الجزء 5

مدثر بحب ناريز شديد بس ناريز مامكتفيه بيهو .. عندها علاقات متعددة وكلها لمصلحة ..

ناريز رجعت البيت دخلت المطبخ بتفتش في حاجه تاكلا اتصل عليها منصور الشاب الوجيه الجلابي ... بتتكلم معاهو وهي بتفتح في الحلل وتفتش اكل .. ومغيرة نبرة صوتا خالص .. ماعندها معلومة بوصول محي الدين اخوها ..

دخل محي الدين وطوالي جراها من طرحتا والتلفون وقع صرخت ناريز لانها اتهجمت ووقفت مجمدة في مكانا .

محي : انتي ماحتسيبي قلة ادبك دي . خسارة فيك دم قلبنا الطافحنو عشانك .. محي الدين فكفك التلفون ورماهو في الارض وجاب ايد الهون وقعد كسرو حتة حتة .. الشريحة واقعه جمب امبوبة الغاز ..

جات جاريه نيروز وامها وبدو يهدو في محي بعد ماضرب ناريز ..

نيروز عينا وقعت علي الشريحه براااحه بطرف اصبع رجلها دخلت الشريحة تحت الامبوبه .. رفعت ناريز من الارض ودخلتا الغرفه ..

نيروز : المفروض ياحمارة انتي تتاكدي من وجود المتعقد دة وتتكلمي ..

ناريز : قومي من جمبي سريع يانيروز ماتزيدني عليك الله ماناقصاك انا .. قووومي ياخ الله ياخدني ويريحني منكم .. وجرت الملايه واتغطت ..

جا داخل محي ووراهو امه سعديه ..

محي : اسمعو هنا انتو الاتنين مسخرة وكلام فاضي ماعايزو في البيت دة لحد ماتتزوجو وتطلعو

نيروز : انت .... وقبل تتم كلاما جات عليها امها وقالت ليها : اسكتي انتي ياسليطه واقفلي خشمك ... خلاص يامحي حصل خير هدي بالك وتعال امشي معاي نفحص السكري انا من امس حاسة بفتور شديد ..

طلعو محي وامه سعديه ..

نيروز : هي بطلي عباطه وتخلف اهو محي حيعرس ونرتاح منو زاتو .. ناخد راحتنا ..

ناريز : فتحت الملايه من وشها وهي بتبكي .. ودي منو البتعرس الكريه ده الا ان كان بايرة

نيروز : ياحليلك انتي .. سلوان يختي الحتكون عروستو اذا اهلا وافقو ..

ناريز : قامت قعدت علي حيلا .. كيف يعني .. ومن بتين دة .. اخر من يعلم انا .. والله خسارة فيهو ..

نيروز : كدة خلي كلام الحرقه والغضب دة وقولي لي مدثر وينو مابتجيبي سيرتو .. ودة منو الكتتي خالطاهو ..

ناريز : هي هي يامتخلفه ماتصاحبيني .. انا جنيت احكي ليكي يافتانه انتي .. بكرة اقل نقاش معاكي تشتميني بيهو جمب امي .. ورجعت اتغطت ..

نيروز : قامت وهي بتصفق بايدا 👏👏 اسم الله عليكي يا الحافظة اسراري .. انتي زاااتك بتستقليني وتطعني بي قدام امي .. واها اوريك شريحتك معاي .. لكن ان طرتي السما مابديها ليكي اتفووو عليكي وتستاهلي محي يكتلك زاتو .. وطلعت ولسه تردح

ناريز : قامت وجرت مسكتا .. عليكي الله اديها لي بديك كرت اريبا بجنيهين ..

نيروز : جنيهين ياجعانه .. انا حسي شفت شنتطك لقيت فيها خمسينات سااااي بقرة ورا بقرا .. وغيرة بقرة مابديك شريحتك ..

ناريز : هي طيري من جمبي .. بكرة بطلع وحدة جديدة بخمسه جنيه وانتهي البيان ..

نيروز : هاهاهاها لما اديك الجنسيه حقتي ابقي امشي .. نسيتي شريحتك باسمي ... وده غير الارقام الانتي حاشراها في الشريحة حتضيع منك .. اها بقرة ولا كيف 🙅🙅🙅

ناريز : انتي اشطر من المافيا ... اي اصطادي في المويه العكرة واستقليني كدة ..

نجي بجانب ...

سلمي وتوسل 👏🎉🎆🎊..

