الفصل التاسع والخمسون
لحظة، ماذا يعني هذا؟
تفضلي معنا
لا، لا، اتركني وشأني، يبدو ان هناك خطأ ما ولست المعنيه بالأمر، راجع امر الإعتقال مرة اخرى يا سيد لأنك ستتسبب في فوات رحلتي وانا في عجلة من امري يجب ان اللحق بالطائرة، اؤكد لك ان هناك خطأ ما سيدي
سيدة شهد عبدالله اليس هذا إسمك؟
اجل ولكن انا، انا لم ارتكب اي جريمة قتل سيدي
سنتحقق من هذا الأمر في قسم الشرطة
طلع الأصفاد بتاعته، لما شفتها حسيت إنه الدنيا دي بتدور بي، بقى يتردد في مسامعى كلام رفيدة، امجد حاكموه محاكمه عسكرية وادوه 5 سنة، وعمي سفروه تركيا..
هيا سيدة شهد لا وقت لدينا
مسك يدي ودخل الأصفاد فيها
سيدي، ارجوك حاول ان تفهم، علي الذهاب لأمر طارئ، اخبرني اي تهمه موجهه لي، من حقي ان اعرف..
سيدتي، ستعرفين كل شيء بخصوص التهمة الموجهه لك في قسم الشرطة، أنتِ رهن الإعتقال عليك الإنصياع للأمر هيا لا تجبرينا على إستعمال القوة معك..
كانت نبرتو حادة وهو بتكلم معي
كل فكري كان مع ابوي والحيحصل فيه وهو بين يدين عمار في اللحظة دي، ميه سيناريو إترسم في راسي
ونحن طالعين من الغرفة على صالة الحضور كل الأنظار كانت متوجهه حوالي بطريقة مريبة، كنت بحاول انزل راسي في الأرض عشان وشي م يظهر، واصوات النداءات بتاعة الرحلات متعالية ومتداخلة مع اصوات الناس ونظراتهم بقيت حاسة كإني بهلوس وفي اصوات كتيرة في راسي م مفهومة..
وصلنا العربية..
فجأة إتذكرت مكالمتي مع عمار وسؤالي ليه إنه هو مراقبني؟
للحظة حسيت إنه دي حركة من عمار،
ممكن يكون شافني لما شوفته في البيت داك وهو برتكب الجريمة وهسي بحاول..
قبل م تتمدد الأفكار في راسي وتتوالي السيناريوهات العربية وقفت قدام قسم الشرطة..
دخلنا القسم..
في شرطية من مكتبها سألتهم : ماذا لدينا؟
واحد من المحققين قال ليها اولى المتهمين في حادثة مقتل الرجل المُسن في ذلك الدار اللعين
وقف شرطي وقال ليهم يا رفاق هل تقصدون قضية ذلك الصحفي الإستقصائي؟
رد ليه ب : اجل، جورج روكفلر
في اللحظة دي حسيت إنه جسمي إتسمر في مكانه
رديت ليه ولكن لقد تم التحقيق معي في هذا الأمر سابقا، اناً لم أقتل مستر جو سيدي
هيا، ستبقين هنا إلى ان يحين وقت التحقيق معك
دخلني زنزانة المرة دي على غيرها من المرات وهو بقفل فيها قلت ليه، اريد هاتفي، ارغب في التحدث مع المحامي الخاص بي، انا لم اقتل احد، ولن اقبل بإجراء اي تحقيق لي مالم تسمحو لي بالتحدث مع المحامي الخاص بي، لن اتعاون ولن اتحدث
سيدة شهد نحن هنا لا نأخذ رأيك للتعاون معنا، أنتِ هنا تنفذين القانون
والقانون يسمح لي بطلب التحدث إلى المحامي، وإخبار احد ما عن مكان إعتقالي، وإجراء مكالمة هاتفية، أنتم الان تجردوني من حقوقي، إذا لم تسمحو لي بالتحدث إلى محامي او إجراء مكالمة هاتفية يمكنني ان اشتكي عليكم من الطريقة التي عوملت بها هنا، انا اعلم بالقانون جيدا..ً
سيكون لكِ هذا بالفعل، تحلي بالصبر وابقي هادئة
❖
شهد بتصل عليك ردي علي وفهميني الرسالة الكاتباها دي معناها شنو؟ابوك ماله حاصل عليه شنو؟ارجعي إتصلي علي ضروري
يا حبيب الليله مالك؟
مالي؟
انا بسألك، ما الليله بس من يوم شهد رجعت وإنت م تمام، في مشاكل حاصلة؟
لا ابداً ماف شي حاصل
يعني انا م بعرفك يا سياف؟كلنا يوم م نشوفك بتشتغل العليك والما عليك وبتجهد نفسك بنفهم إنه في شي
حالتك دي سببها شوق ساي للمره يعني؟طيب م كان تخليها تمشي، او بعد إسبوعين مثلاً قبل الإفتتاح اخد ليك إجازة وامشي م تخاف انا بغطي مكانك لو في شي، وعموماً نحن خلاص على وشك إنه نخلص، حتى تركيب الالات الرياضة شبه خلصو و..
قبل م يخلص كلامه جاتني مكالمة، دقيقة يا وائل..
