الفصل الرابع عشر

قال ليهو عندي صاحبأ لي في عطبرة.. اسمو عبدالمنعم .. خطيبتو اسمها نبيهة .. والله تقول البت دي تومتها شدة مابتشبها .. لامن انا براي قلبي فراني ..

قال ليهو والله لكن صاحبك معناها.. عندو ذوق رفيع في الاختيار ..

قال ليهو انت ماشفت ندى ..

قال ليهو ندى دي منو يا الامين؟ قال ليهو ندى صاحبتها ..

قال ليهو طيب احكي لي يا الامين .. الظاهر عليك عندك كفاوي في عطبرة مع الجنس اللطيف ..

قال ليهو يازول بس الواحد يقول الحمد لله .. العبد مسير وماعارف القدر بوديهو على وين ..

اها بعد الامين اطمأن على ايمان.. وانها بقت الحمد في امن وامان ..

تاني يوم طوالي اتصل على عمر.. بتاع الاتصالات الفي سوق عطبرة .. وقال ليهو بلغ عطية .. قول ليهو ايمان طلع عندها خراج .. وماشة في العلاج كويس الحمد لله ..

الامين طبعا" نص القروش المعاهو انقرضت بدون عملية .. لكن برضو راضي وفرحان بي عافية مرتو .. ولسع ماعارفين جواهو شنو بالنسبة للبت الاسمها ندى الفي عطبرة ..

اخدو الايام المفروض ياخدوهن للعلاج.. وبعد اسبوعين فقط مشو المقابلة للدكتور .. والدكتور قال ليهم الموضوع انتهى تماما .. الحمد لله .. وتاني مافي خوف .. ووقف منها العلاج ..

وخلاص بقو في ترتيبات السفر لي عطبرة .. ...

وفي عطبرة هناك في حاجات كتيرة حاصلة .. اول حاجة عبدالمنعم القمرتي الفي بيت العذابة .. عرف انو الدكان بتاع الامين اتباع.. واتقفل لاجل غير مسمى .. قام لاقى عطية .. وسألو عن الحاصل على الامين بالضبط شنو .. وعطية حكا ليهو ..

قال ليهو طبعا الزول ده حصل عليهو كيت كيت .. وهسي هو مع زوجتو في الخرطوم في العلاج ..

عبدالمنعم طبعا طوالي مشى كلم نبيهة .. نبيهة حكت لي ندى ..

ندى قالت ليها.. لو مرتو المغفلة عارفة انو بلعب بي وراها .. وبلاقيني كانت طلقتو ..

لكن انا ما بسكت.. بتجي وبعرف بيتها .. وبمشي ليها .. وبحكي ليها .. اصبري لي ليهو ساي .. الكضاب الغشاش المخادع .. والله انا مغلولة عليهو جنس غل ..

نبيهة قالت ليها انتي اتسرعتي براك .. شنو يعني معرس؟ .. والله انا كان في محلك .. كنت اقول ليهو يازول ولايهمك.. الراجل محللات ليهو اربعة .. وانا قبلانة .. انتي ياندى هسي راجل المراة.. ما اخير من البورة النحن فيها دي؟

قالت ليها والله يانبيهة.. اقول ليك حاجة؟؟ وحات الله انا الامين بقدر ما اني زعلانة انو غشاني.. برضو ندمانة اني خليتو..

وفعلا حسيت اني اتسرعت .. لكن كرامتي مانعاني امشي اتكلم معاهو تاني .. هسي كمان قلتو باع الدكان.. ومشى يعالج مرتو في الخرطوم .. يعني انا كنت ح اتجهجه مع علاج المراة..

غايتو والله ماعارفة ذاتو القدر مودينا وين. انتي هسي رايك شنو؟ امشي احكي لي مرتو.. انو كان عندو معاي علاقة وبحبني .. واحكي ليها التفاصيل.. بتاعة القمار القالا لينا عبدالمنعم؟؟ ..

ولا احسن اخش فيهو هو.. واصلح علاقتي معاهو.. واعرسو بي مرتو .؟؟

انا متأكدة لو رجعتا ليهو.. هو ماعندو اي مانع .. وحيتزوجني واثقة من الحتة دي .. هو اصلا بموت فيني عديل كدا ..

نبيهة قالت ليها لو دايرة راي .. مافي داعي تعملي فتنة بين الراجل ومرتو .. اساسا انتي لو عرستيهو هي براها بتطلقو .. نسوان الجيهة الكدي ديل .. الواحدة مابتقعد مع الراجل البعرس فوقا .. والله واحدات بكتلنو عديل .. جنهن وجن العرس ده ...

بس انتي لو بتقدري ترجعي معاهو علاقتك .. مافي اي داعي لي فتن وغلاغل .. خليك بت حلال ومحضر خير وعرسيهو وخلاص kiki emoticon

قالت ليها والله يانبيهة كلامك صاح .. انا نفسي والله ارجع علاقتي مع الامين .. والله فقدتو بي حماقتي وعوارتي .. لكن يانبيهة انا مابقدر ارجع ليهو براي تاني.. يقوم يقول البت دي ساكاني .. ويقول عني خفيفة ولفيفة ..

