الجزء 7

اها محي ركب دفارو وداس بنزين بالفرح .. وبقي يدق الصفارة حقت البص الحنيييييينه ديك ... بقي يعزف اغنية ‏( يااااالداقوي ارجع لي ‏) والسديري ده هباااابه كدي بنسيم الشباك ... والدفار دة طبلونو مزين قطيف كدة وخرز ونجف يعلم الله يفتح النفس ويخليك تشحن بضايعك لو كرتونة وشوال عشرة كيلو بس .. واها بالجمبات كدي لمبات حمره وخضره وصفرة .. وقت يكون باليل في شارع السفر ينووور زي برج ايفل ‏( صليت علي النبي الف مرة ‏)

سعديه جرت جوة بقت تعد قريشاتا .. وطلعت ليها خمسينايه كدة علي جمبه وصرتن في طرف توبا وطلعت علي البنات ... بخطوات حنينه مسرعه مبتهجه ... لامن شبشبا يسوي طق طرق ...

سعديه : هي ياخاملات بكرة اجيب ستكن ياالشحمانات .. حسي شوفن برندة الزنك دي من فرشتو فيها ملايات المخمل الزرقه دي ماغيرتوها ... اي اسمها ملايات المرة الخرقه .. اياها الزيكن كدي ..

وبقت تفتش خمارا الاحمر الطقم التوب اللون زينب وسلطه الوان كدة اغلبا احمر ‏( قشرة ياحجه ‏)

نيروز : يمة مالك عايزانا نشمها ونحردا من حسي ..

سعديه : اسكتي يالفاجر .. حسك الذي حس النفير دة ... ودة شنو الفي وشك دة ... كستر صح .. حسي لو نجضتي لينا ماكان احسن ...

نيروز : بقت تغني وهي شايله المرايه وتنفخ اللبانه قدر جضوما وطق تفكها ..

سعديه : دة شنو صوت الاكياس دة ..

نيروز : مدت رجولا لبرة وبقت تهز فيهن ... ديل يمة اسمهن اكياااس البقر .. بنضفن الجسم عجيبه لكن يمه ..

سعديه : الله يقرفك يالعولاقه ديل البولدو بيهن البهايم .... ولشنو تنضفي جسمك .. رقادك ده براااهو نضافه جسم ..

نيروز : بجهز لعرس محي الدين 🚺🚺

سعديه : هي العروس لسه ماخطبوها ولسه ماحبسوها .. الحبسه الليك شنو يالخفيفه .. اسكتي انا ماشه ليهن حسي دي والله يسهل ويتمو علي خير ... وطق طرق طلعت مشت

ناريز جوة بتتكلم بتلفون ربيكا كدة ملفوف بباندة شعر صغيرة كانت خاتاهو احتياط لاي شريحة زيادة .....

ناريز : بنبرة دلعااانه كدة وفيها ترقيق للحروف وبعضها تفخيم وبعضها مبتورة النقاط ..

ازيك منسووور .. معليش تلفوني اتسرق مني في المواسلاااات وهسع شغاله بحق ماما تلفون تعباااان كدة

منصور : كفارة الجاتك في مالك سامحتك ياعسل ... بكرة الحاضر دة بسلمك جوال جديد في الجامعه .. اوكي ..

ناريز : تبعآ اليومين دي مشغولين بختوبة اخوي وكدة وماملحقة ده من دة والجٍامعه واااااي فتر شديد خلاس .. ‏( فتح اضنيك الكلام ليك جهز الكاش موني ‏)

منصور : اها جهزتي حالك ولا لسه ‏( احساس فنيط ‏)

ناريز : بقت ترقص براسا ... الله ياريت العندنا كلو في تجهيزات موحي .. يلا بكرة تتحلا الله كريم‏( في ثانيه قلبت من حنكشه للاخت المؤمنه ‏)

منصور : اوكي بكرة نتلاقي في المقهي الرياضي في الجامعه لما اصل بتصل عليكي ..

باي ... باي .. توت توت ...

طلعت ناريز الحوش وعيونا طششن بضوء الشمس .. اصلا من جات اتحشرت جوة ماطلعت رااحات بس .. اها بقت تحك في شعرا كدة وتفكر وهي بتضحك .. تررررن اتصل عليها مدثر ...

مدثر : ياناريز لا اله الا الله

ناريز : محمد رسول الله اها في شنووووو

مدثر : بتصل عليكي وتلفونك مغلق لشنو والصباح فاتح ومابتردي ..

ناريز : يابني ادم مابتفهم انا شغاله بتلفون امي وماعندي تلفون اوووف منك ياخ ومن شكوكك‏( طبعا ناريز عامله تحويل مكالمة لرقم سوداني قديم كدة راح منها . يعني تحويل اثناء الانشغال .. يعني لما تتصل عليها وهي مشغوله بمشي في الرقم المغلق داك وبديك مغلق .. حككككممم ‏)

البعرفو انو الزول القصير ياحكمه يافتنه .. اها دي طويله نسميها شنووو ?

