الفصل الرابع والعشرون
ما كنت قادرة انوم، كنت مقلقة وسبب خوفي إنه الموقف دة ما حصل ابداً، حتى انه العادي عند عمار لما يصل البيت وبالذات لما يجي ينوم بعمل تلفونه صامت، كنت خايفه عليهو هو، رسلت ليه رسالة محتواها"وين إنت، اول ما تشوف رسالتي ارجع لي"
م كنت قادرة افهم محتوى الرسالة بتاعة الإيميل حاولت اشوف بقية الإيميلات التانيه الواصلة ليه لقيت اللابتوب قفل مافي طريقه،
قعدت صاحية ومنتظرة لغايه م جا الفجر إتوضيت وبديت اصلي حسيت بحركته وهو داخل البيت، دخل الغرفة لقاني في المصلاية دخل الحمام وجا صلى معي،
خلصت وبقيت منتظراه لغاية م خلص صلاة قلت ليه بي ضيق وين كنت إنت؟مشيت وين باليل دة؟ بتصل عليك م بترد وبرسل ليك ما بترد برضو، على الأقل مفروض رد علي طمني عليك عشان م اقعد مقلقة وخايفة على اعصابي كدة، عارف انا اتصلت عليك كم مرة؟
قال لي تعالي وضماني عليه اخد نفس مسافة وقال لي معليش مفروض اكلمك اني طالع بس كنتي نايمة وم فكرت اصحيك وطلعت لأنه احتاجوني ضروري
قلت ليه دة شنو الشي المهم البخليك تطلع بالليل كدة وترجع للفجر؟وبمنعك ترد على مكالماتي ورسايلي؟
قال لي ممكن تروقي عشان نتفاهم؟
كان عندنا إجتماع في club house كنا بنتناقش حول حالات معينه وبعد خلصنا بقينا نتونس وقتها انا كنت برة ما في الغرفة هنا وإنتِ نايمة، واحد من الدكاترة الكانو معانا في الروم اتصلو عليه من المستشفى وقالو ليه إنه في حادث كعب شديد شاحنة مع كم عربيه والإصابات خطيرة محتاجة تدخل جراحي حالا، والدكتورً زميلنا دة هو بعيد في إجازة عشان عنده عيد ميلاد واحد من اولاده م حيقدر يكون متواجد في المستشفى حتى لو عايز، ف طلب مننا نطلع المستشفى ونقوم باللازم عشان نغطي مكانه بس دة السبب غيره اكيد ما حيكون في اهم منك ..
قلت ليه الخوفني عدم ردك علي وطلعتك نص الليل عشان م حصل طلعت بالليل قبل كدة
قال لي كنت سايق مستعجل، بعدين لما وصلت دخلت عملية على طول والله
قلت ليه طيب، انا بس قلقت عليك
قال لي قصدك خفتي يكون عندي مره تانيه ولا شنو؟ �
قلت ليه اذا كان دة هظار ف هو سغيل انا خفت عليك بس ماف فكرت في كدة ابداً
قال لي بهظر ياخي انا عارفك خوافه ودة سبب محاولتي انه ما تكون عندي دوامات ليليه خالص دي حاجه الحاجه التانيه عارفك بتثقي فيني ولا ما كدة؟
قلت ليه اتعلمت يعني شنو ثقة وانا معاك اصلاً � تعالي طيب عشان كلها ساعتين وتجي مواعيد الدوام بتاعك لازم تنومي عشان تقدري تداومي بقيه اليوم..
عاين حواليه مسافة قال لي وين اللابتوب بتاعي انا تقريباً خليته هنا؟قلت ليه قفلتو ووصلتو ليك في الشحن مالك مخلوع كدة؟
قال لي ماف شي بس عشان كنت مخليه هنا وم شايفه يلا ننوم
صحيت على صوته وهو بقول : أديني المعلومات الحيويه بتاعته بسرعه، تمام مسافة الطريق واكون معاك بالكتير نص ساعة في النص ساعة دي عايزكم م تفارقوه لحظه تمام؟يلا المريض بين يديكم لغاية ما اصل..
