الفصل الرابع والأربعون
قلت ليه كيف يعني مختفية من 2005؟
طيب علاقتها شنو بالدار وسبب وجودها في المبنى دة شنو؟
سياف قال لي الحمدلله إنك رسلتي لي رسالة وطلبتي مني اسأله بنفسي عشان هو ما كان حيديك المعلومات دي، خدمني وقدم لي المعلومات دي ك محامي وحاول يعرف انا بسأل ليه عن رقم العربية دي بالذات و...الخ يعني حاول يحقق معي، المهم ما تتوتري إنتِ
بقيت اتلفت مر في مخيلتي كل السيناريو بتاع عمار والرسالة اللقيتها من عمو عثمان عن البنات المدخلنهم امريكا بطريقة غير شرعية نفس القصة او نفس القضية..
سياف قال لي هي، شهد، مسك وشي بكفوف يديه وقال لي حنفهم مع بعض الحاصل شنو طيب؟
ما تخافي، مالك وشك إتخطف فجأة كدة وين شهد بتاعة امبارح بالليل؟
عايني الحاجة الحنعملها حنمشي نملك الشرطة المعلومة دي بإعتبارو طرف خيط للقضية دي واكيد بعد الفترة دي كلها حتعمل ضجة وونخليهم يشوفو شغلهم بعد كدة بالإضافة لبقية العربات الكمية الموجودة دي معناها هي كمان مرتبطة بقضايا تانيه الشرطة هي الحتقدر تحل لغز الحاجة دي..
سكتت مساافة وانا بفكر
قال لي أتصل؟
قلت ليه على منو؟
قال لي الشرطة
رفع تلفونو
بسرعة هزيت رأسي بمعنى لأ، قلت ليه لأ، الشرطة لأ
قال لي شهد ما قادر افهم سبب خوفك دة كله شنو، نحن ما متورطين في الموضوع بالعكس نحن حنكون ساعدنا في حل لغز لما نملكهم المعلومة دي..
مش مستر جو هو الملكك المعلومات دي؟يمكن عشان عايزك توصليها للشرطة ودي القضية البسببها هو كان موجود في الدار
نحن في يدنا في فلاش وفي الظرف الوصلك وعنوان خزينة البنك دي حاجات عينية حنسلمها الشرطة وحنوضح ليهم وصلتنا كيف ووصلنا للمكان دة كيف وبس لغاية هنا نحن في السليم
قلت ليه سياف افهمني مستر جو لو عايز إنه يملك المعلومة دي للشرطة كان رسل المعلومات دي ليهم هم ما لي انا فكر فيها، يعني الموضوع اكيد م متوقف على إني بس اعرف هوية اصحاب العربات وامشي ابلغ في الشرطة لأنه هو كان عارفهم وكان بإمكانه يبلغ
قال لي شهد دي الشرطة الأمريكية ما الشرطة بتاعتنا، يعني لا حتلقي منهم تماطل ولا إستهتار وفي ذات لحظة البلاغ حيتم التعامل مع الأمر وحيقبضو المتورطين في لمح البصر، بعدين القضية بتخص بت عضو سابق في الكونغرس الأمريكي عارفة دة معناه شنو؟
قلت ليه عارفة وفاهمة كل البتقول فيه دة بس ممكن تسمعني؟
نحن لو عملنا دة كله صح البتقول عليه حيحصل انا ابداً ما فايته علي المعلومات دي ولا مستر جو فايتة عليه بس فكر معي برة الصندوق خلينا نشوف الموضوع من زاوية تانيه مِستر جو عايز شنو لما ملكني معلومة زي دي؟
حاسه إنه الفكرة ما في إنه نبلغ الشرطة بس
قال لي طيب قولي لي ي شهد ممكن يكون شنو؟
ضغطته على راسي بيدي الإتنين وانا مغمضة عيوني ومنزلة راسي لتحت
قال لي نرجع البيت؟
قلت ليه يا ريت
وصلنا البيت..
ما كان عندي حيل للنقاش في الموضوع مرة تانيه
دخلت وقفلت باب الغرفة علي وخليته هو برة
اخدتة زمن وانا بفكر في كلام سياف هل دة الحل الأسلم؟
من ناحية دة العقل و المنطق بقول كدة
ومن ناحية لما افكر في التعقيد الأنا في فيه وهو م عنده خلفيه عنه بلقى إني في متاهه كل شويه بحس نفسي غرقانة في دوامة كل م غطست كل ما زاد الضلام حوالي وكل م اقول اكمل يمكن في نور في اخر النفق بتقل الضبابية شوية شوية وبلقى نفسي في مرحلة إنعدام الرؤياء دة غير الضغط النفسي، كل ما اخد نفس واخد وضعية إستراحة محارب واعاين قدامي بتسؤ الأوضاع وبحس إنه المستنيني اصعب من الأول..
عاينت يميني اخدتة حبة مسكن وانا باخد فيها حسيت بحركة سياف إتغطيت بسرعة وغمضتة عيوني..
لما جا داخل نده علي شهد؟
خطواته كانت قريبة مني وفجأة إتراجع وسمعت صوت الباب بقفل، فتحت عيوني لقيته جايب لي اكل وكباية عصير..
لما صحيت الصباح كنت مقررة أتكلم معاه في خطوتين قررت اخدهم، ما كان ليه اثر في البيت والعربية كانت قاعدة قلت يمكن طلع يجري وحيرجع، لما إتأخر إتصلت عليه ما رد، رسلت ليه مسج ما رد عليها برضو قلقت عليه شديد رجعت رسلت تاني وتالت وبقت تتكون في راسي افكار غريبة، إتصلت على لين..
اول ما ردت قلت ليها لين صباح الخير
قالت لي صباح النور يا شهد حلمتي بي ولا شنو متصلة علي من الصباح كدة؟
قلت ليها لأ كيفك كويسة؟
قالت لي الحمدلله إنتو كيفكم؟سياف شايفاه امبارح إتصل علي بالليل وم قدرت ارد عليه كنت بعيدة ولما رجعت نمت م قدرت ارجع ليه..
من هنا فهمت إنه اليوم م إتواصل معاها
قلت ليها فعلاً بس يمكن عايز يطمئن عليك
قالت لي بخير، المخيم مدته إسبوع لكن لو زهجت برجع
قلت ليها طيب تمام إن شاء الله
قفلت منها وطلعت برة البيت ووقفت في الشارع ومعي لولو وكلب سياف وانا بتلفت إذا في حاجة غريبة حوالين البيت، رجعت وقفت جمب العربية وبقيت اعاين فيها منتظرة زي الطفلة، بعد نص ساعة إتصل علي..
ما صدقت عيوني اللحظة دي إلا بعد ما سمعت صوته..
قال لي شهد
قلت ليه بنبرة هلع إنت وين؟
قال لي انا جيت الصالة خير إنتِ كويسة؟
بنفس النبرة قلت ليه يعني إنت كويس؟
قال لي انا كويس ي شهد في شنو؟ حاصل عليك شي؟
اخدتة نفس مسافة بعدها قلت ليه لا ماف شي
قال لي طيب مالك؟
قلت ليه ماف شي قلت ليك
قال لي طيب انا طلعت بالمترو لأني مستعجل كنت وخليت ليك العربية امشي بيها الشغل وبعد تخلصي تعالي لي نرجع مع بعض..
لسة كنت ما طلعت من جو التنشنة الكنت فيه
حتى إني ما سمعته قال شنو او المكالمة إنتهت كيف
جهزت نفسي وطلعت..
