الفصل الخامس والستون
ليله في ديسمبر
شنو؟
ترجمة السطر الأول من الصفحة دي
مشيت عليه بإستعجال وقفت جمبه وبإهتمام قلت ليه كمل..
تعالي نقعد
قعدنا في السرير وشلت الدفتر من يده عشان يقدر يكتب..
اثناء ما هو بكتب الفقرة لاحظت لشيبه في نص شعره، مررت يدي في راسه عاين لي ورجع كمل كتابة وهو بقول لي الرايح ليك شنو في شعري يا شهد؟
شيبت خلاص أنت
جد عندي شيب؟
واحدة بس في نص شعرك بس في خرافة بتقولها امي إنه الشيبة البتكون واحدة في الراس دة بكون خييير جاييك...سكتته مساافة بعدها إتنهدت وانا بقول الله يرحمها
وقف كتابة وإتلفت عاين لي وهو بقول لي : ربنا يجعل الفردوس الأعلى مأواها يارب، انا كمان امي الله يرحمها كانت مؤمنة بحاجات غريبة زي مثلاً الكتاحة لما تقوم يوم العرس معناها العريس والعروس او واحد منهم ماكل في حلة سوداء
ضحكت بعدها إستوعبت هو قال الله يرحمها قلت ليه بدهشة دقيقة أنت برضو امك متوفية؟ما حصل حكيت لي الحاجة دي
عشان ما جات مناسبة، ايوة متوفية ربنا يرحمها
ربنا يرحمها يارب
كمل كتابة وهو ساكت
بسكت في الوقت الأنا بحس فيه إني عايزاه يتكلم، بقيت عايزه اسمعه يحكي عن نفسه واهله وحياته، بس بأي حق وبأي صفه حأسأله؟
وانا بعاين ليه وسرحانه قال لي هاك دي الترجمة كدة كاملة..
إتلفت عاين لي ..؟شهد
بخلعة قلت ليه ايوا
رفع لي التلفون في وشي وهو بقول: الترجمة
حاضر
شلت التلفون..
"اكتب لكِ هذه الأسطر وانا احلق في السماء، يمكنني مصافحة السُحب من النافذة، اشعر "بالخفة، والسلام، والحرية"
انا في طريقي لتحقيق كل شعور حُرمت منه
اعانق السُحب الان، ولم يتبقى إلا القليل لأعانق جوف الأرض "يمكنني تخيل كل شيء وكيف هم بإنتظاري
أعلم انك تشعرين بلهفة اناملي وانا اشاركك ما بجعبتي من احاسيس، تسمعين ما تقوله جوارحي لي؟
لقد فعلتها مارلين
لطالما نعتتني جدتي بأنني اُشبهك،
انا اثبت هذا الان
تعلمين؟
ايقنت ان ليالي ديسمبر ليست باردة كبرودة ايامي التي قضيتها في ذلك القبو
سأقص عليك سر كل "ليلة في ديسمبر" ..
رفعت راسي وبخيبة امل قلت ليه فهمت شي؟
انتهت كدة؟
قال لي الكلام م مكتمل لاحظي في اخر السطر كأنه زول كان بكتب وحصلت حاجة فجأة خلته يوقف كتابه..
رميت المُفكرة بيأس وانا ساكتة..
إتكلمتي مع ليز او لويس، ؟
لأ، حاسة نفسي جايطة وم عارفة روحي باقية على شنو
بالنسبة لشنو؟
الباب دة انا كنت ساعية لأني اقفلو بحق وحقيقة بعد موضوع المحكمة والمرينا بيه
اهلي واخوي اشد حوجة لي والمفروض ما تكون عندي إهتمامات غيرهم وانا ما قادرة اساعدهم وبقيت محبوسة هنا بسبب المحكمة والقضية وكل م اقول اطلع من الدوامة دي تشدني عليها و اغرق اكتر
سكتت دقايق وقلت ليه بصوت حزين وأنت كمان بقيت تتورط معي في مواضيع وامور ممكن تأذيك
حاولي ما تسمي وجودي جنبك تورط
عاينت ليه
انا حأطلع الشغل
"قالها بنبرة إنزعاج بتدل على انه متجنب النقاش"
وانا كمان
طيب يلا اجهزي عشان اوصلك في طريقي
حاضر
بقيت بستغرب في النبرة البقول ليه بيها حاضر وانا م معتاداهاومستغربة إنصياعي التام لكل كلمة بقولها
ونحن في الطريق كنت بقلب في التلفون
راسي حيطق، بقى مهم عندي اتحصل على الهويات الحقيقية للمسنين ديل عشان اعرف هم منو اساساً وشنو سبب تواجدهم في المكان دة؟
أنتِ جايطة ولما تجوطي بتنسي تفكري، وتتذكري
الفلاشات الخلاها ليك مستر جو هي طريقك لهويات الناس دي
تتذكري كيف قدرنا نعرف قصة بت تايسون من ارقام لوحات العربية؟
كل عربية من العربات الموجودة في المكان داك مرتبطة بحدث معين ومرتبطة بشخص داخل المكان داك انا متأكد، لو بحثنا عنهم بناءً على ارقام اللوحات الموجودة عندك في الفلاش حنصل لنتيجة
صح بس الموضوع دة حتواجهنا فيه صعوبة اكيد صحبك الشرطي ما حيساعدك في انه يوريك بيانات كل العربات الفي القائمة دي، ممكن تنتابه بعض الشكوك تجاهك
فعلاً بس ممكن نشوف طريقة تانيه غير صحبي دة ما مشكلة
سكتت دقايق وطلعت تلفوني، انا كدة كدة كنت عايزة اتصل على السيدة جينيفر ..
