الفصل الخامس

الامين في الدكان شغال شغل بي نفس .. والشغل في التلاتة ايام الغايب فيهن عطية .. كان شغل مشرف جداً .. وايمان علاقتها اتوطت مع ناس الحلة .. ومرتاحة جدا في الشمالي.

الصافي مواصل في المدرسة. وكل يوم عندو قصة جديدة ..

طبعا اشترو ليهو الكراسات .. وامو بتراجع معاهو الدروس الفايتاهو ..

وقالت ليهو احسن زول في الفصل منو؟ .. قال ليها ولد اسمو زهير .الخليفه ..

قالت ليهو وتاني .. ؟؟ قال ليها الصافي الامين ..

قالت ليهو ليه مايكون الصافي اول؟

قال ليها .. بعد شوية .. بعد شوية .. لكن زهير مسكين وماعندو قروش .. ومابعمل مشاكل .. وانا دايرو يبقى صاحبي ..

قالت ليهو اذا داير زول يبقى صاحبك .. اهدي ليهو هدية ..

قال ليها خلاس .. انتي اديني هدية اديها ليهو .. اديهو شنو؟ قالت ليهو كويس انا بشتري ليك لعبة من الدكان الجمبنا ده .. وباكر تلاقيهو براهو تديها ليهو .. مايكون قدام الناس كويس؟

قال ليهو كويس ..

المهم تاني يوم اشترت ليهو لعبة بتاعة عربية صغيرة كدا بتمشي بي حجار البطارية ..

وقالت ليهو لو فضلت ليك قروش .. واشتريت حاجة .. تشتري ليهو معاك .. ما تشري براك وتاكل براك .. كدا ماصح .. ولو هو شايل قروش .. وانت قروشك مابتكفيكم الاتنين. ماتشري حاجة لي نفسك قدامو ..

ياسلام على ايمان .. دي التربية على الكرم .. دي ماحاجة ساهلة ..

النسوان الجاهلات الواحدة تقول لي ولدها اوعك تدي حاجة لزول ..

ماتخلي زول ياكل معاك ... ماتقسم لزول من حاجتك .. دي تربية شنو دي؟ ..

عطية طبعا مسافر من حلفا الجديدة .. لي عطبره قابض الشنطة ماسكها في صدورو .. من عربية لي عربية .. لامن وصل عطبرة مافكاها كلو كلو .. قالو البضوق قرصة الدبيب بخافي من مجر الحبل..

عطية طار طيرة جد .. ما يفرط تاني .. واتعلم من الخطأ الاول .. اول مانزل في مدينة عطبرة .. زي الساعة واحدة ضهر .. اتوجه طوالي على الدكان .. وبي الفرحة البارح مانام ولا اتعشى. ولاهسه مافطر .. لمن وصل لي الامين لقاهو معاهو زباين .. قعد برة الدكان متضاري منو .. ودسى الشنطة .. بي وراهو لامن الناس فاتو .. والامين بقى براهو ظهر ليهو ..

الامين قال ليهو عطية؟؟؟

جيت سريع كدي مالك؟؟ .. انا قلت اسبوع على الاقل ..

وعطية يتبسم .. بالرغم من انو لونو مخطوف .. زي الصايم من الجوع والسهر .. الامين قال ليهو الشنطة دي شنو يا عطية؟؟ انت شلت ليك غيار في كيس.

قال ليهو دي القروش يا الامين ..

الامين قال ليهو اوووووعه تكضب علي .. عطية طوالي دخل جوة الدكان وفتح ليهو الشنطة .. الامين لمن شاف القروش ربط ربط في الشنطة .. مسك عطية وحضنو لامن بكو الاتنين ..

وقال ليهو انا ماقلت ليك ربنا بفرجا .. اها رجعتهن كيف .؟

قال ليهو والله يا الامين .. كلام ظنون ده انا تاني مابخليهو نهائي ..

الاتنين فقعوها ضحكة .. قال ليهو عليك الله كيف صاحبي الصافي؟؟ ..

قال ليهو كويس .. ونزل المدرسة .. وعامل فيها طالب جامعي .. ارح ارح احكي لي الحصل شنو؟

قفل الشنطة .. وقعد يحكي ليهو القصة من طقطق للسلام عليكم ..

الامين يازول نزل ليهو تلات علب حلاوة .. وكباهن في صحن كبير

وبقى حايم بي ناس السوق ..

كرامة ياجماعة .. عندنا مشكلة اتحلت .. كرامة .. كرامة ..

اها يازول عطية قال للامين .. انا بدس القروش دي ومن باكر بمشي اشتري القطع حقات الزول ده .. والله انا تاني ما استلم لي امانة حقة زول ..

قال ليهو لالا انت تستلم الامانة بس ماتصرف فيها .. الظروف مامعروفة وبراك ترا شفت الحصل ..

