الفصل التاسع

شكراً يا دكتور حلوين شديد الصور حبيتهم جداً

العفو ياخي، في الخدمة

قال لي في مجال اسألك سؤال؟

قلت ليه إتفضل..

قال لي إنتِ إرتبطتي قبل كدة؟ او إنتِ حالياً مرتبطة وم قادرة ترفضي طلب الزواج بصورة مباشرة وكدة؟دايماً لما الواحدة تعلق زول بكون عندها اسبابها يعني ي إما بتتخلص من بقايا علاقة سابقة او كمان هي في علاقة م قادرة تحدد مصيرها فيها..

قلت ليه إرتبطت قبل كدة أيوة..

حالياً في علاقة؟ لأ

وتوضيح بسيط انا م معلقاك ولا شي العفو ي دكتور ياخ، لكن إنت عارف الزواج قرار مصيري ف لازم الواحد يدرسه خصوصاً إنه انا قلت ليك م بأمن بالشكل دة من الزواج وحقيقي انا من كارهي ال Long distance relationships

، بحس إنه فيها نوع من المعاناة للطرفين رغم إرتباطهم لكن علاقتهم رأس مالها شاشة بس واقعياً كدة..

قال لي انا بحترم صراحتك ووضوحك جدا، مً بتذكر متين اخر مرة حصلت محادثة بيني وبين بت لقيتها واضحة وصريحة في حتة العلاقات دي، كل البتسألهم بينكرو إنهم سبق ليهم الإرتباط قبل كدة..

قلت ليه نحن م كائنات فضائية وإنتو كمان بترتبطو وم بتقصرو، عايز تقنعني لي إنك م حصل إرتبطته يا دكتور؟

قال لي لا طبعاً من فترة الشباب لغاية قريب حصل، بس في واحدة بتكون ثابتة دي اللي هي إنت عايزها وقافل عليها

قلت ليه وكانت في الإنت قافل عليها؟

قال لي كانت في أيوة

قلت ليه: ليه كانت؟هسي وين؟

سكت

قلت ليه لو السؤال مافي محله ف انا..

قال لي لأ بس...طيب حأحكي ليك

انا كنت مرتبط مع واحدة بت اهلي دكتورة إشتغلنا لفترة في مستشفى في السودان هي كانت متدربة ي دوب، مش إرتباط عادي بس لأ كنت عايزها جدجد كدة وحقيقي هي الزولة الوحيدة الخلتني اصل اهلها واكون جادي معاها شديد، المشكله إنه أنا كنت كدة يعني طيش الشباب داك إنتِ فاهمة، يعني مرتبط بي دي وخاتيها اساسية وبلعب برة عادي، سافرت وإنتظرتني وكنا كويسين نوعاً ما، رغم إنه بتحصل النقاشات وانا م اكذب عليك عشان كنت زول علاقاتي كتيرة في وقت ما ف كنت غيور وشكاك شديد وبركز في ادق تفاصيل حياتها، في فترة ما علاقتي بيها كانت بقت عبارة عن تحقيق اكتر من علاقة بين إتنين مرتبطين، خنقتها لدرجة إنها بقت تعمل حاجات كتيرة من وراي بدون تشاركني بسبب خوفها من رد فعلي على عكس عادتها، م يمكن اكون إستنزفتها جداً لدرجة إنه بقى م عندها حيل لإنه العلاقة تستمر، في يوم صحت الصباح لقيت منها رسايل إنه نحن نقيف لغاية هنا وإنها م قادرة تكمل في العلاقة ..

رغم إنه قبل قرارها دة بكم يوم كنا بنخطط لخطوة العقد وتجهيز الأوراق عشان اجيبها عندي وكدة، ببساطة لقيت روحي برد ليها ب تمام.

قلت ليه الليله؟! كيف يعني تمام بس؟

قال لي حتى انا لغاية اليوم بسأل نفسي او بلومها إنه لو كان ردي مختلف شوية يمكن كان الوضع إختلف، حتى هي يمكن كان عشمها إنه دة ما يكون ردي عليها..

قلت ليه م حاولت تعرف ليه قالت كدة؟

قال لي لأ

قلت ليه نرجسيذإ زات يو؟

ضحك قال لي وقتها ايوة، يمكن كنت بتعامل معاها ب شي من النرجسية المبالغ فيها، وبمعنى اصح كنت ضامنها، ضامن وجودها، ضامن إنها م عندها غيري ولا حتختار غيري حتى لو في..

