الفصل الأول

ها انا ذا في مطلع ال السابع والعشرين من العمر تُرى لأي قطر في العالم ستأخذيني اليوم يا امي..

داخل غُرفة مظلمة، وعلى ضؤ شمعة شديدة التوهج

أحتضن صندوق خشبي، أهم بفتحه ثم يطرق الباب:

شهد إنتِ صاحية ولا نمتي؟

ألتزم الصمت ثم يتكرر السؤال إلى أن يتراجع من خلف الباب..

أضع الصندوق أمام حجري أفتحه والتقط ورقة مما بداخله، تزور مخيلتي بعض الأحداث:

ي أمي يعني هسي ضروري تصعبي علي المواضيع كل مرة كدة انا والله بقيت اكره عيد ميلادي لأنو كل مرة بدفع عليهو ضريبة

ايوة ضروري، إنتِ عايزة اي شي بسهولة كدة؟ عندك 7 يوم من الان بدأ العد التنازلي من اللحظة دي

فتحت خشمي وقلت ليها بخلعة ديل كلهم و 7 يوم بس؟انا شايفة إنه دة تحامل مبالغ فيه علي، ليه حاسه إنك بتعاقبيني بإجمالي اغلاطي في السنة كلها؟

حساسة ممتازة يلا شدي حيلك وإجتهدي مواعيدنا بعد إسبوع في نفس الساعة دي لو زادت 10 دقايق ما تحاولي تفتحي معي الموضوع ..

يا ام...قبل م انطق ما تبقى من احرف على لساني

قالت لي : ولو لجأتي لأبوك او عمك وخليتيهم يساعدوك من وراي عارفة حيحصل شنو؟

والله أنا ضد اساليب الُقمع البتستخدميها ضدي دي بس لا بد يجي يوم والشمس تشرق، وبرضو بحبك اكتر من اي شي في الدنيا دي

ضحكت وضمتني عليها وقالت لي اسرح ليك شعرك دة قبل تنومي وفي اللحظة دي دخلو علينا ابوي واخواني وهم شايلين تورتة وبرددو كلمات اغنية عيد الميلاد

ابوي: إجتماع السيدة الأولى وسيدة قلبنا شخصياً

انا: سيدة قلبكم بتواجه اشد انواع القمع والعراقيل من السيدة الأولى وإنتو عاملين فيها م شايفين، شويه شويه كلكم بتتساقطو من نظري، وإنت بالذات ي ابوي عامل رايح عشان بتهرش من مرتك صاح ولا م غلط؟

ابوي: جدنا رحمه الله عليه بقول الما بخاف من مرتو م راجل وانا مع قول جدي

إتعالت اصوات ضحكاتنا على كلام ابوي

وفي لحظة ما:

تودعني هذه الأحداث ذات الطله القصيرة فأعود لواقع غرفتي الساكنهه ذات الظلام الدامس ووحدانيتي في هذه اللحظة، إلى ان اسمع اصوات اقدام تقترب من غرفتي أطفئ الشمع ثم أعود للفراش واغمض عيناي،

أصوات الاقدام تقترب شيئاً ف شيئاً ثم يطرق الباب ويفتح في ذات اللحظة،

لا صوت سوى حركة الأقدام التي تقترب مني شيئاً ف شيئاً ثم يستقر الداخل بالقرب من رأسي، يرفع الغطاء ويمسح على رأسي وخداي مراراً وتكراراً ثم يتهاوى إلى مسمعي أصوات نحيب مألوف، قبلني على رأسي وخداي وبعض من دموعه المتساقطه تستقر في أجزاء متفرقة على وجهي

أذناي تعلم جيداً اثار هذه الأقدام، ولمسات هذه الأيدي، وهذا الهمس المختلط بقطرات الدموع، إنه أبي لطالما ظل يفعل ذلك عند مطلع كل عام جديد من عمري، اعلم جيداً كميه الحزن الذي يخيم عليه وسواد هذه الليلة الذي يقاسيه كل منا وحدهه إلى مطلع شمس اليوم التالي

ربما تشرق الشمس لتؤدي واجبها الدنيوي ولكن يعز علي ان اقول أننا لم تُشرق شمسُُ في قلوبنا منذ سنوات

التراجيديا الكبرى ليست الاضطهاد والعنف الذي يرتكبه الأشرار، بل صمت الأخيار على ذلك...