وانا في الطريق قررت إني أمشي ليه في مكان شغلة، غيرت وجهتي بسرعة وصلت وقفت مسافة بعاين في المكان نزلت وانا متردد..
دخلت الصالة سألت موظفة الإستقبال كوتش سياف موجود؟
قالت لي ايوا موجود في الصالة
كنت متلقية الإجابة بفرح لأني كنت متوقعة إجابة غير دي..
كنت عايزة ارجع رجولي قالت لي امشي الصالة، يمكن من وفاة مستر جو ما جيت المكان دة خالص، مشيت على إتجاه الصالة ودخلت لقيته بساعد في واحد وماسك ليه الأوزان وبتكلم معاه
شوية كدة إنتقل لواحدة وبقى يساعد فيها وهي ماسكة فيه..
كنت عايزة اتحرك قبل ما يشوفني بس وقفت وانا بعاين ليه
فجأة لقيت واحدة بتقول لي منتظرة زول؟
قلت ليها بخلعة ايوا منتظرة زوجي
قالت لي بتجي مع زوجك الصالة دة شي لطيف منكم
فجأة سياف إنتبه لينا وخلى البت الكان ماسكها وجا علينا..
قال لي شهد
سلم على البت المعي
قلت ليها زوجي؟
قلت ليها اووووه تشرفتك بمعرفتك
قال ليها شكراً إتفضلي
بعد م مشت بقيت اتلفت
قال لي صباح الخير
قلت ليه صباح النور
كان بعاين لي بصيغة الإستفهام انا جيت ليه؟
قلت ليه كنت عايزاك في موضوع بس طالما مشغولة م مشكلة بعدين نتكلم فيه
قال لي لأ المساعدين بياخدو مكاني
تعالي
قلت ليه لأ ما تتعطل وتتوقف بسببي
قال لي يلا تعالي
دخلنا مكتبه..
دخلتي للمكتب زكرتني مستر جو والكرسي البقعد فيه حسيت كأني شايفاه للحظة
سياف إنتبه قال لي إنتِ بخير؟
قلت ليه ايوا، المهم عايزة اقول ليك إني موافقة على رأيك بخصوص إنه نبلغ الشرطة وكدة، فكرت وشايفة إنه دة الصح والمفروض يتعمل
سكت مسافة بعدها قلت ليه
تاني شي انا حابة إنه نبدأ إجراءات القرين كارد بعد كدة عشان تطلع لي بسرعة نحن إتزوجنا عندنا اكتر من شهر حالياً ما اعتقد تواجهنا مشكلة ممكن نبدأ فيها؟
انا عايزة ارجع اهلي
قال لي طيب انا ما عندي مشكلة نبدأ على طول
قلت ليه تمام ممكن بداية الإسبوع؟
قال لي ممكن جداً المواعيد البتريحك انا معاك فيها
جاتني مكالمة فجأة، كانت من مشرفة في الدار
رديت عليها قلت لي سيدة شهد نواجهه مشكلة في الدار
قلت ليها في شنو؟
لقد تم نقل السيدة إيفا للمستشفى
شلت شنطتي بسرعة وقلت ليها ليه الحصل شنو؟
قالت لي وجدت صباح اليوم في غرفتها على الأرض
قلت ليها اوك انا جاية
سياف قال لي في شنو ي شهد؟
قلت ليه واحدة من المسنات في الدار نقلوها المستشفى
طلع معي قلت ليه خليك انا حمشي المستشفى و..
مسك مني المفتاح قال لي ما في حالة تسمح ليك تسوقي إنتِ يلا اركبي
ركبت وطلعنا على المستشفى
لما وصلنا لقيت إتنين من المشرفات جمب الغرفة
قلت ليهم الحصل شنو؟
كيف هي حاليا؟ً
قالو لي م عارفين في إنتظار الدكتور يشرح لينا وضعها
قلت ليهم وين الدكتور؟
قالو لي في غرفته من هنا
مشيت بسرعة وسياف وراي والمشرفة
حسيت اليوم كأنه بعيد نفسه والمشهد بالنسبة لي مكرر ورجولي وانا جارية م كانت شايلاني
وقفت لما قالت لي دي غرفة الدكتور
دخلت غرفة الدكتور من غير ما أستأذن او اضرب الباب
دخلت بسرعة هو نفسه إتخلع
قلتة ليه مرحباً دكتور انا شهد مسؤولة الدار، انا هنا لمعرفة كيف هي حالة السيدة إيفا
قال لي مرحباً بك سيدة شهد تفضلي
قلت ليه حصل شنو للسيدة إيفا؟وضعها سيء؟
قال لي إتفضلي بالجلوس لنتحدث قليلا..ً
قلت ليه دكتور طمني..
سياف قال لي شهد اقعدي
قعدت..
فتح فايل وقال لي تشير الفحوصات أن السيدة إيفا تتعاطى دواء مخدر يؤثر على الأعصاب ويهدئ نشاط المخ..
حالتها الأن سببها جرعة زائدة من هذا الدواء يبدو انها افرطت في تناوله ليلة البارحة وهي اشبه بحالة الإنتحار لذا تسبب في دخولها في حالة غيبوبة الان
قلت ليه هي الان في حالة غيبوبة؟
قال لي يؤسفني ان اقول ذلك
حالتها خطرة؟
قال لي لا يمكننا قول شيء الان، ولا يمكننا فعل شيء سوى الإنتظار
ختيت يدي في وشي
قال لي هل كانت تعاني من بعض الإضطرابات نفسية؟هل لديها نوبات غضب او غيرها من النوبات من حين لأخر؟
قلت ليه لأ، ما أعتقد
قال لي متأكدة؟
قلت ليه بإمكاننا مراجعة المشرف النفسي الخاص بالدار وطلب تقارير عن وضعها
قال لي حسناً إذاً
بعد ما طلعنا قلت ليه سياف وصلني الدار..
في الطريق كنت باكل في ضفوري وبهز في رجولي وحسيت إنه مسافة الدار دي بعيدة عديل
قال لي ممكن تهدي؟
إنتِ م في يدك شي تعمليه ي شهد ولا دة شي إنتِ بتتحملي مسؤوليتو
قلت ليهو بصرخة كيف اهدى وكيف دة شي انا ما بتحمل مسؤوليتو؟
كل الموجودين في الدار ديل حالياً انا مسؤولة منهم
عاين لي وهو ساكت
وصلنا الدار نزلت بسرعة ودخلت، مشيت مكتب شؤون الأفراد قلت ليها السيدة إيفا كم رقم غرفتها؟
قالت لي دقايق فتحت الكمبيوتر وقالت لي الطابق ال 3 غرفة رقم 56
طلعت بسرعة ودة كله سياف وراي، وم طلعت المصعد جريت بالسلالم لغاية م وصلت دخلت الغرفة وبقيت بقلب فيها
فتحت الدولاب، الخزانات، دخلت الحمام، تحت السرير،
ما كان في شي ابداً لا علبة دواء ولا غيره..
قلبت الغرفة دي فوق لتحت ماف شي
سياف مسكني قال لي شهد
قلت ليه حأجن انا حأجن، ماف شي هنا، ماف لا علبة دواء ولا غيره يبقى بتاخدهم وين ومتين وكيف؟
حاسة إنه حيموتو كلهم وانا م حأقدر اعمل شي
قال لي تعالي، ضماني عليه وهو بقول لي أهدي، وإنتِ جايطة كدة ما حتقدري تفكري ولا حتعرفي تتصرفي..