نبيهة قالت ليها انتي بس خلي الموضوع ده علي.. خليهو يجي راجع .. وانا بظبط ليك الموضوع ده ..

قالت ليها الله يخليك لي يانبيهه.. ومايحرمني منك ياحبيبة عمري .. نبيهة قالت ليها بس يا ندى.. انا طالبة منك طلب .. كل الخطوات العايزين نقوم بيها عبدالمنعم مايكون عارفها .. حتى مايعرف علاقتك رجعت مع الامين ..

قالت ليها ليه انتي بتقولي كدي يا نبيهة؟؟ موش عبد المنعم هو حبيبك؟

قالت ليها عبدالمنعم حاقد والله .. انتي ماعارفاهو ساي.. والله كان منى عينو.. انو يقطع العلاقة البينك وبين الامين .. وسعى للموضوع ده بكل مايملك.. ولو ما انتهت العلاقة دي .. ما كان ارتاح..

قالت ليها بس تفتكري السبب شنو يانبيهة..؟ انا عبد المنعم بحترمو وبقدرو شديد .. ليه بعمل فيني كدا يعني ..

قالت ليها لالا ماقاصدك انتي.. هو قاصد الامين .. لانو عارف الامين ميت بي حبك .. بس كان عايز يعوقو ويحرمو منك .. وفعلا قدر على الموضوع ده.. وعلاقتكم انقطعت .. بس هسي مافي داعي للكلام البتقولي فيهو ده.. وصيتي ليك دي ماتنسيها .. عبد المنعم مااايعرف.انتي بتهميني اكتر من عبدالمنعم وقبيلتو ..

فاهمة ولالا .. قالت ليها فاهمة يانبيهة .. وبقن منتظرات الامين لمن يجي من الخرطوم ..

الايام مرت .. وناس الامين بكرا المفروض يقومو عطبرة خلاص ..

لكن الصافي بم انو عرف غالبية اولاد الجيران .. الكانو مبسوطين منو ..

قال لابوهو يا ابوي انا عندي صاحبي اسمو مصعب.. في الشارع التاني ده بي جاي .. قال عازمني فطور بكره امشي ليهو؟

ابوهو ما اهتم بالموضوع .. كان مشغول بصلح ليهو في الرباط بتاع جزمتو .. ايمان انتبهت لكلام الصافي .. ردت عليهو قالت ليهو تمشي ليهو طوالي يا الصافي .. الزول البعزمك تمشي ليهو .. عشان انت لو عزمتو يجيك .. وانت مسافر منهم الناس ديل.. خليهم يتذكروك بي ذكرة طيبة .. لمن تمشي منهم .. بترضى لمن تمشي يقولو الصافي المفتري عزمناهو ابا يجينا؟ بترضى؟ ..

قال ليها لالا مابرضى.. قالت ليهو خلاص تمشي تكلم مصعب.. تقول ليهو انا باكر بجيك كلمت امي وابوي ..

الامين فجأة كدا انتبه .. قال ليها اسمعي دقيقة دقيقة.. نحن موش متفقين نسافر بكرة؟

قالت ليهو لالا ما مشكلة.. نتأخر يوم واحد .. عشان الصافي ما يقصر في اصحابو .. قال ليها يا ايمان عليك الله ما تعلمي لي الولد على الدلع وتنفيذ الطلبات ..

قالت ليهو انت ماتنظر ليها من الناحية دي .. انظر ليها من ناحية انو الصافي يعرف.. انو تقدير الناس مهم .. وممكن الزول يأجل عشانو السفر ..

انت فاهمني يا الامين صاح.. الصافي قال ليها ايوة صااح انا فاهمك .. موش يا امي قلتي لي .. والزول البحترم الناس الناس بحترموه والزول الحقار الناس بحتقروه ..

وانا لو مشيت لمصعب بكون بحترمه ..

الامين قال ليهو خلاص خلاص .. امشي ليهو ماتجيبو لي عشراقه انت وامك ..

وزي ما ملاحظين .. مازالت ايمان تزرع في القيم في روح الصافي .. ولو على حساب وقتها وسفرها ومصلحتها .. اكتر حاجة تخلي الولد يشعر بالمسؤلية .. هي انك تعاملو معاملة زول كبير .. وتحسسو بالاحترام والتقدير .. والحكاية دي دايرة صبر وضغط شديد للنفس ..

المهم الصافي بكرة لبس واتظبط تب .. وماشى لاصحابو عشان يفطر معاهم .. امو قالت ليهو امشي معاك اوصلك ليهم؟؟ ..

