الفصل الثاني والعشرون

رقية قالت ليهو اتكلم ياحمودي .. انا ما ح اكتلك ولا ح اهبشك .. اتكلم قول الحقيقة وماتخاف .. انت شفت منو الشال الدهب من دولابي .. قال ليها عمو الصافي .. ما فتح الدولاب وحاجة .. يا امي الاستاذ قال لينا الدهب بعمل فتنة بين الاخوان. وقال الفتنة اشد من الموت. وانا جيت شلت الدهب الفي بيتنا عشان ارميهو في السايفون .. لقيت الحمام مقفول .. ماقدرت افتحو.

بس جدعتو في راس الحمام ..

قالت ليهو متين عملت كدا؟ .. قال ليها لمن انتي وخالتو بهية مشيتو ..

قام الصافي مسك الولد .. قال ليهو انت ولد بطل لانك اتكلمت بالحقيقة .. بس تاني ماتكذب .. ومهما زول هددك وخوفك ماتحلف بالكذب .. كدا ربنا بوديك النار.

رقية قامت محرجة ودخلت جوة .. ودخلت اوضتها .. وقفلت عليها الباب.. ولا انتظرت تشوف دهبها .. وخالد طلع بره مشى على الحيطة وخت رجلو في الوضاية .. ونط في الحيطة وطلع راس الحمام .. ولقى السلسل وخاتم واحد .. والتاني ما اتلقى ..

نزل من فوق شايل السلسل والخاتم ..

وايمان متمتحنة .. وماقادرة تتكلم .. والامين يعاين لي احمد .. في وشو

والصافي ساق الولد الاسمو حمودي .. قال ليهو يلا عشان اديك الهدية الوعدتك بيها .. ولا عاين للدهب النزلوهو من فوق .. قال لي حمودي عاين .. انت الرشيد صاحبك .. ح تسيبو ولانسوقو معانا نشتري ليهو هدية؟؟ ..

قال ليهو نسوقو معانا ونسوق امجد ..

ساقهم التلاتة وطلعو على الدكان .. الصافي عملا مخصوص عشان مايشوف احراج الناس ديل .. وجوده معاهم يضايق مشاعرهم ..

والامين مين مراقب احمد .. واحمد بس مدنقر في الواطة .. وماعارف يقول شنو؟ ولا عارف يعتذر كيف؟ ..

قام قال ليهو عارف يا الامين .. طبعا البت دي طوااالي طبايعها

يهدي.. وحركاتها .. وده السبب الجاب ليها الطلاق ..

المراة دي بتشك في راجلها .. وفي امو وفي اخواتو .. وقالت هم اكبر اعداء بالنسبة لي ..

وقالت راجلا خاين .. واستحملو منها كتير .. في النهاية الراجل جا جدعها لينا هنا وفات .. يعني الشي البتعمل فيهو ده .. ماجايباهو جديد.. وانا والله لو مامحترمكم انتو .. كنت اقوم عليها هسي اخلي بطنها وضهرها واحد بالدق .. لكن نحن طبعا من عادتنا .. كان عاقبتا ولدك او اخوك قدام ضيف .. معناها ماعندك احترام للضيف ..

لكن انا مابسيبها .. بس انتو تمشو .. وانا بعرف بعمل فيها شنو ؟؟

ايمان قامت حصلتها جوة .. لقتها قافلة باب الاووضة عليها .. دقت ليها الباب ..

رقية من جوة قالت .. منوووووو؟؟

قالت ليها انا ايمان يارقية افتحي الباب .. شنو يعني مادايرة تودعينا؟؟

.. ماخلاص الحصل حصل .. والحمد لله .. اتحلا اللغز وبالنا هدأ ..

رقية فتحت الباب فتحة صغيرة كدا. .. ومدت ليها سلسلها ,,

ايمان قالت ليها والله انا ماجاياك عشان السلسل .. تعالي طالعة ماتبقى عويرة .. انا موش اختك الكبيرة؟.. اسمعي الكلام ..

يعني شنو مضايقة كدي ؟؟ انتي ح تعلمي الغيب؟ .. ماخلاص الشافع صغير .. والحصل حصل .. اطلعي بره ودعينا .. نحن سايقين الصافي وماشين .. قالت ليها امسكي مني السلسل يا ايمان .. وبعدين نتفاهم .. امسكي هاك ..