وفعلا من تاني يوم عطية بدا يشتري في القطع .. ومابشتري القطعة الا يتأكد من شهادتها واوراقها .. وبقى ماعندو ثقة في اي زول .. بعد المشكلة الحصلت عليهو دي .. وبصرح عديل .. يقول ليهو والله يا الامين انا بقيت مابثق في اي زول غيرك انت ..

المهم الحمد لله اشترى لي موسى خمسة قطع .. ومسك الاوراق الثبوتية .. وبقو شغالين الاتنين هو والامين في الدكان بي مزاج ..

في الوكت داك عطبرة بدت تزدهر ازدهار فجائي. نسبة للزلط الجديد الجاي من الخرطوم (التحدي) ..

والاراضي زاتها ماشة في زيادة رهيبة ..

والتجارة فتحت من كل جيهة .. وبقت عطبرة ملتقى طرق. من الشمال والغرب .. والجنوب والشرق ..

المهم يازول مرت الايام .. اها بعد شهر .. او شهر ونص من الكلام ده .. موسى صاحب الاراضي جاء.

والامين قال لي عطية الزول ده انا بكلمو بالحصل .. عشان يكون في الصورة .. قال ليهو كلمو .. انا بعد اشتريت ليهو اراضيهو .. تاني في شنو؟

موسى ساكن في منطقة اسمها كنور .. بتقع شمال عطبرة .. بعد خليوة طوالي .. اها يوم موسى جا السوق .. وقال لي عطية تمشي توريني القطع واماكنها .. وفعلا عطية مشى معاهو .. ووقف على الاراضي واتبسط جدا"

موسى لمن جا راجع الدكان .. الامين حكا ليهو .. وقال ليهو حصل حصل ..

موسى قال ليهو والله عافي منك ياعطية .. والله فعلا حفظت الامانة .. وسكيتها زي الحقتك .. تسلم والله .. دي لو حصلت عند زول تاني .. انا بس يعوضني الله .. لكن ياخي والله بتبالغ يا عطية .. انت كان تكلمني انك داير قروش تستثمرها لروحك .. انت ماقاعد تقصر معاي .. انا لو قصرت فيك ابقى ناكر جميل ..

دحين هسي دايرك تشوف ليك دكان في موقع يكون جامد .. وانا بديك راس المال تشتغل .. تقلب البضاعة .. وانا مامحتاج للقروش هسي تسدد لي بي راحتك .. انا ربنا فتحها علي والله فتحا" مبينا ودي اقل حاجة اعملا ليك ..

موسى راجل كلس .. وهو صديق لي عطية .. اكتر من عشرة سنوات .. وهو لمن كان في سوق عطبرة .. عطية وقف معاهو كتير.. زي ماقال ..

المهم عطية ربنا فتحها عليهو .. ومشى فتح ليهو (دكان عدة) في اخر السوق بعيد شوية من دكان الامين .. وامورو مشت تمام .. والامين بقى ماسك دكان الخردوات .. وكل ما يعمل جرد بسدد لي عطية .. في النهاية الدكان بقى حقو براهو .. طبعا"

ومرت الايام والشهور الطويلة .. وعطية رحل من الشمالي وسكن في الحصاية.. والامين مسك البيت كلو براهو .. وامورو مشت كويس شديد ..

بس مع مرور الايام وبعد عطية من الامين حصلت حاجات كدا يالطيف .. الامين بدا يتغير .. وبقا يجي البيت متأخر .. وبقى يزهج كتير .. وبيهيج في ايمان .. وايمان بقت ملاحظة للتغيير الحصل بالتدريج في شخصية الامين .. وخلا الجلاليب .. بقى يلبس بناطلين .. وصلاتو بقت في تلتلة ..

بتراقب فيهو ساكتة .. وهي صابرة للايام تغيرو .. وماعارفة الحاصل عليهو شنو؟

الحصل الماعارفاهو ايمان .. انو الامين كون صداقات مع عذابه شغالين في السوق .. ساكنين في المربعات .. وبمشي ليهم كتير في بيت العذابه .. وبلعب معاهم الكشتينة .. وناس اخلاقهم زفتة .. وبلعبو القمار بس الامين مازول قمار .. لكن بقعد معاهم ساي .. وبمرور الايام .. بي قعادو الكتير معاهم بقت قصة القمار دي بالنسبة ليهو ما مشكلة كبيرة ..

وفيهم اتنين بلفو السجارة .. والامين ارتبط بيهم شديد .. وكل مايقرر انو يفارقهم مابقدر .. هم ناس رجال واصيلين وكرماء وصادقين جدا .. لكن للاسف فساق .. وسفهاء ..

لازم نلاحظ للحتة دي.. الى اللحظة الامين مابلعب قمار معاهم ولابشرب بنقو نهائي .. بس بقعد معاهم ..