قلت ليه خيبت ظنها لكن، حصل عليها شنو هسي؟

قال لي إتزوجت ولد عمها وحالياً هي دكتورة في الإمارات..

سكت مسافة وقلت ليه زعلت عليها

قال لي انا إتخلصت من الشعور بالذنب تجاه الموضوع دة ليه عايزة ترجعيني ليه تاني؟

قلت ليه اول مره يلاقيني زول يحكي عن عكس ما بيحصل، يعني زول يحكي عن إنه خيب ظن زول فيه او خزله او كدة..

قال لي قبيل قلتِ لي نحن بشر م ملائكة ودة الحاصل ي شهد، الواحد فينا حيفضل يحاول إنه يكون مبهر لمتين؟ خيبت ظنها وإتزوجت يعني لو كانت قسمتي م كان حصل كدة..

قلت ليه خيبت ظنها وجاها العوض قصدك ...

ضحك وقال لي دة الحصل بالضبط

قلت ليه وإنت بعدها م إرتبطت؟

قال لي دخول في علاقة م بوصل ليك إحساس إنه البت دي إنت عايز تصل اهلها وتطلبها رسمي انا م بسميه إرتباط او علاقة كامله، بسميها انصاف علاقات، يعني يكون في في حياتك بنات لكن م شايف مستقبلك مع واحدة فيهم دة يتسمى شنو؟

من وقتها دة الحاصل معي حتى البخطبوهم لي بالترشيح م بستمر معاهم، مش عشان المشكله فيهم لأ عشان م اظلم واحدة فيهم معي بعدين، يعني لو الموضوع كان اعرس اي مره وخلاص كنت إتزوجت ورضيت اهلي وسكتهم لكن إنشغلت مع الدراسة والشغل وكدة

قلت ليه بإعتبار إنها بت اهلك وكنت واصل البيت بشكل رسمي، توضيحك لأهلك كان شنو؟

قال لي تصدقي إنه هي بت خالتها ل كوثر زوجة عثمان اخوي، ف لكِ ان تتخيلي كمية الزعل والشخصنة الحصلت

.قلت ليه لالا ياخ، أي واحدة في خالاتها؟إتلومت لكن

قال لي انا م إتوقعت إنها تكون جادة في موضوع الإنفصال دة لأنه عادي بحصل كدة وبنرجع عادي لغاية م لقيتها حظرتني من كل مكان، انا يمكن إستهترت بالموضوع شديد وإتعاملت معاه بلا مبالاة وم رجعت سألت ولا حاولت اهتم اساساً لكن إتعلمت الدرس يلا

قلت ليه امممممم اخر سؤال لسة في مشاعر جواك تجاها؟

قال لي لو في م كنت اليوم بتكلم معاك كدة وفاتح ليك نفسي كتاب، الشعور الوحيد الأكبر من شعور الحب جواي تجاها كان شعوري بالذنب وتأنيب الضمير وجلد الذات، لفترة طويلة جمله لوكان...م كانت بتفارقني..

والحمدلله بقولو الكبر حسنات، ف الواحد كبر وفهم وعقله إتفتح ل يعني شنو علاقة ويعني شنو تكون مسؤول تجاه علاقة..

قلت ليه طيب بعد م عرفت دة كله حاولت تعتذر؟

الإعتذار دة معناه إني احاول افتح باب هي قفلتو وكملت حياتها وحددت إختيارات مناسبة ليها، م حاولت لأنها بعد كدة خلاص زولة متزوجة وحتى عندها اولاد يعني ليه ارجع اجوط حياة زولة مستقرة وسعيدى تاني بدافع الإعتذار؟يكفي إني إستفدتة من التجربة دي في إني اعرف شنو السلبي فيني وأغيره، و إتصالحت مع غلطي الما حيتكرر تاني.

قلت ليه نوعاً ما إنت صح في الحتة دي

كان عندي إجتماع شغل شبه حيبدأ، قلت ليه يا دكتور انا اسفة بس حستأذنك لأني عندي إجتماع شغل ضروري حيبدأ بعد 15 دقيقة ومفروض اجهز نفسي

جدا، اناً الأسف لأني دخلت عليك بدون سابق إنذار، موفقة إن شاءالله Have a good day

"اتفقت أو لا تذكر انها حقيقة"

كل شيء قابل للنسيان والتخطي، حتى انت ستُنسى وكأنك لم تكن.

