الفصل السابع والأربعون
قلت ليه حتمشي البيت عشان تنوم صح؟
قال لي مفروض
قلت ليه طيب انا حأنزل عشان اجهز واشوف الحاصل شنو في الدار ..
قال لي طيب بيناتنا التلفونات للمساء إن شاء الله
عايزة انزل قلت ليه إتذكرت انا كمان ملابسي المعي خلصت وعايزة امشي البيت اجيب ملابس لنفسي وشويه حاجات و..
قبل ما اتم كلامي لقيته إتحرك
وصلنا البيت وكعادته اول حاجه اخد قعدته مع الكلاب لين جات طالعة من غرفتها وكان واضح عليها إنها طالعة
قالت لينا بنبرة عتاب ياخي عاش من شافكم والله
جات سلمت علينا، قالت لي شهد انا عاذراك وعارفة قدر شنو إنتِ شايله مسؤوليه وعلى الأقل وضحتي لي موقفك الدور والباقي على باقي الناس الكل م تتصلي عليهم يا مشغول يا بعيد من التلفون او إتصل قال كلمتين كويسة؟ محتاجة حاجة؟بس م بتشاف نهائي
ضحك وقال ليها طيب خلينا نفطر مع بعض ونتفاهم
قالت ليه لأ انا طالعة الزمن، المهم نتلاقى المساء، او اتمنى إنه نتلاقى المساء يلا باي
اول م طلعت بقيت اعاين ليه، قلت ليه إتحسست منها والله، تكون فاكرانا قاصدين نعمل كدة صح؟
قال لي م تاخدي في بالك
قلت ليه حاول تتكلم معاها وتشرح ليها وضعنا يمكن تتفهم لأني بقيت محرجة منها
دخلت الغرفة فتحت الدولاب وهو جا دخل الحمام
لما طلع لقاني لسة فاتحة الدولاب
قال لي لما تجهزي انا حأدخل المطبخ اشوف في شنو ممكن يتأكل
قلت ليه وانا حاجي اساعدك بس اخلص
على بال م اجهز واطلع لقيته مجهز الفطور قال لي دة القدرت اجهزه
قلت ليه ممتاز لأني جعانة اي حاجة ممكن اكلها م فرقت
قعدت وبدينا ناكل، عاينت ليه وهو بياكل وانا ساكتة، بعدها بي تردد وانا عيني في الصحن قلت ليه البت الشفناها في العرس عرفتها في نيويورك قبل ما اجي هنا وهي السبب في إني أقرر اجي سان وأشتغل في الدار
عاين لي وشال كباية الموية شرب منها
كملت كلامي ب: صاحب مستر جو هو الدبر لي كرت الدعوة بتاع العرس وحب إنه أمشي عشان اشوفها كإنه بختبرني عشان يعرف انا بعرفها ولا لأ او انا موجودة في الدار دة بسببها او لأ، حسب كلامه إنه هي بتستدرج الناس بطريقة ما بحجة إنها بتساعدهم وهكذا بس م معروفة الفكرة شنو من دة كله..
كمل أكل وهو ساكت وانا بعاين ليه منتظرة منه اي رد ف لقيته ملتزم الصمت ف فهمت إنه م عايز يتدخل حتى بالنقاش معي في الموضوع..
بعد لحظة صمت جات لولو داخله شلتها وقعدتها في كرسي جمبي قلت ليه كأنها ماشة تكبر
قال لي واضح جداً
خلصنا فطور، غسلت العدة ونضفت المطبخ وهو شبه ساعدني في ترتيب البيت وطلعنا، قلت ليه حتوصلني؟ لأنه عربيتي في الدار
قال لي اكيد يلا
ونحن في الطريق قال لي تتذكري صحبي المشيتي معي عرسه؟
بدون ما أنتبه قلت ليه العرس الإكس بتاعتك؟
قال لي أمه واخته مما عرفو بموضوع عرسنا ليهم فترة مُصرين نزورهم وكدة وانا كنت بتحجج، ف امبارح إتصلو وقالو م بقبلو عذر وعازمننا بكره عندهم في البيت بما إنها عطله بدايه الإسبوع، ف رأيك شنو؟
انا ما اديتهم جواب لسة وم اكدته عليهم شي
قلت ليه طيب ممكن م عندي مشكله وبالمرة ناخد معانا لين بما إننا مقصرين في حقها
قال لي يعني ما عندك مشكله؟..
قلت ليه لأ
قال لي طيب هم عازمننا فطور ف حنطلع الصباح
عايزة افتح خشمي أتكلم قال لي حأخد لين ونجي عليك في الدار ناخدك..
ف سكتت، حسيت إنه ما حابب فكرة رجعتي للبيت
قلت ليه تمام
وصلني وقبل أنزل قال لي شهد
قلت ليه ايوا
قال لي انا ضد اساليب إنه الواحد يخلي زول لأفكاره دي، واكيد ماف زول عنده حق يعاقب زول بمجرد إنه مختلف معاه، انا بقيت رافض فكرة إنه اتدخل في شؤونك وتفاصيلك الخاصة لأني شايف إنه الحاجه دي أثرها سلبي عليك قبل ما تكون علي او علاقتي بيك
بس خليني اتكلم معاك في نقطة يمكن تفيدك ويمكن لأ
اهم صفة مفروض تشتغلي على نفسك عشان تكتسبيها هي ضبط النفس وإنه مهما كان الموقف بيدعو للإنهيار تحاولي تحافظي على ثباتك وتركيزك..
ما دايماً التعامل بإنفعال وعصبيه وتوجيه الإتهامات السطحية بفيدك بالعكس ممكن تكون خصم عليك، في مواقف لازم تحافظي فيها على ثباتك الإنفعالي حتى ولو كنتِ متأكدة إنه إتهاماتك تجاه القدامك دة حقيقية م لازم تبيني ليه الحاجة دي إلى ان يكون عندك الإثبات الحتقدري تواجهيه بيه، وعشان تسبقي أي خصم ليك بخطوة محتاجة تفكري بعقله وبسياسته، رغم إنه شخصيتك بتوحي بالغموض وإنتِ زولة صنديدة شديد و
السبب المخليني اقول ليك الكلام دة إنو إنتِ حالياً مافي السودان وهنا السذاجة ما بتنفع والقانون لا يحمي المغفلين فعلياً هنا، وجماعة باركوها باركوها العندنا هناك ديلك هنا ماف، حاسي بيك مستهترة شديد بالقانون في البلد دي وانا م عايز اللعب ليك دور الموجه ف إعتبري كلامي دة نصيحة وم تاخدي في خاطرك او تضايقي وانا أكيد متى ما إحتجتي لي حأكون موجود وأي عقبة تقيف ليك سواء قانونياً او غيره لو لجأتي لي حتلقيني موجود ما حأتردد في إني اقدم ليك البتحتاجيه مني ف من الناحية دي خليك مطمئنة، وبالنسبة لموضوع مشكلة الثقة البينا م عندي تعقيب عليها لأنو الموضوع طالع من يدي
قلت ليه إنت صح، أنا يمكن..