مرحبا سيد سياف كيف حالك؟
مرحباً مادلين، بخير وأنتِ؟
انا بخير، كنت اريد السيدة الشهد لأمر ضروري ولكنها لا تجيب على الهاتف، وليست بالمنزل، هل هي معك او تواصلت معك اليوم؟
لا، ليست معي ولم نتحدث اليوم، انا أيضاً حاولت الإتصال بها ولكنها لا تجيب
يا إلهي، اتمنى ان تكون بخير
ماذا هناك مادلين هل كل شيء بخير في الدار؟
لا، تحدث بعض الأمور هنا، ونحن بحاجة للوصول إلى السيدة شهد
ماذا حدث؟
لقد اتى بعض المحققين إلى هنا منذ الصباح الباكر ومعهم مذكرات إعتقال بإسم السيدة شهد، والسيد تشارلي المسؤول السابق للدار وزوجته، وهناك إنتشار كثيف للصحفيين في الخارج، لا نعلم كيف سنتصرف، نحن الان محتجزين بالداخل واغلقنا جميع البوابات الخاصة بالدار
ماذا؟مذكرات إعتقال ماذا؟
لا تفاصيل لدي سيد سياف، حال توصلت للسيدة شهد اخبرها بهذا وان عليها القدوم إلى هنا في الحال
بعد مكالمتي مع مادلين وقفت على حيلي وانا بتصل على رقم شهد، كررت المكالمة اكتر من مرة وماف اي رد..
مذكرة إعتقال طالعة بإسم شهد، معناها م حيسمحو ليها بالسفر..
وهي مرسلة لي لي رسالة إنها حتسافر،
رجعت فتحت محادثتها وانا بعيد قراية الرسالة"سياف، إتصلت عليك م رديت، انا حسافر تركيا اليوم، ابوي عيان وسفروه تركيا، وامجد اخوي إتسجن 5 سنة فجأة، م فاهمة الحاصل شنو ولا الحيحصل شنو لقدام بس حسافر لأنه م عندي حل غير كدة اهلي محتاجني شديد، يمكن لما ترجع لي اكون م موجودة هنا، حأتواصل معاك لما اصل، وانا اسفة إني بخيب ظنك كل مره"
لما اتصل عليها رقمها داخل، يبقى شهد لسة موجودة هنا..
سياف، في شنو مالك يا زول؟
وائل انا ضروري امشي كاليفورنيا، حأحتاجك تغطي مكاني الفترة دي م بعد اسبوعين
حتسافر وين في شنو فهمني؟
انا كمان م فاهم شي، إذا يوسف سأل مني قول ليه سياف حيتصل عليك تمام؟
طيب يا سياف بس..
قبل م يكمل كلامه طلعت، وصلت البيت غيرت ملابسي ولسة كان عندي أمل ضعيف إنه شهد ترد بس م حصل، إتصلت على رقم السيد ادريان كان مغلق
رجعت إتصلت على مادلين..
مادلين اخبريني هل من جديد؟
لا سيدي ولكن..
ولكن ماذا؟
أعتقد ان السيدة شهد قد تم إعتقالها بالفعل، لا يوجد تفسير غير ذلك، لقد ذهبت لمنزلها مرة اخرى، وحاولت الوصول إليها في الوسط لا اثر لها
حسناً مادلين، اخبريني إن علمتي شيئاً اخر
وانا طالع إتذكرت صديقي الشرطي في سانفرانسيسكو، إتصلت عليه ..
❖
وانا في قاعدة في الزنزانة جا الشرطي فتح الباب وقال لي هيا..
هل سأذهب؟
لا، الم تطلبي التحدث إلى المحامي الخاص بك؟
اجل
هيا إذاً
اخدني لغرفة وإحتجزني فيها، شنطتي وحاجاتي كلها معاهم، جاب لي تلفوني
فتحته، كانت في مكالمات ورسايل كميه نازلة، من سياف، ومادلين، والسيد ادريان صاحب مستر جو..
من بين الناس دي كلها إتصلت على السيد أدريان رقمه مغلق حاولت رقم ليز برضو كان مغلق..
في الأخير إتصلت على مادلين..
❖
كاليفورنيا/سانفرانسيسكو
وصلت كاليفورنيا متأخر لأني م لقيت رحلة طالعة على طول في المطار ف إستنيت ساعات، ومن ضمن الأيام كانت في زحمة في المطار...
لما وصلت وقبل م اطلع من المطار جاتني رسالة من مادلين:
مرحبا سيد سياف، قمت بالإتصال بك عدة مرات ولكن لم استيطع الوصول إليك، لدي اخبار سيئة، السيدة شهد في قبضة الشرطة بالفعل كما توقعت، لقد قامت بالإتصال بي وإخباري بالأمر، ولكن طلبت مني عدم إخبارك به، انا الان بقسم الشرطة برفقة أحد المحامين للنظر في امر الإعتقال، الوضع صعب، هناك الكثير من الصحفين امام قسم الشرطة، اردت إخبارك بهذا حتى لا تقلق، سأخبرك بما سيحصل لاحقاً "
7:30pm
رسلت الرسالة قبل ساعة من الان، رجعت إتصلت عليها..
❖
مرحباً سيدة شهد، انا برايدن سميث، المحامي الموكل في قضيتك
مرحبا سيد برايدن
قبل البدء في التفاصيل هل أنتِ بخير؟هل اساء احد التصرف معك هنا او اساء معاملتك؟
ليس هنا ما يحكى ولكن اخبرني لأنني إلى الأن لا افهم شيء
لقد حصلت للتو على نسخة المعلومات التي تبين اسباب إيقافك محتجزة لدي الشرطة
قامت إبنة احد المسنين يدعى "جورج روكفلر" بتقديم بلاغ ضدك تزعم فيه انك قمت بقتل والدها بشكل مباشر، وقد دعمت إدعاءها هذا ببعض الدلائل ولكن يبدو انها تستند على اشياء اخر مثل الرأي العام..
