الفصل التاسع والثلاثون
طلعت دخلت الغرفة وخليتهم
لما جا داخل كنت بمسج في شعري كريم تسريح
قال لي ما كنت عارف بموضوع جيتها دة وإلا كنت كلمتك..
قلت ليه ما مشكله حصل خير
حسيتو محتار كدة وما عارف يعمل شنو والغرفة ما فيها كنبة..
عايزة افتح خشمي اتكلم معاه جاتو مكالمه، قال يا مكي..
وطلع من الغرفة..
اخد وقت وما رجع ونمت وانا بتقلب..
صحيت على صوت منبه بضرب، فتحت عيوني لقيتو نايم جنبي بعد دقايق قفل المنبه عملت روحي نايمه نزل دخل الحمام، جا طالع فرش المصلاية صلى الفجر شكله وشال المصحف قرأ قرءان مسافة اكتر من نص ساعة كان بقرأ قرءان، بعد ما خلص جا راجع رقد في مكانه..
لاحظت ليه وهو نايم طرف السرير و بحاول يخلي مسافة بيني وبينو..
لما صحينا الصباح لقيت لين مجهزة لينا الفطور، قالت لينا صحيت بدري ولقيت نفسي فاضيه ف جهزت ليكم فطور خفيف
سياف قال ليها خير ما عملتي
قالت ليه لقيت القميص بتاعك دة وعجبني ف لبستو على طول بدون ما اتلفت، ما بحتاج استأذن صح؟والله ملابسك ريحتهم حلوة شديد حبيت عطرك دة انا
بالمناسبة وين الكلب بتاعك ما شايفاهو؟
اتجاهل كلامها عن القميص وقال ليها عند زول حاجيبو بكره إن شاء الله
قالت ليه ممكن تربط لينا قدام البيت مرمى بتاع كره سله عليك الله يا سياف عليك الله
قال ليها طيب حاضر
قالت ليه دوامي في المعهد ببدأ يوم الاتنين الجايه ي دوب الجدول نزل عندي في الإيميل امبارح، ممكن اليوم امشي معاك الصالة الأيام دي؟
قال ليها طيب تمام انا زاتي عايزك..
قالت ليه طيب حأجهز
كل دة وانا ساكته بعاين ليهم..
شوية كدة جات نازلة قالت ليه جاهزة
قال لي شهد حتمشي بعربيتك صح؟
قلت ليه ايوا
قال لي طيب نحن حنمشي إذا، ً محتاجة شي؟
قلت ليه لا شكراً
مشيت الدوام وعشان اليوم ضاغط ما إنتبهت للوقت اساسا، إتصلً علي سياف قال لي شهد ها نجي عليك؟؟
قلت ليه تجي علي لشنو؟
قال لي عشان ناخدك
قلت ليه لا امشو البيت إنتو انا بجي بس اخلص شغل
قال لي طيب حأوصل لين البيت واجي عليك الوقت داك تكوني خلصتي..
إستغربت هو عارف إني معي عربيه ليه قال كدة؟
بعد ساعة رسل لي شهد لما تكوني راجعة البيت إتصلي علي نتلاقى نرجع مع بعض
بالفعل دة الحصل هو وصل قبلي، لقيتو منتظرني قدام باب البيت في العربيه ما نزل..
قلت ليه مالك؟
قال لي ماف شي تعالي، مسكني من يدي وفتح الباب وانا بعاين ليه، لقيناها قاعدة في الهول ومشغلة التلفزيون بتحضر..
قالت لينا مساء الخير هو انتو بتتأخرو كدة ولا طلعتو مشوار بدوني؟
سياف قال ليها لما شهد تكون عندها شغل إضافي بس بنتظرها
كانت لابسة بجامة وفاكة شعرها ولابسة قميص سياف من فوق..