إحدى العبارات التي كانت ما بداخل الورقه، وكعادتي في كل ليلة من ميلادي، ينتهي بي المطاف واقفه امام حائطي الخاص المليء بالملصقات الورقية لاُعلق أعظم ما ورثته لي امي فيه وأعود لأقف عنده وأعيد قراءة ما به مراراً ثم ألتقط جوازى سفري وأقلب بين صفحاته وأدقق على ما به من تأشيرات وأعود بذاكرتي للماضي و أهمس بالقول : عشرُ أعوام ولم تشرق الشمس يا أمي...

أهم الى المصحف ف اقرأ بعض ايات الله الكريم وبعض الأدعية واختم ليلتي بإحتضان بعض الصور لكلتينا وقول: ليلة سعيدة السيدة الأولى

لطالما احبت امي ان تنادى بهذا الإسم

❖

قد تتسلق رصاصة اجزاء جسدك خلسة وقبل ان تستقر تستند عليها أخريات، وتتبعها أخريات واخريات فقط لأنك شاركت المجتمع بعضاً من حروف اللغة العربية، والقتل قد لا يكون كافيا، قدً يطمع من تعتريه عقدة حُب السلطة او التسلط في سلب ما بقى لك من بعدك سواء كان إسمك، مكانتك الإجتماعية وحتى الأشخاص من بعدك لأنه يعى أن ذهاب الجسد لا يعني الخلاص، ف كل ذهابِ اثره باق، وكل نضال فكرتهه باقية ...

في حديث قصير لي مع صديقة بريطانية الجنسية في مخيم لتقديم المساعدات اقمناه بغرب السودان اثر وقوع احداث عنف تم فيها إغتصاب عشرات النساء من جماعات مسلحة منهن القاصرات ..

بنبرة يأس وحزن وشفقة وهي تحيط بنظراتها على من حولها من نساء واطفال واثار الحرائق التي تحيط بنا قالت : إنهم يستحقون حياة كريمة، هل حق العيش في هذه البلاد باهظ الثمن لهذه الدرجه؟ ممن تحررتم انتم إذا؟إذً ان ابناء جلدكم يفعلون بكم مالم يكن يفعله المستعمر، ماذا تعني الحرية إن لم يكن حفظ كرامة النساء والأطفال من اولويات المطالبة بها؟

جل م إستطعت قوله هو:

ليس هناك ما يسمى بالحريه هنا يا صديقتي، الحرية في مفهوم بلادي ما هي إلا إمرأة عارية الجسد تتراقص امام مرأى الجميع، الجميع يختلس النظر إليها، الجميع يشعر بالنشوة من حولها ولكن كل من لفظ إسمها فإنه قواد يُلجم لسانه...

لذا إنه لإثم عظيم ان تلفظ بالقول "حرية"، في هذا المستنقع

لسنا احرار

يؤسفني القول أن من تنادي بحرية وحقوق الاخرين تعاقب، ومن لم تنادي بها تعاقب ايضا، لمً نولد هنا لنختار كيف نعيش، ولدنا لنتأقلم فقط هكذا هي الحياة هنا

❖

الأول من سبتمبر \2017

الخرطوم///

سندس، يلا اطلعي انا مستعجلة ما عايزة اتأخر خليني اوصلك سرعة

إستني يا شهد اربط حزام جزمتي واظبط حواجبي دي..

صوت من اخر الزقاق:

يا بت ها حواجب شنو إنتِ بت متين لمن بتظبطي حواجبك والمدرسة دي فيها قراية ولا كلام فارغ لمن بتمشي ليها كدة، قرايتكم دة القرو قدامنا كلهم ما شفنا

عمايل زي دي منهم؟

"العمة سميرهه"

ي عمتي خلاص الزمن إتغير دة بقى ما زمنكم ولا زمن ناس شهد ما ضروري يكون فيها شي، بظبط نفسي لأني انثى وبس

عمتي سميرة: اجيي يا زمن ناس شهد وشهد دي بت متين لمن تقولي زمن ناس شهد؟

شهد: خلاص عمتو خليها، ارح ي سندس

عايني هاك مفتاح العربية والشنطة دي اصلي العربية خليني اقول لأبوي انا طلعتة..