قال لي صباح الخير،
قلت ليه صباح النور، صحيتك بالمكالمه دي صح، الوقت شبه إتأخر لكن عشان ساهرتي بسببي قلت ما اصحيك، جهزت الفطور والشاي، اصحي اجهزي وافطري واطلعي على أقل من مهلتك انا طالع عندي مريض حالته حرجه شويه لازم اللحقه
قلت ليه طيب حبيبي بالتوفيق
قال لي حاولي ما تسوقي اليوم اطلبي تاكسي يوصلك عشان ما حتكوني مصحصحة
قلت ليه لا انا تمام حأسوق عادي
قال لي اسمعي الكلام ي شهد، انتِ لما تكوني نعسانه بتنسي اسمك حتى، انا كل م استلم حالات حوادث خوفي عليك بزيد اكتر اعمل شنو؟
بقيت اعاين ليه وانا ساكته ..
قال لي طيب قبل ما تزعلي خلي بالك من الطريق وانتِ سايقة، وإتصلي علي طمنيني لو ما رديت رسلي رسالة طيب؟
قلت ليه حاضر، وكعادته وهو طالع ضماني عليه وطلع، وانا طالعة الدوام طول الطريق كنت بتكلم مع امجد مكالمة فيديو، إتصل علي هو فجأة وحكى لي عن إنه بفكر يخطب ليلى وكدة لكن حاسي انه خالتو كوثر ما موافقة حسب كلام ليلى
قلت ليه خالتو كوثر ما موافقة عليك؟
قال لي ما عارف ليلى جادة ولا لا بس في كلامها انه امها ما موافقة على ارتباطنا ما فاهم ليه
قلت ليه الا كان بتهظر معاك مستحيل خالتو كوثر ما توافق عليك هي لاقياك وين اصلا، بسً مستحيل اصلاً
قال لي إن شاء الله تكون بتهظر كدة انتِ شوفيها وحاولي افهمي منها شوفيها بتقول ليك شنو؟
قلت ليه حاضر، بقينا نتونس وقبل ما يقفل قلت ليه على فكره انا لسة مستنياك بخصوص بيانات البت الرسلتها ليك المره الفاتت، شايفاك عملت رايح من الموضوع
قال لي ياخ ما عملت رايح ما رسلتو ليك انا؟
قلت ليه لا
قال لي نسيت بس مشغول ومضغوط شديد والله كنت، البت دي طلعت مختفية اوى شي اهلها قالبين عليها الدنيا سماء ارض ما لاقنها وفاتحين بلاغ فقدان بإسمها، إنتِ مش لقيتي منشور فقدانها في الفيس؟
قلت ليه مختفية عديل؟
قال لي اي والله اهلها فاتحين بلاغ فقدان
قلت ليه عندها كم مختفية يا امجد؟
قال لي يا زولة انا ما عارف لكن دة جزء المعلومات اللقيتها، بتعرفيها إنتِ؟
قلت ليه لا ابداً
قال لي طيب مالك بتسألي عنها؟
قلت ليه لا ماف شي
قال لي طيب خلينا في المهم اها ما وجهتيني اخطب ولا اعمل عقد عديل في حال امها طلعت ما عندها مشكله؟
بقيت ما قادرة اركز معاه في المكالمه وم متذكره باقي كلامي معاه كان شنو اصلاً
وصلت الدوام فتحت فيسبوك كتبت إسمها في البحث فعلاً ظهرت لي البوستات المتشيرة بإنها مفقودة، تفاصيل المنشورات كانت إنها طلعت وما جات راجعة وغير متزنة عقلياً ومنزلين صورتها...