قال ليها لالا .. البيت قريب .. وهو مصعب ذاتو بجيني برة .. هنا جمب الباب .. وانا بمشي معاهو .. مصعب عمرو تقريبا 11 سنة واخوهو اصغر منو في حدود 8 سنة سمه حذيفة تقريبا .. المهم جوهو الاتنين .. ودقو الباب وقالو نحن دايرين الصافي عشان يفطر معانا

الصافي مشى ليهم واتعرف على الاسرة كلها .. واتونس مع امهم وابوهم .. واداهم اخبار عطبرة .. وكان مندهشين من الولد في سن اقل من عشرة سنة .. وبتكلم بي وعي ولباقة اكتر من الناس الكبار..

ومشى منهم وترك الصافي بصمة لاتمحى في شمبات وخصوصا في اسرة مصعب وحذيفة ..

على كل باكر الصباح ودعو ناس البيت .. واتحركو على البلد وبعد داك بمشو عطبرة ..

اول من وصلو البلد .. كانت الفرحة ظاهرة فوق ابو ايمان .. وعمل ليها كرامة تاني .. وطبعا زي ماعارفين ناس البلد مافي حاجة بتندس عليهم .. ناس البلد كلهم عارفين انو ايمان جاها سرطان في الراس.. وسافرت الخرطوم للعلاج .. ولمن عرفو انو الفحص طلع نضيف

جو كلهم يحمدو ليها السلامة .. والحاج ابو ايمان دعاهم طوالي لي كرامة ..

ناس البلد ديل طبايعهم غريبة وعجيبة .. عندهم تكافل غريب ..

اول من عرفو انو ايمان طلعت سليمة.. تعال شوف الحصل .. حاج التوم جاب خروف .. وعمر ود السيد جاب خروف .. وبابكر النور جاب شوال سكر .. والطيب عبدو جاب شوال بصل .. وجركانة زيت

وكيس لبن كبير وكبابي شاي .. وفلان جاب شنو .. وفان جاب شنو

يعني اي زول جاب حاجة.. لدرجة تحيرك ذاتو.. الحاجات دي اتردمت تفتح ليها دكان اجمالي ..

والحاج ابو ايمان ماخسر اي حاجة في كرامة ايمان .. بالعكس الكرامة انتهت والحاجات نصها راقد .. وكم خروف مربوطات لسع في الزريبة بتاعة البهايم ..

وديل اهلي .. (عندكم في المدينة في حاجة زي دي؟) kiki emoticon ما اظن .. وقال طارق اللبيب ..

الجود والتكافل ونجدة المحتاج ..

بتلقاهن هناك عندناس بشدو الصاج.

صبارين على اللهب البقوم هواج.

نفوسو طيبة زي مسك المداين قاج.

الكرم في الريف السوداني شي يحير العقول .. في الشرق او الغرب او الشمال اوجنوب كلما بعدت من المدن .. تزداد حيرتك من الصفات العجيبة.. والسمات النادرة .. فالمدن دايما مسكونة بالتناقضات .. وعدم الامن والجفاء وتسكنها الخيانة والانانية ..

الا من رحم ربي ..

بعد الكرامة الاتعملت في البلد .. سافر الامين واولادو يوم الاربعا

في نص الشهر .. الى عطبرة وايضا الى مصير مجهول ..

القروش المعاهو مابتعمل حاجة .. ولمن وصلو الشمالي في عطبرة .. كل الجيران سمعو بيهم.. وبرضو جو واجتمعو.. وكانت فرحة لانهم كانو عارفين الحاصل برضو ..

والامين واسرتو منتظراهم تحديات كبيرة.. هم ماعارفينها .. وهي الشغل ومصدر الرزق .. والنية المبيته من البنت الاسمها ندى ..

وحاجات كدا تجيب الهم .. والامين طبعا همو الاول والاخير يوفر مصدر رزق لي اولادو ..

اها اول شي فكر فيهو .. بعد اولادو وصلو بالسلامة.. عطية

الضهر كدا مشى على السوق .. وسأل من عطية قالو ليهو عطية سافر الخميس الخرطوم ... وتاني ماجاي لانو مواعيد سفرو للسعودية جات خلاص .. والامين حسه بي عطبرة غريبة .. الزول الوحيد البطمئن ليهو .. وضراعو اليمين .. سافر خلاص ودع البلد.. ياحليلو ..

احساس غريب.. عندما يسافر صديقك الوحيد .. من بلد انت فيها غريب.. وبقى مافي قدامو غير يمشي يٍسأل من عبدالمنعم في بيت العذابة .. ويسلم عليهو يشوف اخبارو شنو؟

والامين بقى يعاين لي دكانو مقفول .. وعطية مافيش .. والبلد بقت ليهو مسيخة وغريبة .. وخنقتو عبرة ..

وقال ..

مالك يا بلاد الاكرمين حزنانه ؟؟..

بالهم والكروب متدربكه ومليانة ..

وينو الكان معاي ساند يميني اعانه ؟..

وينو عطية وين يا عطبرة الحردانه...

وقام ماشي على بيت العذابة وجواهو الف صوت يمنعو من المشي

وهو ماشي وربنا يجيب العواقب سليمة ..

الى اللقاء ..