سندس: طيب م تتأخري عارفاك لما تدخلي لي خالو بتتمي سنة

ابوي يلا أنا طالعة دعواتك السمحهه ديك غرقني بيها طيب، بعدين جهز نفسك للشطرنج، المرة دي حألعب معاك بنزاهه بعيداً عن تطبيل عمتو ومساعداتها وغشها

عمتي سميرة: غشها؟ قصدك انا قاعدة أغششك؟ سمح انا زاتي المرة دي حأكون فريق مع عبداللة اخوي إنتِ شوفي ليك طريقة يا فتانة

قلت ليها طيب طيب ي عمتو خلاص ما تزعلي حقك علي تعالي ابوسك بس خليني ابوس ابوي اول، يلا ي ابوي في أمان الله

عمتو يلا عمتو إنتِ كمان باااي بحبك

طلعت لقيت سندس مستلمة مقعد السواقة ف قالت لي حتخليني اسوق؟

قلت ليها لا مستحيل كفاية المرة الفاتت لغاية الان ما قادرة أصين العملتيه،

بنبرة باردة قالت : طيب

زعلتي؟

سندس: لأ

إتفاقي معاك كان الجمعة، بنطلع بخليك تسوقي في الميدان ما ناسياه ما تعملي فيها مبوذة زمني وزمنك ي دوب حنقدر نصل ف شنو خلينا نلحق مع الزحمة والعوارض دي..

سندس: طيب Ok والتلفون عملتي لي في موضوعو شنو؟

التلفون أخر الشهر ي سندس، كلمتة الزول بس اصرف واستلمو ظريف؟

والحاجات القلت ليك عايزة اطلبها؟

طلبها ليك طارق كلمتو بس يلقى زول نازل السودان يشحنها ليك معاه

سندس: ياخ بحبك إنتِ احلى زول، بس طارق دة سخيف وانا عارفاه م حيجيبهم

ليه ليه بتقولي كدة؟

سندس: عشان هو كدة فعلاً وعارفاه م بطيقني عشان كدة م تقولي ليه الحاجات دي حقت سندس قولي ليه حقتي عشان في ثانيه ممكن يوصلهم ليك م زي لما تقولي ليه حقت سندس

ضحكت وقلت ليها ي بت بطلي عوارة، مشكلتك معاه شنو بس والله هو زول كويس شديد على فكره زيو زي شهاب واحمد و..

قبل م اتم كلامي قاطعتني وقالت لي مستحيل اشوفو زيهم زيك كدة، وعلى فكرة شعور متبادل هو م بطيقني وانا م بطيقو

قلت يلاااا خلي النقة وصلنا محتاجة حاجه؟قروشك معاك صح؟

قالن لي ايوة وباستني قالت لي مع السلامه

قلت ليها ركزي ركزي ركزي في دراستك يا سندس صلاتك على النبي

سندس: حاضر حاضر حاضر خلاص ما تعيدي لي الإسطوانة بتاعه كل يوم دي

ههههههههههههههههه طيب يلا

على أنغام اغنيه الحزن نبيل سرحت بمخيلتي بكلماتها إلى أن إنتهى بي الطريق بمقر عملي

بجانب المبنى توقفت وهتفت: خالتو سعدية صباح الخير

صباح النور عليك ي بتي كيفك؟

الحمدلله، قهوة بجنزبيل وهبهان بالله عليك ي خالتو

حاااضر ي بتي مستعجلة ليها؟ عشان ي دوب النار ولعت لي والله

لا لأ على اقل من مهلتك بس ما تنسيني ي جميل.

وبعد كتير من التحايا وبعض الهزل هنا وهناك مع اصدقائي، جلست داخل مكتبي وهممت ببدء القيام بالعمل ولا زلت ادندن:

والعندي ليك كان الفرح، رغم إحتمالي أساكِ ياااااا جرح الألمممم..