ختيت يدي في وشي لدقايق بعدها إتنهدت وقلت ليه:
لا اساس من الصحة لهذه الإدعاءات وجميع من بالدار يشهدون على ذلك، وقد تم التحقيق معي سابقاً بشأن هذا الأمر وخرجت لعدم كفاية الادلة ضدي، سيدي افعل شيئاً ارجوك، قم بطلب إطلاق سراحي من هنا بكفالة او بأي شيء..
لن نستطيع طلب خروجك بكفالة من هنا إلا بعد التحقيق، لا تنسي إنها قضية جنائية، سيتم التحقيق معك غداً صباحا، وبعدً التحقيق قد تبقين هنا ل 24 ساعة او 36 ساعة على ذمة التحقيق ومن ثم سيتم تحويلك إلى المحكمة، سأفعل ما بوسعي، وسأكون برفقتك في غرفة التحقيق غدا، كلً م اريده منك هو ان لا تجيبي على الأسئلة في لحظة ضغط او إنفعال، داخل غرفة التحقيق كل ما يخرج من فمك سيستخدم ضدك ك دليل او إعتراف لذا يمكنك إلتزام الصمت في الاشياء التي لا ترغبين في الإجابة عليها، سأحاول مرة اخرى الان في تقديم طلب إطلاق سراحك بكفالة..
افعل اي شيء ارجوك، اريد الخروج من هنا، يجب علي الخروج من هنا بأي طريقة كانت
إذا اردتِ التحدث معي في اي لحظة اخبري الشرطي بذلك حسناً سيدتي؟
حسناً
ما اخبرتني به هذا كل شيء ام هناك شيء اخر ترغبين في إخباري به؟
لا هذا كل شيء
سأذهب الأن وسأكون غداً صباحاً هنا معك، لا تسمحي لأحد بالتحقيق معك، اخبريهم انك ترغبين بوجود المحامي الخاص بك في غرفة التحقيق
حسنا، سأفعل.ً
رجعوني الزنزانة بتاعتي لقيتهم جايبين لي ملابس ووجبة.
ندهت على شرطي وطلبت منه يجيب لي مصلاية
❖
لماذا لا ترغب بمقابلة السيدة شهد الان سيد سياف؟
اظن انها بحاجتك الان، رؤيتها لك ستجعل وضعها افضل، تبدو متعبة وخائفة كثيراً
دعينا ننظر في الأمر مع المحامي اولاً مادلين
ها قد اتى المحامي..
مرحباً
مرحباً سيد برايدن، اخبرنا ماذا حدث؟ هذا السيد سياف، زوج السيدة شهد
اوه تشرفت بمعرفتك سيد سياف، لا تقلق، ليس هناك ما يثير القلق بشأن البلاغ المقدم ضد السيدة شهد، جميع الأدلة المقدمة في ملف البلاغ مجرد إفتراضات يمكن دحضها..
ما هي تفاصيل البلاغ سيدي هل يمكنني الإطلاع عليه؟
اجل تفضل
ناولني الملف..
لدقايق وانا بقلب في صفحاته..
هل يمكنني اخذ نسخه منه غدا؟ً
بالتأكيد يمكنك ذلك
متى سيكون التحقيق؟
الساعة الثامنة صباحا، بعدهاً سيصدر امر النيابة بالتحفظ عليها وإبقاءها بالحجز ام الإفراج عنها، لا تقلق سأكون برفقتها في غرفة التحقيق
حسناً سيد برايدن شكراً لك
على الرحب والسعة، سأذهب الان
بعد ما مشى مادلين قالت لي : ماذا الان سيد سياف هل سنبقى هنا؟
لا مادلين اذهبي انتِ الان، انا بإنتظار احد اصدقائي هنا
حسنا، سأكونً على تواصل معك، اخبرني إذا هناك تقدم بالأمر، سيكون كل شيء على ما يرام، سأصلي من اجل هذا، تصبح على خير
وإنتِ مادلين
الطريق الوحيد الممكن يوصلني لأمجد كان أستاذ ميرغني في مكالمة هاتفيه لي معاه
السلام عليكم يا استاذ ميرغني..
مرحب مرحب يا إبني كيف اخبارك؟
انا بخير الحمدالله إنت كيفك؟
الحمدلله ما علي عوجة تمام التمام شنو الغيبة دي؟
طالت الغيبة فعلاً إنقطعت منك مع الجري والمشغوليات الما بتنتهي دي
ربنا يسهل علينا وعليكم كلكم يا إبني إن شاء الله بالتوفيق
امين يارب، كنت عايز اسألك يا استاذ بالصدفة عرفت إنه امجد دة إتحبس 5 سنة، الحاصل شنو؟
يا زول متين الكلام دة لا حول ولا قوة الا بالله العلي العظيم؟
والله يا استاذ انا عرفت اليوم وم فاهم شي عشان كدة إتصلت اسالك انا كمان
يا ساتر ياساتر، م عندي علم والله بحاجة زي دي، قبل كم يوم كنت بتكلم معاه، ما يكون ديل نسابته المقابلهم ديل حسبي الله ونعم الوكيل فيهم
نسابته منو والحاصل شنو، كدة يا استاذ براحة عايزك تفهمني الحاصل بالضبط، وكيف نقدر نساعده في الحاله دي؟
طالت مدة مكالمتي معاه اكتر من ساعتين وإتناقشنا في اكتر من امر وفي نهاية مكالمتنا..
زي م قلت ليك ما تنسى يا استاذ حاكون في إنتظارك
ابشر م عندك اي مشكله يا إبني.