حتفيدك بحاجة؟
ححاول
أتصلت عليها وفتحت مكبر الصوت
مرحباً سيدة جينيفر، صباح الخير معك شهد
مرحباً شهد، سُررت بسماع صوتك ظننت انك نسيتني
لا، ما زال رقم هاتفك معي
لقد تابعت ما مررت به الفترة الماضية، اردت مقابلتك وتقديم المساعدة ولكن ابنتي طريحة الفراش لذا وجدت صعوبة في مقابلتك، انا اسفة حقاً لأنني لم اكن هناك
لا داعي للأسف، ما بها إبنتك؟هل هي بخير؟
اجل إنها بخير الان، اخبريني كيف تسير الأمور معك؟
ليست جيدة تماما، تابعتيً احداث الفترة الماضية، وما حدث بعدها هو انه تم إخلاء الدار من المسنين وإغلاقه
ماذا؟متى حدث ذلك؟ولِم؟
في الأيام القليلة الماضية، قيل لي ان المالك الحقيقي للمبنى طلب إخلاءه
واين ذهب المسنين؟
يقال انه قد تم توزيعهم على دور إيواء مختلفة، بسبب المحكمة لم اُشرف على شيء لقد تم إنهاء تكليفي منذ إعتقالي، وإطلاق تلك الإشاعات في الوسط، عندما عُدت وجدت كل شيء قد انتهى
بهذه السرعة؟من قام بكل هذا إذا؟ً
لا اعلم، كما اخبرتك لقد وجدت كل شيء انتهى، لا تفاصيل لدي
سكتت مسااافة وقالت لي إذاً ما الذي تودين فعله؟ كيف يمكنني تقديم المساعدة؟
انا بحاجة لمساعدتك حقاً لأكثر من امر، ولكن الان اريد الوصول للمالك الحقيقي للمبنى سيدة
جينيفر، تدور الكثير من الأمور خلف ذلك المكان، اصبح الان يهمني امر هؤلاء المسنين اكثر من قبل، سأكون ممتنة إذا قدمتي لي هذه الخدمة
لا استطيع فهمك شهد هل توصلتِ لشيء تودين إخباري به؟
اعمل على هذا ولكنني احتاج قليلاً من دعمك
حسنا، امهلينيً بعض الوقت، سأعاود الإتصال بك
أقدر لك هذا سيدة جينيفر
قفلت الخط ورميت التلفون
كل م تتعقد بتتحل، أنتِ بس ما تشفقي
جاتو مكالمة شلت التلفون عايزة اديه ليه لمحت الإسم: ميغان
مسك التلفون وفتح الخط ورد بإهتمام..
مرحباً ميغان
بخير، اجل كنت مريض قليلاً ولكنني بخير اليوم
لا داعي للإعتذار لقد إعتدت الأمر منك
انا في الطريق الان، ساكون بعدد..
عاين للساعة وكمل
بعد ربع ساعة هناك، حسناً سأكون في إنتظارك إلى اللقاء
ملامح وشي في اللحظة دي إتغيرت 180 درجة وقفلت منه بلا سبب واضح بالنسبة ليه وإتخنقت
اليوم كانه الطريق زحمة؟
لا الطريق كويس بس الواضح إنه انت البقيت فجاة مستعجل
قلت الكلام دة وانا بعاين بالشباك ومربعة يدي
بعدها طول الطريق كنت ساكتة وسرحانة لغاية م لقيته بقول لي شهد
نعم؟
وصلنا
طيب
اجي اخدك المساء؟
ما بحتاج برجع بالمترو
كدة كدة طريقنا واحد
على طرف لساني كانت جملة"قلت ليك ما بحتاج"بنبرة حادة، بس نزلت وانا ساكتة، وما شايفة قدامي حتى ما عاينت في وشه وم إتلفت عليه من غضبي الشديد منه
❖
وصلت الصالة وعلى غير العادة في المدخل لقيت
الموظفة في نقاش حاد مع واحدة..
وفي لمح البصر الموظفة شافتني وبتنهيدة قالت ليها ها قد اتى سيد سياف
كان برفقة السيدة طفل مُقعد على كرسي مُتحرك
إتلفت علي بسرعة وهو بحرك عجلته بيده
والسيدة المعاه بلهفة قالت ليه على مهلك داون
سألت الموظفة ما الخطب هل كل شيء بخير كريستينا؟
هذه السيدة كانت تُصر على مقابلتك لتسجيل إبنها رغم توضيحي لها اننا ليس لدينا طبيب متخصص في العلاج الطبيعي
الولد كان بعاين لي بتركيز ومبتسم
حسناً كريستين إذهبي انتِ
مرحباً سيد سياف انا داون
الطفل عرفني بنفسه ومد لي يده
مرحباً انا سياف
هذه مربيتي جينا
مرحباً سيدة جينا كيف حالك؟
انا بخير، سررت بلقاءك، اعتذر على إحداث كل هذه الضجة في المكان ولكننا في عجلة من امرنا، وهو يُصر على لقاءك، سنقع ببعض المشكلات و
الولد قاطعها وقال لي هل يمكننا التحدث قليلا؟ً
اجل تفضل
ولكن في الخارج
الإستغراب كان مخيم على ملامح وشي رغم دة وافقت
حسناً تفضلو
جينا ابقي هنا لبعض الوقت ساذهب برفقته واعود
كان بتكلم معاها بصيغة الأمر
حسناً سانتظر هنا لا تتأخر الوقت ليس في صالحنا علينا ان نلحق بالطائرة
إتجنب الرد عليها وهو بقول لي: سأُتعبك قليلاً سيد سياف، هل يمكنك سحب عجلتي للخارج؟
اجل
مسكت عجلته وطلعنا
لنتمشى قليلاً ومن ثم نتحدث
طلعنا للطريق العام ووصلنا لحديقة قريبة من الصالة بعد دقايق معدودة قال لي : لقد اخبرني جدي انك رجل جيد، لقد امتدحك كثيراً واراد مني ان اصبح مثلك، مؤخراً كان دائم تشبيهي بك لأننا نحمل نفس لون البشرة، اردت رؤيتك لأتأكد من هذا بنفسي لأنني لم ارى جدي يمتدح رجلاً هكذا من قبل، لقد كان دائم الإنتقاد والتذمر م من الأخرين، ولكن الان اظن انه كان على حق..
وقفت العجله وانا بقول ليه شكراً على كل هذا الإطراء ولكن من هو جدك؟
لنجلس على هذا الكرسي
فتح شنطته وطلع ورقة وبقى يعاين ليها بتمعن ودهشة وقال لي انت تماماً ..
كنت بعاين ليه وانا ملتزم الصمت
وجه الورقة على إتجاهي وهو ساكت
كانت رسمة لي..