ديل اخوات ساكنين في الحله البين نيروز ونانا وصديقات نانا ونيروز وسلوان .. بتلمهم دايما المناسبات و الاعياد ..

امهم النوع البولد ماشاء الله ورا بعض يعني بين طفل وطفل ماف فارق سن كتير .. البيت ملان ماشاءالله . وحسي الام حامل تاني ... سلمي اكبر من توسل .. سلمي اتخرجت وتوسل لسه بتقرا .. ابوهم شغال اعمال حرة يوم كدة ويوم كدة زول مسكين شديد .. سلمي دي شويه كدة مسكينه بس توسل شدييييدة ومفتتتحه ..

سلمي : حسي ياتوسل لاخدمة لاشغله بس ترقدي وموصله سماعة البلوتث وشغاله بتلفونين والشفع جعانين كدة ..

توسل : عايزاني اعمل شنو يعني .. انضف بجاي واخوانك ديل ماخالين علبة صلصه ولا سفنجة مقطوعه في الشارع ماجابوها في الحوش ..

سلمي : قومي اعملي سلطة اسود بزبادي انا ماشه اجيب حاجات من الدكان ..

توسل : زيت ماف وتوم ماف اها والسلطه غير ديل مابتتعمل ..

سلمي : بجيبم انا دي قومي ياخ امي تعبانه مع حمودي اخوي عندو حمه ..

مشت سلمي علي البقاله الجمب بيتم صاحب البقاله اسمو سيد ..

سلمي : كيفك سيد اديني رطل زيت وتوم وكيسين عيش ورطلين سكر وكيس لبن بودرة وصابونه ..

سيد : اها وينن قريشاتك ..

سلمي : الله كريم بس اكتبن في الدفتر ..

سيد : اها مااتكلمتي لي مع توسل اختك اني عايز اتزوجا ..

سلمي : سيد انت عندك اطفال وزوجة منتظرنك في البلد الناقصك شنو تتزوج ..

سيد : مرتي بطلقا

سلمي : لالالالا كيف يعني حرام عليك والشفع زنبهم شنو .. وبعدين والله ماببني سعادة اختي فوق خراب انسانه مسكينه .. ربنا مابرضي الظلم .. وشالت الحاجات ودخلت ..

سلمي دي عندها زول بحبها شديد ولما جا يتقدم ليها ام الولد دة مفتريه شديد ماعجبتا ظروف سلمي وبيتم .. فما كانت موافقه بيها .. ولكن الولد خطبا وسافر الشماليه يشتغل في شغل مع خالو ..

اها سلمي دي كل يوم راجيه خطيبا ده يجهز للعرس وكل يوم بتواجه انتقادات من اهل الحي انو ام الولد ماعايزاها ..

دخلت سلمي البيت وهي بتقلع التوب .. ياامي سيد دة ماطبيعي من اخش الدكان يكرهني بتوسل ..

توسل : منو منو سيد اب سنون صفر .. يحلم والله كدة يفتح خشمو ده تاني ..

سلمي : لمي خشمك عليك ماف دكان غيرو بسلفنا احتياجاتنا ... ياود يا ابراهيم انزل من الحيطه دي بجيك بالسير حسي ادقك .. ودخلت المطبخ وهي وتوسل بعملو الغدا ..

بجهزو الغدا علي سندوتشات لانو ماشاء الله مامكن يكفيهم في الصينيه وبتطلع حق ابوها بعيد ..

توسل بتتكلم بالتلفون ... وكانت مربطه مع راجل شايب كبير تاجر مواشي ..

توسل : دقيقه ياسلمي تمي الغدا دا انا جايه سلمان ‏( تاجر المواشي ‏) قال قرب علي البيت ..

طلعت توسل ووقفت جمب الباب وهي لابسه توب امها .. توسل دي صفراااااء كدة علي وردي ...

سيد لما شافا طلع ينفض ايدو وواقف قصادا يتبسم ..

توسل : اجي يا دة .. مالو اب سفه ده يتهابل كدة .. يخسييي السديري زي باب اللوري المصدي ... بتتكلم وهي مكشرة تعاين ليهو وتلوي خشمها براحه ..

واثناء مابتتكلم وقفت عربيه برادو بيييييضه لامن باب الدكان ظاااهر في قزاز العربيه ..

نزل سلمان وكان رجل في الاربعينات .. سلم علي توسل ودخل البيت ..

سيد مدهوش ورجع وقف في الدكان ويضرب اخماس في اسداس .. اصلا هو زول نواياهو كعبه شديد وبتاع فتن وقوالات ..