❖
عديت الليل وانا ببكي، وانا بفكر، وبتخيل عمار ممكن يعمل في ابوي شنو؟او قصده شنو؟عايز يوصلني لوين؟
طلع الصباح وانا لسة قاعدة في مكاني وبحسب في الدقايق وكل شويه بعاين للساعة اللابساها، إنتظاري للتحقيق كان بمثابة إني مستنيه امر إطلاق سراحي..
طلعت مشيت الحمام وجهزت نفسي لغاية م جا الوقت اخدوني لغرفة التحقيق..
كانت شبه مظلمه..
جا المحقق داخل وهو بقول لي صباح الخير سيدة ا سيدة شهد عبدالله اليس كذلك؟انا اسف ولكن حروف اللغة العربية صعبة قليلاً ارجو ان اكون قد احسنت نطقها
اجل، شهد عبدالله، ليست بمثابة صعوبة اللغة الإنجليزية وبقية اللغات سيدي
حسنا، اناً بينجامين دانيال، المحقق في هذه القضية، ينادونني "بِن" طلع لي شارته ومداها لي وقعد ...
لنبدأ بالتحقيق الان..
هل يمكنك إضاءة الغرفة قليلاً؟
بالطبع يمكنني، دقائق..
قام على حيله وولع إضاءة اعلى وقعد وقال لي هل نبدأ الان؟
يمكنك البدء ولكنني لن اجيب على أي سؤال الان، لأنني بإنتظار المحامي الخاص بي.
عاين لي للحظات بعدها قال لي، حسناً سننتظر المحامي الخاص بك، هل سيأتي قريبا؟ً
اجل اخبرني انه سيأتي عند الثامنة صباحاً
عاين لساعته خلاني في الغرفة وطلع، عدت نص ساعة حتى باب الغرفة إتفتح، جا داخل السيد برايدن..
صباح الخير سيدة شهد، اعتذر لقد تأخرت قليلاً
صباح النور، لا بأس، المهم انك هنا
المحقق جا داخل وهو شايل كباية شاي في يده
هل نبدأ الان؟اعتقد انه ليست هناك مشكله اخرى
سيد برايدن قال ليه اجل هيا لنبدأ..
كانت اطول ساعتين مرو علي في حياتي، واسوأ ساعتين، حاولت احافظ على ثباتي الإنفعالي م قدرت، حسيت فيهم بالضغط وتلف الأعصاب والإنهيار لدرجه إني م كنت قادرة أتحمل..
عفواً سيدي انت تمارس الضغط على موكلتي بشكل هي لا تستطيع تحمله..
انا فقط اقوم بعملي، يمكننا إيقاف التحقيق إذا ارادت هي ذلك
لا، لا اريد إيقافه
خيار إننا نواصل كان سببه إني م عايزة اتواجد في الغرفة دي تاني، المحقق اسوا شي عمله إنه مارس علي الضغط النفسي واسلوب التشكيك للحد الوصلني فيه مرحلة البكاء..
مع إنتهاء التحقيق وصلت لغرفة الحجز، وم عدت دقايق حسيت بنفسي م كويسة والالام القولون العصبي قامت علي بشكل اسوأ من المرات المضت بس حاولت اتماسك، بعد تلاتة ساعاات جاني المحامي ومادلين، ملامحهم كانت عابسة وم بتبشر بالخير،
بادرتهم بالسؤال : اخبراني ماذا هناك؟
النيابة امرت بإبقاءك هنا على ذمة التحقيق ل 5 ايام ..
مادلين قالت الكلام دة وهي بتعاين لي بحسره
قلت للمحامي وبعد هذه الخمسة أيام ماذا سيحدث؟
سيتم تحويل ملف القضية للمحكمة
هذا يعني ان النيابة لديها ما يكفي من الأدلة لحبسي صحيح؟
اخبرني سيد برايدن ماذا هناك، لماذا لا تتحدث؟
لأن القضية الأن اشبه بقضية الرأي العام، هناك رواج إعلامي مكثف على القضية لأنها ليست قضية قتل فحسب وإنما تهديد لحياة العديد من الأشخاص في ذلك الدار، هناك عدة بلاغات مقدمة بحقك، حتى انا لم اسلم لقد قام بعض الأفراد بتكسير زجاج سياتي في الخارج فقط لكوني المحامي الخاص بك ونعتوني ببعض الألفاظ البذيئة
من كلامهم حسيت إنه الموضوع المره دي غير،
بعد ما إنتهت مقابلتي معاهم ورجعت زنزانتي دقايق معدودة بس الالام بطني زادت علي، ف بقيت انده، لو سمحتو، احتاج لمساعدة..
وقبل م اكمل مناداة وقعت في الأرض وانا بتلوي حوالين نفسي من الألم..
ماذا حدث هل أنتِ بخير؟
دة كان الصوت الوحيد السمعته قبل م اوعى واللقى
نفسي في المستشفى..
-
من غير ما اعاين حوالي نزلت من السرير وانا بقول "انا وين، عمار حيقتل ابوي، عمار حيقتل ابوي انا عايزة امشي، بقيت أفتش في حاجاتي..
شهد؟
عايزة امشي لأبوي انا م قتلت زول ..
