الفصل التاسع والأربعون
أرمي حمولك علي وم عليك بالباقي
بتردد قلت ليه اصلاً في وجودك انا م حاسة بأي حمول
بقى يعاين لي ويعاين للورد بدون م يسأل بس واضح إنه في طرف لسانه في كلام عايز يقوله
قلت ليه تايسون ادامز
مالو؟
الورد دة منه، كنت متوقعة إنه حأصبح ويدي مكبلات بالأصفاد ف حالياً بحاول استوعب إنه مرسل لي ورد
مديت ليه الكرت
قال لي م مكتوب إسمه متأكدة إنه منه؟
ركز في نهاية الكرت، هو م كاتب إسمه بس كاتب لي رقم لوحة العربية زي م انا عملت لما كتبت ليه رقمي في الورقة تحت كتبت ليه رقم لوحة العربية
وهو كيف عرف عنوانك طيب؟
بقيت اعاين ليه بتوتر قلت ليه م عارفة
وحيحصل شنو هسي؟
حأمشي اقابله في عنوانه المكتوب هنا في نوب هيل.
حتمشي؟
ايوا طبعاً لكن بكرة لأنه كاتب التاريخ مرفق مع العنوان وحتى محدد الزمن لو لاحظت..
لاحظت، وانا م قصدي متين قصدي متأكدة من قرار مشيتك ومقابلته دة؟ليه هو م يجي يقابلك؟
وهو بتكلم باب المكتب دق، مادلين جات داخلة قالت لي سيدة شهد عليك رؤية هذا، إنتبهت لوجود سياف قالت ليه صباح الخير سيدي
صباح النور مادلين
قلت ليها أخبريني ماذا هناك؟
قالت لي : هناك ما يجب عليك رؤيته، تعالي معي إلى غرفة المراقبة
طلعت معاها وصلنا الغرفة
قالت للولد المسؤول أيها الفتى هيا قم بتشغيل ذلك الفيديو
وقالت لي أنظري لهذا تم تعطيل الكهرباء بهذا الطابق عند الساعة الساعة ال 11:30 دقيقة في الوقت الذي كان فيه الحراس المناوبون بالطابق السفلي..
تم قطع التيار الكهرباء لمدة لا تتجاوز ال 4 دقائق فقط
وانظري لهذا الطابق المؤدي إلى السطح تم قطع التيار منه عند الساعة 11:35 دقيقة
وعودة التيار عند الساعة 11:40 دقيقة
وبعد 10 دقائق تم قطع التيار الكهربائي مجدداً من الطابق المؤدي إلى مخرج السطح، ومن ثم الطابق الثالث
طلبت من الولد يعيد المقطع
عاده لي للمرة التانيه
قلت ليه ممكن مقاطع كل الطوابق في الزمن دة بالتحديد
قال لي حسنا.ً
راجع معي مقاطع كل الطوابق وم كان فيهم حركة غير حركة بتاعين الأمن المسؤولين منها
طلعت من الغرفة وجات مادلين لاحقاني
قالت لي قطع للتيار الكهربائي بشكل جزئي وغريب من المبنى، واثار لهبوط مروحية على السطح واثار اقدام ماذا يعني هذا؟
يعني ان هناك شخص بهذا الطابق يمارس معنا لُعبة التخفي
ولكن سيدتي بحسب ما لدي من معلومات انه تم إخلاء غرف الطابق الخامس لأعمال تتعلق بصيانته وتم توزيع المسنين إلى طوابق أخرى
اعلم ذلك ولكن لم تبدأ به اعمال الصيانة بعد
للحظة سكتته و إتذكرت، الطابق الخامس؟
غرفة السيدة إيفا في الطابق الخامس، ممكن يكون الموضوع ليه علاقة بيها؟
مشيت بإتجاه المصعد كان لسة ي داب طالع وحياخد وقت على بال ما ينزل، مشيت على المدرجات ومادلين وراي بتسألني سيدتي اهناك مشكلة
قلت ليها سنكتشف هذا الان
كنت بإستعجال طالعة السلالم وهي وراي بتاخد نفسها بالعافية وبتلهث من السرعة الأنا ماشة بيها وبتحاول تصلني، قالت لي سأخبرك سراً، أشعر أنك تفعلين بي مالم تستطع صالات الرياضة والدايت والصيام المتقطع فعله، أشعر أنني افقد دهوني كلما قررت مرافقتك لأمر ما، اخشى ان استيقظ يوماً على رؤية جسدي مثلك تماماً
عاينت ليها بإستفهام
وقفت وهي بتقول لي اقصد رشيق سيدتي
واصلنا مشي لغاية م وصلنا الطابق الخامس وصلت غرفة السيدة إيفا إتلفتة وراي وانا عايزة اقول ليها المفتاح لقيتها على بعد مسافة مني واقفة وبتاخد نفس
سألتها : مادلين هل تم تسليمك النسخ الإحتياطية الخاصة بمفاتيح الغرف؟
اجل سيدتي إنها بحوزتي، جات بإستعجال ومدت لي المفاتيح وقالت لي هذه هي النسخ الخاصة بالطابق الخامس
بقيت افتش بين المفاتيح على المفتاح العليه رقم الغرفة لغاية م لقيته
فتحت الباب ودخلت وبقيت أتلفت حواليني
الغرفة كانت شبه مرتبة زي م كانت
لما وصلت النص لاحظت لقزاز واقع الأرض وشي مكشوح
نزلت وبقيت اعاين للمكشوح في الأرض كان رمل
شلت جزء من القزاز في يدي
مادلين قالت لي ما هذا؟
قلت ليها تبدو ك ساعة رملية
أهذا يعني انه حقاً ليله البارحة كان لدينا زائر؟
عاينت بجهه الخزانات بتاعتها كانت شبه فاتحة..
قلت ليها زائر لديه ما يبحث عنه، شيء مهم للحد الذى جعله يأتي بمروحيه لأخذه
مشيت على الدرج وفتحته فعلاً كان مُقلب
فتحت الأدراج التحته كلهم كانو بنفس الشكل..
مشيت فتحت الدولاب بتاعها كان في حالة فوضوية، بقيت اعاين فيه هي ممكن تكون مخليه شنو مهم في الغرفة للدرجة دي؟
مادلين فتحت الحمام
بعد مسافة جات طالعة وهي بتقول لي لا شيء هنا
قلت ليها وهنا ايضاً لا اثر لشيء يذكر سوى هذه..
