الفصل السابع

الامين مشى مباشرة للدكان .. فتح الدكان .. وكان خاتي المليون في صندوق بتاع شاي .. وداسيهو في كرتونة .. شالو بي صندوقو .. وختاهو في كيس اسود.. وطلع بيهو علي بيت العزابة.. لقاهم يادووب بادين في القعدة .. والشيشة .. والسجاير .. والدخاخين حكاية مزعجة شديد .. وتجيب قبضة النفس ..

قال ليهم كيف ياجماعة؟؟ اها الامور ماشة كيف؟؟ والقيم على منو؟؟ واللعبة واقفة وين؟؟ ..

عبدالمنعم قال ليهو نحن هسي قاعدين نقزقز بي الصير ..(السمك الصغار) .. اصبر اليجو التماسيح .. بعد الفطور ..

المهم بعد الفطور.. الجماعة بدو يتلملمو .. والقعدة عمرت .. والناس كلها عندها خبر.. انو الامين التاجر .. جايب مليون .. والناس كلها طمعانة .. وفي ناس بنو أمال على المليون ده ..

مع اول قيم الامين أشغال بي مية ..

خم ليك الناس دي جت ..

ولعب بالمية التانية.. وخم الناس .. يازول لغاية صلاة الجمعة .. خسر مرة واحدة بس .. وفي المرة البعدها رجع قروشو.. وشال الفرشة .. (يعني لم قروش اللعبة كلها)

المهم الزول ده خلا القعدة دي مافيها لاقرش .. الحالة دي ولا لعب بالمليون كله ..

قروشو وصلت قريب التلاتة مليون وشوية ..

قالو ليهو بعد الصلاة تجي تواصل ..

قال ليهم وينها قروشكم؟ .. قالو ليهو تدينا دين ..

ونسدد ليك من اللعبة ..

قال ليهم كدي نشوف بعد الصلاة.. والله انا الدين ده .. بخااف منو ..

يازول الزول ده عرف انو القروش دي .. ممكن تشتري ليهو قطعة متواضعة كدا يعني .. بعد الصلاة .. مشى الدكان .. وتاني ابا يجيهم .. كشح ليهم حبة واطا زي مابقولو .. خت قروشو في الدكان جوة.. في نفس الحتة الكان خاتي فيها المليون ..

وقال دي مابهبشها .. الا اشتري بيها القطعة .. عشان خاطر عيون ندو .. فرحان فرحة عجيبة .. ومشى البيت ..

وصل البيت زي الساعة 3 كدا .. فرحان .. لكن الجمعة ماصلاها .. وصل البيت صلاها ضهر .. لانو كان خايف على القروش ..

قبيل لمن مشى فتح الدكان ورتب ليها .. الصلاة كان فاتت ..

المهم .. وصل البيت .. ويتبسم ومتكيف كيف شديد خلاص .. ولمتين باكر يجي .. عشان يلاقي ندو المنداحة ..

وايمان تعاين ليهو ساي .. ياربي الراجل ده مالو فرحان كدي؟؟ ..

والله العظيم انا الشمار قاطع قلبي ..

والصافي كان نايم جوة .. لمن حس بي حركة ابوهو بره.. جا طالع..

واتضارا في الباب كدا .. وبقى يعاين لابوهو .. عايز يشوف ابوهو..

وماعايز ابوهو يشوفو .. خايف يضايقو ولاشي ..

المهم الامين شافو قال ليهو الصافي؟

مالك بتتلبد؟ انت اليومين ديل .. اتعلمت ليك حركات كدا ماعاجباني ..

تعال .. جا طالع .. وماسك اصبعو الصغير .. بدعك فيهو بيدو التانية ..

وشكلو خايف .. انو ابوهو يحرجو .. او يقول ليهو كلام حار ..

قال ليهو مالك يا الصافي؟ .. مالك متضاري مني بي ورا الباب؟ ..

قال ليهو داير اشوفك يا ابوي .. من زمان ماشفتك ..

قال ليهو طيب.. ماتجيني عديل تشوفني .. قال ليهو لالا انت زعلان مني ..

وانا مندايرك تزعل مني تاني .. مندايرك تشوفني .. عشان انا بقيت شرير ..

قال ليهوشرير كيف يعني؟ قال ليهو قالو لينا في المدرسة .. الزول الابوهو بزعل منو .. ده زول شرير .. وربنا بغضب عليك .. اذا ابوك غضب منك ..

