الفصل السادس عشر
كيفك، طمني عليك إن شاءالله إنت كويس؟حاولت اتصل عليك بس رقمك مقفول ويبدو إنك ماسح الواتساب قلقت عليك وفتحت انستقرام بالصدفة شايفاك اونلاين فيه، عموما عايزة اقول ليك خطوبتي حتكون الجمعة الجاية وانا م ينفع اخطي الخطوة دي بدون م اكلمك، مهما حصل إنت في الأول والأخير كنت وما زلت في مقام اخوي وماف واحدة بتتزوج من غير م تكلم اخوها، يهمني جداً إنه تعرف مني الموضوع دة بغض النظر عن كل شي حصل بينا الفترة المضت دي، حتى لو م رديت علي عاذراك ابقى عافيه...
بعد صراعات مع نفسي ارسل ولا م ارسل لطارق، لقيت نفسي مرسله لطارق الكلام دة، رغم إني م عارفه تصرفي صح ولا لأ، وعارفه إنه وقع الكلام ده على نفسه حيكون صعب جداً إلا إني جربت إحساس إنه اسمع من غيره خبر زي ده وم عايزة اعمل زيه ابدا.ً
❖
خير ي شهاب عايز شنو متصل علي مليون مكالمه ومليون رسالة مش قلت ليك بطل تضايقني؟
عايزك إنتِ، عايز اشوفك، انا بره واقف قدام بيتكم، ادق الجرس ولا تطلعي لي برة؟
شهاب إنت م جادي ولا شنو؟
إختاري ي سندس إنتِ ادرى
طيب دقايق جايه عليك
قفلت الخط ودقايق معدودة طلعت الشارع لقته واقف، ركبت العربيه وقالت ليه اتحرك بسرعة.
وهو بعاين ليها قالت ليه عاين عمتي هسي حتفكر لي وحتنتبه إني ماف حتطلع تفتش علي، اتحرك من هنا بسرعة انا م ناقصة الفيني مكفيني
إتحرك مشى مسافه ووقف على جنب
قالت لين نعم ي شهاب، خير عايز تشوفني لشنو إن شاءالله؟
مشتاق ليك يا سندس، م اشتاق ليك يعني؟خلاص حرمتي علي؟
شهاب لا إله إلا الله؟مش الباب دة قعدنا وقفلناه خلاص؟
ورجع إتفتح تاني، بدون اي تدخل مني لاحظتي؟
بس انا م عايزاه يتفتح تاني، م عايزة ارجع خطوة لورا تاني، الكان بينا دة إعتبره كانت مراهقة من ناحيتي وجهل من ناحيتك والحمدلله الحصل مؤخراً دة نور بصيرتنا وبس.
جهل يعني شنو؟مش انا الكنت رافض وراسم حدود معاك حتى في تعاملي وكنت متجنبك وإنتِ الكنتي مُصرة تتقربي ويحصل كل دة؟هسي انا بقيت جاهل؟
معليش ي شهاب كنت مُراهقة
وانا بقيت عايزك عديل، م عندي مشكله اتقدم ليك اليوم قبل بكره وقبل كدة قلت ليك كلامي دة رايك كان بعد تخشي الجامعة صح ولا لأ؟بس لما طارق اتقدم ليك م كان عندك إعتراض نهائي
وانت لما وافقت على طول لما طارق إتقدم لي عرفت موقفك تماماً شنو، إنت كنت مستغلني ي شهاب بس م اكتر وهسي الحمدلله احسن كدة، ما تخرب بيتك وخليك على اولادك وخليني في حالي بالله عليك الفيني مكفيني
مسك يدها وقال ليها عايني، خلينا ننسى الفات دة كله ونبدأ من جديد، باس يدها وقال ليها إنتِ بس قولي لي موافقة وم عليك بالباقي، انا كدة كدة عندي وظيفة جاياني في قطر حتنقل هناك وإنتِ نتيجتك حتطلع اقري هناك حأسوقك معي م حأخليك هنا وراي، نتزوج ونمشي على طول، قولي لي موافقة وانا هسي في العربيه دي قدامك اتصل على خالك واكلمو
إنت ليه مستهل الموضوع كدة؟ليه م عايز تشوف الموضوع من ناحيتي عايزة تجر منه يدها مسكها عليه وقال ليها خليها محتاج احس إنه إنتِ جدجد معي اللحظة دي
إنت عارف كمية المشاكل الحتخلقها بسبب الموضوع دة؟يعني حيحصل شنو ي سندس حتقوم حرب مثلا؟فورةً لبن وكل شي حيرجع مكانو، بعدين انا م عامل شي غلط عايز اتزوج على سنه الله ورسوله شرع ربنا وحلال ربنا المحللو لي
في فرق بين انك حتتزوج وبين انك حتتزوج منو
قبل كدة دة م كان كلامك ي سندس تتذكري كنتي تتحايلي علي عشان اخطي خطوة جادة واكلم خيلانك، هسي وقت بقيت جادي عايزة تعملي حركات ؟؟
لاحظ بتقول كنتِ هسي كل شي إختلف، نظرتي للأمور إختلفت، ممكن تقول بقيت واعيه، إنت كمان عندك بيت ومره واولاد ومسؤوليه احسن تركز فيهم
مره قاعد معاها بالجبر وريتك قبل كدة إني عرستها عشان إتفرضت علي فرض وإنتِ عارفه بقيه التفاصيل، و..