شهد، قولي بسم الله، عايني لي هنا بتكلم معاك
لقيت سياف ماسكني فجأة
سياف إنت هنا؟جيت متين؟
تعالي نقعد عشان تهدي
لالا انا عايزة اطلع من هنا، عايزة امشي لأبوي حيقتلوه زي م قتلو امي، انا لازم اسافر م عايزة شي خلاص عايزة اسافر لأبوي بس، عايزة اللحق ابوي قبل م يقتلوه يا سياف
اهدي يا شهد عشان وضعك م يرجع يسؤ تاني
يا سياف انا بقول ليك حيقتلو ابوي، حيقتلو ابوي وانا م قادرة اسوي شي، إنت م عارف شي ابدا، مً عارف يا سياف"كنت بتكلم معاه وانا ببكي "
سحبني واخدني في حضنة وهو بقول لي
فاهمك يا شهد بس لو م هديتي وإتحسنتي م حتقدري تعملي شي بالحالة دي، إنتِ ابقي كويسة اول شي عشان تقدري تساعديه،
ما عايزة حقن، م عايزة ادوية عايزة اطلع من هنا
حاضر م حنادي ممرضة عشان تديك حقنة او اي شيء
سكتت لدقايق وبصوت يائس قلت ليه انا م قادرة اساعد حتى نفسي كيف حأقدر اساعدهم؟كيف حأقدر اساعد اهلي؟
انا مشيت وين؟حنقدر نساعدهم
بأي طريقة؟
دايماً في طريقة ما تقلقي إنتِ بس
بعد مرور اكتر من ساعة من وجوده في الغرفة وفي حالة صمت مننا الإتنين سألته
إنت هنا من متين؟
لولا عنادك وقوة راسك دي انا دايماً هنا
ممكن استخدم تلفونك؟
اكيد
إتصلت على رفيدة..
الو
رفيدة، انا شهد
شهد، كيفك ووينك يا بت إتصلت عليك كتير روحي قربت تطلع من الخوف عليك طمنيني إنتِ كويسة؟
انا كويسة الحمدلله ما تخافي وتقلقي علي، إنتِ كيفك، حصل شنو طمنيني عليكم، انا كنت جاية بس حاصلة مشكلة في الاوراق بتاعتي م قدرت اطلع م سمحو لي، بحاول احلها وعلى طول جايه، إتواصلتي مع ناس ابوي؟
ايوا إتكلمت مع شهاب اليوم وإتكلمت مع عمتو سميرة، قالو لي كويسين م عندهم عوجة، وعمار إستقبلهم احسن إستقبال هناك، مأجر ليهم شقة خاصة ومبسوطين، م قدرت اكلمهم بموضوع امجد يا شهد عشان م اشيلهم هم، كلمت شهاب بس وقال لي خلي الموضوع دة بينا م تكلمي زول هسي، وانا والله م قادرة اصبر م عارفة اسوي شنو، بكرة حأمشي ليهو في السجن زيارة..
رفيدة إنتِ إتكلمتي مع عمتو سميرة متأكدة وطمنتك على ابوي؟شوفتيه كويس بعينك؟
ايوا يا شهد والله، إتكلمت معاهم فيديو عشان اولاد شهاب كانو عايزين يشوفو امهم وكدة، وشوفت عمو عبدالله عاملين ليه غرفة خاصة للممرضة جايبنها ليه هو كويس حتى سلمت عليه بنفسي وكانت معاهم ليلى برضو إتكلمت معاها بتسلم عليك، بس م كان معاهم عمار قالو إنه عنده إلتزامات وعمليات عشان كدة م معاهم إنتِ اكيد اخباره معاك، لكن عمتو اكدت لي إنهم مرتاحين الحمدلله وعمار م مقصر منهم في شي من لحظة وصولهم إستقبلهم احسن إستقبال تشكر فيه ساي..
سكتت وانا بفكر، هو عايز يوصل لشنو بالتصرف دة؟
طيب يا رفيدة، رسلي لي رقم شهاب الإتصلتي ليه بيهو، مش رقمه؟
ايوا قال رقمه
طيب رسليه لي
حاضر، المهم انا بكره حأمشي لأمجد، وافهم الحاصل شنو بالضبط
امشي يا رفيدة وطمنيني عليهو الله يخليك وفهميني الحاصل شنو بالضبط، حأرسل ليك توكلي محامي شوفي ممكن يعمل شنو في الحالة دي ممكن يستأنف، وإتصلي علي في نفس الرقم دة عشان انا رقمي م شغال
طيب حاضر
وإتصلي إطمني على ابوي وعمتو مرة تانيه وطمنيني، شوفيهو بعينك يا رفيدة وإتأكدي إنه كويس من عمتو طيب؟
حاضر يا شهد، في شنو مالك إنتِ؟
ماف شي، بس كدة قلقانة عليه
بعد م قفلت الخط جربت أتصل على رقم عمار، لقيته مقفول، رفيدة رسلت لي رقم شهاب إتصلت عليه..
الو السلام عليكم
شهاب
مرحب إتفضلي
معاك شهد يا شهاب كيفك؟
شهد؟إيك يا اختي وين ياخي إنتِ؟اخيراً إتذكرتي عندك اخوك كبير غير امجد إسمو شهاب؟
كيفك وكيف اولادك بخير؟
الحمدلله تمام التمام، وين إنتِ الحي بيك والحاصل عليك شنو تضربي تسألي من الخلق ديل كلهم وانا لأ؟
مشغوليات وجري بس لكن قاعدة اسأل منك، قالو لي سافرت تركيا مع ابوي وعمتو صح؟
ايوا ربنا سهلها علي في شغلة كدة وقلت اعالج ابوي او نشوف الحاصل عليه شنو بدل م مخلنو مرمي زي العربية القديمة كدة في البيت
سكتت مسافة وقلت ليه والشغلة دي عمار يا شهاب؟
شنو؟
بسألك انا ما تكذب علي وتلف وتدور، الشغلة دي قايم بيها عمار ولا لأ؟
سياف عمل لي حركة بيدو نظام إنه طالع من الغرفة..
