الجزء 26

فتحي قلبو دة قرب يقيف .. والمنظر بقي ليهو حلم او كابوس ... والاولاد ورأفت واقفين يتفرجو ..

فتحي قعد في طرف السرير ... ويتلفت ويعاين .. مفتكر نفسو حلمان وحيصحي .. لكن لا لقاهو واقع ...

قام ماش علي هاله .. هاله صرخت في وشو ..

هاله : انا بكرهك اوعا تجي جمبي .. اوعي تهبشني .. انت اصلا ماراجل .. لو راجل ماكان خليت البتحبك واتزوجت البتكرهك ... واهو دة حبيبي وقال حيتزوجني ..

فتحي رأفت مسكو لانو وصل لدرجة الغليان ..

نط الولد البتجيهو هاله وقال : هوي هوي حبيب منو انا ... لاحبيبك لاكنت حبيبك .. براااك قعد تجيني . وانافاضي وماعندي شي .. واظن كلكم ياالواقفين ان لقيتو فرص زي دي مابتفوتوها ..

فتحي : اناماعايز اي كلام معاك انت ... كلامي معاكي انتي الجيتيهو لحد بيتو .. ومابتكلم معاك الا بالقانون عشان اثبت رجالتي ليكي .. وحسي اهم ديل شهود .. وتلفوني دة شاهد .. طلع تلفونو وجييييك صور الولد وهاله ...

وحافتح فيك قضيتين .. زنا محصنات ... وقذف علي اني ماراجل .. تتعاقبي وتترجمي ...

هاله بدت تصرخ بصوت عالي وتكورك .. وتشتم ..

فتحي طلع خلاها ورجع المستشفي لامو ولقي امو راقدةبين نايمة وصاحيه .. . جري ختي راسو في حضنها ويبكي ..

امو : كر علي ولدي مالك .. براي عيانه ماتزيد علي ..

فتحي : هاله ياامي طلعت وسخه .. وحصل كيت كيت كيت .. وطلوعي ده لانو دق لي رأفت ومشيت شفت بعيني .. وجيتي الخرطوم لحكمة من الله ...

امو : عارف يافتحي انا ماحبيت اقول ليك سبب مرضي دة هاله .. هاله اتكلمت معاي باسلوب حار وفع الضغط والسكري .. حقك علي ياولدي انا الاصريت تتزوجا ... وبقت تبكي وفتحي يبكي ...

بعد شويه نسيب فتحي الهوا خالو اتصل علي فتحي وبدا يشتم فيهو .. انو هو ليه ضرب هاله لحد ماحجزوهو اصحابو ..

فتحي مارد ولاكلمه علي الشتم .. وقال شكرا ياخال .. بكرة القانون بثبت ليك الواقع ...

فتحي بعد امو طلعت البيت طوالي مشي فتح البلاغين .. والقضيه ماشه ...

صفيه بقت ابليس نسمة وتملاها ... حودة بمشي بيت نانا وشفتو بعيني البياكلا الدود دي .. وووو . ووووتأليفات وكلام خمج .. نسمة دي زي غلاي المويه البفور داك وطق يقفل .. قفلت قفله وحدة واتصلت بنانا وورتا تجيها بكرة في بيتا وحودة بكون قاعد الصباح ..

نانا الصباح لبست وطلعت ومشت بيت نسمة وحودة ودقت الباب ..

طبعا صفيه رحلت سريرة في الحوش عشان تتصنت الحاصل في بيت نسمة ... واول ماسمعت صوت نانا في بيت نسمة . طوالي وقفت استعداد اكشن وبقت تعاين بفتحة الحيطة الكان بتوصل بيها الخرطوش لنسمة مرات ...

نانا : اها جيتك يانسمة وعايزة اعمل ليكي الدايراهو .. والبريحك وانا تحت امرك ..

نسمة : اولا اتفضلي في البرندة دي ونتفاهم ..

حودة حسي بيجي ... عارفه انا بيتي علي وشك الانهيار ... وانتي السبب .

نانا : عليم الله انا بقبت ماعندي صله بحودة .. بس لازم تصبري علي حودة انو انسان لهوي ونسونجي شويه .. يعني انتي حلوة وعندك اطفال ومرتبه اكيد ماحيتزوج زي ماقلتي الزينا ديل الفي نظرك ..

نسمه : تمام 😒😒 اها تشربي معاي قهوة ?

نانا : اكيد يانسومة وخلي البينا عامر .. وانا والله اكون معاك اخت وصحبه واستشيرني في اي حاجه عايزاها ... ودخلو البرندة

نسمه دخلت جوة وجابت القهوة ... كبايتين .. وقعدت ..

