الجزء 42
خليت الاب يفتح تمام ..
نزلتا بسرعه المطبخ .. فتحت دولاب الحلل تحت ، م لقيت شي ، قلبتو قليب ما لقيت شريط الحبوب ، اختفى !
مشيت جردل الزبالة ، قلبتو م لقيتو ،، طلعت براا ، مترددة امشي غرفتا افتشو ولالا ، ولانو الوقت اتاخر كنت متوقعه يجو داخلين في اي لحظة .. بعد تردد ، مشيت علي الغرفه ، بلذ في الباب ابا يفتح ، فتحتو بالاكرة ، اباا ، عرفتو مقفول بمفتاح .. المرة دي قصتا شنوو ؟ ..
رجعت تاني الغرفة ، قعدت للابتوب ، بحثت عن محل عثمان ، م عندي اي معلومات عنوو ، م عرفت اسوي شنوو ،، فتحت دولابو م عرفت حاجة ( دي مشكلة العلم الناقص يا ناس في ابسط الحاجات الواحد . م بكون نبيه الا لو بالفطرة ،، عدم التواصل مع العالم الخارجي والافتراضي مشكلة ،، حاجات بسيطه جداا لو بقينا علي علم بيها ، بتفيد والله ) ..
لقيت في الضلفة الفوق شنطة سوداء ، دي من يوم جيت البيت دا غايتو م حصل شفتو طالع بيها ،، المهم جريت كرسي التسريحه ، وطلعت نزلتها ، و قعدت ليها في السرير عديل ، فتحتها عديل ،، لقيت قروش ربطتين كلها ورقه كبيرة و لفة صغيرة دولارات ( اوع تكونو قايلني حاسرق ، اخس عليكم لكن ، ما اخلاقي يا ناس ) ..
ديل ما هبشتهم ، لقيت اوراق الشغل كلها ، قريتا تمام ، و شربت اسرارو شرااااااب ، زي م تقولو كدا نقاض ضعفو وين بالضبط ، وعرفت اسم شركتو المتحدة ، وحتي ارقامهم و الناس الكان متعاقد معاهم ، والناس الخاتيهم هدف قدامو ، و عرفت # سر متاكدة حيقلب كل الموازين .. ّبعد قفلت الفايلات ، لقيت ظرف بالجمبه .. فتحتو لقيت فيهو استشارة مع دكتور ، التاريخ حقها ، بعد تلاته يوم من الليلة .. صورتا الروشته عشان فيها رقم العيادة ( الله يخلي لي تلفوني ) ..
و قفلتا الشنطة زي الما شفتها اصلاا ، انا عملتا حاجة ؟ ولا هبشتا حاجة ؟ اكيد لااااا .. طلعت رفعتها مكانها ، و رجعت الكرسي حقي مكانوو ..
رجعت سريري ، حفظت رقم العيادة و اسم الدكتور .. بحثت عن شركتهم و دخلت حساباتهم ، وحتي الازمة المارين بيهاا ، المهم اتقى شر الحليم اذا غضب !
مساهرة في النت لحد الساعه 3 صباحاً انا اشيل و اقرااا لمن عيوني وقعن .. زبطت منبهي للصلاة وطفيت لابتوبي ، و رقدتااا ، نمتاا ،، سبحان الله م كنت بقدر اقعد براي ، لكن قلبي قوى فجاة ..
( في جانب تاني )
_ احكي احكي والله ما اقفل الا تحكي لي كل حاجه يا كرم
* عاين ما تصغط علي
_ شوف انا بعرفك لي كم ؟ م حصل شفتك مساهر للساعه 1 فما بالك لحد الساعه 3 !
* اسي انت داقي عشان كدااا ؟
_ ايوة وجودك في الماسينجر خلعني والله
* منتظر الصلاة وانوم
_ يا الله ،كررررررم انت م عندك خيار تاني انا لازم اعرفك مالك ، احكي ياخ
* موضوع اكبر من انو يتحكي وماف زول حيتفهمو
_ انا ما اي زول ، اتوكل احكي
* طيب ، لو قلت ليك انا متورط ، متورط في دوامة مشاعر كدا اكبر من طاقتي ، متورط في حب ما حقي مالي ، في حب غلط ، فكرتو كدا كلها غلط في غلط ، مجرد التفكير في الموضوع دا بيتعبني انا ما عارف كيف وصل بي الحال للمرحلة دي ، ماعارف والله ما عارف و الاكبر من كل دا ، الانسانة دي بتتأذي و ما قادر اسوي حاجة ، عارف احساس العجز ، بس انا حاسي اني عاجز انسان ضعيف بتدعي القوة والامبالاة ، بس في الحقيقة انا من جواي محطم ، غرقان بين المنطق والامنطق .... ارتحتا كدا ؟ّ
_ لا ماف حاجز بقيف قدام الحب يا كرم ، الحب هو البينتصر في الاخير ّ
* بتقول كدا لانك ما عارف ضخامة الموضوع ، انا خجلان من نفسي ، انا بستحقر نفسي من تفاصيل الحب داا ، دا حب غلط في غلط ، كل ما اتزكرا بكره نفسي بشمئز من نفسي ، يوم حبيت حبيت لي مرت راا ......