إنتِ متصلة علي عشان تقولي لي الكلام دة؟متصله عشان تقولي لي ما تلف وتدور وم تكذب؟
ايوا عشان انا عارفاك اكتر بني أدم كذاب، واكتر بني ادم بتاع لف ودوران وهسي إنت بتكذب وبتلف وبتدور
إنتِ منو اصلاً عشان تحققي معي، وإنتِ منو الأداك الحق تتكلمي معي بالإسلوب دة؟اللف والدوران إنتِ فضلتِ فيه شنو؟ بتعرفي لأبوك دة شنو هسي في الوقت الحالي ميت حي ماكل شارب بتعرفي ليه شنو؟انا م زي اخوك الباطل المخليك لافة عشان شويه القريشات البترسليها ليه دي، وهداك ليهو مرمي في السجن اصلاً إنتو م نافعين ياكي إنتِ لافة في لفك بعد م وسختي سمعتنا ودنيتي راسنا وسط الناس بطلاقك من احسن راجل والف بيت يتمنى يناسبه وخليتي وشنا دة مع البلاط اي زول بسألنا بتكم وين، واخوك الحيوان وعاطل التاني داك بسكر في سكره، والتالت باطل عايش تحت اخته التقول مربين بقروش حرام إنتو ناس إنتو؟
شوف يا شهاب البتقول فيه دة كله م بنطبق علينا نحن، بنطبق عليك إنت وبقول الفيك بدر بيه والعليك إتناسى، شادي بسكرو وعد فكرو وعطالتو الهو فيها دي احسن منك بمليون مرة، امجد الرجاله منه وإنتهت، وانا م متصله عشان اوريك إنت شنو، لكن يا شهاب ابوي دة تحصل ليه حاجة في تركيا والله يا شهاب م تلوم إلا نفسك وانا ياهو حذرتك، ياخ إنت راجل؟ماشي لطليق اختك متلصق فيه ومخليه يسفرك عشان يعالج ليك ابوك؟ وين الرجالة هنا؟
إنت من الرجال البهتمو لأمر ابهاتهم ولا حنيين عليهم؟إنت القروش الممكن كان نعالج بيها ابوي إتجابنت واكلتها، دكاكين بعتها، قروش امي الخلتها هينة ولا دهبها الخلتو هين؟ياخ الدهب حق امي الملبساني ليه انا إنت شلتو من جسمي وبعتو، إنت يوم متين بقيت مسؤول؟
بيتك دة فتحتو بحقنا نحن البتنبذنا ديل، كرامات ولادة اولادك ال 3 ديل من جيوبنا نحن يا شهاب، ملابس اولادك البلبسوها في الأعياد وغيرها من جيوبنا نحن، إنت م بتعاير امجد بالعطالة كان اخو حار صحي زي الزمن دة كنت واقف في راسو وشايل همو بدل م بتنبز فيه رغم إنه م قصر امجد م فتح بيت عشان شايلك إنت وشايل بيتك، م تخليني احسب ليك افضالو عليك ولا تخليني اوريك إنت عملت شنو يا شهاب، إنت م مفروض تتكلم عن الرجالة ولا عن البطالة ولا عن الجبن، إنت اسوأ من كدة بكتير يا شهاب لكن كنا بنسكت وينعدي ليك وبنقول معليش اخونا الكبير ومسؤول علينا، بس م شفنا فيك غير مثال للشخص الأناني والإستغلالي والجبان، وارجع اقول ليك ابوي دة لو حصل ليه شي عمار الإنت هسي متقاوي بيه دة م بشفع ليك..
بتهددي منو إنتِ؟إنتِ قايله إنه ابوك براك؟وماشة تعملي شنو؟
اعلى ما في خيلك اركبيه يا شهد، وتاني م ترجعي تتصلي علي اوعى وم اختي ولا بعرفك زاته وقفل الخط.
دموعي جات جاريه، ايوا نعم افلست شديد في الكلام معاه وحاسه نفسي قلت كلام م كان مفروض اقوله في لحظة إنفعال وغضب بس هو الوصلني للمرحلة دي وفقدني اعصابي، دموعي كانت م قادرة تقيف حاسة كأنه الكلام دة إتقال لي انا
إتصلت في رقم عمار لقيته قافل، هو قافله عمداً عشان م اقدر اصل ليه، حذفت المكالمة، ودموعي لسة م كانت راضية تقيف، كنت بتنهد
دقايق سياف جا داخل مسحت دموعي ومديت ليه التلفون..
كدة إتطمنتي؟
هزيت راسي ب لا
قعد قصادي، شال التلفون ختاه على جنب ومسك يدي وسكت مسافه، شهد عايزك تسمعيني كويس، نبرة صوته كانت غير اي مرة إتكلم معي فيها قبل..
خلينا نخلي كل الفات دة على جنب ونعاين للجاي، الوضع المره دي جِدي شديد..
انا لو في حاجة عايزك تبطليها ف هي صفة التفرد دي، انا الأكيد م حأخليك براك بغض النظر عن كل شيء حتى لو إنتِ م عاوزة انا م حأخليك براك،
عاين بإتجاه الباب وقال لي برة الباب دة في شرطيين واقفين، منتظرين متين الدكتور يقول إنه وضعك بسمح والدكتور يكتب ليك خروج عشان يرجعوك الحجز، النيابة بعد التحقيق رفعت ملف القضية للمحكمة وإتحددت مواعيد جلسة الإستماع الأولى حتكون بعد إسبوع من الان، ايوا في سرعة في الإجراءات ودة لأنه قبل إتحقق معاك ونحن إفتكرنا إنه بعد الإفراج عنك الموضوع إنتهى والقضية إتقفلت بس طلع العكس كانو في ناس شغالين يحققو في الموضوع، انا م مفروض اقول ليك الكلام دة عشان صحتك بس انا محتاج منك تتعاملي مع الموضوع بجدية، الحاجة الوحيدة العايزها منك هي الوضوح، عايزك تكوني واضحة بينك وبين المحامي بتاعك وتملكيه الحقايق الممكن يقدر يستخدمها في الدفاع عنك، انا متفهم حتة إنك م عايزاني اكون المحامي بتاعك وانا م حأفرض عليك الحاجة دي اكيد وحتى لو وافقتي في يوم حيكون بناءً على شروطي الإنت م حترضي بيها..
