الفصل التاسع عشر

كوكو رقية واختها دقن الباب بتاع الصالون الفاصل بين الرجال والحريم.. وجن داخلات .. والدق حق الباب ذاتو كان بي ازعاج وافترا شديد خلاص.. الصافي لامن اتخلع ..

ياربي في شنو؟؟ ماتكون حصلت مصيبة على خالاتي ديل .. قام بي سرعة من محلو وطلع برة من الصالون .. وقف في الحوش شافن ليك جاياتنو ..

رقية قالت ليهو اسمع يا الصافي .. مافي داعي انك تلعب بي اعصابي .. فتحت دولابي وجدعت هدومي في الواطة مافي مشكلة.. كدا اتسديت .. لكن تشيل الدهب؟؟ دي كبيرة وانا ماح أسامحك فيها ..

الصافي قال ليها .. شنو؟ شنو؟ شنو؟ قلتي شنو؟ انا ماسامع كويس .. ده كلام شنو البتقولي فيهو ياخالتي رقية ..؟؟

منو البفتح دولابك؟ ومنو البشيل دهبك .. ؟؟ انا؟؟ ههه

والله لكن دي قصة ..!!

قالت ليهو اسمع .. اوعا تستهبل علي .. وتعمل لي فيها بري.. انت الوحيد القاعد في البيت ده .. والدهب اتفقد وانت موجود ..

قال ليها انا اساسا ماقاعد ادخل جوة .. وحدي الصالون ده وحوشو.. متين شفتيني دخلت ليكم جوة .. ؟؟ اخر يوم كنت جوة لمن حبوبتي الملكة الله يرحمها عيانة .. تاني والله ماحصل عتبت لي جوة ..

قالت ليهو اصلك مابتقنعني .. جيب الدهب.. لو سمحت يا الصافي ..

والا والله العظيم انا بتخذ معاك الاجراءات القانونية ..

قال ليها يارقية.. قلت ليك انا مادخلت جوة .. ومافتحت دولابك.. وماشلت دهبك .. لو مامصدقاني اعملي الفي بالك .. انا ماخايف من حاجة ..

وخلاهن واقفات الاتنين .. ودخل مسك كتابو وبقى يقرا .. بهية قالت لي رقية الزول ده شال الدهب.. اوعك تسمعي استهبالاتو دي ..

يعني الح يشيلو منو ؟.. نحن ماعندنا زول بشيلو.. ومافي حرامي بجي يوم الجمعة من الصباح ..

طوالي المراة ضربت لي اخوها الاسمو خالد .. قدر ما دقت التلفون

ما فتح ليها الخط ..

قالت ليها يا بهيه اسمعي .. نحن لازم نمشي نفتح بلاغ سريع .. ارحكي هسي بي ركشة لي مركز الصافية ده.. ونجي ..

قالت ليها والاولاد؟؟ .. قالت ليها برجعهم ناس مدينة (الجيران) يقعدو معاهم لغاية ما اجي .. موش فكرة؟ قالت ليها يلا..

مشن طوالي خلن الاولاد عند ناس مدينة.. ووقفن في الشارع اشرن لي ركشة الاتنين.. الكلام ده كلو في نهار الجمعة قريب 11 ونص كدا ..

مشن للمركز .. السلام عليكم .. الملازم المحرر بتاع البلاغات قال ليها عليكم السلام .. اها نعم .. قالت ليهو نحن عندنا دهب مفقود مشيول من دولابي ..

قال ليها متهمين زول .. ولا بلاغ ضد مجهول؟ .. قالت ليهو متهمين زول ..

بهية قالت ليها لالا .. قولي ليهو ضد مجهول .. عشان ماعندك بينة ..

ابت تسمع كلامها .. قالت ليهو لالا .. ما مجهول ياسعادتك .. انا متهمة ود بت خالتي.. قاعد معانا في البيت.. بقرا في الجامعة .. قال ليها بس الزول ده ح نجيبو ونحقق معاهو.. انتي لازم تكوني عارفة الكلام ده.. الحكاية دي عندها تبعات اسرية مادام قريبك ..