قال لي انا طالع فوق استحمى واغير، قلت ليه وانا كمان لما وصلنا الغرفة قلت ليه حاصل شنو؟
قال لي ماف شي مهم، لين مراهقة شويتين وطايشة
قلت ليه لأي درجة؟
قال لي تكون معانا هنا وم تكلم ابوها
قلت ليه شنو؟
قال لي ابوها حالف يرتكب فيها جريمة لأنها طلعت بدون رضاه والكلام دة قبل اسبوع من الان
قلت ليه اسبوع بس هي ما جاتنا قبل اسبوع
قال لي ما دي المشكله
قلت ليه والحل هسي ابوها حيعمل شنو؟
قال لي ولا شي انا كلمتو إنها معانا لغايه ما الأمور تهدأ وتروق حنرجعها..
قلت ليه متأكد إنه الأمور حتهدأ وهي حتوافق ترجع؟
قال لي على الأقل الفترة دي، لين مراهقة يا شهد وعقلها صغير وتصرفاتها صبيانية وابوها متهور وأحمق ممكن عادي في البلد دي يتصرف معاها اي تصرف وهي تتخذ ضده إجراءات عشان كدة بحاول اسايسه واجاريها حسب عقلها، ابوها اليوم كان حيجي هنا لو ما منعته عشان الأمور ما تسؤ ..
قلت ليه كويس إنك منعته، انا ححاول اتكلم معاها لو حكت لي طبعاً
قال لي يا ريت توجهيها لو فتحت معاك الموضوع
قلت ليه حاضر إن شاء الله..
قال لي وبالمناسبة طلع ظرف وقال لي انا نسيت اقول ليك إنه وثيقة الزواج وصلت من كم يوم، اتفضلي
قلت ليه بالجد، الحمدلله طيب
قال لي حنرتب الأوراق ونبدا نعمل معاملات القرين كارد على طول بس خلي الشهر الأول دة يعدي وكدة عشان اوراقنا كلها تكون سليمة و ما يتجرجرو معانا
قلت ليه طيب إن شاء الله
غيرت ملابسي ورقدتهه وجا صلى العشاء وشغل التلفزيون لغايه ما نمت
الصباح قال ليها يا لين شهد حتوصلك الصالة ولو عايزة تمشي معاها مكان شغلها ممكن..
قالت ليه المكان الاسمو الدار دة؟مستحيل هو انا ناقصة مسنين كفاية العندي في البيت..
قال ليها انا عندي مشوار قبل الصالة مفروض امشيهو
قالت ليه تمام بمشي معاك مشوارك خليني في العربية بنتظرك..
للمره التالته انا اليوم لابسه التشيرت بتاعك، ملابسك حلوة شديد رغم إنها اوفر سايز فيني بس رهيبة
بقيت اعاين ليهم، المشكله تصرفاتها متمادية ما تصرفات طيش ابدا...ً
عدينا اسبوعين بالحالة دي ويمكن اسوأ وانا بقيت اتضايق من تصرفاتها وتعاليقها الما في محلها...
يوم قلت ليه سياف انا عربيتي حتدخل صيانه ممكن اليومين دي توصلني في طريقكم؟
قال لي ما طلبتي شي حاضر على طول
ركبت جنبو في العربيه هي طلعت من البيت بعدنا فتحت الباب القدام لقتني قاعدة وقفت مسافة وقالت لي دة مكاني البحبو بس ما مشكلة وقفلت الباب وركبت ورا قال ليها حاوصلك حتى ارجع اوصل شهد
قالت ليه لا وصل شهد انا ما مستعجله
قال ليها ممكن الدرس يفوتك اوصلك اول
قالت ليه لأ درسي حيبدأ متأخر ما مشكله اصلاً عايزاك توديني محل كدة قبل المعهد عايزة اشتري حاجات
قال ليها خير
ونحن في الطربق قالت ليه سياف هسي إنت عمرك كم؟
قال ليها 38
قالت ليه وشهد 33 يعني الفرق بينكم 5 سنة غريبة..
قال ليها الغريب شنو؟
قالت ليه اول مره اشوف راجل بتزوج واحدة قريبة من فئتو العمرية يعني معروف ناس التلتينات بعرسو بنات العشرينات والطاشرات و..