بعد جلسة الإستماع الأولى في إحتمال إنه يتم الإفراج عنك بس برضو حتكوني ممنوعة من مغادرة الولايات المتحدة، ف عشان كدة حالياً المحامي جاي ومعاه مادلين، انا حأطلع اخليكم مع بعض تمام؟المحامي بتاعك م عدوك إتعاملي على الأساس دة فهمتيني
طيب حاضر
بعد مرور ستة ايام..
في صباح اليوم السابع في قاعة المحكمة بدأت اولى جلسات الإستماع، وسط حضور ضخم ومخيف من صحفيين وناس برة قاعة المحكمة وجواها، كنت خايفة وحاسة إني براي، وحرفياً كنت براي، المحامي بتاعي م شايفاه، وسياف م عارفاه وين كان موجود لما اخدوني من المستشفى بعدين إختفى، وصولي للمحكمة كان وسط ناس كتيرة و الشرطة بتمنع عني الصحفين وبتبعدهم عن طريقي وهم بصورو فيني وبسالوني، من شدة ما وحيدة في قاعة المحكمة لما شفت مادلين وأسرتها حسيت إني فرحت ف إبتسمت ليهم بلهفة..
اول م قعدنا فجأة لمحت تايسون، وميليسا، وجمبهم بت شابة وولده اللي هو راجل ميليسا ومجموعة من الناس قاعدين في الصفوف الأولى ..
في اللحظة دي إتوترت،
تايسون وولده؟
ميليسا؟
كيف؟
وجودهم هنا معناه شنو؟معناه شنو وجودهم هنا؟
معقول هم ورا الموضوع دة؟
بدت تلاوة حيثيات القضية..
القاضي طلب يطلعوني على المنصة، بعد ما وقفت..
سألني ما إسمك؟
كنت متوترة..انا شهد عبدالله
أنتِ مسلمة اليس كذلك؟
اجل
من اين أنتِ؟
انا من السودان
منذ متى وانتِ بالولايات المتحدة؟
4 سنة
لستِ من حاملي الجنسية أليس كذلك؟
لا ليس بعد سيدي
هل لديك محامي؟
سكتت وبقيت اعاين حوالي
سيدة شهد، ليس لديك محامٍ؟اخبريني بذلك حتى تقوم المحكمة بتوكيل محام لك
لدي ولكن...لا اعرف اين هو..
في اللحظة دي كل الفي القاعة اطلقو ضحكات متعالية
فجأة لقيت سياف جاي من المقاعد الورا وهو بقول ليه انا المحامي الخاص بالسيدة شهد سيدي، أعتذر لقد تأخرت قليلاً بالخارج، واعتذر انني لا ارتدي لباس المحكمة اليوم لقد كنت في عجله من امري و نسيته بالمنزل سيدي القاضي..
تفضل بالجلوس
جا قعد في المقاعد الأمامية لإتجاهي تماماً
اخبرينا عن رايك بالتهمة الموجهة لك
كنت بعاين لسياف..
سيدة شهد؟
ارفض جميع التهم الموجة ضدي سيدي، انا لم اقتل احد، ولم أؤذي احد في ذلك المكان، انا فقط كنت اقوم بعملي على اكمل وجه، ولم أؤذي أحد
اهذا كل ما لديك؟
اجل
حسناً سيدة شهد، تفضلي بالجلوس
بعد م قعدت، القاضي طلب من النيابة العامة تلاوة قرار الإتهام وإتلفت علي وقال لي: اصغي جيداً لما يقال حتى تتمكني على الرد عليه..
"تتهم النيابة العامة شهد عبدالله، 33 عاماً بأنها وبتاريخ 15/4 بدائرة إختصاص نيابة ومحكمة سانفرانسيكو قد قامت بقتل نفساً عمداً وعدواناً بالتعذيب وحبسة في قبو تحت الأرض ورش مبيدات سامة عليه وهو المجني عليه جورج روكفلر...الخ
كانو جايبين تقرير تشريح وفاة السيد جو ومعلومات وتفاصيل اول مرة اسمع عنها، كان الكلام الكتير والتفاصيل اكتر لدرجة إني م كنت مركزة هم بقولو في شنو بس وقعت في مسامعي جملة " تعاني من امراض نفسية"
"وتقدم النيابة العامة المتهمة المذكورة امام المحكمة لمحاكمتها "
القاضي قال لي سيدة شهد ما ردك على ما ورد في تقرير النيابة العامة؟
سيدي انا ارفض جميع التهم الموجهه إلي، جميع إدعاءات النيابة لا تستند على أدلة تؤكد إرتكابي هذه الجريمة، وانا لا أعاني اي امراض نفسية سيدي ..
أرجو المعذرة..
فجأة القاضي قال : تفضلي من أنتِ؟
إتلفته لقيتها ميليسا..
انا جوليا ادامز، محامية اولياء الدم في هذه القضية، وهذه كاتي روكفلر، إبنة المجني عليه جورج روكفلر..