قاطعتو وقالت ليه وعايش وصابر معاها عشان الأولاد، في نغمة غير دي؟
انا فعلاً عايش معاها عشان الأولاد، لكن م بنكر إنه دة بيتها واي شي بعملو تجاها عشان دي حقوقها الربنا بسألني منها م عايز انقص منها شي، بس برضو انا حأفضل ظالم نفسي معاها كدة لمتين؟
م عايزها انا م بحس بأي رغبة تجاها، وانا كدة كدة مكلمها وخاتيها في الصورة يعني حأعرس حأعرس في كل الأحوال انا
ولما تسافر قطر حتسوقها معاك يعني؟
لما اسافر قطر م حأسوق معي غيرك، نمشي ونأسس حياتنا هناك مع بعض إنتِ تقري وانا اشتغل كفايه جداً انه تكوني معي بس م عايز شي تاني، دة مش كان كلامك ودي كانت افكارك؟يلا انا بعمل في كلامك الكنتِ زمان بتقوليه لي، والاولاد ممكن انزل ليهم اجازات ولو م عايزاني انزل ممكن ارسل ليهم زيارات يجو عندنا هناك يقعدو فترة ويرجعو، واصلاً البيت الهنا دة بيتهم يعني م حأظلمهم ولا حأقصر منهم ولا من امهم، بقى يقرب عليها ويقول ليها خليك من دة كلو انا مشتاق ليك شديد، مشى يديه في شعرها وقال ليها وبعدين كل شي بحصل لخير، تتذكري اخر مرة اتلاقينا فيها قلت ليك شنو؟كان قسمتي ما حتفوتيني، قلت ليك الكلام دة بيقين تام، من وقتها للأن اقنعيني إنك بقيتي م بتحبيني؟حتى لو قلتي م حصدق لأنو دة العادي بتاعنا، مشتاق لغيرتك علي وشكلك ونرفزتك البتجي تشاكليني بيها لما تتصلي او ترسلي وم ارد عليك
زحت منه وقالت ليه ورونق حتطلقها يعني؟
قال ليها دة خيارها هي لو عايزة تمثل مجنونه وم عايزة تقعد في بيتها مع اولادها اكيد حأديها ورقتها وحتشيل شنطتها ترجع اهلها بدون اولادها لكن
قالت ليه انا عايزة انزل امشي البيت
قال ليها لا خليك
قالت ليه عمتي حتفكر تلاقيني ماف
قال ليها مالك مالها عايزة بيها شنو تاني، تعالي راجعة البيت بعد كدة
قالت ليه لا م بقدر اخليها
ولدها متواصل معاك لسة؟بسرسل ليك وكدة
وإنت مالك؟م شغلتك
سندس لا إله إلا الله، !!!
رجعني البيت ي طارق ولا اقول ليك دقايق..