دايما" الضباط الواعين .. بفكرو بي عقلانية عندنا في السودان برضهم اولاد بلد والله .. قالت ليهو خليهو يتجرجر انا ماعندي مانع ..

بهية قالت ليها .. والله كلامو صاح يا رقية.. هسع احمد اخوي يقول شنو؟ وناس ايمان والامين في عطبرة يسمعو ..

قالت ليها ديل بضرب ليهم انا براي.. الزول سرقني يابهية اقعد اخت يدي فوق خشمي واسكت؟

المهم الضابط وكت سمع نقاشن .. قال ليها خلاص باكر تكتبي عريضة .. وتوديها لوكيل النيابة .. يحرر ليك امر قبض للمتهم ..

المهم رجعت البيت .. واصلو ماكلمو زول بالمشوار الجريمي ده.

والصافي قاعد في الصالون بقرا ماجايب خبر بالحاصل بي وراهو ..

بغد شوية قام يتجهز للجمعة ..

بهناك قامت رقية المغفلة شالت تلفون ايمان .. وضربت ليها في عطبرة .. ودارت المكالمة الاتية ..

رقية: الو ازيك يا ايمان كيفانتي والاولاد ؟؟..

ايمان: مرحب بيك يابت خالتي الغالية.. كيف احوالك وكيف بهية وناس البيت والصافي.؟؟

رقية: كويسين يا ايمان.. لكن والله عندنا مشكلة طويلة وعرريضة مع الصافي ..

ايمان: في شنو؟ ان شاء الله خير.. الله لاجاب مشاكل يارقية؟

رقية: والله يا ايمان.. انا بالغلط فتحت دولاب الصافي.. بفتش لي ضفارة.. اظنو ولدي الصغير شال ليهو ورقات بدون ما اشعرمن دولاب الصافي .. والصافي وكت جا.. كاس للورقات.. وولدي رجعن ليهو .. ولمن عرف اني انا فتحت دولابو زعل ..

وخلاني مرقت .. جا فتح ولابي .. وجدع لي هدومي .. وشال دهبي ..

وابا يعترف لي.. كمان بتنهر.. هسع انا مشيت فتحت فيهو بلاغ .. (رقية تتكلم وايمان ساكتة اصلو ما اقطعتها) .. ومواصلة.. قالت ليها مشيت فتحت فيهو بلاغ.. الضابط قال لي باكر تجي تقدمي عريضة لوكيل النيابة .. عشان يقبضوه بامر قبض .. بس انتو لازم تكونو عارفين عشان مايجي بعدين يكضب ليكم ..

ايمان: خلاص خلصتي كلامك يا رقية؟

رقية: ايوة ده كل الحصل ..

ايمان: ليها والصافي عارف بي قصة البلاغ؟

رقية: لالا ماكلمناهو عشان مايهرب ..

ايمان: عملتي كويس ..

طيب يارقية.. انا لو قلت ليك الصافي ولدي مستحيل يعمل كدا .. ما ح تصدقي ..

لو فرضنا جدلا" .. انو الصافي فتح دولابك.. وشال الدهب ..

انا بكرة بجيك.. وبرجع ليك دهبك.. ولا بديك تمنو على داير المليم .. بس حكاية عريضة ووكيل النيابة دي بتجيب لينا كلام الناس ونحن ناس اهل ..

انتي تستاهلي اكتر من الدهب.. ولاتزعلي روحك .. بس اصبري عشان خاطري لي بكرة .. انا اجي واحل ليك مشكلتك ..

رقية: خلاص انا بصبر لاباكر ونشوف البحصل شنو؟

وتيت تيت قفلت الخط ..

ايمان دي زعلت زعل.. من كلام رقية في الصافي.. واليوم داك بكت جنس بكا .. وبراها تنضم داخلة ومارقة .. ياحليلك يا الصافي .. والله انا ممكن اقسم بالغيب.. ولدي انا مابعمل كدي .. وحسي انا قلبي واجعتي على الاهانة الصابر عليها ..

الله يجبرك يا الصافي .. سبحان الله .. هو منو الزي الصافي حبيب قلبي؟؟ البستر العيب ومابتدس الفي الجيب .. هو منو الزي الصافي ولدي الدهب المجمر ..

