الفصل الثالث والثلاثون

الصافي قال ليهو جدا" يالرشيد .. مابقول لاي زول .. قال ليهو غايتو انا بالليل كنت راقد في السرير .. وهم قايليني انا نايم وقالو كلام كتير .. وبتكلمو عن واحدة .. بتعرفها ومابتعرفها .. بس انا ماعرفت اسمها .. في النهاية ابوي قال ليها انتي اي حاجة لازم تتحشري فيها وتفرضي رايك .. امي قالت ليهو انا اسفه وتاني مابتكلم .. بس ما رضيانة وانا برة من الموضوع ده ..

لكن ماعارف الموضوع شنو؟ .. الصافي قال ليهو بس يا الرشيد ماصح تتصنط لي كلام امك وابوك ..

الرشيد قال ليهو طيب اعمل شنو .. انا ماجاني نوم .. وكنت مغمض عشان انوم وسمعت .. يعني اعمل شنو؟ ده انا عشان حكيت ليك كويس؟؟ .. شوف تاني كان احكي ليك حاجة ..

قال ليهو لالا يا الرشيد .. انا ما زعلان منك لكن بوصي فيك .. انت مابتقبل وصية اخوك الكبير؟ .. انا بس بوصيك تاني لو ابوك وامك بتكلمو في كلام.. وانت حسيت انهم ماعايزنك تسمعو.. اعمل اي حركة وريهم انك انت صاحي .. قوم امشي اشرب مثلا".

قال ليهو حاضر ..

الصافي سكت ساي.. وبقى يفكر في الكلام القالو الرشيد.. وكلام غير مفيد ابدا.. ومافهم منو اي حاجة .. ومخو بقى يودي ويجيب .. وفي النهاية قال ياخي انسى .. خليهم بي راحتهم .. ماعايزين يقولو لي انا ح اعمل شنو مثلا"

.. المهم وصلو السوق واشترى ليهو كم حاجة كدا لي الرشيد وبسمة ورجعو .. ولقى ابوهو مافي في البيت .. شكلو مشى السوق ..

المهم ايمان اتفرغت وجات تتونس معاهو عادي .. ويحكي ليها في احوال ناس الجامعة .. والحاصل فيها .. واصلو ماجاب ليها سيرة انو هو عايز لينة دي نهائي .. شايف انو الوكت بدري على الكلام ده

وايمان بتتونس معاهو عادي .. كانها ماعندها مشكلة مع راجلا ..

شانها شان المراة السودانية عموما .. " تلقاها عندها مشكلة كبيرة جدا مع زوجها .. اول ما تنساق في الونسة تنسى اي حاجة .. وتتونس بي كل مشاعرها .. وتلقاها بتخفي مشكلتها بمهارة عالية .. بس لمن تكون قاعدة براها .. غم الدنيا ينزل فوقا ..

بعكس الرجال .. الواحد تلقاهو عندو مشكلة في البيت مع المراة .. يشاكل ناس الشارع وناس الشغل ويضرب الحيطة .. ويشاكل العربية الراكبها ..

المهم ايمان كانت بتضحك مع الصافي بي كل مشاعرها .. وهو بحكي ليها ماخلا ليها قصة .. ناس مؤيد .. وقصص بهية .. ووو

وكل مرة بحاول يدردقها بالكلام عشان تحكي ليهو .. وهي بتلف وتدور بهناك .. وتدخلو ليك في موضوع تاني ..

المساء لمن ابوهو جا .. ايمان اتغيرت 180 درجة واتكفرنت وبقت تمرق وتدخل .. الصافي اول مرة يشوف امو متضايقة ضيق زي ده .. وشكلها خايفة من حاجة مع زعلها .. او احتمال خايفة انو ابوهو يقول ليهو حاجة ..

الامين بتغدى المساء بعد يجي من السوق .. ختت ليهو الغدا والشاي .. وقالت ليهم عن اذنكم عندي مشوار عند الجيران قريب ..