اها يوم من الايام صاحبو الاساسي من العذابة .. اسمو عبدالمنعم. قال ليهو عندي انا واحدة بحبها وعايز اتزوجها.. والليلة عازمها ومابتقدر تجيني براها .. بتجي معاها بت خالتها .. بنتلاقى في الحديقة ..

دايرك تمشي معاي.. لمن استفرد بيها .. انت تمسك زمنك مع بت خالتها .. تتونس معاها ساي .. اسمها ندى وزولة قنبلة ..

وفعلا الامين وقع في الحفرة ومشى معاهو .. ولاقو البنات الاتنين ..

ندى ونبيهة .. عبد المنعم ساق نبيهة .. وقعد معاها بعيد هناك .. وخلا ندى قاعدة مع الامين .. وندى يازول من اول دقايق انداحت واتكسرت في الامين .. والامين طبعا زول تجاربو محدودة في البنات .. بس مبسوط من البت المنداحة دي .. منداحة اندياح غريب ..

والله ماشاء الله يا الامين .. انت شخصية عسل .. والزول يحبك مما يشوفك .. واي واحدة تتمناك .. عليك الله انت صاحب عبد المنعم من متين؟ وليه ماقاعد تجي معاهو؟ انا اول مرة اشوفك ..

كم مرة انا بجي مع نبيهة هنا .. نقابل عبد المنعم .. مرات بجي براهو مرات بجي معاهو الولد الازرق العبيط داك .. اصلو ماحبيتو .. لكن انت ماشاء الله ..

والامين فاتح خشمو يعاين ليها .. وناسي الزولة المنتظراهو في البيت بي الحب الاصيل ..

الامين قال البت دي انا كان كلمتها قلت ليها انا متزوج .. وعندي ولد .. خلاص بتكرهني .. وتقول الولد العبيط المتزوج داك ..

قام قال ليها والله انا ذاتي من شفتك اندهشت .. وغلبني ابلع ريقي ذاتو .. قعدت تضحك .. قالت ليهو عسل انت .. دي بالغت فيها عديل ..

اها قلت لي عليك الله كيف احوالك؟ وشغال شنو؟

قال ليها انا عندي دكان في السوق .. في الحتة الفلانية .. قالت ليهو الدكان حقك براك ..؟ ولا انت شغال فيهو؟

قال ليها لالا حقي براي .. انا مابشتغل تحت راجل ..

قالت ليهو طيب مالك باري العذابة الملقطين ديل .. شرامة وصعاليق ومفلسين.. ده مايشبه ده .. كل واحد جاي من جيهة ما معروفة .. هسع عليك الله عبدالمنعم ده الزول ببراهو؟ .. انت ظاهر عليك ود حلال وابن اصول ..

قال ليها الله يجزيك خير يا ندى .. قالت ليهو المهم .. اهو نحن اتعرفنا .. لو عندك مزاج علاقتنا تستمر .. ح نتلاقا برانا .. لا نرتبط بي عبدالمنعم .. ولانرتبط بي نبيهة ..

قال ليها اتفقنا .. انتي عرفتي الدكان تعالي عادي بالنهار .. ونتفق على المواعيد البنحددا ..

اها يازول المهم بقو يتلاقو كتير.. الامين وندى .. والامين اتكسر فيها فعلا .. وبدأت علاقتو بي ايمان تفتر .. حبة حبة بالتدريج .. وشخصيتو بدات تتغير وطريقة كلامو .. حتى مع الصافي بقى ينهرو

ومرات يضربو .. مرة قال ليهو يا ولادة الندامة .. وايمان سمعتو .. وقعدت تبكي ..

والصافي جاء سأل امو .. قال ليها يا امي ولادة الندامة يعني شنو؟

وليه انتي بكيتي لمن سمعتي ابوي قال لي كدا ؟؟

يعني دي كلمة كعبة؟

قالت ليهو لالا .. ماكعبة بس انا ماعارفة معناها .. والصافي مشى سأل الاستاذ .. قال ليهو يا استاذ ولادة الندامة يعني شنو؟

قال ليهو سمعتها وين؟ .. الصافي سكت ابا يتكلم .. الاستاذ قال ليهو امشي الفصل يالصافي وتاني ماتلفح الكلام من نسوان الشارع ..

غايتو قصة كانت طويلة وعريضة ..

المهم فيها انو الصافي بقى يخاف من ابوهو ومابتونس معاهو .. لانو بقى يحرجو كتير ..

دي اصل القصة الحاصلة على الامين بعد 10 شهور بس من جا عطبرة .. وايمان نفسياتها بقت في الحضيض .. من التغيير الحصل على الامين .. وما عارفة المشكلة الحاصلة شنو؟

يوم قالت انا الليلة لازم احددها مع الامين ده .. واقعد معاهو واواجهو .. يا اما يعيش معاي زي الناس .. او يفكني انا امشي على اهلي ..

الى اللقاء ..