سكتت مسافة بعدها قلت ليه انا حأنزل يلا مع السلامة
قال لي في امان الله
نزلت وانا على طرف لساني كلام كتير لو قررت اقوله حأكون مجبورة احكي ليه كل شيء عني وانا م عندي الطاقة دي في الوقت الحالي ابداً
مع وصولي للدار صادفت واحد كبير في العمر واقف مع الأمن برة وبحاولو يمنعوه الدخول..
قلت ليهم صباح الخير ما المشكلة؟
قالو لي السيد يقول أن زوجته السابقة قد أرسلت له هذا العنوان..
مما إشتغلت في الدار دي كانت اول مرة يكون في حالة زيارة لمسن
قلت ليه مرحباً سيدي تفضل كيف يمكنني مساعدتك؟
قالت لي زوجتي السابقة ارسلت لي هذا العنوان لم اكن اعلم انه دار للإيواء، بحثت كثيراً حتى وجدته
قلت ليه حسناً تفضل، اخبرني ما إسمها لأساعدك بمقابلتها..
قال لي تدعى إيفا
سكتت مسافه
قلت ليه تعال معي من فضلك
اخدته معي مكتبي
قلت ليه متى اخر مرة قامت بمراسلتك بها؟
دخل يده في جيبه مد لي ورقة
اخدته منه وفتحتها كانت كاتبة ليه رسالة
فتحتها لقيت مكتوب فيها العنوان بس وم بالتفصيل
وتوقيعها بإسمها تحت
قال لي هل هي بخير؟
أشعر أنها ليست كذلك من الشكل الذي عليه التوقيع الخاص بها
قلت ليه اجل إنها ليست كذلك
قال لي ما بها؟أين هي الان؟
قلت ليه إنها طريحة الفراش بالمستشفى وبحالة غيبوبة
قال لي يا إلهى ماذا؟ ماذا جرى لها
قلت ليه نحن ايضاً لا نعلم ولكن يقوم الأطباء بكل ما يلزم لأجلها
ظهر عليه الإستياء والضيق
قمت قدمت ليه موية وقلت ليه ستكون بخير إن شاء الله، هل لدي السيدة إيفا ابناء؟
قال لي لا، لقد كرست حياتها للعمل والدراسة لم تحظى بوقت كافٍ لإنجاب الأطفال او لم تكن لديها الرغبة في ذلك
قلت ليه ماذا كانت تعمل؟
قال لي رئيسة قسم المعامل والأبحاث الطبيه بجامعة هارفارد، لقد عملت بهذا المنصب لسنوات إلى أن تقاعدت قبل أعوام قليله ويبدو انها عزلت نفسها بهذا المكان هروباً من وحدتها، من المؤسف ان يكون شخص مثلها بحجم سلسلة الإنجازات الضخمة تلك أن تكون نهايته هنا حيث لا أحد يعرف من هو
سرحت وانا بفكر للحظة
قلت ليه كنت زوجها الوحيد أليس كذلك؟
قال لي الوحيد الذي أحببتها لشخصها، إنفصلت عنها لأنني أردت تكوين عائلة حقيقية بالإضافة لأنها كانت ترغب برجل تتباهى به بين المجتمعات التي حولها وانا كنت فلاحاً أعيش حياة هادئة
بقيت اعاين ليه
قال لي أجل هذه النظرات يرمقني بها الجميع عند إخبارهم أنني كنت زوج لرئيسة قسم الأبحاث والمعامل الطبية بجامعة هارفارد، إعتدت على هذه النظرة التي تقول كيف نجح فلاح مثلي في إقناعها بالزواج مني
قلت ليه لا انا حقاً أعتذر ولكن يبدو انك كنت شخص جيد حتى أنها قامت بمراسلتك دون الأخرين
قال لي لم تنقطع علاقتنا بعد الإنفصال، كنا نتواصل بين الحين والأخر، كانت تقوم بزيارتي، لا زالت لديها غرفة خاصة بها في منزلي ولكن منذ سنوات إنقطع تواصلنا وغابت عن الأنظار، أين هي الان؟هل بإمكاني رؤيتها؟ لقد أتيت من مكان بعيد فقط لأراها
قلت ليه حسناً هي بالمستشفى
قال لي هل يمكنك أخذي لها؟
قلت ليه حسناً هيا
اخدته ووصلته المستشفى..
ودخلته ليها وخليته ومشيت للدكتور في غرفته
لما جا طالع ملامحه كانت متغيرة ومتوتر
قلت ليه هل أنت بخير؟
قال لي أجل بخير، يجب ان أذهب الأن
قلت ليه حسناً إذا كنت ترغب في الإطمئنان على السيدة يمكنك تسجيل رقم هاتفي الإتصال بي
قال لي حسناً
طلع لي ورقة وقلم
كتبت ليه رقمي وقلت ليه إسمي شهد
قال لي حسناً، شكراً لك سيدتي
حسيت بإنه كان ما طبيعي وفي شي من الخوف والتوتر في ملامحه حتى إنه كان مستعجل في الطلعة، فتحت باب غرفة السيدة إيفا بسرعة للحظة حسيته ممكن يكون عمل ليها حاجه بس كان وضعها مستقر نوعاً، ناديت على الممرضة وبي توتر قلت ليها هل يمكنك فحصها؟
قالت لي ماذا حدث؟
قلت ليها لا شيء ولكن قومي بتفحصها
وقفت وانا بعاين ليها بتوتر وهي بتفحص فيها
طلعت السماعة وقالت لي إنها بخير
قلت ليها حسناً
طلعت من الغرفة لقيت واحدة من المشرفات المرافقات ليها قلت لي سيدة شهد كنا نتناول الطعام منذ متى وأنتِ هنا؟
قلت ليها أتيت لتفقد السيدة، أعلميني في حال حدث شيء، وايضاً لا تسمحي بدخول اي شخص غيركم بالدخول للسيدة إيفا اياً كانت الأسباب حتى وإن قال لكم أنه احد اقاربها حسنا؟ً
قالت لي حسناً ولكن ماذا هناك؟
قلت ليها لا شيء هكذا فقط
طلعت وانا في الطريق فتحت الدرج وطلعت منه ورقة مكتوب عليها رقم مسكت تلفوني وكتبت الرقم و بتردد كنت بعاين فيه، ما بين اتصل وم أتصل إتصلت..
