقفين مع هشام الكان بعاين ناحية فاطمة بغضب ظاهر علي وشو وبتكلم مع سيف وسفيان وبشاور ناحية فاطمة حسان وجات فاطمة تتكلم معاهم وسحبها هشام من يدها وبعدو بعيد وخلو سيف وسفيان واقفين براهم

شوف ياسيف الجاية علينا دي منو

* لااااا ماممكن جيهان بلال

وسلم التوأم علي جيهان سلام حار

* عرفناك ماعندك كلمة ... دي الاسبوعين بتاعتك ... تجينا بعد شهر

* كملت النوم شوف جاية سمحة كيف

وضحكت جيهان علي كلام التوأم سيف وسفيان

* كويس اني جيت السنة دي

* اكييد دي حركات محمد بلال اصلو من ما يشوفك قدامو تاني مابفكك

التوأم سيف وسفيان اصحاب جيهان من فترة طويلة وابوهم . عبدالرحمن صديق ابوها ولما نزلت السودان للدراسة ساعدوها في التسجيل للجامعة وبقت متواصلة معاهم طوالي

* ههههههه والله ابوي نفسو ما ارجع لكن انا بحب السودان

* بتحبي السخانة ... الناس بتجري منها وانتي بتجيها جري

* ماتاكلوني بالكلام ... وروني الفلم الحاصل من شوية ده فهمو شنو

وبقا سفيان يعاين لي سيف

* اسمعو .. ماتقعدو تعاينو لي بعض وتفتشو في الكلام ... في حاجة حاصلة بين هشام عبدالله وفاطمة حسان ... وانتو عارفين فاطمة صاحبتي

وردا عليها سيف

* لو صاحبتك بالجد خليها تبعد عن هشام ...

* برضو ما قلتو لي مالا معاهو

* فاطمة حسان بتاعت مشاكل وبراها بتجيب لي روحا الكلام

.... اهي جاية وشها مقلوب

وفعلا جات فاطمة عليها ووشها كلو دموع ومحمر وهشام واقف بعيد يعاين لي وهو غضبان وفاطمة بتحاول تمسح في دموعا النزلت غصب عنها

* جيجي خلينا نمشي انا كرهتا المكان ده .... خلينا نمشي بسرعة

وودعت التوأم الكانو بعاينو لي فاطمة بطريق ساخرة وجيهان بقت متحيرة من الافلام الهي شايفاها من ماوصلت دي ومافاهمة فيها حاجة

طول الطريق وفاطمة بتبكي وجيهان ماقادرة تفهم منها حاجة

* ماممكن البكا ده ... عيونك بتتقدا كفاية كده ارحمي نفسك

* خليني ابكي ... براي جبتو لي نفسي

* فهميني الحصل شنو .. مالك مع هشام عبدالله

وفاطمة ساكتة بدون ماتقول اي حاجة .. وبعد فترة بدت تتكلم

* انا براي جبتو لي نفسي

* خلي البكا وفهميني مالك . هشام عبدالله عمل ليك شنو

* هشام ماعمل حاجة .. انا العملتا وجبتو لي نفسي

* كدي اسكتي وفهميني الحصل شنو براحة وبدون بكا يمكن اقدر اساعدك

انتي عارفة انو هشام عاجبني زي بنات كتار في الجامعة وحاولتا الفت انتباهو كتير لكن ما عبرني وعرفتا انو بحب واحدة برلومة من اهل العوض ديل

* حرام عليك ... ماتقولي علي البت كده

* لما لقيتو ما شغال بي بديت اخش في شلتو لحدي ماصاحبتهم كلهم وهو كمان بقا شوية شوية يتكلم معاي وبدل ما اصبر شوية لقيت نفسي بقول ليهو انا معجبة بيك وماخلاني اكمل كلامي واعتزر لي وقال انو مرتبط بي واحده اسمها ريا وح يخطبا بعد الامتحانات ماتخلص ... تصدقي اسمها ريا شفتي ذوقو بلدي كيف

* والزعل ده كلو عشان هو بحب زولة بسبطة ومابحبك انتي ... والله يافاطمة انتي ماعندك حق

* ياريت لو وقفت علي كده انا غلطتا في حقو وماعارفة اتصرف كيف

* مالك عملتي شنو

* لما لقيتو رجع تاني يطنشني وماشغال بي وشايفاهو طالع و ونازل مع حبيبتو .... الفتا قصة وكذبتا علي ريا وقلتا ليها انو انا وهشام متزوجين عرفي وهو خلاني عشانا وانو ح يلعب بيها ويرميها زي ما رماني

* ده شنو ... حرام عليك ياخي .. معقولة تعملي كده ... مافي زول عاقل بعمل عملتك دي .. واوعا تكون البت دي صدقتك

* ايوه صدقتني لاني وريتا ورقة بتقول اننا متزوجين عرفي ... وهي عملت لي هشام مشكلة ونبذتو قدام اصحابو وضربتو كف وخلتو واقف وهو مافاهم اي حاجة ومشت ورفضت تتكلم معاهو او تسمع منو اي حاجة ورفضت اي وساطة بيناتم . لحدي مافي زول وصل ليهو الكلام القلتو لي ريا كلو بي ضبانتو شكلها واحدة من صاحباتا وهو جا كورك معاي وهو غضبان وقال لي ماعاوز اشوف وشك تاني ... والله ياجيجي حسيت انو قرب يضربني لو ما اتمالك نفسو

* بالغتي ... دي عملة تعمليها معقولة عشان تاخدي حاجة ماليك تشوهي سمعة الولد وتطفشي منو البت البحبها

* ماقدرتا اشوفم مبسوطين