الجوطة عمرها ما حتحل شي،
لمدة 3 دقايق كان بتكلم معي وهو حاضني بعدها رفع لي راسي و قال لي الجواب على اسئلتك دي موجود، م برة في الدار هنا، راجعي كاميرات المراقبة، شوفي السيدة إيفا دي لغاية امبارح كانت وين يمكن بتطلع تاخدهم برة ما ضروري تكون بتاخدهم هنا
قلت ليه ما مسموح ل مُسن يطلع براه بدون مشرف يرافقة، بس كاميرات المراقبة ممكن توضح لينا الحاصل شنو
طلعت بسرعة نزلت مشيت غرفة المراقبة
لقيته المسؤول موجود
قلت ليه صباح الخير ادريان
قال لي سيدة شهد صباح النور
قلت ليه للمرة التانيه محتاجة مساعدتك في مراجعة الكاميرات
قال لي انا هنا لخدمتك سيدتي
قلت ليه الطابق التالت للمبنى السكني إذا ممكن
قال لي كيف هو حال السيدة إيفا الان؟
قلت ليه لا شيء يذكر هي بغيبوبة الان
قال لي يا إلهي، ماذا جرى لها؟
قلت ليه: ليس هناك شيء يذكر بعد
قال لي هل لديك تاريخ وساعات معينة بشأن مراجعة التسجيلات؟
قلت ليه لأ
راجعنا الكاميرات،
كان نشاطها عادي وم كتير بتطلع من الغرفة
قلت ليه ممكن تراجع لي من امبارح بالليل لغاية اليوم الصباح؟
قال لي اوك
راجعنا لغاية الساعة 12 م كان في حركة
وقفت بإستياء وانا بعاين لسياف
قال لي نطلع؟
قلت ليه يبدو إنه ماف شي
فجأة ادريان قال لي يبدو انها كانت لديها زائرة بعد منتصف الليل
إتلفت عليه وانا بعاين للشاشة، بقينا التلاتة مركزين، قلت ليه ممكن تقربها؟
قال لي حسنا، ً قربها وسياف قال لي ملامحها ما واضحة عشان الضلام يمكن
قلت ليه قرب اكتر وانا مركزة لغاية ما ظهرت السيدة كاثرين...
قلت ليه شكراً ادريان وطلعت من الغرفة
سياف جا وراي قال لي حصل شنو؟
بقيت ماشة وجاية
قال لي شهد؟
قلت ليه عايزة امشي المستشفى
قال لي طيب بس فهميني مالك؟
وليه لما شوفتي المرة دي في التسجيل إتوترتي كدة؟
قلت ليه حأشرح ليك بس وديني المستشفى
قال لي طيب يلا
لما وصلنا المستشفى الدكتور كان في عملية
إنتظرنا لغاية م طلع
قال لي ماف جديد من حالة السيدة إيفا إلى الان
قلت ليه عارفة يا دكتور انا هنا ما عشان السيدة إيفا انا جاية اطلب منك طلب..
قال لي إتفضلي
قلت ليه انا محتاجة منك تاخد عينات من كل المسنين الموجودين في الدار وتعمل ليهم تحليل..
هو بقى يعاين لي وسياف بعاين لي
قال لي هل لديك شك في امر ما؟
قلت ليه وي ريت تخلي الموضوع دة سر بينا، يعني حنعمل التحاليل بإعتبار إنه كشف دوري ليس إلا
نحن عندنا لجنة اطباء مسؤولة عن الكشف الدوري للمسنين ولكن انا محتاجة إنه الموضوع دة يتم بعيد عن عمل اللجنة دي..
قال لي حسناً متى يمكننا ذلك؟
قلت ليه بكره ممكن؟
قال لي حسناً
بعد ما طلعنا، قعدت برة في كنبة من الكنب الفي حديقة المستشفى وانا حاسة نفسي منهكة
سياف قعد جمبي وقال لي حتفهميني ولا حتتجاوزيني برضو؟
قلت ليه انا كمان محتاجة افهم، كل مرة بكتشف إنه في حاجة غلط في الدار دة بس انا محتاجة افهم هي شنو؟
الظهرت في الفيديو دي السيدة كاثرين، واحدة من المسنين الموجودين في الدار بس هي..
سكتت مسافة
قال لي بس هي؟
قلت ليه شكوكي كلها حولها هي، حاسة إنها موجودة في الدار لسبب ما، دايماً لما تحصل مصيبة في الدار هي بتكون جزء من المكان الحصل فيه،
المكان الإتوفى فيه مستر جو هي قبل كدة شفتها دخلت فيه وطلعت عادي،
وحالياً السيدة إيفا إتلقت واقعة في غرفتها بعد ما هي جاتها بالليل
انا م عارفة بس موت السيد جو وهسي السيدة إيفا الدكتور بقول محاوله إنتحارية بس كأنه دي حاجه اشبه بالقتل المتسلسل، انا حاسة بالخطر على كل الموجودين في الدار حالياً م عارفة كيف ممكن احمي الناس دي...
قال لي دي اسوأ الفروض ي شهد ودي إفتراضات بس..مسك يدي وقال لي في كل الأحوال انا معاك اكيد ..
قلت ليه ممكن تأجل موضوع إنه نبلغ الشرطة حالياً بخصوص موضوع العربية العرفناه؟
قال لي ممكن بس إذا صحت شكوكك كدة م زال الخطر لكن، الفكرة شنو من إنه ما تبلغي الشرطة؟
قلت ليه انا جايطة شوية، بس
قال لي طيب نمسكها واحدة واحدة اول خطوة حتعمليها حتزيدي نسبة التأمين في الدار، وبدل الإعتماد على كاميرات المراقبة حيكون في مسؤولين أمن 24 ساعة حوالين المسنين في كل طابق بس ختي في بالك إنه حتطلبي مسؤولين امن من شركة مختلفة عن شركة مسؤولين الأمن العندكم..
حتزيدي عدد المشرفين المسؤولين عن مراجعة المطبخ، وتشددي المراقبة في الحتة دي وممكن تغيري الطاقم حق المطبخ كله إذا إستدعى الأمر
الكشف الدوري بدل ما يكون كل شهر خليه كل بداية إسبوع على الأقل الفترة دي وغيري طاقم الأطباء المتعاقدين معاهم بطاقم جديد وكل فترة غيري الطاقم الحاجة دي اكتر ضمان
لو شددتي المراقبة الفترة دي وضغطتي هي حتحس بشي غلط وحترخي وتقلل نشاطها وحتكون حذرة وإنتِ حتكسبي وقت في العايزة تعمليه وتعرفيه بخصوصها
عاينت ليه وانا يمكن عيوني بتلمع، في الوقت الأنا حاسة فيه بخمول وإرهاق وعقلي م قادر يحدد مفروض يعمل شنو اداني افكار عملية اقوم بيها..
قلت ليه شكراً يا سياف، تجي معي؟
قال لي حأتجاوز شكراً دي وقولي لي وين؟
قلت ليه نبدأ نعمل القولت عليه دة
قال لي يلا طيب
رجعنا الدار للمرة التالتة والمرة دي دخلت مكتبي وفتحت اللابتوب بتاعي وهو قاعد جمبي..
قال لي انا حأعمل بحث عن افضل الشركات الخدمية الممكن توفر لينا الحاجات التلاتة دي وحنقدم ليهت بحيث إنهم حيجو يعرضو علينا خدماتهم وإمتيازاتهم وبعدها ممكن تختاري المناسب..