بإستغراب شلت الورقة وقلت ليه من اين اتت هذه الرسمة؟
انا من رسمتها
سكتت لدقايق وقلت ليه انت؟
هل نعرف بعضنا البعض من قبل؟
اخبرتك انني اعرفك، لقد حدثني جدي عنك وعن يومياته معك، حتى انه اجرى لي إختباراً في الرسم بوصفه الدقيق لك وطلب مني ان ارسمك
تقصد انك قمت برسم هذه دون ان تراني؟
حرك راسه بإيجاب وانا اكاد اكون م مصدق لأنه الرسمة طبق الأصل لملامحي ما كانت تقريبيه
اعلم انك مندهشاً، ابلغ من العمر 16 عاما، الرسمً هوايتي منذ ان كان عمري ستة اعوام
حسناً الان هل ستخبرني من هو جدك؟
هل سيبقى الأمر سراً بيننا؟
إن كنت تريد ذلك اجل
حسنا، تفضلً هذه، ناولني بطاقة شخصية
عاينت ليها وليه بنظرات إستفهام
انا حفيد جورج روكفلر
وكلني جدي ببعض المهام قبيل وفاته، هل إستلمت بريداً في عنوان منزلك؟
اعتقد انه كان يعلم بموته لا ادري كيف
سكت لدقايق وقال لي
لا اعلم طبيعة العلاقة بينك وبين جدي وما هي الأشياء المشتركة بينكما ولكن اعلم انه كان يثق بك كثيرا، ً لذا تفضل ربما تفهم ما كان يعني هذا بالنسبة له
لسة كنت في حالة دهشة؟
مد لي تلفونه وهو بقول لي وهذه اخر محادثة بيننا قبل وفاته بأيام قمت فيها بإرسال بعض الرسومات له والصور التي تجمعنا انا وهو يمكنك مراجعة تاريخ المحادثة وسماع التسجيل الصوتي الخاص به
بقيت اقلب في الصور
مؤخراً كان يطلب مني رسم بعض الأشياء الغريبة، مثل هذه، كنت اظنه مُصاب بالخرف
بإهتمام شلت الورقة وبقيت اعاين ليها واقلب فيها
"إمرأة حامل مكبلة بالأصفاد بشكل عاري تماماً وهي في حالة مخاض او نزيف، جنينها بالداخل يصرخ " يلتف حولها بعض الأشخاص في مائدة طعام "...هكذا كان الوصف
وايضاً طلب مني رسم هذا
تبدو ك خارطة لمكان؟
اجل
جميع العلامات الخضراء مداخل، والحمراء مخارج
اين المكان؟
داون..
إتلفتنا مع الصوت النده ليه مع بعض
إنها مربيتي، علي الذهاب
ولكن ..
داون تبقى لدينا القليل من الوقت، سيد سياف انا اسفة ولكن علينا اللحاق بالرحلة
في اي مدينة تقيم؟
حسناً سيد سياف، سررت بلقاءك
داون دعنا نتحدث قليلا، سيدةً جينا امهلينا قليلاً من الوقت
لنذهب سيدة جينا
داون، حسناً كيف يمكنني التواصل معك؟كنت ماشي وراهم وبتكلم معاه
انا سأفعل، لدي رقم هاتفك
السيدة جينا مسكت ايادي كرسيه المتحرك وخطت خطواتها برة الحديقة، وانا واقف محتار
حضوره كان ك غيمة راجله ما إتعدت دقايق معدودة
لفيت الورق في يدي وانا بعاين حولي ورجعت الصالة، اول ما دخلت كريستينا قالت لي: سيد سياف الصحفية ميغان بإنتظارك في المكتب
❖
New York hospital:
اجلسي لنتحدث قليلاً كاثرين
هل هو بخير؟
بالطبع لا، ليس بخير ولن يكون بخير وانتِ تجولين حوله هكذا، لقد دمرتي حياته مسبقاً وحياة الكثيرين من قبله ما الذي ترغبين به بعد؟
دكتور ميشيل
دكتور ميشيل ماذا كاثرين؟دكتور ميشيل ماذا؟
اخبرتك سابقاً لن اتركك تعبثين بحياة موظفيني الشخصية والمهنية، لقد فقدت احدهم من قبل، واقبل اخر على الإنتحار ليلحق به، والان ورطتي هذا الرجل في اشياء لا يرغبها ولم تكتفي بذلك انتِ تعبثين بحياته، الرجل في حالة غيبوبة لا اعلم متى سيفيق منها بعد ان استقرت حالته وتخطى مرحلة الخطر ها هو قد عاد إليها الان، لقدظللنا نعمل 72 ساعة داخل غرفة العمليات لإنقاذه، ما الذي تريدينه؟
لا تنسى انك انت من كنت تُلقي بموظفيك في هذا الوحل، ومن ثم هم من يحددون مصائرهم بأيديهم بإختيارهم الإستمرار او الترك، وهذا كان إختياره هو لستُ مُلامة على الطريق الذي إختاره
اخبرتك سابقاً ان تتوقفي عن إبتزاز الرجل ليعود لحياته، توقفي عن ملاحقة اطبائي كاثرين إعتبري هذا تحذيرا، لنً اغامر بسمعة اطبائي وإغراق مشفاي من اجل مختلة مثلك
انت جزء من هذه الدائرة ميشيل، نعتك لي بالمختلة لا يغير هذا الشيء
انا خارج ومشفاي الدائرة الان كاثرين ولن نكون ضمن المتعاقدين هذا العام، ودعيني اوضح لكِ امراً سأعمل على ان يكون جميع اطبائي المتورطين بها خارجها ايضاً
لكم من الوقت تستيطع التغطية على الشائعات التي تلاحقك وتلوح في الأفق حولك دائما؟نعلمً جميعاً انها ليست شائعات ولكننا نعمل على تفنيدها وطمسها من اجلك وتوجيه الرأي العام، لا يوجد ما يسمى انا خارج هذه الدائرة الان
سأعيد ما قلت مرة اخرى، انا خارج هذه الدائرة كاثرين، وسأعمل على ان يكون جميع اطبائي خارجها
لنرى كيف ستفعل هذا
اغلقي الباب خلفك كاثرين، ولا تعودي إلى هنا مرة اخرى
أليكس، اليكس، اليكس..
اجل مستر ميشيل
اخبري الجميع انني اريد الإجتماع بهم الان
من تقصد بالجميع مستر ميشيل، اعضاء مجلس الإدارة ام جميع الموظفين؟
"يفك ربطة عنقة بضيق وإختناق"
مستر ميشيل هل انت بخير؟
اخبري الدكتور ميك انني بإنتظاره في المكتب
❖
San Francisco
هذا كل شيء..
