الفصل السادس

طبعا الخبر بقى منتشر وسط العذابه .. انو الامين مكسر في ندى .. والامين ماداير الخبر يصل لي ايمان ولايصل لي عطية .. عطية مشغول ومرات يعدي شهر مايلايتلاقو هو والامين .. اها قام واحد من العذابة قال لي عبد المنعم بالمناسبة .. نحن علاقة الامين بي ندى دي.. المفروض نستفيد منها.. قال ليهو كيف؟قال ليهو ياخي ده الامين غنيان .. وقروشو مضيقات عليهو .. بعدين القروش هو لاتعبان فيهن.. لا جايبهن بي عرق جبينو .. قالو عطية نفض ايدو من الدكان.. وخلاهو ليهو.. ونحن العورا ما مستفيدين اي حاجة من النعمة دي.

لكن ندى دي طريقنا الوحيد للمكسب.. عبدالمنعم قال ليهو كيف يا شاطر؟قال ليهو انت تكلم نبيهة.. تخليها تقول لي ندي تستنزفو بالطلبات .. هو ح يضطرا .. يلعب معانا .. ام لهبه دي .. (لعبة القمار) .. ونحن بنخرتو ليك خرت القرض.. عبدالمنعم قال ليهو ياخي دي فكرة منفسة ساكت.. الامين لو قطعت رقبتو مابلعب قمار.. قال ليهو ياخي انت جرب خسران شنو؟وعبد المنعم سرح في الموضوع.. واصر جواهو انو ينفذ العملية دي.. اها بالمساء لاقى نبيهة .. قال ليها يانبيهة .. طبعا" الامين بقى يحب ندى لدرجة مبالغ فيها.. روحو ودينو وايمانو ..

والاربعة وعشرين ساعة يتكلم عنها.. لكن يانبيهة في شي مهم جدا جدا .. انتي لازم تقوليهو لي ندى .. انو الامين زول جلدة .. ومابطلع القروش.. ولو ندى عايزة تضمن حياتها معاهو .. تقول ليهو انا ما بقبل بيك .. الا تبني لي بيت ملك .. يعني الزول ده ممكن يعيشها عمرها كلو في بيت ايجار .. ويضيع القروش في حاجات لاتسمن ولا تغني من جوع.. نبيهة قالت ليهو غايتو انا بكلمها وتاني هي مخيرة.. ونشوف ردة فعل البت المنداحة .. بتقول شنو؟اها هناك طبعا ايمان متضايقة جدا جدا .. من التغيير والمسخ الحصل على شخصية زوجها ..

يازول اول ما جا بالليل متأخر .. لقاها قاعدة منتظراهو.. وهي طبعا" ماعندها اي فكرة عن الحاصل في حياة الامين.. اول من جا من برة.. قال ليها سلامات .. امسيتو طيبين؟ورقد طوالي.. قالت ليهو الله يسلمك .. طيبين نحمد الله.. يا الامين؟؟قال ليها نعم .. اها مالك؟ في شنو يا ايمان؟.. قالت ليهو اناعايزة اتكلم معاك صحصح لي .. كل يوم بقيت تجي متأخر وتعبان .. وتنوم والصباح تقوم .. انا النهار كلو بكون بتزين .. ومهتمة بي نفسي.. وكل يوم البس ليك لبس شكل براهو.. وانت ولا معبرني بي نظرة.. قعد على حيلو .. قال ليها اها في شنو يعني ..؟

اعمل ليك شنو؟ اقعد اتغزل فيك؟ اكتب فيك شعر؟ وريني... قالت ليهو لادا ولا ده .. بس لو انا غلطانة عليك في حاجة .. كلمني .. لو يوم سمعتك كلمة مارضتك.. كلمني.. انت يا الامين اتغيرته شديد .. انا ماعارفة الحاصل عليك شنو؟ولو يا الامين انت مليت مني وكرهتني .. برضو وضح لي.. الامين قال ليها مافي اي حاجة يا ايمان.. انتي موهومة وبتتخيلي حاجات ماواقعية.. مافي حاجة غير اني انا مشغول وما فاضي .. انتي دايراني اعمل شنو مثلا؟؟ انا بعد اقفل الدكان .. بمشي ماموريات .. الدامر.. ومرات بربر ومرات وين وين .. وبرضو بحاول اجي بدري ..