وقفت عند غير متزنة عقلياً دي وقلت لنفسي مستحيل عمار يغلط غلطة زي دي، رجعت للملف بتاعها ما لقيت في بياناتها شي بدل على انها غير متزنة عقلياً
رجعت لي امجد تاني بعد 3 مكالمات حتى رد، قال لي انتي الليله مشتاقة لي شكلك قولي عادي انا اصلاً الناس بتشتاق لي قلت ليه امجد رجعت ليك بخصوص البت المفقودة دي تاني اخر طلب عليك الله
قال لي قلنا بتعرفيها قلتي لأ في شنو تاني مالك إنتِ؟
قلت ليه ما بعرفها لكن بعرف واحدة بتعرفها لو ما استفدت منك وانت ضابط قدر الدنيا كدة ويدك واصلة استفيد منك متين؟
ضحك قال لي عايزة تستغليني قصدك، طيب انجزي لأني ماشي على ليلى دي منتظراني في الطريق
، قلت ليه عاين يا امجد انت ممكن تعرف لي إذا البت دي طلعت من السودان عبر خطوط الطيران ولا لأ؟اسمها ممكن يظهر معاك ضمن كشوفات اسماء المسافرين اذا طلعت صح، عايزاك تشوف لي اسمها في كشوفات رحلات الطيران الطلعت من السودان الفترة دي
قال لي بإستغراب يعني هربت؟ وبعدين انتِ في الواق الواق عايزة تشتغلي شغل الشرطة؟
قلت ليه لا م كدة بس قريبتها شاكة في كدة بس ماف شي اكيد طبعاً الشرطة جرجرتها كتيرة ف حابين بس نتأكد، المهم ممكن ولا لأ؟
قال لي طيب بحاول اشوف و بديك خبر
قلت ليه ما بتمشي فيني صح؟
قال لي ايوا اكيد
قلت ليه ما تنسى زي ما عملت المره الفاتت
قال لي حاضر ما بنسى يلا اقطعي وشك
الموضوع بقى شاغل بالي وطول اليوم بقلب في بوستات الفيس والتعاليق في بوستات الفقدان بتاعتها وغيره
رجعت البيت إتصل علي عمار قال لي حتأخر اليوم في المستشفى ما تشغلي بالك ولو اتأخرت شديد اقفلي عليك الباب كويس ونومي فعلاً ما جا وصباح اليوم دة كان الأحد يعني إجازة، فتحت تلفوني ما لقيت منه مكالمه ولا رسالة، لقيت رسالة من امجد بقول لي فيها إنه إسم البت في كشوفات المطار مافي ابدا، ً
عمار جا راجع البيت بالليل إتفاجأ بي صاحيه مستنياه، قال لي مساء الخير لسة صاحية؟
قلت ليه كويس إنه إتذكرت عندك بيت وفيه واحدة ممكن تكون مستنياك؟
قال لي الفترة دي ضاغطة شديد والله ي شهد مسك يدي وقال لي ما طالب منك غير إنه تهونيها علي
صوته كان تعبان وعنده زي مبادئ إللتهاب كدة
قال لي تعبان شديد عايز انوم بس
قلت ليه طيب، إستحمه ونوم عشان ترتاح،
ختيت يدي في جبهتو قلت ليه في حمى بسيطة
هو الإلتهاب لما يجيه بتعبو، راقد 4 يوم بسببه، وانا اخدت إجازة معاه م كنت بقدر اخليه براه ولو خليتو حيمشي الدوام متأكدة، وكالعادة لما يكون قاعد في البيت وفاضي ضروري نتكلم مع اهله واهلي مكالمة فيديو ونتطمن عليهم، بعد ما خلصنا مكالمتنا معاهم قال لي انا زهجان من قعدة البيت يلا نطلع
قلت ليه قصدك زهجت مني؟
قال لي بالعكس اي دقيقة جنبك هي بتساوي الدنيا وم فيها
قلت ليه طيب يلا انا كمان زهجانه على فكره
قال لي لو ما ظروف الفترة دي ضاغطة كان قلت ليك يلا نسافر، لكن الفترة دي تعدي إن شاء الله حنسافر بعدها اكيد