قال ليها القال كدة منو؟
قالت ليه ماف زول قال يعني ممكن تعتبره عُرف سائد
قال ليها لين انا شايف تركزي على دراستك افضل إتفقنا؟
لما وصلني قبل ما انزل مسك يدي وعدل لي طرحتي وقال لي الجو بارد شديو وإنتِ صوتك من امبارح منتهي حاولي إشربي حاجه دافية اول ما توصلي
إستغربت وانا بعاين ليه وشويه بحاول استوعب هو كدة بجد؟
فكرت لي لين لقيتها بتعاين لينا
قلت ليه طيب وإنت كمان
وانا داخله على الدار لاقاني واحد من العاملين مع المدخل قال لي صباح الخير
قلت ليه صباح النور
قال لي كيف حال مستر جو الان حالته مستقرة؟
قلت ليه مستر جو مالو؟
قال لي إتلقى مغمى عليه وتم نقله للمستشفى..
قلت ليه متين الكلام دة؟واي مستشفى؟
قال لي صباح اليوم في مستشفى ال...
وقفت اقرب تاكسي ومشيت المستشفى
لقيت مستر تشارلي ومرتو ومعاهم المشرفات
قلت ليهم حصل شنو لمستر جو؟
قالو لي هو بخير، إتلقى مغمى عليه في الدار ونقلناه للمستشفى
قلت ليهم مغمى عليه؟ كيف؟
مستر تشارلي قال لي هو بخير الان ما تخافي عليه
قلت ليهم هو وين حاليا؟ً
قالو لي في الغرفة
دخلت عليه بي لهفة كدة لقيتو بقفل في قميصه ومعاه الدكتور والممرضة وهو بقول ليهم بإمكاني ارجع المقر عادي صح؟
قلت ليه إنت كويس؟
قال لي زي الحصان تماماً وعكة خفيفة وانا بخير
وشو كانت ملامحه متغيره وعيونو منتفخة
قلت ليه دكتور هو كويس؟
قال لي ماف دكتور بقول ليك المريض بخير بحاولو يطلعو امراض من تحت الارض
الدكتور قال لي هو بخير الان ولكن لازم المتابعة خلال الإسبوع دة
قلت ليه تمام انا بنفسي حاجيبو المتابعة
قال لي انا بخير ما تقلقي يلا وصلوني البيت، لما طلع لقاهم متجمعين برة قال ليهم وليه كلكم موجودين هنا؟انا لسة عندي عمر طويل في إنتظاري يلا نرجع وبقى يتكلم مع نفسه وهو ماشي
قلت ليه مستر تشارلي هو وقع وين؟
قال لي في الحديقة
ونحن راجعين كنت بعاين ليه، ملامح وشه والإحمرار الحوالين عيونو حسيت إنه حصل معاه زي ما حصل معي بس كيف اقدر اسأله او افاتحه في الموضوع؟او معقول يكون هو مع السيدة كاثرين؟
لما وصلنا مشيت معاه لغرفته، قلت ليه مستر جو إنت كويس الان؟
قال لي ممكن تبطلي تسألي عن صحتي لأني بخير وما عندي شي وعايز ارتاح بس؟
قلت ليه اوك حاضر اذا احتجت شي إتصل علي انا موجودة.
قال لي تمام
وقفت في الباب وانا بفكر اسأله كان وين لما وقع، سمعتو بقول لي اقفلي وراك الباب واطلبي منهم عدم زيارتي و إزعاجي اليوم
قلت ليه حاضر
قفلت الباب وانا بفكر وراسي بقى يودي ويجيب
نزلت سالت واحد من العاملين وين اتلقى مستر جو وهو واقع؟
قال لي وسط الحديقة هنا بالتقريب مكان ما بيجلس كل صباح
المكان كان شبه بعيد من المدخل بتاع الأرضي..
سياف المساء إتصل علي قال لي انا جاي عليك عشان نمشي ناخد لين اذا خلصتي..