صوت على الباب ثم:

شهددد شهد

نعم ي بت بسم الله مالك؟

المنفسنة جات وبتناديك

خير اللهم اجعله خير انا اليوم دة إستبشرتة فيه خير، مالها كمان؟

بري فايرة جات، سألت منك

نبرتها كيف؟

ماااا بتبشر بالخير

يوم متين نبرتها بشرت بالخير قولي ليها جاية قالت

طيب

طلعت فتحت جهاز الحاسب بتاعي ولسسة ي دوب بوصل فيه اصوات طرق على الباب ومن ثم:

يا شهد قالت ليك تعالي هسي، خلي الفي يدك وتعالي

قالت كدة هي؟

أيوة

قولي ليها قالت ليك لما تخلص الفي يدها حتجيك

بالفعل خلصت الفي يدي وطلعت إتجهت على مكتب ال HR

السلام عليكم صباح الخير ..

قبل الرد على السلام:

شهد إنتِ ليه ما بتسمعي الكلام:

انا: بالنسبة لشنو؟

ال HR: مش انا ناديتك؟ يبقى المنادياك بخصوصو دة أهم من الشغل الفي يدك تجيني تشوفيني عايزاك في شنوووو+إنتٍ من بداية الشهر ما وقعتي في الشيت بتاع الحضور دة لييييهه زي باقي الناس؟

بخصوص الشيت انا ما وقعت لأنو في جهاز بصمة في المدخل انا بجي كل يوم الساعة 8 وببصم في الجهاز

ال HR: ما عندي حاجه اسمها طالما بصمتة في جهاز البصمة م حأجي اوقع في شيت الحضور، تجي توقعي لي هنا في شيت الحضور قبل تصلي جهاز البصمة فهمتي؟؟

اوقع ليك في شيت الحضور على اي أساس وبأي منطق؟الفكرة شنو من جهاز البصمة إذا اصلاً مفروض اوقع هنا في الشيت وهناك؟

بدون أسئلة ونقاش تعملي البعملوه زملاءك في العمل زيك زيهم، م بتذكر القبلك اتناقشو في الموضوع ده..

لا ي أستاذة انا بتناقش علشان حضرة سيادتك بتقومي من نومك الساعه 8 وانا 8 دي مفروض اصبعي يكون في جهاز البصمة عشان كل دقيقة تأخير بتتخصم من مرتبي انا، انا م بناقشك من فراغ عشان كدة شيتك دة م

بيعنيني طالما انا الساعه 8 اصبعي بكون في جهاز البصمة الفي المدخل دة، انا ملزمة بالجهاز دة وم ملزمة بإنتظارك لغاية م تجي الساعة مليون، م شفع نحن علشان تقيف طابور وننتظرك

كلامك دة تحدي؟

لا دة منطق.

طيب منطقك دة اشرحيهو لمجلس الإدارة اتفضلي اقفلي وراك الباب

جداً

بعد يوم اقل ما يقال عنه سيء وقبل ما اصل بيتنا دخلت بيت اخوي عشان شوية اولادو بفرقو علي سؤ اليوم ...

هيييي كيفكم وكيف امسيتو؟ بعد مجموعة احضان من كل واحد فيهم

رونق : شهدون، الحمدلله كيف إنتِ؟

الحمدلله مالك لسسة ما بقيتي كويسه؟

رونق"مرت اخوي شهاب"

بصوت مبحوح: كويس إنك جيتي عليك الله نضفي لي البيت دة من الصباح م قادرة ارفع راسي حتى واولاد اخوك الله يديهم العافيه بس ..

طيب كدة ردي علي اول

م مشيتي عملتي الفحص؟مش شهاب امبارح قال ليك خليك جاهزة عشان حيجي يسوقك؟

أنسي أنسي وادخلي نضفي سريع عليك الله ليهو الغداء قبل م يجي يكورك فينا عارفه اخوك لما م يلقى البيت نضيف تاني م بشوف قدامو..

القليل من الشهيق والزفير وبحيل متهالك قلت ليها:

طيب ..