تقريباً نحن فضلنا يوم كامل بنتواصل مع الشركات، حتى إننا ما اكلنا شي لغاية م وقت الدوام إنتهى
تاني يوم جينا من الصباح لأنو كان الدكتور مفروض يجي ومعاه مجموعة ياخدو العينات وكانت عندنا مواعيد مع كذا شركة مفروض نقابلهم نسبة لإستعجالنا في الموضوع وقبلها كنت لازم اعمل إجتماع مع مدير المالية وال HR عشان الميزانية
وبالفعل دة الحصل..
عملت إجتماع وطلعت لقيت سياف مستنيني
قال لي فاضل نص ساعة وشركة... حيكونو هنا
في اليوم دة تقريباً إجتمعنا مع 4 شركات..
بعد خلصنا إجتماعاتنا معاهم وبدينا نفاضل بينهم على حسب العروض القدموها سياف قال لي في رأي إنه تختاري الشركة الناشئة دي، لسبب ما إنها داخلة سوق العمل جديد وحيكون في إجتهاد منهم في إنه يكسبو ثقة العملاء في الخدمات الحيقدموها وأهل للثقة اكتر من البقية
قلت ليه انا كمان حسيت إنهم مناسبين، إذاً حأبلغهم بموافقتنا عليهم في مجموعة التأمين والإشراف بتاع المطبخ
حيكون باقي علينا نختار لجنة الأطباء..
قال لي إستني الدكتور يطلع نتائج الفحص إذا طلعت فيها شي ممكن بعدها تستشيريه في حتة إنه إسبوعياً يجي يعمل معاينه لكل المسنين وياخد عينات وهكذا وهل هو حيوافق ولا لأ..
قلت ليه طيب
نهاية اليوم رجعنا منهكين بعد ما بلغنا الشركة الإخترناها بقرارنا
سياف قال لي انا جعان
رغم إني تعبانه بس حاساه كان مرهق شديد وهو ما ندر يقول انا جعان او يطلب مني خدة في العادة بعمل كل شي عايزه بنفسه
قلت ليه طيب حادخل المطبخ اعمل ليك حاجة تاكلها
قال لي طيب حأستناك هنا
دخلت المطبخ عملت الأكل ناديت عليه ما رد، جيت طالعة لقيته نايم في مكانه
ناديت عليه مرتين عشان يصحى ما صحى، غطيته ومشيت نمت في غرفتي
تاني يوم في الدار كنت قاعدة منتظرة مشرف ومشرفة مجموعة التأمين الجداد..
شوية كدة جاتني السكرتيرة قالت لي وصلو، قلت ليها دخليهم
دخلت علي واحدة سميييينة لونها اسمر ومعاها راجل لابسين يونيفورم رسمي..
قالت لي مرحباً سيدة شهد انا مادلين وهذا هو السيد كيفن مشرفين مجموعة التأمين الجديدة من شركة "سيفتي"
قلت ليهم تشرفت بلقاءكم تفضلو بالجلوس..
قلت ليهم انا طلبت اقابلكم قبل مباشرتكم للعمل عشان عندي بعض النقاط حابة اوضحها ليكم، انا م طلبت تعين مجموعة تأمين جديدة إلا بعد ما حسيت بحوجة شديدة ليكم، وإخترت شركتكم من دون الشركات لأني حسيت إنه عندكم المقدرة في تقديم الأفضل، قبل فترة قصيرة حصلت حادثة وفاة لواحد المسنين هنا بالدار لغاية اللحظة بنعاني من فقده
انا م عارفة المجموعة مكونة من كم فرد ولكن كل العايزاه منكم ك مشرفين التشديد والوقف على المهام الموكلة عليكم ولو في اي شي او لاحظتو اي سلوك غريب من اي شخص في الدار عايزاكم تكلموني بيه
قالت لي لا تقلقي سيدة شهد، سنعمل بجد على تأمين وسنكون عند حسن الظن
قلت ليهم اتمنى ذلك
بعد ما طلعو إتصل علي الدكتور..
قلت ليه مرحبا دكتور فيليب
قال لي مرحباً سيدة شهد صباح الخير
قلت ليه صباح النور، نتائج التحاليل طلعت؟
قال لي ايوا ولكن هل بإستطاعتك مقابلتي الان؟
قلت ليه حسناً، قادمة إليك
وانا طالعة لقيت مادلين واقفة مع مجموعة كلهم لابسين يونيفورم مع بعض كانت مختلطة وبتتكلم معاهم وبتأشر ليهم على إتجاهات مختلفة
عاينت بإتجاه غرفة السيدة كاثرين لقيتها واقفة في البلكونة وبتعاين..
يمكن هي دايماً في وضع إنها سابقاني بخطوة بس المرة دي المرة الأولى الأنا حسيت نفسي إني بديت اواجهها بصورة مباشرة..
مشيت على مادلين وقلت ليها اتمنى لكم عملاً موفقاً
قالت لي وانتِ ايضاً سيدة شهد
طلعت وانا في الطريق إتصل علي سياف
قال لي ها اليوم عدى كيف كل شي تمام؟
قلت ليه دكتور فيليب إتصل علي وطلب مقابلتي الان انا في طريقي للمستشفى...
قال لي طيب اجي عليك؟
قلت ليه لأ خليك انا بشوف حيحصل معي شنو واكلمك
قال لي طيب طمنيني
وصلت المستشفى، مريت على غرفة السيدة اماندا كانت مرافقاها المشرفة طمنتني عليها وقالت لي الدكتور قال وضعها مستقر نوعاً ما..
دخلت على غرفة الدكتور فيليب لقيته مستنيني
قال لي لقد كنت في إنتظارك، سأتكلم بسرعة أعذريني لأنني في عجله من امري،
يؤسفني قول ان شكوكك صحيحة فيما يتعلق بالتحاليل، نتائح الفحوصات تُظهر ان جميع المسنين بالدار توجد مواد مخدرة في فحوصات الدم الخاصة بهم مطابقة للمادة التي وجدت بدم السيدة إيفا
في اللحظة دي راسي جاط،
قلت ليه كيف بيحصل كدة م فاهمة؟
قال لي قد يكون بتم تقديمها ليهم في الوجبات او عن طريق مياه الشُرب..
طلع لي فايل وقدمه لي، قال لي دي كل التقارير المطابقة، يحتاج الأمر تدخل فوري لإنهاء هذا الأمر، إنه اشبه بالموت البطيء لهؤلاء المسنين..
قلت ليه أعمل على هذا الأمر الان ولكنني احتاج لمساعدتك..
بعد ما طلعت من الدكتور لقيت مكالمات من سياف، رجعت ليه قال لي شهد اها بشريني إن شاء الله كل شي تمام؟
قلت ليه ابدا، طلعتً شكوكي في محلها
بختو مواد مخدرة للمسنين، كل تحاليل الدم بتاعتهم بتأكد وجود موالد مخدرة في جسمهم
قال لي هسي إنتِ وين؟
قلت ليه طلعت من المستشفى ماشة على الدار
قال لي جاي عليك نتلاقى هناك ونشوف حنعمل شنو
قلت ليه طيب
وصلت وبالفعل إتلاقينا، وقعدنا في حديقة الدار
قلت ليه انا م عارفة اعمل شنو خايفة اغير طاقم المطبخ كله واكون سبب في إني قطعت رزق ناس بدون ذنب
قال لي بسيطة ي شهد اكيد م حتظلمي الناس دي كلها إنت لكن كمان ماف تهاون في الموضوع دة ولا لعب دي ارواح ناس إنتِ مسؤولة منها حنركن العاطفة على جنب ونكون ناس عمليين..
