الفصل الثامن والثلاثون
عتبان عليك في نقطة واحدة بس خلينا ما نتناقش فيها هسي، المهم الظرف دة كمان فيه تذكرة مفتوحة ما عليها تاريخ للرحلة ولا زمن محدد، حتكون معاك لغايه ما نستلم القرين كارد بتاعتك بعدها في يدك تحددي عايزة تمشي متين..
الدموع بقت في طرف عيني عدل لي طاقية البلوفر وقال لي حاولي تنومي وبالمناسبة بكره إذا حابه ممكن ناخدك معانا، نحن حنمشي نعمل برامجنا البنعملها كل سنة دي وما بنسوق نسوان لكن تعالي من باب إنه تبدي السنة الجديدة بشعور مختلف وبحاجه مختلفة..
ونحن واقفين فجأة الدنيا ضلمت وبقينا سامعين الصراخ والسماء عبارة عن اللعاب ناريه بأشكال مختلفة وحاجه كدة عباره عن لوحة فنيه، الكهرباء قطعت بس الدقيقة الأولى من الساعة 12 ورجعت نحن الإتنين كنا واقفين وبنعاين من نفس الشباك انا كنت بعاين ليه وم عارفة اقول شنو، وهو بعاين برة ومدخل يديه في جيوبو..
قال لي بكره جا..
قلت ليه سياف في حاجات او اسباب ما ينفع احكيها، لو حكيتها حتقول لي ذنبك مغفور صدقني..
قال لي شهد صلاتك على النبي؟
قلت ليه الف على الحبيب
قال لي انا لو عايز اعرف ما كنا وصلنا لهنا، ما مهمة التفاصيل كفاية جداً معرفتي بالنية الخلتك تتصرفي كدة ودة كافي جداً بعدين إنتِ كنتي واضحة معي بنسبة 70%إنتِ ما إستغفلتيني، انا معاك بكامل إرادتي و..
قبل ما يكمل كلامو باب غرفتنا دق وفتح على طول جات لين داخلة وقالت لينا هيي إنتو عارفنكم عرسان جداد وسنة جديدة عليكم وكدة بس نحن منتظرنكم فوق السطوح تحتفلو معانا يلا..
سياف قال ليها طيب جاين
قالت ليه يلا فايتكم العيد فوق
سياف قال لي حتجي ولا حتنومي؟
قلت ليه جايه بس اللبس
قال لي طيب
لين قالت ليه إنت تعال معي وهي لما تلبس تلحقنا، شهد السطوح حتصليه اول ما تطلعي من الغرفة دي انزلي شمال و..
قبل ما تخلص كلامها قال ليها بنلحقك مع بعض، البيت كبير عشان ما تروح
قالت ليه تمام المهم فوق مستنينكم
بعد ما طلعت إنتظر شويه كدة وقال لي حأستناك في الباب، الجو برة بارد شديد اللبسي تقيل
قلت ليه حاضر طيب
لبست بسرعة وطلعت وراه، لما وصلنا فوق مكي قال ليه شنو يا عريس ياخ عرسة بتاعه كم يوم تخليك حتى عاداتك تغيرها؟تبيعنا نحن الكل سنة بنعيد معاك عشان ما تحس بنفسك وحيد دي جزاتنا تروس مع مرتك ونحن نسوانا كنا بنبيعهم عشان خاطرك..
لين قالت ليه إتخيل بس يا ابوي باعكم بأرخص تمن حقيقي يعني
حبوبة فاطمة قالت ليه إنتو شن طعمكم بعد كدة؟
وبقو يضحكو
سياف قال ليهم يا جماعة خلوني اعيش لهفة وحماس البدايات بكل تفاصيلو..
أدونا اللعاب بقينا نطقها وبعدها جابو التورته والشاي و...الخ
لما جينا ننوم قريب الساعة 3 صباحا..ً
كنت حاسة بألم في بطني، اصلاً كنت حاسة بالألم من لحظة ما سياف فتح معي الموضوع بس كنت متماسكة، لما جيت انوم قدر ما حاولت اتجاهلو ما قدرت نهائي، ف كنت بتقلب، وبقيت حايمة في الغرفة وماسكة بطني،
سياف جا داخل فجأة لقاني واقفة وماسكة بطني..
قال لي كويسة إنتِ؟
قلت ليه سياف بطني مألماني شديد ما قادرة اقعد
قال لي مالك؟نمشي المستشفى؟
قلت ليه ما معي ادويتي بتاعة المصران
قال لي طيب ثواني طلع تلفونو من جيبو،
يا مكي ما اكون ازعجتك او نمت؟، جيب لي مفتاح العربية بتاعتك شهد دي شوية تعبانه عايز اخدها المستشفى، لا ماف شي..
طيب
ما كنت قادرة اللبس من شدة ما بطني مألماني،
هو اللبسني العباية والطرحة، مكي صحبو كان مستنينا هو الوحيد الصاحي..
سياف قال ليه انا بوصلها
مكي قال ليه اركب وخليك معاها بدون نقاش، وبقى يسألو من متين عندها الألم دة وكدة؟
سياف قال ليه هي اصلاً عندها قولون
مكي قال ليه لا ياخي معناها اليوم اكلت حاجه ما نفعت معاها..
كنت ساكتة ما بين بسمع في كلامهم وما بين بركز في الانا فيه..
وصلنا المستشفى دخلوني وسياف اول حاجه قالها للدكتور عندها قولون..
بعد الفحوصات ومراجعة الدكتور ادوني ادوية اخدتها وقتي وخلوني في الغرفة نص ساعة كدة الألم خف ونمت بعد 3 ساعات رجعوني البيت الساعة وقتها كانت قريب ال 6 صباحا، مما وصلنا نمت ما حسيت بأي شي بعدها صحيت عاينت للزمن لقيتها الساعه 3 مساء، وقفت في الشباك شايفة سياف كان بلعب كورة سلة مع وائل وفجأة ظهرت لين وهي بتصارع في سياف وهو بحاول يرمي الكورة في السلة والجليد نازل كأنو في عاصفة...
جاتني مكالمة من أمجد...