ولكن لأكون اكثر صدقاً احياناً ينتابني الخوف من ان يستيقظ يوماً ويراني عبئاً ثقيلاً عليه
ولكن كل ما اخبرتني به لا يفعله إلا رجل "مُحب"
ولكنني اراه يفعل كل هذا وفقاً لإنسانيته، لا اعرف كيف لي ان اشرح هذا ولكن في كثير من الأحيان اشعر انه يشعر بالشفقة علي والمسؤولية من ناحيتي لأنه وجدني وحيدة ومنكوبة، وواقعة في الكثير من المشكلات، ومن ثم أعتاد علي اكثر من انه احبني
اعتقد ان لديك مشكلة في الثقة، وفي تقبل العطاء والمجهود الذي يبذلً لأجلك وإستقباله بإمتنان هل ترين ان ما يقدمه لك كثير عليك او انك لا تستحقينة؟
سكتت وانا بعاين ليها
انظري شهد، اعلم ان ما مررتِ به لم يكن سهلا، منً الطبيعي ان تكوني محطمة بالكامل وهذا الرجل وجدك قطعاً متناثرة وقرر جمع هذه القطع بنفسه وتزيينها
الأمر ليس سهلاً بالنسبة له ايضاً
حسناً اخبريني ماذا وجدتِ به، رتبي بعض صفاته الحسنة
"انه شهم وكريم وجسور
مسؤول ومُهتم
متمسك ودائماً ما اجده بجانبي
يتحمل نوبات غضبي و يعرف كيف يحتويني
محترم للغاية معي ومع الأخرين
اجد السلام والطمأنينه معه"
والأهم من هذا كله إنه داعم لي دائماً
انتِ تتسائلين لماذا يقرر رجل بهذه الصفات، ولديه منزل وعمل وحياة هادئة ومستقرة ان يضع نفسه وسط هذا كله؟هذا الأمر يسبب لك بعض الضبابية لأنك لم تعتاديه؟
لا، لقد إعتدته، سأعترف لكِ بأمر!جميع الرجال الذين مرو علي كانو جيدين في صفاتهم وافعالهم معي، لطالما عاملوني بشكل جيد جيداً بل ممتاز، ولكن لكلٍ منهم سقطة تضعنا في مفترق طُرق..
حسناسأجيبكً بشكل صحيح
الرجال لا يبذلون مجهوداً في شيء لا يريدونه او لديهم فيه مصلحة صدقيني خصوصاً فيما يخص العلاقات، كلما احب الرجل بذل مجهوداً اكبر في إظهار محبته بأشكال مختلفة، تعميم فكرتك عن الرجال لن يجعلك تعيشين علاقة مستقرة
نظرتك له ناتجة من انك اعتدت على العطاء من اجل المسؤولية لا من اجل الحب لذا إختلط عليك الأمر
لننظر إلى الأمر بصورة اكثر واقعية ما الذي يمكن ان يريده منك هذا الرجل من علاقه كهذه؟
إن كان ينوي التلاعب بك ف هو قد حصل على ما يريده منك انتما تعيشان في منزل واحد وتتشاركان الغرفة والسرير إذاً ما الذي يدفعه للإستمرار بإصرار؟
المال؟انتِ لا اعتقد انك تملكينه
ماذا قال لك في اخر مرة تناقشتما فيها عن علاقتكما؟
اخبرني انه يريد علاقة واضحة، إنه يصف علاقتنا بالموجه
تعلمين أنه رجل حقيقي؟اعني رجل عظيم؟ لأن بإمكانه إستغلالك وإشباع حاجته منك كل ليلة وإعطاءك ظهره كأي رجل يفعل هذا لأن هذا مبدأ الإتفاق بينكما، لا مسؤوليات، لا إلتزامات، لا شيء
من يجد علاقة كهذه ولا يسعد بها في زمن كثُر فيه المتسيبين والمعتوهين؟بإمكانه ان يفعل هذا الشيء معك وقضاء اوقات ممتعة مع فتيات اخريات
المشكلة ليست بالرجل عزيزتي شهد، المشكلة بك انتِ، العلاقة ليست سامة كما وصفتها، انتِ هي الشخص السام في هذه العلاقة وانا اسفة لقولي هذا الشيء
توقفي عن التفكير في زوجك السابق وعلاقاتك السابقة، غضي طرفك عن هذا الجانب من حياتك وانظري للجانب الأخر، انظري للرجل بما يظهره لك من افعال حسنه فحسب توقفي عن التدقيق و التفكير في المستقبل، عليك إعطاء نفسك فرصة مرة اخرى
تقبلي "الحب، الإهتمام، العطاء"
انا احاول فعل هذا الأن ولكن هناك الكثير من الأمور تحدث لا استطيع اخبارك بها الان، ولكن انا اخاف عليه و..
ليس لديك الحق في ان تقرري وحدك اي إتجاه يجب ان تسير فيه العلاقة وكيف يجب ان تكون بناءً على خوفك عليه، شاركيه مشاعرك تجاهه، وتحدثي إليه بشأن مخاوفك، دعي الأمر له هو من سيقرر ماذا يريد حتى لا تعاني من هذا، وانا اقصد بهذا "جلد الذات"
نسبة للضيق الشديد الكنت فيه طول اليوم في وقت إستراحتي إتصلت على هتن وطلبت اقابلها اخر الدوام
وصلت بيتها حسب العنوان الأدتني ليه، ما قادرة احدد هل هي كانت جلسة علاجية مع طبيب او فضفضة من صديقة لصديقة، إنسابت الونسة بينا من غير تكلف، محور كلامي كله كان عن علاقاتي السابقة وعلاقتي انا وسياف وكيف شكلها الان ..
نوعاً ما هتن كانت اكتر حكمة في اراءها تجاه علاقتي مع سياف، واتفقنا على جلسات اكتر حتكون مفتوحة..
رجعت البيت متأخرة سياف ما كان ليه اثر في البيت، دخلت المطبخ لقيته مخلي لي في تربيزة المطبخ علبة ايسكريم وعصير بطيخ
شكله جا وطلع
إبتسمت وانا بعاين للحاجات، لأنه متعود اياً كانت حالتنا يجيب لي معاه حاجة نهاية اليوم وكالعادة يا خلاهم في التربيزة او التلاجة
فضلت قاعدة في الكنبة وبشاهد في التلفزيون وراسي
ما بين الحلم والحقيقة رفعت راسي مخلوعة على صوت منبه بضرب، بقيت اعاين حوالي وانا مستغربة انا وين؟
السرير، الغطي..سياف؟
انا الجابني غرفته شنو؟
مع إستمرار صوت المنبه سياف إتحرك
رقدت بسرعة وغمضت عيوني
محتاجة اتذكر وافهم انا جيت هنا كيف ما متذكرة شي وما بقدر اسألو
خليته اول ما طلع للصلاة طلعت مشيت غرفتي وقفلتها علي، عاينت لروحي لقيتني لابسة فنيلته
قعدت مع روحي دقايق، اخر حاجة متذكراها إني كنت قاعدة في الكنبة بشاهد
عاينت للزمن لسة الصباح يا داب الفجر
صليت في غرفتي وما جاني نوم تاني بعدها..