وعشان نقطع الشك بالبيقين اليوم حننتظر الأكل يجهز لحظة ما يبدأ توزيعه حناخد منه صحن وحنوديه ك عينه تتحلل وحنشيل موية برضو ونخليهم يفحصوها، الأكيد انه ما بتم حقنهم بالمواد دي، ف الطريقة الوحيدة عشان تصلهم يا في الأكل يا الشراب،
بس السؤال الأهم والمفروض تتوقفي عليه ي شهد هو ليه؟
ومنو؟
الناس دي بتمثل شنو لمن بيتعمل فيهم كدة؟
إنتِ نفسك مواجهه منو حاليا؟ً
قلت ليه ممكن يكونو مستر تشارلي وزوجته؟
قال لي إذا قلنا ممكن هم م اغبياء لدرجة إنه يدوك منصب زي دة لأنه حتكون متاحة في يدك حاجات وصلاحيات كتيرة بناء على المنصب دة بس ممكن يكون إحتمال ضعيف جداً والحاجة دي حتتأكدي منها من رد فعلهم لما يعرفو بالتغيرات العملتيها حالياً والقرارات الماخداها دي..
لكن قد تكون في ايادي خفية بتدير كل دة
بالإضافة لإنه أهم خطوة مفروض تراجعي تقارير الوفيات السابقة للمسنين في الدار
كنت سرحانة..
قال لي إنتِ معي؟
عاينت للساعة وقلت ليه بعد نص ساعة حيبدأ توزيع الغداء في الصالة الكبيرة
قال لي تحبي امشي معاك؟
قلت ليه لأ م يحتاج
إنتظرت مواعيد الغداء جات، ومشيت صالة الوجبات،
البوفيه اصلاً بكون مفتوح اخدته صحن وكباية موية وطلعت..
لما جيت راجعة لقيت مادلين قاعدة مع سياف وكان بضحك معاها
لما شافتني وقفت على حيلها وفي يدها علبة قالت لي سيدة شهد..
سياف قال ليها بإمكانك الجلوس ومواصلة تناول طعامك
قالت ليه لا تحاول الإلحاح علي بالجلوس إلى جانبك لأنني سأجلس بالتأكيد وبكل سرور !!
قلت ليه بتعرفو بعض؟
قالت لي تعرفنا للتو ولكن يبدو اننا سنلتقي كثيراً وسنصبح زملاء في العمل أليس كذلك ايها السيد؟
قلت ليها هذا زوجي وهو لا يعمل هنا انسة مادلين!!!
عدلت وقفتها ولبسها وقالت لي بخلعة ماذا؟هل انتما زوجان؟
سياف هزة ليها راسو
قالت ليه حسناً فرصة سعيدة أيها السيد، انا فقط جلست لتناول وجبة الغداء تفضلي سيدة شهد إنه من صنع يدي والدي، كنت أخبر السيد انني انا انتمي لأسرة جميع من بها يجيدون الطبخ وجميعهم يمتلكون مطاعم.. والدي يجيد الطبخ بشكل جيد لأنه يعمل طباخاً، كنا نمتلك مطعماً ووالدتي ايضا...الخً
لما شافتنا ساكتين وبنعاين ليها قالت لينا ثرثرت كثيراً اليس كذلك؟
حسناسأذهبً الان
مشت وكنت بعاين ليها وسياف كان بضحك
قلت ليه بتضحك مالك؟
قال لي لأ ماف شي
قلت ليه المهم غلفت الأكل ياهو شايلاه معي ودي الموية جبتها في البوتل، مشينا؟
قال لي يلا
مشينا معمل خاص وطلبنا يفحصو لينا العينات دي..
اخدوها مننا وقالو لينا النتايج حتاخد ساعة من الان، إنتظرنا الساعة بالفعل طلعت...
سياف هو الإستلمها وفتحها وانا بعاين ليه..
قال لي في الأكل بيتعمل ليهم
قلت ليه كيف؟
مد لي الورقة
قال لي ما حتعرفي منو المظلوم ومنو لأ، لكن واجبك في الوقت الحالي بيملي عليك إنه تشيلي كل الطاقم المسؤول عن المطبخ وتستبدليه بطاقم جديد، ماف اي تهاون او إستثناءات في الموضوع دة..
إتذكرت مادلين وهي بتقول انا انتمي لأسرة جميع من بها يجيدون الطبخ وجميعهم يمتلكون مطاعم..
قلت ليه طيب خلينا نمشي الدار هسي، اول ما وصلنا طلبت مادلين في مكتبي..
جات متوترة قالت لي سيدة شهد اخبروني أنكِ طلبتني، هل إرتكبت خطأ ما؟ هل نحن مطرودون؟
قلت ليها اجلسي مادلين
قالت لي نحن..
قاطعتها وقلت ليها ممكن تسمعيني؟
قالت لي حسناً
قلت ليها بالصدفة قبيل كنتِ بتقولي إنه اهلك طباخين وعندهم مطاعم؟
قالت لي اجل، عائلتي محبة للأكل للغاية فهي تكسب منه المال واكسبتنا منه الوزن الزائد كما ترين
قلت ليها الان لديكم من يعمل بمهنة الطبخ؟
قالت لي : اجل والدي، وامي، وجدتي ايضاً واخي الأوسط
وأختي
قلت ليها نحن راغبين في تغير طاقم المطبخ الخاص بنا لأسباب صحية، إذا طلبنا منهم العمل معنا هل..
قبل ما اتم كلامي قالت لي بحماس: بالطبع يستطيعون، دعيني اخبرهم الان وأعود إليك
بعد ما طلعت سياف قال لي في سبب معين لإختيارهم
؟
قلت ليه يمكن لأنه حيكون في نوع من التعاون الشديد بينهم، اسرة واحدة في المطبخ بساعدو في بعض، ومادلين حتكون مشرفة عليهم
لو في شي زي الحاصل هسي دة ما حنشك في زول معين الأسرة كلها حتكون مسؤولة
قال لي تفكير عملي من ناحية بس إذا هم عندهم مطعم تتوقعي يخلوه عشان يشتغلو هنا؟
قلت ليه ححاول اقدم ليهم عرض مغري مادياً بحيث إنه يفكرو فيه قبل ما يرفضو بس ي ريت يوافقو
مادلين جات داخلة وكانت مترددة..
قلت ليها إتفضلي مادلين
قالت لي أعتذر سيدة شهد على ما سأقولة ولكن ابي يقول أنكِ إن كنتِ ترغبين به ستأتين إليه، هو لا يذهب لأحد من اجل العمل..
قلت ليها اهااا
قالت لي والدي نرجسي قليلاً، ليس قليلاً إلى حد جنون العظمة لذا هو هكذا..
ضحكت وقلت ليها طيب ماف مشكلة ممكن تاخدي لي مواعيد معاه عشان اقابله؟
قالت لي اليوم؟
قلت ليها إذا ممكن لأنه نحن في عجله من امرنا
قالت لي حسناً،
طلعت تلفونها وإتصلت عليه مكالمة..
بعد خلصت مكالمتها قالت لي والدي يدعوكم لمقابلته الليله عند الساعة الثامنة وتناول وجبة العشاء
عاينت لسياف وعاينت ليها..
قالت لي سأقوم بتوضيح أنكم مسلمين لا تقلقي بشأن هذا الأمر ..
قلت ليها حسناً شكراً لك مادلين
قالت لي على الرحب والسعة
على الساعة 7 كدة رجعنا البيت وجهزنا وإتحركنا وصلنا على المواعيد..