فتح الخط قال لي عارفين إنه ما بتحبي تحتفلي، بس ما غلط نسمع صوتك ونتمنى ليك عام سعيد،
قلت ليه كدة كدة كنت حأتصل واسمع صوتكم كيفك وكيف بابا ورفيدة وعمتو؟
إتونست معاه قريب ساعة، كنت بمسك دموعي بالعافيه وانا بتكلم معاه، سياف جا داخل وانا بتكلم معاه اول ما قفل دموعي جارية مسحتهم
قال لي صباح الخير
قلت ليه صباح النور
قال لي بقيتي كويسة احسن اليوم؟
قلت ليه احسن
قال لي اعملي حساب لنفسك التنشنه والقلق والزعل والضيق بالإضافة للأكل الما تمام دي كلها حاجات بتخلي حالتك تسؤ.
قلت ليه تمام إن شاء الله
قال لي دي الأدويه ومواعيدها دة ضروري تاخديه قبل الاكل
بعد ما طلع إستحميت ولبست وطلعت كلهم بقو يقولو لي حمدلله على السلامة ليه نزلتي؟
قلت ليهم انا بخير الحمد لله
حبوبة فاطمة قالت لي امبارح اكلناك اكل ما نفع معاك، كان تقولي لينا عندي القولون يا بتي عشان نعمل ليك حساب
قلت ليها حبوبة هسي انا ما عندي عوجة والله
مرت مكي قالت لي هسي للغداء عملنا ليك حساب زعلتينا شديد والله وم كلمتينا إنك تعبانه والله
ناس سياف جو داخلين، بناتهم كلهم كانو برة حتى ماجدة واثار..
قالو لي شهودة صباح الخير والف لا بأس عليك
قلت ليهم امين
ونحن في الغداء اثار قالت لي رجلك باردة علينا السنة يا شهد بابا وعمو سياف والجماعه الطيبين ديل خليتيهم ملمومين معانا في راس السنة الجديدة دي ما حصلت،
ماجدة قالت لي والله حتى مرضك جا لخير عشان قاعدين القعدة دي لأنهم كانو حيمشو يتسلقو الجبال في الجليد دة ويعملو هوايتهم المخيفة ديك اللي هي القفز من الطائرات لكن عمو سياف قال لاااا مرتي عيانه إستحاله افوتها
لين قالت ليها هو قال ليك كدة
ماجدة قالت ليها واضحة ما ضروري يقول لأنه كل سنة الهو البسوقهم
حبوبتهم قالت ليهم الحمدلله وربنا يجمعنا في الحرم إن شاء الله
كلهم بصوت واحد قالو ليها امين
بعد خلصنا غداء وشربنا الشاي رجعت غرفتي سياف جا داخل الغرفة قال لي في حبة مفروض تاخديها قبل الأكل بربع ساعة ما نسيتيها صح؟..
قلت ليه اخدتها ايوا، معليش أمبارح وقفتكم في البرد دة بسببي
قال لي المهم هسي كويسة
قلت ليه بكره يوم 2 المؤتمر بتاعي
قال لي طيب حيكون الساعة كم
قلت ليه حتأكد لكن غالباً الساعة 10 ص
صباح يوم 2 لقيت إنه المؤتمر طلع ببدأ 12 ظهر
وانا بجهز في نفسي جا داخل، كنت لابسة بدلة رسمية وهيلز ولسة ما لفيت حجابي..
قال لي خلاص جاهزة؟
قلت ليه حتوديني؟ما حتمشي مع ناس مكي تتسلقو وكدة؟
قال لي اوصلك تحضري المؤتمر لو في باقي وقت حنمشي
قلت ليه ما مفروض تتوقفو علي انا ممكن اخد تاكسي
بقى يعاين لي وهو ساكت..
قلت ليه طيب حألف حجابي
جهزت وطلعت اول ما ركبت قال لي اتفضلي
كانت كبايه حراريه..
قلت ليه دة شنو؟
قال لي دة شاي نعناع حبوبة فاطمة قالت حينفعك وم حتتعبي، حتخلصي الساعة كم؟
قلت ليه المؤتمر غالباً مدته ساعه
قال لي تمام
وصلني الموقع، دخلت ولقيت مستر تشارلي، كانت عنده كلمه مفروض يلغيها في المؤتمر ك ممثل لمقاطة سانفرانسيسكو..
بعد ما خلصنا مستر تشارلي قال لي انا طيارتي بعد ساعة من الان..
قلت ليه انا هنا مع اصدقائي صعبة ارجع اليوم
قال لي لكن بكره لازم تداومي لأني ما حكون مداوم بكره في المكتب
قلت ليه حاضر حأكون موجودة إن شاء الله
قال لي اكيد؟
قلت ليه ايوا
وانا بتكلم معاه سياف إتصل، قال لي خلصتي؟
قلت ليه اي
قال لي طيب مستنيك برة
قلت ليه كيف مستنيني ما مشيت؟
قال لي في الباركن بتاع العربات طالع حتلقيني في البوابة الرئيسية..
طلعت لقيته، قلت ليه إفتكرتك مشيت لحقت مشوارك
قال لي كلها ساعة زمن قلت انتظرك عشان يمكن تتعبي زي امبارح
قلت ليه انا لازم ارجع اليوم لأنو مستر تشارلي بكره ما حيكون موجود في المقر
قال لي طيب نحجز ليك في رحلات المساء اذاً
لما رجعنا البيت ووريتهم إني لازم ارجع عشان الشغل بقو يتحايلو علي عشان اقعد والمفروض إني عروس وتكون عندي اجازة
قلت ليهم لسة ما كلمتهم بموضوع زواجي حتى هم ما عارفين
قالو لي اهاا إذا كدة عذرك معاك
لين قالت لي شهودة جهزي لي غرفة في بيتكم من هسي لأني جايه اقرا عندكم هناك في معهد
قلت ليها حاضر
قالت لي انا جادة
اثار قالت ليها إنتِ الوافق ليك منو؟
قالت ليها بقنع بابا بطريقتي إنتِ مالك؟
جهزت حاجاتي وودعتهم، بغض النظر عن كل شي بس كانو يومين ملانين لُطف وحنيه ودفى البيت السوداني،
في المطار سياف قال لي كلمت شركة النضافة تجي تنضف مفروض يكونو خلصو، نسخة المفتاح عندك صح إتأكدي منها؟
قلت ليه موجودة راجعتها
قال لي ماف شي يخوف لكن برضو اقفلي الباب عليك كويس..