شهد، شهد
نده علي وفتح الباب وانا مغطية وشي
صباح الخير
صباح النور
كانت في إبتسامة على وشه وترتني
إجازة انتِ اليوم؟
لأ
طيب صحصحي عشان في موضوع عايزك فيه
بصوت عالي قلت ليه موضوع؟
ايوا
طيب لاحقاك
وقفت قدام المراية وانا بعاين لشعري وهو طولة في زيادة رغم عدم إهتمامي بيه وبفكر عايزني في شنو؟، لفيته كعكتين وغيرت ملابسي وطلعت
لقيته خاتي قدامه اوراق كدة
سياف
تعالي اقعدي
عاين لي مسافة بعدها مد لي الورق الفي يده
قعدت وانا بعاين فيه بإستغراب بعدها إبتسمت وانا بقول ليه منو الرسمك؟
خمني؟
جاتك هدية يعني؟
قلبت الورقة بالجهه التانيه وانا بقول ليه ودي شنو؟
شلت الرسمة التانية وانا بعاين ليها وملامح وشي اتغيرت حسيت بالقشعريرة لمجرد شوفتها..
قلت ليه صاحبت رسام ولا شنو؟
ممكن تقولي هو الصاحبني
مبرووك كسبت رسمات مجانية، بس حقيقي مبدع
عارفاه يطلع منو؟
منو؟زول معروف او مشهور يعني؟
حرك راسي بالنفي
سوداني يعني؟
لأ
طيب منو؟
حفيد مستر جو
الدهشة خلتني متسمره في مكاني وبعاين ليه
انا كمان مصدوم لغاية الان زيك
حفيده كيف يعني؟مستر جو عنده حفيد؟
وعمره 16 سنة
كيف؟
بدأ يحكي لي في تفاصيل يوم امبارح والحصل معاه
ليه ما أتصلت علي وقتها؟
انا بالفعل إتصلت عليك بعد ما مشو لأنهم كانو مستعجلين بس ما رديتي ورجعت ما لقيتك في البيت طلعت مشوار رجعت لقيتك نايمة
لأ، في شي ما منطقي، يمكن كذاب يا سياف، يمكن تكون حركة مقصودة الغرض منها تشويشنا او تشتيت إنتباهنا، مستر جو معروف للكل انه عنده بت واحدة ياها الظهرت في قضيته دي وهي ما بالعمر الممكن يخليها تكون عندها طفل بالعمر دة
مستر جو حسب الفهمته إنه كان متحفظ جداً على حياته الشخصية يا شهد، وحتى بته دي ما ظهرت إلا في قضيته دي والناس عرفتها، تقريباً م كان في زول بعرفها غير تايسون ودي في حد زاتها علامة إستفهام
ما فهمت؟
اقصد شنو بأكد لينا إنه الفي المحكمة دي كانت بته طالما انه ماف زول بعرفها اصلا؟ً
رجعت بذاكرتي ليوم المحكمة، نظرات البت وخوفها المبالغ فيه ودموعها..
خلينا نتصل على ليز ولويس نشوفهم وصلو لشنو..
طيب
شلت تلفوني وإتصلت على ليز..
صباح الخير
صباح النور ليز كيف حالك؟
لم اكن بخير طيلة اليومين السابقيين، لقد اصبت بحساسية في الجلد نتيجة ذلك الشيء، كيف حالكما هل انتما بخير؟
تأثر سياف بعض الشيء منه ايضا، ذهبناً للمستشفى ولكنه بخير، هل انتِ بخير الأن؟
اجل، اشعر بقليل من التحسن ولكن شكل جلدي يبدو قبيحاً بعض الشيء
تناولي الأدوية وستكونين بخير وتختفي الأثار
هل من جديد بخصوص العم ادريان؟
لويس واكيمي توليا لأمر ويعملان عليه
هل عاد ساتشي واكيمي؟متى؟
عاد اكيمي فقط، ساتشي ستتأخر ليومين اخرين، لنلتقي غداً ونتحدث
حسناً إتفقنا
قفلت منها رفعت راسي لقيت سياف بعاين لي
وبسرعة شال موبايله
شلت رسمة الأم الحامل وبقيت اعاين فيها بحيرة..
سياف قال لي طلب من حفيده يرسمها في اخر ايام ليه مع العلم إنه قال مؤخراً كان بطلب منه يرسم رسومات غريبة ويحتفظ بالأصل منها ويرسل ليه نسخه، بس دي تحديداً إستعجله في رسمها ووعده بأنها تتصدر الصُحف وحتشتهر زي رسمة الموناليزا في الشهر الهو إتوفى فيه
بس ليه الرسمة دي تحديدا؟كأنهاً كانت لحدث معين هو بخطط ليه وعلى وشك أنه يفصح عنه؟
وتم إغتياله بسببه!!