عشان ما اتاخر عليكم.. صاح بجي بنوم طوالي .. لاني بكون تعبان ومرهق من الوقفة والجري في الشغل.. لكن ابدا ماحاسي بي نفسي متغير منكم.. انا (عندي منو غيركم انتي والصافي) ؟؟ ايمان المسكينة الكلمتين الاخيرتين ديل غيرو ليها نفسياتها ..(انا عندي منو غيركم انتي والصافي) .. وكأنه في زول مسح ليها الزعل من قلبها بي استيكة .. طوالي بقت تتكلم معاهو طبيعية .. وعادية جدا جدا .. قالت ليهو خلاص ماتزعل نفسك.. بس لانو نحن محتاجين ليك معانا يا ابو الصافي..غايتو الحريم ديل الواحدة .. اسهل حاجة انك تزعلها.. واسهل حاجة انك ترضيها ..

يعني لو زعلانة دايرة تطق .. كلمة طيبة بسيطة عاطفية كدا.. ممكن ترضيها وتنسى الزعل.. المشكلة الأزواج .. مابقدرو يقولو الكلام الحلو .. ماعارف ليه .. يقول ليك زعلانة؟؟ خليها تطرشق.. يعني هسي الامين استعمل مع ايمان اسلوب النفاق اللف والدوران لكن مصيرو ينكشف.. الصافي الصباح قام من النوم بدعك في عيونو.. وبعاين لي السرير بتاع ابوهو.. وكان متمني يلقا ابوهو لسا ماطلع.. لكن لقى ابوهو مافي .. قال ليها ياامي.. ابوي ده انا بقيت مابشوفو.. بالليل بي متاخر .. والصباح بلقاهو فات .. انا تاني مابنوم الا يجي..

قالت ليهو مامشكلة يا الصافي.. باكر الجمعة .وابوك ح يكون قاعد في البيت.. وانت مابكون عندك مدرسة .. باكر ان شاء الله تشبع فيهو.. ابوك تعبان من الشغل.. وشقيان عشانا نحن حبيبي .. نحن لازم نقيف معاهو ومانضايقو.. والامين الليلة الخميس ده بالعصرية عندو مواعيد يلاقي ندى في المقرن. جمب الكوبري.. قفل دكانو من الساعة 4 .. واتخارج مشى انتظرها في مكان المواعيد .. اها جاتو ليك لابسة لبس فظيع .. لبس لو ايمان سكروها مابتلبسو ..

وتلوك في اللبانة زي الغنماية البتاكل ليها في كيس.. وخشمها ده مالياهو بوهية حمرا كدا تشوفا تحلف تقول شاربه ليها كوز دم .. غايتو جنس بشتنة؟؟ وهو طبعا من شافها حيلو مات.. وبقى يتكبكب .. وبي قلبو ينضم براهو .. ياخوانا هسع دي ممكن ترضى بي انا العربي المقطع ده؟ معقول ياخي؟؟ دي بت العز والغندلة.. بالله شوف البت دي وشها يضوي .. وهو ماعارف الجمال ده 50 في المية منو مزور وغير طبيعي .. والبياض ده دقيق ساي .. بت عندها نقص نفسي جد..هههه (انا اتذكرتا لي نكتة رسلها لي واحد البارح .. قال لي في واحد ماشي مع حبيبتو ..

وكانت عاملة عمايل فوق وشها وعيونها وخشمها.. كلها بدرة وطليات.. اها وهو مبسوط .. بالجمال الماشي معاهو ده.. قامت المطرة صبت.. والحاجات كلها ساحت .. والبت وشها اتغسل .. وخرخر فوق هدوما .. وبقت شكلها فظيع .. قام هو اتلفت عليها كدا شاف المنظر .. قال ليها (أدم جيب سفه) .المهم.. ندوية قعدت مع المعلم .. وبتونسوكدا.. طبعا كم مرة بتلاقو يعني .. احتمال دي المرة السادسة ولا السابعة ماعارف .. وخلاص اتعودو على بعض .. وماتنسى ندى لسع ماعارفة حبيبها متزوج وعندو ولد.. وهو كل مرة يحاول يبوح ليها بالسر.. وبخاف انو يفقدها ..