لا تنخدع في ضيق شعورك الحالي، ثق بأنك ستندم و تضحك عليه بعد حين.

لا تنخدع بفكرة " فلان دة ما بتعوض " الكل قابل لذلك.

ماف زول ملاك، ماف زول محور كونك، ماف زول جاي آخر حبة..

امنح المستقبل فرصة حصولك على مايليق بك...

❖

في مكالمة ل سندس مع طارق..

طارق ممكن طلب؟

إتفضلي..

ممكن تجي قبل إمتحاناتي تبدأ؟

عشان؟

كدة عايزاك تجي وخلاص

انا إجازتي لسة م عارفها حتكون متين فهمتي؟إنتِ ركزي في إمتحاناتك احسن

طيب، عايزة اقول ليك كمان ممكن لما اتصل عليك ترد؟ يعني انا بتصل مرة وإتنين وعشرة حتى ترد وحتى على الرسايل م بترد بسرعة

لأني مضغوط في الشغل ي سندس

طيب حتكون فاضي متين؟

إنتِ لو إحتجتي حاجه رسلي وانا اول م يكون عندي زمن فاضي حأرد اكيد

قالت ليه بس انا م برسل ليك عشان محتاجة حاجه يا طارق، انا كمان مضغوطة، ومتنشنة، بجاي إمتحانات، وبجاي إنت قلت العرس بعد الإمتحانات مباشرة، ماف شي جاهز، ماف شي م قادرة اقرأ وم قادرة اسوي اي شي وناس البيت ضاغطين علي في الحبسة، وإنت م بلقاك م عارفة اسوي شنو

نزل التلفون واخد نفس عميق وقال ليها بنفاذ صبر

انا حقفل لأنه بكره عندي دوام بدري تصبحي على خير ي سندس، نتناقش في الموضوع دة فيما بعد تمام؟

قفل منها، دخلت الواتساب نزلت إستوري عليها قلب مكسور

ما عدت 5 دقايق، رجع إتصل عليها، فتحت الخط

قال ليها طيب ممكن توريني انا ممكن اعمل شنو او مطلوب مني اعمل شنو وانا حأعملو حاضر..

عملت روحها بتبكي وقالت ليه بزعل، كنت بتجيب لشهد وقت من وين؟انا حأعرس كيف زول م عندو لي وقت ابدا؟ً

سكت

بكت، قال ليها فيما بعد وقتي كلو ليك حيكون بس حاولي تستحمليني الفترة دي ممكن؟انا كمان مضغوط زيك واكتر والله، ومكلف اصحابي في السودان يرتبو معي مواضيع العرس من الألف للياء، إنتِ بس روقي وركزي في إمتحاناتك الفترة دي وانا حتكلم مع امي إنهم م يضغطو عليك، إتفقنا؟

قالت ليه ماشي

قال ليها ماف زعل؟

قالت ليه لأ ماف

قال ليها طيب يلا تصبحي على خير

قفل منها بعد دقايق قليله فتح الواتساب لقاها حذفت الإستوري ونزلت واحدة جديدة فيها قلب احمر، قفل تلفونو ورماه بعيد منه بضيق..

بدت تجهيزات العرس في البيت او شبه بدت، وكمان كنت بحاول اضغط سندس للقراية لأنها كانت مستهترة وم مركزة فيها، ووقتها وتركيزها كلو كان فيما يخص العرس هي كانت محبوسة وإختيار الشيلة اونلاين والمواضيع دي، وكانو بجوها صحباتها اوقات يقرو معاها واوقات بوديهم المكتبة

في يوم هي راقدة جنبي وبتختار وانا بختار معاها قالت لي عايني اختار ل طارق معي لبس؟ فنايل وشورتات وحاجات زي دي؟

قالت لي بلبس مقاس كم؟

قلت ليها يعني L,xl كدة

قالت لي حلو حأختار ليهو حاجات زي دي لشهر العسل بتكون حلوة فيه

قلت ليها م اعتقد يلبسهم لأنه..

قاطعتني وقالت لي لأ حيلبسهم غصب عنه ما على كيفو، خليه علي انا، أختك مسيطره وهمشيه مسطره

قلت ليها طيب

كملت في إختياراتها وانا سرحت مع نفسي..