تلفوني ضرب لقيته سياف
اول ما رديت: شهد وين إنتِ؟
جايه عليك
قفلنا الغرفة ورجعنا المكتب لقيت سياف طالع
اول ما شافني قال لي خير في شنو؟
ماف شي غير إنه الطريق بتزيد تعرجاته وعوجاته وخنادقه وغموضه المخيف كل شويه..
طيب في شي انا بقدر اعمله؟
لأ، انسى، حتمشي؟كنت بتقول في شنو قبل ما اطلع؟
انا ماشي لكن نتلاقى بعدين حاجي اسوقك ونتكلم في الكنت بقول فيه تمام؟
طيب تمام
يلا في امان الله
عديت اليوم بين حيطان المكتب الأربعة..
لما دوامي إنتهى إتصلت على سياف وسألته حتجي علي ولا أطلع البيت لأني مرهقة
ما تطلعي جاي عليك انا
إستنيته لغايه م إتصل وقال لي وصلت يلا تعالي منتظرك
طلعت عليه اول م ركبت العربية قلت ليه اقصى طموحاتي اللحظة دي اصل البيت وانوم بس..
قال لي طالعين بدري، حتنومي بس م هسي..
قلت ليه بحيل مهدود يا سياف انا مرهقة جد كدة
تمام يا شهد بس رافقيني في مشوار صغير وحنرجع البيت
طيب
ربط لي حزام الأمان وإتناول كيس من الكرسي الورا وقال لي م متأكد إتغديتي ولا لأ بس عزمت نفسي معاك غداء
كان جايب بيتزا وبيبسي
قلت ليه والله جعانة كنت
يلا طيب خلينا ناكل ونحن في الطريق
ونحن ماشين بعد مسافة قال لي م منتبهه لي شي؟
كنت باكل قلت ليه زي شنو مثلا؟ً
قال لي كدة المهم ما منتبه؟
بقيت اعاين ليه قلت ليه ما فيك شي متغير ونفس العربية بقيت اعاين حوالي ماف شي
شلت علبة البيبسي وانا بشرب وبعاين برة القزاز للحظة قلت ليه الشارع، قصدك الشارع صح؟
الشارع دة إسموو شارع شنو اللهم صلي وسلم وبارك على سيدنا محمد
عليه الصلاة والسلام، شارع لومبارد
قلت ليه لومبارد صح، الله، بقولو إنه دة اهم معالم سانفرانس بعد جسر البوابة الذهبية، سمعت بيه بس ما حصل جيت مارة بيه ممكا سكنت هنا، يمكن لأنه مسافته طويلة شويه او يمكن لأني مقفولة ومن الشغل للبيت وم عندي اي نشاطات بقوم بيها ولا حتى عندي شغف اعرف المدينة دي فيها شنو اي نعم بسمع بمعالمها سمع بس م حاولت اشوفها، نزلت القزاز بقيت اعاين في الشارع ومطلعة يدي، الطريق كان متعرج كدة وحواليه او على جوانبه في شجر شكله حلو شديد، والبيوت الحواليه شكلها غريب ومميز
قلت ليه مرة شفته في الصور بس م إتوقعت إنه يكون في الواقع رهيب كدة بختهم الناس الساكنين في البيوت دي
قال لي عارفة إنه الشارع دة إتعمل بسبب هضبة كانت مايله بزاية 27°و مسببة عائق للسكان السايقين والبمشو برجولهم صعوبة في الطلعة والنزلة، عشان كدة قامت بلدية المقاطعة عملت الشارع المتعرج النازل لتحت دة على حافة الهضبة
قلت ليه وم كانو متخيلين إنه ممكن يكون واحد من بين اهم المعالم في الولاية واشهر الشوارع في العالم
قال لي بربط او بتقاطع مع شوارع ومعالم كتيرة مهمة في الولاية والأهم من كدة بنزلك في اهم معالم سانفران جسر البوابة الذهبية ..
اخدنا الوقت ونحن ماشين وانا بعلق كل شوية على حتة وهو بحكي لي عنها لغاية م وصلنا الجسر،
قال لي وصلنا مع الغروب
نزلنا ووقفنا قدام العربية وبنعاين بإتجاه غروب الشمس قلت ليه هو دة مشوارك المهم ولا إنت تُهت؟
قال لي لا ما تُهت، بس حبيت اقضي معاك شوية وقت بدل ما نرجع البيت وتنومي وإنتِ زهجانة
قلت ليه أعتبره موعد بدون مناسبة؟
قال لي إنتِ مناسبة كافية
سرحت فيه بعد ما قال كدة وفي لحظة إنتبهت، قلت ليه خت في بالك المرة الجاية الموضوع حيختلف وانا الحأجيبك هنا
نزل شال حصى من الأرض وقال لي وانا موافق من هسي..