وهو بدا يتكلم معاها .. قال ليها والله ياندى انا بقيت كل يوم بعشقك اكتر من القبلو .. ومابقدر اتخلا عنك .. وان شاء الله بس اشوف فرصة واجي اتقدم ليكم في البيت طوالي.. قالت ليهو والله يا الامين انا ذاتي نفسي انك تجي.. لكن انا عايزة اتكلم معاك في موضوع مصيري.. طبعا انت ساكن في بيت براك عذابي في الشمالي زي ماحكيت لي والبيت مؤجر صاح؟ قال ليها ايوة صاح.. قالت انا يا الامين سكن في بيت ايجار مابنفع معاي .. لازم تبني لي بيتي يكون ملكي .. انا مابقدر اعيش في بيت ايجار.. واهلي اساسا" مابقبلو الحاجة دي.. لانهم ناس اغنياء ..

وبي قروشهم .. انت بتقبل يدوك بيت .. يكون حقي .. وانت تسكن معاي في بيت اهلي؟قال ليها لالا مابقدر .. قالت ليهو خلاص.. ماتخطو اي خطوة قبل ماتشتري قطعة وتبدا فيها بناء.. قال ليها لكن كدا ماعصرتي علي شديد..انا لو بعت الدكان بما فيهو.. مابقدر اشتري قطعة في الظروف الراهنه .. الا نصبر شوية نلم ليها .. قالت ليهو اخد راحتك انا مامستعجلة.. بس ماينفع معاي بيت ايجار .. معليش.. قال ليها حاضر انا بتصرف .. سكت ساي.. وبقى يسرح هنا .. ويقبل جاي يسرح هنا .. اتذكر القعدة حقة القمار..

وكمية القروش الممكن يربحها منها.. المهم فكر في القمار بجدية .. وبقى يودي ويجيب .. ويقول بينو وبين نفسو ياجماعة انا بعد الحال ده .. تاني ادخل عليا قروش الحرام .. زمان جدي قال لي (حق الحرام بياخد الورا والقدام).. لكن هسع انا في ضرورة .. ولو بقيت اتردد ندى بتضيع مني .. انا العب كم لعبة كدي.. الم لي قريشات وبعدين .. اتوب وابعد من الحكاية دي .. وربنا غفور رحيم.. ندى قالت ليهو يا الامين.. انت سارح وين؟ انت عايز تعيش عمرك كلو في بيت الرجال؟موش لازم يكون عندك بيتك خاصي بيك؟قال ليها والله كلامك صاح..

هو الزول بعيش في الدنيا دي كم مرة؟.. يازول بس بقى لامتين يمشي لي بيت العذابة.. عشان يقول ليهم انا مستعد للعبة .. اصلا من زمان بحنسو فيهو.. وهو بقول ليهم .. حمانا الله .. وقاعد معاهم.. طبعا ياخوانا الزول البجالس اهل المعاصي حتى لو هو بكره المعاصي .. ح يتعود على رؤيتها.. ويستسيغها بطبعه.. فيصبح من السهل عليه ممارستها .. عشان كدا ربنا قال ((واذا رايت الذين يخوضون في اياتنا فأعرض عنهم حتى يخوضوا في حديث غيره))..

وقال رسول الله صلى الله عليه وسلم من كان يؤمن بالله واليوم الاخر فلايجلس على مائدة يدار عليها الخمر.. والنصوص في المعنى ده كتيرة.. بعد اللقاء التاريخي الكان بين الامين وندى .. رجعو.. ندى مشت على اهلها .. والامين مشى بيت العذابة عديل.. ولقاهم قاعدين والواطة مغربت .. قال ليهم الليلة انا عندي ليكم راي.. باكر الجمعة عندكم قعدة مطعمة ولا ماعندكم؟ .. طبعا الفاظ القمرتية .. وكت يقولو (مسيخة) .. معناها كشتينة بدون قروش ..

وكت يقولو (مطعمة) معناها اللعب بي قروش قمار يعني.. عبد المنعم قال ليهو من الساعة 9 صباحا" لغاية بالليل.. وجايينا جماعة.. شايلين قروش بالهبل.. قال ليهو انا باكر .. من 8 ونص بجيكم عندي مليون مربوط.. يا حرقتو .. يا لميت العندكم .. والجاية من الله حبابها .. وطلع .اها بعد مرق.. واحد قال لي عبد المنعم .. اها ياعبدو فكرتي طلعت كيف؟ والله الزول ده بكرة ح نعمل ليك فيهو عملية .. تخليهو يشرب مايروى.. عبدالمنعم قال ليهو .. والله انت طلعت شيطان رجيم ..