المكالمه على وشك إنها تفصل كانت الخط فتح
قلت ليه مرحباً
قال لي نهارك سعيد
قلت ليه انا محتاجة مساعدتك، انا محتاجة اقابل تايسون ادامز
قال لي اوه على مهلك هل تعتقدين أنن..
قاطعته وقلت ليه اعلم انك تستطيع مساعدتي بطريقة او بأخرى، ارغب في التحدث إليه سواء بمحادثته هاتفياً او بمقابلته شخصياً هل يمكنك مساعدتي؟
سكتت مساافه
قلت ليه لا استطيع الذهاب إلى نيويورك مرة اخرى دون ترتيب الأمر، ساعدني ببعض الطرق التي تمكنني من مقابلته او اماكن تواجده التي يمكنني مقابلته فيها، لا اعلم كيف ولكن اعلم أنك تستطيع فعل ذلك
قال لي حسناً سأعاود الإتصال بك
بعد فصلت منه رجعت أتذكر الحالة الكان عليها طليق السيدة إيفا بعد طلع من الغرفة..
رجعت الدار وعلى طول طلعت مكتبي وفتحت جهاز اللابتوب بتاعي وبديت ابحث عن تايسون ادامز
لازم يكون في سبب مخلي مليسيا تتزوج ولده اكيد الموضوع ما صُدفة..
وانا ببحث وبقرا قدرت أصل لحسابه في تويتر والحمدلله موثق بالعلامة الزرقاء
بقيت افتش في حسابه وبراجع في مشاركاته
كل تغريداته بتوحي بإنه اهتماماته بالطبيعة، والخدمات المجتمعية خصوصاً الأطفال، والرياضة، والسفر وتغريداته كلها كانت عن الحاجات دي واخر تغريده ليه كانت قبل يومين وهو مشارك صورة ليه مع بنات صغار لابسين زفافات وكاتب عليها: الفراشات تحيط بي
فهمت إنهم البنات الكانو في عرس ولده
يمكن حبه للأطفال سببه فقدانه لبته الصغيرة
❖
السلام عليكم ورحمة الله وبركاته
وعليكم السلام ابو النسب
يا شهاب كيفك عساك طيب ياخي؟
الحمدلله بخير كيفك إنت؟
بخير الحمدلله كيف عم عبدالله واولادك بخير؟
الحمدلله ما علينا عوجة تب يا اخوي
الحمدلله، يلا يا حبيب انا الحمدلله شبه جهزت الأمور هنا كلها والملف حق عمي حالياً عرضته على الدكاترة المختصين وقعدتة معاهم وإتناقشنا بخصوص حالته وإن شاءالله بشروني بشريات سمحة، وموضوع الزيارة برضو حليتو والحمدلله كل شي تمام بعد كدة حأرسل ليك التذاكر الإسبوع الجاي إن شاء الله وتقومو على طول تجو هنا
خلاص تمام إن شاء الله حنجهز امورنا و..
ما عندكم اي امور تجهزهوها غير تجهز شنطتك إنت وعمي وزوجتك وتطلعو على المطار على طول، انا مجهز ومتكفل بكل شي زي م كلمتك قبل كدة وم عايز نرجع نتناقش في الموضوع دة تاني وإتفقنا على كدة ولا شنو يا اخوي؟
خلاص خير إن شاء الله يا عمار يا اخوي والله ما عارف اقول شنو زاتي
ما تقول اي شي نحن ناس اهل هسي كنت بتقول لي اخوي وبتقول لي يا ابو النسب بعد كدة ما داير اسمع منك اي شي اهم شي هسي خلينا نشوف علاج عمي عبدالله دة ونستبشر خير إن شاء الله
الله يكرمك في الدارين يا اخوي
❖
على جانب اخر..
متشاكل مع شهد ولا شنو؟
لا ابداً ليه السؤال؟
عشان عازمني عداء وفي المكان الرهيييب دة بدونها غريبة
شهد مشغولة م حتقدر تطلع دة السبب
مشغولة لدرجة إنو م بترجع البيت اساساً وكم يوم برة البيت عادي، م عارفة بتعيشو كأي إتنين متزوجين متين، جد حاساها انانية وهمها كله شغلها حتى لو على حسابك او كدة، دي اول ايام للعرس يعني..
لين إنتِ عمرك كم؟
18 او 17 لسة م دخلت ال 18 سنة كويس
طيب ي لين لما تبقي زولة عرس وبيت وقتها طبقي البتقوليه دة الموضوع م نمطي او جاي كتالوج زي المينيو القدامنا دة مثلاً عشان الناس كلها تمشي عليه وفقاً للمعطيات القدامنا، انا وشهد سلفاً متفقين وعارفين البينا وعلينا وامورنا تمام
طيب
يلا الغداء وصل خلينا ناكل عشان اوصلك البيت
حترجع الصالة الليله برضو وحتخليني مع الكلاب بس في البيت؟
عندي تمرين مع فريق كلة السلة اليومين دي عشان مشاركين في مسابقة لازم امشي
لو م شاركتة ما تبقى سياف طبعاً نفسي اعرف بتحبها كدة ليه وجع جسم سااي والله
هههه يلا اكلي وبطلي النقة على فكرة بكرة خليك جاهزة حأجي اسوقك معزومين فطور سوداني
فطور سوداني يعععع وين دة؟
اهل صحبي، المهم خليك جاهزة حنمشي مع بعض انا وإنتِ وشهد إتفقنا؟
طيب
❖
المساء كنت ماسكة تلفوني وسرحانة
دخلت المطبخ وكان فاضي، فتحت واحدة من التلاجات لقيت فيها جبنة، عملت لي منها ساندويتش وطلعت ولسة بعاين لتلفوني فتحت الشات بتاع سياف م شايفاه اون لاين، إتصلت عليه وفصلت بسرعة
دقايق ولقيته رجع لي بمكالمة..