قعدنا واخدنا الوقت ونحن بنتونس وللأمانة بقى يخوفني إحساس "الونس" معاه، كنت مرة اسمعه وارد عليه ومرة اسرح وهو بتكلم
الزمن عدى وقررنا نرجع
ونحن في طريق الرجعة قلت ليه عارف يا سياف م قادرة اشرحها ليك كيف بس عموماً شارع لومبارد دة متعرج ومليان عوجات شبه حياتي
ضحك، قال لي بس رغم التعرجات دي كلها الواحد وهو فيه بستمتع بالرحلة من كمية الحاجات البمر بيها وم بحس بإستياء من كترة التعرجات دي، ولما تصل نهايته وتلقى نفسك في جسر البوابة الذهبية بتحسي إنه مسافة ال 400 متر دي كانت عشان حاجة بتستحق فعلاً
هو شبه حياتي من حيث التعرجات الفيه بس هو حواليه في الأسباب البتخليك تستمع بالرحله المناظر والبيوت المبهجة شكل الطريق نفسه
معناها إعتمدي العدمية يا شهد ما إلا تكون عندك اسباب تخليك تستمتعي بالرحلة
يعني مثلاً هسي نحن اوقات بنمشي نتسلق الجبال حجار ومعاناة ومشقة وشمس بس نفسياً لما اصل لقمة الجبل بكون مرتاح وحاسي بالرضى رغم إنه ماف شي مستنيني على قمة الجبل بس الواحد بحس إنه إتغلب على نفسه وعلى مخاوفة
ضحكت وقلت ليه لا ما هو إنت إنتحاري لكن وبالك واسع وعندك قوة تحمل انا اخلاقي يا دوب على قدري
وإنتِ قدرك عالي دة الشي الأكيد
بقت في لحظة صمت ما بينا بس اول مرة احس إنه في لغة إسمها لغة العيون سائدة على كل اللغات
سادت لحظة الصمت ما بينا لغاية م وصلنا البيت
قال لي وصلنا
قلت ليه شكراً
على؟
على كل شيء ماف شي محدد
عارفة يا شهد ليه بحب رفقتك؟ لأنه بتخليني في حالة إنعزال ويقين بإنه الجاي من حياتي حيكون أحن من كل توقعاتي
قلت ليه بإستنكار انا؟
قال لي قبل كم شهر كنت مزحوم بخطط كتيرة شديد وجايط بس خططي كلها كانت في حدود الشغل، حالياً بقيت مؤمن تماماً إنه خططنا ما بتسوى شي قدام خطط ربنا سبحانه وتعالى
ضحكت وانا بقول ليه مع إنه ما فهمت بس شكلو كلام حلو
رجعت سالته كلام حلو صح؟
ضحك قال لي يلا ي شهد انزلي وادخلي البيت نومي
❖
السودان/
مافي طلعة من البيت يا رفيدة رجعي الملابس دي الدولاب
ما اول مرة يطردني يا امجد انا لو م عمي عبدالله وعمتي سميرة ماف سبب بقعدني في البيت دة الوقت دة كلو اصلا، واناً كم مرة بقول ماشة بتقولو لي لأ وبتضربو لأمي وأبوي بتتكلمو معاهم وبقعد، الله م كتر إلا الداخليات في الخرطوم دي..
وهسي عشان عمك عبدالله وعمتك سميرة حتقعدي، في بيتنا دة معروف شهاب اخوي دة اروش وطالع زكاة ساي ما تشتغلي بيه، بس برضو يا رفيدة إنتِ غلطانة، انا عارف إنك معتبرانا اخوانك وم بترضي فينا قول بس برضو الدم بلغي اي غلط من الطرف التاني، انا سامع هي كانت بتقول في شنو وكان تفت في وشي عديل ما برفع يدي عليها لأنه امي الله يرحمها زمان كانت بتقول لينا البضرب ليه مره بكره بجي البضرب اخواته وبناته ويهينهم ليه، تاني شي لأنو راجلها قدامها م إحترمتو تفتكري الضرب حيخليها تحترمني انا؟
م إلا يخليها تحترمك يكفي جداً إنه تبلعها لسانها عشان كل م تتذكر تفتحه تتذكر لسانها دة عمل فيها شنو
عموماً يا رفيدة هسي الموضوع دة إتقفل وم عايزو يطلع من بيناتنا لا خالتي تعرف ولا شهد، والشنطة دي زي م قلت ليك مكانها الدولاب إنتِ وشهد واحد و..
اثناء ما هو بتكلم جاتو مكالمه..
ألو..
ألو السلام عليكم
يا امجد كيفك
الحمدلله بخير
معاك سندس يا امجد
يا سندس كيفك تمام وكيف اخبارك وخالتي وطارق كويسين؟
الحمدلله كويسين
لحظة صمت وصوت بكاء
سندس ؟؟
لكن انا ما كويسة يا امجد، ما كويسة نهائي
خير إن شاء الله مالك يا سندس؟
ما عارفة، م قادرة افهم الحاصل شنو، طارق فجأة جا قعد معي وقال إنه اول م ألد حيطلقني، واصلاً عنده فترة معيشني في ضغط نفسي ومشاكل وجوطة من يوم عرسنا م شفته معاه يوم عديل، م مرتاحة انا نهائي، وعمتي من ناحية ضاغطة علي، وخيلاني بقولو لي م عندنا مرة بطلقوها تقعدي بس، إتصلت على امي وريتها قالت لي ماف زول بمسك ليهو عذبة، سمح انا اسوي شنو؟ اقول يا منو؟ امشي وين، تعبانة والله يا امجد وم عارفة اقبل على وين، وصلت الحد والله حاساهو حاقر بي وبذلني عشان عارف ما عندي البقيف فيني
تقبلي على وين كيف يا سندس؟ما عندك البقيف فيك كيف؟نحن م اخوانك؟بيتنا دة م إتربيتي فيه زيك زينا؟ حصل فرزناك من شهد؟
طارق خليني انا بتكلم معاه وافهم منه الحاصل شنو وم تخافي انا طول عمري كنت اخوك مشيت وين؟ اصلك م تتلفتي وم اسمعك تقولي الكلام دة تاني فاهمة ولا لأ؟
طيب حاضر
انا بتكلم مع طارق وبرجع ليك إن شاء الله، م تشتغلي بيه ركزي مع نفسك وصحتك بس الفترة دي على قدر ما تقدري
عليك آلله يا امجد إتكلم معاه انا م عايزة اطلق منه والله، والله عندي إستعداد أعمل العايزو بس يوريني هو مشكلتو شنو وليه بتعامل معي كدة، تعبت والله من معاملتو معي دي ابداً م اتوقعت في يوم يكون دة شكل العلاقة بيناتنا
سندس تعملي العايزو يعني شنو؟
طيب يا سندس إن شاء الله انا بتكلم معاه
امجد
ايوا يا عمتي
في زول في الباب
طيب دقايق
امجد اول ما فتح الباب
السلام عليكم ورحمة الله وبركاته يا إبني
اووو يا استاذي وعليكم السلآم مرحب مرحب
مرحب بيك يا ولدي عاش من شافك
والله يا استاذ يومي بقول عايز امشي عليك م بلقى وقت بقول بكره وبرضو بكره اليوم بمشي إتفضل
والله يا إبني عاذرك اليوم بقى ثواني وينتهي
إتفضل يا استاذ دقايق بس وأجي عليك
اخدته الأستاذ للصالون وطلعت منه وانا بنادي يا رفيدة، رفيدة..
ردت علي عمتي: اي ي امجد
يا عمتي عليك الله جيبي مويه وعصير برتقال خالي سكر تمام؟
منو الجا؟
استاذ محمود الصحفي متذكراه؟
ياخي حبابو والله، خلاص كويس هسي بجهزو واجيبو ليكم، اسوي ليكم شاي؟
ممكن برضو
رجعت الصالون وجددت ترحيبي بالأستاذ..