_ كمل كمل مرة شنووووووووو !
* سلام سلام
_ لا والله ما تقفل يا كرم ، مرة شنوو كمل كمل !
* مرة راااجل ، اااي مرة رااجل ، انا بحب مرة متزوجة ، كدا ارتحتا ّ!
............_
* سكتا مالك ، اكيد حسيت بتفاهتي اسي صح
_ شوف ، ماف زول بقدر يحاسب زول حبا ليهو زول ، الحب الحقيقي لمن يدخل جوا زول مقيم مبدأ الحب نفسو، عمرو م حيكون حب غلط او حب تافه ، وربنا بيجعل كل حاجة سبب ، رغم اني ما فاهم الموضوع كامل ، لكن متزكر اتك قلت لي اللنسانة دي بتتأذي ، بغض النظر عن نوع الاذى داا ، يمكن ربنا ختاها جواا قلبك ، عشان تبقى ليها طوق نجاة .... و ماف زول بيختار يحب منو ويكره منوو !
* دقيقه ردة فعلك دي عشان م تجرحني صح ؟ عشان انا صحبك صح ؟ ليه بتجاملني ، عينك في الغلط و تصححو ّ
_ يوم اجاملك حاكون انسان منافق ، انا قلت كدا لاني انسان متعلم و عارفك و واثق فيك وفي خياراتك ، و انا بؤمن بالحب .. وانا اتكلمت بالمنطق م اكتر ، و لمن جيت سألتك ما سألتك عشان ارضي فضولي او اسمعك و اوبخك او اقوليك والله ياخ ربنا يساعدك ،، لا انا ما حاجي الليله اقوليك انا منو ولا انت شنو ،، عاين للموضوع من وجهه نظري و حتعرف و تفهم انا قاصد شنوو ...
* عارف ، ارتحت لمن حكيت ، بس مجرد التفكير في انها مرة متزوجة دا بقتلني ، لدرجة بخاف اسمع حاجة ليها علاقه بيها في البيت ، و امي واختي طوالي في سيرتا ، وصدقني من خلال كلامهم عنها اي زول يحبها ، وحتي لو م كنت شفتها انا كنت حاحبها من كلامهم عنها ، رغم عنادها و رغم استفزازها لي و استحقارا لي في اول مرة ، الا انها هبشت قلبي من اول مرة .. صدق اللي قال قوية كالحرب ،و ناعمة كالسلااااام ..
_ اللهم حب زي دااا يالله ،وينك يا تعيسة الحظ وووووينك
* هههههههه بتجي بتجي ، اسمع بعد دا انا بقدر انوم والله بكرة عندنا شغلّ
_ اسمع ، بمناسبة الشغل ، فتحتو التعينات للفرع الجديد ؟
* من امبارح اديتكم الشروط والاوكي اعتقد بكونو نزلوو و من بكرة حتبداا
_ بكرة يوم طويل معناتووو ّ
* ربنا يسهل مافي حاجة ساهله
_ يا مهون ،، يلا
* لبكرة يلا يا صحبي ف امان الله
_ ف امان الله ..
صحيت مع المنبه ، قفلتووو ،،و اتقلبتا كداا ، لقيت عثمان راقد وتاكي ضهروو ف السرير ، اتخلعتا لاني م حسيت بيهو لمن جا ، طوالي قمتاا ، شلت ملحفتي ومصلايتي ، و طلعتا ، مشيت اتوضيت وصليت و دعيت تمام .. و جيت داخله ..
طلعت ملحفتي ، وجيت رقدتاا ،، عاملتو معاملة الاشيئ ، كأنه مخلوق غير مرئي ..
بعد رقدتا قالي : ........