الفصل الثالث والعشرون

المهم يازول في النهاية .. حمد قرر يكلم الزاكي بي موضوع القروش .. على الاقل يكون اختبار لمدى ثقة الزاكي في حمد .. وعلاقتو بي فدوى هل هي نزيهة ام لا ..

قام حمد قال .. يا الزاكي والله فدوى زعلانة شديد وشكلها قنعانة .. قال ليهو كيف؟ وانت عرفت كيف؟

قال ليهو طبعا انا عندي صديق عزيز على حكيت ليك بيهو .. اسمو صديق. وهو الزول الانا بديت الشغل معاهو .. وليهو الفضل بعد الله في كل الحاصل ..

المهم يوم حكيت ليهو عنك وعن فدوى .. واتعاطف مع القصة واتفقنا انو نرسل مصاريف لي فدوى ورسلنا ليها نفرين .. مابعرفوها ولاعندهم علاقة بينا .. عشان يقولو ليها القروش مرسلة من الزاكي ..

بس هي طبعا رفضت تستلم القروش .. وقالت قولي للزاكي ماتشيل همي انا شغالة ..

اها المهم الزاكي لمن سمع القصة كلها .. قال لي حمد والله ياحمد عمليتك دي مايعملها الازول اخو جد جد ..

والله فدوى لو عرفت انو القروش جاية منك .. او انت كنت طرف في المرسال. كانت قبلت بيهم .. لكن يازول انا متأكد انك انت بتقدر تقنعها وترجعها لي ..

حمد قال في نفسو .. الله اكبر .. الزول اتصلح ..

حمد في نفسو خايف جدا من ملاقات فدوى .. وكل ما يتذكرها بحس بي قلبو بضرب .. وهو مستغرب شديد في الحالة دي ..

وطول الوقت بحاول يشغل نفسو باي حاجة .. عشان مايفكر فيها ولاتجي سيرتها ..

بس ليه ماعارف ..

و الزاكي مصر عليهو بقول ليهو .. بس في اليومين الجايات ديل يا اضرب ليها تلفون.. يا امشي ليها انت وسماح.. والله لو تجيبوها لي انا اكون شاكر ..

قال ليهو يازول انت ماتشيل هم .. انا بتصرف .. وحمد جواهو ماعايز يمشي لي فدوى .. ومصر انو مايلاقيها كلو كلو .. ولايشوف وشها ..

واول مافكر فكر في حجة نصرة ..

المهم الزاكي مشى على اهلو وطبعا عزابي تب ..

ومرت يومين تلاتة وحمد بتصل على حجة نصرة .. لغاية مالقط التلفون بتاعها .. وقال ليها انا جاييكم في البيت ..

وباختصار جاها حكا ليها المستجدات في القصة كلها ..

ووراها الخوازيق الحصلت على الزاكي .. من مرتو الجديدة .. وانو الزاكي ندم وعايز يرجع مرتو ..

وانا ماعندي زول بقدر يقنعها غيرك انتي ..

انا بجيب سماح تقعد مع سلمي في البيت .. وانتي تمشي سنجة وتجيبيها في ديك وتجي ..

وحجة نصرة قالت ليهو والله ده احسن خبر .. وانا مستعدة ان شاء الله ياولدي ربنا يجبر كسرك ..

حمد ده فرح فرح بي موافقة حجة نصرة ..

اها لما مشى كلم سماح بالتطورات الحاصلة في القصة .. وقال ليها انتي تمشي تقعدي مع سلمى بت حجة نصرة .. عشان حجة نصرة تمشي تجيب المراة ترجعها لي راجلها ..

وسماح رحبت بالفكرة .. واتفقو على يوم السفر .. وفعلا حصل وسماح جابت بتها وجات لي سلمى .. وحجة نصرة سافرت شايلها الوصف والتلفونات في ورقة. بالتفاصيل .وحمد بقى قاعد في البيت براهو ..