لازم كان اجيك هنا لأنه المكتب انا م بضمن النفوس الفيه صراحة، والملف الإنت طالبو مني دة تفتيشه م كان ساهل ابداً أرهقت حد اليأس حتى قدرت اجمعه من هنا وهناك..
لكن خليني احذرك الموضوع دة حيفتح عليك ابواب كتيرة شديد إنت يمكن..
يا أستاذي عارف انا، وعارف هسي في الوقت الحالي بفتشو وراي وبحاولو يعرفو انا بعمل في شنو عشان كدة طلبت منك إنت الحاجة دي وم حاولت اعملها بنفسي..
انا حادرس كل الملفات والقضايا الكانت مُضلله مجتمعياً دي م حتوقف على قضية وفاة امي بس ويا جبت اخرهم يا جابو اخري..
انا معاك في كل الأحوال يا ولدي لو إحتجت حاجة بس إتصل علي بالرقم الأديتك ليه وم تتصل برقمك، وكمان نسيت اهم حاجة جيتك عشانها، في معلومات بتأكد إنه العامل الكان متهم بقضية قتل اختك والوالدة الله يرحمها عفت عنه وأسقطت عنه التهمة هو في امريكا الأن، غالباً بعد ما طلع من السجن قدرو يسفروه بطريقة غير شرعية وياها شغلتهم في كل الأحوال ما صعبة عليهم ومقابل مغري جداً مقابل سكوت الولد عليها..
كنت بفتش عليه وبحاول اصل ليه ظناً مني إنه حألقاه هنا..
للأسف في امريكا الولد والمعلومة دي وصلت ليها من اقاربو ومؤكدة 100% لكن م فات شي اختك مش في امريكا؟ممكن نحاول نعرف وين هو في امريكا وتصل ليه هي
لالا، الموضوع دة بيني وبينك بس ما عايز ادخل اي زول في تفاصيل القضية دي بالذات شهد اختي دي، انا إن شاء الله بحاول بطريقة ما أصل ليه ماف مشكلة..
❖
امريكا/سانفرانسيسكو
حتمشي بكرة؟
بكرة شنو لو علي ملابسي البجهز فيها دي هسي ألبسها واقوم امشي ليه..
كنت بطلع في ملابسي في الدولاب، إتلفته عليه لقيته بعاين لي كأنه عايز يقول شي
قلت ليه سامعاك انا يلا قول الكلام الفي لسانك
قال لي لا بس مستغرب شويتين
قلت ليه من شنو؟
قال لي حركة الورد مثلاً
وانا ماسكة الملابس في يدي بقيت اعاين ليه
قال لي يعني غريبة شوية صح؟
قلت ليه الغريب شنو م فاهماك؟
ليه زول ممكن يرسل دعوة ب ورد لونه أحمر؟
حسيته مغيوظ كدة وفي ريحة غيره فايحه منه بس بحاول يداري عليها وبلف وبدور
فعلاً ليه؟كلامي كانت معاه إبتسامه مرسومة على شفايفي
إتخطاني وفتح الدولاب شال ملابسه وقال لي عموماً اعملي حسابك شديد ودخل الحمام..
مشيت وراه قلت ليه انا نفسي افهم خايف من شنو إنت؟
قال لي المخوفني يا شهد عدم خوفك على نفسك دة..
وقف قدام المرايا وفتح الخزانة طلع حاجات الحلاقة وانا واقفة بعاين ليه، قال لي بحاول اوصل ليك إنه البلد دي ما بالسذاجة الإنتِ بتتصرفي بيها دي..
قلت ليه إنت خايف ألبسك مصيبة إنت في غنى عنها وتدخل في هاء ولاء؟
عاين لي وهو ساكت..
قلت ليه من ناحيتي م تخاف انا بعرف اتحمل نتيجة ومسؤولية مصايبي براي ولو حصل لي شي إنت اخر زول حأفكر فيه تمام كدة؟
قال لي البتشوفيه مناسب معاك أعمليه يا شهد
اصلاً حأعمل المناسب معي من غير ما تقول
طلعت غرفة المعيشة شغلت التلفزيون ونمت في مكاني، صحيت على حركة فتحت عيني لقيتها لين بتقول لي نايمة في الكنبة الضيقة دي مالك؟
قلت ليها صباح الخير، كنت بحضر بس وشالتني نومة
سياف طلع بدري حتى م إنتظرني قال لي اطلعي بالمترو مع شهد لكن شكلك حتتأخري انا طالعة
الساعة كم هسي؟
الساعة ماشة ل 9 ونص
بخلعة قلت ليها 9 ونص؟
قالت لي ايوا مالك؟
عندي مشوار بس لازم اجهز ليه
طيب انا حأطلع لأنه الزمن وكدة
طيب تمام
كنت مستعجلة وانا بجهز لأني لازم اطلع الصرافة عشان احول لأهلي وبعدها امشي الدار حتى اطلع لمقابلة تايسون ادامز..
شلت التلفون بتاعي وإتصلت على رفيدة..
شهود كيفك
حبيبي بخير وإنتِ كيفك وكيف ناس البيت؟
الحمدلله كويسين م عندنا عوجة
صوتك مالو عندك إلتهاب ولا شنو؟
لا ابداً نعسانة بس عشان كدة
طيب يا رفيدة عايني انا طالعة احول ليك هسي حيتواصلو معاك عشان تستلمي
طيب حاضر
المرة دي زايدة المصاريف شوية شوفي الناقص شنو في البيت جيبيه لغاية م ربنا يسهل احول ليكم تاني
حاضر، ماف شي ناقص والله يا شهد امجد م مقصر لقى ليه ركشة كدة اظنها حقت صحبو شغال بيها اليومين دي مطلع منها مصاريف
طبعاً عربيتك شهاب مستلمها على حسابه وباع عربيته كلمتك انا صح؟
م مستغربة اصلاً من زمان هو كان عايز يبيعها حتى وانا سايقاها
والله يا شهد شهاب اخوك دة غايتو م عارفة اقول ليك عليه شنو بس
مالو عمل شنو كمان؟
لالا ماف شي عموماً كدة بس
ما تشتغلو بيه إنتو بس تمام، رفو حبيبي انا طالعة مستعجلة عشان مفروض استعجل في الصرافة واللحق الدوام، برجع ليك بعدين تمام؟
في طريقي للصرافة جاتني مكالمة من صاحب مستر جو..