ايمان شالت السلسل منها .. وقالت ليها طيب اطلعي يارقية ..

قالت ليها ايمان لو سمحتي .. امشي انا ماعندي وشي اقابلكم بيهو تاني ..

ابت كلو كلو تطلع ..

ايمان جات راجعة للصالون .. والامين قال لي احمد اسمعني يا احمد .. انا اصلا ماعايزك تهبشها بي يدك.. دي مراة واولادها بقو حايمين .. بس كل العايزو منك ..

عايزك تعذرني .. انا تاني مابخلي الصافي ولدي يقعد في البيت ده.. وصية امك نفذناها .. وكنا ح نكمل الفترة..

لكن مادام جابت ليها اتهامات .. انا تاني ولدي مابخليهو هنا..

احمد قال ليهو اسمع يا الامين.. دي اخر مرة .. تاني لو حصلت حاجة انا مسؤول .. الصافي هنا خاف انو ابوهو يوافق على حكاية يقعد تاني دي .. ايمان قالت ليهو ده مستحيل يا احمد ..

خلاص لحدي هنا ؟؟ نحن يا احمد اهل .. وعشان علاقاتنا ماتتخرب .. خلو الصافي يمشي لحتة ياخد فيها راحتو ..

احمد قال ليها .. ايمان لو سمحتي .. ممكن تديني فرصة اكمل كلامي مع الامين؟؟ .. الامين قال ليهو هي برضها امو .. وليها الحق تتكلم عن ولدها .. اسمعني يا احمد .. علي الطلاق تاني الصافي تاني مابقعد بي وراي هنا ولادقيقة ..

بس يجيكم زيارات زيو وزي الضيوف .. قوم يا الصافي لم هدومك ديل ختهن في العربية .. خلينا نتخارج من هنا .. مايقومو يقولو لينا سرقتو حاجة تاني ..

طبعا الامين شايلو تقيل .. وايمان شبه عاديه .. لكن ماعادية .. والصافي ماشغال بالموضوع ..

لاقبل البراءة ولابعد البراءة .. كانو ماهو المقصود .. وشايف ابوهو متضايق جدا ..

بعد ركبو في العربية .. الصافي قال لي ابوهو .. دقيقة يا ابوي..

ماتمشي نسيت حاجة مهمة اجيبها واجي.. نزل جرى دخل جوة .. قال لي خالد عليك الله تعال معاي جوه .. انا عايز اودع خالاتي .. سريع تعال ..

قام خالد معاهو ودخلو على بيت الحريم .. الصافي قال ليها يا بهية .. انا والله عاجز عن الشكر .. واصلا المشاكل بتحصل في كل بيت .. الموضوع ماتخلوهو يأثر على علاقتنا ..

وينا خالتي رقية؟؟ .. قالت ليهو جوة في اوضتها ..

قال ليها مالا مقفولة .. ؟؟ لزا الباب كدا .. لقى الباب مقفول من جوة ..

قال ليها ياخالتي رقية ؟؟ اها في امان الله .. انا ماشي .. وانا شاكر ليكم كل الفترة الاخدتها معاكم. وان شاء الله مابنقطع .. اصلو ماردت ليهو .. سكت مسافة .. وكت ماردت .. قال ليها فتك بي عافية .. وطلع على الشارع..

لمن داير يركب في العربية .. حمودي جاهو جاري بره .. قال ليهو عمو الصافي انت ماشي؟ الصافي قبل مايركب وقف يسمع في الولد .. قال ليهو ايوه يا حمودي.. لكن بجيكم ان شاء الله ..

قال ليهو لكن انت شلت شنطتك .. عارفك ماح تجي تاني .. عشان شاكلوك .. لكن انا كلمتهم انت ما الحرامي .. ليه قالو ليك امشي ..

الصافي قال ليهو لالا يا حمودي .. انا ابوي قال لي ارح.. ناس امك ماطردوني ..