الامين قال ليهو ايوه ده كلام صاح .. عشان كدا انا تاني لو قلت ليك حاجة .. ماتقعد تتعابط وتتعاور فاهم؟

قال ليهو سمح ..

الامين قال يا ايمااان .. قومي اعملي لي غدا .. بي مزاج .. انا الليلة داير اتغدا غدا بي فهم ..

ورقد قفاهو .. وقال اححح والله الليلة ده انجاز اصلو ماحصل .. ونفسياتو طبعا" في السماء ..

مفتكر انو كسب العبيط .. وناسي انو دي اكبر خسارة .. واسوء كارثة يعملا في حياتو .. لكن الفهم قسم ..

والعمى الحقيقي هو عمى البصيرة ..

الجماعة العزابه منتظرنو العصراوية كلها .. وكل مرة يعاينو للباب .. الزول جا ولا ماجا؟

في واحد قال ليهم .. الزول ده والله خلاكم تمسكو حبال الهوا .. تاني مابجيكم ..

التاني قال ليهو يجي لشنو؟ عندكم ليهو قروش؟؟ ..

الزول لمه القروش كلها.. وخلاص انتهينا .. لكن والله الامين طلع تفتيحة .. الزول اول مرة يلعب اللعبة دي .. كان بلعبها معانا مسيخة بس .. لكن برضو كان كيشة ..

ونحن هسي قلنا خلاص.. الزول ده نشيل منو المليون .. ونخليهو متحير .. لكن طلع ابن فتله ..

التالت قال ليهم .. الزول ده خاين والله.. وماعندو عشرة .. ونحن المفروض ننتقم منو .. المعروف عندنا.. وكت الزول قروشو تقطع.. بندينو ..

ليه الزول ده يخم الغنيمة .. ويمشي تاني مايجي .. والله انا مابسيبو..

عبدالمنعم قال ليهم كلامو صاح.. الزول ده لازم ننتقم منو؟

واحد رابع قال ليهم يعني تنتقمو فيهو تعملو ليهو شنو .. ؟؟

عبد المنعم قال ليهم انا بعرف اعمل ليهو شنو.. اصبرو علي ساي ..

طبعاعبدالمنعم هو صاحبو الاساسي.. الجابو للناس ديل.. وعرفو عليهم ..

والامين اصلا بجي بيت العزابة ده .. عشان عبدالمنعم ..

اها يازول من الصباح .. عبدالمنعم جاهو في الدكان.. قال ليهو يا الامين .. دي شنو العملية الجبانة العملتها البارح دي؟

قال ليهو ياتو عملية ياعبدالمنعم؟ يعني عشان ابيت اجي راجع ادينكم؟ ياخي انا ماعندي مزاج العب تاني ..

انتو حددتو عدد اقيام معينة؟

قال ليهو لالا ماحددنا .. لكن من الذوق والادب .. نحن ناس اخوانك.. ماممكن تلم الغنيمة وتزوغ.

قال ليهو الغنيمة انا سارقها منكم؟؟ مش جبتها بي لعب نزيه؟

(ههههه قال لعب نزيه قال .. والله غايتو جنس وهم)

اتذكرت نكتة .. قالو في واحد مشى يسكر .. عند ست العرقي .. كبت ليهو في الكباية كدا.. عاين لي الخمره لقاها صافية وشفافة .. وقال ليها والله شغلك اصلي .. ده شغل صافي شديد.. قالت ليهو اول قالو ليك انا بأكل اولادي الحرام؟ هههع ..

يعني حنك انها مابتغش في العرقي .. وبي كدا بتاكل حلال ..

الناس دي طاشة شبكة ولا بستهبلو ..

المهم .. عبد المنعم قال ليهو اسمعني يا الامين.. الناس ديل زعلانين .. وحالفين ينتقمو منك ..

وانا قلت ليهم بجيب ليكم منة حاجة كويسة .. انت اديني نص مليون اوزعو ليهم ..

لانهم الناس ديل ممكن يوصلو خبرك لي عطية.. انك بتلعب قمار .. وممكن يوصلو خبرك لي ندى.. انك متزوج وعندك ولد ..

وممكن يوصلو خبرك لي مراتك.. انك بتحب بي وراها .. وداير تتزوج .. وبتلعب قمار .. دي كلها حاجات انت ناسيها .. ممكن تطرشق ليك حياتك ..