خطوتين والتالتة كانت في المطبخ، ، وحالتو كانت يرثى لها كلو قايم وقاعد فوق بعض،

عدة وسخانه، حوض مليان مويه،

أكل مجدع في الأرض

التلاجه فاتحه

سله زباله مرميه في الأرض

سيراميك مصبوغ بأثار الشاي والعصاير وغيرو من الأكل

وانا واقفة و بحاول افهم مفروض أبدأ من وين فجأة اسمع صراخ

جريت وانا بقول في شنوو؟

أحمد : امي شال لي حاجاتي

أمجد: امي عايني ليهو يضربني كيف

مِنه: أحمد م تضربو، ما تضرب امجد ماما شوفي أحمد "وهي بتصرخ بإعتبار إنه احمد هو المفضل عندها"

امهم: اطلعو برة، سرعه اطلعو لي من هنا انا عايزة انوم يلا اطلعو امشو لي عمتكم في المطبخ.

قالت كلامها دة ورجعت غطت راسها بالبطانيه وخلتهم بصرخو وبتضاربو مع بعض

م محتاجين شرح مفصل عن شكل حياتي لما اعتب عتبة بيت اخوي بكون كيف

بعد رحله نضافه وترتيب على داير م يدور في البيت بي المطاف في بيتنا اللي هو بينو وبين بيت اخوي باب، وبحيل متهالك وصلت غرفتي بعد م سلمت لعمتي وابوي..

المهم..

المفروض اني بعد كل العملتو من نضافة بيت لغيرو مفروض اقفل النور واخد لي غمضة بس لالااا لازم يحصل الأسوأ:

م فاهمين صح؟

دقيقه حتفهم!!

عمتووو..

ي عمتووو..

نزلت الغطاء من وشي وانا بتأفأف وقلت:

خير ي مِنه؟

عمتو البِسهه بتاعتي هنا؟

طبعاً البسه دي مقصود بيها الكديسهه ايوة عادي اصحى من النوم علشان افتش باندة، علشان افتش كديسه، عشان اتسأل نايمة ولا صاحيه، أو عشان واحد عطس وأذكرو مفروض يقول شنو لما يعطس ولما يرمش ولما يتنفس برضو عادي عادي..

المهم:

لا ي مِنه البسه بتاعتك م هنا

طيب ي عمتو ماما قالت ليك تعالي حمينا ولبسينا وسرحي لينا قبل بابا م يجي

ايوة الفي البدايه داك كان جزء من المهمة ودي خاتمة المهمة اليومية طبعاً

خاتمة الموال السعيد دة:

شهاب في الباب

رونق:

دقيقتين في الحمام، جلباب نضيف، الشعر اتسرح، ريحهه، البطانيه إتطبقت والسرير إتفرش

شهاب : كيف امسيتو:

صداع بس مع عيالك ديل، م عارفه انا اللحق لشغل البيت ولا للعيال ولا أفضى لحالي ي شهاب انا تعبت، تعبت بجد والله وانت م داير تجيب الشغالة

شهاب: كدة خليني اشيل نفس اول بعداك اشكي، قلت ليك اصبري شويه خلي الامور تمشي

بصوت مبحوح لمتين لكن ي حبيبي؟ انا باقية علي نضافه بيت، بصحى 6 اجهزهم للمدرسه والروضه، على بال م اخلص نضافه الساعه 1 جات اها التراحيل بتبدأ تجي اجهز ليهم اكلهم وشرابهم اقيف للغدأ وبعد دة كلو اي واحد لازم أراجع ليهو براه، شهاب انا حيلي إتهد ي شهاب

شهاب: ياخي انا ملابسي ريحتك منهم؟ طيب اجري مرة تغسل ملابس البيت وتكويهم، والبيت زاتو نضافتو أجري ليك واحدة تنضف ليك 3 مرات في الأسبوع ووريني بتاخد كم كدة تمام ي ياست البنات؟

حبيبي سيد الرجال انت عاااد انا محظوظة بيك حظ

شهاب: انا اي شي قصاد راحتكم اسويهو المهم طمنيني هسي كيف بقيتي؟

❖

كونفرت زون:

ي بت

عيون البت

وين انتِ ياخ من قبيل بحاول اصل ليك تلفونك قافل وشبكتك قافله، إتصلت لخالتي سميرة قالت لي لسة م رجعتي انتِ كويسه؟حاصله عليك حاجه؟