الامين ما اتكلم معاها ولا قال خير ولاقال لا .. الصافي قال ليها خير يا امي .. ماتتاخري دايرين نتونس ..

طلعت وبقو الامين والصافي قاعدين براهم .. والاولاد الاتنين في غرفتهم ..

الصافي قال لابوهو يا ابوي .. طبعا" انا مابحس انك انت ابوي وخلاص .. انا بحس انك انت صديقي العزيز .. احكي ليك اسراري وتحكي لي اسرارك .. ونتشاور في ادق تفاصيل حياتنا صح ولا انا غلطان؟ .. الامين قال ليهو اكيد يا الصافي اكيد .. قالو ولدك كان صغير ربيهو .. وكان كبر خاويهو ..

الصافي قال ليهو طيب يا ابوي .. احكي لي امي مالها متغيرة؟

قال ليهو والله يا الصافي ياولدي الكلام تنسأل منو امك .. ما تسألني انا..

قال ليهو اولا يا ابوي امي سألتها وابت تكلمني .. وانت ذاتك متغير .. واتخيل لي الموضوع متعلق بينكم الاتنين .. لو ماعايز تحكي ليك ما بضايقك ..

قال ليهو اي ما تضايقني .. ماتسألني .. يهديك امك تكلمك هي .. انا ما متغير ماتتوهم ساي ..

الصافي كدا اتقفلت قدامو الابواب .. وبقى ساكت وتاني لاسأل امو ولا سأل ابوهو. وهو ذاتو بقى متوتر وما مرتاح .. وماعارف يقول شنو.

المهم يازول مرت الايام .. والبيت متوتر ومافي زول بتكلم مع التاني .. ايمان في نفس همها وغمها وعدم ارتياحها .. والامين ماعايز يتكلم معاها لابخير لابي شر .. والصافي كل يوم ضيقو وزهجو زايد .. وحس انو البيت الجاهو بالاشواق .. بقى اضيق من خرم الابرة .. احسن ليهو الشقة بي الف مرة ..

مشى السوق مع ابوهو كم يوم .. ويوم مشى لاصحابو في الدامر العشير .. ويوم مشى لي صاحبو في نهر ادبرة حتة اسمها الواور .. وحاااام ماخلا حتة .. لكن برضو قرفان من قعدة البيت .. لانو امو وابوهو متخاصمين هسي دي قريب التلاتة اسابيع .. بس المخففة عليهو لينة الحنينة .. اتصالاتو منها مابتنقطع يومين ورا بعض ..

المهم يازول يوم اغتنم فرصة ابوهو موجود وامو فاضية قال ليهم ياامي يابوي انا مسافر .. ابوهو قال ليهو شنو يازول .. انت ماقلت اجازتك لسه .. قال ليهو والله يا ابوي فعلا اجازتي لسه لكن بصراحة انا زهجت من البيت .. وما اتعودت اكذب عليكم .. حالتكم انتو الاتنين مع بعض مامريحاني .. والمزعجني اكتر ماعارف الحاصل شنو؟

ابوهو قال ليهو مخير .. يهدي امك التحكي ليك لو في حاجة .. ايمان عاينت لي الامين عين عجيبة كدا .. كانها مستنكرة كلامو .. ودخلت على المطبخ ..

الصافي قام وراها .. قال ليها اها يا امي اديتني الاذن امشي الخرطوم ؟؟

قالت ليهو اسمع يا الصافي انت داير تعرف في شنو؟

ابوك ماكلمك باي شي؟ قال ليها ابدا والله .. سألتو قال لي اسأل امك .. وانا وعدتك انو ماأسالك .. وانتي قلتي لي لو سألتني بغضب عليك .. قالت ليهو طيب انت موش عايز تعرف الحاصل؟ اكلمك هسي قدام ابوك ولا اخليهو لي بكرة؟ ..