اول ما رديت عليه قال لي متأكد انك سعيدة بسماع صوتي..
لا اعتقد انك محق في ذلك ولكن يبدو ان لديك ما ستقوله، اخبرني ما الأمر
ما يعجبني بك انك حادة الطباع
إنها صفة مكتسبه من صديقك
يحب الإلتزام بالمواعيد، قليل الكلام، يحرك صوابعه عند الكذب وتحمر انفه وجفنا عينيه عندما يكون متوترا، يدخلً يديه داخل جيبه عندما يريد إظهار عدم أهمية الأمر بالنسبة له، عندما يغضب تحمر اذنه وعنقه...
لحظه! لم أفهم ما تقول..
صفات تايسون ادامز التي يجب عليك التركيز عليها عند مقابلته لتدارك الموقف
ومن اين علمت انني سأقوم بمقابله تايسون ادامز اليوم؟دعني احذر هل تقوم بتعقبي؟
تخونك الذاكرة دوماً، لا تنسي انني من قمن قمت بتدبير مقابلتك معه المره السابقة..
تقصد قمت بإختطافه ما علاقة هذا الأمر بذاك؟
لا فرق بينهما في الحالتين تعتبر مقابلة، ولا علاقة بينهما ايضاً فقط اقوم بتنبيهك، ربما تكون ذات فائدة لكِ
تايسون بارع للغاية في التلاعب والمراوغة لذا كوني حذره
حسناً ولكن هل، اعني..
الشيء الوحيد الذي سأضمنه لك من هذه المقابلة هو خروجك سلامة من هناك، ، ستكونين بخير
اما فيما يخص ما انتِ ذاهبة لأجله لا اجوبه لدي هذا الأمر يتوقف عليك..
حسنا.ً
قفلت الخط وانا حاسة إنه الأدرينالين بقى يجري في دمي بعد ساعات طويلة من التفكير المتواصل، كلامه الأخير ده هو الكنت محتاجة اسمعه، م عارفة جايب الثقة دي كلها من وين لكن العارفاه إني كنت محتاجة اسمع الكلام دة
خلصت موضوع التحويل في الصرافة ومشيت الدار..
وانا داخله لاحظت ل مادلين قاعدة في الحديقة وسرحانة ويبدو عليه الحزن واليأس على غير عادتها..
مشيت عليها وقلت ليها مادلين
إنتبهت وقالت لي سيدة شهد، مرحباً
أأنتِ بخير؟
نوعاً ما بخير
ما الأمر اخبريني اهناك شيء علي معرفته؟
لا، الأمر يتعلق بالشركة التب نعمل بها، منحتنا الشركة انا وفريقي فرصة 6 أشهر فقط لإثبات جدارتنا وإستحقاقنا لإستمرار العمل معها وإلا سيقومون بفصلنا، تخليت عن اشياء كثيرة وغيرت الكثير من العادات السيئة من اجل هذا العمل، الان لا اعلم ما الذي علي فعله حال تم فصلي انا واصدقائي..
ما هو النظام المتبع لدي الشركة وكيف يتم تقيم الفريق على أنه يستحق مواصلة العمل بشركة التأمين ام لا، هل يتم فصل الفريق بأكمله؟
نعم يتم فصل الفريق بأكمله، إنه بند من بنود العقد
ولكن مادلين هذا ليس عدلا..ً
أعلم وهناك الكثير من البنود التعجيزيه ولكننا نخضع لها لأننا بحاجة للعمل، لا أريد ان ينتهي الأمر بي بالعمل في المطبخ، ليس لدي شغف به لذا..
حسناً اخبريني ما الذي يمكنني ان أقدمه لمساعدتكم حتى لا يتم فصلكم؟
يجب ان نتحصل على تقرير شهري وتقيم من الجهه التي سنعمل بها، المشكله انه سيتم تبديلنا الشهر المقبل من هنا بفريق اخر، ويتم نقلنا لمؤسسة أخرى وهكذا سيتم نقلنا كل شهر لمؤسسة جديدة وهناك نقاط إذا لم نتحصل عليها من جميع المؤسساات في التقيم لا يمكن ان..
ما كملت كلامها وهي بتعاين لي..
لم يكن لدي علم بهذا كله، لا اعلم م الذي علي قوله الان دعيني ارى ما يمكنني فعله سأفعل ما بوسعي لتقديم المساعدة..
شكراً لك
أهناك جديد بشان ما حدث الليله السابقة؟
لا ولكن هناك امر ما، سأخبرك به لاحقاً ليس الان..
حسناً ساكون بإنتظارك.
❖
السعودية//السودان
وبعد تطلقها وترجعها السودان حيحصل شنو؟او الحيتغير شنو يا طارق يا ولدي؟
ماف شي حيتغير يا خالتي بس انا كدة حأكون مرتاح من حتة إني م ظالمها معي وحابسها بين اربعة حيطان
إنت كدة ظلمتها وم راعيت حتى لجناك الجاي في الطريق وم عنده ذنب دة
انا لو خليتها معي في البيت يا خالتي حاكون ظلمتها وظلمت الولد دة، انا م قادر اقدم ليها شي من ناحيتي
ياخي اصبر، نزلها السودان فترة ارتاح وهي ترتاح م إلا طوالي تتطلق منها، البت شافعة الله بسألك منها يا طارق يا ولدي
خالتي، في حاجات كتيرة انا حكيتها ليك قبل كدة، انا جد قدر م حاولت اتجاوزها لقيت نفسي م قادر اتجاوزها إنتِ ياخالتي الوحيدة الأنا حاكي ليك يمكن وقادرة تفهميني..