عدت الأيام وناس البيت كانو مشغولين شديد في تجهيزات العرس، ترميم للبيت على غيره، وجات واحدة من خالاتها من البلد عشان تحبسها، وانا كنت م بين ضغط الشغل وبين إمتحانات سندس وضغطي عليها في القراية كنت بحاول اهيء ليها الجو على قدر م اقدر عشان بهمني جداً تجيب نتيجة كويسة وتقرأ جامعتها

يوم ونحن متجمعين بنتونس سندس جات نازلة قالت لي بي صرخة شهد انا تعبت من القراية، لافة شعرها كعكتين ولابشة شراباتها وجواربها..

خالتها قالت ليها تعالي حبيبتي، تعالي إشربي ليك جبنة إنتِ عروس قراية شنو، كدة كدة ماشة لراجلك وبيتك

قالت ليها دة كلامي انا زاتي والله شايفة ي شهد الناس الواعية بتفكر كيف

قلت ليها حتقري في بيتك ي عسل

قالت لا في بيتي حتفرغ لزوجي حبيبي قرة عيني قراية شنو كمان

رونق قالت ليها عاد شي عجيب شوف الشافعة؟ زوجي حبيبي كمان؟لكن عاد طارق يستاهل يتفرغو ليه سماحة ووجاهه ماشاءالله عاد ي خالتي سلوى ولدتي

خالتي سلوى ضحكت

رونق قالت لي اها ي شهد عملتي شنو في موضوع الشايب حقك م شايفاك فتحتي الموضوع تاني

قلت ليها لو في جديد إنتِ اول العارفين حتكوني م بفوت عليك شي ولا كيف؟

عمتي سميرة قالت ليها بعدين الملافظ سعد، شنو الشايب حقك دة شنو الإسلوب دة؟زول عمره 41 يعني م كبير لدرجة الشايب

قالت ليها بهظر ي عمتي سميره

قالت ليها معليش هظارك مسيخ لكن

صباح أول إمتحان شهادة لسندس شالتني نومة وصحيت مخلوعة لقيت الساعة 6، قمت بسرعة صحيتها سندس اصحي، الساعة 6، هي بطبيعتها نومها تقيل، عديت ربع ساعة وانا بحاول اصحيها، طلعت برة البيت لقيت رونق وعمتي سميرة، وخالتي سلوى وخالة سندس صاحين يتونسو، وخالتي سميرة مجهزة صينية شاي وبتقول ل خالتي سلوى هاك ودي ليهو الشاي

قلت ليهم صباح الخير

قالو لي صباح النور

قلت ليهم مالكم صاحين بدري كدة انا شالتني نومة

رونق قالت لي بنبره غريبه كدة بالله؟ سندس صحت ولا لأ؟

قلت ليها صحيتها بتجهز انا كمان حأمشي اجهز.

رونق قالت لي إستني

قلت ليها جايه

دخلت وبديت اجهز، وسندس كانت داخله ومارقة، انا جهزت وطلعت وهي لسة قلت ليها سندس يلا تعالي عشان تشربي الشاي

قالت لي م عايزة

عمتي سميرة جابت ليها عصير قالت ليها بدون نقاش يلا سريع إشربي وانا جهزت ليكم الفطور هاك ي شهد دي علبة الفطور م تخليها تدخل الامتحان بدون م تاكل

ونحن طالعين كانت عمتي سميرة ورونق ورانا، وعمتي سميرة بتوصي في سندس وبتقول ليها اقري يس، واقري دعاء لا سهل إلا ما جعلته سهلا كويس، واقري أيه الكرسي والمعوذتين، وركزي م تستعجلي في الإجابات..

