الجزء 4

محي الدين عندو جواهو حاجه حلوة كدة تجاه سلوان . يعني من يسمع اسمها بتجيهو هزززة كدة في روحو .. بحس الدم دة جري في عروقو باااارد ... سلوان جاتو في العزيزة .. خصوصا انو زول مابحب حركات البنات ودلعم .. معذب نيروز وناريز ومراقبم في تحركاتم ..

نرجع المطبخ ...

نيروز : احي انا جا المسنوح المُر دة خلاص لابقدر اتكلم تلفون لابقدر اطلع ساااي طله للشارع اكب موية غسيل ...

سلوان : وهي مراقبة القهوة ماتفور وتتكشح وغازة يديها في جمباتا ... جنيتي يانيزو ولا شنو بتتكلمي براك وتكسري في العدة ..

نيروز : قربت اجن لانو محي الدين دة جا خلاص ..

سلوان : ومايجي محي الدين مالك . عشان وشك دة يطفش من البيت ولا كيف ..

نيروز : اريتك تضوقي حكم الاخو المتعقد ..

سلوان : انتي يامتخلفه بتسمي دة تعقد .. دة اسمو غيرة علي الاخت .. والماعندو كبير يشتري كبير .. وانتي يانيزو وحات الله لو ما محي الدين دة كان بقيتي رقاصه ..

نيروز : اسكتي اسكتي زحي كدة نسخن العدس دة ..

سلوان : كدة خلي العدس رصي العدة دي في مكانا . وعلب البهارات دي رجعي كل وحدة محلها .. شنو انتي مكركبة المحل كدة ..

محي الدين رجع رقد في السرير المقابل لامو وبحكي ليها عن المشوار والبيت النزل فيهو واكرموهو كيف ..

جات سلوان شايله صينية القهوة .. الفناجين دي تلمع لمعان زي البرق تضرب في عينك ... والقهوة دخانا يتلألأ زي بخور الفكي ...

اتفاجأت سلوان بوجود محي الدين .. وهي شايله الصينيه دنقرت وردت السلام بروح رااايقه وبريئه .. سلام محي الدين كيفك ..

محي الدين : قام في همة وانبساط ومسك الصينيه من سلوان ... مرحب سلوان ازيك ..

سلوان عايزة ترجع المطبخ .. نادتا سعديه ..

سعديه : تعالي ياسلوان ماتخجلي من محي ولدي .. تعالي اشربي معاي القهوة ..

رجعت سلوان وقعدت علي ركبا في الارض وقعدت تصب القهوة في الكبابي ... وحتي وهي بتسوط السكر بهداااوة ...

محي الدين يعاين في تلفونو ويرفع عينو يعاين لسلوان .. لاحظت ليهو امو سعديه ..

سعديه : صلحت قعدتا في طرف السرير وبقت تضحك للسن الاخير .. فهمت محي الدين .. خصوصا انو محي الدين ماعندو في الفارغه ..

نيروز : انا بس خلوني جوة المطبخ دة اغسل اطبخ اغسل اطبخ ... حتي ماعزمتوني للقهوة ..

سلوان : تعالي شيلي نصيبك ديمة عليك شكايه ونقناقه ..

محي الدين : شرب القهوة وهو عيونو مرة مرة تسرق النظرات تجاه سلوان ..

قام محي الدين ودخل الغرفه .. قامت وراهو امو سعديه ودخلت لقتو بوصل تلفونو في الشاحن .. واظن الكوبس وسيع والشاحن ماواصلاهو كهربه وهو بحاول فيهو ...

سعديه : محي الدين ولدي البشارة في عيونك واضحة زي هلال العيد ..

محي : اتلفت علي امو وعمل نفسو مافاهم ... اي يمة بديك قروش الصندوق العندي ماببخل عليك بيهو ...

سعديه : ياولد ماتستهبل علي ... انا بقصد سلوان ..

محي : يقفل رمز التلفون ويفتح .. مارد وشويه شويه بقي يبتسم .. غلبتو البسمة كلو كلو أبت تدسا ...

سعديه : هيييي ياولد البت خطابا كتار وبكرة خشمك يبقي ملح ..

محي : يمة انا عندي شنو اعرس بيهو .. العندي مابكفي بيت وشيله وعفش ..

سعديه : كدة انت قول خير وانا بدبر ليكم بعد ربنا اموركم .. انت وعلا عرسكم يكون واااحد ...

