الجزء 15

نعود لاحمد ومآب نشوف قصتهم انتهت على شنو ( طولنا منهم 😁 )

حسن : يا بتي صاحب المعرض المشينا اشترينا منو العربات قال عايزك

مآب : انا ما موافقة يا ابوي

حسن : 😳😳 لييه ما موافقة

مآب : ما ارتحت ليهو يا ابوي و كمان هو كان بعاين لي نظرات ما عجبتي

حسن : يا بتي كدي قولي بسم الله ،، اعرفيهو اول ، ما ترفضي ساي و استخيييري

مآب : نظراتو ما عجبتني و انا ما مرتاحة ، ارجووك ما تضغط علي ، كلمو اني ما موافقة

حسن : حيرتيني يا بتي ، انا نفسي اشووفك عروس و اشوف اولادك قبل اموت 😔

مآب : حتشوف يا ابوي ان شاء الله لكن من الشخص البرتاح ليهو ،، انا عشانك حاستخير لكن ما اظن حأغير رايي

حسن زعل عشان مآب رفضت العريس ، اتصل على احمد و كلمو انو مآب رفضت

احمد : 😳😳 رفضتني

حسن : اي والله

احمد : عمي حسن اديني فرصة و انا بقنعها ان شاء الله

حسن : طيب يا ولدي

احمد : طيب انا حأجيكم المساء ان شاء الله لكن ما تكلم مآب اني جايي عشان ما ترفض تقابلني

حسن : خير في انتظارك يا ولدي

احمد مشى اشتري باسطة و جاء لبيت مآب ، قابل حسن ، حكى ليهو عنو و عن اسرتو و طلب منو ينادي مآب عشان يتكلم معاها

حسن : يا مآب تعالي عايزك في موضوع ،، تعالي سلمي على الضيف دا

مآب : كويس يا ابوي و قالت ضيف منو يا ربي ، لبست عبايتها و نقابها و جات لابوها

لقتو قاعد مع احمد ، اتضايقت و سلمت

مآب : السلام عليكم

احمد : و عليكم السلام

مآب : اظن انو ابوي وراك ردي 😒

احمد : اي عارف انك رفضتيني

مآب : طيب جايي لشنو !!!

حسن : يا بتي انا ما عارف مالك رافضة كدة ، اقعدي ورينا وجهة نظرك و اسمعي منو

مآب : طيب يا ابوي

احمد : يا مآب متذكرة قبل خمسة سنة لمن كنتي بتقري في الجامعة هنا و كان في واحد متواصل معاك اسمو احمد .

مآب دقات قلبها زادت 💗 : احمد 😳😳 و انت بتعرف احمد من وين !!!

احمد : متذكرة لمن قلتي ليهو انا بحبك لكن حاسيبك لاني ما بقدر اعمل حاجة ورا ابوي و ما دايرة اكسر ثقتو

مآب : انت عرفت الكلام دا من وين !!! 😳😳 ، اوعى تكون

احمد قاطعها : اي انا احمد ذاتو

مآب : انت جادي 😳

احمد : والله انا احمد زميلك ، شوفي الزمن لف و لف و خلاني اشوفك تاني و جمعني بيك

مآب في سرها بقت تقول الحمد لله و كانت مبسووطة جدا 😍و قالت :سبحان الله بالجد الدنيا صغيرة ، ما كنت متوقعة الاقيك او يجمعنا القدر تاني

احمد : دي لعبة القدر يا مآب يجمع و يفرق

مآب : سبحان الله

حسن : 😧دا شنو دا انتو بتعرفو بعض !!!

مآب بخجل : اي يا ابوي 🙈

احمد قص لحسن كل الحكاية

حسن : سبحان الله

و اتكيف من بنتو عشان ما خانت ثقتو فيها

احمد : اها لسه مصرة على رفضك لي 😉

مآب خجلت و سكتت : 🙈🙈🙈🙈🙈☺️☺️

حسن : 😂 السكوت علامة الرضا و قال لمأب ارفعي النقاب عشان احمد يشوفك

مآب رفعت النقاب

احمد : ما شاء الله تبارك الله ربنا يحفظك

مآب خجلت : 🙈🙈☺️

احمد طلع من عندهم مبسووط جدا و كذلك مآب ، حسن مشى سال عن احمد و عيلتو و لقاهم ناس كويسين جدا و احمد بعد اسبوع جاب اهلو و جو للخطوبة و قلبو الخطوبة عقد و العرس بعدو بشهرين ❤️❤️

مآب و احمد بقو متواصليين مع بعض

احمد : بالجد انا اسعد انسان في الدنيا لاني لقيتك تاني و ربنا جمعني بيك لانو حبي ليك كان صادق ❤️❤️

مآب : اي والله ، انا كمان ما نسيتك يا احمد ،، كان قلبي واجعني عليك ،، كمان سبحان الله ما اتزوجت لا انت لا انا و بقينا من نصيب بعض

احمد : انا بحبببك يا مآب ❤️😍😍

مآب : و انا كمان 🙈🙈🙈🙈

احمد و مآب اتاكدو انو القسمة و النصيب اقوى و انو الحاجة المن قسمتك ما بتفوتك حتى لو حسيت انها ضاعت منك 😍 ، بالجد ما اصابك ما كان ليخطئك و ما اخطاءك ما كان ليصيبك و اتزوجو و عاشو في سعادة و ولدو اولاد و بنات ☺️

❤️❤️❤️❤️

مآب : و دي كانت قصتي انا و احمد يا بنات

اماني : 😍 قصتكم حلوة والله

حنان : بالجد قصة تفرح و القدر لعب دور فيها 😍 وربنا جمعكم

جميلة : ربنا يسعدك والله ، تستاهلي كل خير انتي 😊

مآب : تسلمووو كتييير حبيباتي و الحمدلله احمد طلع نعم الزوج و لهسي ما شفتو منو شي كعب و الحمدلله و ربنا يديم سعادتنا

البنات :امييييين ياارب

مآب : اها واصلي يا جميلة و تمي لينا قصتك الحصل فيها شنو !

جميلة : طيب حأتم ليكم القصة

طبعا انا ما وريتكم 😁 انو جميلة و مآب و اماني و حنان ساكنين في نفس الحي و بقو صحبات و اتعرفو على بعض ، مآب و جميلة بقو يحكو ليهم قصتهم ، اما اماني و حنان ما عندهم قصة 😅 ،، نحن كمان سمعنا قصة مآب و بنتمنى ليها السعادة هي و احمد😍 و عايزين نتم قصة جميلة ، و لنا لقاء في الحلقة الجاية 😉