كان قاعد معي لغاية ما جات مواعيد رحلتي ودعني، بعدها رسل لي رسالة ما تنسي تشربي النعناع وتاخدي الحبوب قبل الاكل بربعةساعة ولو حسيتي بأي الم امشي الدكتور بدري..
رغم عدم إظهاري دة بس كنت حاسة بالخجل منه وكل ما اشوفو جنبي ببقى قدر السمسمة خصوصاً تصرفاتو معي وهو بخدمني..
وصلت البيت، اول حاجه عملتها اتصلت عليه بعد ما قال لي وصلتي وكدة قلت ليه البيت بارد الدفاية بتاعتك وين لأن البيت عباره عن تلج..
وصف لي مكانها، من شكل بيته واضح إنه كان النوع المرتب داك..
اول غرفة دخلتها اخدتها وقررت انوم فيها، كنت تعبانه من السفر وفي نفس الوقت خايفة وبتقلب ومخلية كل الأنوار شغالة لغاية ما نمت..
صباح اليوم التاني صحيت من الصباح فتحت الشنط بتاعتي وانا برتب في ملابسي في الدولاب جاتني مكالمة كان سياف..
قال لي صباح الخير
قلت ليه صباح النور
قال لي اصبحتي كويسة ما خفتي او كدة؟
قلت ليه انا متعودة على السكنة براي وبتأقلم بسرعة على البيوت الجديدة
قال لي طيب التلاجة فيها كل شي ممكن تحتاجيه
قلت ليه طيب حاضر
عايزة اقول ليه حتجي متين إنت قفل الخط
جهزت وطلعت الشغل بالمترو عشان عربيتي ما معي..
كان لازم امشي الدار عشان اعيد عليهم السنة الجديدة، دخلت عيدتة عليهم، لقيت مستر جو قال لي إتصلت عليك قبل الساعة 12 ما رديتي كان ماخد في خاطرو..
قلت ليه انا كنت في المستشفى ما لحقت احتفل اساساً وحكيت ليه الحصل معي،
قال لي المهم عندنا ليك مفاجأة
قلت ليه شنو؟
قال لي ثواني ربط لي عيوني وقال لي تعالي...
ساقني وبعدها وقفني مسافة وفجأة شال لي الشريط..
قال لي كنا حابين نحتفل معاك بس ما قدرنا نصل ليك ف حبين نوصل ليك محبتنا بطريقة مختلفة..
كانو جايبين لي هدايا كتيرة وخاتنها لي في غرفتي اللي في الدار
قلت ليه لأ دي كلها بتاعتي؟
قال لي ما حسستي واحد فينا إنه وحيد، ولا تعاملك معانا بينتهي بوظيفتك وخلاص، يكفي جداً إنك كل صباح بتكوني حريصة على إنه تقولي صباح الخير لكل واحد فينا على إنفراد بدون فرز وبتحسسينا بأهميتنا عندك...
انا بتكلم ليك بلسان الأغلبيه طبعاً
إتلفته عليه فتح لي يديه نظام يحضني..
قلت ليه انا مسلمة..
ضحك وقال لي إفتكرتك حتغفلي
قلت ليه لا جد شكراً شديد، ممتنة جداً لمحبتكم وكرمكم معي دة، وحقيقي إنتو هنا بيتي واهلي وكل شي...
طلعت لفيت عليهم وشكرتهم على العملوه وعيدته عليهم، ووعدتهم نعمل إحتفال مع بعض ونعمل يوم مفتوح وانا هعمل الكيك بإيدي..
وقفت في شباك غرفتي لاحظت السيدة كاثرين جايه من إتجاه كدة في الدار ما حصل شفتها جايه من على إتجاهه وكانت بتتلفت يمين وشمال..
وانا ماشة على القسم الإداري لقيت المسؤول عن نضافة الحديقة قلت ليه الإتجاه دة من الدار فيه شنو؟
قال لي ما عارف والله
قلت ليه اوك شكراً
مشيت مقر الإدارة قلت للسكرتيرة وين غرفة كاميرات المراقبة؟
قالت لي في الطابق التالت
طلعت الطابق التالت، لقيت الغرفة بس مقفولة، فجاة جا زول شايل كباية في يده ولابس لبس العمال الرسمي
قلت ليه كيفك؟
قال لي بخير الحمدلله
قلت ليه مسؤول عن غرفة المراقبة إنت؟
قال لي ايوا
قلت ليه انا شهد نائب رئيس مجلس الإدارة الجديدة، ام عندي مراجعة لكاميرات المراقبة ممكن؟
قال لي اكيد اتفضلي
فتح الباب ودخلت الغرفة كانت كبيرهه وكلها محاطة بالشاشات تقريباً اي حته في الدار معمولة فيه كاميرا إستغربت قلت ليه ليه ليه الكمية دي من الكاميرات؟
قال لي لأهميه الموجودين داخل الدار
قلت ليه اوك انا عايزة اراجع الجهه الغربية للحديقة..
وبقيت اوصف ليه وحددت ليه الزمن ..
راجع لي الكاميرا السيدة كاثرين كانت طالعة من الجهه دي..
قلت ليه وقف هنا، ممكن اعرف الجهه دي من الدار فيها شنو او بتودي لوين؟
قال لي دة الأرضي بتاع المبنى، ما فيه شي مهمل بس
قلت ليه فيه كاميرات مراقبة؟
قال لي معطلة من فترة واصلاً مقفول هو
قلت ليه اوك بس عايزة اراجع تسجيل الجهه دي ممكن؟
قال لي جدا دقيقة واحدة بس
راجعنا الكاميرات، الغريبة السيدة كاثرين كانت بتتردد على المكان دة كتير شديد، لاحظت انه 3 مرات في الإسبوع بتكون في الإتجاه وبتختفي لأنه ماف كاميرات في الأرضي وبتطلع تقريباً بعد ساعة من الزمن، واكتر المرات بتكون يا الصباح بدري شديد قبل الناس ما تصحى، او بعد الساعة 12 بالليل..