وكل الناس متوترين .. وخايفين انو فدوى ترفض ترجع للزاكي .. بعد العملو فيها ..

اها يازول نحن .. ماشين مع حجة نصرة.. وارح .. سنجة.. ركبت من الخرطوم ..

وشايلة ليها سبت بتاع بلاستيك .. منسوج يدويا .. بطريقة فنانة .. فيهو دباسات .. مطبقة فيهو هدومها .. وشايلة معاها حلاوة مولد لاولاد فدوى .. ولعبتين..

واصلو ما إتصلت علي فدوى .. ولا على هدى انو جاياهم ..

اها طبعا وصلت البلد .. سنجة الجميلة .. ونزلت في السوق وسالت من الحي ووصفو ليها ووصلت البيت المحدد ..

وصلت زي العصر كدا قريب الغيبة ..

ودقت الباب .. واول ماسمعت من جوة.. سمعت فدوى قالت ليها عليكم السلام .. منو؟..

حجة نصرة قالت ليها افتحي الباب يافدوى .. يابتي دي انا .. ..

فدوى طوالي عرفت صوتها .. ومن جوة قالتلها .. خالتي نصرة ؟؟ ياحليلا ياحليلا ..

فتحت الباب .. وسلمت عليها بكل لهفة وشوق .. سبحان الله المحبة البينها وبين فدوى .حكاية ماتتوصف ..

اها يازول حجة نصرة بعد اخدت راحتها .. وسلمت على الناس .. واتكيفت جدا من هدى واولادها .. واحتضانهم لي فدوى واطفالها الاتنين ..

وطلعت حلاوة مولد واللعبات .. للاطفال .فدوى طبعا" مندهشة من جية حجة نصرة لغاية سنجة ..

اها يازول في القعدة الجميلة دي والواطة خلاص اتمست.. وبعد الاولاد كلهم نامو .. واليوم داك هدى زوجها كان في مأمورية في القضارف ..

بدت حجة نصرة تحكي في عمايل بسمات .. وتعذيبها للزاكي والحصل كلللو ..

وفدوى دي كل مرة دموعها يكبن وتقشهن سريع. .. عشان نصرة وهدى مايشوفوها ..

خصوصا "لمن حجة نصرة بتحكي في حتة انو بسمات .. هي كانت سبب في انو الزاكي يشك في فدوى .. وهي النقلت الاخبار المكذوبة في انو فدوى عندها علاقة بحمد ...

وهي الكانت بتسمم في عقل الزاكي .. في الحتة دي بالذات .. فدوى اتنخجت لمن حسو بيها.. بس بتبكي شديد كدا ليه؟

المهم في النهاية خلاص لما عرفت انو الطلاق بتاع بسمات تم ..

قامت مشت وخشت المطبخ .. وديل الاتنين شغالات لاهسع بنضمن .. وطبعا هدى بس شغالة لي حجة نصرة .. يستاهل الزاكي الكلب .. اريتها كان قفلتو في السجن .. وحجة نصره تسوي ليها اصبري النتم ليك ..

وفدوى في المطبخ تغسل في وشها من ماسورة المطبخ ..

اها فدوى لمن جات مارقة .. حجة نصرة بدت تقول في الجزء الاهم من الكلام ..

انو الزاكي ندمان وسافي التراب .. ويادوبو عرف قيمة فدوى .. وحنس الناس قال ليهم ترجعوها لي .. ونحن كلنا يافدوى يابتي .حتى مراة حمد اسمها سماح معانا ومنانا في الدنيا دي. انك ترجعي لي بيتك وابو اولادك.. وانا جيت من الخرطوم عشان كدي ..

اها يافدوى يابتي ده ياهو الكلام الجابني من الخرطوم ..

وحات ربي يا فدوى يابتي .. الزاكي راجلك بقى زول فاهم .. وخلا الطرطشة ديك كلها.

وتاني عمرو مايشك فيك ..

اها يافدوى انا راجياك ردي لي .. !!