في اللحظة دي جاته مكالمة، شال التلفون وطلع برة وهو في العادة بتكلم قدامي عادي
انا كمان اخدتة بعضي ودخلت غرفتي جهزت وطلعت الشغل خليته هو في غرفته كان
لما وصلت لقيت منه مكالمات كتيرة ما رديت عليه
في إستراحتي الأخيرة قبل نهاية الدوام جاتني مكالمة
كانت من السيدة جينيفر
مرحباً سيدة جينيفر
مساء الخير شهد
مساء النور
لقد اخذ مني الموضوع بعض الوقت، للأسف لم استطع معرفة المالك الحقيقي للمبنى، هناك تحفظ على الأمر ولا ادري لِم وهذا امر مثير للشك والريبة
بخيبة امل قلت ليها لا مشكلة، شكراً لمحاولتك
ولكن توصلت إلى معرفة المهندسة المكلفة وقائمة على امر المشروع، لا اعرف إن كانت معلومة ذات فائدة ام لا ولكن ساورتني بعض الشكوك حولها لذا ااجريت بعض البحوث والتحقيقات عنها، إسمها جاسمين، من اصول سولفانية تعيش في نيويورك، إشتهرت بإهتمامها بشراء المنازل القديمة وإمتلاكها دون إحداث تغير بها، لا تمتلك شركة هندسية ولا تعمل في احدى الشركات، لا احد يعلم سبب ثراءها الفاحش وكيف تجني كل هذه الأموال، لقد تصدرت ارقامها المزادات العلنية المخصصة لبيع المنازل القديمة
إختفت العام المُنصرم عن الأنظار بعد ازمة إختفاء طائرة روسية في ظروف غامضة قيل ان إبنتها الوحيدة كانت بداخلها اثناء ذهابها في رحلة،
وايضاً قيل انها عملية إختطاف مدبرة للطائرة لأن الرحلة كانت مخصصة فقط لفتيات مسؤوليين روسييين
إتضح مؤخراً ان زوجها السابق عميل في الإستخبارات الروسية وان إبنته كانت برفقته قبل اسبوع من حادثة إختفاءها
كنت بسمع فيها بإهتمام ودهشة ولما سكتت بصوت مبحوح قلت ليها وهل وُجدت الطائرة؟
لا، لم يُعرف لها اثر
غمضت عيوني وافكاري جاطت، سكتت دقايق
شهد هل انتِ هنا؟
اجل، سيدة جينيفر هل يمكنك خدمتي في شيء اخر؟
سأرسل لك ارقاماً للوحات سيارات، اريد معرفة لمن تعود هذه السيارات بشكل عاجل
قومي بإرسالها، ولكن هل تعرفين شيئاً؟
لا اعلم، انا..حقاً لا اعلم
انتِ بخير شهد؟
اجل فقط إختلطت علي بعض الأمور، سيدة جينيفر سأعاود الإتصال بك حال توصلت إلى شيء
قفلت منها وإتصلت على سياف..
سياف، لازم نتلاقى
في شنو، صوتك مالو؟
انا كويسة، بس تعال علي
طيب بس فهميني
سياف حأفهمك بس اصلني اول
❖
وصلت مكان شغلها لقيتها واقفة منتظراني قدام المحل، لما شافتني جات بسرعة ركبت العربية وهي بتتنهد وملامحها باكية
شهد ما تقلقي بي
خلينا نمشي على بيت ليز في الطريق حأحكي ليك
طيب سامعك في شنو؟
السيدة جينيفر ما قدرت تعرف المالك الحقيقي للمبنى
ودة سبب حالتك دي؟
بس قدرت توصل للمهندسة المعمارية الكانت ماسكة مشروع المبنى وتجمع معلومات عنها
وبعدين؟
إسمها جاسمين من اصول سولفانية
الدهشة إعتلت ملامحي وانا بسمعها وهي مواصلة سرد بقية التفاصيل
التفاصيل دي مجرد صدفة مع اللغة الترجمناها في المذكرة؟
حركت راسها بالنفي
دة معناه..
ايوا دة معناه إنه الدفتر اللقيناه في الشنطة بخص بتها للأسف، والبنات الموجودين في تلاجات الموتى ديل هم المفقودين
طيب وصولنا لجاسمين دي حيوصلنا للمالك الحقيقي للمبنى وحيحل لينا اللغز دة عامةً
ما هي مختفية من حادثة بتها وم معروف ليها اثر، دي حنصل ليها كيف؟
وصلنا بيت ليز لويس واكيمي كانو مرافقنها، قعدنا
وحكيت ليهم قصة المفكرة وتفاصيل محادثتي مع السيدة جينيفر..
كانت في لحظة صمت سايدة
ليز قالت كيف يمكننا الربط بين هذين الأمرين والتاكد انها والدة احدى تلك الفتيات؟
سياف قال ليها: انا ايضاً إنتابتني بعض الشكوك والظنون بان الأمر مجرد صدفة، ولكنني بحثت قليلاً عن هذه الدولة، اقصد الموطن الأصل لجاسمين
وجدت ان سولوفينيا تعتبر وجهه الكهوف المشهورة عالميا، حيثً يوجد بها 8000 كهفاً كارستياً تحت الأرض وهذا ما يقودنا لربط الأحداث مع بعضها البعض وندرك ان الأمر ليس غريبا، إعتمدتً تصميم المكان بناءً على الطبيعة التي اتت منها
إختطاف فتيات بهذا العمر وقتلهم جميعاً فقط لأنهم ابناء مسؤولين؟من لديه مصلحة بفعل هذا؟
سياف قال ليه ربما الهدف هو جاسمين فقط، لذا يجب علينا ان نصل لهذه المراة
اكيمي بإستفهام قال: وبعد ان نصل إليها؟ما الخطة؟ما الخطوة التالية؟
لويس قال: علينا ان ندرس الأمر اولا، لنً نعتمد على الخطط الإرتجالية هذه المرة
انا انتظر إتصالاً من السيدة جينيفر، هذا الإتصال سيحدد ما الذي علينا فعله
لا افهمك شهد؟!
سأشرح لكم الأمر ولكن علينا الإنتظار لبعض الوقت
رجعنا البيت انا دخلت المطبخ وهو دخل غرفته، اثناء ما انا بغسل العدة وقعت كباية إتكسرت وقتها كنت سامعة صوته بتكلم بالتلفون
جا داخل علي وملامح وشه بتوحي بالإنزعاج والضيق
لما اصرف بداية الشهر حأجيبها ما تخاف
نعم؟!
كنت بلم في القزاز
لما اصرف بداية الشهر حاجيبها بالطقم بتاعها
شهد إنتِ ما ممكن تتكلمي كويس؟
وين الغلط في كلامي؟
كلامك م فيه حاجة صح اصلاً، مالك إنتِ مشكلتك شنو لأنه انا م فاهم وبحاول اتجاوز واتجنب تصرفاتك الغريبة دي بتطلعي من غير ما تتكلمي، اتصل عليك ما بتردي، فجأة بلقاك ما طايقاني، خليك واضحة وقولي بدل الأمور البتسوي فيه دة
انا بتاعة امور؟طيب وإنت شنو؟
دخل تلفونو في جيبو وربع يديه
سكتت وإتنهدت ووقفت في المغسلة وفتحت الموية
سامعك انا كملي عشان بالمرة افهم المضايقك مني دة شنو؟
عملت روحي م سامعة
شهد
خلصت غسيل وشلت الفوطة اجفف بيها مسكني من يدي جريتها منه وانا بقول ليه م تقرب مني ولا تلمسني تاني لغاية م تحدد إنت عايز شنو
لو عايز تاخد حقك بالحركة دي ف هي حركة سخيفة، وطفولية جداً على فكرة
شهد إنتِ فاهمة بتقولي في شنو؟
ايوا فاهمة!