اعوذ بالله منك ياخي ..(ده الزول الازرق القالت عنو ندى اصلو ماحبيتو هه)..الامين مشى البيت عادي.. وبقى يتكلم مع ايمان كويس .. وايمان حاسة بيهو فرحان كدا.. ماعارفاهو مالو.. وكل مرة يسرح ويتبسم براهو.. ايمان قالت ليهو انت يا الامين الليلة فرحان كدي مالك ..؟والغريبة انا يا الامين.. من المغرب قلبي مقبوض ومامرتاحة .. وحاسة بي خوف .. اول مرة في حياتي تحصل لي الحالة دي.. قال ليها لالا مافي حاجة.. انتي بتتوهمي ساي.. قالت ليهو لالا دا ماوهم .. انا ماقاعد يحصل لي كدا اصلا ..

الله يستر غايتو ماعارفة.. اها يازول ما اشتغل بيها كتير.. راجي لامتين تصبح الواطة .. بس قال ليها انا طالع الصباح بدري.. عندي موضوع .. وانكفى نام.. من الصباح الصافي قام من النوم.. قبل الشمش ماتشرق.. لقى امو بتكوي في هدوم ابوهو .. ولقى ابوهو نايم في سريرو.. وفرح فرح شديد. مشى اتسوك وصلى وجا قعد في السريروربع ايديهو وبعاين لابوهو نايم .. بس منتطره يصحا من النوم وكت ماقام .. جا صحاهو.. قال ليهو ابوي ابوي .. قوم انت صليت؟ قال ليهو مالك يا الصافي.. ؟؟ انت مابتنوم؟؟. قال ليهو انت يا ابوي لو تعبان.. قوم صلي..

وتعال نوم تاني.. انا برجاك صاحي.. قال ليهو انت يا الصافي داير شنو بالضبط؟؟.. قال ليهو دايرك انت .. داير اتونس معاك .. لاني من زمان ماشفتك كويس.. الامين هززا راسو كدا .. ورجع رقد وطوى المخده حول راسو وخطى بيها وشو.. والصافي حس انو ضايق ابوهو .. طوالي مشى خش جوة في الاوضة .. ومد قدومو عمل زعلان.. وماقدر ينوم تاني .. ايمان انتهت من المكوة .. ودخلت المطبخ تجهز الشاي .. والامين قام على مهلتو.. يتمغى ويتطلق وصلى صلاة كدا لامنها لاعليها.. ولبس هدومو.. وختت ليهو الشاي ..

وقالت ليهو والله يا الامين انا صدري مغموم غمة شديدة خلاص.. عليك الله ماتمرق .. خلك معانا الليلة .. ماتقوم تحصل ليك حاجة في الشارع .. وانا الندامة تكتلني.. قال ليها انتي يامرة موهومة؟؟ ولا دايرة تعملي لي موضوع جديد بتاع حريم مهووسات .. عاينت ليهو كدا وبلعت ريقها وسكتت.. والله الامين ده اتغير تغيير.. لمن يحير ياخي الامين ده كان مسكين الغنماية تاكل عشاهو .. في اقل من سنة بقى يتكلم كلام عجيب وغريب..اها يازول شرب الشاي واقف علي حيلو.. وداير يمرق الصافي جاهو مارق من جوة.. قال ليهو يا ابوي.. انا راجيك من قبيل ..

عشان اشوفك كويس.. انت ماشي؟ قال ليهو تشوف لي شنو يا الصافي؟؟ انت داير تبقى زي امك.. الصافي قال ليهو ابوي عليك الله ماتمشي .. عليك الله ماتمشي.. قال ليهو الصافي انا بجيب المطرق ديك.. واجلدك بيها .. سيب الدلع انا عندي مشوار ضروري.. قال ليهو لالا جيب المطرق اجلدني.. واقعد معانا ماتمشي .. وقعد يبكي .. الولد وقف لابوهو في الطريق.. وفرد يديهو مداهن كدا يعني زي الساد الطريق .. قال ليهو ماتمشي يا ابوي.. عليك الله ماتمشي.. الامين مسك الصافي من يدو.. وجراهو دفرو كدا.. لامن الولد وقع على صلبو في الارض ..

وطلع بدون مايعاين للولد الحصل ليهو شنو؟ايمان جات رفعت الصافي من الارض.. ونفضت ليهو هدومو.. وقالت ليهو خلاص يا الصافي .. انت ليه مابتسمع كلام ابوك؟.. ابوك عندو مشوار قال ليك.. .!! خلاص ماتزعل.. والصافي يبكي ويعاين للباب .. متخيل انو ابوهو يجي راجع.. لكن للاسف الامين فات.. الى اللقاء ..