قال لي على كيفك انتي يا امي .. قالت ليهو طيب اصبر لبكرة يا الصافي .. قال ليها جدا" صابر ..

الصافي منتظر لمتين تصبح الواطة .. وابوهو يمشي السوق .. وامو تحكي ليهو الحاصل ..

باكر الصباح الامين لبس وقبل مايطلع على السوق .. وهو طالع قال للصافي انا عندي معاك كلام رجال ضروري جدا قبل ماتسافر .. الصافي قال ليهو حاضر يا بوي..

اها بعد الامين طلع .. ايمان جات على الغرفة بتاعة الامين .. ونادت الصافي وقالت ليهو اقعد ..

ابوك ياخوي داير يخوزقك انت .. الموضوع مابهمني انا كتير ..

قال ليها يخوزقني في شنو؟ .. قالت ليهو عندو صاحبو اسمو عبدالرحيم .. شغال معاهو في السوق .. وقاعد يمشي ليهو في البيت .. وعبدالرحيم بجينا هنا كل مرة .. بعدين يوم ابوك قال لي اتفقتا مع عبدالرحيم .. دايرين ربيعة بت عبدالرحيم لي الصافي ..

انا قلت ليهو لكن يا الامين الحكاية على رغبة الصافي ..

قال لي الصافي داير يكسر كلامي ويحلف وعدي؟ .. انا طبعا الدنيا ضاقت علي .. وركب مشيت حي(...) الساكنين فيهو ناس عبد الرحيم .. معاي منى جارتي دي .. عندها صاحبتها هناك .. وسألنا من الناس ديل .. وسألنا من البت على مخصوص .. والبنات قالن عنها كلام ماحلو .. وهو في النهاية كلام .. ما في زول بقدر يأكدو .. فاهم؟؟؟

الصافي قال ليها فاااااااااهم واصلي يا امي ..

قالت ليهو المهم .. انا اخدت تقاريري .. واتأكدت من البت شديد .. وامها ذاتها قالو مراة بتاعة مشاكل .. وجيت كلمت ابوك بكل الحاصل ..

.. قال لي انتي بتمشي تتجسسي علي الناس بوراي مالك؟

قلت ليهو ده مستقبل ولدي .. ولازم اتاكد؟ قال لي الحاجات الزي دي الاشاعات فيها اكتر من الحقايق .. وده كلو كلام افك .. وما ح يكون صحيح ..

انا قلت ليهو صاااح الزول مايصدق الكلام البتقال في الناس .. لكن نحن احسن بس نبعد من مكان القوايل .. وخلي الصافي يختار بي ارادتو ..

انا حية وعيوني دي بتشوف الصافي ولدي مابعرس البت دي .. قال لي طيب لو الصافي براهو قال دايرها ..

انا قلت ليهو يقول دايرها بعد يسمع الكلام ده؟

قال لي نفرض قال دايرها .. انا قلت ليهو مابعترضو .. بس تكون رغبتو ومسؤوليتو ماتكون رغبتك انت ..

هو قال لي المهم انا ربطت لساني .. وح يعرسا غصبا عنك .. وكل يوم بتناقش معاهو في الموضوع .. ده لغاية يوم قلت ليهو انت البت دي مابتعرفها .. بتعرف ابوها .. والصافي ماح يعرس الابو .. ح يعرس البت .. بعدين الصافي راجل وعندو حرية الاختيار ليه تختار لي ولدك .. انت ابوك اختارني ليك .. ولا اخترتني بي رغبتك.

قال لي انتي الصافي؟ .. الصافي ده ولدك براك؟ .. انتي ماتصبري تخليهو يجي يشوف البت احتمال تعجبو.

انا قلت ليهو بس على شرط .. انا احكي للصافي كل السمعتو عن البت ..

قال لي انت زولة حشرية .. وبتتحشري في اي موضوع .. ودايرة اي شي يمشي بي رايك .. قلت ليهو خير يا الامين .. انا تاني مابتكلم .. بس انا برة الموضوع ده .. ده انت وداك ولدك ..