وكل مادايرة تشيل التلفون تضرب للصافي.. عشان تحكي ليهو يغلبها تقعد تبكي ..

الامين طلع عقد بعد صلاة الجمعة.. في حتة في الدامر اسمها طيبة الحسناب .. وهي منتظراهو يجي تحكي ليهو ..

الرشيد ود الامين اخو الصافي عمره 9 سنوات.. عاين لي امو كدا لقاها تبكي .. جاها قال ليها امي انتي بتبكي مالك؟

قالت ليهو اشتقت للصافي اخوك؟ قال ليها هو ليه بقى مابجينا ؟؟ اناذاتي اشتقت ليهو ..

قالت ليهو بقرا في الجامعة عشان يبقى مهندس كبير ويبني العمارات .. ويبني ليك انت عمارة كبيرة.. قدر عمارة ناس ادريس دي ..

قال ليها طيب مالو مابنى لابوي عمارة؟

قالت ليهو لكن هو لسه بقرا في الجامعة .. ماببدا البناء الالمن يتخرج .. انت هسي داير تبقى شنو؟

قال ليها انا داير اكون سواق طيارة.. وامشي السعودية واشوف الكعبة المشرفة .. قالت ليهو ماشاء الله.. خلاص بتسوقني معاك؟

قال ليها ايوة انتي بتكوني راكبة معاي قدام ..

قالت ليهو طيب وبسمة؟ قال ليها بسمه بسوقها المرة الجاية.. معاها ابوي ..

لو ملاحظين ايمان بدت تتونس مع الولد بي كل احاسيسها كانو ماعندها مشكلة ..

هسي دي لو مراة تانية .. تقول للولد .. طير من قدامي كدي.. انا الفيني مكفيني .. لكن ايمان فصلت بين شعورها السلبي وواجبات الامومية.. ربنا يكتر من امثالها بت الكرام ..

ايمان دخلت جوة .. بقت ترتب في هدومها .. وتظبط في حاجاتها .. وعندها دهب ربطتو في قطعة.. لفتو في توب وختتو في الشنطة ..

وناوية تديهو لي رقية عشان كرامة ولدها ..

ايمان الان عمرها يقارب ال 38 سنة.. لكن البشوفها يقول اخت الصافي الكبيرة .. مابخت انها دي امو .. ممكن تكون ام الصغار ديل ..

مراة ولا الف مراة.. ست بيت .. وزينة واهتمام .. سبحان الله .. ولم تشغلها شؤون البيت والاطفال من اهتمامها بي نفسها .. حتى نسوان الحلة مسمنها (مقدرة) .. لانها مشيتها في الارض بي حساب ..

المهم يازول الامين جاء .. والساعة ونص العدتن ايمان قبل مايجي الامين دي.. كانت اصعب ساعة ونص في السنة .. من الزعل والتوتر والحزن الحاسة بيهو المراة دي ..

الامين جا .. طبعا راكب عربية بوكسي موديل 2001 دبل كابين ..

الراجل رطب.. والبيت ملك .. والعربية في السلك .. والاوضاع مستقرة ماشاء الله ..

والامين ذاتو بي نفس الشكل.. الخليناهو بيهو قبل عشرة سنوات .. بس في حبات شيبات كدا .. في دقنو الصغيرونة التحت حنكاتو دي .. وغرة الصلاة فوق وشو .. والراحة ظاهرة فوق وشيهو والترطيبة ..

وتاني ماشاف ندى المنداحة لغاية اللحظة دي.. قالو اتزوجها عبدالاله

وساكنة في الدرجة .. (حي من احياء عطبرة) ماعارف لو عندها اولاد ولالا ..

وعبدالمنعم ما اتزوج نبيهة.. نبيهة اتزوجها واحد من ناس نهر عطبرة .. من منطقة الهودي.. واستقرت في الدامر ..

وعبدالمنعم لغاية اللحظة دي .. في بيت العزابة .. بس بطل السكر والبنقو والقمار.. وبقى زول صلاة.. لكن مفلس وحالتو بالبلاء .. وعمرو قريب الخمسين ولا اتزوج ولاعندو نيه ..