اول م فتحت الخط قال لي مساء الخير
قلت ليه مساء النور
قال لي كيفك بخير؟كنت بعيد لما إتصلتي
قلت ليه بتهكم انا إتصلت عليك متين؟اهاااا يمكن لما تلفوني كان معلق
قال لي كيف كان يومك
قلت ليه تمام مما جيت...الخ
حكيت ليه كل تفاصيل يومي بعدها قلت ليه ايوا وم انسى مشيت..
بعدين سكته
قال لي مشيتي وين؟
قلت ليه مشيت المطبخ حسيت روحي جعانة عملت لي ساندويتش جبنة وطبعاً من الصباح م اكلت
قال لي ودة اكل بمسك بطن؟
قلت ليه اعمل شنو؟
قال لي ادخلي المطبخ واعملي اي حاجة
قلت ليه زي شنو مثلا؟ً
قال لي ادخلي وانا بوريك
قلت ليه م عايزة يخخ
قال لي طيب إنتِ حرة طبعاً لو جعانة بشكل جادي حتعملي حاجة تاكليها
قلت ليه ما كدة بس لو عملت حاجة ما حأكلها متأكدة لأنه على بال م اخلص طبخ نفسي حتكون طلعت وقفلت منها وحأحس بالشبع تلقائياً عشان كدة ما حابة اعمل رغم إني هسي نفسي في حاجة حاادقة شديد، المهم حصل معاك شنو اليوم؟
قال لي طيب كنتِ تكلميني بدري كنت حأجي اعمل ليك اكل انا شاطر بالحيل في المطبخ على فكرة
ضحكت وقلت ليه هسي تعال، وين إنت بالمناسبة سامعة صوت صاخب كدة
قال لي في ملعب بتاع كُرة سلة كان عندي تمرين مع فريق خلصته وهسي طالع
قلت ليه جنك كُرة سلة ورياضة
قال لي إنتو الليله مالكم ماسكين لي فيها؟قبيل بتغدأ مع مع لين قالت لي نفس كلامك دة
ضحكت قلت ليه لكن جد بي طولك دة إنت مكسب للفريق
قال لي بعد يومين لاعبين دعواتك طيب
قلت ليه حدعي ليك بضمير من هسي لغاية بعد بكرة بس دعاء مشروط سوقني في طرفك
ضحك قال لي حلوة في طرفك دي زكرتني امي
قلت ليه اي نعم حأكون المشجعة الوحيدة المحجبة في الملعب بس حأشعجك بضمير صدقني
كان بضحك وانا لسة بتكلم..
قال لي دقايق ي شهد برجع ليك
قلت ليه طيب
فصل عدة قريب نص ساعة حتى إتصل علي
قال لي نمتي؟
قلت ليه ايوا ودة المجيب الألي البتكلم معاك دة
قال لي طيب يا المجيب انا وصلت
قلت ليه وصلت البيت حتنوم وكدة يعني؟
قال لي وصلت الدار
قلت بإستغراب وصلت الدار؟
قال لي اي، مش كنتِ جعانه وقلت لي هسي تعال؟
قلت ليه انا كنت بهظر وإنت جادي جيت؟
قال لي طيب أرجع عادي يلا لي بكرة إن شاء الله
قلت ليه إستنى، جاية عليك
بإستعجال طلعت لقيته واقف وشايل كيس في يده
قلت ليه وين عربيتك؟
قال لي لما يكون عندي تمرين م بتكون ضروريه
قلت ليه على فكرة جد انا كنت بهظر
قال لي على حس إني جعان ومع سيرة الأكل يمكن م ركزت إنك بتهظري
قلت ليه طيب طالما إنت جعان تعال ناكل
قال لي قصدك تعال نعمل الأكل
قلت ليه يعني دة ما اكل جاهز؟
قال لي لأ
قلت ليه المهم تعال طيب
دخلنا وأول م وصلنا المطبخ قلت ليه قول لي حنعمل شنو؟
قال لي مكرونة وخليك إنتِ على جنب بس انا جايب كل حاجة ممكن نحتاجها وحأعمل كل شي عشان بعد م نخلص ما تقولي لي شبعانة م حأقدر اكل
ضحكت قلت ليه طيب
قال لي ساعديني بس محتاج حلة
قلت ليه وتاني وبقى يوريني هو محتاج شنو، بعد م خلصت قال لي يلا بعد كدة م مطلوب منك غير تونسيني
ضحكت قلت ليه طيب وبدأ هو يعمل في الأكل وانا بتونس معاه لغاية م خلص وجهز الأكل في صحنين واحد ليه وواحد لي وختاه في تربيزة المطبخ واصلاً فيه كراسي..
قلت ليه شكلها يفتح النفس
قال لي نسيت قبل م تستلمي شوكتك هاك
طلع شريط حبوب من جيبة
قلت ليه دة شنو
قال لي المفروض اديك تاخديها قبل 15 دقيقة من الأكل لأني عملتها حادقة زي م قلتِ نفسك فيها وحتتعبك اكيد بعدين تقولي لي إنت السبب
ضحكت وانا بعاين ليه، قلت ليه الوحيد البذكرني إني عندي قولون
قال لي ما تتعودي تنسي
اخدتة منه الشريط وبلعتة الحبة قلت ليه م حأقدر انتظر دقيقتين حتى يلا ناكل
اول ما اكلت بقيت اعاين ليه..
قال لي وهو بضحك رأيك م مهم لأنك حتتنمري عارف
كملت أكل وانا ساكتة لغاية م خلصت الصحن بعدين قلت يعني نوعاً ما حلوة
قال لي الخشم لو دارك الصحن بديك خبر
ضحكت قلت ليه رأيك شنو نفتح مطعم شراكة
قال لي عقلية البزنس خلاص إشتغلت؟
يلا غسلي الصحون وبقيه العدة عشان شوية كدة بتاعين الأمن بتاعنكم ديل حيهجمو علينا
قلت ليه اليوم مادلين م مناوبة وإلا كان لقيتها في نصنا قبيل..