انا كويسه الحمد لله م عندي عوجه

طيب مالك انا مش قلت ليك تلفونك دة م تقفليه لأي سبب وحاولي خليه فاتح؟

خلاص ي طارق تلفوني قفل وم انتبهت ليه بس مع زحمة الطريق

شهد لا إله إلا الله؟

طيب معليش، انا مليون مرة قلت ليك م تتكلم معي بالنبرة دي تعال كفتني عليك الله

غلطان انا ي شهد النبرة دي سببها اني بخاف وبقلق عليك متين حتستوعبي الحاجه دي؟

لحظه صمت

طيب يلا سلام واللبس توب امي تاني لو سألت عليك

انا : طارق إستنى ب..

قبل م اتم كلامي قفل الخط في وشي

رجعت ليه م برد

بعد 5 دقايق بالظبط:

صوت إشعار رساله في التلفون،

قبل م افتحها جاتني مكالمة فيديو رفعت التلفون

محسن وهو لابس توب في رأسو فعلاً

فتحت الخط وانا بضحك وهو وشو ماخد تعابير الجديه قال لي:

صوتك مالو متغير عندك إلتهاب؟ مليون مرة قلت ليك م تشربي موية باردة شديد، ما تطلعي من الحمام بدون غطاء

انا كنت لسه بضحك

قال لي م تضحكي انا جادي على فكرة ي شهد حاولي خلي بالك من نفسك انا حأفضل وراك كدة لمتين؟

حاضر ي محسن، حاضر والله حاضر، انا اسفة فعلاً غلطانه بس مع زحمة الطريق التلفون قفل وم ركزت

اشحنيه من العربية، انا عارف يمكن تكوني حاسه بالخنقة لكن انا بخاف، بقلق، بتوتر والله ي شهد ختي الحاجه دي في الإعتبار، والله لما اللقاك م داخله ولا اللقاك م بتردي وزول من الناس البيت م يرد علي انا بحس إنه قلبي دة حيطلع من محله وبحس إنه عايز اقطع تذكرة وانزل لحظي، أعذريني كمان إنتِ عارفه سبب خوفي وقلقي دة كله شنو م عندي إستعداد اخسرك والله ي شهد ولا بأي شكل كان

سكتت م رديت عليه وسرحت

قال لي طيب احكي لي يومك كان كيف م لقيت طريقة اكلمك من الصباح، رسلت ليك إني مشغول في موقع بعيد من المدينه، ي دوب رجعت

قلت ليه ماف شي مهم بتحكي حاول إرتاح

قال لي انا مفضي ليك نفسي وحابي اسمع الما مهم دة انا يلا احكي لي عندي كم يوم م إتكلمت معاك زي الناس بسبب الخلا الكنت فيه دة

قلت ليه شكلي حأترفد من الشغل

ليهه؟؟موظفة ال HR نفسها؟ مالها معاك تاني؟

قلت ليه الحصل إنو:...الخ

موقفك سليم حتى لو أجمعو إنك غلط انتِ صح م تخافي وانتِ م عامله حاجه ابداً

ايوة بس انت فاهم المدير دة صاحب..

عارف هو صاحب شهاب وشهاب متوسط ليك ودة م بينفي انو نظام شركتو فيهو خلل ودي م المرة الاولى يحصل موقف م سليم من موظف في الشركة، انا قلت ليك خليهو الشغل الكلو ضغط دة وإنتِ م محتاجاه بس انتِ عنيدة

انا عارفه بس صدقني الشغل ظريف والمدير ظريف معي والمرتب حنين ي محسن و..

قبل اتم كلامي:

وانا قادر اديك اضعافو ي شهد شن فايدة الشغل وانتِ م مرتاحه

انا مرتاحة صدقني

طيب انا ..