محي : لالا يمة انا براي بعمل عرسي .. شان بكرة علا يقول لي عرست ليك بحقي .. اي يمة انا داير سلوان وماحصل وضحت ليها بس لو بتصبر لي شويه كدة بتم واعرس

سعديه : انا بتم ليك الناقص .. خلي علي اقسم ليك الجزو الشمالي ده واصينو ليك وانت عرس بالقريشات العندك .. ومن اليلا تاني ماتديني قرش .. وحضنتو وباستو في راسو .. ان شاء الله اشوف عرسك وجناك ياحشايا ...

سلوان ظبطت الفطور فتة عدس وشطة دكوة وسلطه نااااعمه زي اصابعيها ...

وندهت لسعديه تنادي محي وتجي ..

قعدو في الصينيه وسلوان تشيل لقمتا صغيرا وتاكل موهطة يدها في حجرها ..

سعديه : سلوان بتي رايك شنو لو جيتي بيتي ده ...

نيروز : وخشمها ملان اكل .. اهي مرزوعه وكل يوم بتجي مرزوعه تجي كيف تاني ..

محي الدين بقي يحك راسو وقالباهو اللقمة والشطه شرقتو .. مدت ليهو امو كباية المويه قالت ليهو . قول بسم الله 😉😉

سلوان : ياخالتي لو دايراني اجيك كل دقيقه بجيكي انتي أامري بس ...

سعديه : انا قصدي تجيني جية خير . بالصراحة ياسلوان انا مابفوتك من ايدي .. انا دايراك لمحي ده ...

طوالي محي اتنفض وقام مشي وهو مبتسم وغسل ايدو في الوضايه واتسحب جيهة الاوضه ..

سلوان : عاينت كدة وكدة ودنقرت وسدت خشمها باطاراف يدها خجلانه ..

نيروز : سجمك يالبايرة عايزة تتفكي قبلي ... ولا اقول ليك احسن عرسي وزحيهو مننا المتعقد دة .. وعاينت جهة الغرفه وتفلت عليهو ..

سلوان اكتفت بالسكوت وسعديه تضحك وقالت يايمة سعديه سعيده بيك والله حبيبتي .. ايووووووي ايوووي ..

سلوان بقت تضحك بهدوء

نيروز : مواصله تاكل وترقص باكتافا .. وتغمز لسلوان ..

بجانب ناريز في الجامعه ...

ناريز : يا مدثر ماممكن كل يوم ناطي لي في الجامعه كدة .. عايز شنو انت ماتكرهني ..

مدثر : بحبك ياناريز ومشتاق ليك ارح نقعد في الكافتريا دي انا عازمك ..

ناريز : لالا انا دكيت المحاضرة الاولي مابقدر افوت التانيه ..

مدثر : يعني ياناريز انا خليت شغلي وجيتك من اخر الدنيا عشان تتدلعي لي كدة .. مامشكله ياناريز .. ومدا ليها ظرف ومشي طلع ..

فتحت ناريز الظرف لقتو 600 ج 😨😨😨😨 جرت ناريز علي الباب وعاينت جاي وجاي لقت مدثر ركب المواصلات خلاص ... آشرت ليهو بيدها انا اسفه وهي بتضحك 🙏🙏🙏

دخلت ناريز الجامعه ومشت الكفتريا وكان فيها طربيزة بلياردو وبلعب حوليها شباب ومن ضمنهم زول كدة هاي كلاس .. الشكه والساعه والقطعيه والقندفه .. وبيلعب في البلياردو ..

قامت ناريز ومشت شالت استيكة البلياردو السهم وبدت تلعب في تجاه الشاب الوسيم ....

لاحظ ليها الشاب وبدو يتبادلو الابتسامات والنظرات والحركات ..

طبعا ناريز عرفت تصطادو كيف .. طلعت وهي بتتدلع في مشيها ولحقا الشاب ..

يااخت يااخت لحظة لو سمحتي ..

ناريز اتلفتت واشرت علي نفسها .. ‏( انا ‏)

الشاب ايوة .. معاكي منصور .. ممكن اتعرف بيك ..

ناريز : تسلم وانا ناريز ..

ودخل منصور عالم ناريز .. كان بالنسبه ليها صفقه رابحة من جهة المال والجاه ... ونفس الوقت ادتو رقما ..