قلت ليه اوك منتظراك
لما وصل وطلعنا قلت ليه بالمناسبة مستر جو اليوم اتلقى واقع في حديقة المبنى واخدناه المستشفى
قال لي لا ياخ ليه ما كلمتيني متين حصل كدة؟
قلت ليه صباح اليوم
قال لي نرجع نمشي علينا ولا كيف وهسي هو كيف؟
قال لي بخير بس رافض زيارة اي زول اليوم قال عايز يرتاح
قال لي طيب بتصل عليه لو وافق نرجع نتطمئن عليه مالو عندو شنو؟
سرحت مسافة قلت ليه ولا شي وقع بس قالو
قال لي عملو ليه الفحوصات كلها؟
قلت ليه فاضل المتابعة خلال الاسبوع دة
قال لي طيب
كنت ساكته وسرحانه قال لي ما تقلقي حيكون بخير إن شاء الله
وصلنا سياف إتصل على لين قال ليها نحن قدام المعهد
قالت ليه انا طلعت
قال ليها وين؟
قالت ليه رجعت البيت
قال ليها متين انا قبيل كنت بتكلم معاك قلت ليك اخد شهد واجي عليك
قالت ليه خلاص رجعت انا، حأكون منتظراكم جنب الباب
قفل الخط وهو متضايق
انا عموما ما عندي اي تعقيب على تصرفاتها معاه بحس انه ما من حقي اتكلم وهو كمان ما بتكلم
وصلنا البيت لقيناها قاعدة قدام الباب وبتلعب في شعرها والجو جليد وبرد شديد سلمت علينا ودخلنا لا هو سألها ولا هي إتكلمت واضح إنها كانت متضايقة
اول ما دخلنا ما فتحت خشمها على غير عادتها وعلى طول دخلت غرفتها ونحن دخلنا غرفتنا
سياف دخل الحمام إستحم لما جا طالع قلت ليه ممكن اقول حاجه؟
قال لي اتفضلي
قلت ليه افضل تسألها مالها متضايقة، ودة الصح
قال لي حأتكلم معاها بكره إن شاء الله
شغل التلفزيون واخد مفرش ومخدة وقعد قدامه
الصباح لما مشيت اصحيها لقيتها مافي في غرفتها ولا في اي جزء من البيت، سياف اتصل عليها، المكالمة الأولى ما ردت ردت المكالمة التانيه،
قال ليها لين وين انتِ؟ قالت ليه انا طلعت المعهد بالمترو
سياف قال لي يلا اوصلك يا شهد
قلت ليه جد هي مالها؟مشكلتها شنو ما فاهمة
قال لي اوصلك وامشي افهم منها مالها
وصلني ودخل المعي الدار للسيد جو عشان يطمئن عليه، مستر جو قال ليه كويس إنك جيت، اكيد شهد قالت ليك إنه وضعه سيء، كنت محتاج اوصف ليهم إنه صحتي تمام وجسمي رياضي زيك تماماً
مستر جو رغم انه كان رافض مقابله اي زول لكن نزل مع سياف وإتمشى في الحديقة اكتر من ساعة قاعدين مع بعض وانا بعاين ليهم من مكتبي
بعد خلص سياف ودعو ومستر جو وقف وهو بعاين بالإتجاه بتاع مدخل سلم الطابق الأرضي مسافة
إتأكدته إنه وقعتو دي ما كانت ساي، فعلاً شكوكي في محلها، فعلاً في شي، نزلت مشيت ليه في غرفتو قلت ليه مستر جو متذكر قبل ما يغمى عليك حصل شنو يعني كنت وين وكدة؟
قال لي قررتي تبقي محققة خلاص بعد منصب نائب المدير؟
قلت ليه لأ بس..
قاطعني وقال لي انا مريض قلب اتعودته على اني اتعب فجأة وتحصل لي مضعافات واقع فجأة وغيرها من الأشياء وإنتِ كمان إتعودي وم تتفاجئي لما تسمعي إنه حصل لي شي
قلت ليه الف لا بأس عليك انا بس حبيت اعرف السبب عشان نتجنبه
قال لي ما تخافي انا حريص على صحتي اكتر من اي شي، وعندي ده بحفظني طلع سلسل صليب من رقبته وقال لي اهدتني ليه بتي ماف داعي للقلق لسة عندي كتير اقدمه للحياة دي ما جاهز للموت حتى الان..