قبل م ننزل قلت لسياف دقيقة صلحت ليه لياقة القميص بتاعة وقلت ليه ع فكرة لما تلبس وتتشيك كدة شكلك بكون مختلف تماماً عن سياف بتاع الصالة اللبسو كله ترينجات
ضحك وقال لي انا نفسي بكون م مرتاح باللبس دة وبحس بالتقييد
كنا شايلين دونات، ضربنا الجرس فتح لينا راجل ممكن اقول ستيني ..
إستقبلنا ورحب بينا، سياف قال ليه انا سياف وهذه زوجتي شهد..
قال لينا تشرفت برؤيتكم انا السيد مايكل ولكن يمكنكم مناداتي العم مايك تفضلو بالدخول..
اول ما دخلنا طلعت لينا واحدة قال لينا هذه زوجتي سام،
عرفنا ببقية الأسرة كلهم كانو بتشابهو نفس السُمرة و الحجم والملامح..
قال لينا عرفت من مادلين إنكم مسلمين عشان كدة ما تخافو، عملنا حسابنا تماماً حتى إنه زوجتي نزلت اطقم طهي جديدة ما سبق لينا إستخدامها قبل كدة عشان ما يجيكم اي شعور سيء من طبيخنا..
كان العشاء جاهز على طول طلبو مننا نقعد على السفرة..
اول ما بدينا ناكل قلت ليه انا عرفت بالصدفة من مادلين إنكم بتطبخو بس ما كنت عارفة إنكم بارعين في الطبخ كدة..
مرتو قالت لي شكراً على الإطراء عزيزتي إنتِ لطيفة للغاية
ابو مادلين قال لي امضينا 40 عاماً في هذه المهنة، جمعنا حب الطبخ، تقدمت لها بطهي وجبتها المفضلة والوقوف على عتبة منزلهم وانا حامل للطبخة وانا اقول : سأحبك بقدر محبتك بهذه فقط تزوجي بي، تزوجنا وتشاركنا المطبخ واصبحنا من موزعين وجبات سريعة من المنزل لأصحاب مطعم خاص بنا وانجبنا الأبناء واصبح لدينا أحفاد وها نحن ذا معاً إلى الان ما زلنا معاً نتقاسم المطبخ ويتجدد شغفي بها عند رؤيتها كأنني اراها للمرة الأولى..
سياف قال ليه : قال ليه 40 عاما؟ً هذه دلاله على أنك رجل جيد
قلت ليه وأيضاً دلاله على إنها إمراة تستحق ان يكون رجل جيد لأجلها
ضحكو مع بعض سياف قال ليه حقوق المرأة تتحدث
شوية شوية بقينا نتكلم عن موضوع عرضنا شغل..
قلت ليه لقد ترأست منصب نائب المدير منذ فترة قليله والأن تقع على عاتقي جميع مسؤوليات الدار نسبة للوضع الصحي للمدير، تواجهني بعض المشكلات فيما يخص المطبخ والطعام الذي يقدم للمسنين، لا يمكنني الشرح اكثر ولكن علمت حديثاً ان هناك من يعبث بطعام المسنين ويتسبب في تدهور حالتهم الصحية، ارغب بأشخاص اهل للثقة اكلفهم بتحمل مهام المطبخ وما به من مهام، ويكونو اشد حرصاً على تقديم الطعام للمسنين مباشرة..
قال لي فقدنا المطعم الخاص بنا حديثاً لأسباب خاصه، قُدمت لنا الكثير من عروض العمل رفضنا جميع لأن جميعهم اخبرونا بأنهم يستطيعون توظيف اشخاص اكثر كفاءة منا ولكنهم سيوظفوننا بدافع الشفقة او لأن احد ما قام بالتوصية علينا، لذلك جوابي لهم كان : لم أنتم هنا؟حسناً إذهبو وقومو بإختيار هؤلاء الأشخاص..
طوال حياتي لم اعمل ك موظف لدي شخص ما ولكن لدي قناعة ان العمل مع شخص ما يعني ان هناك مصالح مشتركة بين الإثنين أنا اقدم لك خدمة وانت تعطيني المال مقابل الخدمة، لا إكرامية منك او شفقة...
قلت ليه ايها العم مايك انا لست من هؤلاء الذين قابلتهم، لست صاحبة عمل خاص، انا ايضاً موظفة بشكل مؤقت في هذا المكان و..الخ
خلصت كلامي وركزت في توضيح الجانب المالي الأنا بقدر اقدمه مقابل الخدمه وسياف بعدها إتكلم وخلص..
سام زوجته قالت ليه هيا عزيزي دعنا نجرب الأمر يبدوان اشخاص جيدين، لطالما إهتممت بتقديم الطعام لفاقدي السند والان الرب جلب لنا فرصة تقديم الطعام لهؤلاء المسنين لم لا؟
عاين لولده..
بته قالت ليه احب رؤيتك تفعل ما تُحب، هيا ابي
حفيدته قالت ليه هيا جدي جميعاً نريد عودتك للعمل
قال لينا متى يمكننا البدء في العمل؟ولكن قبل كل شيء احب توضيح بعض النقاط الهامة، انا احب الذهاب إلى التسوق و..
ضحكت وقاطعته وقلت ليه كنت سأطلب منك فعل هذا الشيء بالتحديد ولكنني ترددت من ان تُسيء فهمي،
وضح لي بقية النقاط المهمة بالنسبة ليه ووضحت ليه متطلباتي المهمة بالنسبة لي وإتفقنا على إنه بكره حأحدد ليهم متين ممكن يبدو وبعدها إستئذناهم وطلعنا..
العشاء وقعدته كانت مريحة نوعاً ما، وسياف كان حضوره حلو وهو شاطر في حتة إنه يقنع ليه زول بحاجة، وم بس المرة دي بعدد الأيام الفاتت دي هو كان دايماً موجود، رغم إصراري إنه ما عايزة ادخلو في الوضع دة تلقائياً لقيته جزء منه بس يكفي جداً إنه وجوده مطمئن لأنه من فترة طويلة وانا م حسيت الإحساس دة، يمكن م اتوفق اشرحه بس اول مرة أحس إني م براي..
اول ما رجعنا البيت رسلت لل HR وضحت ليها قرار تغير طاقم المطبخ بطاقم جديد، وإنه بكره حيكون اخر يوم وبعده حيكون متواجد في المطبخ الطاقم الجديد، طلبت منها تجتمع بيهم بكره وتوريهم بالقرار دة وتصرف ليهم كامل مستحقاتهم، ووضحت ليها إنه القرار نهائي ما قابل للنقاش، وإني حأجتمع بباقي اعضاء مجلس الإدارة بكره الصباح عشان في بعض القرارات الأنا حابة اوضحها ليهم..
في إجتماع صباح اليوم التاني لقيت ال HR بتقول لي:
سيدة شهد لقد تناقشنا حيال بعض الأمور، نحن نعتقد انه توجد بعض القرارات التي ينبغي علينا مراجعتها، ويتم تطبيقها بموافقة وحضور السيد تشارلي، نعتقد أنك متسرعة قليلاً حيال تغير طاقم العمل، وايضاً هناك بعض السلوكيات غير المستحبة من افراد الأمن الجدد مثل التفتيش الدقيق لكل ما هو داخل إلى الدار، لقد تسببت هذه التصرفات في مضايقة بعد العاملين..