الامين قال ليهو ياااالصافي عليك الله اركب .. سيب الشافع .. انت ماعندك موضوع ولاشنو؟ بدل ماتديهو كف عشان يتربى .. تقعد تتعاور معاهو كدي؟؟ .. الصافي خت يدو فوق راس حمودي كدا وركب .. والعربية اتحركت

الصافي قال لي ابوهو يا ابوي الاطفال ديل نعمة .. وماعليهم غلط ربنا رفع عنهم القلم .. براهو يكبر ويعرف الصح من الغلط ان شاء الله .. والصافي هنا خت يدو فوق كتف امو الراكبة قدامو في الكرسي وقال .. بكرة يكبر ويبقى فاهم .. بكرة يكبر ويبقى فاهم .. انا حمودي ده حاسي انو ح يطلع زول ليهو شنة ورنه ..

ايمان عاينت للصافي وتتبسم .. والرشيد راكب معاهو ورا طبعا .. وبيدو بداعب في شعر الرشيد السبيبي وفيهو حبة حمرة كدا .. زي شعر الصافي وده اصلا شبه شعرالامين .. ايمان شعرا اسود طويل وزيها بسمة ..

طيب الناس ديل ماشين وين .. ماسألو ابوهم .. وابوهم ماكلمهم الا بعد قطع كوبري بحري داخل على الخرطوم .. قال لي الصافي اول حاجة يا الصافي .. نحن نمشي نأجر ليك شقة .. ولانص بيت قدرك .. بس لازم يكون قريب للجامعة .. يعني جامعتك الشفتها انا دي .. من شمبات دي بتسل روحك لمن تصل .. قال ليهو والله صدقت يا ابوي .. انا بركب تلاتة مواصلات ..

ماشي وتلات جاي .. وانت عارف الصباحية وزحمتها هنا كيف .. والضهرية كمان .. والمواصلات كلها ازعاجات وتصرفات مالايقة ..

قال ليهو نحن نشوف ليك سكن تجي الجامعة بي كرعيك ان شاء الله قول ربنا يوفقنا ..

الان يوم السبت زي الساعة 2 وشوية ..

مشو الصحافة يسألو من مكاتب العقارات .. نحن ياجماعة نخليهم

و نرجع نشوف الحاصل في بيت ناس الملكة ام ناس رقية ..

طبعا رقية طلعت بعد الجماعة فاتو وبكت بكا .. وتشيل وتدعي على حمودي البريء .. الله ينتقم منك يا ولدة الشر .. انت اصلك فقر زي ابوك .. الله يكتلك ويريحني منك .. والله الزول هسي يقوم يشق لك راسك بالحديدة الشايلا دي ..

بهية بتقول ليها هو ذنبو شنو؟ انا قلت ليك استعجلتي؟؟ وانتي ماسمعتي الكلام .. قالت ليها اسكتي يابهية .. انتي ذاتك النشطيني وقلتي لي غير الصافي مافي زول بكون شالو ..

وووب علي يابهية من الخاتم الراح .. الخاتم الكبير الاحسن من ده .. هسع الشافع ده كان سكت .. لامن هم فاتو .. وكلمني بي محل الدهب ما كان احسن ..

حمودي سمعها .. قال ليها لكن الرشيد قال لي لو ابيت تتكلم امك بتموت ..

عشان انت ظالم .. احسن تستحمل الدقة وامك ماتموت .. وانا قلت ليهو خلاص بكلمهم براي .. قال لي جيب يدك .. واوعدني وانا بوعدك مابخليهم يدقوك .. لو امك عايزة تدقك انا بشيل منها السوط وبجري ..

رقية قالت ليهو يا البليد يا الغبي .. هسع عليك الله الرشيد موش قدرك في العمر؟ يغشك؟؟ .. !! قال ليها ماغشاني .. انتي قبيل كنت بتكحي .. وهو قال اها عاين امك ربنا داير يخنقها .. امشي سريع كلمهم .. وبهية تضحك .. وخاتة يدها فوق خشمها .. وايمان تعضعض في يديها ممغوسة على الولد ..

بهية قالت ليها انتي ماتزعلي .. كان هدفك من البداية انو الصافي يفوت ويهودا فات .. قالت ليها فات بعد شنو .. بعد ما انزليت واتهنت قدامهم كلهم .. وفقدت كرامتي قدام اخواني .. والله اتمنيت الواطة تنشق وتبلعني .. انا ياريتني لو ماضربت ليهم عشان يجو ..