قلت ليه اول مره اعرف إنه عندك بت، ما جبت لي سيرتها
قال لي ما عندك مهام تقومي بيها اليوم؟
اول حاجه عملتها بعد طلعت منه مشيت قسم شؤون الأفراد، طلبت مقابله المسؤول من صيانة المبنى، وطلبت مقابله العاملين المسؤولين عن الرش والتعقيم
بالليل وانا في البيت كنت بتقلب وسياف كان جنبي في السرير، حاولت انوم بس النوم كان طاير من عيني،
طلعت من الغرفة مشيت المطبخ وانا بشرب في الموية سياف جا داخل المطبخ
قال لي مالك إنتِ مقلقة اليوم على غير عادتك اول ما تختي راسك في المخدة بتنومي
قلت ليه ماف شي ساي عايزة اطلع مسكني قال لي تعالي اقعدي هنا على بال ما اخلص كبايتين الشاي ديل عايزك تكوني خلصتي كلام، وإذا في شي بتحل إن شاء الله..
قلت ليه هو ماف شي مهم شديد بس بالي مشغول بشويه حاجات حاصله في الدار
قال لي مثلا؟ً
قلت ليه مستر جو مثلاً وقع لأنه دخل مكان كدة في الدار بيترش مبيدات حشرية ومانعين فيه الدخول عشان ما يحصل ليك تسمم وانا دخلتو قبل كدة وحصل معي نفس الشي الحصل ليه دة، بس بكذب وبقول انه وقع في الحديقة
قال لي وإنتِ دخلتيه ليه إذا هو ممنوع الدخول فيه وحصل ليك نفس الحصل ليه وعلى اسوأ كمان لأنك اتحجزتي 24 ساعة تحت المراقبة
قلت ليه الما فاهماه هو ليه رافض يقول انه كان هناك؟
عموماً انا طلبت من المسؤول من الصيانة يقفل الحته دي بأي طريقة كانت بحيث إنه يمنع وصول الناس ليها..
قال لي طيب دة كلام ممتاز إنتِ عملتي الصح ومستر جو انتِ عارفاه دة طبعو، ويمكن هو فعلاً ما مشى هناك والحديقة كانت مرشوشة مبيد وهو إستنشقه وحصل ليه الحصل..
قلت ليه بجد؟
مدة لي كوباية قال لي جد وقعد في الكرسي قصادي..
سكت مسافة وقلت ليه امممممم لين حصل معاها شنو حكت ليك مالها؟
قال لي ضغوطات ابوها على امها على كدة شويه متنشنة بيها قالت وهي اول مرة تبعد منهم عشان كدة متضايقة دة حسب كلامها...
قلت ليه انا حاولت اتكلم معاها وقالت ماف شي مهم وقفلتني
قال لي إنتو البنات ما مفهومات ربنا يهديكم
قلت ليه نحن؟
ضحك قال لي المهم خلصي عشان الزمن إتأخر وبكره عندك دوام بدري صح؟
قلت ليه ينفع اقول حاجه او اسأل سؤال؟
قال لي يلا قولي على طول
ا، خلاص ماف شي..
رجعت الغرفة اول ما ختيت راسي في المخدة بقيت بفكر، لين بتذكرني بسندس، حاسة نفسي في نفس الصراع والدوامة ديك وعلى الأقل سندس ما كانت واضحة بوضوح لين، بس الفكرة او الفرق إني هنا وضعي غير وما عندي إستعداد اكون الشخصية الكانت هناك ديك، ما بقدر اضمن القدامي واقول لأ هو ما بعمل كده، ما عايزة اراهن، انا بعد طارق والعملو والوصلت ليه بسببه ده كلو بقيت اتوقع اي شي من اي زول وممكن التغير يحصل في اي لحظه حتى لو سياف كان بظهر عكس كدة، بتذكر طارق برضو في يوم كانت سندس دي بالنسبه ليه كائن لا يطاق وفي يوم واحد بس اصبحت على واقع إنه عايز يتزوجها..