لما وصلنا الجانب بتاع الحوش الكبير الفيه الحديقة، في جلسة الحديقة كانت قاعد ابوي، وشهاب، وخالتي سلوى، وفي زول رابع كان قاعد ومدينا ضهرو،

شهاب قال ليها الممتحنة اها جاهزة؟ الأعصاب كيف؟

فجأة الزول القاعد وقف على حيله وإتلفت علينا

طارق؟ قلت الكلمه دي مع نفسي وانا واقفه

سندس قالتها بصرخة وفرحة جيت متين؟

رونق قالت ليها المفاجأة الحتطير ام المعلومات خلاص، عشان كدة انا قلت نمهد ليها إنه جا

خالتو سلوى قالت ليها والله نحن زاتنا صحينا الساعة 5 ونص صباحاً بجيتو دي، م عارفين زاتو جا متين ولا عارفنو نازل وين

انا وهي الإتنين كنا شبه متسمرين في مكانا هي من الفرحة وانا مصدومة

قال ليها كيف؟سلمت عليه قالت ليه حمدلله على السلامة م كلمتني وهي بتضحك

قال ليها وحتتسمى مفاجأة كيف إذا إتكلمو بيها

قال لي السيدة شهد، إزيك ياخ إن شاءالله كويسة الأخبار شنو؟

مديت يدي وانا بجمع في اعصابي قلت ليه حمدلله على السلامة، انا تمام إنت كيفك؟

قال لي الحمدلله عال العال

اخر حاجه إتوقعتها إنه دة يكون في يوم شكل السلام م بينا لما يجي، على غير العادة دايما بكون في كواريك وجوطة من ناحيتي، ودايماً بتكون في لهفة كدة عليه، اول مرة احس بالتقيد في التعامل تجاهه، اول مره أحس إنه نحن م نحن

قال لسندس جاهزة ي شابة؟

قالت ليه للإمتحان؟يعني م شديد كدة

خالتي سلوى قالت لينا الساعة 7 مفروض تطلعو، عشان تلحق تشوف حجرتها ورقم جلوسها وكدة

قلت ليها فعلاً يلا ي سندس نطلع..

سندس كانت في عالم تاني تعاين ل طارق

إنتبهت إنه مفتاح العربية م في يدي، قلت ليها نسيت مفتاح العربية دقايق امشي اجيبو..

طارق قال لي انا معي عربية، خليها انا بوصلكم، مش جاهزين خلاص إنتو..

عمتي سميره قالت ليه هي ي ولدي متين جيت إنت إرتاح خلي شهد توصلها

رونق عملت ليها حركة بي يدها نظام اسكتي و قالت لي خلاص ي شهد الله ريحك مدام طارق قال حيوصلها ماف داعي تمشي إنتِ ولا شنو؟

سندس بقت تعاين لي..

قلت ليها تمام طيب فكرة برضو انا زاتي عندي شغل بسيط اخلصو وامشي عليها المدرسة...

طارق قال ليها طيب مفروض نطلع عشان م تتأخري؟

سندس قالت ليه اي يلا

بعد م طلعو رونق قالت لي عمتي سميرة إنتِ ي سميرة الولد عامل حبيب ورومانسي وجاي من السفر وعامل مفاجأة للبت جاي من 5 ونص مخصوص عشان عايز يوديها الإمتحان تقولي ليه م تتعب وإرتاح؟

عمتي سميرة قالت ليها وانا شن عرفني إنه قاصد

قالت ليها عاد لكن،

وقالت لي شفتي ي شهد اسمعيها مني وم تقبلي بأقل من واحد يخلي كل شغله الفي يدو ويجي من دولة لدولة عشانك، حقيقي حركتو جنتل شديد، انا شهاب اخوك قمة الرومانسية عنده إنه يعزمني في مطعم، طارق السرور يا يمة، شفتي السماحة دي كيف؟شفتي الولد دة نضيف وملمع كيف و...الخ

كانت بتتكلم وانا رغم إني ماشة معاها في نفس الخط بس م كنت مستوعبة هي بتقول في شنو، وهي لسة مُصرة إنها تتكلم، لغاية م دخلت غرفتي ولقيت دموعي جارية تلقائيا...ً

كل شيء بيجي على قدر الحُب

الزعل بيجي على قدر الحُب، العَتب، الحزن، الغضب

و حتى الكره، بيجي على قدر الحُب!

ومافي أقسى من الكره بعد الحُب لأنه مابيجي بسهولة، بيجي بعد عناء، محاولات و تبريرات عديدة

بيجي بقسوة مرعبة و بهيئة قريبة من الإشمئزاز، الإشمئزاز اللي قادر يمحي كل لحظة حلوة بسهولة...

بنات صباح الخير

اسفة والله، امبارح الجمعة كهربتنا قاطعة من الصباح ولابتوبي قافل، جات متأخرة والجمعة يوم ضيق حاولت على قدر م اقدر اظبطها بالليل وم ظبطت، وهسي تاني قطعت