غسلت عدة وهو واقف وبتونس معي لغاية م رجعنا كل حاجة في مكانها وعملنا شاي وطلعنا الحديقة
قال لي مقعدك المفضل
قلت ليه كل م اكون حاسة بأي شعور حلو ولا كعب بجي بقعد فيه، صديق النكبات ما عندي غيره..
عاين لي وهو ساكت
وانا بعاين ليه قلت ليه اقصد...ما كان عندي غيره*
وهو بعاين لي بسرعة غيرت الموضوع وقلت ليه قلت إتغديت مع لين اليوم صح حتمشي معانا بكره؟
قال لي ايوا حتمشي قالت
طلعت التلفون وصورت ايادينا ونحن ماسكين كبابي الشاي
قال لي هوس البنات
قلت ليه توثيق اللحظات دة مهم، المهم م كملت لي باقي الكلام حتشارك في مسابقة شنو يا ابو طويلة
ضحك وقال لي ابو طويلة دة انا؟
قلت ليه ايوا إنت حتكون يوم شنو المباراة؟
قال لي انا زاتي منتظر خبر
قلت ليه بالحيل حاساك بتحب حاجه إسمها رياضة
قال لي رياضة سفر مباريات وتحديات اياً كان نوعها وقراية كتب دي هوايات وإهتمامات لا يُعلى عليها
قلت ليه طيب نرجع لموضوعنا حتاخدني صح؟
قال لي حأفكر
غيرت ملامح وشي وقلت ليه حتفكر؟ هو إنت لاقيني وين عشان تكون م عايزني امشي معاك
ضحك قال لي خلاص حتبدي تردحي؟
وقف على حيله وقال لي يلا الزمن لازم امشي بعد كدة
طلعت معاه للشارع بعدها وقفنا مسافة وكل واحد فينا بعاين للتاني على اساس حيقول حاجة،
في الأخير قال لي يلا لي بكرة
قلت ليه حتمشي البيت؟يعني إنت بتنوم في البيت وكدة؟
قال نوعاً ما ايوا عايزة حاجه اجيبها ليك معي بكره وانا جاي؟
قلت ليه اهااااا، لا ابداً طيب يلا مع السلامة
قال لي على فكرة مد يده وصل لي الجاكيت حق البرد اللابساه وقال لي: اصلاً لازم أخدك معي المباراة لأنه وجودك حيفرق أكيد، حلو الدبدوب الإنتِ لابساع ده
كنت لابسه خُف بتاع برد على شكل دبدوب
قلت ليه قول والله حتاخدني لسة كنت م استوعبت باقي كلامه كويس وهو مشى وانا يدوب إستوعبت باقي كلامه وبقيت واقفة بتبسم براي وانا بعاين ليه وهو ماشي
رجعت نمت وانا حاسة إنه سعادة الدنيا دي كلها ربنا اخدها وختاها في قلبي، ما عارفة افعاله دي حتاخدني لوين بس انا مبسوطة ومرتاحة ومطمئنة بيها جداً وحاسة إنه دة حقي بعد كل العشتو ومريت بيه رغم إنه في خوف وفي وخزة في قلبي كل م احاول اتخيل الجانب السيء منه ممكن يكون كيف بس شايفة محاولاته اكتر من تركيزي مع خوفي لأني حاسة إني لو مشيت ورا خوفي حأضيع طريق أمن مفروش ورد مستنيني حتى لو المشوار فيه طويل أنا راضية امشي فيه..
في غرفتي كنت ماسكة تلفوني وانا مترددة ما بين أتصل عليه ولا لأ
ف رسلت ليه رسالة: ها وصلت؟
خليت التلفون جمبي وانا بعاين ليه ومستنيه تجيني رسالة منه
بعدين قلت لنفسي وانا مستنيه رسالة منه كأني مراهقة ليه؟
عملت التلفون صامت وختيته بعيد مني وبرضو لقيت نفسي بعاين ليه على أمل إنه ينور في اي لحظة..
فتحت عيوني وانا مخلوع وبتلفت حوالي وقلت لنفسي بسم الله، الحمدلله، الحمدلله كان حلم..
الوقت كان لسة بدري السااعة 6 ونص صباحاً
صليت الصبح نزلت المطبخ لقيت العم مايك جايط وصوته عالي وبقول هيا هيا اسرعو لا وقت لدينا..
كانو كلهم متحركين والمطبخ في حالة فوضى
قلت ليهم صباح الخير
العم مايك قال لي صباح النور
مرتو قالت لي صباح الخير
قلت ليهم ما الأمر؟هل كل شيء على ما يرام؟
قالت لي كل شيء على ما يرام إنه مايك، هكذا هو في المطبخ ستعتادين عليه إن عملت معه في مطبخ واحد
قال ليها هيا كفي عن الثرثرة وقومي برمي البطاطا في المغلاة
قالت لي عزيزتي هل تحتاجين شيئاً ما؟
قلت ليها لا لقد كنت..
سكتت مسافة بعدها قلت ليها لا شيء هيا تابعي عملك، عملاً موفقاً
قالت لي حسناً
طلعت من المطبخ ورجعت غرفتي إتصلت على سياف
المكالمة الأولى ما رد، التانيه برضو م رد
وقفت قدام المراية وانا بعاين لشعري وهو في مرحله شبه إنه إنه بدأ يرجع وبقى ممكن يتسرح
عملت ليه حمام زيت وإستنيت دقايق وغسلته وجيت سرحته..
إتصل علي سياف اول م فتح الخط قلت ليه وارث نايم للزمن دة؟
قال لي كنت بجري نوم شنو يا زولة صباح الخير
قلت ليه صباح النور
قال لي كويسة إنتِ؟
قلت ليه كويسة الحمدلله إتصلت عشان اقول ليك إنه نحن حنمشي للناس ديل ويدنا فاضية؟
قال لي م عارف والله ممكن ندخل اي محل تجاري ونشتري اي حاجة ناخدها ليهم ولا رأيك شنو؟
قلت ليه م عارفة غايتو لكن كنت عايزة اقول ليك ممكن نعمل ليهم قالب كيك ناخده ليهم معانا
قال لي قالب كيك؟
قلت ليه مالك عندك شك في قدراتي في المطبخ يا أستاذ ولا شنو؟
ضحك قال لي لا بس قصدي حيطلع متين
قلت ليه م بتأخر انا حأطلع اجيب الحاجات الممكن نحتاجها واجي البي..