قال لي يبدو إنها بتختلي بنفسها في المكان دهه..
وانا سرحانه كان شايل فطيرة قال لي إتفضلي
قلت ليه لا شكراً
طلعت وانا محتارة شنو الممكن تكون بتنزل تتعملو السيدة كاثرين في الأرضي وهو اصلاً حسب كلام الولد إنه مهمل ومقفول؟
قلت امشي اشوف في شنو هناك،
مشيت كان في مدخل وبعد المدخل دة في سلم، دخلت ونزلت خطوتين في السلم كانت الحتة ضلام شديد وفيها ريحة نفاذة وعلامة كروس بالأحمر معمولة في المكان..
رجعت وانا محتارة طيب إذا المكان دة مقفول ومحظور الدخول فيه هي اول ما توصل هنا بتختفي وين؟وي ريتها لو بتعدي دقيقة ولا إتنين ولا عشرة اقل حاجه بتختفي ساعة حتى بتطلع من نفس المكان دة..
بقيت واقفة وبعاين في المكان مسااااافة لغاية ما فجأة تلفوني ضرب...
طول اليوم وانا ما في بالي غير اللحظة البتختفي فيها في كاميرات المراقبة وظهورها بعد ساعة
❖
بما اننا هسي برانا احكي لي وونسني...
اونسك بشنوو يا خال؟
العرسة دي والبرنامج دة كلو قصتو شنو؟وما تحكي لي الحكيتو قدام ن عشان انا عارف وإنت عارف إني ما حأصدقو
ماف اي شي يتحكي والله يا مكي ياهو بس جات كدة
كدة بيني وبينك؟
والله ماف شي يا مكي، البت دي اتعرفت عليها قبل فترة وفي نوع من التواصل بينا بس ما دايم
سياف انا لغاية الأسبوع الفات فاتحتك في موضوع العرس من باب الونسة متذكر؟
وردي ليك كان القسمة كان جات ماف شي بأجلها
وجات بعد اسبوع مباشرة؟
والله جات كدة ياخ
كلامك ما مقنع يا سياف، وما منطقي، كلمت ناس البيت طيب؟رايهم كان شنو؟
لحظة صمت
ما تسكت، او سكوتك دة افهم منه إنك ما كلمتهم ودة تصرف ما مسؤول منك، ماف شي بجبرك تعرس بالسرعة دي، التجهيزات والأمور الفارغة دي خليها بس ما لدرجة ما تشاور ناس البيت
يا مكي صدقني كل شي تمام وشهد بت كويسة
واضح عليها بت كويسة وبت ناس دي حاجه ما عليها خلاف، بس برضو اعمل حسابك وانا كلامي دة عشان إنت ولدي قبل ما تكون اخوي و عارفك إنت شنو واول مرة اشوفك متهور ومندفع كدة وم عارف السبب شنو
طيب تمام بعمل حسابي ابشر، خلينا في المهم، اها النادي دة كدة نحن متفقين والأمور كلها تمام ولا كيف وكيف؟
❖
يا امي انا حارجع السودان لو عمي عمار دة جا هنا..
يا ليلى ما عايزة معاك قلة ادب
ايوا انا قليلة ادب يا امي، قليلة ادب لأني ما عايزة اشوفو تمام؟
قال جاي نطرده يعني؟اقول ليه ما تجي؟
ما شغلتي
إحترمي نفسك، عمك جاي هنا يقضي كم يوم ونازل السودان ما قاعد، وابوك زاتو جاي، انا ما صدقته قدرت اجمعهم عشان اصالحهم ما بتقدري تتحملي الكم يوم دي؟ ما تقعدي معاه ما ضروري تقعدي معاه انشغلي، اطلعي اعملي العايزاه بعدين هو زول كبير يحمد الله اليوم دة عمره اكتر من 45 سنه إنتِ بتحاسبيه؟
ما قصة حساب يا امي، لكن ختي نفسك مكان امهات واهل البنات ديل يا امي، بترضي واحد يعرسني ويقضي معي سنه سنتين ويفكني ويجيب التانيه على طول؟
انا اسوي ليه شنو؟الكلام دة تقوليه ل عماتك بتقوليه لي انا لشنو؟
المشكله يا امي شهد قدرت تدبر امورها بحكم انها كبيرة ومتعلمة وبتقدر تتحمل مسؤوليه نفسها، لكن الشافعة الجايبنها ليه دي لو عمل فيها العملو في شهد وفكاها في البلد الما بتعرف ليها شي دي ذنبها في رقبة منو يا امي؟في رقبتك؟
وانا مالي عماتك القايمين بالموضوع
يا امي ممكن تبطلي ضلال؟ممكن تبطلي تدفني راسك في الرملة؟
مش إنتِ دكتورة؟ليه ما بتقولي ليهم اخوكم دة سايكو؟لانو دي ما امور بني ادم سوي، ياخ هي شهد ما مسكها يا امي تاني يجيبو ليه واحدة قاصر كمان؟
ليلى ما تتكلمي معي بالإسلوب دة ولا بالنبرة دي فاهمة ولا لأ؟
امي افهمي كلامي البت العايزين يعرسوها ليه دي عمرها 15 سنة يا امي متخيله معي لو ساقها امريكا ورماها الرمية الرماها لشهد؟ وعمتي لما كان قالت خاطباها ليه في عرس شهد البت الوقت داك كان عمرها 11 سنة، عمي عمار لو معرس ولده الكبير حيكون اكبر منها انا صراحة مصدومة فيه ك شخص عايش في امريكا ومصدومة فيه ك طبيب وعارف إنه الحاجه دي غلط
الغلط شنو؟العرس بالحلال بقى غلط؟
بعدين إنتِ شنو ماسكة لي في شهد، افهمي عمك ما رمى شهد، شهد براها إختارت تطلق، وبراها قررت ما ترجع السودان، يعني حسبتها حساب عقل واصلاً واضح موافقتها على عمك كان هدفها انه تمشي امريكا بس واول ما ضمنت روحها هناك عملت مشاكل وامور عشان يطلقها، يعني إستغلتو لمصلحتها بس دي كل الفكرة، لو في زول متضرر عمك ما هي، عمك دة خرب علاقتو عديل مع ابوك بسببها وهسي انا بحاول اصالحهم، وقرب يجن لو ما اصحابو السودانين هناك كلمو ابوك، ما عارفاك معادية عمك ليه اوعى تكوني متواصله مع امجد يا ليلى وهو البملى ليك راسك دة؟
امي امجد ما عندي رقمو اساساً مما ظهر ما اتكلمت معاه انا
إنتِ واخوك حسام الله يفككم من شرور الناس ديل، إنتِ بالذات..