نانا قلبها اكلا واصلا مارفعت كباية القهوة عليها .. تعاين لنسمة وتعاين للكبايه .. ومااطمأنت .. وقالت : اها عن اذنك يانسمة انا ماشه وامي عندها فحص اليلا ..

. ونسمه ماشه كدة طلعت في الحوش ..

بهناك صفيه مازالت لاصقه في الحفرة وعينا تضرب زي لمبة اللوري ...

جات نسمة من وري نانا وشايله حديدة تقيله وعايزة تضرب نانا ... صفيه صرخت ووووب علينا ...

نانا اتلفتت تشوف الصوت ده شنو لقت نسمة رافعه الحديدة وجايه عليها ..

نانا زحت بسرعه كدة من تجاه نسمه ..

نسمة حمولتا كلها في الحديدة . وجات وااقعه في الارض والحديدة وقعت فيها بجمبة كتفها وراسا ..

نانا بدت تصرخ ونسمه تصرخ والاطفال يصرخو .. وصفيه جرت دخلت الحمام حقها وقفلت نفسها وطلعت تاني شالت المقشه ومسحت الأتر من جمب الحيطه عشان مايطلبوها شاهد .. ورجعت قفلت الحمام ...

نانا تكورك وماسكة نسمه لامن جا ولد الجيران داخل .. مخلوع ووراها كم راجل ومرة

نسمة : امسكوها المجرمة عايزة تقتلني .. ضربتني بالحديدة ... وعملت نفسها اغمي عليها وتشخر وتفرفر ..

نانا قامت عايزة تجري .. حاوطوها الرجال وقبضوها وضربو للاسعاف وللشرطه ...

نانا وصلت المركز وهي بتبكي وتتحسبن ...

وبهناك نسمة في المستشفي فحوصات ودربات .. والحله مقلوبه فوق تحت .. حودة سمع ومشي لنسمة .. ومامصدق الحاصل .. ويمشي ويجي .. ويسال في الشفع الحاصل شنو ماف طفل قادر يتكلم ...

نانا بدا الاستجواب معاها .. وحكت انو نسمة طلبتا تجي البيت وكيت كيت كيت ...

قفلو نانا في الحراسه لحد مايحققو مع نسمة ...

في الحراسه في كم عسكري من ضمنهم ولد كدة ملائكي . انسان محترم وعفيف خلاص ...

سايق نانا .. ونانا بتبكي ...

قال ليها والله انك مظلومة .. البجو هنا ماشكل وشهم زيك ومابهمهم شي وعادي بجو كتير وعادي بظهر فيهم الاجرام .. حسي انتي اهلك وين عشان انا اجيبم ليك ..

نانا : انا ابوي ميت وامي مريضه ومابتتحرك وبتكون راجياني .. ومامعاي زول في البلد دي .. بس اديني تلفون .. انا تلفوني اظن اتسرق مع الزحمة ولمة الناس ...

العسكري اداها التلفون .. اتصلت علي نيروز .. نيروز سمعت بالحصل وماعرفت تعمل شنو وتبكي مع نانا في التلفون ..

نيروز اتصلت بأبو سلوان وابو نسرين وبمحي اخوها وابوها وقالت يصلو نانا المركز .. كلهم اتلمو وجو المركز ...

الضابط ابا يتفاهم معاهم وقال نسمة في حالة موت وماف اي تفاهم لحد مايحققو تمام ...

العسكري قال لنانا .. انا ورديتي كانت حتخلص اليلا .. ولحظك في عسكري طالب اجازة وعايز زول يسد ليهو ... انا حامسك مكانو وحاحرسك عشان ماتخافي .. المحل هنا خطر ...

نانا اطمنت للولد ورقدت في المصطبه جوة الحراسه وتبكي ..

نيروز وناريز مشو لام نانا وراعوها وفهموها براحه بالحاصل ...

تم الاستجواب مع نسمه وقالت الاتي :

نانا بتشتمني لانها عايزة تتزوج راجلي ... وجاتني البيت وقالت عايزة تشرب معاي قهوة .. جبتها ليها . . استغفلتني وطلبت مويه مسافة اجيبا .. ختت لي سم في القهوة ... لما انا كشفتها وعرفت انو هي ختت سم لانو ولدي الصغييير قال المرة دي كبت حاجه في الجبنة .. انا ابيت اشرب .. هجمت علي بالحديدة وضربتني وعايزة تشرد رجال الحي قبضوها .. وبين كل كلمة وكلمة تشهق وتعمل مغمضه وترجع تتكلم ..

جات نتيجة الفحوصات انو ماف اي ضرر في الراس ولا الجسم ...