أنتِ عايزة تقلبي التربيزة علي وخلاص؟عايزة هسي تطلعيني انا غلطان في حقك وناسية انه نحن عندنا مشكلة بسببك م اتجاوزناها لسة؟
كلامي واضح حدد إنت عايز شنو حتى لو في واحدة في حياتك وعايز ننفصل تمام، نحن كبار زي ما قلت انت، حأحترمك اكتر لو جيت قعدتني وقلت لي انا في حياتي واحدة وو 1,2,3 وفرصة سعيدة يا بت الحلال لكن امور المراهقين دي شنو؟
وقف قدامي وبقيت م شايفة إلا وشة كل م اتلفت على إتجاه يميل جسمه بحيث إنه يغطيني
دموعي من الردح والغيظ كانت في طرف عيني
ما فاهم بتقولي في شنو والواحدة دي منو وشنو الشعور السيء الوصلك مني بس طول الوقت في العلاقة دي انا واضح وعارف نفسي عايز شنو مفروض الكلام دة تقوليه لنفسك، ارجع اقول ليك انا ما فاهم بتتكلمي عن شنو بالضبط
طيب طالما بتتغابى انا حأسألك عديل، مش قلت ما بتصاحب بنات وم بتعرف بنات؟ميغان
دي شنو وزنها شنو في حياتك وجات من وين اصلاً؟ دة شنو التناقض دة وحركات المراهقين دي؟انا ما بهمني لو إتكلمت معاها في التلفون قدامي ولا من وراي، بس هسي دي حركات زول عارف روحو عايز شنو
ضحك
بقيت اعاين ليه بغيظ
خير مالك؟ المفروض انتِ تساسألي روحك إنتِ عارفة روحك عايزة شنو؟
سكتت
شايفة؟
دة الببني حواجز بينا ما حاجز واحد بس
انا حأثق في مشاعرك المترددة دي كيف وابني عليها حياتي؟
كلمتك قبل يا ابيض يا اسود
خطى خطوتين من جنبي وهو بقول لي مالم تحددي انتِ عايزة شنو في العلاقة دي اوعى تلوميني على شي، وانا ما مجبر اوضح او ابرر ليك وطلع
بقيت واقفة والأفكار بتضارب في راسي،
هو كدة قلب الطاولة علي يعني؟
مشيت غرفتي شلت تلفوني وبقيت اقلب فيه عشان اهدأ لاحظت إيثار بت صاحبه ل سياف رافعة إستوري واضح إنها صورة سياف
فتحتها لقيتها كاتبة"بما إنه انا بنوم بدري واليوم عيد ميلاد بابا التاني حابة اقول ليه كل سنة وانت احلى شخص عرفته، شكراً لحاجات كتيرة قدمتها لينا، ممتنة لوجودك في حياتنا الله يسعدك ويوفقك دايماً يارب، عارفاك شيخ و ما بتؤمن بالحاجات دي بس يظل يوم مميز "
اليوم عيد ميلاد سياف؟
عاينت للزمن لقيته 10:30..
سياف ماف اثر لوجوده في البيت شكله طلع
قعدت مع نفسي لدقايق بعدين مشيت المطبخ وبإستعجال طلعت حاجات الكيك، عملت اسهل كيكة اللي هي كيكة شوكلاته وزينتها وختيتها في التربيزة وختيت شمعة عاديه في نصها ومشيت قعدت في الكنبة برة وبقيت اشاهد في التلفزيون الساعة كانت 12 وشوية..
جا داخل البيت والغريب بالنسبة ليه اني لسة صاحية لأني في العادة بنوم بدري، على طول مشى غرفته،
كنت طافية نور المطبخ، عدى دقايق جا طالع شايل جك موية مشى المطبخ مشيت وراه..
ولع النور وبدون تركيز فتح التلاجة شال موية وإتلفت لقاني واقفة وبعاين ليه بنظرة طفولية، وهو بقفل في التلاجة وقف وبقى يعاين للتربيزة بإستفهام
انا عارفة إنه الأمور بينا ما تمام، وم عارفة بقولو شنو في الحالة دي بس حسيت إني عايزة اعمل دة وسط الجوطة دي كلها
خت الجك من يده
لقيت الناس بتتمنى ليك عام سعيد، أنا عايزة اكون معاك عشان اشوفك سعيد فعلاً واتأكد من الحاجة دي بنفسي، مش سألتني انا عايزة شنو؟
كان بعاين لي بحيرة
بقيت ساكتة وانا م عارفة اقول شنو تاني
عموماً اطفي الشمعة عشان الزمن اتأخر
شلت الكبريت ولعت الشمعة وانا بقول ليه يلا
قرب عليها قلت ليه بس إتمنى امنيه قبل ما تطفيها..
إبتسم وهو بعاين لي بعدين طفاها
شلت قطعة ومديتها ليه
خلاص كدة خلص الإحتفال معليش ما لحقت اجيب هدية لما اصرف بداية الشهر إن شاء الله
شكراً على العملتيه دة براه هدية
طيب تصبح على خير
تلاقي الخير
طلعت من المطبخ، رغم إنه إتبسط بس حسيت رد فعله بارد وباهت، يمكن من كتر ما انا افعالي متناقضة بقى ما عارف يتعامل معي كيف
نمت ودموعي مغطية عيني
صحيت على صوته، فتحت عيوني لقيته قاعد جمبي
سياف؟
انتِ جادة في الكلام القلتيه قبيل دة؟
قعدت وانا بعاين ليه الساعة كم هسي؟
مستني ردك انا
ما عارفة بس انا قلت الحسيته
شهد انا ما عندي مشكلة في البتحسية
عارفة مشكلتك شنو، ما قادر تثق في البقولو
شوفي انا عايزك بس ما بالشكل دة، عايزك بالدغري و بدون اي مخاوف ودسدسة، عايز اصل اهل بيتكم بالطريق الصح
نحن حالياً كدة غلط، واول حاجة صح نعملها نخت اهلنا في الصورة، زواج اهلك ما جزء منه دة ما بتسمى زواج حتى لو بينك وبينهم الالاف الأميال نفسياً لا انا لا انتِ مرتاحين،
بس انا محتاج افهم منك العلاقة دي بالنسبة ليك شنو؟
لو موافقة اناحأفاتح امجد اخوك في الموضوع هسي
سياف انا سلفاً كلمت بت خالتي انه في حياتي في واحد، بس ما وضحت ليها اننا متزوجين
والمعنى؟
انا اكيد موافقة
بقى يعاين لي كأنه م مصدق
بس في الوقت الحالي..