امي هسي نحن مالنا؟
المهم ما عايزاك تتواصلي معاه نهائي يا ليلى وكان بالغلط لقيتك متواصله معاه انا ما عافيه ليك، لأني هملت ابوك وهملت بيتي واهلي وشغلي واي شي بخصني في السودان هناك وجيت معاك عشان قرايتك ومستقبلك، ماف مستقبل بتبني مع الناس ديل، شوف عينك عمك والحصل فيه، وبعدين سمعتي كلام ابوك قال شنو بسبب العملو في ليبيا وقبضوه هناك هسي حينزلوه معاش، يعني حياخد حقوقو دة كان طلعت ليه حقوق وحيقعد عاطل ساي، دايره بيه شنو؟ركزي في قرايتك ومستقبلك ساي...
❖
العاصمة/واشنطن
سياف شنو طوالي قررت ترجع بالسرعة دي إشتقت للمدام ولا جاتك التعليمات من فوق
والله يا مكي عارفك حتشغلها لي، لكن براك شايف الإعلان بتاع سؤ الأحوال الجويه دة يعني ما عندنا طريقة تسلق جبال ولا طريقة للقفز الحر والجو دة قالو حيستمر كدة لمدة اسبوع على الأقل وانا الأسبوع إجازتي بتكون خلصت اصلاً ف افضل ارجع قبل ما الأحوال تسؤ اكتر والرحلات الجوية تتوقف
وشهد هناك براها ما معاها زول يا عمو سياف نسيت تقولها
اللقاها منك يا اثار ولا من مكي، المهم لازم في امشي في كل الأحوال
طيب يا باش رحلتك الساعة كم؟
بعد ساعة كدة
بالسرعة دي؟
زي ما قلت ليك عشان الأحوال الجوية ما تسوء
شايف يا ابوي العرس بخليك زول مهروش وممل لأي درجة وعايز تكون بس في طرف مرتك حتى لو بالكذب
والله يا لين يا بتي حيرني، سياف الكان بطلعنا رحله في اسوأ الظروف داك هسي بقى عايز يرجع عشان الأحوال الجوية ما تمام، يا قولتك مهروش
إنت وبتك اسكتو، سياف واعي ومرتو اولويه عندو ما زيك تتحجج عشان تطلع برة البيت
اها خلاص امك قامت يا لين، يلا يا سياف نلحق نصل المطار عشان قبل ما الجو دة يسؤ اكتر من كدة..
إتعالت اصوات ضحكاتهم، سياف جهز وودعهم وطلع مع مكي ووائل للمطار..
❖
الجو كان بارد شديد رغم إنه الدفاية شغالة بس حاسة نفسي في تلاجة، عملت لي كباية شاي لبن ولقيت كتاب فن اللامبالاة جنبي في الدرج وكان عليه محدد بتاع صفحات، بقيت اقلب واقرأ فيه، محتوى الكتاب شداني لإني اقراه ف بقيت اقلب واقرأ بدون ترتيب فتحت الصفحة العليها المحدد ف كان محتوى جزء من الصفحة بقول:
تأتى السعادة من حل المشكلات. إن كنت تتجنب مشاكلك أو تحس كما لو أنه ليست لديك أية مشاكل، فإنك فى سبيلك إلى أن تجعل من نفسك إنسانا بائسا. وإذا رأيت أن لديك مشاكل لا تستطيع حلها فإنك ستجعل من نفسك إنسانا بائسا أيضا. الخلطة السحرية كامنة فى حل تلك المشاكل، لا فى عدم وجود مشاكل فى حياتك.
وقفت في النقطة دي وانا براجع في نفسي، بالرغم من إنه انا ما حليت شي للأن بس على الأقل بحاول..
سرحت وانا بقلب في صفحات الكتاب دة ومتنقله من صفحة لصفحة حتى إني نسيت نفسي والبرد الحاسة بيه..
فجاة سمعت صوت باب الغرفه بدق
رميت الكباية الماسكاها في يدي من الخوف اتدفقت فيني ووقعت في الأرض إتكسرت، ختيت الكتاب على جنب، قلت بصوت مخلوع منو؟
الباب فتح سياف قال لي قولي بسم الله..
اخدته نفس مساااافة ومسكت بطني
قال لي إتصلت عليك كتير ما بتردي، والمفتاح معي قلت يمكن نامت لكن لاحظت للنور منور في الغرفة
قلت ليه ما مشكله
قال لي إنتِ كويسة؟
اخدته نفس مسافة وقلت ليه كويسة، رجعت على طول مالك خير؟
قال لي خير إن شاء الله
البيت بارد صح؟انا فجأة إتذكرت إنه الدفاية مره بتشتغل تمام ومره لأ، وإتصل على عمال الصيانه من امبارح قالو إجازة هم، إتوقعت تكون ما شغالة والبيت زي التلج، وانا اصلاً طالب واحدة جديدة بس حتوصل بعد يومين
قلت ليه فعلاً حاسة نفسي جوا تلاجه لكن إنت جيت عشان كدة؟كنت تتصل علي بحاول فيها...
قال لي في بتاعة الخشب دي وعندي خشب خليني اولع النار بس
قلت ليه طيب
طلع من الغرفة وانا نزلت غيرت المفرش وملابسي ولميت القزاز المكسر ..
جا دق علي باب الغرفة وفي يده خشب الحطب، قال لي انزلي تحت لانو الدفايه في الهول، دة بمشي لينا حالنا لي بكره إن شاء الله، ،
لما نزلت لقيتو ولع النار ورمى الحطب..