طارق قرار زواجك منها دة كان قرارك في الاول والأخير، وانا سألتك لما جيت تتم العرس حتمسكها مسكة رجال؟
قلت لي اي يا خالتي
انا قادرة افهمك لكن إنت م تنسى إنه إنت إتجاوزتة نقطة إنه امجد كان عايز البت دي من بدري شديد وكان بجهز في نفسو ومنتظرها تكبر وتدخل الجامعة حتى بعداك يتقدم ليها، رغم إني كلمتك إنه البت دي امجد عايزها وم موري زول غيري حتى شهد اخته م مكلمها عشان سندس م تعرف وتتعلق بيهو ساي وتنشغل من قرايتها وهو شايفها صغيرة وم معروف البحصل لقدام شنو حسب طبيعة شغلو وإنت عملت شنو رغم معرفتك بالموضوع دة؟
يا طارق الإنت بتعملو مردود ليك هسي بسببك لا إنت عرست شهد، ولا إتهنيت بي عرسك من سندس ولا خليتها ل امجد يتهنى بيها، الشربكة دي كلها سببها إنت يا طارق وبدفعو تمنها كلهم ف عشان كدة اصلاً م تتكلم عن إحساسك لأنك م راعيت لأحاسيس غيرك وإنت بتتغابى وبتتحامي وم سمعت لزول عشان تتريس، اليوم كل الناس دي في حفرة اليأس دة بسببك إنت ما غيرك ف م اقول لي انا ما قادرة تفهميني لأنه الإنسان الأناني يستحيل يتفهم ..
❖
سانفرانس /Us
الساعة 3 ونص جات ودي كانت مواعيد الطلعة بتاعتي، كنت طول اليوم بعاين للتلفون على امل إنه سياف حيتصل او يرسل رسالة حتى م حصل كدة رغم معرفته بإني اليوم عندي شنو،
ركبت العربية وقبل م اتحرك للحظة قلت اتصل عليه او ارسل ليه رسالة اقول ليه فيه إنه طالعة خلاص ماشة اقابل الراجل، بعدين إتذكرت النبرة القلت ليه بيها:
اصلاً حأعمل المناسب معي من غير ما تقول..
طردتة فكرة إني اتصل او ارسل من راسي وشلت تلفوني وإتصلت تلفون..
مادلين اين انتِ الان
نعم سيدة شهد، انا بالطابق الثالث
انتظرك امام البوابة، هيا تعالي
ماذا حدث، أهناك مشكلة؟
لا فقط تعالي، انا في إنتظارك..
في اقل من 5 دقايق جات قالت لي سيدتي..
هيا اصعدي..
ركبت وقالت لي إلى اين سنذهب؟
لدي مقابلة مع شخص ما، لا مشكلة لديك بمرافقتي أليس كذلك؟
لا سيدتي من دواعي سروري
لبست حزام الأمان وقالت لي فقط سأتصل بمن معي من مشرفين لتولي امر العمل إلى حين عودتي..
هاي إتش، ساغيب لقليل من الوقت، تولى امر توجيه الأخرين إلى حين عودتي حسنا؟وايضاًً لا تدع ناظريك يغيبان عن ما اخبرتك به، اخبرني حال حدث شيء ما، ، لا لن اتأخر، حسناً إلى اللقاء...
ونحن في الطريق قالت لي هل نحن في طريقنا إلى نوب هيل؟
نعم نحن في طريقنا إلى هناك
ااااه اعشق هذا الحي وشوارعه، ليتك اتيتي بطريق لومبارد، هو خاص بالطبقة الغنية بالطبع، إحدى صديقاتي تسكن هنا..
وهي بتتكلم إتذكرت سياف امبارح وهو ماسك يدي في العربيه وبحكي لي عن طريق لومبارد المتعرج، للحظة سرحت مسافة بعدها إنتبهت لصوتها وهي بتقول لي انظري لهذا..
وصلنا العنوان ونزلنا كان في حارس في البوابة، قلت ليه مرحباً
قال لي مرحباً بكن
انا هنا لمقابلة تايسون
عاين لي وعاين لي مادلين
قلت ليه إنها صديقتي
حسناً تفضلي
المدخل بتاع البيت كان عبارة عن مساحة خضراء واسعة..
مادلين قالت لي يا إلهي، إنه منزل جميل للغايه احببته
فجاة ظهر تايسون ادامز في وشنا وهو ماسك عصا او مضرب في يده كان بلعب غولف ولابس نظارة، لما إنتبه لينا وقف..
مشينا عليه وفي نفس الوقت هو كان متحرك جاي علينا مرحباً ايتها السيدات
مرحباً سيدي..
مديت ليه يدي وبتردد قلت ليه انا شهد
وهذه صديقتي في العمل مادلين
مد يده وسلم علي وقال لي لم يكن لقاءنا الأول جيداً لذا مرحبا بك سررت بقبول دعوتك
وانا ايضا..ً
كنت مركزة في حركات جسمه وصفاته القالها لي صاحب مستر جو
اقصد انا ايضاً سررت بدعوتك لي
سلم على مادلين وقال لينا تفضلا بالجلوس
كان عنده جلسة في نص الحديقة دي..
شويه كدة جات شغالة قدمت لينا مويه
وقبل ما تتحرك قال لينا قهوة؟
مادلين قالت ليه لا، انا لا اشرب الكافيين كثيراً
قال لي وأنتِ؟
هزيت ليه راسي بمعنى نعم
قال للشغالة 2 قهوة، وعصير..
الشغالة وهي ماشة مادلين قالت ليها خالي سكر..
الشغالة قالت ليها حسناً
منزلك جميل للغاية سيدي، يبدو انك محب للزرع والطبيعة
اشكرك، نعم احب الزرع كثيراً
كل خوفي من مواضيع مادلين الما بتخلص خصوصاً إنه صاحب مستر جو قال هو قليل الكلام
عاينت ليها وملامح وشي كلها رجاء إنه ما تتكلم كتير..
وانا بعد في الثواني جات الشغالة قدمت لينا القهوة وقدمت لي مادلين العصير..