فتحت الباب ونزلت وأشرت لبتاع ركشة جاي قاطع في الزلط، وقف ليها مشت عليه قالت ليه عاين اتحرك سريع
ماشة وين ي بتنا لكن؟
بوريك ماشة وين اتحرك بس خليك ماشي.
❖
صباح الخير
صباح الورد
اتصلت علي بالليل كنت نايمة
نوم العوافي المهم إصطبحت بصوتك دة شي يكفيني جداً، كنت عايز اقول ليك المفروض نمشي السوق عشان نختار الدبل اليوم
قلت ليه بس انا مداومة ي دكتور عمار
قال لي حأتجاوز ي دكتور دي مره تانيه واكون موضوعي م مشكله بعد الدوام نمشي بس وريني بتطلعي الساعة كم اجي اخدك
قلت ليه حتكون معي العربية، خليني ارجع البيت واكلمك تمام؟
قال لي طيب في إنتظارك وخلي بالك من نفسك
فعلاً رجعت البيت وجهزت وطلعنا ومعي رفيدة اليوم دة، سلم عليها وقال ليها انتِ استقبلتيني اول يوم جينا صح؟
قالت ليه ايواا انا
قلت ليه رفيدة بت خالتي
قال ليها حبابك اتفضلي وفتح ليها الباب ركبت
وطول الطريق كان بونسنا، ورفيدة تحكي ليه قصص يضحك عليها لغايه م وصلنا محلات الدهب، دخلنا وقال للصايغ عايزين دبل على حسب ذوق المدام
الصايغ قال لي عندك شكل محدد عايزاه ولا اوريك الفي بس؟
قال ليه وريها الحاجات السمحه العندك
كنت بعاين لأشكال كدة وقلت لرفيدة دي اساور؟ رفيدة قالت لي شكلها اساور لكن رهيبة
قلت ليها شديد لفتت نظري،
بتاع المحل قال لينا وينها دي؟
اشرت ليه عليها، قال لي دي حجول لكن بتتلبس اساول
قلت ليه لكن لو إتلبست حجل حتكون احلى اكيد
جاب لي خيارات كتيرة قال لي دي ارهب الأشكال الموجودة حالياً م في محل هنا عنده
بقينا نختار دة حلو ودة لا ودة كبير
إخترنا شكل، قلت ليه إنت إخترت؟
قال لي منتظرك تخلصي عشان تختاري معي
بتاع المحل قال ليه ذوق المدام لا يعلى عليه شكله
عمار قال ليه وكلامها برضو
رفيدة رفعت لي حواجبها بعد كلامه ده، قلت ليه عاجبك اي شكل انت؟قال لي م مهم لبسيني على مزاجك البتختاريه إنتِ بس انا م عندي بعده رأي، إخترته ليه دبلته وبقينا انا ورفيدة وبنعلق على الطقوم وكدة
فجأة قال لي شهد كدة رجلك
بقيت اعاين ليه مخلوعة
قال لي يلا، قعد في الأرض ومسك رجلي لبسني الحجل وقال لي مظبوط كدة قاعد في مكانه الصح عايزة اتكلم فكاه من رجلي واداه للصايغ قال ليه اوزنو معاك وضيفو للحساب
قلت ليه نحن علقنا عليه بس م عايزاه وم بلبس حجول اساساً انا
قال لي م مشكله خليه معاك انا اشتريتو وخلاص
ادانا الدبل في كيس، وتاني كان في كيس صغير كدة فيه علبه، بعد م ركبنا العربيه شالو ومداه لي رفيدة وقال ليها اتفضلي ي رفيدة
قالت ليه بخلعة انا؟
قال ليها م بقبل نقاش إتفقنا؟ إعتبريها هدية بسيطة مني
قالت لي شهد
قال ليها إسمي عمار وامسكيه مني
شالتو قالت لي بالجد شكراً ياخي
قال ليها عشان عارفك حترفضي لو اخدته رايك في المحل ف إشتريت ليك على ذوقي اتمنى يعجبك وكمان ي شباب في طريقة نمشي ناكل في محل او نشرب اي حاجه ولا اوصلكم البيت؟
انا كنت متضايقة ومتحسسة لانو اشترى الحجل، قلت يمكن افتكر تعليقي عليه عشان هو يشتري