إتلفت على سياف لقيتو نايم في حافة السرير ومديني ضهرو..
قلت ليه سياف
قال لي ايوا يا شهد
قلت ليه السرير واسع وبشيلنا مالك بتنوم في الحافة كدة إنت بتخاف مني؟
إتلفت علي وصلح رقدته وهو بعاين لي مسافة، مد يدو عايز يختها في خدي زحيت منه ضحك وغمض عيونو..
الصباح فتحت تلفوني لقيت فيه كميه من المكالمات من مشرفة في الدار،
رجعت ليها وانا مقلقة ما من عوايدهم يتصلو علي كل المكالمات دي..
اول ما ردت قلت ليها صباح الخير سيدة ليون
قالت لي صباح النور شهد انا اسفة لأني إتصلت مكالمات كتيرة في وقت ما مناسب ولكن كنت حابه اسألك سيد جو كلمك بإنه طالع مكان او حيغيب ليله كاملة او كدة؟
قلت ليها ابداً ليه في شنو؟
قالت لي مستر جو مختفي من امبارح بالليل وم لاقين ليه اثر
قلت ليها كيف يعني مختفي فتشتو الدار كويس الغرف يمكن يكون مع واحد من المسنين، او السطوح فتشتوه؟
قالت لي مافي، ما موجود
قلت ليها طيب انا جايه
سياف قال لي في شنو مالك؟
قلت ليه مستر جو مختفي من امبارح بالليل
قال لي كيف مختفي؟
قلت ليه ما عارفة بس انا لازم اجهز امشي
على بال ما اللبس لقيتو مستنيني في العربيه، قال لي يلا اركبي
ركبت وإتحركنا حتى ما صحينا لين، وصلنا لقيتهم متجمعين في الحديقة، قلت ليهم صباح الخير ماف خبر لسة؟فتشتو المبنى كويس؟هو ما من عوايدو يطلع براه او ما يكلم زول بإنه طالع
قالو لي ما موجود في اي مكان في المبنى
قلت ليهم طيب راجعتو كاميرات المراقبة اكيد لو طلع حتكون مصوراه
قالو لي امبارح كانت في صيانة لكاميرات المبنى ما كانت شغالة بالليل ولا اليوم حتى..
بقيت اعاين بإتجاه مدخل الأرضي كان عمال الصيانه ي دوب بادين يشتغلو فيه، مشيت عليه قلت ليه ممكن تبعدو من هنا دقايق؟
سياف جا لاحقني قال لي شهد
قلت ليه انا حأنزل تحت اشوفو
قال لي طيب السلم بودي لوين انا حأنزل إنتِ خليك
جا مستر تشارلي قال لي نازله وين انسة شهد؟
قلت ليه حأشوف مستر جو تحت
قال لي الحيجيبو هنا شنو مكان مليان بالفيران والحشرات وكل اسبوع بيترش بكمية من المبيدات الحشرية السامة
قلت ليه عارفة عشان كدة طلبت يتقفل المدخل دة، بس انا لازم ادخل ما بقدر اشرح ليك
قال لي فكري بعقل شنو ممكن يخلي مستر جو يدخل هنا هل هو طفل؟كان بتكلم بنبرة حادة
المكان تحت..
قبل ما يكمل كلامو نزلت وسياف وراي كنت مولعة الفلاش بتاعي
قال لي ختي طرحتك حوالين انفك ي شهد..
على قدر ما إحساسي كان بقول لي في حاجه غلط، وإنه هو هنا على قدر ما كنت بقول ي رب احساسي يكون غلط، ي رب ما يكون هنا..