كان في حالة بتاعة صمت كدة حاصلة،
مادلين وقفت وقالت لينا سأترككم قليلاً هل يمكنني التجول هناك سيدي؟
قال ليها لكِ هذا
مشت وفضلنا نحن ساكتين للحظات قليله بعدها قلت ليه لم يكن لقاءنا المرة السابقة موفقاً ولكنني وضحت لك الأمر، اردت مقابلتك لأن الأمر يستحق سماعه، دعني أعرفك بنفسي للمرة الثانيه انا شهد، اعمل بأحد دور الإيواء ب سانفرانسيسكو
أردت مقابلتك لأن الأمر متعلق بحادثة إختفاء سيارة خاصة بك بداخلها إبنتك والسائق الخاص بها
فجأة ملامح وشه إتغيرت قال لي
إبنتي؟هيا اخبريني ما الذي تعرفينه؟
هناك امور كثيرة تتعلق بهذا الأمر ولكن بدا الأمر المتعلق بإبنتك بعد وفاة السيد جو، كان احد المسنين بالدار وبعد وفاته...الخ
اخدتة وقت وانا بتكلم معاه، في امور كلمته بيها وجزء منها خليته مبهم وجزء إتكتمت عليه
في الأخر قلت ليه الأمر لا يتعلق بمعرفة أين هي السيارة الان لأن معرفة موقع السيارة لا يقود إلى إبنتك إن وجدت بعد كل تلك السنين، إنه طرف خيط لعقدة كثيرة التشابك والتداخل مع بعضها البعض، ارجو ان لا تسيء فهمي
يمكنك إستخدام هاتفك الان والبحث عن وفاة السيد روكفلر، ستجد انه توفى بداخل ذلك المكان محاولاً حل ذلك اللغز لم تكن محاولة بائسة منه لقد كان الأمر مجدياً نوعاً ما والأن الأمر لا يتوقف على معرفة أين هي أبنتك فحسب، هناك مئات المسنين بداخل ذلك المكان هم ليسو بمأمن لا أستطيع إخبار الشرطة لأنني لا ارغب بمعرفة من بالسطح، هناك من في القاع وهم الأسوأ..
لقد توفى السيد جو محاولاً حل هذا اللغز، والان هناك مسنه اخرى بغيبوبة، لقد حاولو قتلها بجرعة زائدة..
لم يترك لي السيد جو سوى فلاش به معلومات مبهمة من خلاله إستطعت التوصل للحادثة المتعلقة بإبنتك..
أخبرك بهذا لأن الأمر يتعلق بك على المستوى الشخصي سيدي، والان بات يتعلق بعائلتك
اقصد بعائلتك إبنك وزوجته
لا اعرف ما الذي علي قوله ولكن زوجة إبنك من المرجح ان تكون..
لاحظت إني إتكلمت كتير، وحسيت إني ما قادرة اصيغ الكلام وهو كان بكامل هدؤه وثباته، ومستمع جيد..
لما وصلت للحتة بتاعة زوجة إبنك من المرجح أن تكون..
وقف على حيله وقال لي تعالي معي
قمت ومشيت وراه
دخلني بيته وطلب مني اقعد في غرفة المعيشة
وهو إختفى من جمبي لدقايق وانا بعاين حوالي
للحظه عيني وقعت على حائط فيه صور كتيرة
وقفت ومشيت على إتجاها
كلها كانت صور مختلفة لطفلة
بقيت واقفة وبعاين ليها
هذا الحائط كل ما املك من اثر إبنتي، كانت فتاة جيدة للغاية، من إختطفها اراد قتلي ولكن بطريقته وقد فعل..
انا اسفة للغاية لأجلك
تفضلي معي
رجعنا مكان كنت قاعدة
كان جايب لابتوب وجايب جمبة زي دفتر كدة كبيير وقديم شديد شكله ومغبر
شال الدفتر ومداه لي وقال لي تفضلي، المنزل مغلق منذ فترة طويلة لذا هو متسخ قليلاً
فتحته كان عبارة عن ألبوم صور
بقيت أقلب فيه وانا اثار الدهشة بتحيط بملامح وشي..
بعد ما خلصت وقفلته..
قال لي إنهما ليسا مجرد شخصان عاديين، إنهم صديقا الطفولة، لقد ترعرنا سوياً إلى ان تخرجنا من الثانوية وبعد ذلك كل منا سلك طريقة
اصبح جو صحفياً إسقصائياً
وادريان إنتقل إلى شيكاغو
اما انا ف اصبحت سياسياً
وإجتمعنا مرة اخرى على قضايا المجتمع، وقربتنا قضية إختفاء إبنتي، وتسببت في تفريقنا ايضا، لقدً تسببت في موت احدهما وإدخال الاخر بمصح عقلي
فتح اللابتوب
وشغل لي تسجيل صوتي محتواه : ابي انا بخير..
هذا اخر تسجيل صوتي لإبنتي تم إرساله لي في اول يوم تم إختطافها فيه، امضيت كل هذه السنين استمع إليه لخلق شعور وهمي بالإطمئنان ثم اعود للواقع..
عجز محققين العمل الخاص والكثير من الجهات دون ذكر اسماء عن كشف ما يدور حول ذلك المكان، جُل ما يمكنني قوله لك ان القاع لا طريق للعودة منه، جميع من حاولو القفز به لم يعودو
إستمعي لهذا
هذا كان اخر تسجيل لصديقي جو قبل وفاته بيوم وهو يخبرني فيه انه على وشك الخروج من ذلك المكان ولكن لديه ما يبحث عنه
علمت حديثاً من ادريان انه تمت سرقة بعض الأشياء منه وضمن المسروقات كان جهاز الحاسب الخاص به و إحدى الفلاشات المهمة التي عمل كثيراً على تجميع ما بها وفقد كل شيء قام بجمعه
هذه كانت اخر صورة قمت بإلتقاطها له ذات مكالمة لنا مع بعضنا البعض، وعندما اخبرته بملاحظتي عن ذلك الشيء الذي خلفه قال لي ممازحاً إن مت سترثه عني في جميع الأحوال إنه اغلى ما املك وذا اهمية بالنسبة لك مثل ما هو مهم بالنسبة لي الان لم تمضي ايام قليله وقام بإهدائي واحد مثله واخبرني ان شكلها والتأمل بها يقلل الإجهاد ويكافح الإكتئاب ويقلل الألم ويخفض ضغط الدم المرتفع وتحث على السلام والإتزان في حياتك، أضمن لك انها ستحقق لك السلام والإتزان في حياتك ذات يوم..
لقد سخرت من حديثه ذلك اليوم وندمت على سخريتي منه لم يبقى منه سوى هذا الشيء وها هو الان في هذا الحائط كما ترين..
كانت مانديلا او حاجة اشبه بالمانديلا فيها حاجات كتيرة زي سلاسل نازلة منها، شكلها حلو شديد مشغولة بالخيط والخرز..
شال الألبوم واللابتوب وإستأذني ورجع..