قلت ليه لا رجعنا البيت احسن
قال لي حاضر مالك إنتِ وشك م بتفسر كدة حاسه بشنو؟
قلت ليه ولا ب اي شي
قال لي مصدعة ولا مالك خت يدو في جبهتي مسافة وقال لي جسمك م سخن
قلت ليه انا كويسة
طيب انزل اجيب ليك حاجه تشربيها مويه او عصير من اي مكان؟
لا ماف شي والله وم عايزة شي بس وصلنا البيت لأنو انا م ارتحت من دوام الصباح دة سبب
قال لي اوك تمام، حالاً اوصلكم البيت
كان مشغل موسيقى قفلها قال لي عشان م تصدع بيك وصلنا البيت قبل م انزل قال لي إرتاحي حأتصل عليك بعدين اطمن عليك لو بقيتي نايمه وقت م تصحي رسلي لي طمنيني عليك تمام؟
قلت ليه تمام حاضر
قال لي بالمناسبة إتضايقتي من موضوع الحجل ملاحظ ليك، انا اشتريتو لأني حبيت اشوفو عليك وماف شي يغلى عليك اكيد حتى لو م حتلبسيه، المهم م تزعلي تمام؟
قلت ليه طيب
قال لي يلا في امان الله لو احتجتي لأي شي كلميني اجيبو ليك ولو بكره م حتقدري تمشي الشغل م تمشي حاسي بيك مرهقة شديد واذا عايزة تمشي م تسوقي خليني انا اوصلك في كل الأحوال كلميني بالبحصل معاك بالتلفون
قلت ليه ماشي تمام
ونحن داخلين رفيدة قالت لي البيه رومانسي ومهتم شديد ولطيف، لما خت يدو في جبهتك انا مشاعري دي م فضل فيها شي، إلهي تجبرني بواحد زيه من حيث لا احتسب
قلت ليها بالعكس الحركة ضايقتني حسيت فيها تجاوز حدود
قالت لي ي بت هو خطيبك
قلت ليها دي على وزن الحبيب البقول ل حبيبته ي بت إنتِ مرتي وهو ي دوب مرتبط بيها مجرد ارتباط
بقت تشكر لي فيهو ونحن ماشين
ونحن قاعدين في الغرفة كلما مع بعض ورفيدة بتحكي لخالتي وعمتي قدر شنو هو لطيف وراقي وهم بشوفو في الحلق الجابو ليها و بتونسو وبشكرو فيه، جاتني رسالة في الأنستقرام من طارق، فتحتها
حأعمل نفسي م سمعت شي من ريكورداتك دي وعايز اقول بس " اشتقت إليك "
م تفتكري إنها مجرد كلمة عادية.
انا جد ي شهد حاسي انه في جزء من قلبي مفقود، جزء مني بيعاني من الانطفاء، طمأنينتي شبه معدومة، روتيني متوقف، ساعتي بحسها بطيئة يومي م بمش مهما انشغلت، جِلدي حاسي بيه ممزق، راحتي مَسلوبة، رغم إني منعزل وبعيد كل البعد عن اي شي وشاغل نفسي وضاغطها عشان اتناسى لكن في ثانيه واحدة بلقى كل جهدي بروح هدر وإني محتاجك، بلقى روحي بفتش عليك كأنك ضايعة مني وم عارف ليك طريق، حاسي حياتي متوقفة او ساكنه عديل وكل شي بخصني منتظر وجودك إنتِ..
عارف إنه يمكن م صح او م ينفع اقول كدة لكن اعمل شنو؟انا م كويس والله ي شهد رغم إني حاولت اكون عكس كدة، إعتبريه إعتراف جاي في غير وقته او اعتبريه إعتراف حزين او سميه زي م عايزة تسميه، انا حقيقي لقيت روحي حبيتك اكتر من راحتي ودة سبب إنعدام راحتي الان...
"قد نصِل لمرحلة فعل عكس مانرغب فعلِه، أن نقسى رغم الحنان، نؤصد أبوابٌ مُشرعة، نقِف بعد كثرة المُحاولة، وأن نمشي رغم رغبتُنا بالبقاء في ذاتِ المكان."
مبدئياً كدة م قصيرة للناس الحتقول قصيرة