سكتت
قال لي مالك سكتي؟
قلت ليه لا ماف شي خلاص ممكن ناخد اي حاجة في طريقنا زي م قلت
قال لي انا هسي في الشارع وريني حتحتاجي شنو بالضبط وانا في طريقي اجيبهم معي واجي اسوقك البيت
قلت ليه البيت؟
قال لي او الدار م مشكله المهم مكان راحتك انا معاك فيه في كل الأحوال مفتاح البيت معاك وبالمناسبة انا م قلت ليك تعالي البيت لأنه انا شايف إنه القرار دة قرارك إذا حسيتي إنك حتكوني ومرتاحة ومطمئنة في البيت دة أكيد حترجعي في الأول والأخير البيت بيتك ما تنسي حتى الإيجار نحن شراكة فيه
قلت ليه طيب حأرسلهم ليك في رسالة ونتلاقى في البيت ما تجيني
قال لي طيب
لما وصلت م كانت عربية سياف برة موجودة، دخلت البيت م كان فيه حركة، مشيت على غرفة لين ناديت عليها اكتر من مرة ما ردت فتحت الباب كانت نايمة..
دخلت المطبخ وبقيت اشوف المطبخ فيه شنو ممكن اعمله فطور لغايه م سياف يوصل ..
جهزت الفطور ولسة م جا، قلت خلاص اعمل عصير، وانا بخلط في العصير إتلفته وراي لقيته داخل المطبخ قلت ليه بخلعة بسم الله
قال لي مالك؟
قلت ليه إتخلعت م سمعتك وإنت داخل مع صوت الخلاط
قال لي لين ماف؟
قلت ليه نايمة، المهم جهزت ليكم الفطور
لقيت كل الحاجات إن شاء الله؟
قال لي ايوا لقيتهم
قلت ليه الحمدلله، اهم شي لقيت فستق حلبي إن شاء الله بشرني؟
قال لي دة الخلاني اتاخر كدة دخلت كم محل حتى لقيته
قلت ليه بتنهيدة ياااااه ده اهم زول في الحاجات دي
يلا إنت افطر على بال م اعملها
قال لي فطرتي إنتِ؟
قلت ليه م نفسي م عايزة إنت أفطر وانا حأكسب الزمن
بديت اطلع الحاجات من الكيس
لما إنتبهت لقيته بعاين لي
قلت ليه مالك؟
قال لي حأستحم أول حتى افطر طيب
طلع اخد وقت وانا شغالة حتى جا راجع
لما رجع قلت ليه فكرت اعمل كنافتين واحدة بالقشطة والتانيه بالجبنة فكرة صح؟
قال لي اعمليهم تلاته عشان واحدة أكلها بمزاج بعد م ارجع فرصة يوم م بتجي كل يوم
قلت ليه حتساعدني ولا ساي؟
ضحك قال لي وريني عايزة شنو مساعدة وانا ححاول اعملها ليك
قلت ليه طيب، حقت البيت عايزها بالجبنة ولا بالقشطة؟
اوعى تقول لي اعمليهم واحدة كدة وواحدة كدة لأني م حأعمل اربعة كنافات صراحة
ضحك قال لي اعملي الظابطة فيهم ديك بس، وعلميني وإنتِ بتعمليها عشان تاني م اتذل الذلة دي عشان كنافة
عاينت ليه وانا بضحك وبديت اشتغل وهو واقف في راسي وبسألني من الخطوات وكل م احتاج لحاجة يناولني ليه ويرجع يقيف جمبي زي الطفل يسألني عن ادق التفاصيل
خلصت وبقيت واقفة جمب الفرن ومنتظرة اخر واحدة عايزة اطلعها إتلفت عليه لقيته ماسك سكين وشوكة وقسم واحدة غلط صرخته فيه لمن إتخلع
قلت ليه ليه عملت كدة؟
قال لي يا زولة مالك مش دي حقت البيت؟
قلت ليه انا قلت ليك اهبشها؟عاين قصيتها كيف
بقيت اتكلم معاه بنرفزة وهو ماسك القطعة القطعها ودخلها في خشمه وقال لي ببرود يعني، نص نص كدة
مشيت عليه بغيظ وقلت ليه جيبها ما تاكلها دخلها بسرعة في خشمه مسكت يده وعضيته في كفه يده
ضحك قال لي يعني اطبل ليك بالغصب؟
عاينت ليه بغيظ وانا ساكتة
جات لين داخلة قالت لينا بسم الله جيتو متين إنتو وبتعملو في شنو وجايطين وبتصرخو كدة مالكم؟
قلت ليها صباح الخير جينا من بدري
قالت لينا صباح النور عاش من شافكم، حاسة نفسي بحلم بحلم كدة لما قنعت من فكرة رجعتكم للبيت بقيت متحسسة منكم عديل
قلت ليها اعفي لينا وإتعودي تصطبحي بصوتنا تاني يومي إن شاء الله
سياف عاين لي و قال لينا اجهزو عشان نطلع بعد كدة
لين قالت ليه الساعة 8 ونص ي دوب
قال ليها على بال م تجهزو وتطلعو الساعة 9 حتكون جات انا عارف الأمور بتاعتكم دي
عاينت لي مسااافة وقالت لي المتغير شنو في وشك حاسة في حاجة غريبة، اها لميتي الصويفات وسرحتيهم
قلت ليها حاولت ألمهم ههه
قالت لي ممتازة لازم تدي الناس دي إحساس إنك عروس جدجد
قلت لي سياف انا بس حأرجع اسقي الكنافة دي الشيريا وتاني م عندي شي
قال لينا انا حأسوق الكلاب واطلع برة لما تخلصو وتجهزو خلاص ادوني خبر عشان اجهز
خلصت شغل في المطبخ ودخلت الغرفة بديت اجهز، سرحت شعري ولبست حلق ورتبت حواجبي
ولبست وطلعت نبهت سياف إني جهزت عشان يجهز
دخل جهز نفسه ونحن شلنا قوالب الكنافة دخلناها العربية وبقينا منتظرنه اخد وقت حتى طلع
قلت ليه م بدري
ضحك وقال لي الوقت دة إنتو حتاخدو اضعافه لو قلت انتظركم
ونحن في الطريق لين كانت بتتمكيج ورا وبتظبط في روحها قالت لي شهد هاك ومدت لي روج
قلت ليها انا عاملة
قالت لي م ظاهر شديد هاك ظبطيه
شلتو منها وعلمت وبقيت اعاين في المراية
سياف قال لي بصوت خافض زي الكتير كدة البتاع دة
عاينت ليه وطنشته..