قلت ليها سيدة كريستين دعيني اوضح لك بعض النقاط
منصبي هنا نائب رئيس مجلس الإدارة، تم تكليفي من قبل السيد تشارلي بالقيام بجميع مهامة حال غيابة بما تقتضيه المصلحة
قمت بتغير طاقم المطبخ بما تقتضيه المصلحة
قمت بزيادة عدد افراد الأمن والتشدد في الحراسة وتأمين الدار بما تقتضيه المصلحة
الأشياء التي تقتضيها المصلحة العامة ليست بحاجة للمناقشة او موافقة السيد تشارلي
واحد قال لي حسناً نحن معك ولكن لم؟ هل هناك شيء نحن لا نعرفه؟
قلت ليه بعد حادثه وفاة السيد جو وحاله السيدة إيفا ينبغي علينا ان نكون اكثر حرصاً على جميع المسنين المتواجدين هنا
كريستين قالت لي هل سيتم تغير مجموعة الأطباء الخاصة بالدار ايضاً؟
سكتت مساافة وقلت ليها نعم، ولكن سنتناقش في هذا الأمر فيما بعد ولكن التغير يشمل جميع العاملين، هل اخبرتي المسؤولين من المطبخ عن القرار؟
قالت لي نعم ولكن كيف يمكننا تعين موظفين جدد خلال يوم واحد فقط؟
قلت ليها انا سأتدبر هذا الأمر لا عليك
اخر شيء هذه الفترة سنعتمد على مياه الشُرب المعبأة بدلاً عن مياه الخزانات الخاصة بنا، لذا تواصلت مع إحدى الشركات المختصة بتوفير المياه وسأرسل لك الميزانية
قالت لي ولكن هذه الخطوة تحتاج لدراسة لأن الميزانية قد تكون ..
قلت ليها ليس لدينا الوقت الكافي لدراسة الأمر الان، سنتدبر امر دراسة الموضوع وإيجاد الحلول الأخرى فيما بعد إلى ذلك الحين سيكون إعتمادنا على المياه المعبأة، لقد تم الأمر وموظفو الشركة في طريقهم الأن لجلب المياه إلينا
خلصت من الإجتماع و نزلت الجزء السكني، لقيت مادلين قالت لي كل شيء يسير على ما يرام سيدة شهد،
قلت ليها تعالي معي..
طلعت معي ولفينا على كل الطوابق كل طابق كان فيه 3 حراس..
مشينا على المطبخ قلت ليها من بكرة عايزة 2 من الأمن يكونو موجودين جمب المطبخ، وممنوع منعاً باتاً يدخل المطبخ غريب غير العاملين تمام؟
طلعت وقعدتة في الحديقة إتواصلت مع العم مايك وكلمته إنه كل شي جاهز وبكره المفروض ينزلو الشغل،
إتصلت على سياف ما رد، رسلت ليه رسالة وقلت ليه الحمدلله، نوعاً ما كل شي ماشي تمام حكيت ليه تفاصيل الحصل معي من لحظة دخولي الدار وحصل شنو في الإجتماع وختمت كلامي ب قلت اكلمك ورسلت ليه صورة وانا ماسكة كباية شاي في مكان قاعدة...
إتصل علي المساء قال لي خلصتي؟
قلت ليه ايوا
قال لي يلا في الطريق جاي عليك ما تطلعي
إستنيته لغاية ما إتصل علي قال لي يلا وصلت
طلعت عليه لقيته جاي بدون عربية، قال لي العربيه في المغسلة، بس قلت نتمشى ونرجع البيت مع بعض..
قلت ليه وانا برضو عربيتي مع واحد من العاملين عشان هي تابعة للدار ف لما تكون في مشاوير بياخدوها وانا اصلاً اغلب الوقت بميل لإنه اخليها معاهم
قال لي يلا طيب بما إننا طالعين بدري خليني اخدك مشوار..
قلت ليه وين؟
قال لي تعالي بس
اخدنا مترو
بعد ربع ساعة نزلنا ومشينا مشوار شويه كدة وقفنا قدام مبنى كبير مكتوب عليه "كاسترو ثياتر"..
قلت ليه دة شنو؟
قال لي نحتفل إحتفال صغير بإنجازاتك خلال الإسبوع دة؟
قلت ليه شنو؟
مسكني من يدي وقال لي تعالي بس
دخلنا قال لي دة يعتبر قصر افلام تاريخي في سان فرانسيسكو ومعلم من معالمها
بقيت اتلفت في المكان قلت ليه الله
قال لي تعالي نختار الفيلم، خلينا نحضر على ذوقك
إخترنا الفيلم وإشترينا الفشار والعصير ودخلنا..
بداية الفيلم قلت ليه شكلو حلو
قال لي ايوا شكلو
في نص الفيلم قلت ليه ظريف صح؟
قال لي شديد
بعد شويه إنتبهت لقيته مركب سماعته وبحضر في تلفونو
الفيلم خلص وطلعنا قلت ليه حبيت الصالة رهييييبة ياخي
قال لي ايوا
قلت ليه والفيلم حلو برضو
سكت
قلت ليه صح؟
ضحك وقال لي م قدرت اكملو بس ما حبيت اخليك براك واطلع وإنتِ متحمسة فيه شديد كنتِ
ضحكت وقلت ليه لاحظت على فكرة إنك ما حبيته
قال لي يكفي جداً إنك حبيتيه
قلت ليه طيب وريني اي نوع من الأفلام وانا يوم حأعزمك واحضر على ذوقك
قال لي ما حتحبي ذوقي انا متأكدة
قلت ليه قول لي بس إنت
قال لي تحضري اكشن ورعب وخيال علمي؟
قلت ليه انا ملخص حياتي عبارة عن اكشن ورعب ما فرقت خلاص ليك علي يوم عزومة على حسابي
قال لي وانا مستني يلا ناخد تاكسي
قلت ليه لا ياخ خلينا نتمشي انا بحب المشي بالليل خصوصاً إنه الجو ما بالبرودة الشديدة ديك ولا في عاصفة ولا غيرو
قال لي طيب يلا تعالي
وطول الطريق كنا بنتونس وبناكل في الفشار والعصير الشايلنه معانا لغاية م وصلنا البيت..
قبل ما ندخل البيت قلت ليه سياف؟!
قال لي ايوا
قلت ليه اول مرة يكون في زول يعتبر واجباتي إنجازات ويتعامل معاها على إنها تستحق الإحتفال
قال لي وبعدين؟
قلت ليه ف شكراً على اليوم الخفيف دة
قال لي المشوار ما كان حيبقى خفيف لو م كان معاك
بقيت اعاين ليه، بعدها إتوترت وقلت ليه يلا ندخل..
كالعادة هو اول ما يجي بلعب مع الكلاب وانا بدخل غرفتي..
رغم إحساسي الدائم والمكتسب بعدم الأمام إلا إني إبتديت احس بنفسي خفيفة وم محملة بالهموم والمشاكل وانا معاه بالعكس بقيت بحس بإني بخير طالما هو موجود ودة بيرجع لإنه دايماً بيكلمني بصيغة الإشتراكية في مشاكلي يعني معظم كلامه معي على شاكله: "حنتصرف، حنفكر،
حنلاقي حل، ما تخافي، انا موجود في كل الأحوال"
يمكن انا م اتعودتة على سماع الصيغة دي من قبل بس هو في كلامه معي حتى بتصرفاتي المريبة واللي لا تطاق دايماً بكون على الشاكلة دي
يمكن دي الحاجة المخلياني احاول اكون مطمئنة وحسيت إني مطمئنة فعلاً بإحساس الخِفه والراحه البحسهم في وجوده حوالي رغم دة كله إلا إنه صوت عقلي دايماً بكلمني عن إنه انا في طريق خطأ ومفروض احذر لأني إتلدغت قبل كدة وإحساس اللدغة ما مفروض يفارقني، وإنه دايماً السقوط بكون على قدر الإرتفاع، برد عليه قلبي ب: انا عارفة إنه يمكن اكون في طريق خطأ لكن انا حابه وجودي فيه لأني شايفة الطريق أمن وجميل...