وصلنا تحت سياف شغل الفلاش بتاعه وبقيت اقول مستر جو، مستر جو انت هنا سامعني؟
مستر جو،
سياف كان في إتجاه وانا في إتجاه المكان شدة ما كبير اشبه بالباركن بتاع العربات حتى تقسيماته شبه تقسيمات الباركن، اكتر من ربع ساعه ونحن منورين فلاشاتنا وانا بنادي، وسياف بدأ يكح من ريحة المبيدات المالية المكان،
قلت ليه سياف اطلع من هنا عشان ما تتعب خليني انا بفتش عليه، او اطلع اخد نفس وارجع
فجاة سياف قال لي شهد، شهد تعالي
جيت عليه بسرعة، مستر جو كان واقع..
بقيت اقول ليه مستر جو،
قلت لسياف مات
سياف بقى يقول لي اهدي وببهبش فيه، قال لي قلبو فيه نبض شالو وتلفونو وقع منو، شلت التلفون وبقيت اقول ليه من هنا الطريق، مستر جو انت سامعني..
وصلنا السلم بعد تعب وهو قدامي وانا وراه بقيت انادي ليهم من تحت وبقول ليهم شغلو لينا إضاءات بتلفوناتكم بسرعة لغاية ما وصلنا فوق مستر تشارلي بقى في حالة صدمة..
اول ما طلعناه برة انا اتصدمت اطرافو ووشو لونها ازرق عديل وجسمو كلو طفح جلدي ..
بقيت ببكي، سياف طلع بيه العربيه على طول وانا وراه، ما كان بتنفس، كنت بقول ليه سياف مات،
سياف بقول لي شهد اهدي بالله عليك ممكن تسكتي، انا لما شلتو نبضو شغال، يعني حي فهمتي
ما كنت قادرة اهبش اي مكان في جسمو لانو قايم طفح جلدي حتى وشو وراسو
بقيت اهبش مكان قلبو وبقول ليه مستر جو الله يخليك قوم..
وصلنا المستشفى، اول ما استلموه دخلوه الطوارئ، سياف قال ليهم كان في مكان مقفول ومرشوش فيه مبيدات حشريه، تقريبا هو من امبارح بالليل في المكان دة، وهو مريض قلب ..
ركبو ليه اوكسجين وقلعو منو القميص، وبقو يتكلمو
جسمو كان كلو بالشكل الكانت عليه اطرافه ووشو،
الدكتور بقى يعمل ليه انعاش بيديه تقريباً
ركبو ليه حاجات وجابو جهاز الصدمات..
الدكتور قال اشحنوه على 200
وختاه في صدر مستر جو
كان بعاين للجهاز بتاع الاشارات،
بقى يحاول مره واتنين وتلاته، محاولاتو كانت بتدل على إنه ماف إستجابه من القلب..
خت الجهاز وبقى يعمل بيدو
بقيت اقول لسياف دة معناه شنو؟
عاين خط الجهاز دة معناه شنو يا سياف معناه مات صح؟
مات كيف يعني؟
سياف قال لي شهد الدكاترة بحاولو زي ما شايفة تعالي نطلع برة
قلت ليه لالا عايزة اشوفو، امبارح بتكلم معي قال لي انا عندي باقي عمر منتظرني، قال لي انا ما بموت هسي..
مستر تشارلي ومرتو ومعاهم المشرفين جو داخلين بسرعة ووقف جنبنا قالو لينا حصل شنو؟
بقيت واقفة وبعاين من غير اي رد فعل، كلنا مع بعض في نفس المكان ونفس تعابير الوش ونحن بنشوف الدكاترة وهم حاولو فجأة وقفو وشفت واحد فصل الجهاز والدكتور كان بتكلم مع واحد ماسك دفتر وبكتب..
سياف قال لي شهد تعالي
بقيت اعاين ليه وانا ساكته
تعالي يا شهد مسكني وقال لي يلا نطلع من هنا
كنت لسة بعاين بإتجاهه وبحاول استوعب والدكتور جاي علينا...
الدكتور اول ما وصل قال لينا عملنا جهدنا ولكن وصلتوه في اخر لحظات ليه للأسف الموت الدماغي كان متحقق سلفاً رغم دة حاولنا، انا اسف ما قدرنا ننقذه، إتوفى..