وصلنا صحبه هو الإستقبلنا وبعدها أمة واخته جو إستقبلونا ورحبو بينا، والغريبة كانو بعرفو لين وبسألوها عن امها ووين هي الأن وعاملة شنو و...الخ
ف إستغربت اسألتهم شويه
وكانو عازمين اصحابهم برضو العزومة كانت زي الوليمة، صفرة طويلة متجمعين فيها كمية من الناس وفيها ما لذة وطاب
ام صحبة قالت لينا العرس م ادانا خبر والخطب م ادانا خبر والجاب ليه وليد م ادانا خبر رغم إنكم زمان نايمين وقايمين معانا قلت اجمعكم كلكم مع بعض كدة وأنتف ريشكم يا اولاد
ضحكو كلهم بصوت عالي
واحد من اصحابهم قال ليهم معروف العرس دة مقصود بيه منو
التاني قال ليه يا زول هو ورقو كان مكشوف من يوم جا العرس تتذكر؟قال م بتصافح وهو عمنا الشيخ غانج قايلنا م بنفهمها وهي طايرة
سياف قال ليهم خالتي قاعدة حأعمل روحي ما سمعكم
قال ليهو في التويتر بعدين إلا تطير اصبر بس
اخت صحبه قالت ليهم إحم إحم يا شباب عيب عليكم الكلام دة ما تشغلوها ل سياف دة زول خجال شديد لدرجة إنه خجل يورينا إنه عريس كتر خيرو عرفنا على شهودة قبل العرس
سياف قال ليها جيتي فزع بقيتي وجع يا خالتي ما تقولي حاجة
قالت ليه حاجة يا ولدي
ضحك
كانت قعدة ظريفة ملانة ضحك وونسة وتشغيلات
دخلت المطبخ عشان اساعدهم ام صحبة قالت لي يا بتي ولا شي م محتاجنة منك، قلت ليهم بالجد لو في شي يتعمل اناا
قالت لي تعالي اقعدي هنا تعالي
قعدت في الكرسي قالت لي البت دي قاعدة معاكم ولا جاتكم زيارة،؟ قلت ليها لين؟ايوا قاعدة معانا نازلة معهد هنا في سان؟ عاينت لبتها وقالت لي شوفي عليك الله البت الما بتخجل دي لا هي لا امها م بخجلو للأن متلصقين في الولد دة ومستغلينه
انا كنت بعاين ليها وانا ساكتة
قالت لي عايني إعتبريني امك واسمعي كلامي اعملي حسابك شديد لبيتك وراجلك وقروش راجلك اوعى تخلي راجلك يصرف قروشه في الفارغة ابوها قاعد مجبور عليها، دي امريكا يا بتي هنا الفوضى وبعزقة القروش م بتنفع دولار واحد لو طلع بفرق معاك والدخل محدود عشان كدة الصرف لازم يكون محدود، إنتو عندكم إيجار وضرايب ومصاريف اكيد يا دوب تقدرو تكفو مصاريفكم، وهو كمان عنده مصاريف اهله في السودان ومسؤليات تانيه كتيرة ماف راجل بعمل حساب للقرش عشان كدة إنتِ اعملي حساب وخليك واعية
بتها قالت ليها اكيد جات قعدت معاهم بدراما جديدة من دراماتها الما بتخلص هم اصلاً متعودين افضل حاجة عملها سياف إنه عرس من سكات وفاجأهم وريح نفسه
امها قالت لي عموماً يا بتي نحن هنا إعتبرينا اهلك انا دي زي امك دايرة تتحنني او ترمي او حتى تدخني او لو عايزة ليك كوفير سوداني او اي حاجة سودانية هنا شيلي رقم أختك دي ورسلي ليها في الواتساب بس و اخدي ليك تاكسي وتعالي لينا هنا م بنقصر منك
لما طلعنا ل قعدة الشاي اخت صحبه قالت ليهم لكن يا شباب مرت ولدنا تستاهل يغنجو بيها عاملة كنافة م فاضية للكنافة السورية
واحد من اصحابة قال ليها اخر مرة اكلت كنافة زي دي كانت في السودان قبل م اقطع هنا بالسمبك
التالت ضرب سياف في كتفه وقال ليه يا صحبي سنة لقدام جسمك الرياضي دة تستودعه الله مع العزة دي
عدى اليوم بتشغيلات متواصله لغاية م جا وقت رجعتنا
ونحن طالعين أم صاحب سياف قدمت لي سلة مغلفة مليانة حاجات وقالت لي م لحقنا نحضر العرس ف دي هدية العرس بتاعتك ربنا يبارك في ايامكم ي رب ويكتب ليكم الخير في بعض
قلت ليها يا خالتو م كنتو تتعبو نفسكم كدة
قالت لي العفو يا بتي سياف دة ولدي وأكتر ودة قليل من غلاوة سياف ونحن طالعين كانت بتوصي في سياف على إنه يجيبني ليهم كل م يلقى وقت وم ينقطع منهم، لغاية م ركبنا العربية وإتحركنا
اول م مشينا مسااافة لين قالت ليه المرة لصقة ومعاطة ياخ بتكرر في الكلام كدة
سياف قال ليها لين
قالت ليه سكتة عشان م تبدأ محاضراتك الما حتخلص
قال ليها كويس إنك حافظة طيب
قالت ليه عاين ممكن م نرجع البيت لأني زهجانة حد الزهج من البيت والقعدة في البيت
قال ليها طيب عايزة نمشي وين؟
قالت ليه اي مكان م عندي معرفة شديدة ب سان دي انا
قال ليها تمام..