ماعلينا .. كدة ارح ندي نانا الدانا طله . ...

نانا الدانا مقشقشه البيت وزرات الرمله الفي الحوش دي تلمع تسوي كدي 👋 مع الشمس ..

والعدة دي ترقش المونيوم لاااامع ... والملايات دي مابتقدر تفر لانها مشدودة تماااام ....

اها مركبه ليها حلة سليقة في البوتجاز .. والبوتجاز دة فارشه فيهو ورق المونيوم كل ما حاجه تتكبه تطلع الورق وتغيرو ...

امها رااقدة في الغرفه ونايمة والرادي شغال في اذاعة البيت السوداني ‏( اعلان عدس الوابل .. وشويه ابو السيد يغني فاصل .. ودعاية شاي الغزالتين كل شوي ينطط .. ‏) .. وطربيزة الدوا دي والله انضف من رفوف الصيدليه ال بقزاز ...

نانا قااعدة تغسل وخاته الطشت في لستك عربيه قديم كدة وقاعدة في البمبر .. ماخدة وضع نانسي عجرم اه ونص ... وشعرا البوب دة يعزبا مرة في الرغوة ومرة جم عيونا ..

رفعت يدها ربطت شعرا لافوق .. باب الشارع دقا ..🚪🚪..

قامت نانا ولبست توب قريب عليها وبقت تمسح الصابون من يدها ..

فتحت الباب ووقفت بوراهو ..

نانا : مرحب حبابك جدو كيفك ..

جدو دة ود عمها واحد صعيليييق كدة ... عاجباااهو نفسو يشبه الاشيقر التركي كدة لكن علي سوداني ..

جدو : ماف اتفضل ولا شنو يانانا ..

نانا : خش خش البيت بيتك ود عمي ..

جدو دخل وشايل في ايدو كيس .

نانا دخلت الراكوبه العاملاها مطبخ وجابت بمبر وختتو لجدو اتفضل اقعد ود عمي ..

ودخلت المطبخ وركبت القهوة في النار .. وجات شايله صحن قزاز راااقي كدة فيهو قزقز وفول سوداني .. وجابت الطربيزة جم جدو ..

وجابت الهون وقعدت جم جدو تدق في البن ..

جدو دة يسرررح فيها ووشو محمر بالشمس الواصله ليهو جزو منها ... طلع سجارة ولعا وبقي يعاين في نانا ..

نانا : مدنقره وبتسالو امك واخواتك كيف اخبارم .. ومن جوة صحت ام نانا وكوركت لنانا .. الجا منو يانانا ..

نانا : دة جدو يمة ..

جدو مشي سلم عليها واخد معاها صنه وعينو تجاااه الراكوبه دخلت فيها نانا تسوي القهوة ..

جدو قام وجا علي الراكوبه ونانا مامنتبهه ليهو ..

جدو جا ووقف وحاصر نانا وايديهو علي خيزران الراكوبه التقيييله وعبارة عن عمود .. بدا يعاين فيها من فوق لتحت ..

نانا قفلت النار ورمت المعلقه من ايدا .. واتنفرت كدة شديد ..

جدو : نانا انا الماعاجبك فيني شنو .. ولد وجيه زي دة برفضوهو .. بنات ام در والخرطوم بحبو وراي حبيان عجيب الا انتي ياروحي ليه .. لو عايزة لبن الطير بجيبو ليكي ..

نانا دفرتو بكل قوتا لاااامن جدو دة طلع برة الراكوبه . ورجعت نانا جرتو من قميصو ورمتو في عنقريب العدة الجوة الراكوبه .. ومسكتو من ايدو ولفت ايدو دي بطريقة صينيه كدة ..

نانا : اسمع ياجدو انا مامعاي راجل ولا ولد مامعناها انا بكون هشه وساهله وبتكسر ليك ... وكيسك الجايبو دة شيلو و القهوة لو عايز تشربا اشربا بادبك وقوم فرتق سرعه من هنا ... والا قسم بالله اكسر ايدك الوسخة دي يا عربيد ..

جدو دة اتنفض كدة واداها حمممممرة عين كدة وطلع ووقف جمب الباب وضرب الباب بونيه وسداهو بقوة شديدة وركب الموتر وفات ... ‏( الله لاجاب عقابك ‏) ..

نانا : ود امو المجرم التافه .. ريحتك كلها نساوين وسجاير ... شوف الاحمر الصعلوق دة اعمل بسماحتك شنو انا ياوسخ يا مجرم ... وخاتا يديها كدة علي جمباتا والنفس دة لامن طالع بعيونه

امها : جدو فات يانانا ..

نانا : اي يمة ... الفوته البدون رجعه ان شاء الله ..

ورجعت تغسل ومخنوقه ... ارضت نفسها انها كانت قويه لتفاهة جدو وعيونو الشر ..