قال لي لأنو الجو بارد شديد حننوم هنا ادفى من الغرف"قصده الهول"...
إنتِ خليك في الكنبة وانا بنوم في الأرض هنا
جاب لي مفارش كتيرة وجاب لنفسو مفارش..
قال لي لغاية يوم بكره دة ما يجي بس..
لما شافني قاعدة في الكنبه
قال لي لو ما مرتاحة انا ممكن انوم في الغرفة وإنتِ خليك هنا عشان ادفى..
قلت ليه لا ابداً حأنوم..
قال لي انا حأصلي العشاء، وحأشاهد شوية كدة في تلفزيون الغرفة ف إنتِ ممكن تاخدي راحتك هنا والدفاية شغالة..
ما بقدر انكر حتة إني عندي تراست إيشوز مبالغ فيها وكنت حاسة بإحساس كعب شديد اللحظة دي حتى وهو بتعامل معي كويس وبظهر حسن نيته انا بعاين ليه بعين الأكيد وراه شي، هو عايز مني شنو طيب؟اكيد ما بقيف معي الوقفة دي ساي،
، بعد كل المريت بيه دة كيف حأعيش مع الشخص دة وحاتعامل معاه ما عارفه، ولا عارفة إذا في يوم قرر يأذيني ممكن اعمل شنو بس العارفاه إني حأعمل كل البطلع بيدي عشان اكون مسالمة ومرنه في التعامل واكون في حالي إلى حد ما، ولو إتضطرني الأمر اجي على نفسي و اقدم تنازلات مقابل بس الفترة دي انا موافقة، بس أنا محتاجة منه يثبت لي..
وقفت هنا وانا بقول لنفسي وليه يثبت ليك يا شهد؟
إنتِ ما محتاجة منه شي في الأخير إنتِ هنا برضاك وبكامل إرادتك ودة كان قرارك...
رقدته وإتغطيت وانا بعاين للنار وبفكر، طول الليل كنت كدة لغاية ما غالبني النوم...
صحيت على حركته وهو بيرمي الخشب في النار..
عاينت لساعة تلفوني قلت ليه صباح الخير، إنت ما نمت ولا شنو؟
قال لي نمت في الغرفة
قلت ليه ببرودتها دي؟
قال لي انا ما عندي مشاكل مع البرد بالعكس
قلت ليه واضح
قال لي المهم اليوم حتجي الدفاية الجديدة حتكون في غرفتك تمام
قلت ليه وإنت؟
قال لي حيجو يصلحو لي الواقفة دي لأنها برضو جديدة..
قلت ليه طيب انا حأجهز عشان الدوام
لما جهزت وجيت طالعة قال لي انا كمان طالع بس ما حتشربي شاي؟
قلت ليه بشربو في الطريق قال لي انا عملت وعملت ليك واحد معي لو حابة جاهز في المطبخ...
دخلت المطبخ لقيتو مجهز لي لبن ومعاه بسكويت وخاتي فطاير وشويه اكل..
كنت جعانه قعدته اكلت وصراحة خجلت لما جا داخل لقاني باكل
قال لي لما تخلصي نطلع على طول
قلت ليه انا خلصت
قال لي متأكدة؟
قلت ليه ايوه
طلعنا مع بعض قلت ليه معي عربيتي انا
قال لي طيب خلي بالك وإنتِ سايقة في الجو دة
ركبت عربيتي إتحركت حتى هو إتحرك وراي..
مشكلتي معاه كلها بتكمن في حاله التروما الجاتني من عمار حولتني لشخص شكاك وم قادرة اشوف اي فعل كويس على إنه صاحبه دة كويس، وحاسة بإنه كل الناس دي بتتنافق وبتداري على افعالها الكعبة بإظهارهم للجانب الكويس فيهم، مشكلتي مع البشر يمكن بقت تتمحور حوالين الناس الكويسين معي هم منافقين ليس إلا...
لما وصلت الشغل كنت مقررة ارجع امشي المكان الكانت فيه السيدة كاثرين امبارح، وانا واقفة وعايزة ادخل سمعت زول بقول لي شهد..
إتلفت وانا مخلوعة لقيتو مستر جو..
قال لي واقفة هنا مالك؟
سكتت مسافة وقلت ليه ولا شي بس كنت سامعة صوت كديسة حسيت انها محتاجة مساعدة بس ما شايفاها
قال لي غريبة ما سامع صوت
قلت ليه ايوا صوتها برضو إختفى
قال لي طيب ممكن توصليني لصالة الرياضة اليوم اذا عندك وقت يا نائبة رئيس مجلس الإدارة؟
قلت ليه عشان الجمله الأخيرة دي حأوصلك بس عندي شويه تقارير مفروض ارفعها وشويه شغل اخلصه بس ممكن؟
قال لي تمام في إنتظارك..
خلصت شغل واخدته مستر جو ل صالة سياف، لما قربنا نوصل مستر جو إتصل عليه قال ليه انا قربت إنت جاهز؟
بعد ما قفل قلت ليه اليوم شايفاك لابس لبس مختلف شورت ونظارة وحركات ماشي وين
قال لي طالعين انا وسياف
قلت ليه في البرد دة؟
قال لي متفقين نطلع نفطر مع بعض لأنه كان في واشنطن وما إتلاقينا..
قلت ليه اهاااااا
اول ما وصلنا قال لي حتنزلي تسلمي ولا حتعملي زي كل مره؟
نزلت بدون ما ارد عليه سياف بقى يعاين لي وانا بعاين ليه
مستر جو سلم عليه بالأحضان وقال ليه مسرور بشوفتك يا صديقي
سياف قال ليه وانا كمان، حصل تغير بسيط في الخطة كان المفروض نمشي نادي الخيل ولكن لسؤ الجو في الوقت الحالي صعب نمشي، ولكن حنمشي مكان تاني حيعجبك اكيد
مستر جو قال ليه انا موافق المهم ما اكون موجود في الدار ومحبوس بين 4 حيطان، شهد نحن حنمشي حابه تنضمي لينا ولا راجعة تمارسي مهامك بين 4 حيطان؟
سياف قال لي ما حنتأخر ساعتين بالكتير وحنرجع
قلت ليه اوك حأمشي معاكم
مستر جو عاين لي بإستغراب..