بقيت اعاين ليها بدهشة، ميليسا محامية؟؟؟
البت كانت بتعاين لي وعيونها ملانة دموع وبترجف
أعتذر سيدي، كاتي لا تستطيع الكلام، وايضاً لا تستطيع الحركة، إنها المره الأولى التي تتواجد فيها في مكان كهذا لذا ف هي متوترة قليلاً
إن كانت غير قادرة على التواجد هنا يمكنك إخراجها
لا، هي بخير الان
لدي كاتي ما تقوله، هي لا تستيطع التحدث ولكن كتبته هنا..
رفعت لافتة مكتوب عليها"القصاص لا يعني قتل الجاني، القصاص يعني الحفاظ على العديد من الأرواح منه"
سيدي لا نحتاج العديد من الجلسات لإثبات بأن المتهمة قد قامت بإرتكاب هذه الجريمة لدينا ما يكفي من الأدلة التي سنعرضها لإثبات التهمة
سيدي دعني أخبرك بأنها ليست المرة الأولى للمتهمة في محاولة إرتكاب جريمة قتل، في السابق قامت بإحراق منزلها وبداخله هي و زوجها في سلوك إنتحاري سبب لها حروقاً بالغة أدت إلى إجراء العديد من العمليات لها في مقدمتهم عمليات تجميل أدت إلى تغير وجهها إلى الشكل التي هي عليه الان، هذا هو التقرير الطبي الكامل حول هذا الأمر مرفق صورة للسيدة شهد قبل وبعد العملية، لقد حاولت قتل زوجها بهذه الطريقة ة لهذا السبب قام زوجها بعرضها على طبيب نفسي وكانت محاولات قتلها له تزداد يوماً بعد يوم ووضعها يزداد سؤ، إتضطر زوجها بجلب مرافقة طبية لها بالمنزل وحبسها بداخله وإعطاءها بعض العقاقير الطبية المهدأة حتى يستطيع ممارسة مهنته ك طبيب ومع تفاقم وضعها قام بإدخالها إلى مركز إعادة تأهيل وتركها هناك لعدة أشهر وهذا هو تقرير مركز إعادة التأهيل الذي يؤكد ان السيدة شهد كانت ولا زالت تعاني امراضاً نفسية، قام زوجها بالإنفصال عنها بتاريخ...
وقام بالإجراءات اللازمة لعودتها إلى ديارها ولكنها قامت بالهرب من المطار واتت إلى هذه المدينة، عرفها الجميع بإختلاق القصص غير الحقيقية..
لقد إدعت على زوجها بأنه يعمل في تجارة البشر، الأمر الذي أدى إلى إلى إستدعائه والتحقيق معه من قبل المباحث الفدرالية
كما انها قامت بإجبار السيد ادامز على مقابلتها بتهديد شقيقته في مكتبة القراءة الخاصة بها، حيث قامت بتهديدها وطلبت منها الإتصال به وطلب حضوره للمكتبه وإلا قامت بأذيتها وبالفعل نفذت لها ما تريده
وايضاً قامت بالذهاب لمنزل السيد ادامز في سانفرانسيسكو حيث قام بإستقبالها وسماع ما تقول، إدعت ان هناك عصابة بالدار وهي تعمل على حل لغزها وطلبت مساعدته لها للقضاء عليهم، والعديد من الأقاويل والأشياء التي تدعيها
بالطبع لا أحد يرى ما تقوله لأنه لا اساس له من الصحة،
لدي تسجيلات تثبت ذهابها إلى مكتبة شقيقة السيد ادامز وإلى منزله
حتى العاملين بالدار يعانون من إضطرابتها النفسية حيث انها تقوم بتشديد المراقبة، وزيادة عدد افراد الأمن ونشرهم في الطوابق والإستراحات الخاصة براحة المسنين، ومراجعة كاميرات المراقبة يوماً بعد يوم والعديد من الأشياء التي من الصعب إستيعابها
مؤخراً قامت بمحاولة قتل السيدة إيفا، وهي إحدى المسنات بالدار، وهذا هو التقرير الذي يؤكد ان السيدة إيفا قد تعرضت لمحاولة قتل داخل الدار وهي الان طريحة الفراش في المستشفى، ومن ثم قامت بالذهاب إلى مدينة تالاهاسي في ولاية اوهايو والتسلل إلى منزل زوجها السابق بإستغلال وضع زوجته المريضة بالزهايمر وتفتيش منزله..
سيدي إذا لم تتم محاسبتها وإيقافها ووضعها في المكان الذي يليق بها وهو "المصح العقلي" سيكون لدينا العديد من الضحايا في ذلك المكان وغيره من الأماكن، ستظل تختلق القصص في مخيلتها وترتكب الجرائم
ايضاً لدي تقارير طبية تثبت ان جميع من بالدار يعانون الان من مشاكل في الأعصاب، ليس شخصاً او إثنين جميع المسنين، والسبب في ذلك جود بعض المواد الغريبة بتحليل الدم الخاص بهم، يتم إعطاءهم ادوية تؤثر على الأعصاب وتزاد الجرعات شيئاً ف شيئا..ً
هناك ما يكفي من الشهود لإدانة المتهمة سيدي، ، في الأخير اقول، نحن نريد حماية اهم شريحة في المجتمع، هذه الشريحة ليس لديهم من يعيلهم، ليس لديهم مأوى وليس هناك من يحميهم، لقد لجأو لذلك المكان ليبقو احياء وأمنين، لا ليتم قتلهم بالتعذيب وحياكة القصص، وحمايتهم هي مهمتنا ..
ملحوظة
يا جماعة امبارح إتحظرت من النشر ل 24