انا عارف الأمور جايطة والوقت ما مناسب، بس خلينا نخطي الخطوة دي احسن
طيب خليني اول حاجة انا اتكلم مع امجد وافهمه إنه انا ما رجعت لعمار زي ما هو فهمهم، وهو كان ماخد موقف مني احسن انا اكلمه اول وامهد ليه
متين حتكلميه
بكره إن شاء الله لو لقيت تلفونه فاتح
اكيد يا شهد؟
اكيد
سياف
نعم
حتنوم؟
انوم شنو الفجر على وشك الأذان اصلاً
وانت كنت صاحي دة كله ليه؟
بفكر في شنو هو الصح بالنسبة للعلاقة دي
طيب خليك هنا شويه
قعد قصادي
من يوم ما ابوي وعمتو مشو تركيا وانا خايفة عليهم شديد وكل ما اغمض عيوني بتخيل تخيلات كعبة، وبعد ما دخلنا المكان داك وشفنا الجثث ديك بقيت ما بقدر انوم، خوفي زايد عليهم
إتناقشنا انا وامجد في الموضوع دة واقترحت نرجعهم لسلامتهم وانا عندي صاحبي هناك ممكن اخليه يستلم الموضوع دة لغاية ما يصلو مطار الخرطوم، بس امجد رفض واكد لي إنهم حيكونو بخير ووضح لي انه هو عنده اصحابه هناك حيزوروهم بشكل اسبوعي وحيكونو حريصين على انه يتأكدو من سلامة الوالد بنفسهم، لأنه اخوك الكبير شوية بتاع مشاكل ومتهور وابوك وضعه ما بتحمل جدل وعمتك هناك براها، ف هو شايف إنه حيقدر يحل الموضوع بدون مشاكل
يارب يكونو بخير، يارب موضوع المحكمة دة يعدي واقدر اطلع من هنا واشوفهم، الموضوع دة باقي لي حلم بعيد شديد
حيعدي وحتشوفيهم إن شاءالله
الصباح ونحن بنفطر وفي حالة صمت قال لي في واحدة من اكبر شركات المحاماة عايزاني اشتغل معاهم بعد اخر جلسة من قضيتك وتصدرها الأخبار وكدة، وميغان وسيط للشركة وبتحاول تقنعني اوافق امشي اقابلهم في نيويورك
سكتت وانا بستوعب دة تبرير بشكل غير مباشر؟
بإندفاع قلت ليه دة خبر حلوووو شديد اي شركة؟وافقت صح؟
لسة
ليه؟
لأني ما مقتنع وحاسي بيه صيد في الموية العكرانة
ما هو أنت لازم تقعد معاهم اول حتى تقرر الحاجة دي،
جاتني مكالمة في اللحظة دي،
سيدة جينيفر؟فتحت الخط
شهد علينا ان نلتقي الان
نبرتها كانت مخيفة، ماذا حدث؟
الأمر يخص ارقام لوحات السيارات تلك، دعينا نلتقي اولاً سارسل لكِ عنواناً
حسناً
في شنو؟
انا كمان ما فاهمة بس قالت عايزة تقابلني وصوتها غريب
ونحن في الطريق إتصلت على ليز، اول ما فتحت الخط قلت ليها ليز سأرسل لك عنواناً قابليني عنده انتِ والشباب
ما الأمر شهد؟
سنلتقي بالسيدة جينيفر
سياف وقف العربية
مالك؟
دة الموقع
عاينت حوالي كان مبنى كبير
متأكد هنا يا سياف؟
حسب اللوكيشن المرسلاه هي ايوا
نزلنا من العربية وإتصلت عليها
انتِ في الخارج؟
اجل
حسناً قفي على جانب الباب
شهد
إتلفته، كانت ليز
نزلو وجو علينا مرحباً
صباح الخير
ماذا يجري؟ما هذا المبنى؟
قبل ما ارد عليها الباب فتح طلع واحد شغله غريب
من هي شهد؟
انا
بقى يعاين للبقيه
قلت ليه هذا زوجي وهؤلاء اصدقائقي
ابقو هنا قليلاً
إتحرك من جمبنا وبقى يتكلم وهو مركب سماعة
جا راجع وقال لينا إتفضلو
دخلنا، في حديقة اول حتى مدخل المبنى، واخدنا المصعد..
كنا بنعاين لبعض بإستفهامات واضحة والراجل متقدمنا
وقف المصعد وقال لينا من هنا
مشينا وراه لغاية ما وصلنا مكان كدة غرفة زجاجية السيدة جينيفر كانت جواها..
فتح الباب ودخلنا
مرحبا شهد
مرحبا سيدة جينيفر
بقت تعاين للباقين
اووه سأعرفك، هذا زوجي السيد سياف
وهؤلاء اصدقائي ليز، لويس، اكيمي، أنهم يساعدونني
مرحبا سيد سياف تشرفت بلقاءك،
، مرحباً يا شباب كيف حالكم؟
تفضلو بالجلوس
كانت غرفة إجتماعات وهي قاعدة في كرسي متحرك وقدامها لابتوب وفي بروجيكتر في الغرفة عاكس صور ل 5 اشخاص لابسين لابكوتات في معمل..
بقيت اعاين فيهم بدهشة
قلت ليها من هؤلاء؟
من على اليمين كلارك، مايكل مانشستر، إيلي اوبستفيلد، دايفيد جونز، ريتشرد "
علماء حصلو على الدكتوراة الفخرية في اقسام علم الأحياء والأمراض والطب الجزيئ في هارفارد
ماتو غرقاً في رحلة بحرية لهم في احد المحيطات إستغرق البحث عنهم عدة أشهر، رقم لوحة السيارة في مقدمة القائمة التي ارسلتها تعود ل مايكل، إنها السيارة التي خرجو بها للرحلة
كيف يمكن ان يكونو اموات؟هذا مستحيل
تم إعلان وفاتهم منذ سبعة سنوات مضت شهد
اقول لك مستحيل ان يكونو اموات سيدة جينيفر، انهم جزء من المسنين لدي في الدار...