الامين قال ليهو يعني ياعبدالمنعم انت بتهددني؟؟ .. انت قايلني بخاف؟؟. واديك قروشي الكسبتها بي عرق جبيني؟

انا مابدي زول تعريفه واحدة .. وده اخر كلام عندي .. قول ليهم الامين قال ليكم اي زول يعمل البريحو .. وانا عارفك انت ماممكن تخليهم يخربو علي ..

عبدالمنعم قال ليهو مادام قلت كدي.. انا مالي ومالك .. المهم انا نبهتك تنبيه.. لحاجات انت ماجايب ليها خبر .. طيب اديني حاجة انا ان شاء الله مصاريف .. قال ليهو والله القريشات ديل عندي بيهن غرض وماعايز انقصهن ..

عبدالمنعم طوالي .طلع منو ..

عبد المنعم من محلو داك .. مشى على دكان عطية .. في اخر السوق ..

سلم عليهو.. وعطية طلب ليهو شاي.. وقال ليهو كيف الاحوال ياعبد المنعم؟؟ والله دي شقة غريبة الليلة ..

من زمان وانا بقول عبد المنعم ده اصلو مابدورني ..

عبدالمنعم قال ليهو والله الحقيقة ياعطية.. نحن ناس بتاعين هلس .. وسكر .. وقمار .. وبنقو وانت الحاجات مامن ناسها .. عشان كدا انا ببعد منك .. وعارفك ما بتهضمني ..

قال ليهو كويس ياعبدالمنعم .. اتفضل اشرب الشاي وامرني .. باي خدمة ..

قال ليهو والله ياعطية ماعندي خدمة طالبها منك.. بس انت ياخي بقيت بعيد من الامين .. والامين ده اليومين ديل ماسك ليهو طريق.. نحن ذاتو الطريق ده ملينا منو.. وكرهناهو.. ودايرين طريقة تبعدنا ما لاقينها ..

قال ليهو الامين مالو يا عبدالمنعم ؟؟ احكي لي عديل ..

قال ليهو والله الامين اليومين دي.. باري ليهو بت من بنات ال...

وقال داير يتزوجها فوق مراتو .. وهي بتغش فيهو.. وهو بغش فيها ..

هي عندها 13 حبيب .. وهو ماكلمها انو متزوج وعندو ولد ..

وكل واحد بغش في التاني ..

ودي ما المشكلة.. المشكلة انو البت بقت تغش فيهو .. وتسف في قروشو .. لغاية ما الزول ده اضطر يقعد معانا في طربيزة القمار ..

عطية قال ليهو يقعد في طربيزة القمار يعمل شنو؟

قال ليهو ياخي الزول ده امس الجمعة كلها شغال لعب.. وخرت الجماعة كمان ..

عطية قال ليهو اصلا مابصدق.. انو الامين يعمل كدا .. انت زول حاقد .. وعايز تبوظ سمعة الراجل .. ياخي حرام عليك ..

عبدالمنعم قال ليهو انت بس امشي اسألو.. شوفو بقول ليك شنو.. لو نكر ناديني .. وانا ماعندي مانع اعمل معاهو مواجهة.. اصلا تاني ماعندي معاهو حاجة ..

قال ليهو جدا .. بعد ساعة انا بمشي عليهو .. هسي عندي زول جاييني .. لكن والله ياعبدالمنعم القاك بتكذب .. مابسيبك انت عارفني انا كان قمت بعمل ليك شنو؟

عبدالمنعم قال ليهو يامعلم ولا تزعل روحك.. انا بمشي معاك خليهو ينكر قدامي ..

وبنتظرك هناك .. مع عمر بتاع المغلق .. لمن تخلص من زولك كورك لي .. نمشي ليهوسوة..

وفعلا انتظر عطية لمن الزول المنتظرو جاهو.. وخلص منو ونادى على عبدالمنعم..

ومشو الاتنين .. ليمنو؟ مشو لي الامين..

وعطية ماشي في الشارع .. ومامصدق الحاصل على الامين نهائي ..

الامين فعلا بقى زول طغيان.. ومستبد وماعندو اي حاجة لزول

واحتمال يشخط لي عطية ذاتو ..

لكن البحصل شنو مامعروف كدي نشوف بكرة

الى اللقاء ..