ده الحاصل في عطبرة بي اختصار .. وكل ماتجينا حتة بنفصل فيها..

اها نرجع لي ناس الامين وايمان ..

اول ما الامين دخل.. ايمان قالت ليهو.. اعمل ليك شاي ولا قهوة ..

قال ليها والله اتغدينا فضلة خيرك .. وشربنا الشاي .. عند ناس المناسبة .. لكن قهوة كويسة ..

مشت عملت القهوة سريع.. وجات كبت ليهو.. وابت تفتح الموضوع ..

لغاية ما كمل قهوتو بي مزاااج واتكيف تمام ..

قالت ليهو اتصلت علي قبيل رقية بت خالتي الملكة .. وقالت قالت قالت .. حكت ليهو كلامها بالتفصيل .. لغاية البلاغ والعريضة وامر القبض...

قال ليها شنو؟ شنو؟ شنو؟.. قتي شنو؟ .. انا ماسامع كويس .. ده كلام شنو البتقولي فيهو يا ايمان؟ (نفس عبارات الصافي بالنص)

معقول الصافي ولدي انا يعمل كدا؟؟

مستحيل.. دي مراة موهومة .. والطلاق عمل ليها نفسيات .. وجنت الجن اليفقها ..

ايمان قالت ليهو .. ماتقول كدي يا ابو الصافي .. الزول وكت تروح منو حاجة زي الدهب ده.. بقعد يتخبط .. ومابعرف بقول شنو .. المراة مسكينة.. ومكسورة جناح.. تلقاها ماعندها غير الدهيبات ديل .. ومالقت زول ترمي فوقو الحمل غير الصافي ولدي..

لانو الغريب الوحيد في البيت ..

انت اصلك ماتنفعل وتزعل .. لو بتزعل والله مابسوقك معاي.. بركب بمشي براي.. ح ابري ولدي من التهمة .. وبجي راجعة ..

قال ليها لالا .. ابدا والله انا قلبي يقول لي.. نقوم حسي نسافر ..

والله الصافي هسي تلقيهو كاره نفسو .. اكتر حاجة بتضايق منها الصافي .. انو زول يتهمو بالكضب.. ببقى زي المامركز ..

ايمان قالت ليهو لالا مافي داعي للاستعجال .. اصبر لاباكر صباحات الله بيضاء .. نجهز حالنا ونسوق الاوولاد معانا ونمشي .. الموضوع بتحل ان شاء الله .. بس انا دايراك انت تطول بالك .. وما تخسر علاقتك معاهم بي سبب مشكلة بسيطة .. تتعدى ان شاء الله ..

الامين عاين ليها كدا ..

قال ليها دايما" بتاخدي الامور بي بساطة .. انتي عارفة هسي نفسيات الصافي بتكون كيف؟ .. قالت ليهو مهما تكون فسياتو كعبة .. ولدك مابتصرف غلط .. انا واثقة منو يسلم لي دخري الحوبة ..

قال ليها طيب على الاقل .. اتصلي عليهو كلميهو.. قولي ليهو نحن جايين ..

قالت ليهو هو طبعا ماعارف انها فتحت فيهو بلاغ.. ولو قلنا ليهو نحن جايين ح ينزعج .. واحتمال يمشي يفتح معاها نقاش .. انت اصبر بس خليني اتصرف يا الامين ..

قال ليها طيب هسي يعرف كيف نحن جايين ..

قالت ليهو بنضرب ليهو لمن نقرب على الخرطوم.. اول من نصل الجيلي ولا الكباشي.. بنضرب ليهو نقول ليهو نحن جايين لموضوع .. وقربنا عليك انتظرنا في البيت ..

الامين طبعا ماعندو حل غير انو يقول ليها خير يا ايمان ..

لكن صراحة الامين زعلان زعل شديد من التهمة دي.. يتوحوح .. واصلا من زمان رقية دي مابدورها كلو كلو .. وشكلو كدا لمن يصل بنفصم في ابواهلها ذاتو ..

المهم باكر صباح السبت ساقو الولد والبت .. وركبو العربية وملوها بنزين من طرمبة السوق بتاع عطبرة واتوجهو الخرطوم ..

الى اللقاء ..