الكلام ده كلو واحمد وخالد قاعدين في الصالون بتكلمو ..

احمد قال ليهو عليك الله ياخالد شوف رقية دي اهانتنا كيف والله ماعرفت اودي وشي وين ؟؟

قال ليهو والله يا احمد .. انا قلت ليها مستحيل الصافي يشيل حاجة ..

لكن هي اظنها بس بتكرهو ساي كدي .. وقبل كدا عملت معاهو شمطة .. وشتمتو قدامي .. وهو ساكت يعاين في الواطة .. ابت تسكت لامن انا فكيت فيها الكوز .. واتخيل في شنو؟

عشان الصافي نسى نور الحمام فاتح .. ومن الشكلة ديك الصافي بقى يدفع قروش الكهربا من مصاريف الجامعة .. لامن انا شاكلتو وحلفت عليهو ..

قال ليهو والله العظيم المخلوقة دي ح تجيب لي ضغط .. زولة عندها نفسيات وبغض جواها غريب .. وشكوك.. وسوادة نية .. ماعارف الزول يتصرف معاها كيف ؟؟

قال ليهو انساها .. وعارف احسن دواء ليها شنو .. اصلك ماتتكلم معاها ..

خليها تموت بي حسرتها .. لو مشيت شاكلتها بتفشها .. انا شخصيا بقاطعها تاني سلام مابديها ليهو.

احمد قال ليهو والله الكلام ده ولا يأثر معاها .. دي انسانة متبلدة وشعورها ميت .. هسي عليك الله اعتذار ماتعتذر .. ولاتتاسف من الاتهام اعوذ بالله .. والله كان ده انا كنت مسكت للصافي في رجليهو عشان يسامحني .. غايتو في اصناف كدا غريبة من الشخصيات .. ربنا يصبرنا عليها .. لكن اقول ليك ولافي داعي اتكلم معاها .. بنظمها ليك بالمقاطعة الكلبة .. وركب عربيتو ومشى ..

خالد نادى بهية جمب الباب بتاع النص .. وقال ليها احمد مشى زعلان زعل .. احتمال يعمل حادث بي عربيتو .. وانا بكون جاني سكري .. ونحن بقينا مارجال قدام الامين .. رقية سودت وشنا .. لا انا لا احمد تاني رقية ما اختنا ولابنعرفا .. عندنا اخت واحدة .. اوعك تاني رقية تعمل لي اكل بيديها الخبثات ديل .. ورقية في الوقت ده كانت واقفة بتسمع في كلام خالد .. اتكلم بي حرقة لامن بكا ..

اها يازوول ناس الصافي هناك لقو ليهم شقة قريب للجامعة.. في عمارة في الطابق التاني .. والامين دفع فيها مقدم ستة شهور .. وختو فيها حاجات الصافي .. و قفلوها وشالو مفاتيحها .. ومشو لي جماعة اصحاب الامين في امدرمان بانت .. قال ليهو انا اتصلت على بكري عمر صاحبي في بانت .. ناخد معاهم اليوم ده ونبيت وباكر نخلي معاهم الاولاد ونجي نجهز الشقة دي انا وانت .. الصافي قال ليهو ربنا يخليك يا ابوي.. ويخدر ضراعك والله كدي ريحتني راحة .. كدا الزول يقرا بي مزاج .. قول لي ناس الدفعة جاكم بلا هههه ..

لمن مشو على امدرمان .. كان الزمن قريب المغرب من يوم السبت ده ..

اها يازول وصلو لي ناس بكري .. وبكري فرح بيهم فرح شديد ..

وماكان مصدق انو الامين يجيهو زيارة بي اولادو ..

بعد صلو المغرب وقعدو للونسة .. الصافي موبايلو ضرب .. طلعه كدا عاين ليهو .. لقاهو ده رقم خالد .. قال ليهو الو ياخالد .. مرحبا ..

خالد قال ليهو الصافي انتو وين؟

قال ليو نحن في امرمان مالك يا خالد مخلوع كدي؟

قال ليهو تعالو سريع .. رقية دي بلعت ليها حبوب كتيرة .. دايرة تنتحر وهسي تعبانة بين الموت والحياة .. فيها تحصلوها وفيها ماتحصلوها ..

الى اللقاء ..