وصلنا مكان كدة، مكتوب عليه Shooting
مستر جو قال ليه نادي تعلم الرمايه؟
سياف قال ليه بالسلاح
مستر جو قال ليه ليه ما اتعرفت عليك من بدري؟انا نادم لانو ما كان عندي صديق زيك في شبابي
سياف قال ليه نحن اصدقاء الأن يا رجل
نزلنا ودخلنا..
خلوني واقفة ومشو مع بعض تقريباً سجلو واخدو بطاقات وقالو لي يلا سياف مدة لي البطاقة
قلت ليه انا حأدخل معاكم؟
قال لي ممتعة حتحبيها يلا
اخدتها ودخلت، الصالة كانت كبيرة شديد وفيها ناس بس ما كتار،
ادونا سترة ونظارة وسماعة لكل واحد فينا، بعد ما لبسنا كل واحد فينا اخد مكانه، انا قلت لواحدة من الشغالين إني اول مره اجرب المفروض اعمل شنو؟
بقت توجهني..
مستر جو كان اغلب وقته بشجع في سياف او يقول ليه اصبت هدف..
انا كنت بحاول اخلي واحدة بس تظبط معي..
حاولت قريب ساعة حتى اصبت الهدف مرتين..
بعد ما خلصنا سياف قال لي محتاجة شويه تركيز بس وبتتعلمي سريع
قلت ليه بس ممتعة واحلى حاجه فيها إنها بتعلمك التركيز، رغم إني ما كان نفسي اشارك معاكم بس حقيقي إسمتعت جداً ف شكراً
قال لي العفو، انا عازم مستر جو على اكل شعبي في مطعم هنا، يلا نمشي ناكل مع بعض وبعدها ممكن تمشي الدوام
مستر جو قال ليه انا جاهز وجعان
قلت ليه لأ انا حامشي عشان الزمن بس ممكن توصلو الدار عشان ما حأقدر ارجع تاني
قال لي ما حتاكلي معانا؟
قلت ليه لا، مفروض ارجع الشغل الزمن إتأخر واصلا انا ما جعانه..
دخلت المبنى السكني للدار، ورجعت مشيت بإلإتجاه البتختفي منه السيدة كاثرين، ونزلت في السلم، لما حسيت بالضلام ولعت الفلاش بتاعي وبقيت نازله، السلم كان طويل شديد والمكان ضلام لمن مبالغة وعباره عن متاهه من شدة ما كبير، بقيت مولعة الفلاش بتاعي وبتلفت واضح عليه مهمل وماف زول قاعد يدخله بس السيدة كاثرين تكون بتجي هنا بتعمل شنو واوقات بتكون هنا بالليل كمان حسب تسجيلات الكاميرات..
بقيت بتلفت وم عارفه امشي على وين والمكان فيه ريحة نفاذة شديد شكلو بيترش مبيدات، إتخنقت وبقيت بكح..
اكيد السيدة كاثرين ما حتكون بتدخل هنا بشكل يومي بدون سبب، بس شنو السبب الممكن يدخلها في مكان زي دة وتكون فيه لمدة ساعة كمان؟
حسيت بنفسي مخنوقة وم قادرة اتنفس، طلعت بسرعة، مشيت المكتب بتاعي لسة ما قادرة اتنفس وقفت في الشباك بقيت حاسة اطرافي منملة، اكتر من نص ساعة وانا على نفس الحال واسوأ..
نزلت تحت بسرعة لقيت السواق الخاص بالمسنين واقف، قلت ليه ممكن تاخدني اقرب مستشفى هنا؟
قال لي إنتِ كويسة؟عيونك مالها؟
قلت ليه محتاجة امشي المستشفى حالاً ما قادرة اتنفس..
ركبت وعلى بال ما اصل انا شبه كتمت نفس، اول ما وصلني ركبو لي اوكسجين قعدت في الجهاز فترة بعدها بقو يسألوني..
حكيت ليهم انا كنت وين وإستنشقت شنو وحصل معي شنو..
الدكتور قال لي الغاز الإستنشقتيهو في المكان دة سام غير إنه سام بيأثر في الأعصاب ودة سبب إحساسك بالتنميل في اطرافك، دة يعتبر إنعدام مسؤوليه و..
قلت ليه المكان مغلق ومعمول عليه كروس انه ممنوع الدخول بس انا دخلت لأني كنت سامعة صوت كديسة فيه يعني الغلط غلطي
قال لي في مبيدات تانيه اقل ضرر ممكن يستخدمها للمكان، حنحتاج نخليك معانا هنا تحت المراقبة لمدة 24 ساعة تجنباً للأثار الجانبيه والمضاعفات الممكن تحصل ليك..
طلبت من السواق يرجع وقلت ليه انا حأرجع البيت، ما حبيت يعرف إنه انا ما حاطلع الا بعد 24 ساعه
المساء جاء وانا لسة في المستشفى ما طلعت، حوالي الساعة 8 كدة تلفوني ضرب كان سياف..
اول ما فتحت الخط قال لي يا شابة وين انتِ؟
قلت ليه انا في المستشفى، وحكيت ليه الحصل
قال لي جاي عليك..
لما وصل قال لي ما كلمتيني ليه من لم حصل دة؟
قلت ليه انا إفتكرت حأطلع على طول ما اتوقعت حاخد 24 ساعه..
قال لي حتى ولو مش مفروض يكون عندي علم؟
قلت ليه حصل خير انت ممكن ترجع البيت هسي وانا بكره إن شاء الله لما يطلعوني حأجي البيت
عاين لي وهو ساكت
ما رجع قعد معي لغاية تاني يوم رجعنا البيت مع بعض لقيتو ركب لي الدفاية في الغرفة وجاب لي مفارش جديدة ومعاهم بلوفرات وشرابات وجاكيت جلد...