اخد وقت وهو ماشي بعدها وقف
قلت ليه المكان دة م غريب علي
قال لي نادي الفروسية
عاينت ليه بحزن إتذكرت إنه المكان دة جابنا ليه سياف قبل كدة مع مستر جو
لين قالت ليه يا سلااااام عندي زمن بفكر اسجل في نادي فروسية
نزلت بإستعجال وانا لسة بعاين للمكان
سياف قال لي نسيت نقطة إنه جيناه قبل كدة ومعانا مستر جو اعفي لي، لو م حابة تدخلي نرجع عادي
قلت ليه لأ عادي، بس كدة إتذكرت اللحظة وحسيت كأني شايفاه قدامي اصلاً هو م بغيب عن بالي والله
قال لي ي شهد اعفي لي جد والله ما قصدي اكيد
قلت ليه يلا ننزل
نزلنا وهو بعاين لي لسة قال لي متأكدة إنتِ كويسة؟
قلت ليه انا لسة شغالة في الدار اللي يعتبر إنه أكتر ليه اثر فيه ف عادي م تركز
دخلنا النادي، كان اشبه بالمزرعة الطبيعية ومساحته خضراء وواسعة وفي جزء من الحصين فاكنها ساي شكلها رهييب، سياف إتكلم مع واحد من العاملين بعدها قال لينا تعالو، مشو بينا على إلإسطبلات الحصين
في حصان ابيض لين قالت ليه انا حأختار دة عايزة الأبيض دة
سياف قال لي شهد
قلت ليه انا؟ لا مستحيل
قال لي مالك؟
لين قالت لي ما جادة م تخافي حيكون معاك م بخلوك براك
قلت لسياف انا لابسة فستان ف م ينفع
لين قالت لي اها، الحمدلله انا لابسة بنطلون
قلت للعامل ممكن اهبشه م حيعضيني؟
قال لي لا إنه مسالم للغاية
طلع الحصان الإختارته لين من الإسطبل
وانا واقفة بعاين للحصين م بين عايزة اهبش واحد فيهم ولأ
اشرته ليه على واحد ملون قلت ليه عاين دة حلو كيف حبيتو شكلها حصانة م حصان
ضحك قال لي حلوة حصانة دي ومسكني من يدي وقال لي تعالي ومشى على الحصان وانا بقول ليه يا سياف لأ حيعضينا
قرب من الإسطبل ومرر يده في وش الحصان وقال لي شايفة عادي الموضوع يلا جيبي يدك
قلت ليه لأ
قال لي طيب خليك
قلت ليه طيب دقيقة قربت وانا ماسكة بيدي في قميصه والتانيه مررتها في وش الحصان قال لي جبن شديد..
عاينت ليه بغيظ قال لي اقصد الجُبن البياكلوه
قلت ليه خلاص خليت مشروع الأكل ارح نعمل لينا نادي تعلم الفروسية زي دة ونربي حصين وكلاب ونعمل اقفاص عصافير وحمام رأيك شنو؟فكرة حلوة صح؟نعمله على شكل مزرعة ونبني البيت بتاعنا جواه زي البيوت بتاعة الريف بتاع سويسرا داك نبقى مستثمرين وساكنين لا إيجار ولا سجم رماد رأيك شنو
ضحك قال لي والله فكرة برضو
سمعنا صوت لين وهي بتقول يا سياف..
طلعنا لقيناها راكبة الحصان ولابسة خوزة وحاجات كدة حوالين رُكبها والمدرب بتكلم معاها..
اول م شافتنا قالت ليه يا سياف تعال
قال ليها مالك المدرب معاك
قالت ليه لالا تعال خليك جمبي عشان م اقع
مشى عليها مسكت فيه وهو بتكلم معاها إنه تمسك وين وتعمل شنو و...الخ وهي لسة مُصرة تتلايق وتصرخ..
نزلها وهو ركب وبقى متحرك بالحصان ماشي وجاي قال لينا شايفين ساهل الموضوع
قالت ليه بالنسبة ليك إنت لأنك م مخلي شي م متعلمة اما نحن لأ، سجل لي في النادي دة يا سياف ممكن؟
قال ليها طيب حاضر بس بداية الشهر كدة إن شاء الله
قالت ليه م حتسوقني بالخلا صح؟
قال ليها حصل مرة قلت ليك حاجة وم عملتها قالت ليه لأ
قال ليها طيب
طول الطريق وانا ساكتة
وصلنا البيت المغرب كان دخل، صلينا المغرب انا وهو مع بعض..
بعدها عملت حليب وشلت صحن الكنافة ودخلت بيه غرفتنا...
هو كان مشغل فيلم
قلت ليه بتكلم عن شنو الفيلم؟
قال لي قصته م واضحة للأن ي داب بادي
قلت ليه زيك كدة قصدك؟
عاين لي بإستغراب شلت كباية الشاي بتاعتي وعملت روحي بشرب وهو رجع ركز في فيلمه
نزلت ووقفت في الشباك وانا ماسكة كباية الحليب بتاعتي..
قال لي مالك؟
قلت ليه مالي؟
عاين لي لي ورجع كمل الفيلم بتاعه وهو ساكت
وقفت مسافة، طلعت من الغرفة مشيت صليت العشاء وجيت راجعة رقدتة وإتغطيت وطول الليل بتقلب وبتحرك..
فتحت عيوني لقيته ماف جمبي
حسيت إني عايزة اشرب موية طلعت من الغرفة لقيته نايم في غرفة المعيشة
إفتكرته في ركن الصلاة
دخلت المطبخ شربتة موية وطلعت مشيت عليه، ناديته يا سياف، سياف
رفع الغطى من وشه
قلت ليه مالك نايم هنا؟
قال لي ساي ماف شي
قلت ليه كيف ماف شي؟
قال لي شايفك م مرتاحة في الغرفة ف قلت ممكن كدة يكون احسن
قلت ليه إنت سألتني وانا قلت ليك م مرتاحة؟
سكتت
شلت كبايتي بتاعة الموية ودخلت الغرفة
بعد مسااافة
سمعته بقول شهد
سكتت م رديت عليه
رجع نادى علي يا شهد
رفعت الغطى مني وقلت ليه نعم
قال لي نتكلم شويه؟
قلت ليه عارف الساعة كم؟
قال لي م مهم الساعة كم المهم افهم السبب المخليك م تقدري تنومي دة، المشكلة شنو؟إتصرفت تصرف ضايقك قدام الناس، انا، لين، اهل البيت لو في شي بدر من زول قولي ما هو انا م حأعلم بعلم الغيب بس لما أعرف مالك حأعرف بقدر اعمل شنو
امحي مخاوفي طالمَا عندك القدرة في كدة...
مَا يُميز الحديث مَعك هو شعوري الدائم بأنني وجدت منطقة راحتي ومكان يشبهني تماماً .. أتحدث مَعك، كأنك كُل ما يُطمني بهَذا الوجود ف تهدأ نفسي من القلق وتزداد فكرة سلامي لك رُغماً عن كل شيء آخر ...