صحيت نص الليل وفتحت اللابتوب وبقيت اراجع في ارقام لوحات العربات والمناطق المرفقة معاها، إذا رقم لوحة عربية طلع مرتبط بحادثة إختطاف طفلة عضو سابق في الكونغرس الأمريكي معناها بقية العربات دي كلها مرتبطة بحوادث او جرائم تم إرتكابها، بس كيف انا حأعرف الحوادث المرتبطة بيها كل لوحات العربات دي اكيد صاحب سياف الشرطي حيتوقف على إنه يعرف ليه بنسأل عن بيانات اصحاب لوحات العربات دي، يعني نحن لو عايزين نعرف قصص العربات دي ونربطها مع بعض حنحتاج إننا نبلغ الشرطة..
عملت حركة على اثرها صحى سياف، قال لي شهد؟
رفع تلفونو، قال لي الساعة 3 صباحاً خير مالك؟
قلت ليه مستر جو يمكن قتلوه عشان إكتشفو إنه وجوده في الدار لسبب ما، طيب السيدة إيفا محاولة قتلها سببها شنو ما فاهمة؟
شنو الخطر الإكتشفو إنها مسبباه ليهم وخلاهم يحاولو يقتلوها بجرعة زائدة؟
قال لي مستر جو صحفي إستقصائي، السيدة إيفا كانت شنو بالضبط؟إذا عرفتي حتفهمي سبب محاولة قتلها..
قلت ليه نفسي افهم ليه مستر جو ما حاول يكشف لي هويتي قبل ما يموت وحالياً مخلي لي مسؤولية حاجة انا م قدرها على عاتقي؟ وليه؟
قال لي يمكن إنتِ الوحيدة القدر يثق فيك في الدار وواثق إنك حتحمي الناس دي
قلت ليه من شنو ومن منو؟
سياف قال لي زي م عرفتي إنهم بخليهم يتعاطو مواد مهدأة للأعصاب حتقدري تعرفي هم منو وليه؟
مستر جو خلى ليك طرف الخيط وإنتِ وطولة بالك بعد كدة في فك العُقدة دي..
سكتت مسااافة وقلت ليه عارف في حاجة متوقفة عندها للأن، صاحب مستر جو الفي المصح دة يعني هو جاب ناس تراقبني وعمل الجوطة ديك كلها وإتسبب في إعتقالنا وإتوقف المؤتمر الصحفي بسببه وبعدها إتلقى ورجع المصحى عادي مش كأنه في حاجه غلط هنا؟
قال لي يمكن كانت الفكرة إنه المؤتمر الصحفي يتوقف؟
قلت ليه وإذا الفكرة كانت كدة يبقى ليه؟ وهل دة معناه وجوده في المصح العقلي زي وجود مستر جو في الدار؟
يمكن لسبب ما؟
بقينا نعاين لبعض من غير م نقول حاجة
الصباح طلعنا مع بعض اخد العربية، وسياف مشى قسم الشرطة وخلاني في العربية..
اخد وقت حتى جا طالع
قلت ليه ما ادوك تفاصيل صح؟
قال لي لا اخدتها، يلا نمشي
قلت ليه اقنعتهم كيف لأنك إتأخرت شديد
قال لي طالبتهم بإنه عايز اتأكد بنفسي بوجوده داخل المصح لأني لا انا لا زوجتي قادرين نتحرك بحرية بعد الموقف الحصل وزوجتي حاسة بعدم الأمان، ك محامي طالبتهم بتصريح لدخول المصح...
قلت ليه شكلنا حنستفيد من حتة إنك محامي دي شديد..
جاتني مكالمة من العم مايك، قلت ليه نسيت اتصل عليه رديت وإتكلمت معاه، قلت ليه انا حتأخر في الطريق شوية إنتو باشرو شغلكم عادي انا خلال ساعة حأكون في الدار،
وصلنا المصح، سياف طلع التصريح بتاعه دخلونا،
قلت ليه حيسمحو لينا بمقابلته؟
قال لي ححاول..
قابلنا المدير، سألنا عن سبب زيارتنا ونحن صلتنا شنو بيه؟وتحقيق طويل عريض في مجمله
قلت ليه نحن..
سياف قال ليه لكن انا محامي ومعي تصريح من الشرطة برؤيته، طلع التصريح قال ليه حسناً فهمت، يمكنك مقابلته..
قلت ليه مش التصريح كان بدخول المصح بس؟
قال لي هو تصريح في النهاية
دخلونا كذا محل كده عشان نقابله، والمكان الحنقابله فيه كان في حاجز بينا وبينه..
قعدنا وانا على أعصابي وبتلفت، للحظة إتذكرت مركز إعادة التأهيل الدخلني ليه عمار بس كانت فكرة الزيارات مختلفة كان لما يجي زول لزيارتك بطلعوك الحديقة عشان تقابلة م بتقابله في مكان مغلق اشبه بالسجن كده..
وانا سرحانة حسيت بحركة إتلفته لقيتهم جابوه وقعد قصادنا
انا م كنت عارفة حأقول شنو..
سياف قال ليه مرحباً
قال ليه هل أتيت من أجل إلقاء التحية؟
سكتنا وبقينا نعاين لبعض
قال لينا هل أتيتما لكي تنظرا لبعضكما البعض امامي وإضاعة وقتي؟
قلت ليه انا مرافقة السيد جو، لقد قمت بمراقبة منزلي و..
قاطعني وقال لي ومن هو السيد جو؟
قلت ليه اقصد روكفلر
سكتت ونحن بنعاين ليه
قلت لسياف بهمس شكله فعلاً مختل وتخمينا غلط
قال لي نطلع؟
قلت ليه ممكن لأني خفت من نظراته
قلت ليه حسناً سنذهب الان، نعتذر على الإزعاج
شلت شنطتي وعايزة اقيف على حيلي قال لي إنتِ شهد؟
لما قال إسمي لما حيلي برد
قلت ليه بلهفة نعم، هل تعرفني؟
عاين لسياف وهو ساكت
قلت ليه هذا زوجي
قال لي بصوت خافض لقد تأخرتي كثيراً في القدوم الى هنا لقد اخبرني جو انك شديدة الملاحظة والزكاء
قلت ليه : هذا يعني أن..
قاطعني وقال لي ليس هناك وقت للحديث كثيراً اخبريني عن سبب قدومك إلى هنا..
قلت ليه لقد ارسل إلي السيد جو فلاشاً يحتوي على ارقام لوحات سيارات
قال لي انا من قام بإرسال ذلك البريد لك ولم اكن اعلم ماذا يقصد به، لقد اخبرني انه في حال حدث له شيئاً ما اقوم بإيصاله لك، هل وجدتِ شيئا؟ً
عايزة اقول للحظة حسيت بسياف بضغطني بجزمته في رجلي..
قلت ليه لا لم اجد شيئاولكنً جربت البحث عن واحدة من لوحات السيارات علمت أن السيارة تعود لعضو سابق في الكونغرس الأمريكي، قد إختطفت إبنته في العام 2005 بتلك العربة و