قلت ليه ما كان تتعب نفسك ليه دة كله انا معي
قال لي لازم مفارشك وحاجاتك تكون منفصلة حتى لو المفارش
قلت ليه لاحظت ليك منظم شديد وانا عكسك صح؟
قال لي نثبتها قاعدة طيب ونكون متفقين النظام مهم شديد..
بتجي شركة تنضف ٣ مرات في الاسبوع وترتب لو في شي بسيط ممكن الموجود في البيت يعمله يعني مثلاً كبايه الشاي تتغسل وترجع مكانها، المعالق والحاجات الصغيرة صغيرة تتخت في مكانها وكدة
قلت ليه بتلمح على اني ما بغسل كبابي الشاي وبرمي المعالق ساي؟
ضحك قال لي والريموت في مكانه برضو ي ريت
قلت ليه حاضر في حاجه تانيه؟
قال لي والكتب بتاعتي والمكتبة عموماً لأ غير كدة نحن متفقين
بقيت اعاين ليه اخد كتابه من الدرج بتاعي وقال لي لما تحصل ليك حاجه او اي ظرف طارئ اول حاجه تعمليها تتصلي علي وتكلميني، دي اهم حاجه نتفق عليها، قال كلامو دة وطلع
بعد مرور اسبوعين يوم جيت راجعة من الشغل دخلت متجر اشتريت احتياجات البيت وانا مقررة اطبخ، وصلت البيت دخلت المطبخ على طول وطبخت اصناف كتيرة، بعدها كنت مرهقة لما جيت انوم جرس الباب ضرب..
قلت لنفسي سياف ما يفتح بمفتاحه ياخ، إتصلت عليه قلت ليه سياف انت مفتاحك ما معاك؟
قال لي معي ليه في شنو؟
قلت ليه طيب بتضرب الجرس ليه؟
قال لي انا ما لسة في الصالة ما طلعت اصلاً
قلت ليه طيب منو الحيكون في الباب، نزلت وانا مستاءة فتحت الباب..
تتتاااا سبرايز
لين؟..
لحظة صمت..
هاي مشتاقين
قلت ليها اهلين وحضنتني
كانت شايلة شنطة في يدها
قالت لي كيفك، وكيف سياف؟ وينو
قلت ليها الحمدلله اتفضلي، سياف لسة ما جا
قالت لي وااااي بردانه برد مبالغة
قلت ليها طيب ادخلي اقرب غرفة، اخت ليك اكل ولا اعمل شاي لبن دافي؟
قالت لي لا بس خلينا هنا هسي، الله بيت سياف زي ما هو رهيب من زمان ما غيرتي فيهو شي
قلت ليها لا ما غيرت
قعدنا شويه كدة قالت لي ممكن ابدل ملابسي وكدة؟
قلت ليها اكيد طبعاً
قالت لي وينها غرفتكم ووين غرفة الضيوف،
قلت ليها دي غرفتنا والغرفة دي مُستغلها سياف، على طول دخلت غرفة سياف وجرت شنطتها..
نزلت خليتها، شوية كدة جات نازلة ولابسة سويتر كبير..
قالت لي لقيته مُعلق ف لبسته بردانه ياخ
قلت ليها اجهز ليك اكل ولا تستني سياف يجي؟
قالت لي هو حيتأخر انا ما مكلماه إني جايه عاملاها ليه مفاجأة
قلت ليها ما حيتأخر على حسب
قالت لي طيب ما تكلميه اني جيت لما يوصل البيت
قلت ليها حاضر
عملت عصير وبقينا قاعدين نحضر في التلفزيون، لغايه ما سمعنا حركة سياف وهو داخل على البيت، وقفت وقالت لي هسسس عشان اخلعة..
كانت واقفة على جنب اول ما جا داخل على الهول قالت ليه مشت وراه وغمضت ليه عيونو بيديها قالت ليه انا منو..
وقف مسااافة ونزل يديها منو وهو بعاين ليها
قالت ليه مفاجأة..
قال ليها يا زولة من متين هنا؟
قالت ليه من قبيل وإستوليت على سويترك حتى عاين محلياه كيف
سلم عليها قال ليها كيفك وكيف ابوك وامك واخوانك كويسين؟
قالت ليه بخير الحمدلله
قال ليها جيتي براك؟
قالت ليه اي وعارفة العنوان ما احتجت زول يوصلني واصلاً بابا لو قال حيجيبني حقيعد يجرجرني اليوم وبكره وعطله نهاية الاسبوع حيقول مرهق عشان كدة جيت بس
قال ليها المهم وصلتي بخير
قالت ليه ايوة الحمدلله
قلت ليهم انا حأجهز ليكم الأكل تاكلو مع بعض
قالت لي محتاجة مساعدة؟
قلت ليها لا خليك مرتاحة
جهزت الأكل في السفرة وبدينا ناكل وهي بتتونس مع سياف وانا ساكته فجأة قالت ليه وبعدين انا ما حبيت اكلمك بالتلفون قلت افاجأكم، سجلت ل كورس مهم شديد عندكم هنا في سانفرانسيسكو وقررت انزل على طول عشان ما يفوت علي شي لأنه فيه إمتحانات اول بأول وانا كنت مستنيه التسجيل فيه يفتح عندي سنة ..
سياف عاين لي
قالت ليه معليش حتتحملوني شهرين تلاته صح لو ما فيها ثقالة
سياف قال ليها يا بت إنتِ هبلة؟
قالت ليه فاجأتكم عارفة روحي
قال ليها حنختلف لو كترتي في كلامك المسيخ دة
عاينت لي..
قلت ليها بالعكس اخيراً حألقى زول اتونس معاه لانو سي السيد وقته كله في الشغل
ضحك وقال لي ما انتِ برضو وقتك كله في الشغل
قلت ليه حتى لما ارجع بتجي متأخر
قالت لينا في كل الأحوال قاعدة حأغزركم يا قول حبوبة
بعد ما خلصنا اكل وشربنا شاي وإتونسنا قالت لينا انا نعست حأمشي انوم..
قلت ليها وانا والله
قالت ليه سياف معليش استوليت على غرفتك وشبه حاستولى على دولابك وعموما بديت بالسويتر، ما حألبس ملابسي الجبتها معي حأقشر بهدومك بس ما بيناتنا صح انا وإنت واحد..