قلت ليه ما وريتني مضغوط في شنو انت؟ بالمناسبة المبتعثين وصلو؟
كان مركز في التلفون ما رد علي
قلت ليه وصلو ولا لسة؟
قال لي شبه وصلو
قلت ليه متين ما كلمتني؟
قال لي لأني انا كمان ي دوب عرفت
بقيت اقول لنفسي كيف وصلو والبت المفقودة دي المفروض إنها من ضمنهم واسمها مافي في كشوفات المسافرين عبر المطار زي ما قال امجد؟
فتحت الإيميل بتاعي مرة تانيه واخدته إسم من اسماء البنات الإخترتهم كان ورسلتو لأمجد قلت ليه امجد حبيبي، عايزة اعرف إسم البت دي موجود ضمن اسماء المسافرين من مطار الخرطوم الفترة دي ولا لأ، وعشان ما يرد ويرفض قلت ليه عليك الله ما ترفض، البت دي صحبة البت المفقودة عايزين نعرف لو دي طلعت من السودان الفترة دي ولا لأ، بس ضروري تديني خبر او بكره
قرا الرسايل وم رد علي
بقيت ارسل ليه استفهامات
تاني يوم لقيت منه رسايل عبارة عن ريكوردات وهو بردح لي، قال لي اهل البت ما مهتمين قدر اهتمامك دة، بعد اكتر من 3 ريكوردات ردح حتى قال لي البنات ديل ما طلعو من السودان قاعدين في السودان دة شكلها حركات منهم ساي عشان يخوفو بيها اهل البت، لأنه اصلاً البت عندها خلافات مع اخوانها وابوها ف شكلها مختفية بإراداتها، وبالله عليك تاني ما تقولي لي شوف لي حاجه وكان طلبتي شي ما تكتري كلامك ورسايلك انا طالما قريت الرسالة معناها بعمل في الشي الطلبتي مني ولما اخلص برد
رده بإنه البتين اسماءهم ما مدرجة ضمن اسماء المسافرين كان صادم بالنسبة لي ومتناقض مع كلام عمار وتأكيده بإنهم واصلين، بقيت ما فاهمة شي منو فيهم الما صادق ..
مشيت لعمار وقلت ليه حبيبي ما قلت لي حنعزم المبتعثين متين عشان ابدا اخطط واجهز؟مش كنت واعدني اشوفهم ونعزمهم عندنا لما يصلو؟
بقى يعاين لي
قلت ليه بصوت طفولي ما تطنشني انا عايزة اشوفهم
قال لي حاضر حتشوفيهم
قلت ليه متين؟
قال لي هم في ولاية تانيه إلا نسافر ليهم يعني ما ينفع نعزمهم هنا فهمتي؟
قلت ليه حلو نسافر طيب
قال لي ما لازم اتفرغ عشان اقدر اسافر دي الفكره
قلت ليه هم كلهم وصلو يعني ما بتقسموهم لمجموعات صح؟
قال لي اي كلهم وصلو مع بعض ما بتقسمو مجموعات
قلت ليهم افتكرتكم حتقسموهم مجموعتين كل عشرة مع بعض وكدة
قال لي بي ضيق لا، وبعدين ممكن نغير الموضوع دة ولا خلاص المواضيع إنتهت عندك يا شهد؟
نبرتو كانت حادة اول مره اسمعه يكلمني بيها قلت ليه بسم الله يا عمار مالك متضايق كدة انا بسأل بس..
قال لي انا بقول ليك مضغوط ومتضايق الفترة دي وعلى العلي عيان كمان وإنتِ كل همك مع ناس ما بتعرفيهم ولا شفتيهم اصلاً ممكن ما تندميني على اني كلمتك عنهم وطلبت مساعدتك؟ ممكن؟ اقول ليك شي انا غلطان شال الجاكت بتاعه ومفتاح عربيته وطلع...
لكنني معك شعرت لأول مرة بأن الأشياء حقيقية و أن الكلمات بإمكانها أن ترمم شخصا قد انهار منذ زمن...