ولو هو جا شاورني بوريهو اني مارضيانة .. وانتهينا على كدا بس انا مهمومة ومغمومة من تصرفات ابوك دي .. وانا صبرت عليهو كل حياتي دي .. بس ما مستعدة كمان اضحي بي حياة اولادي عشان ارضيهو .. عندو تصرفات مامنطقية ولاشرعية حتى ..

كيف يعني يختار لك انسانة انت ماشفتها .. ويربط لسانو مع اصحابو فوق قعدة ونسة .. بالله ده كلام ده؟ الحركات المتخلفة دي خلوها الناس زماااان .. المفروض ينتظر ويشاورك وما يوافق الا انت توافق ده الشرع والسنة والعقل والمنطق بقول كدا ..

الصافي سرح هنااااك .. والمواضيع جاطت في راسو .. مرضاة امو بي جيهة .. ومرضات ابوهو بي جيهة .. ورغبتو وحب حياتو الاسمها لينة الزولة الملاك المنتظراهو في الخرطوم من جيهة ..

قال لي امو بس يا امي .. ده موضوع بسيط .. وممكن يتحلا بي كل سهولة ..

انتي اصلك ماتزعلي منو .. ولا تزعلي روحك .. وخليك عادية انا قادر اتصرف مع ابوي .. بعدين احتمال البت انا اسأل منها والقاها بتنفع وكويسة .. منها القى مرادي الدايرو .. واعز كلمة ابوي .. رايك شنو؟

انتي بس اديني فرصة أسال منها تاني .. واتحقق بي طريقتي الخاصة ..

قالت ليهو يعني انت المبدأ ماعندك منو مانع؟

قال ليها ابدا" ماعندي مانع .. الكلام اليقولو ابوي يمشي .. بس انتي خليني بي رغبتي .. انتي موش عايزة رغبتي؟

انا رغبتي انتي تخلي الموضوع ده على .. الموضوع يا امي مابتحلا بالزعل .. انتي بتتذكري زمان قلتي لي ..

الغضب بحوط الراس .. ومابخليك تتصرف .. خلي غيرك يكون زعلان .. وانت خليك هادي .. عشان تقدر تفكر في الانتصار؟ متذكرة الكلام ده؟

قالت ليهو ايوة لكن انا غايظني ابوك ده .. هسي عليك الله ده تصرف يتصرفو .. يمشي يخطب ويربط لسانو بي كلمة من دون ماياخد راي ولدو؟

قال ليها معليش يا امي .. لانو ابوي واثق اني مابكسر ليهو كلمة .. بس انتي خلي الموضوع ده علي .. ولو دايراني اكون مرتاح نفسيا" ارجعي اتكلمي معاهو عادي .. لالا دقيقة افكر ليك ..

قولي ليهو انا كلمت الصافي .. بي انك عملت كيت كيت .. والصافي موافق .. وقال اي كلام يعملو ابوي انا مابكسرو .. ومادام ابوي ربط لسانو للرجال .. انا مابخيب وعدو وافشل كلامو .. كلميهو كدا بس .. وخلي دي تكون بداية ترجع المياة الى مجاريها بينك وبينو ..

ايمان قعدت تعاين للصافي .. ودموعها جرن .. وقالت ليهو دايما بتجي على نفسك.. عشان ترضي الناس .. ديما انت طبعك كدا.. يحليلك انت .. ياحبيب قلبي .. دايمة عليك كدا.. ممكن تخش النار عشان رضاي وراحتي .. لكن انا ياحبيبي رضاي في رضاك وراحتي في راحتك ..

الصافي قام مسك امو قلدها كدا .. ومسح ليها دمعتها.. واتذكر لينة وفي عبرة سدت حلقو .. وراسو كابس ..

الى اللقاء ان شاء الله