وانا واقفة بعاين للحاجة الشبه المانديلا المعلقة في الحائط جمب صور بته دي جات مادلين قالت لي سيدتي هل إنتهت مقابلتك؟
قلت ليها ليس بعد هل حدث شيء ما بالدار؟
لا، ليس هناك شيء
وقفت جمبي وبقت تهاين
قالت لي منزله جميل للغايه،
اظن انني رأيت مثل هذا الشيء بمكان ما
قلت ليها تسمى مانديلا تتم خياطتها يدوياً كما ترين..
لا أعلم ولكن ليس بغريب علي شكلها، رأيت مثلها تماماً ولكن اين؟..
إنتهى كلامنا برجعة الراجل..
قال لي ينبغي ان يطول حديثنا اطول من ذلك ولكن يجب ان اذهب الأن..
قلت ليه ولكن سيدي أهم ما اردت الحديث به هو..
اعلم ما الذي ترغبين في قوله، لا اعلم تماماً من هي لأنها لم تترك وراءها ما يمكن معرفته حتى الان، ولكن ساخبرك امرين الأول إنها فقاعة في ذلك البئر، الثاني سنتحدث به في لقاءنا القادم لا مزيد من الوقت لدي ارجو المعذرة..
حسناً سيدي، رقم هاتفي معك، اتمنى ان نلتقي مرة اخرى قريباً
طلعت وانا راسي عايز يطق، كيف ممكن يكون عندو خلفية عن واحدة ممكن تكون متورطة بإختطاف بته ويخليها تعرس ولده عادي؟
، ركبت العربية وطول الطريق وانا ساكتة ولاحظت لمادلين كمان ساكتة..
قلت ليها مادلين سأقوم بإيصالك للدار ومن ثم سأذهب للمنزل لأنني متعبة قليلاً
حسناً سيدتي
فضلت طول الطريق سرحانة وبفكر في مقابلتي للراجل كلامه ونبرته وتحركاته وردود فعله..
وصلتها الدار نزلت وقلت ليها إلى اللقاء
قالت لي الى الى اللقاء سيدتي
وانا ي دوب متحركة لقيتها بتنادي علي وجاريه وراي وقفت العربية ونزلت القزاز بإستغراب قلت ليها ماذا؟ ما الأمر مادلين؟
لقد تذكرت، تذكرت ذلك الشيء ذو الشكل الغريب الذي كان بحائط منزل ذلك الرجل..
قلت ليها بنفاذ صبر ظننت ان شيء ما حدث، او ان هناك شيء مهم يا إلهي لقد اخفتني، انت غير معقولة مادلين..
لا سيدتي، اردت فقط ان اقول يوجد اخر مماثل له تماماً معلق ب باب الغرفة التي قمنا بالدخول إليها ليلة البارحة..
ضغطته على عيوني بأطراف صوابعي وقلت ليها إلى اللقاء مادلين
إتحركت بالعربية مسافة قريبة إستوعبت هي قالت شنو وقفت العربية ورجعت بسرعة هي كانت لسة م دخلت اصلا..ً
ندهت عليها مادلين ونزلت بسرعة..
عيدي ما قلتِ قبل قليل اين رأيتي ذلك الشيء؟
قالت : كان معلقاً بحمام تلك الغرفة التي قمنا بالدخول إليها ليلة البارحة..
أمتأكدة؟
تماماً
تعالي معي
اخدتها وبإستعجال دخلنا الدار واخدنا المصعد، وصلنا طابق الغرفة وانا مستعجلة ماشة وبقول يا رب م يكونو فتحوها للصيانة..
وصلنا الغرفة ناولتني المفتاح، فتحته بسرعة وإتجهت على باب الحمام فتحته ومشيت ورا الباب، لما شفتها لما حيلي برد
ياها نفسها، نفس الشكل والتفاصيل..
بس هي كيف وصلت هنا؟
نزلتها وبقيت اعاين ليها يمين في شمال لاحظت لإنه في نهاية الخيوط المتدليه منها في زي جيوب صغيرة شكلها مستطيل ورفيعة لو م الزول ركز فيه م بقدر ينتبه ليه..
مادلين قالت لي سيدتي
بقيت اعاين حواليني
ومع نفسي بردد ممكن يكون مستر جو كان بخت فلاشاته القال إنه إتسرقت منه هنا في الجيوب دي عشان كدة قال ل تايسون بشكل مبهم إنه المانديلا دي حتحقق ليه السلام والإتزان في حياته..
كلامه كان في منه مغزى ما ساي، بس الجابها غرفة السيدة إيفا شنو معقول السيدة إيفا هي السرقتها؟واكبر دليل على كدة إنها معلقاها في باب الحمام من جوة ويستحيل زول يدخل حمامها عشان يشوفها
طيب ليه؟؟.
طلعت من الحمام بقيت يفتش غرفة السيدة إيفا بشكل هستيري ومادلين بتتكلم معي..
سيدتي
ما الذي تبحثين عنه، يمكنني المساعدة إذا اخبرتني..
سيدة شهد هل انتِ على ما يرام
خلصت وطلعت مستعجلة حتى م اخدتة العربية
وانا في الطريق كنت بتكلم مع نفسي(كنت بفتش عن المسؤول عن موت مستر جو كدة انا إتأكدتة إنه موته كان بفعل فاعل بس منو فيهم المسؤوله عن موته؟ممكن تكون كاثرين لأنها بتحاول تتحصل على المعلومات الجمعها عن الدار في الفلاشات دي
وممكن تكون السيدة إيفا لانه كشف سرقتها ويمكن كشف عن هويتها الحقيقية الأنا م عارفاها بس كاثرين ومستر جو هم الوحيدين العارفين هي منو وإلا م كانت كاثرين حاولت تقتلها، ما كانت عندي رغبة الرجعة للبيت ف اخدتة وقت في الطريق
وصلت البيت وكان الوقت متأخر، لقيت سياف واقف برة البيت قدام العربيه وخالف رجل على رجل
مساء الخير
بصوت يائس قلت ليه مساء النور
كانت مرسومة على وشه علامات القلق والتوتر
إنتِ كويسة؟
هزيت ليه راسي بمعنى لا
حصل شنو؟
نحن متشاكلين؟
خليك من شكلتنا ووريني مالك؟
وقفت على بُعد مسافة قريبة منو وانا ساكتة، وقفة الحاسي بشعور الخيبة واليأس للمرة المليون..
خطى خطوتين وهو مقرب علي وكل القالو : تعالي واخدني في حضنه..