قبل ما يتم كلامو جات سندس داخلة ومقاطعة كلامو ب: شهد عايني كدة تلفونك دقايق، عايزة تشيلو لقت مُحسن قالت ليهو إزيك ي حُس مشتاقييييين هاك، عاين اقفل من البت دي ثواني بس وبعدين تعال اخلطها يلا بوسات كتارات باي، شالت مني التلفون وفصلت المكالمة

ما رجعتو لي إلا بعد نص ساعة، تاني محسن رجع لي متضايق، قال لي يعني ما بتقدري تقولي ليها لأ؟

ضحكت قلت ليهو مفروض تكون إتعودتة

قال لي سغيلة ولزجة ياخي الشافعة دي

قلت ليهو هيييي ما تغلط في بتي، كلامك دة كانك بتشتم في تربيتي..

محسن: تربيتك فاشلة فعلاً

على فكرة حزعل بجد

ههههه لا بجد ي شهد البت دي إنتِ خاربة طبعها جداً، مدلعاها زيادة عن اللزوم ياااااخ

ومالو أعيش وادلعها وادلعها وادلعها

اتمنى ما يجي يوم وتزعلي على كلامك دة، المهم خلينا من شافعتك دي ونرجع لموضوعنا على فكرة انا فهمت ردك بدون م تقولي قبيل وعارفك ما بترضي تاخدي مني جنيه، المهم العايز اقولو ليك إنو انا من اولوياتي راحتك ومصلحتك بس

قلت ليه وانت عارف مصلحتي وراحتي وين صح؟وبعدين م قلت ليك عايزة اغير العربية ياخ مفروض تشجعني إني اكمل.

قال لي العربية الصرفتي قروشها بعد م لميتيها ولا غيرها؟

المهم انا عارف وفاهم صدقيني، بس المفروض تفهميه إنو انتِ عامله حاجات كتيرة انا شخصياً فخور بيها ي شهد، شغاله، متحمله مسؤولية نفسك وحافظاها لا بتلفي ولا بتدوري مقدمة مسؤليات غيرك على اولوياتك، و

العملتيهو انتِ من وفاة خالتي ماف واحد من اخوانك عمل ربعو، كلهم بعد الوفاة انشغلو بأمور حياتهم البتخدم مصالحهم اما إنتِ لأ! ف شنو م عايز منك غير انو تفكري في نفسك شويه حبتين..

حاضر، بس برضو م حاسه اني وصلت للعايزاه وإنت مهما شرحت ليك م حتفهمني

حتوصلي او حنوصل ي شهد، انا م حأخليك الا وانتِ محققة العايزاه، المهم حتنومي؟

شبه نعسانة وبكرة ابوي عندو حجز مع الدكتور الأردني متذكرو لازم نمشي بدري

ايوة صح، طيب انا حأخليك تنومي حأضبط ليك المنبه مع الساعه 7 ص، وخلي تلفونك عام عشان لو م صحوك ناس البيت م اتصل مليون مكالمة

طيب يلا

تصبحي على خير

وانت من اهلو.. هيييييي بالمناسبة زدته كم كيلو جضومك مالية الشاشة كدة، قلت ليك خفف كبسة واكل جاهز، ما ممكن ماشي وجاي صالات رياضة وماعطنا بالصور ومتجدع وبتاع وإنت كل يوم زايد كيلو

قبل م يشتمني قفلت الخط في وشو،

رجع لي بعد دقيقتين

قلت ليه م تنفسن خلاص جضومك م ظهرت شديد ولا شي

قال لي يا متخلفة اتصلت عشان اقول ليك إتأكدتي من إنه باب الشارع قافل؟

اهااااا ايوة قافل

طيب قفلتي الأبواب كويس عليكم

قلت ليه بإنزعاج ونفاذ صبر طاااارق..

طارق: طيب قبل تقفلي عايز اقول ليك بلسان خالي وناس البيت كلهم نحن فخورين بيك جداً جداً جدا، أبسطً إنجاز ليك بالنسبه لينا يسوى الدنيا وم فيها، ابداً م تخلي شي بقيف في طريقك انا معاك زي ضلك دايماً ي شهد

قلت ليه زولي والله ي طارق

قال لي تزاولي من ضلك يلا اقطعي وشك

”أحبّ الاحتفاء برصيد اللحظة الهادئة التي تأتي بعد يوم مزدحم بالسعي، وإنها لعافيه أن يكون لديك ملجأ امن وملاذاً لطيفاً يحنو عليك عند غروب شمس كل ليلهه...